🌸ولدتني_عاهرة 23🌸
نزلت من سيارته .. و كأني كنت بين الواقع و الحلم .. بين الحقيقه و الخيال .. خشيت الحوش لقيت إيمان و أمل مع منار .. أمل كانت تاخد في حاجات تجهز لعرسها .. اتصلت بي نزار نطمن عليه .. قالي مزال ما ركبناش البحر .. قتله آمته ؟ قالي انا بروحي ما نعرفش لكن كان قعد البحر هايج بنروح و نرجع المدة الجايه .. قالي في حد عندكم ؟ قتله منار و بنات عمتك .. قالي اعطيني نكلمها .. اعطيت التليفون لي منار و خشيت نغير ملابسي .. ما عنديش مزاج نهدرز او نقعمز مع حد .. في المواقف هادي نبي فراشي بس .. جتني منار اعطتني تليفوني و قتلي في رقم خش انتضار .. شفت تليفوني لقيته باعتلي رساله .. ( ما قلتيليش كيف صدقت فيا إيمان 😉😉 )..
قاطعتني منار و قالتلي في ناس اليوم بيمشوا يشوفوا الحوش .. قتلها عيلة تانيه ؟ قتلي ايه العيله الاولى ما صارش منها ..
فجأه تفكرت السنسله 😨😨 .. اتصلت بسيف .. قتله السنسله وين ؟
قالي مش عارف نحسابك خديتيها ..
قتله لا لا ما خذيتهاش .. قالي معناها طاحت من إيدي لما حضنتك من غير ما نحس ..
قتله سيف راهو محمد خوي ماشي للحوش .. قالي ليش ؟ قتله في عيله تبي تشريه .. قالي تبو تبيعوه ؟ قتله ايه
قالي توا نتصرف انا ..
قعدت في الدار سرحانه .. إيمان تنادي عليا .. قتلها بنخش الدوش .. و كانت حجة نختلي فيها بنفسي شويه .. كل ما يصير موقف معاي نحب ننعزل بنفسي و كأني نبي نرسخ الموقف هذا في ذاكرتي .. نبي نعيشه مرة و اتنين و ثلاثه و بعدها ننخرط مع الناس عادي ..
خشيت الدوش و قعدت نتفكر في كل شي .. و اعطيت لنفسي فرصه نحضن مشاعري ♥️
دوشت و طلعت قعدت مقعمزة جنبهم .. كلمت محمد سألته ع الحوش شن صار فيه .. قالي لا ما صارش مرات ياخذه واحد صاحبي ..
قتلي إيمان حددوا موعد عرس أمل .. قتلها هكي بالسرعه هادي !! ردت عليا أمل : ماشاءالله مش ناقصهم شي علاش بيأجلوا العرس !! قصدي الناس الي تعطل في عراسهم هدوكا يلقطوا في حق دار النوم و الأثاث هههههههه ..
قتلها به ربي يهنيك و يتمملك ع خير 🤷🏻♀️
نضت للمطبخ و معاي إيمان .. قتلها امته العرس ؟ قتلي مزال 45 يوم بس .. قتلها تلحقوا تجهزوا نفسكم ؟ قتلي ساهل كله ..
قتلها محمد يعرف ؟ قتلي لا .. قتلها قلتيله بالك يسقد روحه حتى هو و تدخلوا انتي و اختك في يوم واحد ..
قتلي بجد 😳😳
قتلها ليش لا !! .. شقه جاهزة و مأثثه و أكيد مجمع قرشين على روحه .. بعدين الراجل مش زي البنت .. الراجل الي يعرقله الحوش و الأثاث بس .. قتلي تو نقوله لكن مرات ما يفهمش عليا ..
قتلها منار قاعده هنا الليله .. تو نقولوله تعالى و حناي تزيد تكلمه ع الاقل يجيكم عرس واحد انتي و اختك خير ..
قعدت تحضن فيا و تقولي حليلي محلاهم حمواتي 😍😍😍😍
قعمزنا نشربوا في قهوة .. جثه بس معاهم .. كلي معاه هو و مع ريحته و انفاسه و طعمته و كله ♥️ ..
روحوا البنات و جى محمد خوي و كلمناه و قال عادي ما عنديش مشكله ندير العرس توا لكن لين نقول لي الحاج قبل ( بابا )
قتله حناي خلاص بكرة الضهر رد عليا باش نكلم عمتك .. قاللها ان شاءالله حاضر ..
روح محمد و تعشينا و خشينا فراشاتنا .. كلمت نزار قتله شن ادير ؟ ..
قالي مكسد مع الاولاد .. قتله مرات عرس خوك الشهر الجاي ..أجلها سفرتك لي بعد عرس محمد .. قالي بجد ؟ قتله و الله ..
قالي تو نشوف صاحبي قبل .. قتله نتمناك هنا كان صار منه العرس ..
قالي به خلاص اصلا انتي معارضه فيها المشيه حتى الجو تغير ..
قتله تستاهل 😛
كلمني سيف .. قالي نشوفك بكره ؟ قتله شن في ؟ قالي بكرة نقولك .. قتله تمام به ..
قالي تعالي الشركة ..
الصبح طلعت مشيت للشركة .. كلمته قالي كيف طلعت من البحث الجنائي مسافة الطريق و نكون عندك ..
قعدت مقعمزة في المكتب نستنى لين جى .. و اول ما خش المكتب صكر الباب و فتح ايديه الزوز و قالي حضن حضن 😍
تحشمت و نضت وقفت .. قرب مني و خدا حضن 🙈♥️
قتله يعني هذا كمين 😉
قالي لا و الله 😀
قعمزنا .. قالي عندك علم من اول امس ما رقدتش بكل ..
قتله شن في ؟
قالي بالنسبه لي امك و مصطفي جاركم و الضابط علي .. ضربناهم في بعض ..
جاركم ما عنداش علم بموضوع الحشيش .. لانه قال جتني ( ليلى ) و قالتلي نبي نرفع حاجات للسجن و انا امراه نتعرض لمضايقات نبيك ترفعهم انت .. يعني امك استعملاته بس و هو ما يعرفش .. و لما قلنا لي ( علي ) انه مشتبه بيه في قضية المخدرات الاولى خاصة انه هو الي قبض على بوك و ان امك اعترفت بتورطه في القضيه .. من الاول نكر و قال ما نعرفهاش .. و مجرد بلاغ تعاملت معاه و تحولت القضيه للنيابه و تحاكم الشخص و خلاص .. و لما قلناله ان شريكته اعترفت و معاها شاهدة اسمها ( فاطمه ) انكر و بعدين قال الشخص الي حط المخدرات من طرفها .. يعني هو يبي ييري ساحته و تجيه بتورطه في التعامل مع بلاغ كاذب و بس ..
قتله سيف انا مش فاهمة شي 😨
من فاطمة هادي ؟؟
قالي هادي وحدة تعرفها امك .. مش عارف تعرفيها انتي او لا ؟؟
قتله كيف شكلها ؟ قالي امرأه شن كيف شكلها !! ...
قتله في وحدة كانت تجيها و أمي تمشي تبات عندها لكن ما نعرفش اسمها ..
قالي تعرفي وين تسكن ؟ قتله في مرة امي مشت باتت عندها من غير ما احنا نعرفوا و جى خالي قال وين امكم ؟؟ و مشينا معاه لي جهة كلها عمارات و في وحدة من العمارات من الجنب مرسوم عليها امرأه شعرها مفتوح ..
قالي اوك اوك هي نفسها ..
قتله شن دخلها المرأه هادي ؟؟ قالي امك قالت انها هي الي دبرت عليها الدبارة هادي و هي الي عرفتها على علي ..
قتله سيف انا دخت 😰😰
قالي لازم بوك يعرف .. لانه المتهم الاول في الموضوع .. كونه أتهم في قضية بريئ منها .. لكن انا ما نبيش نكون في الواجهة بكل .. و ما نبيشي يعرف ان انا وراها القضيه ..
قتله ليش ؟
قالي حفاظاً ع قدره و احترامه لاني حسبتها لي بعدين انا ..
قتله شن ح يصير توا ؟
قالي بس حبيت نقولك ان طلعة بوك مش بعيده .. قعدت ساكته .. مش مستوعبه شي ..
قتله و أمي ؟؟ قالي مُدانه في جميع الاحوال .. ما قدرتش نستوعب انها ح تنحبس و تتبهدل .. في شعور داخلي ضئيل جداً يزاحم في كل مشاعر الكره اتجاهها .. يجاهد باش يطلع للعلن .. و يكسب ودي .. نحس بيه شويه و تصارعه مشاعر الحقد و يغلبوه و يختفي .. و نرجع نحس بيه تاني يدغدغ مشاعري و كأنه يقولي لا ما اديريش فيها هكي أمك هادي 🤷🏻♀️🤷🏻♀️
شد سيف إيدي .. قالي في كلام تبي تقوليه !!
نزلوا دموعي و قتله سيف ما نبيهاش تنحبس .. مرات تخاف هي ..💔💔
قعد يتأمل فيا و رد فعل ملامحه يقولوا الله ع الأنسانيه ..
قالي تعالي .. فعمزنا ع الصالون و خداني في حضنه .. قتله مشاعري مختلطه .. انا ما نبيهاش تتشرد بكل ..
قالي لو بوك تنازل مش ح تتشرد بكل .. قتله بالحق ؟ قالي ايه ..
انهرت بالبكاء و حسيت و كأن الله عز و جل قاضي القضاه جابها لي عندي باش نحكم عليها في الوقت نفسه قالي {{ فَاعْفُ عَنْهُمْ وَاصْفَحْ ۚ إِنَّ اللَّهَ يُحِبُّ الْمُحْسِنِينَ }} .. حكمة 🤷🏻♀️
سيف انا نقدر نغذر بيها .. نقدر نعيشها مشاعر الحزن الي استملكتني .. شوف شوف حط ايدك هنا في رقبتي .. ريتها الغصه هادي نقدر نعيشهالها .. نقدر نتلاعب بنفسيتها .. نقدر نستحقرها ... نقدر نخليها تتمنى الموت و نكسرها من اغلى حاجة عندها ..
لكن أنا ما نقدرش 💔😢 ما نقدرش يا حبيبي ما نقدرش ..
يبدو أني إبنة ذاك الرجل حتى النخاع .. و الحمدلله إني ما خذيت من صفاتها شي ...
قتله نحس إني معيشاتك في حزن معاي .. قالي أبداً معاش تقولي هكي ..
فرحان لأني تعرفت على مجموعة إنسان فيك .. مجموعة أخلاق .. مجموعة مشاعر ..
تعرفي .. كل يوم نزيد نحترم فيك شي يزيد يجذبني فيك .. بديت نحس ان البنات كلهم سطحيات و العمق كله فيك ..
عمق مشاعر .. عمق الأدب و الاخلاق .. عمق الجمال .. انتي خذيتيني كلي .. غيرتيني من غير ما تحسي ..
قتله سيف به انا نبي لعبتي الي امس ندور عليها و ما لقيتهاش 😢
قالي ااخخخخخخ منك اخخخخخ .. تعرفي امته تكوني معاي طفله .. و تعرفي امته تكوني معاي امرأه .. و تعرفي امته تكوني معاي حبيبه ..
هيا نوضي نشريلك لعبه .. قتله بجد .. قالي ما عمري خشيت محل العاب بس ع خاطرك نخش حتى الملاهي 😄
طلعنا من الشركة و وقف خدالي ميه و عصير و شكلاطه .. و مشينا محل العاب ..
سيف سيف نبي هادي .. و نبي هادي .. و نبي هادي ... وقتها حسيت اني طفله مع بوها .. مش عارفه شن الي يجمع في اي علاقه بين اتنين ✌🏻 .. غير كلام الحب المحفوظ مسبقاً و المتكرر غالباً .. في محل الالعاب نبيه بابا .. في في المطعم نبيه صديقي .. في محل الورد نبيه حبيبي .. في محل الملابس نبيه زوجي .. في الشارع نبيه خوي و سندي .. في العوزه و الضيقه نبيه ضهري ..👌🏻
