#العشق_المتمرد "عندما يزهر الليمون"
#جمان_فريد
الجزء132 القسم الاخير"1"
⏳..
الساعه 8:00مساءا..
مروحين فالطريق لحوشهم..
هو فاتح المسجل ع اغنيه ليبية ويغني معاها..
اما هي فكانت فعالم تاني..
من خوفها قاعده تفكر شن ادير بش تتجنب كارثه كبيرة ممكن تصيرلها ...
من خوفها كانت مش قادره تفكر كويس..
اللي عرفاته صدمها ولخبطها بالمرة..
وصلوا للعمارة..
نزل هو فتح البوابه وهي تشبحله ومازال تفكر فحل سريع..
ولى للسيارة وركب ودخلها..
بعد خشوا..
هي نزلت ومشت طول خشت داخل العمارة..
اما هو صكر البوابه..
بعدين ولى للسيارة صكرها..
وتوجه داخل العماره..
خش وركب الدروج ووصل فالدور الثاني..
لقاها واقفه تراجي..
مشي فتح الباب وهو يشبحلها بطرف عينها..
لاحظها مش ع بعضها..وفكر انها ممكن تكون متعاركه مع وحده من سلفاتها..
ولأنه مل من ضجيج النساوين ماباش يسألها..
خلاها تخش..
بعدين خش بعدها..
وصكر الباب..
🍁🍁🍁🍁
مقعمزات فالكوجينه يوتوا في ماكلة القهوة ويهدرزوا ع نفس الموضوع..
حميده؛كذابه وستين كذابه والباين انها عدت من ورا راجلها..
غاليه بإستغراب:وليش تعدي من وراه؟
حميده:مدام تنكر فيها حتى بعد عرفت ان سعيده رتها معناها ماشيه من غير شور عمر..
غاليه مطت شواربها للاسفل بعدم معرفه وهي تقرض فالكبده..
حميده ضيقت عيونها وهي تفكر..
بعدين حطت الموس وناضت..
غاليه وهي تشوفلها :شن بديري.
حميده وهي واقفه ع اللاوندينو تغسل في ايديها قالت:تو تعرفي..
صكرت الشيشمه...ومسحت ايديها فقفطانها ومشت طول طلعت من الكوجينه..
غاليه بإستياء:غير شن دخلك بس ياحميده..
🍁🍁🍁🍁
طلع من الحمام بعد مادوش..
وهي كانت دايرة روحها تعلق فالحوايج فالدولاب...
هو وقف ع الزيانه وقعد ينشف فشعره بالفوطه..
هي صكرت الدولاب وقالت:ايه حقه عمر سعيده بنت عمك طلعت تعرف عيت******..
عمر نزل الفوطه وقال:وباهي..
لمياء:قالوا البنات مشت لعرسهم لو كان نعرف راهو مشيت اني وياها..
عمر وهو يمشط فشعره:من قال بنخليك تعدي معاها؟!لاتعدي معاها لامع غيرها...
لمياء بضحكه مصطنعه:حتى امي قبل تبي تمشي..قالتلي نمشي اني وياك..قلتلها لالالا عمر قال مافيش مشي..
عمر مادارش اي ردة فعل وماردش بكلمه..
حط المشط ومشي بيطلع من الدار..
وهي تشوفله بتوتر..
وقف فم الباب لما سمع تليفونه رن..
لف وولى للزيانه وخداه لما شاف المتصل استغرب..
فتح الخط وحطه ع وذنه ومشي طلع من الدار وهو يقول:ايوه حميده..
قلب لمياء قريب وقف...
طول خدت تليفونها وخشت ع الرسايل وبدت تكتب فرساله لأمها وهي ترجف من الخوف..
برا..
وصل فالصاله وقعمز وهو يكلم فأخته..
عمر:لالا مانيش مولي لبعد شهر...
حميده :امم..باهي..ايه حقه بننشدك عمر..
عمر:انشدي..
حميده:حق هل لميا يعرفوا عيت *****
ضيق عمر عيونه وقال:ايه يقربوا لأمها..ليش تنشدي؟
حميده؛احمم..ماهو سعيده عدت لعرس ولدهم وقات ريت وحده غادي تشبه لميا وسألت لو عدت لميا ليش ماقلنالها راهو عدوا جميع..
عمر صمته اللي سمعه من حميده..
سكت شويه بعدين قال؛لا ..لميا..ماعدتش اني قلتلها ماتعديش..ليلة العرس كانت فحوش خالتها امها غادي..
حميده ابتسمت بتهكم وقالت:ايه حتى احني قلناها لو عدت كانت قالت ولاعمر قال..المهم وين تجي بتولي مرة تانيه لزليطن قولي بش نوصيك ع حاجات..تصبح ع خير..
عمر بلع ريقه وقال:ان شاء الله..تصبحي ع خير...
صكر...
وقعد يشبح فالفراغ بصدمه..
قعد يفكر فالمكالمه اللي صارت بينها وبين امها وكلام حميده توا...
ولأنه يعرف لمياء كويس مااستبعدش مشيتها من وراه...
"شن تبي عشي"..
حرك عيونه ناحيتها وقعد يشبحلها بنظرة حاده..
لمياء حست بوجع بسيط من الخوف وهي تشوفله وكانت تحاول ع قد ماتقدر تبان عاديه..
هو تكلم وقال:ديري عجة..
لمياء:باهي..
ولفت ومشت للكوجينه وهي تبلع فريقها من الخوف..
وعمر معاها بعيونه وهو مركز بنظره اكثر شي ع بطنها ومن داخل يغلي غلي من الغضب..
🍁🍁🍁🍁
خلاص اني والله معاد متحملها ومعاد نبيها ..
جمعه:شهاده لله ماتنلام مراة ادير لراجلها هكي ماتقعد ع ذمته اكثر ماقعدت..
نجاه بضيق:اني والله ماواجعني كان هالضراري ياناري عليهم الاربعه لوحتهم هانوا عليها عطها ماينزعها..
عجاج بإنفعال:اني خلاص بنتزوج...والله لما نجيبها عليها ونوريها الكلبه هدي..
جمعه؛طلقها ياراجل ولوح عليك البلي..
عجاج؛ابدا..ماني مطلقها لين نربيها بنت الكلب هدي وتو تشوف...شبح لنجاة وقال..شوفيلي من يالاك يانجاه بنت كبيرة عاقله تتحمل مسؤولية حوش وعويله..
نجاة:حاضر..
جمعه:حاضر شنو انتي الأخرى! اصبري شوي..
شبحتله بإنزعاج..
وهو شبح لعجاج وقال:متأكد ياعجاج انك تقدر تاخد عليها..
عجاج عقد حواجبه وقال؛متأكد مال شنو...بنلعب يعني؟!
جمعه:وهل مراتك؟!عارف شن بيديرولك؟!اشر عليه وقاله..انت غير هددتها بالزواج شوف شن خلت خوتها يديروا فيك..
قعدت نجاة تشبح لآثار الضرب ع وجه ولد خالها..
عجاج تصنع الشجاعه وقال:اعلى مافي خيلهم يركبوه..
نجاة شبحت لراجلها وقالت:خلاص ياجمعه ساده ماجاه منها العقرب هدي خليه يربيها وبعدين يتلفها سحقة ومحقه..
جمعه مط شواربه بملل..
نجاة تجاهلت راجلها وشبحت لولد خالها وقالت:ماتخممش ياعجاج تو نلقالك اللي ظفرها برقبة هديك الشيطانه..
عجاج:خلاص نعبى عليك..
نجاة ابتسمت وقالت؛ماتخممش..
وجمعه يمرر فنظره عليهم ومش عاجبه اللي قاعد يصير..
🍁🍁🍁🍁
طلعت من الحمام بعد مادوشت..
كانت لابسه قفطان حوش شتوي..ولافه الفوطه ع شعرها..
ماشيه للدار وهي تغني وترقص مرة تميل ايمين ومرة يسار..
اشيه مايرقص هالغزال..
اشيه مايرتع هالغزال..
الصحرا خلاها ميال..
وصلت فالدار ووقفت فمكانها وهي مخلوعه...
لما شافت راجلها متمدد ع السرير ويشبحلها ويبان ع وجهه انه تعبان..
قلبها رجف من الخوف..
طول مشتله وهي تقول:محمد..خيرك؟!
محمد يدوب يفتح عيونه ويصكرهم وهو يقول بصوت مخنوق:نحس روحي بنمرض..
بلقيس بخوف:حي عليا!!..
حطت يدها ع جبهته وقالت؛نهاري!!..حطتهم ع رقبته وقالت..عندك حرارة..
حولت ايديها وشبحت لدولابها بعدين مشتله طول فتحاته وقعدت ادور فيه لين لقت ترمومتر...
جاته بيه بسرعه...
وحطاته تحت باطه...وشدت ذراعه وهي تراجي..
محمد يشوفلها ومرة مرة يغمض عيونه..
هي حطت يدها التانيه ع شعره وقعدت تمسح عليه وتشوفله بنظرات كلها حن وخوف عليه...
وهو كان يحاول يقاوم تعبه اللي مخليه رغما عنه يغمض عيونه وتنحجب عنهم
طلعت الترمومتر وشافت القياس قالت بملامح وجه قلقه:ياغبيني..
حطت الترمومتر ع الكامدينو ومشت طلعت بسرعه من الدار للكوجينه..
وهو غمض عيونه بعد ماطلعت..
🍁🍁🍁🍁
تعشى..
كمل عشاه وهو ساكت ماقالش ولاكلمه..
وصمته هدا مخوفها..
بعد كمل عشاه ناض وقال:ارقدي بكري غدوة من الصبح ان شاء الله بنعدوا لطرابلس..
لمياء بتموت من الخوف لكن حاولت تبان عاديه وهي تقول؛عندك خدمه غادي؟
عمر وهو ماشي للدار:ايه بنحطك فحوش هلك ونعدي نشوف اشغالي...
لمياء التفتت بتشوفله لقاته مهناش..
قالت فنفس بخوف"حي عليك يالميا حي غبارتي غبارة...كله منك ياسعيده الشياطين الله لايربحك"..
🍁🍁🍁🍁
خشت عليهم الصاله..
وحطت صفرة العشي قدامهم..
عمها قاللها:مبروك نجاحك يابنتي..
اريج بإبتسامه؛الله يبارك فيك عمي..
ميلاد شبح لمرته وقال:عطتيها المعلوم..
ضحكت سعيده وقالت:ايه ياسيدي عطيناها هديتها..راهي من عمك..
اريج وهي مبتسمه:ربي يحفظك ويطول فعمرك..
ميلاد؛كلمت راجلك وقتله يخليك تعدي مع عمتك لعرس قريبتها وقال باهي..
ابتسمت اريج بفرح وشبحت لسعيده وسعيده ضحكت..
ميلاد يرفس فالرغيده وهو يقول:مرة تانيه تبي تعدي لمكان ولاخاطرك فشي قولي لعمتك بس وماعليكش فتوفيق..
اريج بإبتسامه امتنان:بارك الله فيك عمي وربي يطول فعمرك يارب..
ميلاد كلي فم رغيده وهو يهز فراسه...
سعيده؛قعمزي تعشي..
اريج:تعشوا انتم عمتي صحتين اني بنركب بأيهم فوق...
سعيده:باهي عدي..
اريج:تصبحوا ع خير..
ميلاد وسعيده؛قدامك كل خير..
لفت اريج ومشت من حداهم...
وهما قعدوا يتعشوا فالرغيده اللي يقولوا عنها انها احلا مايتاكل فالشتي ايام زمان..
"بازين باللبن.."
🍁🍁🍁🍁
الساعه 12:00ليلا..
مقعمزة ع السرير بالطول ومرقده بنتها ع مخده محطوطه ع رجليها وتهز بيها بش ترقد..
وعيونها ع راجلها اللي كان راقد جنبها وتبدله فالكمادات..
فجأه..
"با...با"..
ضحكت بإندهاش وهي تشوف لبنتها قالت:حي عليك ياشفشفه!واني اللي متحديه بيك الناس ونقول بنتي حتقول ماما قبل بابا!!!كسفتيني يامعفنه..ماجبتيه من برا طالعتله..
محمد:اممممم...
بلقيس:هههههههههه..حتى وهو مريض سيدك هدى حتى وهو هكي..
محمد حط يده ع يدها وشدها بقوة..
بلقيس:ايييهههههه..خلاص..ياودي خلاص انت راجل تهبل كيف النسمه استغفر الله ياربي..أااا قصدي سبحانك ياربي..
طلق يدها وحط يده ع فوطة الكمادات اللي ع جبهته وهو شاد ضحكته..
والبنيه تشبحله وهي تلعب بلعبه شادتها فيدها..
بلقيس بإبتسامه:هاه شن تحس روحك توا..
محمد بصوت هادي:كويس..
بلقيس:خل نحط وسومه فسريرها ونجي نقيسلك حرارتك..
محمد وهو يشوفلها:باهي..
🍁وناضت بلقيس حطت بنتها فسريرها ومشت لراجلها قاست حرارته لقتها نازله تريحت..بعدين مشت جابتله ماياكل..كلي...وبعدها ولى تمدد ع سريره ورقد..وهي مشت لبنتها اللي كانت مازال نايضه..غيرتلها..ورضعتها بعدين رقدتها..وفالأخير رقدت هي🍁
🍁🍁🍁🍁
ايه باهي ليش فته المشروع هدى؟
الهادي وهو ياكل فالرمان:اممم..مش عارف ماحسيتش انه حينجح..
فضيله:بالعكس ينجح ونص..مافيش مغسلات واجد هنى كان فتحت وحده فمكان مناسب صدقني حتنجح واجد..
ابتسم بتهكم وقال:غيرك قال عنه مشروع فاشل نفتحها شهر شهر ونص ونصكرها..
غمضت عيونها وابتسمت بأسف..بعدين فتحتهم وكلت كاشيك معبي حبات رمان وهي تقول فنفسها"لازم يذكرها حتى بالشر"..
الهادي"كلا انت واحد حمار..شن جاب سيرة هديك توا بس!!؟غصب عني فضيله تخلي فيا نقارن بيناتهن..هي اللي ذكر فيا ديما بيها اذكر فيا بغلطة عمري اللي كنت معاها مدفون واني حي"..
حطت فضيله الكاشيك وقالت؛خل نعدي نشوف الأولاد كانهم متغطيين زين ولالا صقع سم الليله..
ومشت ناضت طلعت من الدار..
وهو بعد طلعت تنهد بضيق وحط الكاشيك وقعد يتفرج ع التلفزيون..
🍁🍁🍁🍁
واقفه قدام الدولاب تشوف لقفاطينها متاع المناسبة..
اي واحد فيهم تلبسه غدوة فعرس حفيدة اخت الحاجه حدهم عزوزتها..
هو كان مقعمز ع السرير قدامه كراسه كشكول وآلة حاسبه ومنهمك فالحسابات..
هي طلعت زوز قفاطين معلقات ومشت طلعت بيهم من الدار..
هو قام عيونه فيها لما شافها طالعه..
بعدين ولى يشوف لحساباته..
☘☘☘☘
الاخضر يهبل البسيه هو..
البارقه بإبتسامه:حتى اني اخترته هو غير قت رايين خير من راي..
حدهم ابتسمت..
البارقه:دودو..
حدهم:اممم..
البارقه تنهدت بعدين قالت:مش سادك حزن حبيبتي..
تلاشت ابتسامتها وتبدلت لملامح الألم..
البارقه:امك الله يرحمها كان تبيك تفرحي تبيك ديما تضحكي هي قالتها لسيدك ولعمتك سعيده..
نزلت حدهم عيونها ودموعها قعدوا يطيحوا..
البارقه:مانبي نوض عليك جروحك...لكن نبيك تذكري ان امك اكثر شي تمناته فالدنيا هدي سعادتك ياحدود..
حدهم قامت عيونها فيها وهي تمسح فدموعها قالت:عارفه..لكن مازال لتوا مانقدرش نخش فرح....
البارقه:ع راحتك حبيبتي..لكن زيدي فكري فكلامي..
حدهم هزت راسها وهي ترشف بعدين قالت:إن شاء الله..
ابتسمت البارقه..
حدهم:معاش تحسي فشي؟
البارقه:مريرة مريرة مش كيف قبل..
حدهم:باهي كويس..
البارقه بإبتسامه:الحمد لله...هي مالا نخليك ترقدي ونعدي نرقد حتى اني خلاص النوم نزل عليا..
حدهم بإبتسامه:باهي..تصبحي ع خير..
البارقه:وانتي من اهله..
ومشت طلعت من الدار..
وحدهم صكرت الباب وراها..
فهاللحظه رن تليفونها..
ضحكت ومشت خداته من ع الكامدينو وانطرحت ع السرير..
تاكاته ع جنب الكمادينو..
بعدين فتحت المكالمه وحطت ايديها الزوز ع المخده تحت خدها الأيمن..
بان عليها ايمن وهو راقد نفس الرقده وعيونه الناعسات يشوفولها بإبتسامه..
أيمن؛هي سمعي حديث اليوم..
حدهم بنعس:استغفر الله العظيم ايمن هدا حديث شريف لازم نكون مصحصتله ومقعمزة بوقار واني نقول فيه..
ايمن :صح عندك حق..لكن اهو حطيها فراسك عرس مافيش قبل لتحفظي الأربعين النوويه..
ضحكت وقالت:حاضر💓
☘☘☘
اما عند بوها ومرته..
بعد علقت البارقه القفاطين فالدولاب..
مشت للسرير بترقد...
خشتله...وهي تزحف ع ركابها..
دفت بيدها حاجات حسن المطرحات..
هو رفع حاجبه..
هي تمددت ع السرير وقالت :النوم ولادبلوم..
وجبدت البطانيه بتتغطا بيها وبيجوا الكراسه والآله الحاسبه طايحات..
هو قعد يشبحلهم وخلاص..
وهي تغطت وغطت راسها وشادة ضحكتها بقوة..
اما هو ناض وقال:يصبرنا الله على مابلانا..
وطبس خداهم..
ومشي للباب صكر الضي وطلع للكوجينه بش يكمل حساباته..
البارقه بتوعد:تو نوريك البلي كيف شكله ياحسن..
🍁🍁🍁🍁
تاني يوم..
الساعه 11:00صباحا..
خش لطرابلس...
وهي مجرد ماشافت اللافته اللي تبين انهم خشولها حست روحها بتطلع من الخوف..
هو طول الطريق ماتكلمش معاها كان بعبارات مختصرة جدا وملامح وجهه الجامده هي اللي مخليتها مرعوبه مش بس خايفه..
خشوا الزنقه اللي فيها حوش اهلها..
عمر:اتصلي بيهم يفتحوا الباب.
بلعت لمياء ريقها وقالت:باهي..
واتصلت بأمها قالتلها:وصلنا......الله يسلمك....وصكرت..
حوالي 3دقايق ووصلوا لحوش اهلها..
درس عمر السيارة..
نزل وهي نزلت...
فاللحظه اللي فتح فيها عامر خوها الباب..
سلم عليهم ورحب بيهم ودخلهم داخل..
عمر خش للمربوعه..
اما لمياء خشت لأمها..
☘فدارهم هي واختها زمان...
لمياء وهي فقمة الخوف:حي عليا ياامي رحت فيها راهو بنطلق خلاص بنقعد حداك..
نادرة بشي من التوتر:ارزني ياغبيه ارزني وخليك واثقه فروحك حتى لو بالكذب..
لمياء بلعت ريقها وقالت؛ياربي كان يصير لعيلي شي من الرعاش..
نادره وهي تحاول تخفي قلقها:اطمني مايصيرله شي بعون الله..
لمياء بخوف:يارب..
▪▪▪▪▪
الكلام اللي تقول فيه هدا ياولدي اني مانقبلاش لا علي زوجتي ولابنتي..
عامر:كبير كلامك ياعمر..حني ماعندناش نساوين يطلعوا من ورا رجلاتهم..
عمر:نقوللكم روها بعيونهم يحسابوني نعلم..انحطيت فموقف مافيش راجل يقبله ع روحه..
مصباح شبح لولده وولده شبحله الزوز كان موقفهم صعب حتى هما..
لكن قعدوا يدافعوا عن رجولتهم كأب وكأخ مسؤولين ع نساوينهم...
مصباح:دام ماريتهاش بعينك معناها اللي سمعته كل كذب وافتراء ع بنتي..
عمر شبحلهم الزوز وقال:مالا خلاص..ناض وقال..اني ماتلزمنيش مراة تكسر كلمة راجلها وتطلع من وراه..
مصباح وقف ووقف معاه ولده وقال:وحتى حني مايلزمناش راجل يصدق ع بنتنا كلام كل من هب ودب..
عمر:خلاص بنتكم عندكم...
مصباح :سلامتك..
وعامر يشبحله بحده..
وكيف بيمشي تخش عليهم نادره..
نادره: عمر ولدي خيرك العفو شن في؟
عمر نزل عيونه و ع وجهه ملامح العصبيه..
مصباح بتهكم؛السي البي متهم بنتك انها مشت من وراه لعرس قريبتك فالبلاد...
نادرة ضيقت عيونها وقالت:قصدك لعرس عيت *****..
عامر:ايه؟
نادرة بإصطناع الصدمه:نهاري !! معقوله ولدي تقول كلام زي هدا!!تو انت مش يومها جبتها لحوش خالتها جبتهالي اني انت نحلفلك بالله البنت ماتحركت من بحداي يومها..
عمر:احلفي انتي وياها ع المصحف انها انها ماعدتش العرس ليلتها..
🍁🍁🍁🍁
مقعمزين هي وياه فالجنان..
وعمار قدامهم يلعب بالدراجه..
ومرة مرة يشوف لخاله اللي كان يتكلم بإنفعال
ضو:عايشه فوهم مازالت فوهم..تقولي كيف تتجرأ وتقول كلام زي هدا وانت اكثر واحد يعرف حالي
⚡🍃
دلال بشي من العصبيه:اني مراة مازالت لتوا مش مقتنعه انها ارمله وحاسه ان راجلها مازال عايش حاساته زي المسافر وحيجيه يوم ويروح..كيف تبيني نتزوج واني متزوجه؟!
⚡🍃
ضو بغضب؛قسمابالله جي فبالي ساعتها نعطيها كف..بالك تفيق وتصحى وتحط عقلها فراسها...
مرام بصدمه:شن تبيها بالسيف تحبك!؟
ضو:ماقلت بالسيف..لكن تعطي فرصه..نبي بس منها فرصه..
مرام بنفاد صبر:فرصة شني بالله عليك!!ياضو الموضوع هدى صكره تربح وفكر فنفسك وفعمرك اللي قاعد يجري..راهو كان دلال عايشه فوهم انت مش خير منها..صدقني هالمراة عمرها ماكانت ليك..
ضو شبحلها بحده بعدين قدم خدي نظاراته من ع الطاوله ولبسهم وقال:اني الغالط اللي جيتك..
ومشي طول بإتجاه الباب وصل فيه فتحه وطلع..
مرام :برا برا اجري ورا سراب ووهم كذاب..ياما جايك من كفوف
تنهدت بحسرة بعدين مشت لولدها اللي لماشافها جاياته مشي يجري بدراجته
هي ضحكت غصب عنها وقعدت تجري وراه وتقول:غير مانيش شادتك ياودي..بالشويه..هههههههههه..
🍁🍁🍁🍁
خليك مذكر اليوم هدا ياعمر..
الكلام هدا قاله مصباح لعمر اللي كان واقف يشبح للمياء وهي تبكي بالعبرة جنب امها..
عامر خوها مصدق ان لمياء اخته ادير هكي لأنه عرف بهلبه عمايل دايرتهم اخته وياما كاذبه ومصدر معلوماته رشا..
لهدا ماكانش يبي يدخل تدخل قوى..
مصباح مشي لمرته...
ومدلها المصحف وقال؛احلفي هي..
نادره خدت نفس..
ومدت يدها وحطتها ع المصحف وقالت وهي تحاول تتصنع الثبات:اقسم بالله لميا..مامشت..للعرس..
لمياء كانت تشوف للمصحف وفمها يرجف من البكي..
حولت نادره يدها وقعدت تفرك فراحتها بصوابعها وكأنها تحاول تنظف ذنب مايتنظفش لو نقعت يدها فماء أسيد "اشيدو"..
مصباح شبح لعمر من فوق لتحت بغضب بعدين قالت:حتى بعد حلفت امها ماتبيش تصدق.
رفع عمر حاجبه بكبر وقال:قلت هي وامها يحلفن...
مصباح هز راسه وهو يحاول يضبط نفسه..
التفت للمياء..وقربلها المصحف وقال:احلفي..
لمياء كانت حاطه يدها ع بطنها وتبكي وهي تشوف للمصحف..
عمر فهديكا اللحظه ماقدرش يصخف عليها نهائيا...
ومصباح خاف من ترددها..خاف ينخزي قدام نسيبه...
ونادرة تشوفلها بألم وخايفه لمياء تفضح روحها..
لمياء..
اللي كانت وكأنها فوسط دوامه..
مش عارفه كيف ادير...
لاتقدر تكذب روحها وتطلق وتتمرمد..
ولاتقدر تمد يدها وترتكب ذنب حيكلفها هلبه...
قعد تفكر وتفكر..
والكل عيونهم عليها...
نادرة:مش منها من الموقف اللي انحطت فيه ماعندي مانقول غير الله لايسامح المفتريات خربات الحياش العامرة..
عمر:لميا...معاد عندي وقت بنعدي...
هي كلام عمر الأخير ليها خلا قلبها يتقطع..
لمياء تحبه هلبه..وماتقدرش تعيش من غيره..
وان كانت انسانه سيئة لكن الحب مايفرقش..
وكذلك ماتبيش تطلق بعد تجيب العيل وتخش في مشاكل ليها اول ماليها اخر..
فهالحظه لمياء..
اختارت الدنيا ع حساب الآخره اللي ولامرة كانت فحسابات لمياء نهائي..
حطت يدها ع المصحف وقالت بنبرة باكيه:اقسم بالله... مامشيت للعرس..
حولت يدها فيسع وحطتها هي واختها ع وجهها وانهارت بالبكي..
امها حضنتها وقالت وهي ادمع:حسبنا الله ونعم الوكيل...
الله لايسامح اللي كان السبب الله لايسامحه..
مصباح بغضب؛والله مفروض مانخليها تقعد معاك بعد اللي صار توا لولا هالجنين..واشر بسبابته ع بطن بنته..
عمر؛لو كنت مكاني درت هكي واحرف..شبحلها وقال...هيا..
بعدين لف ومشي لباب المربوعه البراني فتحه وطلع...
ولمياء بعدت عن امها ومشت وراه..
وكإنها تمشي بلا إراده..
واهلها يشوفولها...
مصباح:لين نموت يوم زي هدا ماني ناسيه..
نادرة رشفت وقالت:خشوا بيناتهم شياطين الإنس..يلقوه ويتلقوه إن شاء الله...
🍁🍁🍁🍁
الساعه 3:00بعد الظهر..
سعيده:هيا وراس حميده سقدي..
طلعت حميده تجري بشنطة المكياج وقالت:هي تحركي قدامي..
مشت سعيده..
وحميده كانت تلبس فشبشبها وهي تشوف لغاليه كيف تنسق لأمها فلبسة العرس..
غصبوا عليها تمشي بش تغير جوها وهي رضخت لإصرارهم ووافقت...
سعيده وهي واقفه فالسقيفه؛تي هيا..
حميده بضحكه؛باهي يامرعوشه..
سعيده:قرده..
ضحكت حميده...
لكن تعكرت ضحكتها لما شافت عمر ومعاه لمياء خاشين من فم البوابه..
وجه عمر مايتفسرش..
ولمياء مازال تبكي لما شبحت لسعيده قالت:حسبي الله ونعم الوكيل فيك ياظالمه الله ينتقم منك..
سعيده.قعدت تشوفلها بصدمه..
عمر:سعيده انتي كيف اختي الكبيرة واني نحترم فيك ونقدر فيك..بالله ماتخلي القدر يطيح بيني وبينك..
حميده؛خيرها شن دارت سعيده!!؟
عمر:عوايدها الأولى اللي كلنا نعرفوها وياما رينا منها ولانسيتي ياحميده..
لمياء ببكي:اني خليني فحالي ارجوك فكيني من شرك..
ع جية غاليه اللي قالت بخوف:خيركم!؟..
سعيده مشت فاتت من حداهم وطلعت ودمعتها ع خدها..
حميده بعصبيه؛مادارتلك شي سعيده ولاجت من يالاك..ولما راتك فالعرس جت نشدت مستغربه بس قات علاش ماقلتوش وعندها الحق..
عمر بتهكم:وانتي عاد توا طاح غلاك فسعيده وصدقتيها وادافعي عنها!!
غاليه:سعيده مادارت شي ياعمر لمرتك..
لمياء ببكي:اللي ماعنده حظ لايتعب ولايشقى ع اللي
داراته فيكم مازلتوا ادافعوا عليها..
غاليه بضيق:بالله فكونا منه القطاف الفارغ هدى..
عمر:توا طلع قطاف فارغ ياغاليه!؟؟ماهو هدى الحق..شن اللي خلا هدى حالك انتي غير سعيده..
حميده انصدمت فكلامه..
اما غاليه فحست بكلامه نزل عليها زي السم..
حميده بعصبيه؛اسمع عمر دوة نساوين طلع روحك منها احسلك..
عمر بنرفزة:والنبي انتي التانيه اسكتي..
سكتت حميده وهي مصموته..
عمر:اني بنقول كلمه معاش نبي نعاودها لميا معاد نبي حد يطق فيها من نساوين خوتكن اقسم بالله تصير حاجه كيف هدي مرة تانيه ماتعرفوا شن يطلع مني...
شبح لمرته وقال:هيا..
مسحت لمياء والتفتت بتمشي..
فجأة..
حطت يدها ع بطنها وشدت فذراع عمر بقوة وعيطت..
عمر بخلعه:خيرك!!؟..
لمياء بصدمه وألم؛حييي عليااا حييي حتى هادي ياربي..حتى هادي!!..لااالاااياااااربيييي...
عمر شدها وقال:خيرك قولي خيرك!!..
غاليه قعدت تشوفلهم بحده هما الزوز..
غمضت عيونها بشده ..
عايشه حالات صراع...بين غضبها وشفقة قلبها...
لكن مع الاسف كلام عمر مازال طازة...
قاعد يرن فودانها..
فتحت عيونها ومشت ولت لأمها فالدار اللي كانت معليه حداها التلفزيون ومصكرة الباب..
فتحت الباب وخشت وصكراته طول..
فاطمه؛شن صوت الدوشه هدي؟!
غاليه:عمر مرته بتجيب شكلها وحميده بتعدي معاهم.
الحاجه فاطمه بدهشه:مش مازال!؟
غاليه مشت قعمزت حداها وقالت:عادي يمي تصير..هي قوليلي شن تبي تلبسي..
فاطمه شبحتلها وقالت؛بالي فاللبس توا اني!!
غاليه تنهدت بضيق وقعدت تشبح لحولي مطروح قدامها وسرحت وهي تذكر فكلام عمر...
🍁🍁🍁
عمر اللي كان يجري بسيارته بطريقه للعياده اللي تابع فيها مرته ومعاه اخته حميده..
ولمياء اللي كانت.تبكي وتتألم..
وصل بيها العياده...
دخلوها طول..
ودارولها الجهاز....
الدكتورة؛نبض البيبي ضعيف وللاسف مش فوضعية ولاده لهدا لازم تولد ولاده قيصريه..
عمر بقلق شديد:يعني مافيش عليهم خطر..
الدكتورة:ان شاء الله لا...ومشت من حداهم..
عمر قعد معاها بعيونه وهو خايف ع الآخر..
وحميده واقفه تشوفله بحزن ومش قادره تقرب منه ولاتواسيه لأنها زعلانه منه...
☘☘☘☘
وبدت عملية الولاده القيصيريه...
وعمر كان مهييء نفسه لكل شي..
هالمرة قعد تفكيره كله بس فلمياء...
وقعد يذكر فاللي صار معاهم لما ولدهم مات وهو فبطنها...
عمر رسمي كان حاس روحه حتصيرله حاجه لو لمياء صار فيها شي...
وعارفها ومتأكد ان هالمره مش حتتحمل...
وزاد حمل نفسه الذنب...
وكره سعيده من كل قلبه...
🍁🍁🍁🍁
بعد نص ساعه...
طلعت الدكتورة...
حميده لما شافتها تلقائيا ابتسمت..
لما شافت ملامح الإبتسامه والبشاير ع وجه الدكتورة..
اما عمر فكان يراجي فيها تتكلم..
الدكتورة بإبتسامه؛الحمد لله جاتك بنيه سمحه زي العسل وصحتها كويسه غير لازم نحطوها فالحضانه تقعد فيها كم يوم....
حميده ضحكت ودمعت من الفرحه..
عمر وهو يرجف قال:وأمها؟!!
الدكتورة؛اطمن حتى هي كويسه وحالها باهي..
عمر حط ايديه ع وجهه وتنفس بقوة...
وحميده من فرحتها جاته حطت يدها ع ذراعه وقعد تمسح عليه وتقول ؛مبروك البنوته تتربى فعزكم..
نزل عمر ايديها وحضن بيهم اخته وقعد يبكي من الفرحه..
الدكتورة مشت من حداهم وهي متأثرة..
وحميده كانت اطبطب ع ظهره وهي مبتسمه ودموعها تنزل..
🍁🍁🍁🍁
الحمد والشكر ليك ياربي..
الحمد والشكر ليك يامولاي...
هادي كانت الحاجه فاطمه تحمد فالله وهي مغمضه عيونها بشده...
وغاليه واقفه حداها وهي تضحك بفرح من بين دموعها وتتصل بخواتها بش تبشرهم..
💕وانتشر الخبر..
ومافي حد مافرحش لعمر..
ومافي حد ماكلمش عمر تليفونه مابطلش اتصالات بكل..
وبفرحة احبابه بيه زادت فرحته اضعاف...❤
💕💕💕💕💕
عمر:ربي يهديك يامتلفه..
لمياء وهي تمشي فجنبه بصعوبه:مانقدرش نصبر نبي نشوفها نبي نطمن..
ابتسم عمر...
وصلوا فشباك الحضانه ووقفوا عليه..
عمر اشر بسبابته ع طفله رضيعه وقال:هديك هي..
لمياء لما شافتها حطت ايديها ع فمها وهي مش مصدقه...
ودموعها ينزلوا سيل...
بعدين نزلتهم وحطتهم ع صدرها وقالت:هادي بنتنا حني ولا بنتا..
ضحك عمر وقال:ايه بنتك وبنتي ياشفشه..
ضحكت بدموع..لكن تألمت..
حطت يدها ع مكان الجرح..
عمر بشي من الخوف:تعالي نولوا...
لمياء حركت راسها ايمين ويسار بالنفي وقالت:لالا خلينا شويه تانيه..
ضحك وقال:باهي شويه تانيه..
قعدوا الزوز يشوفوا لبنتهم وهما فقمه السعاده..
مش مصدقين امتى يجي اليوم اللي يضموها فيه ويشموا ريحتها..
عمر:ايه حقه...استقريتي ع اسم؟
لمياء:ليا وقت...
عمر:وليش ماقتي..
لمياء:انت معاش سألت..
ابتسم عمر وقال؛باهي شن هو...
شبحت لبنتها وابتسمت برفعه حاجب بعدين قالت:
"سما"
...يتبع....
