عقارب الساعة

الجزء العاشر

بعد مرور سنه
من وفاة فراس
طلعت الجازي من العدة صارلها
ثلث شهور ونص
كان عمي طلب منهم يجتمعون بالديوانية
عمي : وسام وينه؟
سهيل : اخذ ديبا وطلع تعرف يبا ما قدروا يحتفلون بمناسبة يوم زواجهم بس وسام حب يسوي لها مفاجأة صج مره جم شهر بس ما يبي ينطر لسنه اليايه
عمي : الله يسعدهم عيل خلاص انت تقول له بعدين الي بصير اهني
سهيل : ان شاءالله ليش يبا صاير شي؟
هز عمي راسه بالنفي : مو صاير الا كل خير بس من شوي كنت ببيت عمك
سهيل : صج شلونه عساه بخير؟
عمي : بخير الحمدلله ليش شنو ما تتواصل مع عمك؟
سهيل : امبلا اسبوع الي طاف داق علي يسألني عن حور
عمي : اي زين لا تقطع صلتك بعمك ولا بعياله
سهيل : ان شاءالله
عمي : مابي أطول عليكم سلطان خطب الجازي
توسعت عيون سهيل : يبا من صجه؟
هز عمي راسه بالايجاب : اتغمشر معاك؟ اي من صجه
سهيل : السموحه منك يبا بس انصدمت
التقت عمي لابو فراس ونطق : شرايك يا بو فراس؟
ابو فراس : لو ربي ما كتب لفراس لصغير " ولد الجازي " انه يطلع ل هالدنيا جان رفضت
سهيل بعدم فهم : دقيقه عمي انت موافق ولا انا مو فاهم شي؟
او فراس : لا انت فاهم عدل
عمي : زين انا فهمني شلون موافق
ابو فراس : يمكن الي بقوله ما يكون منطقي بالنسبه لكم بس بالنسبه لي منطقي
عمي : اي قول خل نشوف منطقي ولا لا؟
ابو فراس : الحين موجودين باجر انت بتلهى مع وصيف بتربية حور ووسام راح ينشغل مع زوجته باجر انا وابوكم راح نودع مارح نتم دايمين مهما كنا معاها بتم الطفل يحتاج اب ادري الي اقوله صدمكم وواضح من وجهكم بس ما تدرون اشكثر قلبي يتقطع وانا اقول هالكلام فكرة انه فراس الصغير يتربى وابوه بعيد عنه يكبر وما يشوف اب معاه مثل ما يشوف الاطفال الي معاه بالمدرسة فكرة تذبح وبما انه تأكدنا انه سلطان ما قتل فراس قبل اي شي نسأله اذا موافق يربي الطفل مع الجازي
عمي : اهو قال من غير لا اسأله
ابو فراس : شقال بالضبط؟
عمي : قال ابي الجازي واذا على فراس الصغير انا مستعبد اربيه معاها صج مو ولدي بس راح اربيه ك ولدي
ابو فراس : خوش عيل نشوف الجازي
سهيل : عمي اكيد الجازي راح ترفض تدري هي اشكثر تحب فراس وفترة حملها كانت صعبه بسبب نفسيتها تعبت على وفاته ما اظن راح توافق وخاصه سلطان بعد الي سواه
عمي : اذا ما تبي خلاص هي وولدها بعيونا دام ربي كاتب لي عمر انا اربي معاها ولدها
ابو فراس : راح توافق اذا فكرة ب فراس الصغير راح توافق
سهيل : اي عمي بس ما نبيها توافق بس عشان فراس الصغير ما ابي تنجبر على هالزواج بس عشان يكون لولدها اب احنا موجودين ومثل ما قال ابوي بنساعدها مارح نخليها

ابو فراس : تمام مارح اضغط عليها بقول الي عندي وهي اذا رفضت وعد مني اني مارح اجبرها ومنها بشوف فروس الصغير
...
كانت وصيف قاعده مع الجازي
وصيف بين احضانها حور
والجازي بين احضانها فراس الصغير
وصيف : الجازي ليش ويهج تعبان؟
تنهدت : انا من داخلي تعبان يت على ويهي!
وصيف : سمله عليج
الجازي بنبرة حزن : فيني بجيه من فترة بس ماسكه نفسي واحاول اسوي اي شي بس عشان ما ابجي اقرا قرآن كلام ربي يريحني بس يوم ثاني يرجع لي نفس الشعور ابي ابجي وهكذا من طلع فروس على هالدنيا
وصيف : وليش تسوين جي بنفسج ليش ما تبجين؟
الجازي : اخاف يختي
عقدت حواجبها : من شنو؟
الجازي : ينقطع حليبي بعدين شلون ارضع فروس
طقتها بخفه على ريولها : اول شي لقدر الله لقدر الله يعني وانا رحت؟ ترى ما بينهم الا نص شهر يعني عندي حليب ما ارخصه على ولد اخوي هذا اول شي ثاني شي مو قاص عليج وقالج انه البجي يأثر على الحليب؟
الجازي : من وانا صغيره اسمع يقولون هالشي وغير الي اشوفه بالمسلسلات
هزت وصيف راسها بالنفي : والله مادري الصراحه شقول
الجازي : ليش؟ بعد هذا الصج
وصيف : تطمني مارح يأثر
الجازي : شدراج؟
وصيف : بحثت ومن شفت انه مكتوب دقيقه خل ابحث لج عشان تقرين بنفسج
مسكت تلفونها وكتبت بقوقل
" هل البكي يأثر على الرضاعة "
وصيف : اها شوفي انا اقرا ولا اعطيج انتي تقرأين؟
الجازي : انت اقري
وصيف : تمام سمعي يقولج عمي قوقل يرون أن بكاء الأم المرضعة وحزنها يؤثر على الرضيع وكمية الحليب من حيث أن البكاء والحزن يؤدي إلى هزال الوليد ومرضه، كما أنه يجب عليها ألا ترضع طفلها إلا بعد عصر الثدي خارج فم الطفل قليلاً ثم معاودة رضاعة الطفل، وهذا ما نفاه الطب الحديث، وأثبت الطب الحديث أن كمية الحليب لا تتأثر ببكاء الأم حسبما يعتقد العامة
رفعت حواجبها : صج؟
هزت راسها وهي تسكر تلفونها وتحطه على السرير : اي والله من قريت هالكلام قلت لا دقيقه اخاف عمي قوقل يلعب علينا جان ادق على دكتورتي وقالت لي ما يأثر
التزمت الصمت لثواني وبعدها نطقت : الجازي ما يصير الي تسوينه قلبج يعيش شعور ليش تتجاهلين هالشعور؟ ليش تحطين شعور فوق شعور قلبج شوفي تخيلي في حفرة داخل قلبج تمام؟
الجازي : تمام!
وصيف : ومشاعر قلبج حالياً رغبته بالبجي وانتي تجاهلتي مشاعر قلبج وحطيتي فوقه مشاعر ثانيه ف انتي اهني شسويتي؟
الجازي : شسويت؟