عشيرة الاغا _ باللهجة الجزائرية _

الحلقة 15

قمرة : واش داني نيبس راسي اهههه دوك نتبحر لالا قمرة متريسكيش غير ولي

رجعت تجري

قمرة : يا اغاااااااااا يا اغااااااااا  وين راح هذا وقيلا قتلوه يا اغااااااااااا
اسلام : بلعي دوك منا يعرفوا بلاصتنا
قمرة : باش تسمعني برك
اسلام : واش رجعك
قمرة : اهههه ... خممت عليك محبيتش نخليك وحدك
اسلام : ايه باينة شكون راه مسحق الاخر .... ارواحي هادي بلاصة مليحة نريحو فيها فالليل و الصباح نكملو طريقنا
قمرة : امممم

تكسل على واحد الشجرة مغمض عينيه و هي مقابلته تدفي فروحها ؛ فتح عين وحدة خزر فيها منبعد نحا لافاست تاعو مدهالها

اسلام : شدي
قمرة : لالا صحا ... دوك تبرد
اسلام : لالا لي مكتوب عليه الشقا هكا تصرالو
قمرة : متقدرش تكمل الخير تاعك كامل

لبستها و تكات راسها

قمرة : هكا تعادلنا البارح حبستني و اليوم سلكتني متسالي منساللك
اسلام : لي صرالك البارح تستاهليه و مع لسانك مزال تزيدي تشوفي كثر
قمرة : شفت روحك واش قلت .... مخليتنيش ممبا ندافع على روحي وعلاش وقت نتوما الرجال تغلطوا تمسحوها فالمراة ... الخدام تاعك كل يوم يديرونجيني و يدنى ليا و هكاك شكون لي تعاقب انا وين راهو العدل هنا يا اغا
اسلام : ...... كنتي قادرة تهدري
قمرة : خليتني نهدر ياك رميتني فالحبس ديراكت
اسلام : رانا متصافيين كيما قلتي
قمرة : امممم
اسلام : ........... واشنو هي الحاجة لي خلاتك تخرجي تعيشي فالمدينة 
قمرة : الفقر .... كان لازم نروح نخدم
اسلام : ملقيتيش هنا
قمرة : تتت ... شهرية قليلة بزاف يعني منقبل جامي خدمت فالقصر كنت مرات نعاون جارتنا فااخياطة مرات نبيع مرات نطيب كل خطرة كيفاش منبعد صحتلي خدمة فالمدينة دراهمها لباس بيهم .... كان لازم نروح و نخدم سورتو علجال ختي و قرايتها فقعدت 3 سنين تما
اسلام : ..... و باباك يعني ميخدمش
قمرة : ..... لالا
اسلام : فهمت
قمرة : بصح تمنيت لوكان قعدت فالمدينة كان خير
اسلام : وعلاش رجعتي مالا
قمرة : الظروف حتمت عليا .... تما كلش مسموح معندهمش عقلية متشدد  ولا لبسة كيما هنا كل واحد حر فحياتو
اسلام : توالفي نورمال .... هي صح هنا العقلية متبدلة بصح الصح الصح ناس العشيرة ملاح بزاف هي على كل وين تروحي تلقاي المليح و العيان بصح هنا بحكم عشيرة وحدة تلقايهم كامل مترابطين مع بعضهم ...... بصح اذا تحبي تكوني ليبر لازملك المدينة هنا العادات صعاب
قمرة : وعلاش عشت فالمدينة ؟؟
اسلام : ماشي ثلث سنين حياتي كامل تما
قمرة : صح
اسلام : اممم كنت نقرا تما منبعد لافاك قريت لهيك و تحتمت عليا نولي كي شد بابا لفراش بارسكو انا وليدو الوحيد و كان لازم نشد بلاصته
قمرة : مليح .... و كيفاش حتى والفت الحالة هنا
اسلام : نورمال مراهمش عيباد ياكلوا هنا
قمرة : علبالي بصح المدينة خير
اسلام : نضمنلك بلي فشهرين تكوني بدلتي رايك
قمرة : ههه اذا بدلت نقولك بصح مشكيتش .... مفهمتش كيفاش بانولك عيبادها ملاح انا لي تلاقيتهم قريب كامل واحد مايصلح نبدالك من مول التوت هداك و موراها سلوى الخدامة و علي هداك الحارس تاعك و بلا ما ننساو خطيبتك لميس
اسلام : حشمتي تزيدي اسمي
قمرة : انا منحشمش و لي في قلبي على لساني ؛ نتا يا اغا مزال مصفيتك
اسلام : مزال مالا .... تعرفي مفهمتش منين يجيك الكوراج باش تهدري فالوجه هكذا
قمرة : معنديش زوج وجوه انا منقدرش نهدر معاك حاجة و انا فقلبي حاجة واحد اخرى
اسلام : ماشي مليح تصححي وجهك مرات ... شفتي واش صرا فيك البارح في جرت لسانك
قمرة : مكانتش حاجة كبيرة موالفة

عقد حواجبو تاع كيفاش و هي حمحمت و حطت يدها على راسها مستسلمة للنعاس

صباح جديد :

اناهيد : يا ربي وليدي وين راح
صهيب : مدام وزعنا الجنود فكامل البلايص راح نلقاو وين داوه
عائشة : بصح بيزار كيفاش حتى الخدامة و مكانش حسها
ريمة : تكون غير راحت عند كاش واحد
لميس : هديك تكون راحت مع هداك العساس لي حكمو معاها الاغا .... لي يهمنا الاغا ؛ بابا مكانش كيفاش نديرو باش نلقاوه
فوزي : لميس معندنا حتى خبر حتى الطونوبيل و لقيناها فالجبل معرفناش نوصلولو 

حطت يدها على خدها تمسح فالدموع حتى طلعت راسها وقت اناهيد عيطت باسم اسلام ؛ تبسمت وقت شافتو داخل

اناهيد : اسلام وليدي

راحت عنقتو

اناهيد : خوفتني عليك
اسلام : خلاص راني هنا

تبسمت وقت شافته و راحت عندو

لميس : يا اغا راك مليح خافنا عليك بزاف

تبسم معاها

اسلام : راني مليح لميس

تبسمت بصح تمتم راحتلها وقت شافت قمرة دخلت موراه

اناهيد : قمرة !!! وين كنتي
اسلام : تخطفت معايا
لميس : كيفاش ... يعني كنتو كيف كيف
قمرة : ..... لالا البلاصة لي بعتوه ليها على اساس صهيب فيها انا لي كنت فيها و تما غمونا و سرقونا
اناهيد : شكون عندو مصلحة يدير هكذا
لميس : هذا كامل بسبتك مفهمتش وعلاش الاغا بقدره و شانه رايح يحوس عند خدام عنده
فايزة : لمييييس
لميس : ماشي كل مرة تغطيو الشمس بالغربال
صهيب : يا مدام انا مكانش علبالي بلي راح يصرا هكا
لميس : ههه يعني حاب تقنعني بلي جاو ضربوك لراسك و خطفوك و نتا محسيت بوالو
فايزة : لميس اخر مرة نقولك بلعي

يتبع 💚💚💚 .....