انين الروح || Im Sorry

حلقة 30

الحلقة30:
دورت ليها لقيتها رافدة...مجموعة تصاور وتشوف...وقفت قدامها نشوف في تصويرتو بين يديها...شافت فيا...وحكات...
ملك: شكون هذا نفس...
حسيت بدقات قلبي زادت...حتى حرارت جسمي زادت...رعشة في جسمي سرات كي تفكرتو...تنهدت وحكيت...
انا: نو والو...واحد ديما نشوفوا كي نروح للجاردا...صورتو...
ملك: واحد...
انا: مممم واحد...بلا ما تشوفي فيا هاد الشوفة...
ملك: دوماج علاه صورتيه داير...حبيت نشوفو..
قلبت التصويرة...وكملت لي موراها...
ملك: ياي شحال شباب هاد الكلب...
تبسمت ورفدت التصويرة...وتمتمت..."ماكس"...
ملك: شششش ريحي هنا بلا ما تروحي بعيد...
انا: انا بففف...تعيي...هيا نخرجوا...
خرجنا...وغلقت الباب مورانا...غسلنا لماعن بين لعب وضحك...وزوج الحمام غايب...وانا مع تعليقات ملك عليهم...كملنا وطلعنا لبيتي نرقدوا.. لبست وبدلت وقابلت التاقة كي العادة...نحب نشوف النجوم...مي هي مش موجودة...عادي نتخيلها...تبسمت وانا نلعب بصبعي فالسماء ونرسم...جنوني هو لي مخليني عايشة وواقفة على رجليا لليوم... كمشت وجهي كي سمعت بلي جاني ميساج...وتنهدت قربت من التيليفون ويدي ترعش...ونزلت دمعتي كي شفت صاحبو...
"بعدك عذاب...وليلتي راح نديها...حتى لو فالجحيم"...رميت تيليفوني... بلا ما نحس على روحي وعيطت عيطة وحدة...لخصت كامل وجيعتي منو...حسيت على ملك لي خرجت مخلوعة مني...جات راح تقرب مني منعتها...
ملك: ن..نفس...
انا: ما تقربيش مني...
رفدت اول حاجة جات على يدي وحبطت للصالو...اهم حاجة نبقى وحدي...مش حابة نبكي...خاطر لبكى مش راح يمحي حقيقة بلي هو مسني...وبلي دمرني...تبسمت باستهزاء نتمتم..."هه...ليلة اخرى"...
اصلا ايامي كلها جوز على كوابيس لياليه...لي هو فرحان بيهم... اصلا هو بحد ذاتو كابوس...كابوس كل ما نكبر يكبر معايا...كابوس قاسي مدمر حياتي...اصلا واحد ما رح يتقبلني بحالتي...تبسمت مي بحزن هاد المرة...وتكمشت على روحي...رايحة في رقدة باردة كيما حياتي... في نفس السواد لي محاوطني...مش حابة نعيش داخل هاد الدوامة... ومتمنية تخرج يد من العدم تنقذني...من هاد المستنقع...اما وهاب ونعرفوا عمروا ما راح يخليني...راح يبقى موجود لليوم لي راح يضمن فيه موتي...وهاب هو موتي...تمتمت وانا مغمضة عينيا لي طاحت دمعة سخونة منهم..."موتي"...