روايه جابك اللي جاب لكفوف الصحاري غيمه عقب البطى يحيي شجنها /للكاتبه :عايشه

البارت الثاني والعشرين

----

في بيت اول مره نجيه
بيت جد فهد أو بيت ابو نايف
اول شي نعرفكم بالشخصيات الجديده

" ابو نايف : 63 سنه رجل اعمال يشتغل ب اعمال حره "
" ام نايف : 61 سنه ربه بيت وحنووونه بالشكل اللي يخلي اي واحد من عيالها يصير معه شي يجي يعلمها وأبو نايف يموتتت فيها وكلمتها عنده مسموعه "

عيالهم - بنت وحده و ٤ عيال وفرق الاعمار بينهم بسبب مشاكل الحمل اللي كانت عند أم نايف اللي كانت ما تخليها تحمل الا كل فتره طويله -

---

" نايف : ٥٣ سنه متزوج بالقصيم وعنده ثلاث عيال بنتين وولد "
" نوره : ٤٥ سنه مطلقه وام لولد واحد واللي هو فهد "
" حامد : ٣٧ سنه متزوج من ثلاث سنين وباقي الله ما رزقه بعيال ويشتغل بالتجارة بشكل عام "
" متّـام : ٣١ سنه اخر عيال ابو نايف وهو اللي ماسك الشغل مع أبوه أو فعليا من سنتين مسك الشغل كله اقرب واحد لـ فهد من خواله
دارس اداره اعمال واعزب مو متزوج "

------

انفتح باب البيت ودخل متّام اللي توه جاي من الشغل بعد ما اتصلت فيه أمه وقالت له أن ادويه أبوه خلصت كان مستعجل خصوصا أنه مخطط يكلم فهد ويشوف وش صار معه خصوصا أن فهد كلمه أمس وقال له أنه مشى للديره
دخل للصاله اللي كان كل مافيها ينطق بالفخامه واللون الذهبي الطاغي مع البيج
الديكور والثريا والكنب كل شي يعبر عن الفخامه
شاف الصاله فاضيه ومافيها أحد عرف أن أبوه رجع ينام بعد الفطور وأمه اكيد عند وحده من الجارات حط كيس الادويه على الطاوله الزجاج اللي كانت للاكل وحاطينها بوحده من زوايا الصاله
ودخل المطبخ ياخذ اي سناك قدامه لأن من أمس مو ماكل شي والصباح عيّا يفطر علشانه كان مستعجل ابتسم على حنيه أمه وكيف مفكره فيه اول ماشاف العلبه اللي محطوطه على اول رف من الثلاجه ومسكره كانت مقطعه له فواكه وحاطتهم بالعلبه عارفه ولدها وش ياكل اذا فتح الثلاجه وهو فعليا كان فاتح الثلاجه يبي يدور اي نوع من الفواكه
اخذ العلبه وجلس على الكرسي حق طاوله المطبخ بعد ما فتح العلبه وأخذ ملعقه
وبدأ ياكل وهو عقله مشغول بكل شي ممكن يصير الايام الجايه واول شي مشاكل أخته نوره وزوجها سعود
تنهد بـ هم وهو فعليا يلوم أبوه ونايف اللي اجبرو سعود يطلق نوره بس علشانه مو من مستوى نوره المادي ناظر البيت وهو بالنسبه له مو مقياس ياما ناس معهم فلوس بس ما فيهم ولا ذره اخلاق والعكس صحيح
صح أن أبوه ونايف ماكلهم الندم خصوصا أن نوره عيّت تتزوج عقب سعود وصار لها ٢٧ سنه على هالحاله ولا رضت تطلع من البيت اللي كانت ساكنه فيه مع سعود !

--------

الديـره
بيت ابو محمد - المجلس الخارجي
تقلب فهد للجهه الثانيه وفتح عيونه وهو يحس أنه فلّلّ نوم عقد حواجبه يوم حاول يسمع اذا فيه صوت لكن مافيه ولا صوت والعيـال ! اول ما استوعب أنه اصلا ببيت حاتم نقز بسرعه وهو يسحب جواله يشوف كم الساعه وانصدم فعليا كانت قريب العصر
هو نايم من الساعه ٨ الصباح شلوننن وهو بحياته ما نام ببيت غير بيتهم شلون نام كل هالوقت وهو متوقع أنه مارح يقدر يغفى
استغفر ربه اول ما استوعب أنه اخر صلاه الظهر مسك جواله واتصل على أمه يشوفها
ومن اول رنه ردت : هلا يمه صحيت؟
فهد مسح على وجهه : هلا بك يمه اي والله تو صحيت ليه ما صحيتيني اخرت الظهر
ام فهد : يايمه منت نايم من أمس قلت اخليك
فهد : اجل لا هنتي يايمه شوفيلي طريق ولا تعالي لي ابي اطلع اتوضى وألحق صلاه الظهر قبل العصر
ام فهد : يلا يمه جايتك