دخلت عليهم وبين ايدينها ولدها فراس
الجازي : فاضيين بنات ؟
عدلت وصيف قعدتها ونطقت : اي فاضيين تعالي
دخلت وسكرت الباب وراها
قعدت على طرف السرير ونطقت : عادي اخلي فراس عندكم ؟
وصيف : من صجج ليش تسألين اكيد عادي
الجازي : مارح يتعبج وانتي عندج بنتج ؟
وصيف بغضب : شالكلام اكيد مارح يتعبني وثريا موجوده معاي لا تحاتين وبعدين حتى لو تعبني ولد اخوي هذا تعبه راحه لي
ابتسمت : بعد عمري تسلمين
وصيف : انتي تطمني ولدج ب امان وروحي جهزي نفسج شكلج نسيتي انه اليوم ملجتج ؟
هزت راسها بالنفي : ما نسيت حتى جهزت
عقدت ثريا حواجبها ونطقت للتأكد : حلو تبين اساعدج انتي تلبسين فستانج وانا احط لج مكياجج ؟
اشرت على نفسها : انا جي جاهزه
طالعت ثريا وصيف ب استغراب
بعدها نطقت : يوم ملجتج على اخوي كنتي احلى بوايد
التفتت وصيف ل ثريا
وطالعتها بنظرات غضب على كلامها الي كلش مو وقته
نزلت دموع الجازي
وكان جوابها ل ثريا هي ابتسامه
بعدها طلعت من الغرفة
وصيف : انتي شقلتي ؟
ثريا : قلت الصج اكيد ما كان قصدي اذكرها ب اخوي بيوم ملجتها بس هذا الصج كانت تهبل اهو فستان كان يهبل اهو مكياج اهي تسرحيه كانت طالعه مثل العارضات الي نشوفهم بالتلفزيون بس اليوم شفتي شلابسه !! لابسه بدلة رسمية سودا حتى يعني مو فستان بدلة !!! ولا الشعر مسويته ذيل حصان ولا حاطه مكياج بذمتج هذي شكل وحده اليوم ملجتها
وصيف : اهو معاج حق تستغربين بس مو تقولين هالكلام جدامها
ثريا بعدم فهم : اذا هي للحين تحب فراس ودموعها دليل انها للحين تحبه ليش وافقت على سلطان والله يختي شي يحير
وصيف بتأكيد : هالسؤال محيرني من زمان مو بس محيرج انتي يمكن يكون مثل ما قالت عشان يساعدها بتربية فراس
هزت ثريا راسها بالنفي : مادري يختي احسه مو عذر عندها وسام وسهيل وابوها يعني في من الي يساعدها
وصيف : انا فاهمتها لانه عندي بنوته صعب تربية الطفل واذا على سهيل فهو اذا اليوم ساعدها يمكن باجر ما يقدر ونفس الشي مع وسام الظاهر الجازي فكرت بالمستقبل
ثريا : انتي راضيه سلطان يربي ولد فراس ؟
وصيف : الصراحة لا بس دامه ابوي موافق ماقدر اقول شي
ثريا : زين سمعي بقولج شغله
كانت وصيف عيونها على فراس وتلعب فيه
وصيف : قولي …
وصيف : قولي … واااي قلبي انت واااي مال طراق
ثريا ب نرفزه : وصيف !!! قاعده اكلمج بقولج شي وانتي تلاعبين فراس !!!
بعدت عيونها من فراس وطالعت ثريا : قاعده اسمعج ترى اذا عيوني ما كانت عليج مو معناتها اني مو قاعده اسمعج
ثريا : الموضوع مهم وابي عيونج واذنج علي
عدلت قعدتها : يلا كاني قاعده اطالعج واذني عليج
ثريا : بروح اشوف ذياب
وصيف : وين ؟
ثريا بنبرة هاديه : بالشاليه
وصيف بحده : لا
رفعت حواجبها لرفض وصيف : ليش ؟
وصيف : لا مو انج تشوفينه لا لروحتج للشاليه شنو مافي مكان تتشاوفون فيه الا الشاليه
ثريا : لانه بنتكلم عن مصيرنا
وصيف : واذا يعني هالموضوع ما يصير تتكلمون فيه الا اذا كنتوا بالشاليه !!!
ثريا بغضب وبنبرة حاده : وصيف !!!
بعد ما نطقت اسمها طالعتها من طرف عينها
وصيف : لا تقعدين تطالعيني جي يكفي ذاك اليوم رحتي من غير علمي ومن عرفت قلت ما عليه من زمان مو شايفته والريال كان مختفي وما تكلمت وقلت لج شي لانج بموقف صعب يوم اختفى عنج بس انج تحسبين اني بوافق تروحين مره ثانيه عنده وتكونون بروحكم ف لا
ثريا : بس احنا دايم نتقابل بالشاليه
توسعت عيونها بصدمه : شقلتي ؟
ثريا بتكرار : احنا دايم نتقابل بالشاليه مو اول مره
طالعتها بنظرات غضب : شنو كنتوا تسوون ؟؟
ثريا ب تبرير : لا يروح تفكيرج بشي غلط تعرفين انه محد يعرف بعلاقتنا ف بعض المرات يكون بخاطرنا نروح السينما وما نقدر فنروح الشاليه هناك ونشوف فيلم ، بعض المرات ودنا نتعشا مع بعض بمطعم وهم ما نقدر خاف احد يشوفنا فنروح الشاليه ناكل هناك يعني بختصر عليج من نشتاق لبعض ونبي نتقابل نروح للشاليه للمكان الي نقدر نتقابل فيه واحنا مرتاحين لا احد يشوفنا
تملكها الخوف بعد الي قالته
وكانت متردده تسألها سؤال بس كان لازم تعرف جوابه
نطقت بحده : صار شي بينكم !!
توسعت عيون ثريا بصدمه من سؤالها ونطقت : من صجج تسألين !!!
هزت راسها بالايجاب : من صجي لا تنسين اني شفتكم بملجة الجازي شلون كنتوا لازقين ببعض
ثريا بعصبيه : بس هذا ما يعني انج تشكين انه ممكن يكون صار شي بينا !
KAMU SEDANG MEMBACA
عقارب الساعة
Misteri / Thrillerعندما يجتمع قلبان بوسط عادات وتقاليد قبيله من عاداتها تكون بنت العم ملك لولد عمها وهالعاده بتكون نهاية هالقلبين بسبب خباثة ولد العم عندما تكون عقارب الساعة سلاح للانتقام من ولد العم شخص واحد قدر يحطم علاقات كثيره اتمنى الرواية تنال على اعجابكم
