روايه جابك اللي جاب لكفوف الصحاري غيمه عقب البطى يحيي شجنها /للكاتبه :عايشه

البارت السابع والعشرون

---
حايل - بيت ابو سلطان
صحى سعود بعد ماصحاه سلطان لأن المستشفى اتصلو عليه وقالو لازم يجون
وحلف ابو سلطان مايطلع سعود الا وهو مفطر
عاد بهالحاله وبما أن مافي الا ليالي اللي مانامت
قال لها ابوها تسوي الفطور
دخلت المطبخ وهي تحس بالحقد على سلطان اللي قاعد يرجع لها ذكريات ماتبي تتذكرها هي
خلاص قاعده تحاول تنسى صارلها سنه من تطلقت من سعود لين متى بتطول هالسالفه؟
تنهدت وهي تحط سكر بالشاي وتفكر بحال بنات عمها وعمها اللي للحين ماصحى
رغم كل اللي حصل عمها ماله شغل سعود هو المسؤول عن قراراته مارح تحمل عمها مسؤوليه اللي سواه سعود هو يبقى احب عم لها من صغرها وهي تعزه غير عن كل عمانها وللحين دعت من كل قلبها أن ربي يرده للحياه ولعياله ب اسرع وقت !

---

بالمجلس
جالسين سعود وسلطان وأبو سلطان
ما تكلم ابو سلطان عن موضوع طلاق سعود لليالي خصوصا بعد ما قال له سلطان أنه لا يطري الموضوع نهائيا ويتصرف كأن ليالي وهم نسو الموضوع والموضوع تسكر
وهالشي اللي حز بخاطر سعود كان وده أنهم يعاتبونه أو حتى يضربه سلطان لكن خيبة أمله ردة فعلهم وتأكد من كلام سلطان وان ليالي خلاص نسته والمفروض حتى هو الحين ينـساها !
ابو سلطان : ها ياسعود منت ناوي ترجع لحايل لازم تقدم نقل ب اسرع وقت ماينفع تطول ب أجازتك ولا هوب زين تترك خواتك واهلك هنا لحالهم
سعود بـهم : المشكله ان ماصارلي سنه من قدمت على النقل للقصيم ماهقيت يوافقون على نقلي
ابو سلطان : انت توكل على ربك وقدم على نقل أن وافقوا كان بها
سعود : أن شاءالله على خير
ابو سلطان: قم ياسلطان شف اهلك خلصو الفطور أو لا
سلطان: ابشر يبه
طلع سلطان يشوف الفطور وأبو سلطان بدأ السواليف مع سعود عن أخباره بالقصيم وكيف الوضع عنده ،

-------
الديره
بمحل ابو محمد
طبعا المحل مارح يكفي كل العيال وأبو محمد وابو راكان فقرروا أن محمد وعبدالله يجلسون مع ابوهم وعمهم
والباقين مانع وراكان زياد وحاتم وفهد طلعو يتمشون بالديره ويعرفون فهد على الأماكن اللي فيها
حاتم اول ماشاف مكان معين ضحك وهو يلتفت على مانع : تذكر هالمحل؟
ضحك مانع يوم اجتاحته ذكريات الطفوله : يووووه يعمّاار صدق !
حاتم لف على فهد وهو يقول : ذا أكثر مكان كنا نجلس فيه يوم نهج من المدرسه كان محد يجيه نجيب ورق اللعب واكلنا ونلعب على مايخلص وقت المدرسه
ابتسم فهد : لا عاد تهجون من المدرسه !
مانع : والله ياهي كانت وناسه وقتها وكنا ننقفط من أهالي عيال الحاره وننطق ولا نتأدب
فهد ب استغراب : وش دخلهم هم؟
مانع : هذا الله يسلمك عندنا بالديره اي واحد يشوف عيال جيرانه يسوون شي غلط يعاملهم معامله أنه ابوهم يطقهم ويسحبهم ل اهاليهم ولا أزيدك من الشعر بيت فوق انك تنطق من الرجال ابوك يحب رأسه علشانه يربي ولدك !
ضحك فهد : منت صادق يحب رأسه علشانه طق ولده !!
زياد ضحك : ماشفت شي بعد الناس هنا يتعاملون معامله الاعمام والخوال مع بعض الكل يحق له يربي عيال الثاني
فهد ابتسم: غريب الموضوع بس حلو والله حاب أنا كميه الترابط بين الناس
راكان : هو حلو بس له جانب سلبي
فهد : اكيد كل موضوع مارح يكون إيجابي بكل شي
مانع نغز حاتم اول ماشاف ابو مزنه : شف شف ابو زوجتك المستقبلي قم حب رأسه
ضربه حاتم على يده بقوه : انكتم لا اكتمك ويخسي ويعقب اناسبه
مانع مسك يده بوجع : طابوقه مو يد وش تاكل انت!؟
حاتم : بعير وش اكل يعني ؟
زياد بضحكه : فشلتونا عند الرجال كل واحد طول وعرض وهاذي علومكم؟
حاتم : اكيد شايف اخوانه لا تحسب حنا الوحيدين اللي كذا صح فهد؟
فهد سكت اخوانه؟ ابتسم بشفقه على حاله اي اخوان بالضبط اللي ما عرفهم الا من كم شهر ؟ضيع الموضوع : الحين حنا وين رايحين اشوف مغير نحوس بهالديره
راكان : خل نرجع للمحل دامنا فرينا الديره نجلس نتقهوى ونسمع لسواليف الشياب الحين يتجمعون عند عمي

-----
حايل - المستشفى
خلصو الفطور وعلى طول طلعو سلطان وسعود للمستشفى وبمجرد ما وصلو عند باب العنايه شافو الدكتور طالع من الغرفه ووجهه منقلب
اول ما شاف سعود طبطب على كتفه وقال : ادخل ياولدي ابوك يبغى يشوفك
سعود انعقدت حواجبه ب استغراب من تصرفات الدكتور لكن ما ركز على طول دخل الغرفه عند أبوه واول ما شاف وجه أبوه عرف
ليه تعابير الدكتور كانت كذا !
ابو سعود اللي كان باين التعب بوجهه والمرض كان وضعه سيء ولدرجه مو معقوله قرب سعود بخطوات بطيئ من أبوه وأيده ترتجف كل الأفكار السيئه اجتاحت تفكيره بعد ما شاف وجه أبوه عرف أن لا خلاص من القدر باس راس أبوه ومسك يد أبوه بيده المرتجفه
ابو سعود ابتسم بتعب بصوت ضعيف من المرض والتعب : سعود ياوليدي
سعود والدمعه بعينه : امريني يبه
ابو سعود بتعب : ابي أوصيك على امك وخواتك لا تتركهم انقل لحايل ياسعود مالهم غيرك من بعدي لا تخلهم يحسون أنهم فقدوا سندهم بعدي
سعود برجاء : لا تقول كذا يايبه بعد عمر طويل بتزوجهم وتفرح فيهم
ابو سعود ابتسم بتعب : ما باقيلي كثير بالدنيا يايبه ولا رح يمديني افرح بزواجك واشوف عيالك
ياسعود لا تتخلى عن ليالي محد يناسبك كثرها هذي وصيتي ياسعود ما تتزوج الا بنت عمك ليالي مافي احد بيراعي وضعك من امك وخواتك غيرها ولف ابو سعود على سلطان وصيتي يا سلطان ليالي ما تاخذ الا سعود
سلطان بغصه : ياعمي لا تقول كذا بعد عمر طويل أن شاءالله
ابو سعود بدأ فعلا يتعب من الكلام وصوته بدأ يخف : ما ابي ارجع أوصيك ياسعود مال لـ امك وخواتك غيرك من بعدي انتبه لهم
سعود خلاص مو قادر يتحمل انهار يبكي خصوصا بعد ما ابو سعود غمض عيونه وكأنه يودع الدنيا
لف على سلطان ب انهيار : خلهم يجون يشوفونه أنا متأكد مارح يروح ويخليني لحالي هو كان ينتظر يشوفني معّرس كيف يروح وهو باقي ما شافني هو قال بقنع عمك يرجعها لك واشوف عيالكم كيف يروح كذا
سلطان حضن سعود وهو يقول بحده : حتى لو جو مارح يمنعون قدر ربك ياسعود مارح يمنعونه هذا يومه
انهار سعود يصيح ابـوه وخلاص غـادر هالدنيا تارك على كتفه حمل ثـقيل والله يعينه على اللي جاي
-------
الديـره
رجعو للبيت وخلاص قرروا يجلسون ولا يفتحون المحل بعد العصر لان عبدالله وفهد بيمشون
فعلشان يمدي العيال يجلسون معاهم
خلاص سكرو المحل ورجعو البيت
وفعلا العيال جهزو الجلسه وقهوه وشاهي وحلا
وبدت جلسه السواليف الاخيره من غير شر
حاتم : تدرون المفروض أنا اللي ارجع مب انتم لاني راعي دراسه مو شغل
عبدالله  : اي لو انك مهتم للجامعه كنت بترجع معاي
حاتم: لا أنا رجلي على رجل اخوي حبيبي زياد ما اتحرك بدونه وبعدين كيف تبيني امشي واخلي هالوحوش "وأشر على مانع وراكان " عند اختنا
عبدالله ضحك : حاتم صحصح تراها اختهم بعد
حاتم : حتى ولو اختي من دمي بس هم اختهم من الرضاعه بس
زياد ضرب جبهته : حاتم منت صاحي رح نام الله يصلحك
اما مانع وراكان كانو ماسكينها ضحك من بدأ حاتم يتكلم
سكتو العيال وبدو يسمعون لسواليف ابو راكان وأبو محمد
خلونا نتركهم يسولفون ونروح لمكان ثاني !