انين الروح || Im Sorry

حلقة 14

حسيت بدودونتي لي تحطت على كتافي...ويدو لي عاونتني باش نوض...وهي مزالها في حضني...رفدها عليا بلا ما نفيق...حتى اني ما علاباليش كفاه...رضيت وعطيتهالو...ولا كفاه هي راحت عندو... رسم بسمة على شفافو...لأول مرة نشوفها عليه...وحكى...
سيف: نقدرو نتعرفو برانسس...
ضحكت وهي في حضنو...حطت يديها على رقبتو...توازن في روحها...وشافت فيا...
نايا: نونو شكون هذا...
دورت راصي نشوف فيه مصدومة...وما علاباليش واش نجاوبها...
حطها على الارض...وقعد على ركبة ونص. يحكي...
سيف: انا سيف...صديق نفس...
حط يدو باش يخمس معاها...مي هي شافت فيا...هزيتلها براصي ايه...ودورت راصها تحكي...
نايا: نونو نقدر نلعب معاه كيما علي و أدم ولا نو...
دورت راصي نشوف فيه...حسيت باستغرابو...والغضب من عينيه...مي كاتمهم على جال نايا...تبسمت وحركتلها براصي ايه...
حطت يدها على يدو...
نايا: أنا نايا...مي نونو تعيطلي برانسس...وأدو يعيطلي نون...
ضحك وسألها...
سيف: علاه تحبيه أدم نتيا...
حركتلو راصها ايه...
دار ڨريماس تاع عايف...وقاللها...
سيف: يلڨي و صامط خلينا منو...
حركتلو راصها بلا لا...ودارت ليا...
نايا: نونو...قوليلو بلي أدو...مليح قوليلو...
شفت فيه...وحركت راصي بايه...
دورت نشوف في طونوبيلتو لي مزالها في بلاصتها...والراجل داخلها يعني...أكيد حكالو كلش...حسيت برعشة في جسمي...من خوفي...تنهدت وشديت نايا...كل همي أني نهرب...نهرب منهم...ونديها معايا...ولا نوض ونتهنى من هاد الكابوس...قربت خطوة منهم...مي فطنت كي حسيت بنايا لي ترفدت فجأة خلاتني الحركة...لي خلاتني...ندور نشوف واش بيها...وقبل ما نستوعب... حط يدو على يدي...وشابك صباعو بصباعي...لدرجة اني حسيت برعشة قوية في جسمي...البرد زاد...ودقات قلبي قوات...حسيت بعاصفة تحلت داخلي...يدو الدافية كانت و كأنها طاقة...طلعت راصي شفت فيه...وهو يشوف جيهة الطونوبيل...و ولا شاف فيا...يحكي وهو مزير عليا...
سيف: راح تحكي...جوست توصل نايا...ونحكو...
وبدأ يمشي وهو جارني وراه...جسمي مطاوعو...ومتبعو...ولأول مرة جسمي تقبل ذكر...من غير آم وعلي...حبطت عينيا نشوف في يدينا...جوزت عينيا عليه...وعلى جسمو...كأني نتفحص فيه...حسيتو وكأنو سحرني...بعدها دورت نشوف فالطريق كامل...لغريبة رجال وهاب لي في كل بلاصة...ما دارو والو...حتى أثرهم اختفى...حبس ركبني ملقدام في طونوبيلتو...بلا ما يحكي حتى كلمة...وركب نايا ملور...بعد ما دارلها حزام الامان...ركب قدامي و خبط بابو...حتى خلاني نسوطي في بلاصتي...طلعت راصي نشوف وهاب وين...مي تصدمت كي ما لقيتوش...حسيت بيه كي بدأ يمشي بزربة...كأنو همو الوحيد انو يبعد منا...وينفجر...تنهدت وانا نشوف في عصبيتو...الظاهرة من عروقو لي خرجو...هدوءو الغريب...وصوڨانو المتهور...صوت نفسو لي نسمعو من بلاصتي...دق قلبي مرة أخرى...حتى خلاني ندور جيهة التاقة نحكي...
انا: موسيو سيف بلا ما تعيي روحك...طونوبيلتي فالشركة...وها..
ما خلانيش حتى نكمل الاسم...وشاف فيا...وكأنو حاب يقتلني... وقرب مني يحكي...وهو مزير على هدرتو...
سيف: نفس...
غمض عينيه اهدي فروحو...
غمض عينيه اهدي فروحو...وحكي مع نايا...
سيف: برانسس...معليش تمدي لنونو...كاختابل تاحا قدامك...
شوية وقت وحطتهولي قدام وجهي تبسمت وشكرتها...
قاطعني وهو يحكي...
سيف: تيليفونك...لابتوبك...كلش داخلو...حتىى...
ودار شاف فيا...وقال..
سيف: تعرفي...
دورت راصي...نبعد في عينيا منوو...حليت الطاقة شوية حسيت كلي خلص الاكسجين لداخل...حطيت يدي على رقبتي نحب نتحسس سنسالي...من فوق التريكو مي تصدمت كي ما لقيتوش...
مسيت كامل رقبتي أكثر من مرة...حتى اني طرت نحوس داخل ساكودو تاعي...مي ما لقيت والو...حتى حطو قدامي وهو يحكي...
سيف: تحوسي على هذا...
شفت فعينيه مليح...سييت نقرا واش فيهم...مي والو...عينيه كحولا...يقدر اخبي بيهم كل لي داخلو...غالق على روحو...وواحد ما يقدر يفهمو...نحيتهالو من يدو ولبستها بلا ما نشوف فيه... ورجعت خبيتو بنفس الطريقة...ما نحبوش اضيع مني...و ما نحب حتى واحد اشوفو...ذكراه غالية عليا...ورغم كلشي ما قدرتش ننسى...
شفت فيه نحكي...
انا: مرسي...
تبسم نص بسمة...وحركلي راصو....
رديتلو بنفس الحركة...وتكيت على الطاقة...وسهت بعيد...نشوف فالناس لي تمشي...لي يضحك لي فرحان...ولي عندو هموم...فطنت على صوت تيليفوني...كي شفت آسمها...تبسمت ورفدت...
انا: ماما حياة...
حياة: لا ماماك حياة...ولا هم يحزنوون...ترفدي الطفلة...وتجي عندي...وما نقبلش أعذار...
انا: مي...انا...
حياة: نففففسس...
انا: حاظر مسافة الطريقة...
حياة: لحمار تع آدم...ولحمير لخرين...ساعة نعيط واحد ما رد فيهم...
انا: والله كانوا في اجتماع...تعرفي خدمة...
حياة: نفس...عندك تكوني تخبي عليهم كي عوايدك...
تبسمت وحكيت...
انا: والله من آخر مرة توبة ماما حيوتة...
حياة: ماما حيوتة العبيهالي العبيهالي...مسافة الطريق...و نشوفك فالدار...
حركت راصي ايه...حتى وماراهيش تشوف فيا...
انا: اوكي...
كوبيت عليها نشوف في سيف...لي مشي كامل معايا...حمحمت وشفت فيه..
انا: معليش تحطني هنا نحكموا طاكسي...
ما شافش حتى فيا...كمل يمشي عادي...كلي ما حكيتش...
أنا: موسيو سيف...
مي كيف كيف ما جاوبنيش...حطيت يدي على يدو وحكيت...
انا: سيف....
دارت الطونوبيل فجأة...ونشوف فيه رايح فطريق دار علي...ملامح وجهو تبدلت...حتى عصبيتو نقصت...شوية وقت...وكنا في دار ماما حياة امو لعلي...وين فرينا ساك...بعد ما حيا الرجال لي تما...وحتى الحراسة زادت بعد ما دخلنا...شفت فيه نسأل...
أنا: سيف واش كاين...
جاوبني وهو يعاون في نايا تنحي لاسانتور خاطر رقدت...
سيف: نتي لي راح تقوليلي نفس...
ستغربت من هدرتو...خبط الباب و راح بيها...حطيت يدي حابة نحل الباب ما حبش...شعور غريب حسيتو...كأنو قلبي داه معاه...دمعتي بطريقة غريبة صابت طريقها...حتى وانا نشوف في ماما حياة لي رفدتها...وهو يحكي معاها...