His Howling Voice (Gazellian Series #1)

Chapter 50

"Lily, please fight back. Please, alam mong gusto ka naming lapitan. Gusto ka naming yakapin, kaunting tiis na lang. Kaunting tiis na lang." Sigaw rin ni Evan sa kabila ng mga kalabang nakapaligid sa kanya. Gusto kong umiling sa sinabi niya, kulang na kulang na kami at kung may isang mawala mula sa kanilang mga posisyon madali nang mapapasok ang harang ng Parsua at tuluyan nang masisira ang apat na kahariang piniling talikuran ang patakaran para lamang sa akin.

"You need to fight for us, fight for your life Lily. Babalik tayong buo, babalik tayong pito sa palasyo." Lalo akong lumuha dahil sa sinabi ni kamahalan. Alam kong nararamdaman na nila ang unti unting paghina ng pagpintig ng puso ko.

Lumalaban ako pero hindi na kaya nang katawan ko. Nagpupumilit nang bumaba ang talukap ng aking mga mata.

"Adam.."

"Adam.."

"Adam.."

Pilit ko siyang tinatawag pero wala pa rin akong marinig na sagot mula sa kanya. Hindi ko na siya maramdaman, lalo nang sumisikip ang dibdib ko. Habol ko na ang aking paghinga. Mas lalo na akong nanghihina ngayong hindi ko na maramdaman ang lalaking pinakamamahal ko.

"Dastan!" pakinig ko ang sabay na pagsigaw ni Caleb at Finn. Nagpilit akong igalaw ang aking kanang kamay na parang maaabot ko ang aking kapatid. Dumudugo na ang braso ni Dastan at hindi na niya ito maigalaw.

"Fuck! Behind you Evan!" Akala ko ay tuluyan nang madadambahan ng bampira sa kanyang likuran si Evan nang sabay nagpakita si Harper at Casper sa likuran ng bampirang dapat susugod kay Evan at sabay ang mga itong pinugutan ang bampira ng ulo.

"Harper! Casper!" sigaw ni Caleb. Kita ko ang pagpupumilit lumapit ni kamahalan at Caleb para tulungan ang kambal pero agad silang naharangan. Mabilis tumilapon ang mga katawan ng kambal patungo sa kumpulan ng mga kawal ng kalaban. No!

Nagpumilit humabol si Finn at Caleb pero mabilis silang nahaharangan nang napakaraming bampira. Hindi na makatulong ang iba pang malalakas na bampira ng Parsua dahil lahat ng mga ito ay abala na sa bawat malalakas na bampirang pinadadala ng konseho.

Naubos na ang aming mga babaylan at ang tanging naiwan na lamang ay ang kanilang ginawang harang na anumang oras ay maaari nang masira. Kahit saan tingnan, walang laban ang Parsua kahit marami ang bilang ng malalakas na bampira, kahit apat na hari pa ang magtulong, kaming mga Gazellian, Le'Vamuievos, Viardellon at Thundilloir. Hinding hindi namin matatalo ang natitirang apat na imperyo. Walang kahit anong paraan para manalo kami, bakit kailangang humantong dito? Bakit?

Hindi ko na maramdaman si Adam, hinanap ng aking mga mata ang lugar kung saan ko siya huling nakita. Wala na siya dito, maging ang katawan ni Rosh ay hindi ko na rin makita. Marami nang mga Viardellon ang nakalugmok na sa lupa, maging ang mga Thundilloir na siyang mga namumuno sa Trafadore ay nanghihina na rin, malapit na rin maubos ang aming mga kawal maging mga grupo ni Lucas ay nanghihina na.

Umangat ang dalawang ang prinsipe mula sa akin nang may mga kawal na nagmadaling kumuha sa walang buhay nilang katawan. Wala akong nagawa kundi hayaan silang buhatin at halos madurog ang puso ko nang dalhin sila sa mga nakahilerang bangkay na nagmula sa apat na kaharian. Ang mga bampirang may katungkulan, malalakas na mandirigma, punong babaylan at maging mga heneral ng mga kawal.