روايه جابك اللي جاب لكفوف الصحاري غيمه عقب البطى يحيي شجنها /للكاتبه :عايشه

البارت واحد والخمسين

عيدكم مبارك 🤍
---
زياد مسك يد عبدالله وهو يقول : انت وقف على جنب بغينا نودّع من ورا سواقتك
عبدالله رفع حاجب وبصدمه : الحين حطيتوها بظهري ! مو كل هالشي من ورا اخبار التاسعه اللي جالسه ورا ؟
كيان ب اعتراض : اقووول لا تلصقون الاسم فيني استهدو بالله وش اخبار التاسعه ذا اول خبر اجيبه لكم
ناظرها زياد بطرف عين : ومن زينه من خبر هذا وجهي إذا أنه صحيح ‹ وألتفت على عبدالله › وقف انت الثاني ابي اعرّس وانت واختك بتذبحوني قبل عرسي
وقف عبدالله وهو يضحك بصدمه لأن لثواني فقد التحكم بالدريكسون وبغى يودع !
فتح زياد باب السياره ونزل وهو يلف لباب عبدالله ويفتح وقال : انزل انزل الشرهه علي مخليك تسوق
عبدالله رفع حاجب: انت وش بك صاير نكار لـ افضالي ! صارلي كم ساعه اسوق واخر شي ذا علمك
زياد ضحك وهو يسحبه من يده : على هالسواقه حتى ولدك بتودعه قبل يجي على الدنيا انزل لا يكثر
انفجع عبدالله وهو ينزل ويقول : انت لا تفاول وولدي مايجيه شي مستودعه ربي معليك !
ضحك زياد : ايه ما علي
ركب عبدالله ومشى زياد وكملو رحلتهم على خير
وعدى هالموقف على خير لأن محمد كان متعدي زياد بالسواقه وما شافهم ابو محمد ..!
--
الجبيل
بغرفه ضحى
ريم اللي واقفه وماسكه بدر قالت بضحكه : هاه وش صار حصلتو ؟
ناظرتها خلود بطرف عين وبقهر : لا ابشرك للحين ما حصلنا
ضحكت ريم: قلت لكم اطلبو معاي فستاني بعد بكرا يوصل تخيلوا !
خلود ب استفهام : طلبتي الاحمر ؟؟
ريم هزت راسها بالايجاب: اييه طلبته يجنن مخصرّ ولونه احمر واضح
ضحى بمزح : خير حبيبتي ناويه تنخطبين لا يهونون عني وياخذونك !
ريم بضحكه : لا تستبعدين
ضحى : عاااد الاحمر عليك يمووت مع بياضك وربي يجنن !
ريم تحرك حواجبها تقهر ضحى : عاد الحين حصلي لك لون يوضح أكثر من الاحمر
ضحى عدلت جلستها على السرير : ارسليلي المتجر اللي طلبتي منه ابي اشوف لي واحد ازرق نيلي بيطلع يموووت
ريم بحماس : تدرييين شفت واحد عندهم يموتت يا ضحى بيطلع عليك بيرفكتت
ضحى مسكت جوالها : ارسلي وارسلي رقم الفستان خلاص تعبت من السوق يوم واحد اللي رحته والحين ما احس برجولي
ريم بغرور : شفتو قلت لكم تدلعو وانتم بالبيت تختارون وتطلبون ويوصلكم
خلود رفعت حاجب : وشفيه الشيخ مانع صار قدامي !
ضحكت ريم : خير خير لا تظلمين مانع واثق حيل أنا على الخفيف
ضحى : حلوه هذي لأن الثقه فيها خفيف وكثير
ريم : اقول بس لا تستقعدون لي
خلود بضحكه : بنسكت , لا تموتين علينا بس
---
بحائل - شقة العائله
قامت بسرعه من السرير وانفاسها متسارعه وعيونها مرعوبه من الحلم اللي شافته نزلت دموعها لا اراديا من تذكرت الجزء المرعب من الكابوس اللي داهمها
مسحت دموعها بظهر يدها وهي تقرأ ايات من القران تحاول تنسى اللي شافته بالرغم من كمية الرعب اللي فيه تعوذت من الشيطان وهي تهدي نفسها ب أنه مجرد حلم ومارح يتحقق !
انفتح باب الغرفه بشويش ودخلت ام محمد اللي تحسبها نايمه وتفاجئت من شكلها وعيونها اللي الرعب باقي فيهم
تكلمت بحنيه وقلق من شكلها  : كيان يمه وش فيك بسم الله عليك !
ناظرت كيان امها وعلى طول من سمعت الحنيه اللي بصوتها صاحت وهي تخبي وجهها ب كفوفها
جلست ام محمد جنبها وبخوف حضنتها وهي تسمي عليها وتساؤلات تدور بداخلها وش فيها !
تركتها كانت نايمه براحه وما فيها شر
هدت كيان بعد وقت ولكن شهقاتها باقي مسموعه
ام محمد بحنيه : وش فيك يا عيون امك
كيان بشهقه : كابـ..وس يمه والله خـفـ..ت ما اد..ري شلون اول مره اشوف كذا !
مسحت على رأسها ام محمد ويحميه : وش شفتي علميني ؟
عدلت جلستها كيان وهي تمسح دموعها وتحرك أيدينها تشرح ولـ امها : مد..ري شفت نفسـ.ـي بغـر..فه مليانه مويـ..ه كنت اغـ..رق مو قادره اتنفس بعدين حصلت شباك يوم جيت بفتحه اطلع الا اشو..ف فهد قاعد يغرق ومرتخي كأنه ميت وفي حيـه تدور حوله ‹ رجعت تبكي ب انهيار › والله يخوف يمه كنه حقيقي
ام محمد اللي خافت من الحلم : اعوذ بالله من ابليس  بسم الله عليك لا تفكرين فيه أكييد من نومه هالعصر قلت لك لا تنامين ما تطيعين كلامي
مسحت كيان دموعها وهي تهز راسها بالرفض : ما لها دخل النومه والله يايمه كنه حقيقي وصاير ما صحيت الا وانا اشهق علشان اتنفس ما كنت قادره أخذ نفس
مسحت على رأسها ام محمد وهي توقف وقلقها يتزايد لكن تخفيه عن كيان : تعوذي من ابليس يا يمه بجيب لك مويه وانتي قومي غسلي وجهك وصلي العصر
طلعت ام محمد بقلق تاركه كيان تهوجس بالحلم اللي مو راضي يروح من بالها
بطريقها للمطبخ شافت زياد اللي خاف من وجه أمه الخايف !
سأل بقلق : وش بك يمه صاير شي ؟
هزت راسها بالرفض : لا مافي شي بس كيان تعبانه شوي
ضحك زياد : كل هذا علشان قلنا لها بتروحون معانا لـ بيت الشيخ فهد !
ابتسمت ام محمد بشحوب : يمكن ، الحين ابعد خلني اجيب لها مويه وشي تأكله ما كلت شي
توجهت ام محمد للمطبخ تاركه زياد اللي استغرب وتساءل معقوله بس تعب ؟
توجه للغرفه اللي فيها كيان وطق الباب وثواني وجاه الرد من كيان اللي قالت : ادخل
ابتسم رغم قلقه اللي زاد من صوتها المبحوح فتح الباب وقال بمرح : ام سعود وش متعبها ؟
---
ابتسمت كيان اللي روقت شوي عقب ما غسلت وبدلت لبسها : أما ام سعود يا اخوي اصبر اتزوج وعقب ألصقه فيني
ضحك زياد وهو يحضنها وبراحه: اشوى دامك مروقه اجل مافي تعب
شدت عليه كيان وهي تبتسم : لا معليك بخير
ابتعد زياد وبمزح : أجل اخليك تجهزين علشان بعد المغرب بنروح بيت فهد
ابتسمت كيان براحه ما تدري ليه وسوست أن ممكن فهد صار له شي علشان كذا حلمت فيه بهالشكل
لكن دام ما تكنسلت الروحه اكيد هو بخير !
ما انتبهت على زياد اللي طلع من الغرفه صحت من سرحانها على صوت الباب اللي تسكر جلست على الكنبه وهي تمسح على قلبها اللي ماهدى من صحى
اول مره يصير معاها كذا ما تتذكر انها بيوم شافت كوابيس وهي نادرا ما تشوف احلام علشان كذا اذا شافت حلم توسوس فيه ويارب أنه يكون حلم عابر وماله معنى !
---
دخلت ام محمد بالصينيه اللي فيها اكل وعليه مويه
وكيان من شافت الاكل حست انها بتستفرغ ‹ اكرمكم الله › وقالت بتعب : يايمه والله مو قادره أكل ليه تجيبين وتتعبين نفسك !
ناظرتها ام محمد : وتبيني اخليك تطلعين من البيت بدون اكل ! بتاكلين سويت لك البيض زي ما تحبينه دايم تقولين تحبين بيض العيون ينشف تنازلت اليوم عن طريقتي وسويته لك زي ما تبين
ضحكت كيان رغم شعور الانقباض اللي بمعدتها اللي مو قادره تتخيل انه يدخل شي فيها : لازم اسجل هالحدث بالتاريخ !
ام محمد قربت لها الصينيه وب إصرار : لا تسجلينه كوليه وتسوين خير !
---
ضحكت كيان وهي تقرب من الصينيه وتغصب نفسها تاكل علشان امها اللي مارح تتطمن الا بعد ما تشوفها كلت كم لقمه وبعدها قسمت من الخبز وجت بتكمل اكل ويداهمها شكل فهد وهو غرقان وحوله الحيه حست انها مو قادره تكمل اكل وتجمعت الدموع بعيونها غصبت نفسها تاكل اللقمه وهي تحاول تداري نفسها علشان امها لا تخاف عليها حست باللقمه وقفت بحلقها كحت بقوه علشان تنزل اللقمه اللي على مايبدو دخلت مجرى التنفس بدل مجرى الاكل رجعت تكح بقوه نزلت دموعها لا اراديا من كل هالاشياء اللي اول مره تصير فيها ومو عارفه وش السبب !
خذت ام محمد كاس المويه وشربتها غصب بخوف : بسم الله عليك يايمه وش فيك اليوم
شربت كيان اوابعدت كوب المويه عن فمها وحطت يدها على قلبها تحاول تهدي نبضاتها اللي تلخطبت
ام محمد مسحت على رأسها : لا تروحين معانا اليوم
انتي تعبانه ارتاحي حسبي الله على ابليس بس
تعوذي منه يايمه ولا تفكرين باللي شفتيه
هزت راسها كيان بالايجاب وهي تحاول تمسح دموعها اللي ما توقف
قومتها امها تسندها للسرير اللي يتوسط الغرفه وهي تساعدها تنسدح فيه
مسحت على رأسها بحنيه وهي تقول : ارتاحي يايمه بسم الله عليك والله عين وما سمت
غمضت عيونها كيان وام محمد توجهت للصينيه تشيليها وهي بقلبها غصه على وحيدتها وش قلب حالها كذا ؟
---
فتحت عيونها الممتليه دموع اول ما طلعت امها
وسمحت لها تنزل من جديد ما تدري وش صابها وش ب هالحلم !
ما تبي تصير موسوسه ما تبي تأثر على أهلها وعلى زياد المتحمس لملكته وفرحاان فيها
بس غصب عنها هالشي هي ما تحلم الا نادرا ف ليه بهالوقت تشوف هالحلم اللي متعلق بفهد ؟
سحبت جوالها وهي تضغط ب أصابعها على الكيبورد بسرعه تكتب اللي فكرت فيه ناظرت اللي كتبته لثواني وبعدها ضغطت ارسال
شغلت قران وهي ترجع تقفل جوالها وتغمض عيونها على أمل ترجع تغفى من جديد ...

---
طلعت ام محمد من الغرفه وهي تمسح دموعها اللي تغافلتها ونزلت من زعلها على وحيدتها
ما تقدر تمسك نفسها قدام كيان اللي ما جت الا بعد اربع عيال وكانت فرحتها فيها ما توسعها هالدنيا
ومع شقاوة كيان ووناستها وضحكها الدائم
ما تقدر تشوفها تعبانه وحزينه بهالشكل !
دخلت الصينيه للمطبخ وتوجهت للغرفه اللي جالسين فيها ابو فهد والعيال .
فتحت الباب وهي تحاول تروق علشان لا تخبص عليهم الجو
ابتسم زياد أول ما شافها وبمداعبه : ياهلا بـ ام المعرّس يا هلا ومرحبا تو تنور الغرفه
ابو محمد رفع حاجب : عسى ما شر شيخ زياد مضيع زوجتك ؟
ضحك زياد : هذي راس المال قبل نفسي وقبل زوجتي
ضحكت ام محمد
عبدالله : والله شكل رأس المال يا زيود صدرها ماعاده شمالي ويتحمل
ام محمد ابتسمت رغم الضيقه مايفهمها أحد كثر عبدالله ياهو حنيّن : يافديت قلبك يايمه ما فيني شي
ابو محمد : والله شكل ي ابوك ماهوب بس ضايق صدرها الا والله ماعاده يوسع مزوح وضحك
ام محمد : وانتم وش فيكم علي ضايقتن شويتين على كيان ولا ما بي بلاء
عقد حاجبه ابو محمد : كيان ؟ وشبها
ام محمد : والله ماهيب زينه ياهي ضايقه فيها شايفتن حلم شين وضايقن صدرها
ابو محمد : اعوذ بالله لا تفاولين بالشين ياحرمه حلم شين من الشيطان تتعوذ من ابليس ولا هو جايه شي الا ب أمر ربي
محمد يتساءل : صاحيه هي ؟ بقوم اشوفها
ام محمد : والله ما ادري يا امك شفها كأنها صاحيه اجلس عندها ونسها وجدان تعبانه ولا هي قادره تجلس معاها
محمد باس راسها : تبشرين يا ام محمد بس لا يضيق صدرك انتي
ابتسمت ام محمد : الله يرضى عليك يا ولدي ويرزقك من هي تستاهل قليبك
محمد : امين يايمه امين
-

عند فهد - بمجلس ابو فهد
كان يسولف مع واحد من اخويا ابو فهد عن مواضيع مختلفه ومندمج معاه ناظر جواله من اشتغلت الشاشه وارتفع اشعار رساله من الواتس
ناظر الرجال يتحراه يخلص السالفه وباله ومع الاشعار اللي اعتلاه اسم ‹ أم سعود ›
ابتسم للرجال اول ما قضى من السالفه وسكت
مسك جواله وفتحه يشوف وش مرسله وعقد حواجبه من غرابة الرساله
‹ السلام عليكم
ادري مستغرب مرسله لك بس انتبه لنفسك
حلمت فيك حلمٍ شين استودعتك الله ›
رغم غرابتها لكن من قرأ ‹ استودعتك الله › ابتسم لا اردايا من حنية الجمله
استأذن وهو يوقف تارك الرجال من أبوه وسلطان
و بمجرد ما غادر المشب اتصل عليها

---
بغرفة كيان
صدى صوت رنين الجوال بالغرفه
فتحت عيونها بتعب وهي تناظر الجوال عدلت جلستها وهي تتكلم كلمات عشوائيه قبل ترد لعل وعسى يتعدل صوتها ويوم فقدت الامل والبحه ما فارقت صوتها ردت ببحه : هلا
فهد : السلام عليكم
كيان : وعليكم السلام
فهد عقد حواجبه : شفيه صوتك كذا ؟ تعبانه
كيان عضت على شفايفها وهي تحرك شعرها مو عارفه وش تقول : اي ... لا مافيني شي
فهد رفع حاجب : ياسلام وهالبحه اللي بصوتك ماهي بحه تعب
كيان ب استسلام : تعبانه شوي بنام شوي واصير احسن
فهد ب استفهام : يعني ما رح تجين اليوم ؟
كيان وهي تلعب باللحاف : لا
فهد بتفهم : طيب انتبهي لنفسك واشربي سوائل حاره يزين حلقك عليها
كيان بهمس : طيب
فهد : بسكر الحين عند الوالد ضيوف وبرجع اتصل عليك بعدين انتبهي لنفسك
كيان : استودعتك الله
قفلت كيان بنفس اللحظه انطق الباب .
----