انين الروح || Im Sorry

حلقة 6

قربت منهم بالشوية...كل خطوة مني مسموعة...كلش هادي...وحتى الريح هادية...حطيت فولارا على راصي...وقعدت بيناتهم...نمس فلحشيش ونقرى فآسميهم...للمرة الألف في حياتي...مي هاد المرة مختلفة...اول مرة نقراه...على هاد الحجرة الباردة... 5 سنين عمري جاتني الشجاعة نجي لقبرهم...آيات وعادل إبراهيمي...ساحت دمعة من عيني نتفكر في لحظاتي معاهم...قربت أكثر وعديت يديا...على إسم بابا المنقوش...كنت حابة نحكي...مي حاجة ما تقدر تبرد النار لي داخلي...حاجة ما تقدر تعوضني فقدانهم...يمكن ما كانتش عندي الشجاعة...ولا القوة باش نحكي معاهم...تنهدت وتكسلت بيناتهم... مش مهتمة...المهم نحس بيهم...بلاك نقدر نحس بدفاهم...وحبهم لي فقتو وخسرتو مرة أخرى...
انا:14/01/2016 نهار خسارتكم...
طاحت دمعة حسيت روحي خرجت معاها...نفس الوجع ما قلش حتى ذرة...بالعكس زاد...
-النهار لي خليتوني فيه بلا ما تشوفوا موراكم...النهار لي ضطريتو تخلفوا فيه كامل وعودكم...النهار لي طلعت روحكم...بلا ما تودعني...يا ريتكم ديتوني معاكم...وما خليتونيش في هاد الدنيا السوداء...سمحولي علابالي طولت عليكم...وبلي عمري لا جيت في ذكراكم...مي حبيت حبيت هاذاك النهار اكون...ذكرى خاصة بيها...ذكرى ليها وحدهاا...خاطر هي روحي بعدكم...وما نقدرش نخير بينكم وبينها...سميتها نايا... خاطر هي موسيقى...موسيقى ردتلي روحي من بعدكم...موسيقى خلاتني نعيش ونحيا مرة اخرى...كانت املي لي جاء بعد ما فقدت الامل...نوتاتها سكنو في قلبي...وخلاوه يحيى مرة اخرى...بعد ما تحطم...
قربت أكثر منهم وتمتمت...
انا: سامحوني!!
تبسمت بمرارة...ومسحت الدموع على خدي...دورت راصي نشوف فالناس لي تبكي وتعيط...تبان جنازة جديدة...وكامل الناس مجتمعة على لقبر...الفرق بيني وبينهم...اني تعودت نعيش كلش داخلي...من الخوف والحزن...حتى لبكا...عمرى سترجيت نعيط وانا نبكي... ما عنديش حق...وعمروا ما راح اكون عندي...قربت منهم قريت الفاتحة على فقيدهم...وخرجت...متمنية لوكان كنت في بلاصتهم...تنهدت وركبت طونوبيلتي...تكيت روحي على الكرسي نرتح في راصي...وفالعاصفة لي داخلوا...دورت راصي على صوت الباب...وعليها هي لي قعدت قدامي...تكات راصها على كتفي بلا حتى كلمة...وقربتني منها عنقتني...تمتمت بيني وبين روحي... "ملك" اسم على مسمى...هي كي الملاك...متبعتني وين نروح... تحس بحزني...و بكل حاجة تخصني...قاطعني سؤالها...لي أنا اصلا ما لقيتلوش جواب...
ملك: جاز 5 سنين...و 15 نيوم على موتهم...علاش هاذي اول مرة تزوريهم...
عنقتني كثر كي حست بدمعتي...وعصيرة قلبي...
ملك: شششش عتبريني ما حكيتش...ششششش...هاكي جيتي و ما صرا والو...
قربت منها أكثر وحضنتها بأقوى ما عندي...محتاجتها ومحاتجة دعمها كي عادتها...بعدت عليها بعد ما هديت...وتنهدت...تبسمتلها وحكيت...
انا: خاطر خفت يرجعوا سنين هدوك...ويرجع نفس الواد معاهم... مش مستعدة نعيش فالضياع مرة وحدخرا ملك...
دورت راصي ليها وزيرت على الكلمة...
-مش مستعدة...
ملك: نفس واش صرا...حتى خلاك تكرهي...حتى تزوري اهلك...
تبسمت نحكي...
انا: مش نكره نزور اهلي...نكره حياتي وروحي...ونكره حقيقتي و وجودي...
شفتها كفاه حارت فيا...وكفاه خليتها تتخبط مع الحيط...
انا: اعتبريني ما حكيتش...
ملك: بصح...
انا: ملك بليز...
شافت فيا...ودارت حزام الامان...علابالها شحال نأكد عليه...بعد الحادث تاعهم...غمدت عينيا...وانا نتذكر في مظهر طونوبيلتهم... نمنع في دموعي...من أنهم اطيحوا...تنهدت وبديت نصوق...مش مهم وين...الأهم اني...نبعد...ونخلي يا لوكان جزء من احزاني... بعديد عليا...مالغري منيش راح نقدر ننساها...مي نتناساهم...