#العشق_المتمرد "عندما يزهر الليمون"
#جمان_فريد
الجزء 128القسم الرابع
🌟..
لوحت الشيشه وخشت تجري وهي ميتة من الحشم والإحراج..
شافتها خالتها حميده وهي خاشة تجري بهالحاله..
استغربت ولحقتها..
خشت دلال الدار ووراها حميده
وقفت دلال فنص الدار
غطت وجهها اللي مولي احمر وسخون من الخجل وهي تقول..
حي ع الحشمه..حي ع العار..حي ع الحشمه..حييي ع الموقف حييي..حييي..
حميده:غير خيرك قولي شن صار!؟..
ع خشة عمر للدار وهو يضحك:نقولك لا نأشرلك بإيديا انتي شي مابيتي تفهمي..
حميده بضحكه وهي مش فاهمه شي قالتله:غير قول شن دارت..
لفت وقعمزت وخدت مخده وغطت بيها وجهها..
عمر وهو يشوفلها قال بضحكه:برا مصبيين هانيبال ومراته ومعاهم ضو..
حميده:حيي طلعت تجري قدامه!!؟
عمر:هههههههه ياريت هكي....بخت الميه جت فالراجل غسلاته غسل..
دلال بصوت مكتوم:ياحلييييلييي..
حميده:ووووههههههههههههههه...
ع جية هانيبال ووراه مرام اللي كانت تضحك..
وقف فالباب وقال:هبلتي ياصفرا !!
دلال ماقدرتش تحول المخده من ع وجهها وكان تلقى الأرض تنشق وتبلعها..
وخالتها وخالها يضحكوا عليها..
مرام خشت بضحكه وهي تقول:وين تعلم عليه برا هي؟..
هانيبال:تعلم ولاماتعلم تحساب روحها صغيره طالعه تجري وتبخ فالميه..
اياك اعني واسمعي ياجارة..الكلام ع عمر..وعمر فهم ودار روحه الدوة مش عليه..
اما دلال قريب تتبخر من الإحراج..
هانيبال:حولي المخده وصبي..صبي حددي سورية الراجل..
حولت المخده وهي تشوف لخالها بصدمه..
مش هي بس كلهم يضحكوا بصدمه..
هانيبال شبح لحميده وقال:عدي قولي لمرت محمد تجيب سوريه من سواري محمد بش يلبسها الراجل لبين ماجفت سوريته..شبح لدلال وقال..عنده مطراح بيعديله ضروري..
دلال نزلت عيونها لوطا وهي ذايبة من الخجل..
حميده :حاضر ..ومشت طلعت..
ووراها عمر اللي كان يضحك وهانيبال يشوفله بحده..
طول مشي لحقه..
مرام وهي تحط فبنتها اللي كانت راقده ع الفراش قالت: نحددها اني دلوله مادوري..
دلال بخجل:لالا اني نحددها خير مايحرج مني خالي..
مرام شافتلها بعدين ابتسمت..
وعمار جي لدلال يجري طاح عليها وحضنها..
هي ضحكت وحضناته وهي تقول:نجيه الأمور حبيب بنت عمته..
ومرام تشوفلهم وهي تضحك..
شبحت دلال لمرام وقالت بضحكه خجوله:حتى السلام ماسلمنا..
ناضت بعمار وجت لمرت خالها..
طبست عليها وسلمت ومرام تسلم عليها وهي تضحك وتسأل فيها عن احوالها واحوال اهلها..
برا..
فالمربوعه..
كان ضو مقعمز وسرحان فالموقف اللي صار وابتسامته مرسومه ع وجهه..
والمكيف مقابله كان قوي لكن هو ماأهتمش..
قاعد سارح ويفكر فيها وفمنظرها الحلو وهي تلعب وتشاغب زي الطفله وقتها شافها..ولأول مرة يشوفها هكي.
قبل متعود ع مظهر المراة الناضجه العاقله القويه..
لكن هالمرة حس انها مازال صغيره فعلا وهالشي زاد رغبة قلبه بقربها...
مراة جميله..بحالات مختلفه..
تخلي الراجل يتوق بش يحوزها ومايهمه شي فالدنيا لاظروفها ولاظروفه...
انفتح الباب وخش هانيبال وفيده سوريه لخوه محمد..
لقي ضو فهالحاله
ابتسم ع جنب وهو رافع حاجبه الإيسار..
قدمله وجي قدامه مدله السوريه فوجهه..
ضو استاقض وانخلع شبح لهانيبال وقال:هدى شنو؟!
هانيبال وهو عاقد حواجبه:خبزة فرن.
ضو ضحك وقال؛لمن؟..
هانيبال:لمحمد..صبي ارمي اللي عليك خل نعطيهلهم يحددوها بيش تجف
ضو:مش لازم نعدي للحوش اهو خطوة هنى نغير ونعدي..
هانيبال:قتلك هاك
ضو مط شواربه بملل وقال:عليك كساحة راس
ناض وقف وبدي يرمي فسوريته..
وهانيبال حط السوريه اللي فيده ع تركينه وقعمز..
🍁🍁🍁🍁
واقفات الزوز فدار التقعميز يقضوا ف غلافات المنادير بش يغسلوهم وهما يهدرزوا...
البارقه:معناها ماعنده مانع تقري..
حدهم:ايه لكن نلبس الحجاب الشرعي..
البارقه:ماقالك شي ع الخمار..
حدهم وهي مضيقة عيونها:تس تس تس..وان شاء الله مايقول..
ضحكت البارقه..
🍁🍁🍁🍁
مروح بسيارته اللي جابهاله واحد من جماعته للمطار..
كان يدور فالشوارع بمرته ويهدرز هو وياه...
والكلام كان مهم..
عماد وهو يسوق ويشوف القدام:معليشي حبي مراة كبيرة سايريها واعتبريها امك..مش مرات امك تكشخ عليك وتعارك فيك وتكون واعره معاك..اعتبري امي زيها..وماتنسيش عمري امي عمتك..انتي بنت خوها..تحبك وتتمنالك كل خير..لكن طبيعي حبي هكي تصيرلها لقطة الغيره..سكت شويه وهو يشوف لسيارات وراه..دار فليتشات بش بيلف يمين وهو يقول...ايه زي ماقتلك..بتغير شويه..عاد بالذات اني علاقتي بأمي قويه هلبه..فهي بتحس كأنك خدتيني منها..شبحلها وقال..عرفتي كيف حبي..شبح القدام وقال..تو حتى انتي سموحتي تولي ام....وتفهمي عليها بعدين..
تنهدت وقالت بإبتسامه:فاهمه وعارفه..وحتى بدون ماتقولي اني مستعده نتحمل كل شي ع خاطرك انت..
ابتسم وشد يدها وحطها ع مكان قلبه وهو قال:اني نموت من غيرك روزنتي ونقولهالك الف مرة..بالذات بعد خديتك ياعمري..والله معاد نتحمل حياة من غيرك..
تنهدت من قلبها وهي مبتسمه بعشق..
وهو بدي يغني..
ميت موت عليه غزالي..ميت موت عليه..
ميت موت عليه غزالي..ياربي نجيه..
وقعدت تغني معاه باقي الطريق لعند ما وصلوا للحوش..
انفتح باب الحوش..
خشت السيارة..
وتسكر الباب...
درس عماد..
وفتحوا البيبان ونزلوا..
ع طلعة كفايه من باب الحوش الدخلاني..
وكان الإبتسامه واسعه ع وجهها وهي ترحب بيهم..
حمد لله ع السلامه حمد لله ع السلامه..
مرحبتين مرحبتين..
نزلت من الدروج..
قدمتلها كنتها بتسلم عليها هي خدتها فحضنها..
رزان من داخلها معاش بدت ترتاح لأي تصرف من تصرفات عمتها..
ولاعماد..بس شن بيدير..امه...لازم يسايرها وياخد بخاطرها ويحاول يتفهم تصرفاتها..
☘بعد السلام..
دخلتهم للحوش وهي تسأل عن احوالهم وهما كذلك..
بعدين قالتلهم يركبوا شقتهم وغداهم عليها..
هما مايبوش يعلقوا ع تصرفاتها حتى بينهم وبين انفسهم حدهم يدعوا فقلوبهم "ياهادي يارب"..
🍁🍁🍁🍁
اما الأفعوانة الصغيره..
فكانت قاعده فحوش مالك ليها اسبوع..
هي كانت تتعامل مع نور عادي..
ماتمادتش معاها لابالكلام ولابالتصرفات ونور تتعامل معاها ع حسب ماتشوف منها..ومافكرتش نهائي تفتح معاها هدرزة تخص اي شي ليه علاقه بالعيله لأنها تخاف منها تاخد الكلام وتحوره وتكذب عليها لأنها حاسة بيها ادير هكي فعلا..
☘تعالي نورهان خودي..
ناضت نورهان لنور وخدت منها صفرة فيها مق كاكاو وحليب ومعاه تست مربي...
بعدين مشت قعمزت وحطتها جنبها وخدت ايبادها ولهت بيه..
اما نور قعمزت حداها وفتحت تليفونها..
وخشت ع الماسنجر تكمل هدرزتها مع تالة..
تاله
(تبدا بعد العيد الكبير)
نور
(ايه نعرف )
تاله
(بتولي نور؟)
نور
(طبعا بنولي مالا شني)
تاله
(نحسابك ع خاطر الحمل بتوقفي)
نور
(لالا علاش بنوقف..هلبه بنات قروا معانا وهما حوامل وبطونهم واصله لخشومهم)
تاله
(ههههه..ايه..باهي مالك عادي عنده)
نور
(اكيد هدا شرطي وهو مش ممانع بكل)
تاله
(حلو..ايه احكيلي شن دايرة مع الحمل)
🍁🍁🍁🍁
هههههههههههه..وااااو مالك واااو..
مالك بضحكه وهو رافع حاجبه:مال شنو عزيزتي يحساب غير هو بس اللي يفهم..
اسراء ابتسمت بإعجاب وقالت:تعجبني ثقتك بنفسك..
مالك رفع حواجبه وغير عيونه عنها وشرب من مق النسكافيه...
واسراء تشوفله وهي مبتسمه برفعة حاجب..
ع جية وحده من زميلاتهم..
خطمت من حداهم وقالت:شن جو..
الزوز ردوا:تمام..
هي ضحكت وقالت:الفوشي واكل منك حته سرو تهبلي..
ابتسمت اسراء وقالت:ثانكس ياقلبي..
وهو يشوف لإسراء ولبستها وشعرها..
هي التفتت فجأه شبحتله..
عيونه جو ع شفايفها اللي كانت نافختهم مؤخرا..
كان منظرهم ملفت هلبه..
هي ابتسمت ..
هو شبح لعيونها ونظراتها المربكه..بعدين غير عيونه وقال:بنمشي توا عندي خدمه..
اسراء:اوكي..ايه ماتنساش عزومة الليله..
مالك:اكيد..سلام توا..
اسراء:بااي..
مشي طول وهو يحاول يسيطر ع نفسه ويقوللها"خيرك يامالك خيرك...انت عندك هدف ركز عليه هو وبس ردبالك تنحرف عن الطريق يامالك"...
جي بين عيونه من جديد منظر شفايفها..
غمض عيونه بشده وحرك راسه ايمين ويسار بسرعه بعدين فتحهم وكمل طريقه...
🍃في رجالة هكي..قبل مايديروش فأهميه لتفاصيل المراة...بس بعد يتزوجوا ينفتحوا عيونهم ع هلبه حاجات..ويبدوا يميلوا لأمور قبل مش مدورينها...لهدا نلقوا هلبه قصص خيانه داروها الرجاله بعد تزوجوا فالوقت اللي كانوا فيه قبل الزواج ع صراط مستقيم...
ولعل مالك هني لاحظ فإسراء نضج انثوي من جميع النواحي داخليا وظاهريا..مقارنة بنور ذات الملامح الطفوليه الطبيعيه جدا..واللي قاعده تبان وكأنها بنت 15سنه برغم ان انثوتها عاليه لكن ماكانتش تبرز فيها زي ماقاعده ادير اسراء توا🍃
🌴🌴🌴🌴
فالدار تحدد فالسورية وهي تذكر فاللي صار...
مرة تغمض فعيونها بشده من الإحراج وتقول
"عطيني جدري"
ومرة تعض ع شاربها وتقول..
"واااك ياربي"..
ومرة يخطروا عليها المواقف اللي جمعتها بضو كلها..
كلها كانت مواقف محرجه معاه وفيها منها يخلوها تحس اتجاهه بالإمتنان...
اكتشفت قداش ضو انسان راقي جدا وراجل بكل معنى الكلمه فكل مواقفه معاها..
لدرجة مرة كان ممكن يفقد روحه بش يحميها ويحمي شرفها...
ابتسمت وهي تشوف للسوريه اللي تحدد فيها...
⚡فلاش باك..
سنة 2011...شهر فبراير...
فالطريق من سرت لطرابلس..
مقعمزة تشوفله بحزن...
وهو يسوق وملامح الهم ع وجهه ممزوجه بالغضب..
شبحلها..
تصنعت ابتسامه وهي تشوفله..
هو ابتسم وشبح القدام..
قرب يده للمسجل فتحه...
وبدت المقدمه الموسيقية لأغنيه محمد حسن..
هي ابتسمت واتكت ع الكرسي...
وهو شبحلها ابتسم وخدي يدها وشدها..
هي زادت شدت ع يده....
بدت الأغنيه...
وهما يغنوا معاه...
انت وبس حبيبي الوفي..حبيبي الوفي..حبيبي الوفي..
انت وبس..الغالي علي..الغالي علي..الغالي علي..
سكتت هي وخلاته هو يكمل لأن اسلوبه فالغني حلو وصوته مع لكنته البدويه زايدين الاغنيه حلاوة..
انت وبس نورك ونس..
نورك ونس فليلي...
ومرساي ودليلي..
انت الشوق والود نقي...
شبحلها وهو يغني..
انت فوووق...فوق كل شي..
هي غنت..
انت فوووق..فوق كل شي..
ابتسم وشبح القدام..
وكملوا الزوز غني..
⚡الوقت الحاضر..
مسحت دموعها اللي نزلوا..
وقعدت تحدد فالسوريه لين كملت..
فكت مقبس المكوى وحطاته فتركينه...
بعدين فتحت باب الدار وطلعت..
قعدت ادور فمرام ع خشة مرام من باب المروحه..
دلال ابتسمت وقالت:حددتها فالدار..
ابتسمت مرام وهزت راسها بإيجاب ومشت للدار..
اما دلال مشت توجهت للكوجينه..
بعد ماخشت مرام للدار...
شويه وطلعت وهي شاده السوريه..
طلعت من الحوش وصلت فالمربوعه..
طقت الباب..
شويه وانفتح..
خدي منها هانيبال السوريه وهو يقول:جيبي مية..
مرام:حاضر..
لفت ومشت ولت للحوش..
وهانيبال صكر باب المربوعه..
🍁🍁🍁🍁
الساعه 4:40 قبل العصر..
خش مالك لحوشه..
كان هادي بالمرة وكأن مافيه حد..
قلبه انقبض..
بدي ينادي:نوور...نوااارتي...نوااارة..
هي طلعت من دار المعيشه وجاته تمشي بسرعه وتقول بخوف:خيرك مالك شن في..
جاها طول وخداها فحضنه بقوة وهو يقول:خيره الحوش هكي هادي!!قبل صوت التلفزيون نسمعه من برا..
نور بضحكه:نورهان رقدت وهي تتفرج صكرته ولهيت بالنت..
بعدها شويه وقعد شادها وهو يقول:خفت عليك نحساب صارتلك حاجه!
نور :هههههه..لالا مافيا شي حتى اليوم هدرزنا اني وأنيس فموضوع وخديت رأيه فيه...
ابتسم وقال:ايااه هدا مازال ماجاش وبديتي تاخدي فرايه وتفوتي فيا..
نور ضيقت عيونها وقرصاته من خدوده وهي تقول:من يقدر يفوتك انت ياعسول ياقنين..
ضحك وقرب باسها بعدين بعد وقال:باهي قوليلي شنهو؟
نور:تبي تتغدا..
هو تغدا برا مع اسراء..لهدا وين سألاته السؤال هدا وجهه تغير..عقد حواجبه وقال؛لا قلبي واكل برا..
نور:صحتين..باهي خلاص نخلوه عشي..
تنهد وقال وهو هارب بعيونه عنها:الليلة معزوم حبيبتي اني..
نور :اممم..خلاص نرفع اللي درته لحوش عمتي وبالمرة نشوف رزان روحوا اليوم من السفر..
مالك:ايه عارف...احمم..خل بنمشي نغير قلبي..
نور بضحكه:نجي معاك..
ضحك وقال:تعالي...
ومشوا مع بعضهم لدارهم...
🍁🍁🍁🍁
فدارها..
تسمع فاغنية لنانسي عجرم"ماتجي هنا وانا احبك"..
وترقص وهي هايمه وطايرة من فرحتها..
اللي بدت تقربله هلبه وهو يقربلها...
فرق كبير بين قبل وتوا فتعامله معاها...
حاسه انها لو طبقت خطة عمتها بحذافيرها حتوصل للي تبيه وتاخده..
انفتح الباب وخشت عمتها وهي تضحك..
صكرت الباب وبدت ترقص وتغني معاها..
والزوز قلبوها رقيص مع بعض...
لين تمت الأغنيه..
بعد تمت وقفوا يشبحوا لبعض وضحكوا..
ضربت اميمه بنت خوها ع ذراعها وقالت:شن صاير معاك..
اسراء حضنتها وقالت بهيام:اااه ياعمتو اااه قداش يهبل ويجنن..بعدت وشبحتلها وهي تقول..مش حيطول هلبه عمتو حيطيح رسمي..
اميمه بضحكه وملامح شفقه مصطنعه ع وجهها:تبي الحق وجعتني اللي واخدها..نهاري ماصكرتش معاه سنه وطول شاف لغيرها..هدا غير يحبها وقصة حب ومش عارفه شني..!
اسراء:عمتو اني اللي نعرف مالك اكتر منها مرته هادي راجل طموح وديما يحب الحاجه الباهيه ليه هو وبس..وبنت خالته هادي واخدها عناد فيها بعد ماسيباته ع خاطري..مايتسيبش هو يسيب بس..
اميمه:خافي منه هدا سرورة..
اسراء بإبتسامه ثقه:تس اني بالذات مانخافش منه كل شي يبيه معاي اني حيحافظ عليا اكثر من عيونه..
اميمه:اممم..باهي...المهم توا خليك ماشيه ع قتلك عليه..
اسراء بضحكه:اني ماشيه ع كلامك انتي ياسويتي هدا علاش اني فرحانه توا.
ضحكت عمتها وهي تقرص فخدودها وتقول:ياوخيتي سلمها..
واسراء تضحك بعدين قالت:ايه حقه عزمه بابا الليله ع العشي..
اميمه:اللللعب..
اسراء:ههههههههه
🍁🍁🍁🍁
تغسل فماعين الغدي فالكوجينه لأنهم تغدوا متأخر..
وهو مقعمز حداها ويهدرزوا..
عماد:يعني متأكده تقدري مع وضعك هدا؟
رزان وهي تمصمص فالصفره:ايه نقدر حبيبي..
عماد خبط بيده ع فخده خبطه خفيفه وقال:تمام..اني سجلتك فالكليه وامورك كلها منظمه غادي..بنديرلك سواقه ترفعك وتجيبك..
رزان التفتت وجاته وهي تقول:نحبك نحبك نحبك نحبك نحبك نحبك نحبك..
وصلت فيه وحضناته وهي مازال تقول..نحبك نحبك نحبك نحبك..ونحبك اكثر واكثر لو رفعتني للسوق طلقت كرعيا..
عماد:ههههههههههههههه..يابازوزة ليك شهر وانتي تطلقي فكرعيك ماخلينا تركينة مادورنا فيها..
رزان:خاطري ندهور هنى حتى كان ماشريتش..
عماد بضحكه:وحم هدا ولاشنو؟..
رزان حركت عيونها حركة دائريه وقال:امم..ايه وحم..
عماد :هههههه....عادي خل يطلع فالولد..
قرصاته من رقبته بغيظ ..
عماد وهو يضحك ويتوجع:اححح..ياسم...
🌴🌴🌴🌴🌴
شن خطر عليك!!؟
بلقيس وهي تلبس فبنتها:خاطري نكمل قرايتي محمد..
محمد وهو ينشف فشعره بالفوطه:فوتيه الموضوع هدى صكريه ومعاد تفتحيه..
بلقيس بضيق:محمد مازالي عامين بس..
حول الفوطه من ع راسه وقال:حوشك اولى بيك..
بلقيس:نقدر نوفق محمد صدقني والبنات يساعدني..
التفت وشبحلها وهو يقول:اني قلت لا..مافيش..صكري ع هالسيرة وانهيها وماتقعدي تشوفي لغيرك وتماري...
التفت القدام وهو يقول:ليك عام ناسيتيها تو خطرت عليك.
ومشي طلع من الدار..
وخلاها تكمل فتلبيس بنتها وهي مضايقه ع الآخر والدموع معبيات عيونها..
🍁🍁🍁🍁
مقعمز وفيده صونية دلاع ياكل فيه بالشوكه..
ويسمع فيها وهي تلبس فوشاحها وتهدرز:مازال تلاته سنين..
توفيق:اممم كويس..
التفتت وقالت :باهي اني ماشيه توفيق بنوصيك..خاطري بنموت فالفستق..
توفيق بضحكه:افتحي القجر حداك..
توسعوا عيونها بعدين التفتت للقجر فتحاته لقت حكة كبيرة معبية فستق...
ضحكت وقالت:يااااه..
طلعت الحكه وفتحتها وبدت تاخد تكسر وتاكل ونست المشيه ومايجي منها..
وتوفيق ياكل فالدلاع ويشوفلها ويضحك..
☘☘☘☘
التموا فحوش رمضان..
الكناين مع حميده وغاليه ودلال...
وهدرزتهم كلها ع مشكله صايرة عندهم فالقبيله ع ورث..
واليوم ماشيين اعضاء من المجلس ومعاهم الحاج عبوده وولده ضو ..يحاولوا يحلوها ويلين الطرف اللي رافض الصلح فكل المحاولات السابقه..
سعيده:الحاج فتح الله واعر راسه كاسح
مرام:واعر وكاسح فالظلم..حرام عليه يحرم ضراري خوه من حقهم
غاليه:هو دايرها قبل وحارم خواته من حقهن فورث سيدهم..
حميده:المشكله انه مايفوت وقت صلاة الا ويصليها فالجامع..
سعيده بضحكه:حاج تلات مرات..
مرام:كله رياء قدام الناس اللهم عافينا..
دلال:باهي واحد زي هدا كيف يقدروا يقنعوه؟!
حميده:بيحاول فيه الشيخ عبوده وولده..وضو عنده قدرة اقناع..
اريج بضحكه:واني نشهدله انقدنا هديكا الليله..
كلهم:هههههههههه..
مرام ابتسمت..
ودلال خطر عليها الموقف نزلت عيونها لفنجان النسكافيه بإحراج..
وفي من معاهم فنفس المكان ومش معاهم..
بلقيس اللي كانت مضايقه من رفض محمد تكمل قرايتها...
وفي اللي ملتزم الصمت ويسمع بس..
زي لمياء لأنها مستثقله بعض الموجودات ..
وكانت تبتسم مجامله من فوق نفسها...
🍃طبع فيها ومستحيل يتحول حبها للإستحواذ ع اهتمام اللي حواليها وانها تكون هي الكل فالكل...
وتوا قاعده تشوف فغيرها واخد هالإهتمام..
مرام🍃
🍁🍁🍁🍁
الساعه 9:30ليلا..
في مربوعة فيلا عبدالمعز بن حامد..
كانوا موجودين ضيوف من اكابر القوم زي مايقولوا فمجالات مختلفه...
ومالك موجود معاهم وكان حاس بحماس كبير وهو يتعرف ع فلان الفلاني المسؤول فوزارة الصحه
وعلان العلاني اللي يخدم فالسفارة الليبيه لإحدى الدول الغربيه..
ودكاترة كبار غالبهم جاي طبيب زائر لبلاده وهما خارجها اصحاب مراكز مرموقه فمجالهم...
عالم..عالم تاني..
عالم فيه تولي احلام مالك حقيقه...
مالك توا يشوف فيها قدامه كلها وكأنها حقيقه واقعه لامحاله..
🍁🍁🍁🍁
ومن هما هادوما اللي عدتلهم..
نور وهي تاكل فالمكسرات:اممم..ناس تعرفهم زمان جيرانهم لما كانت تسكن فوق حوش شيابينها..
رزان هزت راسها وخدت حبة لوز خزايني وكلتها..
نور:شن جوك انتي وعماد..
ابتسمت وقالت:تمام التمام الحمد لله..وانتي..
نور بإبتسامه:الحمدلله تمام...تنهدت براحه وقالت..الوحده لما تاخد راجل يحبها ويهتم بيها وهمه يخليها ديما مرتاحه ويوقف معاها ويحميها حتى من نفسه..مستعده تتحمل ع خاطره كل شي..
رزان بإبتسامه:صح..لأنه يستاهل..
نور وهي مبتسمه:هو هدا..لأنه يستاهل..
فجأة رنوا تليفوناتهم بنغمة رسالة واتساب..
الزوز مع بعض قالوا بلهفه:الحلقه!..
كل وحده قامت تليفونها وفتحت الرساله وبدت تقرا..
مش هما بس..
🌴حتى دلال..وغاليه..وحميده...
وفحوش ميلاد
فالدور التاني...أريج..
وفحوش عبدالله...
البارقه..
اللي كان يشوفلها حسن كيف منسجمه وتعابير وجهها تتغير كل مرة لحالة..
حسن:غير امتى اتم بس...
البارقه ولا عبراته من كثر مامنسجمه..
ضحك وحرك راسه ايمين ويسار ورجع يتفرج ع التلفزيون..
🍁🍁🍁🍁
ووااك منها آية هادي تمرض..
قطع عليها اتصال خطيبها..
رانيا:وااك منك يارمزي حتى انت..راجاته لين فصل وكملت قرايه...
🍁🍁🍁🍁
ياروحي ع آيه مسكينه ياطياح سعدها وخلاص..
شبحتلها امها وقالت:من آيه هادي؟!
رفقه :اللي فالروايه ياماما..
لطيفه:اها قصدك نزلتها حدهم!!كملي واحكيلي..
رفقه ضحكت بعدين قالت:باهي..
🌴🌴🌴🌴
تفيه عليك ياسراج الكلب..
كان يلعب فبنته قام عيونها وشبحلها بتفنيصه:من سراج هدى؟!
ضحكت رباب وقالت:اللي فالروايه..
مؤنس مط شواربه للأسفل وحرك راسه ايمين ويسار بعدين قال:ربي يهديكن ويشفيكن..
رباب:هههههههه...
💕مقابل هالحوش...
كان ع دروج حوش تاني..
مقعمز ويتصل ويعاود وهو يضحك ويقول :لين نحرمك قرايتها ياعنز...
"رمزي"
رمزي بصوت مفخم عالي:نعم ياسيدي..
"تعال دخل معاي المولد"..
رمزي:هي هي...حظك يافرخه رانيا..
ناض وركب ومشي وين مافي المولد..
🍁فالحوش اللي فجنبهم..
حميده:ماعندي صبر خاطري نقراها كلها..
غاليه:عطينا وعد لحدهم راهي محلفتنا..
حميده بتذمر:تس اففف اني شن خلاني نتبعكن ونقراها ماهو قعدت شايفتها حاجات تافهه وريحت راسي..
دلال:بس تعرفوا..حاسه اختها نجاح حتطلع فحياتهم لكن كيف الله اعلم..
حميده:عطها بطاح هالحقيرة هربت وسودت عيشتهن..
غاليه بحزن:امهن واجعتني واجد مسكينه..
دلال:ايه تصخف..
حميده بضحكه:بمن ذكرتكن مرت خوهن؟
غاليه ودلال قعدوا يضحكوا..
حميده :الحمد لله ربي هداها اللي عندنا...
🍁🍁🍁🍁
رزان:مسكينه تلاقت عليها من جميع النواحي..
نور:ماحبيتش ضعفها الحق..كيف سلمت فراجلها هكي وهي تعرف انه يحبها...
رزان:سلمت فيه بش تريح راسها من المشاكل...مش شوي اللي تشوف فيه..
نور:اديريها انتي رزونه؟..
رزان شبحتلها وقالت:مستحيل..لو مهما شفت..
نور وهي تشبح فالفراغ:ولاأني...
رزان ضحكت بعدين قالت:واجعتني بلقيس ماتقدر تقراها لين يصبح الصبح..
نور بضحكه:ربي يصبرها ع اللي عندها..
رزان:ايه والله...
🍁ايه والله ربي يصبرها..
راجل صعب جدا طباعه صعبه..وهي مش عارفه كيف تتعامل معاه بش تلينه وتعرف كيف تقنعه بأي شي هي خاطرها اديره..للأسف محمد شوره من راسه والقرار ديما ياخد فيه بروحه حتى اللي يخصها هي..
ورقدت بلقيس ليلتها وهي واخده منه موقف...
وهو ماأهتمش نهائي..المهم تعرف ان كلمته هو اللي تمشي ولايمكن يغيرها لو شنو مادير هي..
🍁وفي من رقدت ليلها وهي غافله..
عاطيه بظهرها لأكثر شخص واثقه فيه ومأمنتله ومنسنده عليه..
ومش خاطر فبالها حتى الخطور ان اللي سانده ظهرها بيه حتجيها منه طعنه..
ماتقتلش..لكن ادير جرح ألمه يخلي صاحبه يتمنى الموت..
نور...
اللي كان مالك فجنبها مقعمز ع السرير ويراسل فإسراء وهو منسجم معاها ع الآخر...
🍁وفي من رقد وهو مش عارف..
ان الأيام الجايه جايبه معاها مصيبة الصبر معاها صعب صعب هلبه...
حدهم...🍃
🍁🍁🍁🍁
ربي يهديك ياراويه تعب عليك راهو ماتقدريش..
راويه بدموع:خيرك ياشرف ماتبيش تفهمني اني جايه هني ع خاطر يوم عرفه..نبي ننظف..نبي نسيبها واني نظيفه..
نبي نرقد فقبري واني مرتاحه..
شرف بألم؛نسألك بالله ياراويه معاش تقولي هكي..تفائلي بالله عليك تفائلي..بعد نتموا حجنا تبدي علاجك وترجعي خير من قبل بمية مرة..قولي يارب اشفيني..ومعاش تستعجلي السو تربحي..
تنهدت راويه بحرقه ودموعها ينزلوا..
وقالت من قلب موجوع....
"يارب"..
🍃🍃🍃🍃
وجي تاني يوم..
يوم عرفه...
اليوم الأعظم....
فهاليوم...
صيام...قيام...دعاء...
الدعاء...الدعاء...
اعظم عباده فهاليوم الدعاء..
والكل انشغل بيه..
حتى وهما يعدوا في مائده الإفطار...
يكبروا ويهللوا...ويدعوا...
وكل حد باللي فخاطره دعي....
ويمكن اكثر من اجتهد فالدعاء هاليوم...
لمياء...رزان...حميده...
🌴🌴🌴🌴
اهل سرت..
كانوا واصلين من الصبح...
ودلال طول مشت مع خالها عمر بصغارها غادي بش تقضي يوم عرفه واول يوم العيد معاهم...
وتجي معاهم تاني يوم لحوش جدها..
كانت متأمله اول ماتوصل تلقى اصيل...
لكن اصيل كان يومها معزوم عند صديق مقرب فوحده من مدن الغرب الليبي ع الفطور وهو نزل ضيف عنده...
🍁🍁🍁🍁
بعد المغرب...
فطروا نور ورزان فحوش عمتهم..
اللي كانت جدا هاديه..ماتتعاملش معاهم إلا بحدود...
ونورهان كانت شاده روحها قدام خوها الكبيروبوها خايفه منهم لأن اسلوب تعاملهم معاها تغير بسببها هي وتصرفاتها..
وامها كانت مش راضيه...بس اضطرت تسكت وتفوت...
لكن ولادها كانوا مضايقين من طريقة تعاملها معاهم...
تعامل فيهم زي ماتعامل فنساوينهم...
عماد عارف خيرها...
لكن مالك لا...
🍁🍁🍁🍁
والله العظيم ماغلطت فيها ولارت مني شي وجعها اقسم بالله..
مالك بحده:باهي علاش تتعامل معانا هكي؟!فهميني..
نور بضيق :مانعرفش والله مانعرف..
مالك فكر شويه وهو يشوفلها بعدين قال:هي ماكانتش معاي اني وياك هكي الاالفترة الأخيره واني فاهم علاش..اسمعيني جاي..خلطتك برزان معاش نبيها..
نور بصدمه:شن دخلها رزان!؟
مالك:امي مش راضيه عنها الله اعلم شن شايفه منها امي اني ماتكرهش حد هكي من بلاش..
نور:ماتظلمش مالك..
مالك ضيق عيونه وقال:شن قصدك!!؟الغلط فأمي!!
سكتت نور وغيرت عيونها عنه وهي مضايقه هلبه..
مالك:لالالا...فوتيها بالمرة رزان هادي اللي شكلها بتقلبلك عقلك انتي طيبه هلبه وفيسع ينضحك عليك ورزان هادي مش ساهله بكل..كان نلقى حتى رفقه تقطعيها بالمرة..
نور برفعة حواجب:شن دخل رفقه توا؟
مالك بشي من الربكه:الزوز زي بعضهم يخربوا طباعك يانور..
نور وهي مازال رافعه حواجبها:شن تشوف فيا قدامك بيبي؟!
مالك غمض عيونه بنفاد صبر وفتحهم وهو يقول:فاهمه عليا انتي ماتكتريش دوة..
نزلت عيونها وهي مازال رافعه حواجبها هزت راسها وقال:تمام..شبحتله..مش حنكثر دوة...لكن بنقولك حاجه وحده بس..فكرتك عني هادي غيرها..لاني غبيه ولاساذجه ولابدون اراده وانت تعرفني كويس يامالك كويس هلبه...
خالتي ع عيني وراسي..ولأنك زوجي اني حنسمع كلامك تجنبا للمشاكل وبس...تصبح ع خير..
ولفت ومشت طول للدار..
ومالك معاها بعيونه..
كلامها الأخير وتره هلبه لدرجة انه بعد مامشت طلع تليفونه من جيبه صكره ومشي لدار المعيشه..
تمدد فيها....
ولحظات...وجاه النوم...ورقد..
🍁🍁🍁🍁
علقت لبسه العربي بعد حدداته...
بعدين مشتله..
كعادته فاتحلها حضنه ويراجي فيها..
خشت فيه وهو ضمها بقوة وقال:قداش ليا نراجي فالعيد الكبير بالذات..تكوني حداي فيه فكل شي نديره تعاونيني ونعاونك..ونشوي ونوكلك...
وناكل من..رفع يدها وباسها وقال..ايديك العصبان..
رزان:ايه حقه عمتي قالت غدوة العصبان عشي..
عماد:علاش!!؟مش درتوه اليوم غدوة اديره غدي طول..
رزان:قالت لا نبي ندير بازين..
عماد:غريبه ولامرة درناه غدي اول يوم العيد..
رزان:قالت خاطرها فيه..
عماد:كان امي خاطرها فيه خلاص...وانتي سموحي فشن خاطرك..
رزان:نرقد بس...تعبانه واجد..
زاد ضمها وقال:ارقدي ياقلبي ارقدي نوم العوافي..
ابتسمت براحه وغمضت عيونها...
🌴🌴🌴🌴
فدارها..
تتكلم مكالمة فيديو..
حدهم :عجبوك؟..
ايمن:ماشاء الله..طلعتي تعرفي اطيبي..
حدهم:مال شنو يابابا تحسابني بايرة..
ايمن بضحكه:يامعتوهه حسني اسلوبك..
حدهم برفعة حواجب:ريت اللي يكلم فيا ع الأسلوب وهو ماينادي فيا كان يامعتوهه!
ايمن:ههههههههه..
حدهم ضحكت وهي عاقدة حواجبها..
هدا ضحك بعدين قال:كلمتي عمتي راويه اليوم..
حدهم تلاشت ضحكتها وقالت:اتصلت بيها هلبه ماحصلتهاش..
ايمن:اكيد تعبت ورقدت اليوم تعب راهو..
حدهم بقلق:ايه صح..
ايمن:نعطيك تكلمي عزوزك..
حدهم بضحكه؛امك ماتنطبقش عليها كلمة عزوزك تبارك الرحمن ماتنعطاش عمرها بكل..
ايمن ابتسم وقالت:حتى هي هندا **** أمي..
حدهم وهي رافعه حاجبها اليسار:خف علينا ياطاووس..
ايمن:ههههههههه
🍁🍁🍁🍁
طق باب الحوش ونادى..
"سعيده"..
سعيده فتحت باب دارها وطلعت..
مشت طول لباب الحوش الخلفي..
بان عليها خوها حسن
وصلت فالباب وقالت:خيرك قاعد برا خش!
حسن بضيق ممزوج بالحزن:راويه تاعبه واجد ياسعيده..
سعيده عيونها تعبوا دموع وهي تشوفله وقلبها وجعها ع الآخر..
حسن:تو واني مروح من السوق اتصل بيا راجلها وقالي تعبت اليوم بعد تمت الوقفه..طلعها من السعوديه بالإسعاف الطاير بيرفعها لألمانيا..
طاحوا الدموع من عيونها وهي تقول:قالتها..تقول كانت عارفتها..
حسن مسح بيده ع وجهه وتنهد بألم وقال:كيف بنخبر بنتي كيف لوصارت حاجه..كيف بنقوللها امك كانت مريضة سرطان وماتت منه كيف!؟..
"شنوووو"..
التفت حسن طول..وسعيده شبحت اللي كانت واقفه وراه بمسافه..
قدمتلهم وهي تمشي بسرعه وصلت فيهم ودموعها ينزلوا قالت:شنو قت توا..سرطان!!؟
سعيده:تعالوا خشوا داخل خشوا..
البارقه بدموع:فهموني يانهاري كيف والبنيه ماتعلمش بأمها!؟كيف هكي!؟
حسن بضيق شديد:خشي يابارقه بالله عليك خشي..
بلعت ريقها وهي مصدومه لأبعد حد..
خشت..وخش حسن وراها...
وسعيده صكرت الباب...
🍁🍁🍁🍁
طلعت من دارها بعد مانهت مكالمتها مع راجلها..
وصلت فالصاله خشت لقت حناها متكيه فيها..
حدود:حنينه..
حدهم ؛اممم..
حدود: البارقه روحت لجناحها؟
حدهم:لاقات بتعدي لحوش عمتك انظر شن بتاخد منها بديره للحم مش عارفه شن هو..
ضحكت حدود وقالت:تتبيلة عمتي متاع الشوا..
حدهم:ايوااه..هي هدي..
حدود بضحكه:باهي اني بندير فطيرة من توا..
حدهم:لما اطيب احسبيني فطرفين تو..
حدود بإبتسامه:حاضر..
ومشت طول للكوجينه..
🍁🍁🍁🍁
ياااربي!
قالت هالكلمه بألم وهي غامه وجهها بإيديها..
حسن:ماتبي حدهم تعلم ياالبارقه ماتبيها تعلم لين تتعالج..
حولت البارقه ايديها من ع وجهها ودموعها ينهمروا انهمار وهي تقول:كيف ماتبيها تعلم كيف!؟
سعيده:حدهم ماتتحمل شي فأمها شي يابارقه لو عرفت لاقدر الله تصير فيها حاجه..
البارقه:باهي لاقدر الله..لو صارت حاجه..مش بتعلم بعدين..بتعلم انها كانت مريضه وماحد قاللها..بتعلم انكم حرمتوها تكون مع امها فأصعب حالاتها..
حسن بألم:امها محلفتنا يالبارقه محلفتنا..
سعيده ودموعها ينزلوا:بارقه تربحي ياوخيتي خلينا نعدوا هالعيد ع خير..تو هي عدوا بيها لبلاد اخرى بيش تتعالج وان شاء الله ربك يشبح فيها وتنوض لبنيتها مافيها شي..
حسن:حدود راس بنيه عندي..تصير فيها حاجه يابارقه مانعرف شن يترالي بعدين..تربحي اسكتي بالله عليك..
وزعت نظرها عليهم وهي تشوفلهم بوجع وصدمه...
بعدين قالت بصوت يدوب طالع:باهي..باهي...
☘☘☘☘
وروحت البارقه بعد مااخفت كل مظاهر الحزن..
وهي خاشه شافت عزوزتها راقده فالصاله..
وخشت انفها ريحة تطييب الفطيره..
تبعتها لين وصلت للكوجينه...
لقت حدهم واقفه ع الرخامه وتفتح فالفطيرة وهي تغني:
سامحتك من كل قلبي يامحبوبي سامحتك..
دموعها عبوا عيونها ...
هربت عنها طول ومشت لجناحها بش تبكي براحتها..
حدهم وهي تحط فالفطيرة فطاجين القلي:
تنسى العشرة وتنسى الماضي ....
الله محلاها تهبل كيف طلعت معاي المره هادي..ااخ لوفيها كيف نوصلها لماما اذوقها وتعرف قداش بنتها ولت فالحه فكل شي..وحتى ايموني حبيبي مستحيل تخليها فخاطره تو ندسله منها..💕🍃
🍁🍁🍁🍁
طالعة من المستشفى وهي تتكلم بالتليفون..
خنساء:وكانا عمتو نخدموا فكل وقت حني..حني لو خدينا عطله هلبه ناس تنضر ومرات يفقدواارواحهم.................ماعليناش فيهم هادم.....علينا فخدمتنا وبس.........ايه مروحه توا.......باهي...باي..
صكرت وهي تقول...الناس ميته بينا ولابلانا!!عليك عقلية مش عارفه بشن نوصفها..خسارة التعليم العالي اللي متعلماته برا...
وكملت طريقها وهي متوجهه للمكان المدرسه فيه سيارتها..
وعضو الأمن اللي تحت تأثير مخدر ما ماشي وراها وهو يقول:ماتجيش بالباهي انتي..تجي بالقوة بس...
فنفس الوقت..
حمزة اللي كان يراقب فيها لاحظ واحد ماشي وراها هي تحديدا ومنظره مش مريح..
خاف عليها هلبه وفتح الباب ونزل وفيده حاجه..
☘هي..
وصلت لسيارتها..
المكان اللي كانت فيه فالليل شبه فاضي وشبه مظلم..
لكن هي متعودة عليه وولامرة صارتلها حاجه ولاتعرضت لشي فيه الا هالمرة...
لما جت بتفتح الباب..
فجأة..
لصقت فالباب وحست بجسم ثقيل ضاغط عليها ومانعها من الحركه..
كيف جت بتعيط..
فمها انغم...
وسمعت صوت منبعثه من فم صاحبه رائحه كريهه وهو يقوللها:انتي تبي هكي...يادكتورة...اااخ $%%£ محلاك ومحلا شعرك وريحتك..
والخنساء اللي كانت حاسه بالموت جتها..
قعدت تعيط لكن صوتها مكتوم...
قامت يدها وقعدت تخبط ع السياره..
هو شد يدها ونزلها لوطا وهو يقول:ديري ماديري منه ماتقدري تهربي خلاااااااص...
الخنساء حاولت تقاوم بس ماقدرتش كان ضاغط عليها بجسمه كله وشادها كويس..
وهي تحاول تعيط ودموعها ينزلوا...
هو قال:بتمشي معاي ياحبي بتمشي معاي نهربوا بعييييد..بعيييد هلبه..فتركينه مايقدر حد يوصلنا فيها..
الخنساء بدت تبكي بالصوت...
قلبها خلاص بيوقف من حالة الرعب اللي كانت عايشه فيها..
هو كيف جاي بيطبها ويرفعها...
ماحسش الا وحاجه انهبدت ع راسه وتكسرت...
طلقها طول وحط ايديه ع راسه وهو يتوجع...
هي فلتت منه وكيف جايه بتهرب..
انصدمت لما شافت حمزة..
حمزة بعصبيه:شن واقفه تشبحيلي هكي!! تحركي امشييي..
هي انفزعت..
ومشت تجري...ومازالت مذعورة..
لكن بعدين وقفت والتفتت..
لقت حمزة واقف يسب فيه..
وهو مازال يدور فمكانه وشاد راسه ويتألم..
حمزة بغضب: يا ولد الحرام..يانجس...تفوووو...
ولف بيمشي..
وهداكا استغل الفرصه وجاه وشده وهو يقول:تو نوريك ولد الحرام شن يدير يا*^&££..
عيطت وهي تقول:حمزاااااا...
لوحت اللي فيدها...
ولفت ومشت تجري بأقصى سرعه..
حمزة غمض عيونه بشده بعدين فتحهم وبكل قوة فتح ايديه ودفه عنه..
ولأنه مازال دايخ من الخبطه والسم اللي واخده ماقدرش يشده كويس...
لكن ...
حط يده ورا ظهره وطلع سلاحه...
وكيف جاي بيصوب ع حمزة..
تنطر من يده السلاح بعد انصابت يده بخدش برصاصه...
حمزة التفت شاف جماعه الأمن جايين مع خنساء يجروا...
هداكا لما شافهم خاف وجاي بيهرب..
واحد منهم قال:اوقف مكانك ولانجيبها فراسك..
هو مااهتمش جاي بيهرب ..برغم انه بيموت من الألم وينزف...
التفتله حمزة و مشاله يجري لحق عليه..
شده وجبده...
وحطه ع كوفني السياره وهو متبته كويس..
هو قال:تو نوريك...تو تشوف...بالله ماهي فايته..
حمزة زاد ضغط ع يده المنصابه وهو توجع هلبه..
عيط بصوت عالي....
ع جية جماعه الأمن..
واحد منهم قاله:مصيرك اسود اليوم من ******..
بعد عنه حمزة وهما شدوه..
ومشوا بيه طول لوحده من سيارتهم بيرفعوه للمقر...
لما جوا خاطمين من حدا حمزة شبحله بنظرة تخوف كلها تهديد ووعيد...
وحمزة قعد يشوفله بإزدراء...
فاتوا من قدامه وين جو خاطمين من قدام الخنساء قالت بغضب وانفعال:تفووو عليك يامسخ ياقذر تو تشوف شن ندير فيك ياحيوان...
هو رد عليها بلفظ نابي خلا زميله اللي شاده يضربه ع فمه...
الخنساء بغضب وعيونها غارقات بالدموع:ان شاء الله يحرقوك حرق...
شويه وجي حمزة فايت من قدامها..
قال وهو ماشي:روحي الناس تتفرج عليك...
وكمل طريقه وهي تشوفله بنظرات حسرة وحزن...
وهي اتبع بعيونها فحمزة...
لمحت بوها جاي يجري ووراه جماعه..
لما وصل فيها قال بإنفعال:هادي خدمة الليل هدا اللي كنت خايف منه..
جبدها من يدها ومشي بيها..
واللي معاه مشوا وين مافي جماعة الامن بش يفهموا منهم اللي صار ..
☘حمزة
قعد مقعمز فسيارته وهو يراقب فالخنساء كيف ركبت مع بوها من الخلف..
بعدين تحركت سيارتهم ووراها سيارة تانيه...
هو تنهد بعدين شغل سيارته وتحرك..
....يتبع...
