عشيرة الاغا _ باللهجة الجزائرية _

الحلقة 41

نور : يا اغا
اسلام : واش كاين نور
نور : انا شفت واحد البارح هبط لتحت ... للحبس

ناض من بلاصته

اسلام : شكون ؟؟
نور : .... قمرة

قمرة فتحت عينيها من الصدمة و ضحكت

قمرة : انا ههه و وقتاش شفتيني
نور : البارح فليل
قمرة : مفهمتش وعلاش كل مرة جبدوا عليا حكاية و شكون نور الطفلة لي ولات قريب صاحبتي
نور : سمحيلي بصح نتي تلاعبتي بحاحة تخص عشيرتنا و انا منقدرش نسكت على هاد الحاجة
اسلام : نور اخرجي
نور : حاضر يا اغا

لورين خزرت فبنتها و قالتلها بلعقل

لورين : متقوليليش نتيا قمرة
قمرة : ماما واش راح نربح كي ندير هكذا

نطقت لورين

لورين : مفهمتش وعلاش الحاجة لي تصرا يحصلوها فبنتي
فايزة : لورين مزال مبان والو نور قالت بلي شافتها هابطة لتحت ماشي بسيف تكون هي لي هربتوا
اناهيد : قمرة تفكري واش هبطك لتحت
بيلسان : ههه هبطت ترقد تما ... باينة بلي مدام راحت للحبس هي لي هربتوا

قمرة كانت تخزر فاسلام حابة تعرف رد الفعل تاعه بصح مفهمت والو

اسلام : راح تبان متخافوش راح نعرف لي دارها منا للعشية و وقتها راح يتحاسب على لي دارو

طلع للبيرو تاعو و لميس دارت لقمرة

لميس : خلي الاغا يكونفيرمي بلي نتي لي هربتيه وقتها نشوفوا واش راح ديري
قمرة : معندو ما يكونفيرمي انا ما درت والو .... منعرف بلاك هاد المرة تاني تخرجي نتي مور هاد الحكاية
لميس : انا منقدرش ندير حاجة تمس بالاغا
قمرة : مول الطبع ما ينطبع
فايزة : خلاااص حبسو

راحت قمرة مقلقة مفهمتش وعلاش نور لي كانت مقربة منها ديرلها هكاك

........

صهيب : يا اغا صح مدموزال قمرة لي دارتها
اسلام : لالا محال ؛ غير دخلنا اسامة لبارح انا شفتها و كنا سهرانين الليل كامل كيف كيف فالجنينة منبعد كي اذن الفجر هي طلعت لشمبرتها و انا رحت شفت اسامة وقتها مكانش كاين .... و كي لقيناه لقيناه قريب من القصر معنتها الحكاية صرات قبل مندخل للقصر بشوية مكانش كيفاش اطفلة طير و تدخل تهربو هادي واحد و زيد هي متعرفش الطريق لي تحت القصر
صهيب : مالا وعلاش نور كذبت
اسلام : لي دارها حب يمسح الموس فيها برك بصح الحكاية لي دارها جايحة كيفاش نور جي تقول بلي شافتها هابطة للحبس و معلباليش واش
صهيب : سمحلي يا اغا ... بلاك مدموزال لميس مدام هي لي لي دارت بروبلام لقمرة من قبل

قعد رايح جاي منبعد قالو

اسلام : لميس تاني مديرهاش ... من جهة مور واش صرا تخاف تزيد تريسكي و من جهة واحد اخرى هي البروبلام تاعها مع قمر متقدرش جي و تاذيني نعرفها
..... كاين ثلاثة يقدرو يديروها ..... فوزي بارسكو حبستلوا البروجي ، الياس و عائشة بارسكو معندها حتى صلاحيات فالقصر سما واحد فيهم حاب ينتقم
صهيب : صح ... بصح كيفاش راح نعرفوا
اسلام : اذا كان لازم نخير واحد بعقلي نقول عائشة .... الياس مراهوش يدخل بزاف للدار نشك بلي معلبالوش ممبا بلي دخلنا اسامة فليل ملي خطب سيد دخل ف dépression .... عمي فوزي خواف بزاف ، صح بلاك حاب يخلفهالي بصح مدابيه العشيرة تكون مليحة مدام بنته راهي مخطوبة للاغا سما تقعد عائشة ماشي اول مرة تحب طيح بيا ..... بصح منقدرش نقول من راسي برك
صهيب : و الحل

وقف شحال و قالوا

اسلام : روح عيطلي لكنان قولوا يلقاني فالصالون
صهيب : ايه مالا انا نروح نشوفو

وقت سمع صوت الباب قعد فوق البيرو و نطق

اسلام : انعم
قمرة : نقدر ندخل

دار بعينيه لصهيب باش يخرج ؛ خرج و قمرة دخلت غالقة موراها الباب

اسلام : ارواحي قمر

دنات عندو كانت باينة مقلقة

اسلام : واش تسحقي
قمرة : ... امنت بلي انا لي هربتو
اسلام : على هادي جيتي
قمرة : اممم
اسلام : ماشي نور قريبة ليك
قمرة : ايه بصح معلباليش وعلاش قالت هكاك انا الحبس مزدتش شفتو من اخر مرة رميتني فيه
اسلام : ايه
قمرة : اسلام انا معندي مراح نربح اذا هربتو منقدرش نديرلك حاجة كيما هادي سورتو مور البارح و  ....
اسلام : وشنو البارح
قمرة : والو .... حبيت برك نفهمك بلي انا خاطيني و الباقي يرجع ليك
اسلام : اتهناي قمرة مرانيش شاك فيك وقت هرب اسامة كنت معاك

غمضت عينيها و تنفست

قمرة : مليح .... يعني امنتني برك كي كنت معاك
اسلام : ياك تبراتي دوكا واش راهو هامك
قمرة : لميس هي لي دارتها ... حبت تخلفلي تاع امرة لي فاتت
اسلام : لميس البروبلام تاعها معاك مراحش تقدر ضرني
قمرة : وعلاش راك سوور
اسلام : بارسكو نعرفها و هي ...
قمرة : هي تحبك صح عندك الحق متقدرش تاذيك صح صح سمحلي ... انا نخليك براحتك يا اغا

خرجت و هو غمض عينيه

.....

غلقت باب شمبرتها و قعدت فبونكها مقابلة التاقة عينيها تعمروا بالدموع

قمرة : وعلاش راهو يصرالي هكا

......

دخل للصالون لقاهم قاعدين من غير قمرة و هند لي طلعت مع ليندة

اسلام : جيهان اطلعي عيطي للباقي
جيهان : ماما هبطلها السكر على هادي طلعت معاها هند
اسلام : معليش خليهم ، عيطي لقمر
جيهان : ايه  

طلعت جيهان شوية و هبطت معاها قمر لي دخلت و شدت بلاصتها بلا متخزر فحتى واحد شوية و دخل كنان

اسلام : العشية راح نشوف les empreintes لي كاينين فالحبس على هادي كامل نلقاكم الفوق و واحد مايهبط كنان نتا لي راح تستكلف بالخدمة
كنان : كون مهني يا اغا

وقت سمعت صوتو طلعت راسها لا اراديا و تلاقات عينها بعينيه و قلبها بدا يخبط مالخوف لوكان يجي عندها

هادو هما حلقات اليوم ان شاء الله يكونوا عجبوكم خليولي ارائكم فالتعليقات و اقتراحاتكم و الى الملتقى ان شاء الله في حلقات جدد
💚💜💚