عشيرة الاغا _ باللهجة الجزائرية _

الحلقة 59

نهار جديد و احداث جديدة : 

خرجت من الدوش و قعدت قدام لاكوافوز تنشف فشعرها حتى دخلت لورين لي وقفت قدامها

لورين : سمعت بلي رحتي لبارح عند لي رباوك
قمرة : ايه
لورين : وعلاش مقلتيلناش
قمرة : هكا كنتو مشغولين ... كان لازم نروح حالتهم مكانتش مليحة
لورين : فبلاصة مراكي تحوسي عليهم حوسي تسقمي علاقتك مع باباك
قمرة : لي فسد حاجة يسقمها انا ما درت والو
لورين : المهم انا جبتلك الحوايج لي تلبسيهم اليوم نعرف بلي ما شريتي والو

حطتهم فوق البونك و جات خارجة ، ناضت عندها

قمرة : ماما حبسي

دارت عندها

لورين : اممم
قمرة : ارواحي

عنقتها تتبسم

قمرة : وشبيك
لورين : خايفة يديوك مني لي رباوك
قمرة : وعلاش الهدرة هادي .... كمال جا لبارح و حكالي على حالتهم ، ماما عندهم يامات ما كلاو والو و رؤيا خرجت من المسيد كان لازم نعاونهم
لورين : عندك الحق
قمرة : و نتي حبسي مديري فالدراما

خبطتلها راسها و هي تبسمت و حطت راسها على صدرها

لورين : وشبيك
قمرة : والو
لورين : راكي تباني مقلقة من حاجة
قمرة : لالا ... بصح قلبي راهو مقبوض منعرف وعلاش
لورين : بوووه ... معليش روحي وجدي روحك بلاك كاش وحدة تخطبك لعشية
قمرة : ههه ايه

خرجت لورين و قمرة رجعت لشعرها تمشط فيه

قمرة : شكون هاديك الطفلة ... راحت لميس جات هادي ... قلبو باركينغ يا حبيبي

كملت توجد في روحها ؛ دارت مكياج خفيف و لبست  القفطان لي جاي فاللون السماوي كيما علباكم ليوم العشاء تاع الياس داروه فلقصر و عرضوا غير لي قراب بزاف

كملت و خزرت فالساعة لقاتها 5 تاع العشية ؛ رفدت تليفونها و هبطت لقات الناس بداو يجيو

قمرة : طاطا حسناء
حسناء : قمرة وشراكي

سلمت عليها و قالتلها

قمرة : راني مليحة و نتي
حسناء : الحمد لله ؛ اسمعي يجوز العرس و ارواحي عندنا
قمرة : ههه ان شاء الله طاطا
حسناء : ربي يحفظك ان شاء الله .... شفتي اناهيد شحال تهبل الطفلة ما شاء الله تبارك الرحمان في خلقه
اناهيد : اممم .... راكي مليحة قمرة
قمرة : وعلاش منكونش مليحة

ميلت راسها تتبسم و باستها من راسها

اناهيد : ربي يدومها مالا

قعدت واقفة دير بتليفونها حتى جات لميس

لميس : اههه قمرة ... راكي شابة اليوم
قمرة : .... مارسي
لميس : ايه ارواحي نعرفك على البنات

تبعتها متعجبة منها ؛ هدرت شوية معاهم و جبدت روحها كامل نفس عقلية لميس البريستيج و التكبر عاميلهم عينهم

كيما كان الحال جاز الوقت بين القسرة و الضحك و الماكلة ، حطو العشاء تعشاو و الخدامات بداو ينقيو فالحالة باش يوجدو للسهرة

جات وحدة من الخدمات لي كانوا جابوهم اليوم للعشاء رافدة سنيوة فيها كوكتيل سرباتو على الضيوف ؛ وقتها قمرة رفدت كاسها و خرجت تنقص من الحس شوية
قاعدة دير فتليفونها و مرة مرة تترشف من الكاس شوية و شافت كنان جايز قدامها .... تبسمت معاه فوق فوق و هو ردهالها

كنان : ..... نسقسيك
قمرة : اممم
كنان : نتي هدرتي مع الاغا باش يرجعني ؟
قمرة : وعلاش راك تسقسي
كنان : بارسكو الاغا حاوزني و كي قتلك موراها رجعني
قمرة : ..... ايه انا قلتلو بصح دير فبالك ماشي دايمن راح نقعد نعاون فيك
كنان : بصح فواش غلطت باش حاوزني
قمرة : هنا ممنوع تهدر مع العائلة الحاكمة غير اذا تحتمت
كنان : و صهيب دايمن معاكم !!
قمرة : صهيب مربي معاهم من بكري و زيد هو صاحب الاغا يعني متخلطش بينك و بينو
كنان : بصح كان قادر يقولي وعلاش حتى يحاوزني هكذاك
قمرة : تقدر تسقسيه كنان .... اذا حاب تضمن خدمتك اقعد بعيد عليا
كنان : فهمتك .... نشكرك مرة واحد اخرى على لي درتيه معايا
قمرة : امممم

راح و هي دنات للجهة لي تقابل البحر ، شدت يديها بين بعضهم وقت حست بالرجفة و الدوخة

قمرة : بسم الله الرحمن الرحيم، واش هذا

دورت راسها وقت حست ببنادم موراها ؛ تبسمت و قالتلو

قمرة : راني نشوف فيك لاحقني
اسلام : رانا كيف كيف

تبسمت باستهزاء و دورت راسها كملت تشرب ، وقف قدامها قعدوا واقفين و ساكتين شحال حتى نطق

اسلام : لوقتاش راح نقعدوا هكا
قمرة : مفهمتكش
اسلام : قمر علبالك عييت ... مرانيش نلعب و نتمسخر معاك ..... دوكا ديسيدي ، يا تبعدي يا تقربي

دورت عينيها عليه ماشي حابة تهدر

اسلام : قتلك خيري ..... اذا حابة تبعدي نوعدك مراح نزيد نهدر معاك ولا نحوس عليك
قمرة : ..... نتا واش راك حاب
اسلام : ..... مدامني لاحقك لهنا باين واش راني حاب

تنهدت مغمضة عينيها ... حطت رايها على صدرو و قالتلو

قمرة : لي حابو ميقدرش يصرا اسلام
اسلام : وعلاش ميصراش
قمرة : ...... لي فالقصر كامل حابينا نقعدو بعاد .... نتا و لميس مكتوبين لبعضكم و انا منقدرش ندخل بيناتكم و ندير المشاكل
اسلام : ...... وعلاش راكي تزيدي عليها حتى نتي وليتي كيما هوما ؛ متهمني لا لميس ولا الارض ولا الوصية ولا رايهم تهميني نتي برك و من غيري واحد ما راح يديك و لوكان نعرف نتخلى على الاغوية و العشيرة و القصر ؛ افهمي انا ماشي كيما هوما الحاجات لي راهم يخممو فيهم من الزواج و هبط ميهمونيش كامل

عقد حواجبو وقت الكاس لي كانت رافدتو طاح فالارض هبط راسو عندها و دنالها وجهها

اسلام : قمر وشبيك

قعد يخبط فوجهها والو كانت دايخة شوية و يشوف فالدم يخرج من فمها .... العيطة لي عيطها باسمها خلاتهم كامل يخرجو عندو

  يتبع 💚💚 ....