انين الروح || Im Sorry

حلقة 12

نضت عدلت روحي...نحكي بهدوء...بلا ما نشوف فيه...
انا: سامحني ما قدرتش نتحكم فروحي...
مي هو تجاهلني...وكمل طريقو لبيروه وين صاب الدوسيي مع البيسي...رفدو ودارلي بيدو باش نقعد...قعدت نشوف فيه كفاه متجاهل واش صرا تماما...
سيف: عنا اجتماع منا على 10 دقايق...
ديقت عينيا نفهم  قصدو..
انا: باغدو واش قصدك...
طلع راصو شاف فيا بعينيه وطلع حاجبو حتى سكتت...
انا: اوكي نكون تم...
سيف: تقدي تروحي...
وكمل يقرا فالدوسيي لي فيدو...
تنهدت بيأس...وحليت الباب لقيت ملك في وجهي...دحكت معايا وحكات..
ملك: سيف وقت الاجتماع...
حركلها براصو اوكي...تبسمتلو...وجبدتني معاها...
انا: سيف؟؟!
دحكت وجاوبتني...
ملك: أكيد مانيش راح نقولو موسيو...
ستغربت من هدرتها...وكملت نمشي معاها بسكات...
ملك: علاه ما دخليش معانا للاجتماع...فالنهاية كنتي سكرتيرا في فرونسا وأكيد متعودة...
تبسمت وحركتلها براصي اوكي...
جزنا على البيرو جبنا دوسيي وخرجنا...فطريق لقينا آدم ودين... كملنا معاهم...لحظات غريبة كانت...كامل لي فالشركة اشوفوا فيا بنظرات غريبة...قدرت نفهمها ونفسر معناها...ضحكت في سري... كفاه فتاة الارشيف...تمشي مع مدراء الشركات لخرين...يمكن أنا خيرت نحط روحي فهاد لبلاصة...مي هاد المواقف علمتني أكثر ملي ضرتني...حركت راصي بعدم اهتمام وركبت فلاسونسور... شوية وكنا قدام باب الاجتماع..تبسمت كي لقينا سيف تما...
علي: شريك شبيك ديما لول...
حرك راصو يمين ويسار...
علي: سور كنت فاريها مع كاش بابيشا...
قرصتو ملك سو سمير...وهي تحكي وتتبهلل...
ملك: ما ديرش عليه سيف هاك تعرفو...
شاف فيا وحرك راصو تع صحا وراح قعد فراص الطابلة...وين كان كل واحد اسموا مكتوب...واول ما جيت راح نقعد...دخل محامي عمي صالح يحكي...
المحامي: السي صالح ماوش مترأس شركاتو هاد الفترة...مي ماد...
حليت فيه عينيا...نمنعوا يكمل هدرتو...حمحم وكمل يحكي...
المحامي: قصدي أنا نايب عنو...
خمسو كامل معاه حتى انا...حسيت بورقة على يدي وتبسم...حركتلو راصي...وبعدت...قعدت في بلاستي وقريتها... "صار الوقت يا حورية" حركت راصي بلالا...وكمشت الورقة...واول ما طلعت راصي...لقيتو يشوف فيا...دورت عينيا عليه...حمحم وبدا يحكي...
كيان (كيان): بما انو كامل راكو هنا خلونا نبداو...
كان يحكي وهوما كامل يسمعوا...الا انا...وقت لحقني صوتها مرة وحدخرا يبست في بلاصتي...صوت كابوسي..صوت جرحي...صوت الماضي...يتجسد كامل في خبطتها على الأرض...هو صوت عكازة...مي بالنسبة ليا هو صوت الذئاب...كامل سكتو كي دقدق الباب...ودارو كي حل تحل...الا انا مانحتاجش ندور...باش نشوف شكون جاء...حتى اني نقدر نتوقع حركاتو وحدي...راح يتبسم رغم لي هو ما شايف حتى واحد فينا...مي من الريحة والصوت راح يعرف عددنا...بعدها راح ازير قبضتو على عكازتو...بعد ما يحركها للامام والخلف...و يحط اليد لخرا فالجيب...ويكمل خطواتو بثبات...طلعت راصي نشوف في انعكاسو...نفس الحركات تبسمت باستهزاء...نحاول نحبس من رعشت يدي...تكيت على الكرسي...وعاقدة يديا...يدي تزغد وكأنو قاعد يحكي فالحقيقة...قعدت نسمعوا ونشوف في انعكاسو بلا ما ندور ليه...
وهاب (الحاج): نعتذر على التأخير...
سيف بعد ما شاف فيا شوفة ما فهمتهاش...وحكى..
سيف: تفضل...
شكرو وجاء قعد مقابلني...جبدت روحي شوية للور...وجبدت بخاختي...بيدي ترعش...حاولت ما نلفتش الانتباه قد ما نقدر...خذيت منها زوج رشات...ارتحت بيهم...وخبيتها...قربت مني ملك تحكي...
ملك: بيبي سافا حاستك مش مرتاحة...
طلعت عينيا لقيتو يشوف فيا بنفس الخزرة...دورت راسي ليها وتبسمت...
أنا: لا مليحة...
حطت يدها على يدي وزيرت عليها ورمشت...جبدت روحي...
عم الهدوء...دورت عينيا عليهم...تبسمت...شعور غريب...كامل لي هنا عندهم علاقة بيا...سواء من قريب ولا من بعيد...وكأني لغز...لغز كبير...لازم على الواحد احلو...كامل يعرفوا بعضاهم... على حساب مكانتهم...قوتهم...ومنصبهم...أنا الوحيدة هنا لي بلا منصب...وجودي وعدمو واحد...أو يمكن قدامهم برك...اكبر شعار في هاد الغرفة هو نفسي...يمكن تكون كاين الطيبة في قلوب بعضهم... مي وقت الخدمة...هوما قناصين...قناصين مناقصات...حتى اصغرهم...خبتو أضعاف عمرو... العالم الغامض...هكا سميتو...معادلة طويلة...راح تاخذ منك حياتك باش تحلها...تمتمت "عالم رجال الاعمال" وتبسمت باستهزاء...كي بدأ يحكي...
وهاب: سبب الاجتماع هنا...كيما تعرفوا كامل...هو... مسابقة...مسابقة...رح تكون برعاية اكبر الشركات في الجزائر... بلا ما نفكركم...بلي الأهم هو مصلتنا...سمعتنا ومكانتنا...تبسمت باستهزاء مرة اخرى...و دورت وجهي...
وهاب: مادمازال نفس عندك ملاحظة...
غمضت عينيا من صوتو...وعاودت حليتهم بعد ما اصطنعت بسمة خفيفة على شفافي...ولاحظت سيف لي عينو عليا و مركز مع كل حركة...
أنا: نو...جوست تفكرت حقيقة رجال الاعمال...
قاطعني سيف يحكي...
سيف: اذا كنا راح نديروا مسابقة فيهمني أنها تكون نزيهة...موسيو وهاب...
يحكي وهو مركز على زوج كلمات لخرين...
غمضت عينيا كي حسيتها رح تلحم بينهم...و لحسن الحظ دخلت ملك...