روايه جابك اللي جاب لكفوف الصحاري غيمه عقب البطى يحيي شجنها /للكاتبه :عايشه

البارت العاشر

لايك و كومنت م أحلل القراءه بدونهم ✨.

----
مر الليل صعب على ابطالي

فهد : اللي م تركته الهواجيس الا يوم صلى الفجر ونام بعد م شغل قران لأنه أيقن أن الشيطان بيبقى يوسوس له لو م شغل!

سلطان : اللي تعب من تفكيره واستسلم بالاخير ونام بعد م انتصف الليل وصحى على الفجر يصلي ورجع له الأرق وغصب نام بعد ماصارت الساعه أكثر من ٦

عبدالله : اللي م قدر يرجع يكلم وجدان خصوصا أنه هو و زياد وحاتم نامو بنفس الغرفه ! وتعب وهو يفكر كيف بيجلس اسبوعين بعيد عن وجدان !

حاتم : اللي كان كل همه كيف بيداوم بالمحل ويتحمل تهزيء أبوه لـ اسبوعين وصار وده الايام تعدي بسرعه علشان يرجعون حايل!

-----

الصباح
بيت ابو محمد
كان صوت العيال اللي صحاهم ابو محمد
غصب مالي البيت وكيان اللي كانت شعره وتنجن منهم لأنهم فعليا م تركوها بحالها كل شوي جاي واحد يطلب شي اللي يبيها تكوي ثوبه وشماغه واللي يبيها تستعجل بالفطور واللي يسألها وين حاطه ثوبه اللي من عصر جدي م لبسه ولا طرى على باله !
واخيرا خلصت الفطور هي وامها وودته للصاله اللي كانو جالسين فيها
حاتم اول ما شافها قال بزهق : واخيرا جاء الفطور مابغيتي تخلصينه
كيان تخصرت بعد م حطت الصينيه بالأرض : نعم استاذ حاتم محسب يوم تقول تبي فطور فيه عصى سحريه تجيبه يعني ولا كيف؟
طنشها حاتم وقرب للصينيه وهو ياكل على الخفيف علشان لا يبان ويهزئه أبوه أنه بدأ قبل يجون
طلعت كيان من الصاله متوجه لغرفه العيال علشان تشوف وش اللي صار لهم ساعه يصدعون راسها يبغونه!

----

---

بيت ابو محمد
طقت باب غرفه اخوانها وجاها صوت زياد :
تعالي كيان
فتحت الباب ومدت رأسها : كيف عرفت انها انا ؟
زياد بـ استعباط : ليه حاتم مؤدب كذا ؟ ولا لا يكون عبير بتجي عندنا
ضحكت كيان : تكفى لا يسمعك حاتم واصله معه من الصباح علشانه بيروح مع ابوي
زياد ب فقدان امل من حاتم ؛ هالولد مستحيل يتعدل  !
كيان : حرام والله يحزن جاي وهو مخطط على أنها عطله وانصدم بالواقع المر
زياد : خليه ينكرف ويشيل مسؤوليه
كيان : بدري عليه المسؤوليه
زياد : وين بدري عليه هالسنه بيتخرج لين متى بيتهرب من المسؤوليه والشغل ؟!
كيان : علشانه اخر ولد متدلع !
زياد وهو يناظرها بنص عين : انتي المفروض تتدلعين مو هو
كيان شتت انظارها عن زياد وهي تضيع الموضوع : معليك مني يالله تراني خلصت الفطور ألحق قبل يأكله حاتم لحاله
زياد : يالله اسبقيني وبلحقك .

--

بعد الفطور طلعوا زياد وحاتم
مع ابوهم وكل م يمرون من جنب واحد من رجال او عيال الديره يسلمون عليه ويبدأ يستلمهم اسئله عن حايل وعن الوضع بالمدينه واسئله لا نهائيه وم صدقو وصلو المحل وفتحوه جلس حاتم جنب زياد وهو يهمس له : ياخي ذا ابو سليمان يا انه م ينبلع معاي نشبه نشبه م ادانيه !
زياد وهو يكتم ضحكته : بعذرك تكرهه ياهو طقك طق يوم كنت بالمتوسط
حاتم كشر : الله يأخذه على كثر م كان ناشب لي على كل حركه ويهاوشني ويقول عني صايع علشاني مجمع عيال الديره ضد ولده
زياد : بعذره والله م خليت أحد بالديره الا وخليته يطق سليمان رغم أنه أكبر منكم وكان بالثانوي !
حاتم ب استنكار : وانا شدخلني إذا هو مو معلم ولده يكون قد حاله ويكون رجال هو م يدافع عن نفسه وعيال الديره كانو يبغون واحد كذا علشان يطقونه
زياد : لا تجحد يالكذوب انت كنت ماسك كل عيال الديره ويسمعون كلامك وانت اللي كنت تقولهم يطقون المسكين يالمشراني
حاتم كشر : والله مغيرك المشراني مو ذنبي إذا أنه ضعيف شخصيه وم يعرف يدافع عن نفسه
زياد ضحك : ضعيف الشخصيه اللي مو عاجبك صار دكتور يابابا وانت باقي تدرس كيمياء !
حاتم : والله مو هامني دكتور ولا محامي درس لنفسه مو لي
زياد : ياصبر الأرض عليك بس
قام زياد متوجه ل أبوه بعد م سمع صوته يناديهم يساعدونه...

--

بالمركز
بمكتب فهد
كان فهد جالس وباين الإرهاق بوجهه
وغياث كان جالس قدامه ويناظره ومستغرب من حاله فهد الغير معتاده .
غياث : فهد وش رايك تأخذ اجازه ؟
فهد رفع رأسه يناظره ب استغراب : ليه وش الطاري؟
غياث عدل جلسته : انت صار لك زمان م اخذت اجازه صح ؟
فهد : اي
غياث : واهلك من زمان م طلعتهم ولا سفرتهم وش رايك تأخذ اجازه وتطلع الديره اللي قريبه لنا والله يمدحونها ويمدحون أهلها ومنها انت واهلك تغيرون جو وانت تصفي راسك وترجع بطاقه جديده؟
فهد تعدل والفكره أعجبته خصوصا أن امه صار لها زمان م طلعت لمكان برا حايل ولا تروح لغير جاراتها : تم أجل قام بسرعه ومسك جواله وهو يمسك ورقه ويكتب فيها أنه يبغى اجازه والخ... وعقب ناظر غياث وابتسم: يسعد دينك على هالفكره والله جات بوقتها
غمز له غياث : أجل ألحق على خالد علشان يوقع لك ورقه الاجازه قبل يطلع
ضحك فهد وهو طالع من مكتبه ومتوجه لمكتب خالد مدير المركز علشان يوقع له ورقه الاجازه وهو فعليا كان محتاج هالاجازه وهالفكره اللي جات بوقتها منها امه تغير جو ومنها هو يصفي راسه شوي !.

---

بيت فهد وأمه
دخل فهد البيت وكانت أمه جالسه بالصاله واستغربت اول م شافته داخل عليها وهو ماله كم ساعه من داوم
تقدم ل امه باس راسها : السلام عليكم يالغاليه
ام فهد : هلا يمه وعليكم السلام صاير شي معك؟
فهد ضحك وهو يجلس جنبها ويطوق كتفها ب أيده : لا والله يايمه مو صاير شي لكن بنسافر !
عقدت حواجبها امه وهي تحس انها ما سمعت صح : وش قلت ؟
فهد : بنسافرر يالغالية شفتي الديره ال... اللي جنبها؟ بنروح لها كم يوم نغير جو
أم فهد تعدلت واستانست : بالله علييك والله جت بوقتها !
فهد : اي والله علشان كذا اخذت اجازه خلاص وبنروح لها بس عقب كم يوم علشان اشيك على السياره وتضبطين أمور الشنط والسواليف هذي وعقب نمشي
ام فهد : كم بنجلس هناك علشان اعرف كم لبسه احط لك
فهد : مو اقل من اسبوع لأني ماخذ اجازه اسبوعين
ام فهد : على خير ان شاء الله

--