عقارب الساعة

الجزء 21

قاعدين بالدوانية ب انتظار ذياب
كان ابو فراس جاهل عن الي صار ب ثريا
وجوده ببيتنا هو بسبب اتصال ذياب له
وطلب منه انه يروح بيت ابوي
على ما يوصل يكون موجود
ابوي حاول يمسك نفسه
خاصة بعد ما عرف انه ابو فراس
له علم بزواج ثريا وذياب
حاول وحاول بس بعدها ما تحمل
ونطق : ليش ما كنا ندري عن زواجهم ؟
عقد ابو فراس حواجبه
لانه فعلاً ما كان يدري انه ابوي عرف
نطق : زواج منو ؟
ابوي : زواج ذياب وثريا
رفع حواجبه وهو ينطق : اها انتو عرفتوا ؟!
ابوي بحده : ليش كان لازم ما نعرف ؟
ابو فراس بتبرير : لا ابد ما كان هذا المقصد بس عرفت سبب اتصال ذياب
ابوي : ليش ما كنا ندري عن هالزواج ؟
ابو فراس : هذي كانت رغبت ذياب
منصور : وليش ما كان يبي ندري ؟! وليش انت بالتحديد الي تدري وطبعاً سلطان
ابو فراس : لانه كان خايف بالرفض ..
قاطعه ابوي : بس اهو ما جرب حتى يقول انه يحبها ويبيها هالخوف من شنو ؟!
ابو فراس : يا ابو سلطان الشي الي صار بين فراس وسلطان ورفضه الزواج من الجازي كان هذا كفيل يخلي ذياب يخاف وكان خوفه الاكبر من رفض ثريا لانها اخت فراس وانه سلطان يرفض
منصور : بس سلطان يدري بالزواج وهذا يعني مو رافض
ابو فراس : للعلم سلطان عرف بعد زواجهم ما كان يدري قبلها عرف بالصدفه وحتى عصب ف ما الوم ذياب من كان يخاف
ابوي بعدم فهم : فهمني بالضبط شلون تروجوا
ابو فراس : يالي اتصال منهم وطلبوا مني اروح البحرين لانهم كانوا بالبحرين وفعلاً رحت وقالي ذياب عن خوفه من عدم موافقتكم ل هالزيجه وقعد يقنع فيني لساعات اني اوافق وقعد يقول لي انه يحبها
وانا بالنهاية وافقت من شفت اصراره وشلون قعد يقول لي انه يحبون بعض وانا الصراحة خفت يصير فيهم مثل ما صار ب فراس والجازي بنهاية شصار لهم
كمل كلامه بنبرة حزن : يالهم الرفض الي خلاهم يسافرون مصر ويتزوجون خف يا ابو سلطان خف انه اييلهم الرفض وينكسر قلب بنتي
من بعد وفاة فراس صارت اولويتي اسعاد بناتي الي مالي غيرهم ب هالدنيا
فهم ابوي وحس بلي حسه ابو فراس
وعرف ليش وافق من غير لا يكون عنده علم
لانه ابوي توقع اني ممكن انا ارفض زواجهم
مثل ما رفضت زواج فراس والجازي
بس بالحقيقة انا ما كنت راح ارفض
لانه ما عندي سبب يخليني ارفض
لو قالي انا ابيها واحبها
كنت راح اوقف معاه ومارح اكسر قلبه
لانه مشكلتي كانت مع فراس
ما كانت مع اهل فراس
بس هم ما الومه
حافظ على حبه

ابوي : لو ذياب قالي انه يبي بنتك كنت وافقت بالنهاية الخلاف كان بين سلطان وفراس ما كان بينا عشان ارفض بالعكس كنت اتشرف اني اخذ منك عروس ل ولدي بس بعد الي صار صار والحين اهم متزوجين
ابتسم ابو فراس ونطق : يعني اناديك يالنسيب
ابتسم ابوي : اي بعد خلاص الحين عرفنا بزواجهم لازم نسوي لهم عرس
منصور : يبا سلطان مو موجود
التفت له ونطق بحده : وانا قلت اليوم نسوي
ابو فراس بخوف : الا صج على طاري سلطان مافي اي خبر عنه ؟
هز ابوي راسه بالنفي : لا للاسف
دخلوا عليهم ثريا وذياب
كان ذياب ماسك ايد ثريا
ويطلب منها تمشي بخفه
اول ما ابو فراس شاف الاصق الطبي على وجهها
قام متجهه لها بخطوات سريعه
نطق بخوف : شفيج ؟؟
ثريا بتعب : مافيني شي
ابو فراس : وشنو هذا الي بوجهج ؟
محتار ذياب اذا يقوله عن الحقيقة ولا يجذب
يقوله اعذرني عمي والله اخوي خطفها
وعذبها بس لانه كان يشك انك انت الي خاطف سلطان !!
توه كان ينطق سبقته ثريا : يبا لل تحاتي طحت من الدرج
من خوفه عليها
قعد يتفصح ايدينها اذا تأذت ولا لا
همس ابوي ل منصور : شفت شقالت ما فضحتك جدام ابوها وقالت له الحقيقة وانت شسويت عذبتها شلون تفكر تضرب بنت
عبالك سكت لك لا والله بس خل يرجع سلطان بالسلامه وانا اعلمك
منصور : يبا ترى ما انلام خايف على سلطان …
قاطعه بغضب : جب ولا كلمة مهما كان الموضوع هذا ما يسمح لك انك ترفع ايدك وتضربها وين احنا قاعدين بغابة لو رفعت عليك قضية خطف وضرب شنو تسوي ؟؟
منصور بكل برود : بس ما رفعت يبا شسوي والله كنت معصب
ابوي : طبعاً مارح تسوي لانك اخو زوجها وما تبي تخسر ذياب ولا جان من زمان اشتكت عليك وهذا مو عذر معصب ! وبعدين شيل فكرة انه ابو فراس اهو الي خطف سلطان
لو كان اهو جان خطفه من زمان مو ينطر شهور على وفاته بعدين يخطفه واخر شي اقوله لك يا منصور لو كان فعلاً يعرف انه سلطان اهو الي انهى حياة فراس
كان مستحيل يوافق على هالزيجه ومستحيل يخلي قاتل ولده يلعب ويربي له حفيده فاهم ؟؟
منصور بعد تفكير بكلام ابوي
واقتنع نطق : فهمت
فعلاً من وجهة نظرهم
وعلى الي يشوفونه
انه ماكو جد يقبل قاتل ولده يربي له حفيده
تطمن منصور من ناحية ابو فراس
ذياب : يبا وين امي ؟
ابوي : وعليه عليها تعبت من كثر البجي ونامت
ذياب : ماكو خبر على سلطان ؟
تنهد بعمق : لا ماكو ناطر يمر على غيابه ٢٤ ساعة وبروح ابلغ