قمرة : يا اغا انا نخليكم
لميس : اه اسسسلام
زيرت على اسم اسلام شغل تبينلها بلي انا راني نقولو اسلام و راني قريبة ليه ؛ قمرة تبسمت
لميس : اههه من وقتاش ولينا نقعدو مع الخدامات اسلام
عقد حواجبو و قمرة دارت ليه
قمرة : ههه نورمال يا اغا منزعفش منها فاهمتها و عاذرتها و زيد انا وياها بزاف نتفاهمو ... قصدها بالخدامات البنات يعني بصح انا ننصحك لازم تكون عندك كونفيونص فروحك و فخطيبك ملازمش تتوسوسي من كلش
لميس : نصايحك خليهم عندك
قمرة : ايه كيما تحبي ؛ انا نخليكم
غمزتها و راحت تمشي و تهدر مع روحها
قمرة : شهر و نص ... شهر و نص و انا شادتلها و ساكتتلها راهي لاحقتلي لهنا ... حابة نوريلك قمرة نتي و المصفارات لي معاك نوريلك مالا
......
دخلت لداخل وين لقات نور طالعة بسنيوة فيها الماء و الدواء
قمرة : نور ليمن هاذو ؟
نور : لمدام لورين قالتلي راسي راهو يوجع
قمرة : ايه .... نور خلي نطلعهولها انا
نور : ... ايه
.....
دقدقت و دخلت وقت شافتها لورين ناضت
قمرة : مدام جبتلك دواك
لورين : اههه تعيشي ... بصح ماشي قلت لنور جيبو
قمرة : ايه ... بصح هي غيطتلها مدام اناهيد سحقتها
لورين : ايه
قمرة : هاكي ....
مدتلها دواها و هي قعدت واقفة تفرك فيديها
قمر : راكي مليحة ... قصدي راسك راهو يوجع فيك بزاف
تبسمت لورين
لورين : شوية
قمرة : تحبي نديرلك مساج
لورين : اههه ... ايه
قعدت قدامها دلكلها فراسها و لورين تتبسم منبعد خزرت فالكادر لي قدامها مصورة فيه هي و زياد جبدته
لورين : هذا زياد خوك .... قصدي ... هو يعني بلاك متعرفيهش مليح بارسكو ميقعدش بزاف فالدار يقعد بزاف مع يما
قمرة : اههه ايه ماشي موالفة نتلقاه بزاف
لورين : استناي
راحت جبدت الالبوم زدو حطتو قدامها و قاعدة توريلها فيهم و تحكيلها على كل حاجة وراتلها كامل الدار من لي تزوجت حتى لدوك وقت دخل زياد و شافهم تبسم
زياد : اههه لالا يما راكي تبهدلي فيا توريلهم كي كنت بلاكوش
لورين : ههه
زياد : استناي دوك نوريلك وحدة تضحكي على روحك
قعد قدامهم و شوية بشوية قمرة ندامجت معاهم و بدات تحكي و تضحك معاهم وقت دخلت منى و لقاتهم هكاك خرجت منارفية و حتى بلا ما يحسولها
......
و هكذا جاز شهر و شهر الثاني نفس الاحداث نفس الروتين بصح التطورات لي صراو بزاف .... لي فالدار عرفوا بلي قمرة هي بنت لورين و شاهين بصح قمرة مزالها فشمبرتها مع نور ... و الخدمة مولاوش الخدامات يخليوها تمس بزاف بصح كامل كانوا مسايرينها و مسايرين رايها .... علاقتها تحسنت بعايلتها و حستهم رغم المشاكل لي يصراو بصح الاغلبية يتفاهمو مع بعضهم و سورتو كي عرفو بلي هي بنت شاهين رجعو يعاملوها بزاف مليح و يسايروها من غير لميس لي قريب مهبلت و هند و بيلسان لي الغيرة عماتلهم عينهم كل يوم يديرولها بروبلام صح هي متسكتش على حقها بصح عياوها من المشاكل دايم لميس تخرج تضارب معاها بالهدرة ولا يقعدو قدامها و يمعنيو .... المهم كرهولها حياتها بصح ماشي قمرة لي تفسد معيشتها على جالهم ... بالعكس مالغري المشاكل تاعهم بصح والفت و حبت القصر و ناسه و مع اسلام منهدروش يتفاهمو بزاف بوون ماشي لدرجة دسراتو و ولاو مقربين لالا بصح يتفاهم معاها مقارنة ببنات عمه لاخرين و حتى لميس
منى دوكا هي صح تقلقت بزااف من علاقة قمرة بدارهم لي قوات بصح جامي دارتلها بروبلام ولا عايرتها كيما هادوك
.......
وصلت لقدام القصر منبعد ما راحت للابوست بعتت دراهم لاسيا كيما كل شهر ؛ دخلت للدار بدلت حوايجها و راحت للكوزينة وجدت الفطور
.......
في الطابلة :
جيهان : سيبال راني متحمسة للخطبة تاعكم
سيبال : يا عمري
ريمة : ايه مبقالهاش
ليندة : راح تكون خطبة يسمعو بيها كامل الناس
فايزة : ايه راح نهولوها هداك النهار
اناهيد : ههه ... الياس وشبيك مراكش تشارك معانا ياك الخطبة تاعك
عماد : راهو كي الولية حشمان
شاهين : ههه
الياس : عماد بلع
دخلت قمرة حطت الماكلة مع سلوى
فايزة : قمرة اقعدي معانا
قمرة : اههه لالا
زياد : هيا اقعدي وشيك حشمتي
سيبال : جيهان ادناي خليها جي بيناتنا
جيهان : بيانسور
عضت على شواربها متوترة و قعدت بسيف عليها ؛ لورين تبسمت و البنات قلبوا عينيهم .... بداو يحطو فالماكلة و سيبال سربات معاها لقمرة
اناهيد ( للورين ) : مبقاش و تخرج لشمبرتها و تولي تعيطلكم ماما و بابا
لورين : ان شاء الله ان شاء الله
فوزي : ايه يا اغا واش رايك حنا بديناها بديناها بالحفلات وعلش ما ديروش عرسكم نتا و لميس مور الخطبة
لميس تبسمت فرحانة و بيلسان حصلتلها .... قمرة قاعدة مهبطة راسها مع الطبسي محبتش طلعو
اسلام : مزال الحال على العرس
ريمة : لالا هداك هو لوقتاش تقعدو مخطوبين واش قلتي اناهيد
اناهيد : كيما حب وليدي يدير
فوزي : انا بنتي منقدرش نخليها هكذا تقعد غير مخطوبة يالوكان نديرو الفاتحة و العقد و العرس منبعد
فايزة : حاجة مليحة و اسلام ماشي مليح تخلي الطفلة معلقة هكذا و نتوما مبينتوش العرس وقتاش
ريمة : ايه انا بنتي ماشي تقعد شادها منبعد ميكتبش المكتوب و تقعدلي عانس فالدار
لميس : حتى انا رايي من رايكم
هادو هوما الحلقات ان شاء الله يكونوا عجبوكم نحبكم تخليولي اقترحاتكم للقطات بين البطلين و الى الملتقى يوم السبت ان شاء الله 💚💜💚
YOU ARE READING
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
