#ولدتني_عاهرة 40
قعدت إيمان تحكيلي على أمل و شن صاير فيها .. و كيف إياد تعارك مع راجلها ..
جى بابا و روحت معاه ناديه و كان واضح عليها متحشمة و مش على بعضها ..
قعد محمد مع بابا في الصالون و حسيت إن محمد حكى لي بابا على سيف ..
قعدت في فراشي نفكر نتصل بيه او لا ؟؟ نبعتله رساله او لا ؟ و ليش هو ما يتصلش ؟؟
رقدت و ما اتصلتش بيه .. تاني يوم نضت الصبح و مشيت أنا و بابا للمقبره .. دعينا و قرينا قرآن و روحنا .. لقينا ناديه مجهزة الفطور و مقعمزة تهدرز مع حناي ..
قعمزنا فطرنا .. و بعد الفطور قالتلي ناديه شن انديروا غذانا اليوم ؟
قتلها 😳 عادي اي حاجة .. قتلي بالك خاطرك في حاجة ؟ قتلها 😳 لا كله زي بعضه ..
قاللها بابا نوضي انتي ديري الغداء خلي بنهدرز عليها شويه ..
وقت تأكدت إن محمد حكى لي بابا على سيف .. ناضت ناديه و قامت سفرة الفطور .. و قعدت أنا و بابا و حناي ..
قالي بابا في ناس كلموا محمد عليك .. و كان انتي رافضه ولد عمتك خلي نتوكلوا على الله و نسألوا ع الراجل و العيله ..
قتله بالنسبه لي إياد أنا ما فكرتش حتى في الموضوع .. قتله حناي إياد لا ما تعطيهاله ..
قاللها بابا علاش ؟؟
قالتله خطبها مني قبل ما تطلع انت من الحبس .. و بوه قال لا ما ناخدهاش لي ولدي بنت ليلى و صغار ولدي تبدا حناهم وحدة زي هادي .. و قال لي ولده كان تبي تاخدها معاش تخدم معاي ..
مشى قال لي امه معاش نبيها خلاص .. و لما انت طلعت تغير رايهم ..
بنتي مش لعبه ع حسابهم هما .. هادي بنت ولدي .. و إياد ولد بنتي .. لكن غدوة بعد غدوة يبدا يعاير فيها و مشاكل بينهم و الي رخى بيك مره يرخي بيك عشره ..
و البنت سادها ما شافت .. أعطيها لي راجل يهني عليها و يعيشها ايام باهيه ..
بابا ساكت و متضايق من الكلام الي سمعه .. بعدين قالي معليشي يا بابا ما فيشي نصيب ..
قتله عادي انا تضايقت في الأول و بعدين ما عدلتش ..
قالي معناها تو نقول لي خوك يسأل ع الراجل .. كان كويس و ولد عيله نقولوله يجيب إماليه .. قالي كويس هكي ؟؟
قتله به كويس .. ناض بابا طلع للعمال متع البني .. و حناي قالتلي منو هذا الي مكلم خوك عليك ؟
قتلها نفسه الي قتلك عليه 🙈
قتلي ما افلحك يا كبدي و انا نحسابك عويقله ..
قتلها عويقله طبعاً 😌
كلمتني خالتي .. قتلي راهو امك طالبين عليها جهاز على قلبها .. و الفلوس الي تبعتوا فيهم ما يسدوش .. قتلها كيف ما يسدوش 😳 !!
قتلي يا دوبك دواء بس معاش لحقت حتى ناخدلها ملابس ..
قتلها كان طلعت تو نخطم عليك .. قتلي لا ضروري تخطمي مش كان طلعتي .. قتلها به إن شاءالله خير .....
قعدت نخمم شكون الي يبعت في فلوس ؟؟ ع حسب علمي محمد من لما عرف بسبب حبسة بابا معاش يعطي في فلوس و لا يكلم فيها ..
و منار مستحيل .. شكون الي يبعتلها في فلوس زعمه !!!!
معقوله سيف ايديرها ؟؟
أنا يوم شفتها في البحث قتلي شكرا ع الحاجات الي جبتيهم .. معناها هو الي يبعتلها في فلوس ..
اتصلت بيه .. رد عليا .. نعم !!!
قتله نبي نحكي معاك .. قالي مش فاضي ..
قتله ضروري نبي نحكي معاك .. قالي كان فضيت نكلمك .. و صكر الخط 😳😳
بعتله رساله أنا جاياتك للشركة ..
بعتلي ..( تعالي خلى نفرغ فيك مخزن )
قريتها و أنا 😱😳
بعتله نبيك ضروررررررري ..
ماباش يرد عليا ...
كلمت بابا و قتله نبي نمشي حوش خالتي .. قالي به تو نوصلك انا .. قتله ليش اتعب في روحك في التاكسيات .. لما تاخد سيارة وصلني وين ما تحب ..
قالي به طمنيني لما توصلي .. غيرت ملابسي و خديت من فلوس سيارة نزار الله يرحمه و مشيت حوش خالتي ..
لقيت أمي مهناش رفعها ولد خالتي للمصحه .. قلت لي خالتي شكون الي يبعت في فلوس .. قتلي ما نعرفش شاب قال انه من طرفكم و اعطانا رقمه و قال كل ما تستحق حاجة كلموني ..
لكن انا قلت نكلمك انتي قبل .. قتلها اعطيني رقمه .. اعطتني خالتي الرقم و سجلته في تليفوني .. قتلها علاش طالبين عليها جهاز للقلب .. قتلي جتها جلطه و رقدت اسبوع في المستشفى و بعدين طلعوها ..
تفاجأت و ما تأثرت بكل .. ماتت المشاعر فيا من زمان ..
قتلها و توا شن قالولها ؟ قتلي طالبين عليها جهاز على قلبها باش يديرولها عملية تسريح ..
فتحت شنطتي اعطيتها فلوس .. و شربت قهوتي و طلعت روحت ..
لقيت منار في حوشنا هي و إيمان و محمد و عمتي ...
سلمت و ناديت منار احكيتلها كل شي على أمي .. قتلي ما دخليش بيها .. أحكيلي شن صار مع سيف أهم عندي ..
قتلها منار خيرك هكي بديتي !!
قتلي معقوله يجيكم أمس و ما تبعتيش حتى رساله لي أختك اتطمنيها 🤨
قتلها أهو قتلك إيمان ..
قتلها ضروري نعرفوا شكون الي يبعت في فلوس لي امك .. و خايفه يكون سيف هو الي يبعتلها ..
قتلي منار هو صح الراجل كويس و مواقفه شهم .. لكن عاد مش لدرجة بيبعت فلوس لي امك كل شهر ..
قتلها به شكون الي بيدير هكي ؟؟
قتلي ما نعرفش بس أكيد محمد خوك ..
قتلي و نقصي رجلك من المشي غادي .. ما دخلكش بيها .. في النهايه هي قاعده في حوش اختها مش في الشارع ..
قتلها أختها تشكي و تعاود مش طايقتها بكل .. قتلي ينظموا أمورهم خوت في بعضهم .. توا كيف عرفونا خالاتك ؟؟ تي ماهو كانوا حتى يتلاقوا معانا في مكان ما يسلموش علينا .. و كانوا يقولوا لي بناتهم ردوا بالكم اتبعوا منار و ماريا يفسدوكم .. يحسابونا زي أختهم ..
علاش عمتي ما دارتش هكي الي كانت تجي تسأل و تسلم علينا في المدرسه ...
تي فكينا منهم ماريا حتى هما مساهمين في فساد بنتهم .. يوم الي عرفوا بابا انحبس و امي واخده راحتها خيره ما جاش خالي كسرلها رقبتها ؟؟
بالعكس صكروا فمهم و كل واحد شد حوشه و قطعوها ..
قتلي يوم الي انتي طلعتي من الحوش و كنتي فرخه في الثانوي .. مشيتلها في دارها و ننهف و نبكي و نقوللها ماريا مهناش .. و هي بكل برود تقولي تو ترجع زي الكلبه .. و لما ما رجعتيش اتصلت بي عمتي و قالتلها أنا بنتي ماريا ماتت و ربوها انتو ... و توا اناي تمشي و تعطوا فيها في الفلوس !!!
خيركم شن صارلكم !!
تي ذنب نزار يقعد طول عمره في رقبتها .. خلاص انسيها خلي ربي يخلص ديننا ..
قتلها أنا ع خاطر نزار بس 😔
قتلي و نزار من شكون هارب من البحر ؟؟
مش منها هي ؟
تنهدت و سكتت و لا عرفت صح من الغلط .. و دبارتي ضايعه بين العفو و الانتقام 💔💔
قتلي نوضي فكري في روحك و بكري محمد كلم سيف و قال له امته ما تبي جيب العيله يشرفونا .. و جهزي نفسك و فكري في مستقبلك .. و هني على حوشك و راجلك .. و الجرثومة الي كانت بيننا اقتليها ماريا ..
اقتليها و ارتاحي .. الي ادير علاقه مع سلف بنتها و راجل اختها و صاحب خوها .. ادير علاقه حتى مع راجلك عندها عادي .. فيقي ماريا و نزار يبي منك الدعاء بالرحمة بس .. و لعلمك نزار لو يعرف بعار امك راهو قتلها .. يكفي انه قاعد متفكر الرجاله الي كانت امك تدخل فيهم للحوش لما بوك يمشي للخدمة .. و شوفي كيف هرب من كل شي و رمى روحه في البحر و لحكمة لا يعلمها الا الله ربي خدا أمانته ..
نوضي فكري في روحك و سادنا همّ و مشاكل و نكد و فكري شن بتلبسي و شن بتشري و شن ناقصك و شن بديري .. مبكري بوك قال لي محمد مش شرط نديروا عرس .. نقروا فاتحه و تروح حوش راجلها ... يعني مرات حتى الشهر الجاي يحددوا الفاتحه .. قتلها بالحق 🙈
قتلي هيااااا نوضي غيري ملابسك و تعالي برا نهدرزوا شن بنديروا ..
طلعت منار و خلتني في الدار .. و مشاعري بين الفرحه و الحزن و التفكير في أمي و واجبي اتجاهها .. مشاعر مختلطه في النهايه ما تحسيش بفرحه تامه ..
نضت غيرت ملابسي و طلعت جنب عمتي و البنات .. عمتي متضايقه هلبا ع خاطر أمل .. باركتلي و قتلي لما بيجو اماليه قوليلي باش نجي هنا .. قتلها حاضر عمتي 🙈
و في كل موقف عمتي تعطيك درس في التصالح مع الذات و تقولك بي أفعالها .. إكسبي الناس في آخر لحضه خير من تخسريهم .. و ما كانتش أنانيه أو حقوده ع خاطر ولدها و حطت كل شي ع جنب و كسبتني و كسبت بنتها إيمان و ما دارتلهاش مشاكل مع أهل راجلها الي هما احنا و كسبت خوها ♥️♥️
