🍇الوصية 🍇(مكتملة)

part 52

🔱 الوصية 🔱
بقلمي الكاتبة هند المتقي
👈 الجزء 52

بقات شحال سهرانة .. كتستنى علاء  فبيته حتى يجي .. كل مرة كتعض فيديها بالفقصة .. وقفات قدام المراية ديالو .. ب بيجامة حمرا .. عبارة على كسوة قصيرة طفولية .. شعرها الاحمر جمعاتو الفوق وخلات بعد الخصلات هابطين على وجهها ...

خدات قميجته .. كتشم ريحتها .. وشحال عجباتها ودوخاتها .. ملي كيكون قريب منها كتبغي غير تستنشقها وتغيب .. رجولية كتخلب الانفاس ..

بدا يديها النعاس عاد سمعات صوتهم طالعين فالدروج .. ناضت تقادات فالجلسة .. كانت الساعة الوحدة ونص ..
شافته داخل مع الباب باينة فيه عيان ..  مخنزر كيف ديما ..

علاء : باقي مانعستي ؟ ( وقف شوية و عاد تفكر بلي قالها ترجع ل بيتها ) وبيتك ماشي هو هدا ؟ هضرنا ف هادشي
قلبات وجهها ..  و هي كاتميق فيه
ماريا : بيتي هو هادا .. ودنيا ماخداتش حوايجي .. وتقدر نتا تخرج منو لا  بغيتي .. اما انا لا ..  انبقا هنا حتى حد ما قال لك خرج الفراش ديالي من البيت
زير على سنانو ..  و تكلم بتعب
علاء : ماريا بلا تبرهيش ..
ناضت كتهدر بشوية ..
ماريا : ياك نتا مابغيتيش السمعة ديالك تخياب !! .. وزايدون حنا قدام الناس مزوجين ولا لا .. ( جمعات فمها بغيرة) وبغيتي هاديك ياسمين تعرفنا غير كنكدبو .. ؟؟
حيد القميجة ديالو بلا مايهتم للشهقة لي فلتات من عندها .. حتى شافت عظلاتو الضخمة  المتورمة.. وجسده الرياضي  ... واخا ماشي اول مرة لكن ف كل مرة كاتشوفو عريان كاتخلع ... شاف فيها و تكلم بصوتو الخشن ... لي كيزعزعها
علاء : ياكما عجبك المنظر ..
رجعات اللور برعب ..
ماريا : لا لا .. انا غاننعس تصبح على خير ..
تحركات قدامو .. بالكسوة ديالها .. خلاتو يغمض عينو ويزفر بضيق من تأثيرها عليه .. حتى نعسات ف بلاصتو ..
ماريا : تقدر تنعس ف الفوتوي ياك ؟
علاء : غانجي نسلخك انا  ..
سمعاتو دخل للحمام عاد تنفسات بالجهد .. علاء راجلها هي .. كتغير عليه بشكل جنوني وعاد ماحملاتش تصرفات ياسمين والطريقة باش تبدل لونها ملي سمعات بخبر زواجو ... تفكرات منين قالت ليها ضحى صحاباتها كانو كيحماقو عليه ... زادت تغزفات عليها بسنانها و هي كاتحلف فيها لا ماخلات مرارتها تطرطق بالفقصة  ماتتسماش ماريا