عشيرة الاغا _ باللهجة الجزائرية _

الحلقة 25

فايزة : حاجة مليحة و اسلام ماشي مليح تخلي الطفلة معلقة هكذا و نتوما مبينتوش العرس وقتاش
ريمة : ايه انا بنتي ماشي تقعد شادها منبعد ميكتبش المكتوب و تقعدلي عانس فالدار
لميس : حتى انا رايي من رايكم

طلع حاجبو من صحانية وجهها

اسلام : السوجي هذا تغلق و اذا خايفة بزاف تقعدلك فالدار تقدرو تحبسو الخطبة هادي

ناض و خرج بيلسان تبسمت و كملت تاكل

اناهيد : اسلام

خزرت اناهيد فيهم

اناهيد : هادي اخر مرة تزيدو تزيروها عليه اذا معجبكمش الحال نقدرو نحبسو كلش

خرجت اناهيد مخليتهم ؛ كملو كلاو شوية و كل واحد وين راح

.....

اما قمرة دارت دوش خفيف و خرجت لبرا ؛ قعدت فالدروج دير فالتليفون حتى حست بواحد جاي وقت دورت راسها لقاتو اسلام خارج

قمرة : يا اغا راك خارج
اسلام : ايه راح نخرج نصيد
قمرة : صح .... نقدر نجي اذا معندكش بروبلام كرهت فالدار
اسلام : .... ايه امشي

تبسمت و ركبت فالطونوبيل .... شوية و كانوا وصلوا قدام واحد الغابة قارا و هبطوا يمشيو

قمرة : موالف جي
اسلام : ايه في كل مرة نجي مع صهيب مرات وحدي مرات مع عماد و زياد
قمرة : انا كبرت هنا بصح جامي جيت هنا

كملوا يمشيو ؛ منبعد كي وصلوا لنص الغابة لقات واحد الدار صغيرة تما

اسلام : هاكي المفاتح ادخلي ؛ انا نروح نصيد شوية و نجي

عوجت فمها تاع راني من الدار للدار منبعد سكتت و راحت ؛ دخلت للدار هديك دارت فيه شافتو منبعد خرجت لبالكون و قعدت حتى كرهت وقت سمعت صوت الباب يتفتح دخلت ؛ شافتو دخل و حط دوزانو و راح غسل

اسلام : جيبي لافاست تاعك راح نروحو
قمرة : اممم

خرج للبالكون و هي راحت جابت لافاست تاعها و خرجت عندو لقاتو يتكيف

قمرة : يا اغا نروحو
اسلام ( تنهد ) : ايه
قمرة : .... يا اغا راك مليح
اسلام : ايه
قمرة : بصح مراكش تبان

راحت قابلتو

قمرة : ...... على حكاية لميس ماشي هكذا ....

سكت و قعد يخزر لبرا

قمرة : يعني حكايتها باينة اذا مراكش حاب هاد الزواج حبس والديها عندهم الحق متقدرش تقعد شاد الطفلة بلا ما تبين والو ............. سمحلي مكانش لازم ندخل روحي ... هدرت هكاك كي شفتك هكا

دورت راسها راح تخرج حتى قاللها

اسلام : ...... انا لوكان لقيت لوكان بطلت هذا شحال بصح صعيبة من جهة راهي بنت عمي و مرانيش حاب نجرحها و من جهة وصية بابا لي قعدت معلقة هكاك ...... سييت بزااف بصح مقدرتش نتقبل هاد الزواج
قمرة : باباك ربي يغفرلو بصح كيفاش يقدر يفرض عليك حاجة هكا على جال زوج ميترات يعني .... الزواج ماشي حاجة لي تندار على جال مصلحة راهو عمر راح تكملوه كيف كيف و اذا لقيت بلي معجباتكش دوكا غير حبس خير متندم منبعد .... و اذا حاب تزيد تمد فرصة للعلاقة تاعكم نتا حر و تحب نزيدلك
اسلام : زيدي
قمرة : نا حاب لميس هي لي تحبس هكذا باش جي منها و ماشي منك و تريح ضميرك صح ولا لالا

سكت شحال منبعد قاللها

اسلام : امشي امشي مفهمتش كيفاش قاعد ندي عليك
قمرة : وعلاش واش خصني ؛ وين تحطني تلقاني الله يبارك
اسلام : حتى فالزواج
قمرة : حتى فالزواج
اسلام : ملا مجربة
قمرة : اوهووه

تبسم و هي ضحكت ؛ خرجوا و شدوا طريقهم موليين للقصر

......

قمرة : طاح الليل ديجا
اسلام : ايه ... جعتي !!
قمرة : بزاف
اسلام : .... كاين واحد يبيع هنا

حبس و هبط شرا ؛ و رجعو للقصر

دخلت للقصر شادة الساشي تاع العشاء و قاصدة شمبرتها حتى لقات بيلسان خارجة من الكوزينة منبعد ما كانت طل عليهم من التاقة ، جاوزتها محبتش تكسر راسها معاها حتى نطقت

بيلسان : اوهوه خدامتنا خرجت مع الاغا .... متخزريش فيا هكاك بصح تقلقنا عليكم برك

خزرت فيها ببرود قالتلها زوج كلمات و راحت مخليتها هكاك

قمرة : ولدتينا و نسيتينا واقيل

.....

بيلسان : نوريلك يا شيبة النار ..... اههه يا اغا جيت
اسلام : خير
بيلسان : اههه ... والو سقسيت برك

طلع حاجبو و طلع لشمبرته حتى يلقى لميس جاية عنده

لميس : يا اغا .... طولت اليوم وين كنت

دخل للشمبرة و هي لحقته ؛ نحا لافاست و محبش يريبوندي عليها فهمت بلي محبهاش تدخل

لميس : .... كنت حابة نهدر معاك على الصباح ..... يعني صح مكانش لازم بابا يسيف عليك بصح نتا مكانش لازم تهدر
اسلام : واحد ما سيف ولا راح يسيف عليا انا ندير لي فراسي لميس و حاجة واحد اخرى ؛ اخر مرة توريلي واش نهدر واش لالا .... و اذا راكي مقلقة على الزواج و مراكيش حابة تقعدي مربوطة ياك مديتلكم الحل و دوكا مدابيك تخرجي راسي راهو يوجع
لميس : مفهمتش وعلاش راك تهدر معايا هكا شغل ماشي كامل خطيبتك
اسلام : ياك انا مديتلك شونص بصح نتي معرفتيش تستغليها لميس
لميس : يا اغا راك دير برك فالسبايب

دنا عندها عاقد حواجبو

اسلام : افهمي حاجة عقلية الدراري تاعك متديناش لبعيد ... حبسي متدخلي روحك فيا و فكل حاجة نديرها و تحاسبي لي نهدر معاهم
لميس : عليمن راك تقصد ... ههه على قمرة هكذا
اسلام : مدام لحقك الميساج تقدري تخرجي