انين الروح || Im Sorry

حلقة 3

حسيت الطريق تدي فيا وتجيب...ڨاريت أكوتي (على جنب) وخرجت منها نجري...مور ما غلقت الباب عليها...النفس ذياق عليا...مالغري نايا كانت تحكي معايا مي ما قدرتش نجاوبها...وقفت مقابلة لبحر نرد فالنفس...نتفكر في كل كلمة كان اقولهالي..."كل ما تكبري راح ازيد يلسق اسمك في عبد الوهاب أكثر وأكثر" قوات السعلة(الكحة)...حطيت يدي في جيبي نسيي نجبد فالبخاخة مي ما لقيتهاش...تقطع عليا النفس... لدرجة اني حسيت روحي قاعدة تخرج مني...نسمع في صوت نايا لي تخبط وتعيط فالباب...سييت نجبد النفس ما قدرتش...دورت راصي نشوف فيها لقيتها تبكي وتخبط فالتاقة...جات صورتو بين عينيا...غمضتهم ونسيي نمشي...ما نحبش نتفكرو...ما نحبوش اكون في حياتي...نحبو يكون مجرد وهم...كابوس ونفيق منو...خلطة والله كانت غلطة...غلطة ما عندي حتى ذنب فيها...حسيت بيد تحطت على ظهري...والبخاخة في فمي...بعد عدة مرات ولالي النفس طبيعي...فتحت عينيا حرت كفاه لقاني... دورت راصي لقيت روحي قدام المطعم تاعو...جبدت المفتاح نجري...حليت الطونوبيل...قبل ما نوصل عندها...هبطت تجري جات عندي...ميتة خوف...عينيها معمرين دموع...حطت يديها على خدي تحكي...وتمسحلي دموعي...
نايا: نونو...اكي منيحة...سافا...
قربتها مني...وعنقتها...هي آخر حاجة بقاتلي من الدنيا...ومستحيل نخليها تعيش نفس قدري...مستحيل...هديت روحي...ومسحتلها دموعها...
انا: شششش...جازت...
حركتلي راصها بلالا...جاوبتها بايه وتبسمت...عنقتني اكثر...رفدتها و دورت ليه...نتبسم هاذي اول مرة نشوفوا بعد سنين...ما جيت نحكي حتى كشر...وحطلي البخاخة في يدي...
عمي الصادق: مش قلنا هذي عمرها تفارقك...
تبسمت وحركت راصي حاشمة...عمي الصادق...هو من أكثر الناس لي يعرفوني من صغري...دورت راصي نشوف في مطعموا...تبدل بزااف...مي مزالها نفس الريحة تخرج منو...الصباح...ريحت كرواسو سخون بالشكلا...والقهوة...وعلى 12 ريحة الحوت...تعبق الدنيا...مالغري بدل الديزاين...مي روح لبلاصة هاذي مزالها هي هي... درتلو بيدي إذا ندخل...تبسم وحركلي راصو...حطيت نايا...مور ما بستها...وحكمتها...نمشي..ونشوف الامور لي تبدلت على قبل...تحلت الباب وحدها...بعد ما كانت من حطب... ونتعدب باش نحلها...دخلت ناس وحدوخرين قاعدين...إكيب (فريق) جديدة قاعدة طيب...مي نفس الريحة...فجأة سمعت صوت عندي شحال ما سمعتوش...
- عمي صادق وين تحب نضيفوا ضيوفك
جاوبها وهو يضحك...
عمي الصادق: فالطابلة لي طل على لبحر...
وقفت حايرة تشوف فيه..
- ماشي نتا ما تحب حتى واحد ياكل فيها من غير...الحورية و...
سكتت كي دورت راصها وشافتني...
تبسمت نحكي...
انا: بانكايك...كاس جو...وقهوة مرة...
تبسمت وقربت مني حضنتني...
لوجي: وقتاش وليتي...يا كلبة عندي شحال ما شفتكش...سور لتيهيتي مع صحاباتك...ونسيتيني...
حبطت راصها تشوف في نايا...دارتلي بيدها عليها حركتلها راصي...بايه...طابست ليها تحكي...وتتنفس...
لوجي: سالو أنا خالتو لوجي...ما تشوفينيش هكا...مي أنا طبيبة... خلي نقولوا فالمستقبل...اوكي ونتي وسمك يا صغنون...
انا: احكي وحدة وحدة ما تفهمش مليح عربية...
ناضت تضحك وحدها...
لوجي: عينيها خظورا و ڨاورية...
تبسمت وخليتها...حكمت نايا...ورحت للحديقة الورانية...جاية مبنية فوق لبحر...ولي يميزها...انو ما فيها حتى باروداج...حرة و مخلية مساحة لحرية كل واحد اجي ليها...تنفست هواها...حاجة ما تبدلت فيه...نقي وحتى الماء يلمع...دورت راصي نشوف فيها كفاه تشوف فيا...تنهدت مور ما تبسمت...
انا: سقسي...
نايا: سكون هادو...
انا: ناس نعرفهم قبل...
نايا: وعلاش عمرنا ما جينا ليهم...
سكتت وحبطت ليها جاوبتها...
انا: باسكو نسيتهم...
نايا: وكاش واحد ينسى واحد احبوا...
انا: صح عندك حق...
نايا: مالا نزيدو نزو دايما...
انا: علاه حبيتيهم...
حركتلي راصها بايه وتضحك...جبدتها عندي...وضحكت...كي خلعها صوتو لي تعودت عليه...كل مرة يجي في لحظة...في يدو الطلب لي طلبتو...قربت منو نرفدو عليه...
عمي الصادق: انتي حبيتي تجي عندنا...
حركتلوا راصها بايه...
عمي الصادق: مالا كان ما تجيبكش...نجبدها من وذنها...حرمتنا من هاد الماسة الغالية...
حركتلو راصهابلاالا...
عمي الصادق: وشنو...
نايا: تجبدلهاش وذنها...نونو تاعي...
ضحك بالصوت منها وعطاها تاكل...مالغري البرد عليها...مي حبيتها توالف هاد لبلاصة باسكو تعبر على ماضيها...كيما تعبر على ماضيا أنا بالضبط...