#ولدتني_عاهرة 33
خشينا المقبره .. نتبع في محمد .. خدا محمد ميه و قعد يبخبخ في القبر .. أهاا هذا هو .. نزار .. حبيبي .. صباح الخير ..
القبر قاعد شيمنت .. مكتوب عليه اسمه و تاريخ الدفن ..
قعمزت و دعيت و قريت عليه قرآن .. و ربي نزل عليا صبر سبحان الله .. قلبي برد ..
قعدت ندعي و نمسح بي إيدي ع القبر .. محمد جاب عجنة شيمنت من الراجل الي في المقبره .. دارها فوق القبر و حط عليها صونيه مرش غارقه .. عمتي تقرا في قران .. بديت نبخبخ في القبر الي في جنبه .. و ندعيلهم بالرحمه .. صبيت ميه في الصونيه و دعينا ..
اللهم ارحم روحاً صعدت إليك و لم يعد بيننا و بينها إلا الدعاء
اللهم ارحمها و اغفر لها و انظر اليها بعين لطفك و كرمك يا أرحم الراحمين .
اللهم ارفع درجته فى المهديين واخلفه فى عقبة الغابرين
و اغفر لنا و له يالله و أفسح له فى قبره و نور له فيه .
اللهم أبدله دارا خيرا من داره و أهلا خيرا من أهله و أدخله الجنة و أعذه من عذاب القبر ومن عذاب النار .
اللهم ارحمه فوق الأرض و تحت الأرض و يوم العرض عليك اللهم قه عذاب يوم تبعث عبادك .
اللهم أنزل نوراً من نورك عليه .
اللهم نور له قبره و آنس وحشته ووسع مدخله ..
اللهم اجعل قبره روضه من رياض الجنة لا حفره من حفر النار .
اللهم اغفر له و ارحمه و اعف عنه و اكرم منزله .
اللهم أبدله دارا خير من داره و أهلا خيرا من أهله و ذرية خيرا من ذريته و زوجا خيرا من زوجه .
اللهم انقله من ضيق اللحود ومن مراتع الدود الى جناتك جنات الخلود
لا إله إلا أنت يا حنان يا منان يا بديع السموات والأرض تغمده برحمتك يا أرحم الراحمين .
اللهم إن ( نزار ) فى ذمتك و في جوارك فقه من فتنة القبر و عذاب النار و أنت أهل الوفاء و الحق فاغفر له و ارحمه إنك أنت الغفور الرحيم .
اللهم ارحمه و اغفر له و أكرم منزله .
طلعنا من المقبره .. و أنا ندعي .. قتلي إيمان نمشوا نشوفوا منار في المستشفى ؟؟
قتلها لا بنروح ..
روحنا للحوش .. و يا زين الميعاد الي فاتحينه الناس .. وين أمهم ؟ كيف مات ؟ قالوا مقتول ؟ يا حنه من يومهم مش مرتاحين راه ..
بشر ما خدوا من الدين الاسلامي شي .. خشيت و قعدت مقعمزه في الجنان .. و حناي جنبي .. الحوش حوش عزاء .. الناس جايه تهدرز و تغير جوها .. أنا نفسي معزوله عليهم تماماً .. تفكيري بين الماضي و الذكريات .. بين أسئلة في دماغي نبيلها أجوبه ..
زعمه كيف طاح من المركب ؟ أكيد خاف .. كيف عاند الموج .. أكيد حس بالصقع .. كيف استسلم للموت ؟؟
نبكي .. و نسكت .. و نتفكر و نرجع نبكي .. و نستغفر و نسكت .. مع الضهر جت هيمانه اخت سيف .. جابتلي سبحه إكترونيه .. قتلي خليها في صبعك و اشغلي نفسك بالأستغفار و التسبيح .. قعدت جنبي .. خشيت انا و إياها للدار داخل .. قتلي حتى أنا عندي خوي ميت 😔💔
قتلها الله يرحمه 💔
قتلي حتى إحنا مرينا بنفس وجعك .. و ان شاءالله ما عاد اذوقيه ..
قعدت مقعمزه جنبها لين روحت .. و خشيت رقدت .. نضت قبل الفجر .. صليت و ركبت فوق السطح .. الجو صقع .. تفكرت لما كنا نقعمزوا انا و نزار هنا و نهدرزوا و نتفكروا الماضي .. نتفكر و نبكي .. و ندعي ربي يبرد قلبي
اتكيت ع السور لين غفيت .. حلمت بي نزار شاد ولد صغير يلعب فيه و فرحان و يضحك ..
فقت من الغفوه .. يا رب هذا كان حلم !!
الله يرحمك يا حبيبي و يجعل مقامك الجنه .. الله يرحمك .. أذن الفجر .. نزلت للحوش و خشيت صليت .. و اتكيت رقدت في مكاني .. نضت الصبح مع صوت الدوشه ..
خشيت دوشت و لبست و طلعت قعمزت برا .. و كل مره يخش حد .. و مع الضهر خشيت للصالون داخل .. شويه و جت منار خشتلي في الصالون .. حضنتها و قعدنا نبكوا و باركتلها .. اعطتني طفلها .. قعدت نقول ما شاءالله تبارك الله .. قتلي بنسميه نزار ..
قعدت نقول سبحان الله انا حلمت بيه شاد ولد صغير و يلعب فيه و كان فرحان هلبا ..
خليته في حضني .. مرحبا يا نزار .. مرحبا يا حبيب خالتو .. يا رب تعيش أيام حلوه يا رب ♥️♥️
حسيت الطفل هذا شال هموم كبيره في القلب و حزن عميق ..
منار تاعبه من الولاده .. اتكت جنبي .. كل مره يخش حد يسلم عليها .. ناديه مسيطره ع الحوش كله .. تنظيف .. تطييب .. تقعمز تهدرز ع الناس .. كأن ليها سنين عندنا ..
و مرت الأيام .. كل يوم ينقص حد .. الي كان يبات روح حوشهم .. نقصوا الماشي و الجاي ..
و أنا عايشه حزن داخلي و هدوء خارجي .. بابا يخش في الليل بس .. نمشي نرقد في حضنه .. نهدا و نرتاح ..
جتني إيمان قتلي بنروح حوشي ندوش و نجيب ملابس تانيه و نغسل ملابس محمد .. قتلها خودي راحتك ..
سألتها وين تليفوني ؟؟ قتلي عندي في شنطتي .. قتلها اعطيهولي .. جابتهولي و طلعت مشت حوشها ..
فتحته وصلوني رسايل من سيف .. اتصل بيا طول .. رديت .. قالي عظم الله أجرك حبيبي .. قتله شكر الله سعيك ..
قالي نطلب منك طلب ؟ قتله ان شاءالله خير !! قالي نبي نشوفك حتى شويه ..
قتله أول ما نحصل فرصه نكلمك .. حكينا شويه و صكرت الخط ..
و فاتت أيام و أيام و أيام .. و روحوا كلهم حوشهم و فضى الحوش .. كان إياد يبي يتقرب مني بأي طريقه لانه عارف ان هادي فرصته و ع أساس يبي يوقف معاي ..
و في يوم بعد ما روحوا كلهم كان إياد مقعمز مع حناي في دارها و يهدرز عليها .. خشيت أنا الصالون و صكرت على روحي بالمفتاح .. رقدت و الصبح نضت فتحت بالمفتاح و طلعت عادي و فطرت مع ناديه و بابا و حناي ..
طلع بابا جايينه اولاد عمه .. جتني ناديه .. قتلي الصبح كلموني أبلات معاي يبو يجو يهدرزوا عندي ما عرفتش شن نرد عليهم ..
قتلها ليش !!
قتلي عاد معقوله مصكره على روحك الصالون 😏😏
قتلها اهااا ..
طلعت و خليتها .. بنمشي نغسل ملابسي انا و حناي .. لحقتني قتلي الغساله هادي جديده و نبيها تقعد على إيدي أنا بس نخاف تفسد .. حوايجك انتي و حناك اغسليهم بالغساله القديمه ..
قتلها حااضر ...
العشيه جوها صاحباتها .. نادتني حناي .. قتلي مبارح وين رقدتي ؟ قتلها في الصالون ليش تسألي .. قتلي بكري نسمع في ناديه تقول لي بوك راهو اياد ولد اختك جى مبارح و بنتك صكرت الباب بالمفتاح ..
قتلها شن قصدها !! 😳😳
قتلي و كان ما سمعتها بي وذني راهو كذبت و ما صدقتش ..
قتلها هي تقصد ان إياد خشلي و انا صكرت بالمفتاح ؟؟؟
قتلي ايه هكي قالت لي بوك ..
قتلها كيف هكي 😳😳
جت منار و قعدنا مقعمزين .. قتلي أمك ليها 10 أيام راقده في المستشفى ..
قتلها خيرها !!
قتلي جاها السكر يوم الجنازه و ضربلها الشبكيه طول ..
قتلها شن معناها هادي ؟؟ قتلي يعني نعمت معاش تشوف ..
قلت الله المستعان 😰
قتلها مشيتيلها ؟؟ قتلي لا خالتي اتصلت بيا قالتلي .. و من الاخير تحسيهم قالقين منها و معاش يبوها .. لانها بعد ما قالتلي امك في المستشفى قعدت تقولي انتو بناتها أولى بيها .. و أنا يا ماريا مستحيل نقبلها في حوشي و لا في حياتي .. و نحملها مسؤولية موت نزار الله يرحمه ..
قتلها تعرفي منار .. حتى انا في داخلي صوت يقولي هي السبب في موتت نزار 💔😔
