روايه جابك اللي جاب لكفوف الصحاري غيمه عقب البطى يحيي شجنها /للكاتبه :عايشه

البارت الثالث والعشرين

------

الجبيل - ريم وفيصل

ما سمعت وش قالت البنت لكن اول ما سمعت فيصل يزفر وسكت مده عرفت أنه سكر خلاص رصت على أيدها أكثر وعضت شفتها تحاول تتحكم بمشاعرها ما تقدر تقول أنها ما تغار وهي اللي كانت تحبه لـ سنتين ونص وحتى لو ما تحبه هو زوجها ما رح ترضى يكون يكلم بنات غيرها !
فتحت باب الغرفه ودخلت متوجهه للدولاب تطلع لها ملابس وهي تحاول ما تناظر بفيصل اللي انفجع اول ما دخلت الغرفه وتوتر هو يبي يشوف هل سمعت شي او لا !
طلعت لها ريم ملابس كان جينز ازرق فاتح وبلوزه بيضاء برسومات وكلمات خفيفه
اخذت لبسها ودخلت تتروش وهي تحاول تمثل انها طبيعيه
وبمجرد ما دخلت الحمام انهارت على الأرض وهي تصيح وكاتمه صوتها ما تبيه يعرف انها منهاره علشانه تحس الكره تجمع بقلبها مو قادره تناظر بوجهه وهو خادعها لـ سنتين ونص ويمثل أنه يحبها وهو هايم بغيرها !

-------

بيت ابو محمد
كانو جالسين ضحى وكيان بالمطبخ ويسولفون وحاطين حلا وعصير ويسولفون دخلت عبير اللي من يوم تكلمت كيان وهي حاقده عليها وتبي الزله علشان تتهاوش معاها مسكت كاسه على أساس بتشرب مويه وطيحتها متعمده وشهقت تمثل الصدمه : يوووه كله من المويه اللي على الكاسه لو هي منشفه زين ما طاحت
كيان ضحكت بسخريه وببرود ينرفز : متأكده أن البلا من الكاسه مو من يدك اللي ما تعرف تمسك شي ؟
ضحكت ضحى بصوت عالي واستفزاز وهي جايز لها وضع كيان اللي صايره ما تسكت على شي
عبير بعصبية: وش قصدك ؟
كيان بلا مبالاه وهي تشرب من العصير : اللي فهمتيه حياتي
عبير ضربت الطاوله بيدها : هين ياكيان أن ما علمت محمد ما اكون عبير
ضحكت كيان بصوت عالي : حبيبتي لا انتي ولا محمد بيدكم شي تسوونه لي ابوي وموجود وموو بس اخو 5 اخوان والله لـ يكسرون ايدينه لو فكر يمدهم
عبير طلعت من المطبخ وهي تفور وتغلي
وكيان ناظرت ضحى وضحكت هي واياها على شكل عبير المقهوره !

---------

اليوم التالي
بالديره
اليوم قرر ابو محمد يسوي عشى علشان فهد ورغم اعتراض فهد على الموضوع وخصوصا أنه فعلا منحرج من كرم هالناس وكيف اكرموه هو وأمه إلا أن ابو محمد كان مصّر
وبدت التجهيزات عند البنات من الصباح خصوصا أن العشى حريم ورجال وفعليا البيت منقلب فوق تحت وكل وحده مستلمه شي وعبير اللي أجبرتها أم محمد تقوم تشتغل غصب خصوصا أن حتى ام فهد عيّت تجلس وقامت تساعد بالترتيب والطبخ !
عند كيان وضحى اللي كانو قالبين الحوش ساحه رقص واشكالهم تموت ضحك الأرض كلها مويه وصابون ويتزحلقون وأصوات الضحك ماليه الحوش
ام محمد اللي كانت متوتره وتبي يخلصون كل شي قبل العشى طلعت تهاوشهم علشان يخلصون بسرعه : كيااان اخلصييي باقيلكم مجلس الرجال ماسويتو فيه شي خلاص صرنا قريب العصر لين متى بتجلسون على تنظيف الحوش
كيان : خلاص يايمه تقريبا خلصنا
ام محمد بتهديد : خمس دقايق ما  خلصتو بجيكم واخليكم تطبخون الذبيحه انتم
كيان بفجعه : لا لا شدعوه يالغالية خلصنا خلاص
ضحى اللي قمطت تعرف أن ام محمد بتسويها بدو ينشفون الحوش بسرعه وفعليا بدو يشتغلون من قلب !