#ولدتني_عاهرة / 39
♡♡الكاتبه❣️✍️ No name .🌸🌸
🌺قرااءه ممتعه للجميع 🌺
كنت نبي انوض نلحق منار للدار التانيه .. بس بابا كان يحكي معاي ما قدرتش نقاطعه ..
عقلي مش مع بابا بكل .. و لا نندري عليه شن يقول .. تركيزي مع منار نحاول نسمعها شن تقول .. جت منار قعمزت جنبنا ..
نوض يا بابا و خليني مع منار بروحنا ..
بابا قاعد يهدرز و انا عيوني في منار .. و منار تتهرب مني ما تبيش تشوفلي ..
قعد دماغي يرفع و يجيب .. ناض بابا بيصلي الشفع و الوتر ..
صكرت الباب و قتلها ليش سيف اتصل بيك ؟؟
قتلي مش رقم سيف هذا 😌 ..
قتلها منار ما تلعبيش بي أعصابي تشوفي في حالتي كيف ..
ليش ..... سيف .... اتصل ..... بيك ؟؟؟؟؟؟
قتلي موضوع بيني و بينه ..
قتلها منار و رحمة نزار احكي شن قالك ؟؟
قتلي عادي هدرزنا عادي ..
و احنا نحكوا اتصل سيف .. قتلي نوضي صكري الباب بالمفتاح .. و ما تتكلميش بكل ..
صكرت الباب بالمفتاح .. ردت منار ..
قاللها في جنبك هي ؟؟
قالتله لا مع بابا برا .. قعد سيف ساكت ..
قالتله منار انت تعرف الليبيين و دوتهم .. احنا بروحنا تعرضنا لمضايقات في وفاة نزار .. الناس تدوي ..
قاطعها سيف .. قاللها أنا الي شايفه في خدمتي انتي ممكن ما عمرك سمعتي بيه .. و فاهم الدنيا كويس .. و نعرف شن اخترت.. أنا عارفها كويس من اول يوم وقفت عليا .. عارف اخلاقها .. نعرف عليها كل شي .. لكن يا منار نمشي نكلم خوها ترفضني انا !! تطلعني عيل قدام خوها !!
تي انا لما قالي محمد اختي عاطيين فيها كلمة كذبته .. قلت لا هذا ما كلمهاش ..
شن الي تبيه هي ؟؟ تبي نتسلى بيها و نفوتها ؟؟
قتله منار باهي شن رايك تقعمزوا مع بعضكم و تحكوا في كل شي ؟؟
سيف ساكت ما ردش عليها ..
قاللها قوليلي عذر تاني غير الي قلتيه لأني مش مقتنع أنا ..
قالتله منار و رحمة نزار هذا الي صار .. قاللها إن شاءالله خير .. و صكر الخط ..
قتلها ليش كلمتيه ؟؟
قتلي لأن حساباتك كلها غلط و الراجل كلامه صح كله ..
تي يا منار انتي شن دخلك ؟؟ تبي اختك تقعد طول عمرها مواطيه راسها قدام امالي راجلها ؟؟ تبيه ياخدني و يندم ؟؟
تبي اماليه يقعدوا يلقحوا عليا و يحذفوا في الكلام ؟؟
قتلي هذا كله وهم .. بري صلي و استخيري .. بعدين من قالك هذا كله بيصير ؟؟
قتلها انتي ليش تتصرفي أصلاً من غير إذني ؟؟
قتلي أنا أختك و نعرف مصلحتك أكثر منك ...
فتحت الباب و طلعت منار .. قعدت انا بروحي في الدار .. كل المواقف الي تحتاج فيهم البنت لي أمها أنا نعيشها بروحي .. ما نعرفش حتى كيف نتصرف او من نشاور .. ما عنديش الحكمة الي تكتسبها البنت من أمها ..
غارقه في بحر بروحي .. و في هلبا أمور تشوفيها إنتي زي الجبل ع قلبك .. بحضن من أمك او كلمة أو مشوره أو حكمة تزيل الهموم كلها ..
جى بابا و قعدنا نهدرزوا و روحت منار و قعدت ليلتي طويله ..
و أستاحشته من أول ليله .. كيف باقي العمر بيكون من غيره ؟ 💔
طول الليل و كلمته انتي بنت ليلى ترن في وذني ... مؤلمة .. مؤلمة جداً ...
تاني يوم نضت الصبح .. عيوني منفوخات .. راسي صداع .. بروحي في الحوش .. نرقد و انوض ..
العشيه جت إيمان و محمد .. جايبيين معاهم حلويات ..
جى بابا و روح بي حناي معاه من حوش عمي .. حسيت بدوخه لدرجة معاش قدرت نوقف ... قتلي إيمان تغذيتي ؟؟
قتلها لا من أمس ما كليت شي .. قتلي به خشي دوشي و غيري ملابسك البسي حاجة نازكة و حطي ميك اب خفيف ..
قتلها ميك اب شني و احنا حازنين ..
قتلي حتى روج بس .. قتلها إيمان خيرك ؟؟ قتلي غير خشي دوشي جايين صحاب محمد ..
قتلها هنا بيجو ؟؟ قتلي ايه ..
قتلها علاش ؟؟ قتلي بري دوشي معاش وقت .. خشيت دوشت و خليت إيمان تجهز في سفرة القهوة و الحلويات في المطبخ ..
طلعت من الدوش لبست فستان طويل و فيه حزام و جففت شعري و فتحته .. دارتلي إيمان عطر .. قتلي حطي روج .. قتلها لا ..
قتلي شويه بس .. حطيت روج خفيف و خشيت معاها للمطبخ ..
جى بابا قال انا بنمشي لي عمتك بناخدها و بعدين بنمشي لحوش أهل ناديه .. قتله به تمام ..
طلع بابا و بعد شوي رن جرس الحوش و طلع محمد بيفتح الباب .. إيمان دارت بخور ..
قعدت في المطبخ و مرة مرة نشوف في تليفوني .. بالك بعتلي رساله .. بالك اتصل بيا ..
ما نلقى منه شي .. زعمه خطب حق !! ايديرها المجنون هذا ..
إيمان تحوس في المطبخ .. قتلي نحطوا بكلاوة مع القهوة ؟
قتلها ما نعرفش بس حطي عادي .. قتلها جايين رجاله ؟؟ قتلي راجل واحد بس ..
جى محمد قالي تعالي نبيك .. قتله أنا ؟
قالي ايه انتي تعالي .. و شدني من إيدي و رفعني معاه للصالون .. قتله خلي نحط وشاح كيف بنخش هكي و شكون في داخل ؟؟
قالي تعالي معاي و اسكتي .. خشيت للصالون لقيت سيف مقعمز ..
شهقت حطيت ايديا على فمي .. تلفتت لي محمد و قعدت نبكي .. خداني في حضنه ..
ما اتوقعتاش سيف يجي بكل .. و لا اتوقعت تكون ردة فعلي هكي ..
شدني محمد و قعمزت ع الصالون .. سلمت على سيف ..
طلع محمد و خلانا بروحنا ..
سيف ساكت و انا دمعتي ما بتش توقف ..
قالي تحسي إني مش قادر نحميك ؟؟
عندك شك إن ممكن يجي يوم و نندم لأني خديتك ؟؟
في رأيك أنا نمشي بكلام الناس ؟؟
شخصيتي ضعيفه لدرجة إن يأثر عليا فلان و علان ؟؟
قعدت ساكته و نبكي ما قدرتش نرد ..
قالي أنا لا يتدخل في حياتي أمي و لا بوي .. و لا يتجرأ حد يجي يدوي معاي و يقولي اختيارك صح او غلط ..
لكن لو تشوفي فيا مش راجل و ممكن ظروفك تأثر عليا و خايفه من إماليه وقتها عندك حق و في كلام تاني ..
قتله أنا نعرف إنك راجل .. بس ما فيش أم ترضى أن ولدها يتزوج وحدة امها محبوسه ..
قالي من يعرف ان امك محبوسه ؟؟ و من هو الي بيسأل عليك أصلاً ؟؟
أنا حتى يوم الي كلمت امي قالتلي مدامك انت تعرفها احنا ما ليناش علاقه ..
قتله مرت خو ناديه مرت بوي هي نفسها حماة اختك .. افرض تقوللها كل شي و اماليك يأثروا عليك ..
قالي ما نفرض شي أنا .. الفرضيات هادي في دماغك انتي بس ..
و أماليه حتى لو سمعوا مستحيل يعاملوك مش كويس او يجرحوك بالكلام ..
طق الباب و خش محمد .. جاب قهوة و حلويات .. قعدنا ساكتين ..
قالي محمد شن رأيك ؟ قعدت ساكته و تحشمت نرد عليه ..
قالي توكلي على الله و صلي استخاره و ربي يبارك في كل شي ..
قتله ان شاءالله به .. ناض سيف وقف .. قاله محمد خليك نشربوا قهوة .. قاله سيف نطلعوا نشربوها برا ..
نضنا وقفنا و سيف كان حازم هلبا و كأني درت فيه جريمه ..
نادت إيمان على محمد و طلع .. تلفتت لي سيف قتله ليش معصب و كأنك جاي بالسيف ؟؟
قالي و مزال تتكلمي ؟؟ 😳
و لا عندك ساهله ترفضيني ؟؟
قعدت ساكته 😔😔
قالي آسف ع الكلمه الي قلتها ..
قالي بنطلع أنا .. طلعنا من الصالون و طلع سيف و محمد لي فم الحوش برا ..
و جتني إيمان فرحانه قتلي شن صار ..
قتلها مغرور 🤨
قتلي عارفاته مغرور و حقير .. لكن شن صار ؟؟
قتلها قال الي عنده و طلع .. لا رضاني لا قال كلمة حلوه لا شد إيدي لا شي ..
قتلي ع المدخل برا في باقة ورد و شكلاطه ..
قتلها هو جابهم ؟ قتلي أمالا مرت بوك 😆
طلعت نشوف في الورد و الشكلاطه .. و ندعي من كل قلبي ربي يسخرلي يارب ♥️
بس قاعد الخوف في قلبي .. قعد سيف و محمد برا .. جتني حناي قتلي كلميلي عمتك نبيها .. اتصلت بي عمتي و اعطيت التليفون لي حناي تكلمها ..
خديت الورد و حطيته في ميه ..
خش محمد و قعد مقعمز معاي .. قالي ليش رفضتيه ؟؟
قتله نخاف من الدوة بعدين .. قالي و أنا لما خديت إيمان خفت من الدوة ؟؟
قتله إيمان تختلف .. قالي ما فيش حاجة إسمها تختلف ..
بتعيشي معاه كويس ؟؟ بتنقصي من خلطه الزايده .. بتعطي وقتك لحوشك و صغارك .. بتصوني راجلك .. الكلمة الطيبه ديما في فمك .. وجهك بشوش .. فمك يضحك .. هكي انتي كسبتي راجلك و اماليه ..
و الي فات كله انسيه .. انتي ما ذنبك في شي ..
قتلي إيمان أمل أختي حرجانه ليها 3 أيام .. قتلها ليش 😳
قتلي ضاربها و شافت عليه حاجات في التليفون و يدخن في حشيش و بلى على راسه ..
قتلها مش معقوله 😨😨
قتلي و المصيبه حامل .. قتلها كيف بدير توا ؟؟ قتلي و الله ما نعرف ..
مشيتلهم أمس تغرد و تبكي و شاده في الطلاق .. قتلي و أمي تقوللها شي تحملي زيك زي الناس و كيف بتطلقي بعد 4 شهور زواج ..
قتلها باهي أماليه شنو ؟؟ معقوله ما يكلموشي !! ... قتلي وين الراجل الي مازال مداير حساب لي اماليه ؟؟ قتلها بس هي كانت تشكر في اماليه .. قتلي هذا الي صار حتى لسانه و أسلوبه زي وجهه ....
سبحان الله هذا الي ما يدورش جوهر الأنسان و معدنه و أخلاقه .. و الي يهمك بس أسم عيلته و وين يسكن و مجموعة مظاهر واهيه ..
