العشق المتمرد

الجزء الأخير القسم الثاني

#العشق_المتمرد "الخاتمه"

#جمان_فريد

الجزء الأخير "القسم الثاني..."

⌛...
الساعه11:00صباحا
"تعالى هنى..وقف خيرلك..عماااار"
هادي مرام تجري في جرة عمار اللي خدي زلباحة خوه كنان الصغير..
💓مرام فهالسنه ونص حملت للمرة تالته وجابت كنان من شهرين فاتوا💓
وصلت فم الباب خلاص بتشده..
يتلقاه عمه محمد ويشده وهو يقول:خيره شن داير..
مرام:خدي زلباحة خوه الشيطان هدى..
محمد جبد الزلباحه منه ومدها لمرام خدتها وخشت داخل..
محمد شبح لعمار اللي كان قارن حواجبه بغضب وقال:تو مش عيب اللي دير فيه..
عمار:لا..مش عيب..
محمد :لاانت مايقدر عليك حد كان سيدك..
عمار خاف وقال:ايه عيب عيب معاد نعاودها باهي؟
ضحك محمد وطبه ومشي بيه للمربوعه الخارجيه...
💕في الوقت اللي خشت فيه مرام للدار..
طلعوا هويام وفطومه يجروا ووراهم فضيله وهي تقول:هي بسرعه بسرعه..
مرام بضحكه:وين بيهن؟
فضيله وهي ماشيه:للفطور نبي فطومه تفطر وهويام تسايرها..
ضحكت مرام ومشت لولدها حطتله الزلباحه في فمه وقعمزت حداه..
💕في الوقت اللي خشت فضيله هي والبنات للكوجينه..
طلعت حميده من حداها وهي تتكلم بالتليفون..
حميده:ايه ايه بعد العيد......لا والله اللي في طرابلس صكرناه ع خاطر الحرب.........الله غالب ربي يفرج......باهي ان شاء الله....مسجل اسمك مسجل ماتخافيش...
وهي تتكلم وتمشي في الصاله..
خشت غاليه من فم البوابه ومعاه اوسمه..
غاليه شاده الغربال واوسمه المغرف..
خشوا للكوجينه..
غاليه:واخيرا فطرت..
فضيله بضحكه:ريتي تصكير الراس مانفطر لين تجي هويام..
غاليه:ههههههه..نجيهن ياربي..خطرن عليا رانيا ودلال هكي كانن..
ابتسمت فضيله
ع خشة حميده؛وااك ياربي حتى فالعيد مانرتاحوا..
فضيله؛قصدك زبونه اللي كانت تكلم فيك؟
حميده:ايه تأكد ع الطلبيه عرس اختها السبوع الجاي..
ضحكت غاليه وقالت؛عرفتها كلمتني نهار الوقفه تأكد..
ضحكت فضيله
حميده رفعت حواجبها وقالت؛كان كلمتني مرة اخرى بنقوللها فلوسك تعالي خوديهن..صكرنا..تقاعدنا
غاليه وفضيله:هههههههه
💕فهالوقت خشت بلقيس للحوش من الباب القدامي وولدها ميلاد يمشي جنبها وهي تقول:وينه سيدك قال بنقله للمربوعه!
خطمت من حدا الدار اللي فيها مرام قالت:نحسابك عديتي؟
مرام:قلت نراجي البنات معاكن وخلاص..
ابتسمت بلقيس..
شويه شد ولدها في قفطانها وقال:بابا.
قامت تليفونها وقالت:ياودي باهي تونتصلك بيه..
اتصلت بيه وحطت التليفون ع ودنها شويه وقالت:وينك يامحمد......ميلاد يبيك......باهي نراجو فيك.....
نزلت تليفونها وصكرت وشبحت لولدها وقالت:اهو جاي بابا..
طبست طباته..بعدين باساته من خده💖
ومرام تشوفلهم وهي مبتسمه..
💕💕💕💕
"هيااا ياأريج"...
اريج وهي طالعه من الصاله:هيا هاني جيت..
طلعت وراها عزوزتها وهي تقول:راجو شويه..
خشت للكوجينه..جابت كيسه كبيرة في ماكله وخدت طرمس قهوة بالطواسي وطلعتلهم بيه..
اريج:تي غير علاش ياعمتي بس!
سعيده:هاك شدي واسكتي..
خدتهم اريج وهي تضحك..
شبحت سعيده لتوفيق وقالت:سوق بالشويه مراتك في التامن ياولد..
غير وجهها عنها وهو محرج وقال:باهي..
ومشي وولده في غمره...واريج طلعت وراه وهي تضحك..
طلعت وراهم سعيده..
قعدت واقفه وهي تشوفلهم..
لين وصلوا فالسيارة..
بعد ركبوها وتحركوا هي خشت داخل..
قعدت تمرر فنظرها الحوش اللي فضي عليها..
تنهدت بألم ومشت لدار النوم...
خشتلها..
خدت عبايتها من الشماعه وهي تشبح لسوريه ميلاد وطاقيته..
سعيده ودموعها فعيونها قالت:كذب..مافي حد قدر يملا مكانك لو الناس كلهم حداي..من غيرك انت نقعد بروحي ديما..
مسحت دموعها..وخدت نفس..
بعدين مشت طلعت وصكر الباب..
لبست عبايتها وهي تمشي وصلت فالباب الخلفي وطلعت من الحوش متوجهه لحوش بوها...
💕💕💕💕
سلم محمودي ياربي..
ضحكت حدهم وهي تشوف لعزوزتها كيف تلعب في حفيدها..
ع خشة كامله:هي هندا صبي وتي روحك قبل الظهر بنعدوا..
ناضت هندا بمحمود وقالت:ريتيه عمتي كيف مولي نسخة باته..
كامله وهي تشبح لمحمود ولد أيمن بإبتسامه قالت:ايه السمح هدى سبحان الله فيه واجد منه لما كان صغير..
حدهم ناضت وقالت:حتى هو قالي عنده صورة وهو صغير هكي زي محمود..
شبحتلها وقالت:هندا قالت حامل مرة اخرى...
حدهم بإبتسامه خجل:ايه..
قرصتها هندا من خدها وقالت؛نجيها..
ضحكوا حدهم وكامله...
💕برا..
"نا غادي تفاهمت معاهم وبإذن الله المناقصه لينا"
اصيل بضحكه:وحش مولي راك.
مختار بإبتسامه كبر:ربايتك راني..
اصيل ابتسم وقال:بتستقر في الإمارات قالوا..
مختار وهو مبتسم رفع حاجبه ونزله..
ضحك اصيل...
ع جية مؤنس شبح لمختار:صار خالي حتى العيد هدى بيخط فينا..
مختار:مشغول واجد الحق..
مؤنس:توحشناه ياراجل ليه فوق عام لتو..
مختار :مشاغل يامؤنس..
مؤنس حرك راسه يمين ويسار وقعد ساكت.
💕داخل..
"شن رايك رباب"
رباب:والله يهبل..قوليلها ياكوكا..
كوكب بضحكه:الف مرة ونا نقوللها قفطانك سمح ماشي معاك بطنك مش مخربه عليك شي ماتبي تقتنع..
مريم زفرت وقالت؛حاسه روحي فسدت هلبه بعد الجياب..
رباب:تو نقولك ع نظام اديريه بش تولي زي ماكنتي...
💕فالمربوعه..
"النظارات هديم ياجدي افضل نوعيه"
مختار وهو يشوف للنظارات الطبيه اللي فيده:باهي باهي ربحت ياعثمان..
ايمن:شن مش ناوي تروح..
صبري:قنعوه يروح ياايمن ياولدي..
عثمان:لو تجيبلي غسان سلامه يقنعني ماني مروحها نسيب كندا ونروح لهالنكد!!
صبري مط شواربه للأسفل بإزدراء وقال؛خزيي ناكر اصله..
ضحكوا مختار وايمن..
وعثمان ابتسم بإحراج وهو يشوف للنظارات..
💕💕💕💕💕
خشت سيارة حميد...
ووراها سيارة ياسين..
ووراها سيارة خيري..
ووراها سيارة سعد..
تبعهم سيارة عبدالسلام..
ووراهم سيارات مالك وحمزة اللي راكب فيها معاه سند..
ووراهم عماد اللي كان راكب معاه مروان..
كلهم دارو كلاكسات لما خشوا...
طول طلعوا حميده وغاليه والكناين لممر فم البوابه..
غاليه:اول من بيجي رانيا..
حميده:اني نقول نعيمه..
فضيله؛تراهنن انه واحد من الولاد؟
بلقيس:وتراهنن انه واحد من ولاد كفايه..
مرام بضحكه:وتراهنن ان اللي بيجي توا مجد ولد نعيمه ومعاه خوه كيف العيد الصغير..
حميده:ايااه عاد مش ديما بتصيب معاك..
شويه جي مجد وهو شاد خوه عبدالوهاب..
الأربعه مع بعض:لااااااااااا عااااد..
مرام:هههههههههه..
مجد ابتسم وقال:السلام عليكم..
جي لخالته غاليه مد يده وقال:كل سنه وانتي طيبه خالتي..
صافحاته غاليه وطبست باساته من خدوده وهي تقول:كل عام وانت بخير ياسمح..
حميده طبت عبدالوهاب وباساته بعدين قالت لمجد:قلعت شباب العيله اوكل منهم..
ضحكوا...
ومجد ابتسم باحراج وجاها سلم عليها..
ع جية خالاته مع بعض زينب وكفايه ونعيمه..
زينب معاش زينب زمان..المكياج معاش ادير فيه بكل ولبسها ولى عادي جدا..مهتمه بس بصحتها...
وكفايه زيها بالزبط..
اما نعيمه كانت عاديه زي قبل..
زينب:سبقنا السموحي هدا حتى توا..
ضحكت نعيمه وقالت:يبي يعيد اول واحد ع غاليه..
ع جية البنات يجروا..
سهى وروان ومعاهم حنين اللي تلقتهم مع حناها وهما جايين..
روان وين شافت مجد قالت؛واااك حتى توا سبقنا..
سهى:قتلك اني..
مجد شبحلهم من فوق لتحت بعدين شبح لامه وقال:جواد قاعد مع بوي؟
روان عجبت عليه وهي تقلد في شبحاته..
والبنات ضحكوا..
نعيمه بضحكه:ايه مع بوك..
مجد مشي طول من حداهم..
روان وهي تشبحله :اصفر غبي.
وقف والتفتلها فنص فيها..
زينب؛روااان!!
شقلبت عيونها ومشت خشت داخل والبنات لحقوها..
نعيمه وهي تسلم ع حميده:ناقمه عليه من اخر مرة تلاقينا فيها في الحوازة
زينب هي تسلم ع غاليه:ايه...
مجد لما سمعهم شن قالوا مشي طول وهو يقول:مش ديما بنخليها تفوز..
🍃لعبوا مع بعض بلاستين وفاز عليها فوز ساحق..اول مرة يديرها وخلا الولاد كلهم يتسهوكوا عليها نقمت عليه🍃
وهو ماشي فاتوا من حداه رزان ونور ورفقه ونورهان.
نورهان وهي شاده فيد رزان:قصة شعري احلى من قصة حنين..
رفقه ونور شبحوا لبعض وهما شادات ضحكتهم..
رزان؛وانتي مالك ومال شعر حنين.!المهم شعرك سمح وخلاص..
شقلبت نورهان عيونها وطلقت يد رزان ومشت بروحها.
ضحكوا البنات..
ورزان ضحكت وهي تحرك فراسها يمين ويسار...
بعدين خشوا لممر فم البوابه..
وراهم لطيفه تمشي هي ورانيا..
رانيا:ماعنديش مشكله نرسملها التصميم اللي تبيه..
لطيفه:خلاص نكلمها ونرد عليك..
والبنيات الصغار يجروا قدامهم..
لطيفه: امشوا بالشويه...
💕💕💕💕
بعد عيدوا الكناين ع البنات..
ورجالتهم ع النسابه...
اللي هدا رفعها راجلها لحوش اهلها...
💕💕💕
في الصاله..
غاليه:جت يوم الوقفه وروحت امس في الليل..
زينب:وشن جوها..
غاليه:تتوحم ليه ليه..
كفايه:وشن حال امها؟
غاليه:خلاص عقلها معاش عليها..حتى المشي معاد تقدر تمشي..
زينب ونعيمه:تس تس تس..
حميده:كل مايحولوه منها يتجدد ولتو مش عارفين مني وراه..
لطيفه:لاحول ولاقوة الا بالله..ربي يجيرنا وخلاص..
زينب:ايه والله..
سكتوا شويه بعدين قالت زينب:معاش سمعتوا شي عن حوشكم يانعيمه..
نعيمه تنهدت بحسرة وقالت:ع حاله يازينب مقعمزين فيه..
خواتها شبحولها بضيق وقالت كفايه:ربي يفرج وينهي هالحرب ونرتاحوا...
كلهم:آمين..
💕في الدار..
رانيا:معقوله عام ونص!
نور بضيق:راجلها مايفضاش بكل..
رفقه:استاحشتها هلبه وحتى اسو استاحشتها..
نور:بنموت عليها اسو كبرت واحلوت بزياده واللسان ملوي ع الرقبه..
ضحكوا..
رزان مقعمزة معاهم وتسمع في هدرزتهم وهي مبتسمه..
"حريم عيت رمضان"..
رزان ناضت وهي تضحك وقالت:تعالن..
ومشت طلعت من الدار..
والبنات ناضوا وطلعوا وراها وهما مستغربات..
برا...
عماد:شن جو..
كلهم ردوا عليه بأصوات متقطعه؛تمام..مليح..
ع خشة سعيده من فم البوابه..
عماد طول مشالها..
ورزان وراه..
وصل فيها تصافحوا وعماد كب ع راسها..
سعيده:تبوس ع الكعبه وليدي..
عماد؛كل سنه وانتي طيبه..
سعيده ابتسمت وقالت:كل عام وانت بخير ولدي..
بعد وجتها بنتها..
حضنوا بعض بقوة...
رزان:ان شاء الله كل عام طيبه وصحيحه يارب.
سعيده:وانتي بنيتي كل عام وانتي في احسن حال..
بعدوا عن بعض وهما شادات بعض وسلموا بالخد..
بعدين رزان باست راس امها..
عماد :هي خشي نسيبتي وانضمي للفريق..
ضحكت سعيده وخشت..
عيدت ع حمواتها وسلفتها بعدين قعمزت حدا حماتها زينب..
عماد مد يده لرزان شدت يده وهي مبتسمه وهما يشوفولهم..
عماد:ليدز آند جن...اااه ليدز..
كلهم:هههههههه..
عماد بضحكه؛المهم..في هالجمع المبارك نبي نعلن شي مهم مهم مهم للغااايه..بعد جولات ع حلبه المصارعه بين رزونتي والسفتول...رفع يدها وقالت..انتصرت الملعقه..
كلهم قعدوا يشبحولهم لحظات وهما في حالة اندهاش..
بعدين صاحوا البنات بفرح ومشولها يجروا حضنوها مع بعض..
وهي حضنتهم وهي تضحك ودموعها ينزلوا..
اما عماتها فطول دموعهم نزلت وهما يشوفوا لسعيده كيف غامه وجهها وتبكي بصمت..
رزان وهي تشوفلها دموعها نزلوا وقالت:ماما..
بعدوا البنات عنها..
وهي مشت لأمها طول..
قعمزت ع ركابها وضمت امها وهي تقول؛ريحته في قبره ماما...
حضنتها سعيده وقعدت تبكي بالعبرة..
وكلهم بكوا معاهم..
اما عماد انسحب من حداهم وطلع وهو يمسح فدموعه.
🍂🍂🍂🍂
تو بالله اين احلى..ادهم..ولا قتيبه قولي الحق ياآسيا..
دلال:ماحكمت الا آسيا اللي ديما معاك ع طول الخط..
عمار:اللهم لاحسد.
ضحكت اسيا وقالت:هما الزوز حلوات ماما لكن ادهم احلى..
عمار:هههههاااي..
دلال رفعت حاجبها وقالت؛وانت عموري..
معمر:قتيبه اسم ولد يقرا معاي نكرهه فالدم..ادهم خير..
عمار ؛الله اكبر ..
طرمت دلال شواربها وهي معصبه وسكتت وقعدت تهز في رجلها وعمار يضحك عليها..
شويه وقال:وهدي القطعه ياستي..
ارتسمت ع وجه دلال ابتسامة فرح..وقلبها قعد يدق بقوة..
عمار: هممم..ياريتني القطعه..
دلال شقلبت عيونها وهي مبتسمه برفعة حاجب..
وعمار يحرك في راسه يمين ويسار وهو يضحك..
بعدين قالت؛رد بالك تكلكس..
عمار بضحكه:ياودي باهي فهمنا..
ودرس عمار في نص الساحه..
ع طلعة سند من المربوعه شبح للسيارة وهو مستغرب..
شويه وانفتحوا البيبان الخلفيه..
ونزلوا اسيا ومعمر..
سند لما شاف آسيا تفاجأ هلبه..
كانت لابسه قفطان طويل طرازه فلسطيني ولابسه عليه وشاح لونه احمر..
اللي يشوفها يقول عمرها 11سنه مش تمانيه سنين..
كانت زايده في الجمال..
لما شافاته تحشمت وشبحت لبوها اللي نزل من السيارة..
هو استغرب فيها هلبه ولاكأنها تعرفه..
مشي لعمار طول..
وعمار قدمله..
وصلوا في بعض وسلموا ع بعض.
سند:الحمد لله ع سلامتكم..
عمار:الله يسلمك..كل عام وانت بخير..
سند:كل سنه وانت طيب..
دلال مشت لآسيا وشدتها من يدها وشبحت لسند وقالت؛كل عام وانت بخير سند..
سند:كل سنه وانتي طيبه بنت خالتي..
دلال:اسيا عيدي..
اسيا شبحتله وقالت:كل عام وانت بخير..
سند ابتسم وقال:معاش تعرفنا آسيا..
عمار شبحلها وابتسم..
واسيا تحشمت..
معمر جاه ومد يده وهو يقول: سند..كل سنه وانت طيب..
سند ضحك وصافحه وهو يقول:كل عام وانت بخير يازعيم..
ودلال مشت ببنتها وهي تقول:توا بيموتوا من المفاجآه..
ضحكت آسيا وهي تشوف لأمها..
وصلوا لممر فم البوابه..
ع طلعة غاليه وهي ناويه تمشي للحوش التاني لما شافت دلال..فتحت فمها من المفاجآه..
دلال وهي تضحك حطت سبابتها ع فمها..
ابتسمت غاليه بفرح وجتها...
وحضنوا بعض وغاليه تقول:والله مامصدقه عيوني..
ضحكت دلال وهي تقول:كل سنه وانتي طيبه غلوشتي.
غاليه:كل عام وانتي بخير..تي وينكم وين هدى كله عام وفوق ياظالمين!..
دلال:الله غالب خويله الدنيا ومشاغلها..
غاليه:باهي باهي المهم حالكم باهي وصحيحين..
دلال:الحمد لله..
بعدوا عن بعض و غاليه شبحت لآسيا وقالت:ماشاء الله ماشاء الله كبرت اسو..
اسيا ضحكت وجت لغاليه وضمتها..
وغاليه ضحكت وحطت ايديها عليها وهي تقول:ربي يحفظها..
دلال بإبتسامه:تسلمي خويله..
غيرت غاليه عيونها لدلال ركزت ع بطنها اللي كيف باديه تبرز وقالت:حامل!!؟
دلال هزت راسها وهي تضحك..
💕💕💕💕💕
فتحت غاليه الباب الفاصل وخشت وهي تقول:جايبتلكن مفاجأة..
كلهم قعدوا يشوفولها..
غاليه:اظهر وبان عليك الأمان..
كلهم قعدوا يشبحوا للباب بترقب..
شويه وبانت عليهم دلال وبطنها قدامها..لابسه ومكيجه وطالعه عسل...
كلهم مع بعضهم بصوت واحد قالوا:دلاااااااال..
وهي تضحك..
هجموا عليها كلهم وهي تقول:حامل راهو حامل..
وهما بدال مايسلموا عليها قعدوا يضربوا فيها ويقرصوا وهي تعيط وتضحك..
فاطمه بضحكه:خلنها يامنجوهات..
كامله وهي مصدومه:ريتن بالله..لامن قال لامن خبر!!
امينه:القرد مختار عنده علم راهو..
كامله وهي مبتسمه بإندهاش:اسوو!!
جتهم تجري..
مشت لحناها نعيمه طول وضمتها..
لا كامله ولابناتها اضايقوا من الحركه بكل عارفين حق نعيمه عليها اكبر من حقهم..
💕💕💕
سلموا ع البنات ع دلال سلام حار..
بعدين خالاتها بالوحده ناضولها وسلموا عليها..
بعدهم سلمت ع امها وطولت في السلام والدموع كانت حاضره..
ومن بعدها سلمت ع عزوزتها وحماتها وهندا وكناينهم...
💕💕💕💕
في المربوعه..
عمار:عندكم حق عندكم حق..لكن والله مشاغل وارتباطات الواحد مايلحق معاهن ع شي بديت مقسم روحي ع عملي والحوش وان شاء الله مانكون مقصر..
مختار بوه:اهم شي ماتكون مقصر في دينك و الدنيا خداتك منه..
عمار:لا الحمد لله رب العالمين الدين اولويه لايمكن يجي تاني عندي وانت تعرف ياباتي..
مختار هز راسه وقال؛عارفك عارفك غير نبي نطمن..
مختار الحفيد:اطمن ياجدي من الناحيه هدي والله حتى اني يحاسب فيا ع صلاتي كان صليتها فالجامع ولالا..
سند شبحله وقال:انت قاعد في الإمارات؟
شبحله مختار وقال؛ايه..بعدين شبح لجده وقال..جدي مش مفكرين تولوا لمصر الحرب هدي مرات تجيكم..
عمار شبح لبوه وقال:لازم تولوا ياباتي مؤقتا..
عبدالسلام؛سامع حاجه.
عمار:الوضع مايطمنش..
خيري:معناها حتمتد..
عمار رفع حواجبه ونزلهم..
سكتوا كلهم وهما يفكروا بعدين شبح عمار لجواد..
جواد كان يشبحله ابتسم..
عمار ابتسم..
بعدين شفشفله شعره وطبس راسه وباس راسه..
وجواد مبتسم..
عبدالسلام شبحلهم وقال:كان يروح معاكم ياعمار افضل.
شبح جواد لجده وعيونه تعبوا دموع..
ومجد مسكين وجهه ولى اصفر..
عمار:ليش ياعمي؟
عبدالسلام؛تشبح في وضع البلاد قدامك..معاكم انتم أمان ياعمار..
جواد نزل راسها وهو في قمة الحزن..
وبوه يشبحله..
عبدالسلام؛جواد ولدي لين اتم الحرب..
مسح عمار ع شعر ولده وقال:تنتهي الحرب هدي نا نردك بروحي..
معمر وهو يمرر في نظره عليهم قال:اني قبل بنقعد مع جدي معاش مروح معاكم..
تفاجأ عمار هلبه بكلام معمر..
بس مش اكثر من عبدالسلام..
مختار الجد؛ليش يامعمر..
معمر:نبي بلادنا ياجدي مافي شي حلو غادي..نبي حوش جدي ومدرستي القديمه وصحابي..
شبح عمار لعبدالسلام..
اللي كانت الانظار كلها متوجهتله..
تنهد عبدالسلام وقال؛ربي يخلصنا من هالحرب وتجوني وتقعدوا معاي لأمتى ماتبوا..لكن ياجدي في وضع زي هدا مستحيل نخاطر بيكم وانتم امانه عندي..
سكتوا الزوز وهما مضايقين..
وبوهم كان مضايق اكثر منهم...
🍂🍂🍂🍂🍂
بعد الغدي..
وبعد ماغسلوا ماعينه..
كلهم انطرحوا ع الفراشات تحت المكيفات..
دلال:صار الوضع ولى اسوأ من قبل..
حميده:شوفت عينك المولد قريب 24 ساعه يخدم..
رانيا:كان جت ع الضي ياخالتي هينه..ارواح راحت وحياش طاحت وايام سود..
دلال؛باهي شن صار في عرسكم..
رانيا:يوم واحد في الصاله وكان الله ويبقى الله..
دلال:اخر العام نفس الموعد..
رانيا:ايه..
دلال:والصاله بعيده عن مكانات الإشتباكات..
رانيا:في تاجورا..
دلال:غاااادي!!
رانيا؛غادي امان والحرب مش حداهم...بنقعدوا في حوش عمتي صابرين يومين..
غاليه؛الحمد لله الطريق مازالت سالكه من هنى لغادي..
رباب:ان شاء الله تقعد سالكه لبعد العرس يارب..
كلهم قالوا باصوات متقطعه:آمين..
بعدين دلال قالت؛حقه ضو عبودة تزوج؟
ضحكوا..
غاليه بضحكه:ايه ياحنه خدي مودة الترهونيه..
دلال:سبحان الله ع النصيب..
غاليه؛ مرام تحكي عنهم وتقول منسجمين واجد مع بعضهم..وحتى هي حامل ليها تلاته شهور..
دلال بإبتسامه؛ماشاااء الله..
رزان ضحكت وقالت:دلال قولي راوند من خطبها..
دلال بضحكه:من ؟!!
رانيا:ههههه..اسامه ولد عمتي..
دلال:الله!!
رزان؛علاقه مع بعضهم ليهم عام وفي رمضان اللي فات رفعولها بيان .
دلال:ماشاء الله ماشاء الله ربي يهني..
رانيا بإبتسامه:آمين..
🍃نصيب حد ماياخده حد🍃
💕💕💕💕
ومر باقي اليوم زي غيره من الأيام اللي يجتمعوا فيها في مناسبه زي هادي..
في الليل روحوا الولاد بنساوينهم ع حوش العيله..
وكملوا هدرزتهم للساعه 2 في الليل وبعدين اللي هدا روح بمرته...
وعيلة مختار روحوا ع حوش ايمن في البلاد اللي هو نفسه حوش العيله قبل..
🍃وعدى باقي الليل وجي اليوم اللي بعده..
كان ماشي بروتين عادي زي اللي قبله بالزبط...
وبعد العصر...
الرجاله كل حد منهم في تركينه شكل فالبلاد..
اللي ماشي يعيد ع قريب..واللي صاحب..المهم مشوا وأدوا الواجب..
وخلوا للنساوين فرصة يقعمزوا في المستراح قدام الحوش...
💓حميده؛خدي بنت خلف الله ****..
زينب:كويسات بناويته..
حميده:ايه طيبات واجد..
كفايه:باهي طيب فيه وفبناويته..
نعيمه:ماتسمعوا شي عن امهم.
غاليه :تس تس تس.
حميده:نهائي مافيش اخبار عنها..
زينب:احسن...
💕فالكوجينه...
دلال؛وليد..بنجيبه هني..
نور بعيطه:الله !!
دلال ضحكت وقالت؛والله..
رانيا بضحكه؛وين بتقعدوا..
دلال؛في حوش لأصيل في حي الاندلس..
رباب:اها عرفته..
دلال:شن جوهم سلفاتك..
رباب:السرتاويه كويسه لكن شايفه رويحتها شويه..اما مريم طيوبه ماتغير فيها شي..
دلال؛كويس..
فم البوابه..
كانت مقعمزة آسيا مع سهى وروان وحنين توري فيهم حسابها ع الفيس اللي تنزل فيه حاجات تخص مدرستها فالشارقه..
والبنات يشوفوا بإنبهار...
ع جية سند..
شاف اسيا كيف الوحيده بيناتهم اللي لابسه توته مستوره ووشاح ع راسها..
ابتسم..
بعدين قدملهم وقال؛شن ديروا..
شبحوله..
روان:نشوفوا في فيس آسيا..
عقد حواجبه وقال؛كيف فيس آسيا!؟قصدك انتي عندك حساب ع الفيس!؟.
اسيا:ايه من زمان..
سند بصدمه:كيييف!!..معقوله بنت في عمرك انتي عندها فيس!! تي شن امك وبوك مايعرفوش شن صاير فالدنيا..
اسيا اضايقت هلبه ناضت ومشت خشت داخل..
وهو مشي خش وراها..
لقاها خش للكوجينه خش حتى هو لقي اخته وامها وخالتها..
سند:تو منكم جد يابنت خالتي مدايرين طفله في السن هدا فيس!
دلال بصدمه:فيس!!
اسيا شبحت لأمها وفنصت عيونها..
دلال:آسيا اشبحيلي هني من دارلك حساب ع الفيس!
اسيا:مختار ولد عمي..
دلال:وانتي ريتيه مختار!؟
آسيا:تي خيرك ياماما مش من زمان يكلموا في جوادي وعموري ع الفيس واني نكلم فيهم معاهم..
دلال بإنفعال:جيبي آيبادك جاي ..
قدمتلها اسيا وعطتها الآيباد..
سند بضيق:ردو بالكم يابنت خالتي راهو الدنيا فيها كل شي وهادي طفله راهو..
التفتت اسيا وشبحتله بحده من فوق لتحت..
هو ماشبحلهاش قعد يشوف لدلال وهو يقول: سامحييني كان ادخلت في شي مايخصنيش غير آسيا نحسب فيها زي روان يابنت خالتي...
ولف ومشي طلع من الكوجينه..
دلال شبحت لآسيا وقالت:امشي اطلعي من قدام وجهي..
اسيا لفت وطلعت من الكوجينه وهي معصبه..
دلال بغضب:اني نربي وبوها يفسد..
نور:شن دخله بوها!؟
دلال:نندري ان عندها حساب ع الفيس وعاركت عليه هلبه وبوها قالي ماتخافيش اطمني ع عيني و الباسورد عندي..
رانيا:اها معناها تحشمتي من سند لما قلتي انك ماتعرفيش..
دلال شبحتلها وقالت:تحشمت منه..لكن الحاجه اللي ماكنتش نعرفها حق ان هدا مختار هو اللي دارهولها اني حتى لما يجينا مانخليش فيها تنزل من فوق..
رانيا:علاش!؟
دلال؛مش لشي لكن هادي بنت يارانيا لازم تكون مخالطتها بحدود حتى غادي حاطتها في مدرسة بنات..
نور:باهي اللي عندك بنت وحده..
دلال وهي تفتش في حساب الفيس بعصبيه:الحمد لله..
فنصوا رانيا ونور وهما يشبحولها..
🍃في امهات حريصات زي دلال..وفي من امهات مسيبات لبناتهم الحبل ع الغارب لين ضاعو🍃
🍂🍂🍂🍂
في المستراح..
زينب:شن صار في خالتك وولادها يافضيله..
فضيله؛مشوا للشرق..
زينب:الله!
غاليه:ماخلوهمش عيت **** تعرفي قعدوا وراهم حتى بعد عدوا ل*****
كفايه:ربي يهديها خالتك قعدت تعادي في الناس لين وصلت لهني..
لطيفه:والبارقه شن صار فيها؟
فضيله:قالت هكي اريح لان مرات يكثروا مشاكل وتوصل في راجلها وعيلته..
نعيمه:عندها حق..
بلقيس:والله بكل حكاية التارات والمشاكل هدي كثرت في البلاد..
غاليه:ايه ولى القتل بلاحساب في طرابلس يموتوا فالحروب وهني يموتوا ع خاطر ورت وارض وبلي اسود..
كفايه:ربي يتقي عليكم..
حميده وغاليه:آمين..
سكتوا...
وزينب تشبح لأمها كيف مفرشه صلايتها في تركينه ومقعمزه عليها تراجي في المغرب..
شويه وجي صوت الحاج عبودة وهو يأذن في المغرب..
شبحوا لبعض وشدوا ضحكتهم..
نعيمه بضحكه؛صدق الحق..
زينب رجعت شافت لأمها لقتها تمسح فدموعها بطرف رداها..
تلاشت ضحكتها..وتبدلت بملامح الحزن وفيسع ماالدموع عبوا عيونها وطاحوا..
شافتلها نعيمه بعدين شبحت وين ماتشبح شافت امها شن دير..
غيرت عيونها عنها وشبحت لفم القطعه..بين عيونها شافاته وكأنه خاش منه..
ماقدرتش تتمالك نفسها قعدت تبكي..
كلهم انتبهوا للموقف...
مافي وحده منهم قدرت تمسك دموعها..
قعدوا يبكوا بصمت...
🍃زي سعيده..
اللي كانت مقعمزة في الكوجينه وهي حاطه يدها ع خدها وتسمع في الآذان بصوته هو..
مغمضه عيونها والدموع تنزل منهم...
🌼اما رزان اللي كانت مقعمزة مع رفقه حدا الفرن..
رزان بدموع:لتوا مش قادره نصدق نقول لروحي مسافر وتو يروح كيف مااني سافرت ونحساب روحي معاد نولي وهاني وليت..
رفقه وهي تمسح فدموعها:كله آجال مكتوبه يارزان الله يرحمه ويغفرله خلى ذكر طيب يارزان يخلي الناس تحكي عنه بكل خير الى ماشاء الله..
رزان شبحتلها وقالت بإبتسامه:فيك حاجات واجده متغيره..
رفقه بضحكه وهي تمسح فدموعها:اللي تتزوج ياسين لازم تتغير..
ضحكت رزان وقالت:شن دايرين مع همام..
رفقه:ديما مع بوه مايفارقش فيه بكل حتى وين جابه بش نغيرله بعدين مشاله..
رزان بضحكه:تو ميلاد باهي مع بوه الا فيا اني يغار منه غيره مش طبيعيه..
ضحكت رفقه وقالت:الله!
رزان بضحكه:ايه..غير اسمعي مرة شن صار..
⚡فلاش باك..
ف الجنان....
رزان:الجو سمح اليوم..
عماد وهو يقيم في الحديد بيد وحده وينزل:ايه...قلبي..
رزان:ميلاااااااد...تعاااالى مااامااا..
عماد:فوتيه..
حط متاع الحديد ع الأرض وجاها..
تمدد وحط راسه ع رجلها وهو يشوفلها:خلينا نهدرزوا كلمتين ع حالنا..
رزان بضحكه:يابارد..
عماد:يموت فيك البارد..
ضحكت..شبحت القدام لقت ولدها جاي يجري..
رزان:جاك جاك جاك..
ميلاد ضرب بوه ع جبهته وقال:ماما متاعي..
وحضن امه..
عماد:حييي!! ع امك!!ياولد الكلب.!! حييي!!
رفع روحه والتفتله  بيشده ..
رزان بضحكه:تمسه تشوف..
ميلاد:امثي  بعيد..
عماد:نمشي امك ياولد الكلب..وهاه هاه..حط راسه فحضن رزان ولف يدها عليه..
ميلاد طلق امه ومشي بيجيب الشبشب...
⚡الوقت الحاضر..
رزان بضحكه:ناضله عماد يجري واني نضت في جرته بش نحز بيناتهم..المهم ميلاد خدي شبشب وحدفه بيه جي فيا..
عماد حلف يضربه وشده وقعد يضرب فيه ع ايديه وميلاد شي ولاقال يبكي..
رفقه:هههههههه..جووو..
رزان بإبتسامه:وفي الليل تلقيه راقد هو وياه مايرقد كان فوق بوه..
رفقه بضحكه:ربي يحفظه ويفرحكم بيه.
رزان:آمين..تنهدت بعدين قالت..هي صبي نعدوا نصلوا..
رفقه ناضت معاها...
ومشوا الزوز بإتجاه حوش جدهم...
🍂🍂🍂🍂🍂
وعدا باقي اليوم....
وجي اليوم اللي بعده وكلهم شدوا الرحال لطرابلس الجريحه ع امل اللقاء في ايام افضل..بس للأسف مع مرور الأيام كانت الأمور تمشي للأسوأ..ومع هدا الناس كانت تحاول تتكيف وتعيشها كيف ماهي...
🍃🍃🍃🍃🍃
نوفمبر 2019
في ذكرى المولد النبوي💓
الساعه 5:00عصرا..
في الساحه اللي مابين الحوش القديم والحالي..
والجمهور المتفرج من روشن دار الحاجه فاطمه يراجي..
والنص التاني في روشن المربوعه الدخلانيه..
في شن يراجو؟!
في سباق بين ثنائيات العيله..
سباق شني؟!
هدا سباق الرهان اللي تراهن فيه عمر هو والولاد..
ايام دوري ابطال اوروبا شهر يونيو الماضي..
راهن عمر كل من..
مؤنس..عماد..مالك..رمزي...
ع فوز فريقه اللي يشجع فيه..
وطبعا التواصل بيناتهم كانت عن طريق التليفون والنت...
الاربعه ياما تسهوكوا ع عمر..وهو راهنهم كان فاز فريقه يخليهم يديروا سباق جري وهما طابين نساوينهم..
طبعا هما خدوا الرهان بهزوة..
وهو قال كانكم تريس حق ديروها..
واللي هدا قاله نديرها لعبلهم ع الوتر الحساس..
وجي الحظ مع عمر وفاز فريقه وراجى رمزي لين يروح بش ينفدوا شرط الرهان..
🌼عمر:تراهنا ولا وانتم الاربعه خسرتوا تم خلاص... وهدى شرطي وإلزامي يتنفد..
الأربعه واقفين يشبحوله بطرف عينهم..
عماد: باهي علاش واقفين زي العرص هني كان مش منفدينه..هيا انجز ياخال بالله..
ضحكوا..
عمر بضحكه  شبح للبنات:تعالن يامشفشفات كل وحده حدا راجلها..
حمزة:قصدك حتى رانيا!!
شبحله رمزي بحده..
عمر:وراس زينب ريحنا..
ضحكوا..
وهو سكت وقعد يتفرج واعصابه راكبات...
عمر شبحلهم:تشاوروا بينات بعضكم شويه هي..
...
مؤنس:اني بنحاول جهدي..
رباب:حسستني اني بقرة..
شبحلها مؤنس بطرف عينه..
.....
مالك:صح قصيرة ياقلبي لكن...سمنتي..
نور:عينك وعين عينك ..
مالك فنص..
.....
رمزي:ماتخافيش تمام خليك واثقه فيا..
رانيا بإبتسامه حب:اكيد...💕
....
عماد:ملعقه..
رزان بحماس:النصر لنا...
عماد: الله اكبر...هو داااه..
....
عمر:خلاااااص..
التمانيه هزوا روسهم بإيجاب..
ضحك عمر وقال:3.....
2.....
عمر:بابا سما قولي تلاته..
سما :تلاااااته...
💓واللي هدا قام مرته وطلع يجري بيها..
مع الاسف مؤنس قريب طاح برباب لهدا يعتبرطالع من السباق اللي ماحصلوا منه غير ضحك الجمهور عليهم..
اما مالك في نص طريق استسلم ووقف نزل مرته ونور تعطي فيه ع راسه والكل يضحك عليهم..
وقعدت بين عماد ورمزي اللي لازم يوصلوا لحدا لباب الفاصل بين ارض عبدالله وارض رمضان..
وبعد اصرار من الزوز ودعم زوجاتهم ليهم بهتافات التشجيع...
رانيا:عمرك ماخيبت ظني رمزي..هيااا..
رمزي هني زاد تحمس اكثر وزاد سرعته لين واخيرا وصل في الباب قبل عماد بشويه...
نزل رمزي رانيا اللي قعدت تنقز وتعيط وهي فرحانه..
اما رمزي مسكين حط ايديه ع الحيط وقعد ياخد في النفس ويضحك ويكح في نفس الوقت..
اما عماد بعد نزل رزان..
مشت لخوها وهي تضحك قاتله:رمزي..
رمزي بضحكه وهو يكح:ميه..
ورانيا مشت تجري بش تجيبهاله..
عماد بضحكه:حني خليناكم تفوزوا راهو..
رمزي وهو داهش:عدي..من قدام وجهي..خيرلك..
عماد:عبت عليك رانيا وصار اللي صار..
رزان فنصت عيونها.
ورمزي شبحله بحده..
وعماد يرقص في حواجبه بإستفزاز..
وبسرعه البرق يجري رمزي في جرت عماد اللي قعد يجري وهو يناشب فيه ويستفز فيه بالكلام..
ورزان ميته بالضحك..
لفوا ع ارض جدهم كلها وهما يجروا في جرة بعض..
والكل يتفرجوا عليهم اللي برا واللي فالرواشن..
لين وصل عماد في المستراح لقي حناه فاطمه ادرق وراها..
ورمزي وقف فمكانه قدامها..
رمزي وهو داهش:اخرتك هكي انت!!
عماد ورا حناه يضحك عليه بإستفزاز..
ع طلعت اللي فالمربوعه وفي الحوش برا يشوفوا شن صار فيهم..
رمزي:ترا يمي شويه..
الحاجه فاطمه:ترا انت واجد..
وطلعت غصن مقطوع من السروله من تحت رداها وطاحت فيهم هو وياه والزوز يتلقوا في الضرب وهما يتوجعوا ويضحكوا..
وفاطمه تخبط وين مايجي وتهزب:حتى بعد درتوا عيله انت وياه..ماتبوا تكبروا..ولاتعقلوا...
والكل يشوفولهم ويضحكوا بدموعهم..
عمر بضحكه:عطيهم..زيديهم..
ع جية هانيبال اللي كان يتكلم بالتليفون حدا السروله..
ركب الدرجه وقال لأمه وهو ياشر بصبعه ع خوه:كان في من يبي الضرب هداك هو يمي..
عمر:هييه يامتاع اليباري انت يلي درت الحوله ع الرهان وكأنه مش شورك..
هانيبال برفعة حواجب: وشن دخلني فيه اني!!
عمر:ماهو حتى انت كيفهم وهزيت معاهم ولما تكلمت ع الرهان..عملت نفسك ميت..اهاا..ولا ماتقدرش عليه..
هانيبال:ياعن جد جد شيطانك..
وطلع يجري في جرته...
وعمر يجري وهو يضحك ويصيح:وووووه..
فاطمه لوحت العصا وقالت بهزوة:هييي..خياب كلكم كيف بعضكم كبار ولا صغار..
كلهم ضحكوا ع كلامها..
ومنهم نزلوا للمستراح يشوفوا لهانيبال وعمر وهما يتجاروا في جرة بعض
عمر ماخلا وين رفع هانيبال وفي الاخير طلعه برا القطعه...
مرام:ههههههههه..اول مرة نشوف هانيبال هكي..
دلال بضحكه:زمان كان هكي هو خالي عمر..
غاليه بضحكه:حي خيرهم ولوا وهما يمشوا هكي..
كانوا الزوز خاشين وهما يمشوا وروسهم لوطا منحرجين..
وبعدهم خشوا الحاج عبدالله والحاج عبوده للقطعه..
النساوين ادرقوا مع الحاجه فاطمه..
ومرام ميته بالضحك وهي شاده في العرصا متاع الحوش..
فاطمه:خلهم ياكلوا الهزايب متاعين الحشايم..
شبحت للنساوين وقالت..خشن داخل..خشن..
والنساوين مشوا خشوا داخل كلهم ومازالوا يضحكوا..
اما الشباب كلهم توجهوا للمربوعه الخارجيه ومازالوا يعلقوا ع بعض في اللي صار فالسباق..
لكن هانيبال وعمر..
هانيبال:كله من فسختك..
عمر وهوشاد ضحكته قال:قتلك اجري وراي ماقتلكش..
ضربه بوكس ع ذراعه..
عمر تحسسه وهو  يضحك..💕
🌼🌼🌼🌼🌼
الساعه8:00مساءا..
مقعمزات في الصاله يراجو في العشي..
سعيده:معناها بنعدوا نقعدوا في حوش حماة نعيمه؟.
نعيمه:ايه هي اللي بادرت وحلفت علينا حتى الحلف..
لمياء:وينها هي توا..
نعيمه؛في تونس..
لمياء هزت راسها وسكتت..
فاطمه:بارك الله فيها ويرحم بوها اللي عرف يربي..
نعيمه:امنه زي عمي حمد الله يرحمه بالزبط..وحتى راجلها راجل طيب هلبه..
سعيده:بارك الله فيهم..
زينب ابتسمت وقالت:ربي يتمم ع خير...
كلهم قالوا بأصوات متقطعه:آمين..
شويه وجوا البنات بصفر العشي...
💓اما برا..
فكانت قيامه قايمه..
العاب ناريه ومفرقعات..
والدنيا هايجه ومايجه..
ومش موجود غير الولاد الكبار شويه..
اما الصغار امهاتهم حابسينهم في الحياش..
💓في المربوعه..
عمار:ربي يهدي من خلق..
هانيبال:هي ناقصه تقربيع..
عمار شبحله وضحك نص ضحكه وقال:هم يضحك وهم يبكي..
هانيبال ابتسم بتهكم وقعد ساكت...
🍃🍃🍃🍃🍃🍃
وبرغم كل شي..
مازال الحياة مستمرة..ومازلنا نعيشوا ومسيبينها ع الله..
ويوم يفوت حلو..ويوم مر...واهو عايشين..
🍂🍂🍂🍂🍂
يوم 2\12\2019..
دلال جابت ادهم في وحده من عيادات طرابلس برغم الخوف اللي عايشين فيه وهما يسمعوا في اصوات الضرب البعيد...
اكبر الخوف من العشوائي اللي ياما حصد ارواح..
لكن رب العالمين سلم...
🍂🍂🍂🍂
9\12\2019...
مقعمزين ع السرير في دار نومهم..
والمولود الجديد في النص..
دلال:تمنيت نديرله اسبوع كبير..
عمار تنهد وقال؛حتى هكي باهي الحمد لله..
دلال ابتسمت وهزت راسها وهي تقول:الحمد لله..
سكتوا شويه وهما يشوفوا لأدهم..
بعدين دلال شبحت لعمار لاحظت ع وجهه ملامح الضيق..
دلال:عماري..
شبحلها وقال:همم..
دلال:خيرك حبيبي؟
عمار غير عيونه عنها وشبح لولده وقال:واجعني وجود اختيار جواد ومعمر لجدهم عليا وفي نفس الوقت عاذرهم ولاعندي وجه نلوم بيه..
دلال حطت يدها ع يده وقالت:راهم يحبوك هلبه ورافعين راسهم بيك..لكن هما تربوا وكبروا مع بوي وليهم نمط حياة حبوه ومايبوش يغيروه..
عمار:قبل نبيهم يكبروا معاي ونكبر معاهم..بعدين ابتسم وقال..الله غالب نراجو النتفه كان مازال في عمر..
قربت دلال منه وباساته من خده وقال:ربي يطول في عمرك وتشوف صغاره ياربي..
ضحك وشبحلها..بعدين قرب باسها بوسه لطيفه وقال:مش غير هو بس راهو مازال بيجوه خوت اخرين..
دلال ضحكت بخجل .
عمار قرص خدها وقال:مازال تتحشم القطوسه..
ضرباته ضربه خفيفه ع يده وقالت:اسكت..
وبعدت وجت لولدها قاماته وناضت بيه بتمشي تحطه في سريره..
عمار:هاه دلوله بعد تحطيه بالله شوفي كان خيط الشحن عالق ولالا..
دلال حطت ولدها ومشت شافت الخيط متاع شحن رجل عمار الصناعيه لقاته عالق..
دلال:عالق حبيبي..
ومشت خشت السرير..
هو فتحلها حضنه خشت فيه..
وغطاها بالبطانيه..
عمار:ترا خرفيلي خرافه..
دلال:هههههههه..باهي..ياحضارك يامضارك..
وعمار يضحك عليها..وهي كملت باقي الخرافه...
"سبع بنات في قصبات سعد الغوله تاكلهن..
لو سطاح فوق مراح والله ماذوقهن"💓
💕💕💕💕💕💕💕💕💕💕💕💕💕💕💕💕💕
30\12\2019
يوم الإثنين..
الساعه 11:00صباحا...

~~~~~~~~~~
قعدت بس التكمله....💖