قمرة : واش هذا
دخلتها اناهيد وين بانتلها شمبرة كبيرة لداخل فيها دروج للتحت و باب مع الاخر تاع الكلوار داتها ليه و فتحت الباب ...
قمرة : اهههه واش هذا
اناهيد : لهنا خلاصت خدمتي
رجعت اناهيد منين جات و هي دارت عاقدة حواجبها
قمرة : واش هاد الطريق
اسلام : طريق
قمرة : و كيفاش كاينة باب هنا جامي شفتها فشمبرتك
اسلام : كانت مغطية بهداك الكادر يا الحابسة
طلعت حاجبها و هو ضحك معاها جابدها عندو
قمرة : لوكان كاش واحد يشوفني و انا داخلة و خارجة منا
اسلام : واش فيها ياك توحشت مرتي
قمرة : هممم
.......
خرجت لبرا وين شافتو قاعد يلعب بالتليفون حطت السنيوة قدامو وقتها طلع راسو يتبسم معاها
اسيا : جبتلك لاتاي و شوية بقلاوة قعدت
صهيب : يعطيك الصحة .... اقعدي وعلاش راكي واقفة
ترددت منبعد قعدت
اسيا : فرحت بزاف لقمرة و الاغا يستاهلوا
صهيب : مام انا فرحتلهم بصح هما صبروا صبروا لوكان استنى حتى قنع دارهم و لقى لي حب يقتل مرتو منبعد يتزوج على روحو .... يعني هكا راح يعياو بزاف و هوما يخبيو و ميقدروش يعيشو كاي زوج متزوجين
اسيا : انا لوكان فبلاصتو ندير نفس الحاجة عندو الحق عندهم ما جوزوا مساكن يعني هي مالاول كانت باينة بلي يحبو بعضهم حتى وقت كانت تحكيلي قمرة حسيت
صهيب : الله يبارك على الاحساس
اسيا : الله يسلمك ... ايه قتلك سما عندو الحق انا ندعم ليكوبل لي يحبو يكونوا حياة ليهم
صهيب : مليح .... و وقتاش جي دالتنا
بدات تكح فالبقلاوة لي كانت تاكل فيها
اسيا : احم ... انا نروح سمرة تكون مسحقتني
صهيب : روحي روحي ... جبتيلي البقلاوة عشيتي كليتيها
رفدت الحبة لي قعدت و وجهها لي كان راح يطرطق
اسيا : ليلتك زينة
دخلت للداخل تمروح على وجهها حتى لحقت لشمبرتها
..........
اما سمرة فكانت قاعدة فالدروج لي مقابلين البورطاي تاع القصر ؛ قعدت غايسة ... مسحت دمعتها وقت حست ببنادم قعد قدامها
سمرة : نتا !!
كنان : كنان
سمرة : .... سمرة
كنان : معرفة خير
سمرة : متشرفين
كنان : تخدمي هنا ياك
سمرة : اممم ... نخدم فالكوزينة و نتا
كنان : انا هنا نخدم فالكاميرات تاع الدار و اي حاجة عندها علاقة ب l'informatique
سمرة : اههه مليح .....
كنان : مالا عجباتك الخدمة هنا
سمرة : ايه بزاف لي هنا بزاف ملاح مدام اناهيد مدام لورين قمرة و زيد درت صحابات ، اسيا نشك تعرفها
كنان : ايه نعرفها ههه هي و صهيب يظلوا لاسقين فبعضهم
سمرة : ههه ايه ... و نتا راك لاقي روحك هنا
كنان : اهههه انا هنا عكسك الله غالب مقدرتش ندير صحاب من غير صهيب لي فاميلتي ... و زيد لوكان ماشي نحتاج الدراهم هادو نرجع لدارنا
سمرة : واش معجبكش هنا
كنان : .... يعني بيناتنا بصح الاغا معجبنيش كامل نحسو بزاف متعجرف و عقليتو صعيبة
سمرة : بالعكس ... حنا هنا كامل نحبوه بزاف مليح معانا و زيد جامي ظلمنا ولا كلالنا حقنا
كنان : نفس الحاجة لي سمعتها فالعشيرة بصح انا ما بانليش كامل هكا
سمرة : المهم انا سمحلي لازم ندخل برد الحال
كنان : تصبحي بخير
سمرة : و نتا بخير
YOU ARE READING
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
