من شدة اعجابي بتفاعلكم راح نكمل نحط 😒
سوو هادو حلقات غدوة ان شاء الله نتمنى يطلعوا شوية باش نتحمس نكملها بلرسكو الحلقات هادو كان عندي شحال ملي كتبتهم المهم ملتقانا يوم السبت ان شاء الله 💚💜💚
حطت راسها قدام التاقة و غاست ؛ طفات تليفون لي صونا كي عيطتلها اسيا ..... مراهيش قادرة تامن بلي الناس لي رباوها تخلاو عليها على جال الدراهم هبطت دمعة من عينها و ولاو دموع الضرب و الفقر و الميزيرية لي عاشتها معاهم و فالاخر تخلاو عليها ؛ قرايتها حبستها على جالهم راحت تمسح وسخ الناس باش تقدر تقري ختها و توكل والديها و هادي هي مكافئتها ..... استغفرت و خزرت فالساعة لقاتها الربعة و نصف ناضت و راحت للكوزينة
قمرة : نور الاغا جا
نور : ايه هداوين جا من التدريبات كنت جاية ليك على القهوة
قمرة : ايه
وجدت القهوة و طلعتهالو وقت فتحولها الحراس و دخلت لقاتو يصلي ... حطت القهوة و كانت راح ترجع بصح وقت سمعاتو يقرا فالقرآن و هو يصلي حست لحمها قشعر و عينيها دمعو .... حبت تعرف واش راهو يحس و هو يصلي ؛ وقت كمل قالتلو
قمرة : يا اغا قهوتك راهي واجدة اذا متسحق والو نقدر نخرج
اسلام : ايه
قمرة : ..... صوتك شباب فالتجويد
اسلام : ( شرب من القهوة ) .... اممم اول مرة تعجبك حاجة مليح
قمرة : قلت واش شفت برك
اسلام : متصليش ؟؟
قمرة : ..... اممم
اسلام : وعلاش
قمرة : .... هكا ؛ ربي يهديني
اسلام : مكان حتى سبة تخلي بنادم ميصليش علبالك ..... تارك الصلاة كافر علبالك
قمرة : .....
اسلام : راهو ياذن العصر اذا حابة ديري حاجة مليحة فحياتك روحي توضاي و صلي ( مقبيل صلى واش فاتو كي كان برا )
قمرة : امممم ....
رجعت شعرها مور وذنها
قمرة : هو يعني ... نسيت عليها شوية ....
اسلام : روحي لبسي حاجة للصلاة و ارواحي صلي معايا تتعلميها
قمرة : صح !! ... ايه دقيقة
خرجت .... شوية و رجعت و فيدها حصيرة و طقم صلاة تاع نور دارتو ... دارت الحصيرة موراه و بداو يصليو كيف كيف صلاو شحال من ركعة باش تشفى مليح عليها .... الراحة لي حستها وقت صلات جامي حست بيها ( من هاذ المنبر لكل وحدة مراهيش تصلي ربي يهديك ان شاء الله تبدايها و متحبسيهاش )
اسلام : ربي يثبتك
قمرة : ان شاء الله .... يعطيك الصحة ربي يجعلها فميزان حسناتك
اسلام : امين
قمرة : انا نخرج نكمل خدمتي
رجعت الحوايج بلاصتهم و كملت طيب العشاء
.......
تلموا على الطابلة ؛ البنات كانوا يضحكو مع بعضهم
لميس : فرحت بزاف كي خرجت
هند : حتى انا معجبتنيش هديك قمرة
بيلسان : هي صح تعيي بصح عندها كونفيونص فروحها بزااف شفتيها وقت تحكي
هند : اممم حتى لبستها متبانش تاع وحدة خدامة حاسبة روحها فدارها
جيهان : تعيووو هادي كامل غيرة طفلة تهبل و مخصها والو ولا حسدتوها على الزين لي مدهولها ربي انا كنت حابتها تقعد ماكلتها عسل
هند : بلعي سينون دوك نضربك
لميس : اففف مفهمتش هاد الطفلة وعلاش راهي شاغلتلكم عقلكم و هي كلها على بعضها متسوى حتى حاجة قدامي
هند : صح
بيلسان : ههه لهاد الدرجة حاطة روحك مركز الكون لميس
فتحت عينيها فيها و وقت نطقت ليندة سكتتهم
ليندة : يا بنات متعرفوش تسكتو شوية
اناهيد : سلوووى حطو العشاء
دخلت سلوى و معاها نور يسربو و فالاخر دخلت قمرة حطت الشلاضة وسط الطابلة ؛ لميس فتحت عينيها مشوكية و قمرة غمزتها .... لورين طبعت الكرسي و ناضت
منى : ماما ... واش بيها
شاهين : خليها دوك انا نشوفها .... بصحتكم
خرجت قمرة من تما ديراكت لشمبرتها ، دخلت ففراشها و رقدت
و هكذا جازت اليامات و جاز شهر .... قمرة والفت خدمتها و لي فدار واحد محب يجبدلها على لحكاية هديك ؛ هي و نور ولاو قراب شوية من بعضهم و والديها لي رباوها ما سمعت عليهم حتى حاجة ... و دايمن لميس هند و بيلسان يديرولها المشاكل سورتو كي لقاو اسلام يتفاهم معاها نوعا ما .... و من غير اسلام اناهيد شاهين و لورين و فايزة لي علبالهم بحكاية قمرة
........
صباح جديد يبدا مع اذان الفجر ، حطت الحصيرة صلات صلاتها .... من نهار بداتها رجعت تحس براحة و هدوء محستهمش من قبل ؛ نحات طقم الصلاة تاعها و خرجت للكوزينة توجد حاجة للقهوة
.........
فايزة : تقبل الله خويا
محرز : منا و منكم
فايزة : ايه واش راك
محرز : الحمد لله ختي
فايزة : قولي دار وحدة و منتلقاوش بزاف
محرز : صح
فايزة : ... محرز خويا انا حبيت نحكي معاك فحاجة
محرز : اتفضلي
فايزة : يزيد فضلك .... هو كيما شفت اسلام قريب يتزوج و ... الياس كبر حتى هو دوك انا قلت وعلاش ما نفرحوش ديراكت و نزوجوه حتى هو
محرز : حاجة مليحة بصح تاع دوكا راكي تعرفيهم يحبو يخيرو وحدهم كي تنفحلهم
فايزة : لوقتاش تقعد تستنى فيه .... انا قلت وعلاش مانوجوهش هو و سيبال منها بنت عمتو و زيد ميلقاش خير من دمو
محرز : تعرفيني نحب سيبال و نعزها و متمني تكون عروستي بصح معلباليش الياس اذا يحب
فايزة : يعني ترجع ختك الكبيرة على جال وليدك ...
محرز : حاشا
فايزة : شوف محرز انا حابة نتهنى على بنتي و على ولاد خاوتي و ليا سيبال و الياس يتفاهمو بزاف خلينا نفرحو بيهم نتا قول برك ايه و الياس راح يقبل
محرز : ايه نسيي
فايزة : فرحتني ... انا نخليك
هبطت لتحت تتبسم ؛ دارت كاب على صدرها و خرجت برا وين كانت قاعدة اناهيد و لورين
YOU ARE READING
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
