🌸ولدتني_عاهرة 29🌸
.............
قعدت أنا و منار في المطبخ .. متضايقين من تصرف إيمان .. حتى لو كانت نيتها صافيه بس مش بالسرعه هادي .. ع الأقل بعد 3 او 4 شهور ..
اتصلت بي نزار و قالي أنا بعتها السياره و بنجيبلك فلوس ترفعيهم للمحامي ..
قعدت نفكر شن بندير !!!
اتصلت بي سيف .. قالي نحسابك قاعده مع بوك و حناك ..
قتله نشوفك الصبح ؟ قالي اوك تمام ..
قعدت انا و منار مقعمزين مع حناي و جى نزار و بابا و درنا عشاء و كل حد خش فراشه ..
تاني يوم الصبح نضت دوشت و جهزت نفسي .. و قلت لي بابا بنمشي للخدمة .. و لأن عمتي كانت عندنا .. قعد بابا مع عمتي و أنا طلعت مشيت للشركة ..
قعدت نستنى في سيف في المكتب .. جى و سلم عليا و قعمز مقابلني ..
قتله كلمتك امس مش ح نسامحك عليها .. قالي قلت هلبا كلام أما منهم ؟؟
قتله معقوله تقولي مهمتي كملت ؟؟
أنا ما عمري فكرت فيك هكي .. و مش أخلاقي أصلاً نتصرف هكي ..
و لو كانت هادي مهمتك ما كنتش حكيتلك أدق تفاصيلي .. التفاصيل الي ما يعرفها حد غيرك ..
قالي و توا شن صار ؟
قتله في شنو ؟
قالي في اللوح ولد عمتك .. قتله مزال ما نعرفش .. بابا تحسه عاجبه هلبا .. و حناي سمعتها بروحك شن تحكي ..
قرب كرسيه مني لدرجة ان رجلينا تداخلت في بعض .. قالي يعني نقولوا مبروك ؟
وخرت الكرسي متعي و نضت وقفت 😠...
شدني من خصري و قرب مني .. باسني من خدي و قالي هادي مبروك ..
و باسني من خشمي و قالي هادي مبروك ..
و قرب من فمي باسني و عطلت هلبا المبروك ... حسيت بدوخه .. البوسه هادي تختلف ع الي قبلها .. فيها شي جديد عليا و شعور جديد عليا .. شديت في رقبته .. قامني و حطني ع الصالون .. دسيت راسي في حضنه ...
و قلبي و جسمي يرجف .. قمت راسي فيه .. قتله نحبك أنا نحبك ..
نزل راسه قعد يبوس فيا .. كمية عشق في تواصل اجسادنا رهيبه .. حسيت معاه بخضوعي ليه .. بسيطرته عليا .. بقوته .. لهفته .. مشاعر تانيه ما نعرفش نوصفها .. بس الي نعرفه ان أنا أنسانه معاه بكاملي ♥️
باعدت منه و انا حاطه ايدي على قلبي و شاده راسي .. قالي دايخه ؟ قتله ايه ..
حضني بقوة .. قالي نهبل كان يخطبك ولد عمتك .. خدا ايدي حطها على قلبه ..
عيونه في عيوني .. قالي القلب هذا أقسي منه ما فيش .. ما عمره دق هكي .. و لا يعرف حتى يتكلم و يعبر ع مشاعره .. القلب هذا عايش ينبض بس .. ما فيش و لا بنت سكناته ..
انتي بنهبل عليك .. نحلم بيك نعاشر فيك ..
هو يحكي و انا نرعش ..
كمل حكيه و قالي .. خليك معاي .. نبي ناخذك .. نبي نعيش معاك .. نبي نهرب بيك .. نبي نعاشرك ..
قتله سيف خلاص ارجوك .. زاد حضني .. كانوا عيونه يترجوا فيا .. و غرقنا في بحر من العشق .. بحر من القُبل .. علها تنهي لهيب الشوق ...
♥️♥️♥️♥️
باعدت منه و قعدت في حضنه .. طق باب المكتب .. ناض سيف .. و نضت انا قعمزت جهة المكتب ..
طلع سيف من المكتب و قعدت بروحي .. اتصل بيا نزار قالي شن صار ؟
قتله نطلع نكلمك .. جى سيف .. قتله نزار متضايق هلبا و تعبان ع خاطر امي ..
قالي أنا بعتلها محامي يفهمها شن تقول بالضبط .. و تنكر انها حرضت .. لان صاحبتها فاطمة هي الي حرضت .. المحامي فهمها شن تقول بالضبط و ممكن بكرة يفرجوا عليها بشرط انها تقعد تحضر نيابات ..
المحامي هذا شاطر هلبا .. و الكلام الي نقال في التحقيقات الاولى كله بيتغير .. قتله ليش بابا ما دارش تنازل ؟؟
قالي في حالة زي هادي لو بيدير تنازل ح يتم الافراج على المتهمين كلهم .. لانهم شركاء في نفس القضيه .. لكن للامانه بوك جى هو و محمد بيدير تنازل لكن ما يرضيكش ان باقي المتهمين يطلعوا ...
قرب مني و شد إيدي .. قالي من فير ما تقوليلي أنا حريص انها تطلع من هنا ..
فرحت هلبا بكلامه .. و قربت منه بوسته على خده 🙈 ...
قالي أنا هكي مستعد ندير كل شي على خاطرك .. ♥️
قتله نمشي أنا لاني حاسه ان موظفين الشركة بدوا يعرفوا ان في شي بيننا ..
قالي اوعديني انك ترفضي .. قتله ح نزيد نكلم حناي ع الاقل في حد في صفي ..
قالي تبي تشوفيها ؟ قتله أنا ؟ 😨
قالي ايه انتي .. قتله ما نحسش اني نبي نشوفها .. قالي ليش ؟؟ تصالحي معاها ماريا و خليها بعيده على حياتك .. الصد ح يزيد من الكره و الحقد .. لو مهما صار تبقى امك .. قدمي خطوة باش ربي يملي قلبك تسامح و فرحه و يسخرلك في كل شي ..
قتله توا ؟؟ قالي نمشوا ؟ قتله به ...
طلعنا مشينا للبحث الجنائي .. خايفه و متوتره و مشاعري متضاربه .. و هلبا احاسيس مختلطه .. بس كان استعدادي للموقف في ذاكرتي اني اول ما نشوفها نحضنها ..
وصلنا و قالي سيف بشريها انها بكرة بتطلع .. خشيت للمكتب و سيف طلع باش امي ما تشوفاش .. دقات قلبي تضرب في حلقي .. نحس في نبضات قلبي توصل لرقبتي .. بعد عشرة دقايق طق الباب .. نفتح .. قمت عيوني ..
نلقى امي لابسه جلباب و وشاح .. وجهها اصفرررر .. عيونها الخوف فيهم .. يسألوا فيا شن بيديرولي مزال .. عيونها قالولي انا اسفه .. قالولي احنا ميتين خوف .. قالوا هلبا كلام ..
قربت مني و حضنتني .. و قعدت تبكي ..
ماهو ياريته الحضن هذا كان من زمان .. ياريت الدموع هادوا نزلوا يوم الي طلعت و خليت الحوش .. انتي بحضنك هذا تقوليلي احنا في نهاية المطاف ما عندنا غير بعض .. تي باهي ما كان من الأول ..
تأخر هلبا الحضن .. بس لحكمة لا يعلمها الا الله حسيت فعلاً بحنين للرحم الي ولدني 🤷🏻♀️
قعمزتها ع الكرسي و اعطيتها ميه .. و كل ما كنتي الأيد الي تمسح دموع الناس ح تحترمي ذاتك و إنسانيتك ..
قتلي بصوت مرتجف .. صحيتي ع الملابس و الحاجات الي بعتيهملي ..
تفاجأت 😳 بس تغاضيت ع المعلومة .. قتلها انا جيت نشوف فيك و نقولك ان بكرة ح تطلعي ..
فرحت فرحة عجيبه .. و ناضت تحضن فيا و تبوس في إيدي .. نزلت دمعتي غصباً عني .. و حضنتها .. ليش يا ماما هكي ليش ..
قتلي قالولي في محاميه تبيك ما توقعتكش انتي .. انا فخورة بيك يا ماريا .. و باست راسي و قتلي سامحيني ..
به و مش من حقي نفتخر بيك ؟؟
هل يعلم كل من دار علاقه مع ذات زوج انه دمر نسيج اجتماعي متكامل ؟؟
هل يعلم انه دمر مجتمع كامل ؟؟
هل يعلم ان السنين كفيله برد المظالم ؟؟
هل يعلم ان المرأه لما تحب رجل غير زوجها .. تكره زوجها .. تكره اطفالها .. تنفصل ع العالم الواقعي الي عايشه فيه .. تنكر ذاتها .. تعيش مراهقه جديدة و في داخلها كارهه حوشها و راجلها و صغارها .. كيف ح يكون عطاءها ؟؟
ضرب .. ضغط نفسي .. جفاء .. حتى ولد كبدها تكرهه لمجرد انه يفكر فيها بأنها متزوجة ... { إِنَّهُ كَانَ فَاحِشَةً وَسَاءَ سَبِيلًا } ساء سبيلا 🤷🏻♀️
طلعت روحت .. و أنا حاسه براحة و نحمد في ربي ان امي بتطلع بكرة ..
وصلت للحوش و لقيت نزار ينظف في الغرس .. قتله امي بكرة يطلعوها من التوقيف 😍 ..
قالي بجد ؟؟ قتله و الله ..
قالي كيف ؟ قتله المحامي شاطر و يعرف شغله كويس .. خش غسل ايديه من التراب .. و اعطاني حق سيارته .. قالي امته ترفعيهم ؟
حضنته و قتله محلاك يا نزار و محلا أخلاقك ..
قتله الفلوس هادوا خليهم توا مش محتاجينهم .. و لو المحامي كلمني ع الفلوس ح ناخذهم منك .. و بفرحة نابعه من قلب طفل ما فاتش العشره سنين قالي به حاضر ♥️
خشيت لي حناي و قتلي بكرة الخميس بنمشوا نشوفوا العروسه لي بوك .. قتلها حناي شن بتشوفوا فيها و انتو تعرفوها ليكم عشرين سنه .. قتلي هذا الماير بنديروه زينا زي الناس .. شن بنتصل بي امها نقوللها بنتك نعرفوها من 20 سنه ما فيش داعي نجوا نخطبوها !!!
قتلها نزار يعرف ؟ قتلي لا فكيني منه هداكا عصبي .. قولوله انتو ..
مشيت قعمزت معاه .. قتله تتفكر اول ما نحبس بابا ؟ وقتها امي كانت زي السجين الي خدى حريته .. تبي تطلع .. تبي تبات عند صاحباتها .. تبي تطلق .. تبي تخدم .. و احنا كنا مجرد عبأ .. مجرد حمل ثقيل على ضهرها ..
قتله دارت كل شي بدون ادنى اعتبار لمشاعرنا لان بابا مسجون ..
و اليوم بوك قرر يتزوج ..
قالي كيف 😳
قتله عمتك و حناك يبوه يتزوج ..
دار الزمان و بوك طلع و بيعاود حياته ... و امك في السجن .. و تكرر نفس السيناريو .. بتفاصيل مختلفه ..
طبعاً احنا مش من حقنا نعارضوا او يكون لينا رأي .. بس حبيت نحطك في الصورة ..
قالي يتزوج عادي ما يوقف قدامه حد .. حقه و شرع الله 🤚🏻
لكن تطلع أمي قبل .. امي موقوفه كل شي يوقف هنا و يحترموا مشاعرنا .. مش حرب هي كل واحد يرد في ثأره من الثاني ..
قتله به عندك حق .. نوض نحكوا مع حناي .. قالي شن بتحكيلها !!! ردي بالك حد يعرف ان امك موقوفه 🤚🏻
قتله صح نسيت ..
مش عارفه ليش نحس ان اكثر اشخاص نظلموا هما انا و نزار .. إحساسنا بالقهر كان مضاعف ..
و احنا نحكوا جى إياد .. استغربت فيه .. طلع جنبه نزار و حناي ..
و انا خشيت داري و صكرت على روحي .. اتصلت بي سيف .. قتله شن ادير ؟
قالي كيف طلعت من اجتماع .. قتله نبي نطلب منك طلب 🙈
قالي ءأمري ..
قتله معاش نبي يصير شي بيننا لين نرتبطوا .. سكت و بعدين قالي حاضر ♥️
بما أنه صعب عليا لكن حاضر .. حبيتها كلمة نرتبطوا 😍
قتله راضي بوضعي كله ؟ مش ح تصير مشاكل بيننا بعدين ؟
قالي معناها كل ما بنشوفك بيصير بيننا شي 🤨
قتله ليش نحس بتأنيب الضمير انا 😔😔
قالي أبداً مش ح نخليك تحسي بضيقه بكل .. يعلم الله نيتي شنو انا
و الكلام الي قلتيه معاش نبي نسمعه بكل ..
خذيت نفس عميق و قتله حاضر 🙈
خشلي نزار في الدار .. قالي هذا امته تكلم فيك ؟ قتله منو 😳 ؟
قالي إياد ..
قتله اول امس ممكن عمتي كلمت بابا ..
قالي انا براني للدرجة هادي ؟؟ علاش لما قتلك بنسافر ندرق وجهي قتيلي لا ..
تي اهو كلكم بتخطبوا و نخطبتوا و انا ما نعرف شي .. قتله لا انا مش موافقه عليه اصلا ..
قالي معقوله مقعمز يقولي نبي نهدرز على خطيبتي !!😠😠
قتله خطيبة شنو انا ما وافقتش و بابا ما ردش عليهم ..
قالي أنا غير تطلع امك بس و الله ما عاد قاعد فيها البلاد ..
قتله نزار اهدأ 🥺🥺 .. قالي بنطلع انا 😠 ..
طلع نزار و قعدت حناي و إياد ..
