روايه جابك اللي جاب لكفوف الصحاري غيمه عقب البطى يحيي شجنها /للكاتبه :عايشه

البارت السادس والثلاثون

لايك وكومنت ما ابيح قراءتك بدونهم 💫
--
قفلت من ام محمد وهي تبتسم يالله يالراحه اللي سكنت قلبها الحين باقي تكلم فهد
ألتفتت على صوت الباب اللي تسكر وصوت فهد اللي يكلم بالجوال واصلها
فهد بعصبيه : وبعدين ياسلطان انا قلت لك فكنّي من تجمعاتكم تروح و تجمع عمامي وتحطني تحت الامر الواقع يعني ؟
--
فهد : وانا شدخلني فيهم خلهم يتجمعون من قالكم اني فاضي لهم ؟
-
مرر اصابعه بشعره وهو يستغفر : بشوف بشوف ماهو اكيد اجيكم
-
فهد : خلاص ياسلطان لا تزّن قلت لك بشوف يلا فمان الله
خطى بخطواته لداخل البيت وهو يحوقل بدينا بالحركات اللي مالها داعي بدينا بالتجمعات اللي تخنق
هو جمعات خواله ويالله يحضر ناقصه الحين !
دخل واول ماشاف امه ابتسم : السلام عليكم يا ام فهد
ام فهد : وعليكم السلام وش عندك معصب صراخك واصل للصاله
فهد رمى نفسه على الكنبه وهو يغمص عيونه : مافيني شي بس عمامي مجتمعين وسلطان يبيني احضر العزيمه اليوم
ام فهد : وانت بتروح؟
فهد : بشوف ما أكدّت له
ام فهد : اجل قوم بدل ملابسك على ما احط الغداء
تعدل فهد وبعدها قام : اي والله ميت جوع من الصباح ما كليت شي
ام فهد : يلا على ما تبدل احط الغداء مسويه لك برياني
فهد ابتسم : عز الطلب والله
طلع فهد وتوجهت ام فهد للمطبخ وهي تفكر شلون بتعلمه ؟
صبت الكبسه وتفكيرها مشغول كيف بتكلم فهد تعلمه عن سالفه الخطبه !
حطت الاكل على الطاوله ونادته : يلا يافهد الاكل جاهز
جاها صوته وهو يسكر باب جناحه : جيت يايمه
جلست بمكانها وهي تصب لها بصحن وقررت ان خلاص بتعلمه الحين
جلس فهد وهو مبتسم : تسلم يدك الريحه بالراس والله
ام فهد ابتسمت وهي تفتح علبه اللبن : بالعافيه , بعد الاكل ابي اكلمك بموضوع
ناظرها فهد ورجع انظاره للصحن : اكيد الزواج كالعاده خلاص يمه انا قلت لك اذا صرت جاهز للموضوع قلت لك اخطبيلي
ام فهد تنهدت : هالمره يافهد غير
عقد فهد حواجبه ورفع انظاره لها : كيف يعني غير؟
ام فهد : انا خطبت لك بنت ابو محمد واليوم ردو علي انهم موافقين !
وقف فهد بصدمه : نعمم ؟؟ خطبتيها ؟ ولمن ؟
ام فهد : خطبتها لك والناس وافقو
فهد بعصبيه : يمه وش هالتصرفات بزران حنا ؟؟ قلت لك اذا صرت مستعد بجيك واقولك اخطبي ما قلت لك روحي تصرفي من عندك وزوجيني بدون لا تاخذين رأيي
ام فهد بحده : لين متى يعني ! بتصك الثلاثين وانت للأن لا زوجه ولا ولد ماربيتك وتعبت عليك كل هالسنين علشان اجلس الحين لحالي ولا ازوجك لانك منت مستعد ! وش الشي اللي يمنعك من الزواج ؟ فلوس وعندك ووظيفه وموجوده وبيت هذا كبره وش اللي ناقصك؟
فهد بعصبيه دف الكرسي اللي ارتد وطاح على الأرض: اللي ناقصني ان ماعندي ابو يروح معاي عند الرجال ويقول ابي بنتك لولدي ! اكيد منتي متوقعه اني باخذ جدي واروح عند الرجال واخليه يقول ابي اخطب بنتك لحفيدي ! انا ابي ابوي وعمامي وخوالي كلهم معاي واللي يتكلم بزواجي ابوي مو جدي !
ام فهد ضربت يدها على الطاوله بعصبيه : الحين ابوي ماقام يعجبك ولا هو بقد المقام وهو اللي مربيك كل هالسنين ناسي ان هو اللي سعى لك بالعسكريه وهو اللي رباك وركض لك من انت بـ عمر السنتين يوم ابوك تركنا « وبغيره عمياء » ركض ورا زوجته الثانيه ولا قام يشوف شي قدامه غيرها الحين جاز لك ابوك اللي اكثر من 27 سنه ما قابلته ولا شفته
---
فهد بحده : ابوي يمه ابوووي لا تغلطين عليه وش ما سوى هو سبب وجودي بهالدنيا وانا مارح اتعدى حايل الا وهو معاي ورايح يخطب لي وغير كذا ماعندي !
ام فهد والغضب سيطر عليها : الحين جاز لك ابوك وانا اللي ربيتك وتعبت عليك كل هالسنين تبيعني علشان واحد ما صارلك شهرين من قابلته !
فهد : ما بعتك بس مارح اسمح لك تغلطين عليه علشان كلام وصلنا من جدي ما ندري هو صحيح ولا لا لاتنسين ان جدي كان اكثر واحد معارض زواجك من ابوي , انتي مصدقه ان ابوي يبيعك علشان زوجه او انه يكون متزوج ! يمه هالكلام مايدخل العقل انتي بلسانك قلتي لي وش كثر سوا ابوي بس علشان يتزوجك تجين الحين تبين تقنعيني انه باعك !
ام فهد بقهر : انكتم يافهد واطلع ما ابي اشوف وجهك
لا تقهرني زود على قهري
تنفس فهد يحاول يهدى وبعد ثواني تقدم لها وباس راسها وبعدها خطى لخارج البيت بعد ما سحب مفتاح سيارته من الكنبه .
ركب السياره وهو يحرك من قدام البيت بعصبيه كل هالشي اللي صار بسبب انها خطبت له بدون لا تستشيره ما كان يبي يتكلم لكن الكلام طلع منه بدون لا يقصد مرر يده بشعره وهو يحاول يفكر بعقلانيه
مايبي يرجع للبيت الحين يبي امه تهدأ اول حرك وهو متوجه لبيت ابوه على امل ينسى شوي ويغير جو
هالموقف خنقه ورجع له كل الذكريات السيئه والليالي اللي جلس يفكر فيها بكلام جده عن ابوه وبحثه الطوييل عن تاريخ زواج ابوه واللي صدمه انه ما كان متزوج وقت طلق امه وما تزوج الا بعد طلاقه بشهور طويله وهالشي اثبت له ان كلام جده كله تأليف وللأن ما يدري وش الغايه من هالفعل !
بعد مده
وقف سيارته قدام بيت ابوه جا بيسحب جواله علشان يتصل على سلطان عقد حواجبه وهو يدوره ومالقاه
زفر بقهر اول ما ادرك انه نساه بالبيت !
سحب مفتاح السياره من مكان وفتح الباب ونزل قفل الباب وتوجه لباب البيت ووقف لثواني تأمل الباب وبعدها رن الجرس
مره
مرتين
وقبل يرن الثالثه جاه صوت من خلف الباب : مين ؟
عرف انها وحده من خواته العنود او ليالي تنحنح : انا فهد
ثواني وسمع صوت فتح الباب ينفتح وجاه صوت نفسه: تفضل سلطان وابوي بالمشب
فتح الباب ودخل وشاف قدامه بنت على طول عرف انها العنود لان ليالي شافها بس العنود لا : السلام عليكم
العنود ابتسمت : وعليكم السلام
فهد لاحت ابتسامه على وجهه رغم انه باقي ماروق : العنود صح ؟ كيف حالك وانا اخوك ؟
العنود ضحكت : اي العنود انا بخير وانت بشرني عن حالك ؟
فهد : والله لك عليه اهم شي انتي بخير .
العنود : هونها تهون
فهد : وانتي صادقه ، وين قلتي سلطان؟
العنود اشرت له على جهة المشب : جالس هو وابوي بالمشب
فهد ابتسم : اجل بروح لهم وان شاء قريب لي جلسه معاك انتي وليالي اتعرف عليكم
العنود ابتسم وهي تمشي لداخل : ان شاء الله
اتجه فهد للمشب وهو عازم انه يبي يعرف قصه طلاق ابوه لـ امه هالسالفه اخذت وقت اكثر مما تستحق السر ورا هالسالفه صار لازم ينكشف ومحد عنده الحقيقه الا جده وابوه .
--
فتح باب المشب وخطى داخله وارتفع صوته وهو يلقي السلام : السلام عليكم
فز سلطان : فهدد ! ياهلا والله وعليكم السلام
ابو فهد جاء بيقوم بس سبقه صوت فهد : والله ماتقوم خلك جالس انا اجيك
سلم على سلطان وتوجه لـ ابوه وسلم على راسه : اخبارك عساك طيب ؟
ابو فهد ابتسم : توني صرت بخير
فهد : جعله دوم
جلس سلطان ومرت دقايق من الصمت لحد ما حس ان في شي يبي يقوله فهد ومانعه وجود سلطان ! : بجيب القهوه واجيكم
طلع سلطان تارك فهد اللي بعد ثواني من خروج سلطان تكلم : يبه ابي اسألك
ابو فهد : سم
فهد ناظر ابوه : سم الله عدوك ، يبه وش سبب طلاقك من امي؟ انا عارف انك ما تزوجت ام سلطان الا بعد كم شهر من طلاقكم يعني مارح تقنعني بكلامك اللي قلته لـ امي والل
ي خلاها تطلب الطلاق ابي اعرف وش اللي خلاك تطلقها
بلع ريقه ابو فهد وهاجمته ذكريات الماضي اللي تعب على ما حاول ينساها او فعليا يتناسها ! : وش لك يا ابوك بهالسواليف ! الماضي عدى وحنا نسينا وعشنا ليه جاي تفتح دفاتر قديمه تقفلت من زمان؟
تنهد فهد : يبه انا وانت عارفين ان هالشي ما تقفل وان الموضوع ما مر كذا ولا رح يمّر علي ! انا عارف ان جدي له يد بموضوع طلاقك لـ امي بس ابي اعرف التفاصيل
ابو فهد جا بيوقف وهو مصّر انه مايقول شي : مارح اقول شي يافهد وهالموضوع انساه
مسكه فهد من عضده وهو يجلسه ويحاول يسيطر على عصبيته : مارح تقوم يبه مارح تتحرك ولا اتحرك من هنا قبل لا اعرف كل شي صار واللي خلى امي تطلب الطلاق
---
ابو فهد بصبر : قلت لك المواضيع القديمه تقفلت ولا عاد له لزوم ينعرّف شي
فهد : تقفلت عندك انت يايبه ماهو عندي ولا عند امي
اللي للأن بعد ٢٧ سنه تحسب ان زوجها تزوج عليها وانها كانت مقصره على بيتها وانها السبب اللي خلاك تتزوج ! يبه امي للحين تحسب انك فعلا تزوجت عليها ، من حقها تعرف السبب اللي خلاك تطلقها وان جدي السبب
ابو فهد بقهر : وش بيفيدها انها تعرف ؟ يزيد قهرها قهر ! لا خلاها تحسب انها هي اللي طلبت الطلاق وأنها هي اللي مارضت تبقى على ذمتي احسن من انها تعرف ان ابوها هدد زوجها فيها وبولده علشان يطلقها
ناظر فهد ابوه بصدمه : ايييييش ! جدي هددك ؟
صد ابو فهد اول ما ادرك انه قال شي ما كان لازم يقوله
تنهد ومسح وجهه بكف يده وهو يستغفر ناظر فهد اللي كان باقي يناظره : علشان كذا ما ابي اتكلم ولا اعلمك ما ابي اخرب نظرتك بجدك
فهد ب اصرار : ليه سوا كذا ؟
ابو فهد : لان حالتي الماديه كانت اقل منهم
فهد غمض عيونه لثواني وكأنه يحاول يدرك ان هذي كلها افعال جده !  تنهد وهو يقول : امي خطبت لي !
ناظره ابو فهد لثواني وبعدها ارتسمت ابتسامه على وجهه : على البركه بنت من ؟
فهد : ابو محمد اللي جاك هنا
ابو فهد بسعاده : خير من اختارت اي والله
فهد بتأكيد : وانتم بتروحون معاي نخطب رسمي
ابو فهد ب ابتسامه : ومن دون لا تقول ، متى بتروح ؟
فهد حك جبهته : للأن ما حددت لاني تهاوشت معها وطردتني
ضحك ابو فهد : للحين على عادتها ؟ يا حبها لـ انها تطرد الاوادم تمشي بدمها هالعاده « وبجديه » لا تخليها زعلانه من تطلع من البيت تروح لها تراضيها فهد : ابشر
ابتسم وهو يشوف نظره الحنين لمعة بعين ابوه وتأكد الحين ان ابوه انجبر على الطلاق ماكان ب ارادته
بس هالشي مايشفع لجده دمه يفوور لو يشوف جده ما يدري وش ممكن يسوي فيه !
بس الحين بيركز على سالفه امه ويراضيها والباقي لبعدين
---