عشيرة الاغا _ باللهجة الجزائرية _

الحلقة 52

قمرة : ايه و انا وعلاش راكي تحكيلي دوكا واش نديرلهم ؟
فايزة : ماديري والو انا لي ندير انا لي نرجعهم لبعضهم و هاد المرة راح يعقدوا ديراكت بصح ...
قمرة : بصح
فايزة : نتي لازم تبعدي على الاغا
قمرة : و انا وعلاش
فايزة : راني نشوف بلي شوشتيله مخو .... بعدي عليه اذا راكي حاطة عينك عليه نحب نقولك متتامليش مدامني عايشة نظام القصر يقعد هو هو و غير لميس لي يديها اسلام ..... على هادي راح تروحي تكملي قرايتك لهيك مع ختك منى راح تقراي فاحسن الجامعات لي كاينين تما و هادي على جال مصلحة العشيرة
قمرة : ههه عمتي ... صح بلاك مكبرتش معاكم بصح نشك بلي قعدت معاكم بزاف قعدت معاكم وقت يكفي باش تعرفوني .... انا ما نقدمش مصلحة الناس على مصلحتي متهمني العشيرة متهمني لميس ولا هاد الزواج مصلحتي انا فوق كلش و على هادي اذا حبيتي تزوجيهم زوجيهم بصح انا منبوجيش من العشيرة هادي
فايزة : مرانيش نسقسي فيك قمرة غدوة صباح تكوني عند منى انا و باباك وجدنا كلش
قمرة : بابا !!!
فايزة : من وقتاش خاوتي يرفضولي طلب

غمضت عينيها تشد فالزعاف تاعها منبعد دنات ليها

قمرة : لهاد الدرجة راني مخوفتكم
فايزة : اعرفي كيفاش تهدري
قمرة : هدرتكم و سمكم يبين شحال راكم خايفين مني
فايزة : شوفي قمرة نتي و لميس و سيبال صدقيني راكم كيف كيف عندي و عمري مراح نكره دمي لي راني نديرو على جال مصلحتكم انا بنتي مديتها لواحد مراهوش سامع بيها باش نحافظ على عائلتي و هاد القصر
قمرة : وجعتيلي راسي و نتي تتبهاي بروحك و بانجازاتك ..... نوعدك يا عمتي بلي القصر و القوانين لي راكي تهدري عليهم انا لي راح نقلبهم و انا لي راح نكون الامر الناهي هنا
فايزة : قمممرة متفوتيش الحد تاعك
قمرة : نتوما لي وقفتو ضدي حتى نتي عمتي حابة تحاوزيني منا بعدما تحرمت من عايلتي 21 سنة على جال مصلحتكم .... نتوما لي رجعتو مني هكا منبعد تقولو وعلاش قمر  متحشمش و قبيحة
فايزة : روحي وجدي فاليزتك خير

خرجت خابطة موراها الباب و راحت ديراكت لشمبرة والديها بلا ماطبطب دخلت ديراكت

لورين : قمرة خير كيفاش تدخلي هكا
قمرة : صح راح تبعتوني نقرا لهيك ؟؟
لورين : وين ... شكون راح يبعتك ؟؟
شاهين : ايه هدرت معايا فايزة و عندها الحق قمرة راح تكمل قرايتها فاحسن الجامعات و تولي حاجة كبيرة و تنفعينا ان شاء الله
قمرة : بصح مرانيش حابة كيفاش تخمم تبعتني بلا ماتسقسيني و عمتي حابة تبعتني بسيف
شاهين : عندها الحق قمرة شوفي خاوتك و بنات عمك كامل قاريين و مكملين قرايتهم
قمرة : بارسكو فالوقت لي كانو هوما يقراو انا كنت نمسح فخماج الناس
شاهين : قمممرة .... رانا نسييو نعوضولك واش جاز مكاش خير من تروحي تكملي قرايتك و تنجحي
قمرة : علبالي بصح برضايتي انا كي نحب انا ماشي تسيفو عليا على جال مصلحتكم مفهمتش فايزة هادي وعلاش تسمعولها للي تقولو
لورين : شاهين الطفلة مراهيش حابة تروح خليها ... كيفاش تبعد علينا و البارح برك لقيناها
شاهين ( عيط عليها ) : بلاكي تزيدي تهدري هكا قمرة .... فايزة هي يمانا هي المراة لي وقفت معانا كي تيتمنا و حنا صغار تطلب عينيا نمدهملها ... حق الخير تخمم فمصلحتك و نتي ديري هكذا
قمرة : واحد هنا ميخمم على مصلحة الاخر متخممش
شاهين : قممممرة سقمي هدرتك .... كل يوم شكاوي و بلاوي بسبتك ؛ واحد ميتفاهم معاك فالدار اليوم عرفت وعلاش
لورين : شاهييين اعرف واش راك تهدر
شاهين : اسكتي نتي .... نتي مقدرتيش تتاقلمي معانا و مراحش تتاقلمي كان لازم نعلموك كيفاش تهدري قبل ما جي تعيشي معانا ، اليوم فبلاصة ما تفرحي و تشكرينا جاية تعيطي علينا .... غدوة الصباح طيارتك راح تروحي تقراي و تتعلمي و تخرجي كيما اندادك

لسانها حستو ثقال عينيها تعمرو بالدموع رجليها حستهم ترخفو

قمرة : ..... عندك الحق بابا العزيز ، واحد ما يتفاهم معايا هنا بارسكو واحد محبني فيكم و واحد ماعاملني مليح من غير شوية منكم و معلباليش اذا راح يتقلبوا عليا و لالا ...... نتوما لي رجعتوني هكا معلبالكش شحال قاسيت فحياتي تحملت الضرب و الجوع و الذل و العيا و الشقا و انا صغيرة سينون انا وحدة ضعيفة و بزاف .... حبيتني نروح راح نروح بصح .... اليوم عرفت بلي لا نتا ولا كمال قدرتو تكونوا اب مليح ليا ...
لورين : قمرة متديش عليه راهو يهدر هكا من زعافو برك

خرجت من تما مراهي حابة تهدر مع حتى واحد خرجت للبالكون وقت شافتو واقف يطل من تما

اسلام : خير وشبيك !!!

خزرت فيه شحال منبعد عنقته تبكي

اسلام : قمر وشبيك وعلاش راكي تبكي

كان غير صوت شهقاتها لي يتسمع تشوكا منها بارسكو اول مرة يشوفها تبكي

اسلام : اهدري وشبيك وعلاش راكي تبكي .... قمر

مسحلها على شعرها و قاللها

اسلام : اهدري وشبيه لسانك ... كاش واحد قلقك .... كنان كشما دارلك !!!

دارتلو براسها لالا منبعد جبدت روحها

قمرة : معلباليش وعلاش جاني البكا سمحلي قلقتك معايا
اسلام : نورمال .... ارواحي نوصلك للشمبرة

دارتلو براسها ايه و راحو ؛ دخلها لشمبرتها و هي راحت للبونك تاعها

اسلام : وعلاش كنتي تبكي
قمرة : ياك قتلك
اسلام : و انا امنتك ... ريحي دوكا منبعد و نهدرو

خرج و هي حطت راسها على المخدة و رقدت ديراكت من كثرة ما بكات ...... معلبالهاش شحال و هي راقدة حتى تحس بيد تحطت على شعرها بدات تتفاطن و دورت راسها مخلوعة عاقدة حواجبها كي شافتو

شاهين : قمرة نوضي نوضي نهدر معاك بنتي

هادو هما حلقات اليوم ان شاء الله يكون عجبكم خليولي ارائكم فالتعليقات و اقتراحاتكم و طلعوا شوية من التفاعل زينات راهو ميت ..... و خليولي شوية اقتراحات بارسكوا خلاصولي الافكار ملقيتش واش نزيد نكتب 😩😂 و الى الملتقى ان شاء الله في بارت اخر
💚
🧡
💚