#العشق_المتمرد "عندما يزهر الليمون"
#جمان_فريد
الجزء 132 القسم الثالث
⏳..
تشوف للممرضه وهي تسحبلها فالدم وابتسامتها طول الوقت ع وجهها..ابتسامه فرح..ومش اي فرح لدرجة ان الممرضه ركزت عليها وخلتها تسألها وهي مبتسمه..
الممرضه:شكلك بتاخدي اللي تحبيه؟
فاجئ السؤال رانيا..
لكن ردت ع الممرضه وهي تهز فراسها بإيجاب وتضحك..
الممرضه بإبتسامه:ربي يتمم ع خير ويهنيك..
رانيا بإبتسامه:تسلمي والفال ليك لو كنتي مش متزوجه..
الممرضه بضحكه:لا متزوجه وعندي بنيه تزوجت تقليدي لكن الحمد لله ربي رزقنا الحب
رانيا وهي تنوض من مكانها وشاده القطنه ع مكان ضربة الإبرة قالت بإبتسامه:ربي يديم عليكم الحب يارب..
الممرضه :اجمعين يارب..
خدت الممرضه عينة الدم وطلعت ورانيا طلعت وراها..
مشت وين مافي خوها...
وصلت فيه وقالت:خلاص..
حمزة ناض وقف وقال:تعالي..
مشي وهي مشت معاه...
☘كملوا باقي الإجراءات بعدين طلعوا..
حط حمزة رانيا فمكان خدمتها..وهو توكل لخدمته...
اول ماوصلت رانيا قعمزت ورا مكتبها وطلعت تليفونها واتصلت برمزي...
❤رمزي وقتها كان فالكورس ياخد فدرس لغة انجليزيه..
كان حاط تليفونه قدامه ودايره صامت
انتبه للإتصال شاف رقمها ابتسم
شبح للأستاذ
بعدين خدي هاتفه درقه تحت الطاوله...
صكر عليها وخش ع الرسايل وعين فالتليفون وعين فالأستاذ
كتبلها رساله وبعتها..
بعدين رد تليفونه لمكانه وانتبه مع الأستاذ
❤رانيا تلقت الرساله
وشافتها
(اني فالكورس بعد نطلع نكلمك ❤)
ابتسمت بتنهيده بعدين حطت تليفونها ع تركينه وفتحت لاب توبها وبدت بالخدمه
🍁🍁🍁🍁
مقعمزة في باحة كلية الهندسه..
كانت حاطه اللاب ع رجليها ولاهيه بيه تراجع فمشروعها اللي حتناقشه يوم التلاثاء...
وهو من بعيد كعادته يراقب فيها..
لكنه قرر يبطل مراقبه من بعيد يبي يبادر خلاص يبي يكسر حاجزالخوف من الرفض
الحب يبي شجاعه..بالذات الإعتراف بيه
والمراة غالبا تحب الراجل الجريء فالحب الشجاع فالمواقف متاعه...
وهي بالذات مراة مش أي حد يلفتها...
هي تحب الراجل الصاخب القوي اللي يكون واثق من نفسه فكل شي يديره..يرغم قلبها ارغام ع حبه...
خدي نفس..
ومشالها...
وصل فيها وقال:السلام عليكم..
ماانتبهتش...
هو استغرب ضحك وبراس سبابته خبط اللاب خبطه خفيفه..
هي انتبهت قامت راسها شافتله..
ابتسمت وهي تضغط ع زر ما وقالت:اهلا اسفه ماانتبهتش..
ضو بإبتسامه:ولا يهمك..احم..نقدر نقعمز..
دلال انحرجت منه وقالت مجامله:تفضل..
ابتسم ع جنب ومشي قعمز جنبها بمسافه وقال:كيف حالك وحال هلك..
دلال:الحمد لله كلهم بخير..انت كيف حالك وحال الاهل..
ضو بإبتسامه:الحمد كلهم بخير..
دلال:بالله نبي نسألك مازال العلوم مانزلوش النتيجه؟
ضو:بإذن الله اليوم مع العشيه..
دلال رفعت حواجبها وقالت:اها..باهي..
ضو:بتشوفي نتيجة بنت خالك؟
دلال بإبتسامه:ايه..
هز راسه بإيجاب وقال:ان شاء الله بالنجاح..
دلال:إن شاء الله..
سكتوا الزوز...
هي قعدت تشبح للاب وتقول فنفسها بتوتر"تس خلاص نوض"..
اما هو فقال لنفسه"كيف بنخش فالموضوع بس!!"..
دلال من التوتر كانت تبلع فريقها لين شرقت بيه..
وبدت تكح..
هو انخلع وقال:اسم الله اسم الله..
ودلال مازال تكح..
هو ناض وقال:لحظه بس..
ومشي بسرعه للكافتيريا..
هي جت بتكلمه لكن ماقدرتش شدتها الكحه..
حطت اللاب توب ع جنب..
وخدت شنطتها وطلعت منها شيشه ميه فتحتها وشربت منها..
بعدين صكرتها وحطتها جنبها...
ورجعت التفتت للاب ولهت بيه..
هو فهالوقت طلع من الكافتيريا وفيده شيشة ميه..
وهو ماشيلها لاحظها كيف ولت لهت بحاسبها المحمول..
ابتسم وقعد يتأمل فيها..
كيف تبان منقطعه عن الدنيا وهي لاهيه بيه..
منظرها جدا جذاب بالنسبه ليه..
هو هني فهاللحظه انبعث فيه شعور شجاعه وجرأة عمره ماحس بيهم قبل..
فهاللحظه قرر يعترف..لكن اختار طريقه مميزة تليق بيها
طريقه تأثر فيها...
وصل فيها وقعمز وين ماكان مقعمز..
خدي نفس...
وقال...
رأيت في عيناك سحر الهوى... مندفقا كالنور من نجمتين
فبت لاأقوى على دفعه..من رد عنه عارضا باليدين..
قامت عيونها فيه قعدت تشبحله..
هو يشوفلها بلهفه وقلبه قريب يطلع من صدره يراجي فكلمه تطلع من فمها ردا عليه...
هي ابتسمت بعدين قالت:اسفه كنت حاطه السماعات ماسمعتكش شن قلت...
هو غمض عيونه وابتسم بعدين ضحك..تدريجيا الضحكه زادت اكثر واكثر..
دلال تضحك بإحراج: بجد اسفه ماانتبهش...
وحولت سماعاتها وهي تقول بإحراج..شن قلت..
هو حب شكلها وهي خجوله ومنحرجه وبالذات ضحكتها..
ماحبش يعكر المنظر هدا..لذلك قاللها؛سألتك امتى مناقشتك غدوة؟
دلال بإبتسامه:اها..الساعه 12حتكون مفتوحه..تقدر تجي؟
فرحه هلبه سؤالها هدا ابتسم ابتسامه حلوة وقال:ايه نقدر بعون الله..
دلال وهي مازال محافظه ع ابتسامتها:نتشرف بحضورك..
ضو بإبتسامه:شكرا..ناض وقف وقال..نخليك تلهي بمشروعك..موفقه..
دلال:مشكور..
تنهد بعدين قال:السلام عليكم..ومشي..
ودلال قالت:وعليكم السلام..
زفرت بعدين فتحت عيونها ع وسعهم وصكرتهم ورجعت فتحتهم وكملت شغلها...
🍁🍁🍁🍁
كولي ماما.....
وكلت بنتها كسرة خبزة بالشاميه...
كلتها البنيه و ومشت ادور فالدار لين تكمل مضغها..
حناها قعدت تشبحلها وهي تقول:صار وصل مصراته.
رباب:ايه ومنها طول بيمشوا لسرت..
زينب تنهدت وقالت:اشبح توا يولولها ولايقعد خالي مصكر راسه ع القعاد فمصر..
رباب بضيق:نحس فيه مش حيتحمل اللي يشوفه لما يمشي غادي..
زينب:صح..هو سيبها بشكل وبعد قريب سبعه سنين يولي يشوفها بشكل تاني..وياريته غير يسر..
رباب:الله لايربح اللي وصلنا لهالحال..
زينب:ايه والله ياربي..
ولت إباء لأمها وهي تقول:مما ماما..
رباب خدت شوية شاميه بكسره خبزة تانيه ووكلتها..
وامها تتأمل ففارس اللي كان فحجرها وفاتح عيونه الحلوات الصغيرونات اللي مازال مش قادر يشوف بيهم بوضوح...
🍃🍃🍃
حليت عيوني فيها...
مدينته.. اللي حل عيونه فيها..
انولد فيها...كبر فيها...تربي فيها...عاش فيها...
اهله منها...وناسه فيها...
تزوج فيها...وجوه صغار فيها ومنها...رباهم وكبرهم فيها..
وولى جد مرات ومرات فيها هي...
مدينته..
اللي كانت بالنسبه ليه عوض عن الأم اللي انحرم منها..
وماخطرلاش يجيه يوم وينحرم منها حتى هي...
بعد غاب عنها مجبور سنين..
رجعلها توا مكسور ومقهور وحزين..
لما خشولها بالسيارة من احدى بواباتها...
استقبالاته البوابه نفسها وكأنها تقوله المكتوب باين من عنوانه...
كان متألم هلبه..
عيونه فالروشن ويتفرج ع حجم الخراب اللي خلفاته الحرب..
الخراب اللي خطف من هاللؤلؤة بريقها وخلاها وكأنها حجر جامد مافيشي اي مظهر من مظاهر الحياه..
الحياة اللي هو يعرفها بيها زمان..
مش الحياة اللي الناس توا عايشينها فيها وأهو عيشة والسلام..
ذاكرته كانت تجيبله فالصور القديمه..
لأن عقله أبى تصديق اللي يشوفوا فيه عيونه توا...
حفيده اللي كان يسوق عيونه عليه من مراية السيارة كان يشوفله بنظرات حزن..
حزن ع جده اللي كان حابس دموعه فمحجر العيون وهو يشوف بقهرة للبلاد كيف ولت...
مؤنس:جدي..
مختار:نعم..
مؤنس:شنو ياجدي..
التفت ايمن اللي كان مقعمز القدام جنب ولد عمته وقعد يشوف لجده..
مختار:نشم فنفس الصنه مازلت..صنة هواها وبحرها..قاعده كيف ماهي..
ابتسموا الزوز..
مختار:ارفعني لقبر ولد خالك..
تلاشت ابتسامة كل واحد فيهم..
بلع مؤنس ريقه وقال:حاضر...
🍃🍃🍃🍃
ماشيين الزوز فمقبرة خاصه بالشهداء من المدينه فالحرب..
وصلوا فقبر عبدالرزاق محمود مختار..
كان محفور الإسم ع حجر كبير مثبت عليه...
لما شافه الحاج مختار...
قلبه انفطر من الألم..
وقف جنبه وحط ايديه الزوز ع بعض وهو يشوفله بعيون مليانات دموع وحزن وحسرة..
قعدوا احفاده يشبحوله وقلوبهم من داخل خايفه عليه...
كانوا يراقب فيه بصمت..
وهو يشوف للقبر بصمت...
لحظات..
ونزلت الدموع من عيونه وبلت لحيته الكثيفه البيضاء..
بعدين قال جمله قطعت قلوب ايمن ومؤنس..
"اهو الحمد لله عنده قبر وين نستاحشوه نجوه..مش كيف اللي عدا وماخلالنا بيش انصبروا"..
بدون مقدمات..
انهاروا ايمن ومؤنس بالبكي...
مؤنس لين قعمز ع روس صوابع رجليه وهو حاط راحتي ايديه ع عيونه ويبكي بالصوت..
اما ايمن اللي كان بكاه بالعبره وهو حاط ايديه ع وجهه..
جاه جده وخداه فحضنه وهو يمسح ع شعره والدموع من عيونه ينزلوا...
عارف ان جروح ايمن المها مضاعف..
كبر يتيم..ولقي عمه عوضه عن غياب بوه وكان ليه هو وخوته اب حقيقي..
لكن زي ماانحرم من بوه الحقيقي فطفولته..
انحرم من بوه التاني فشبابه..
وزاده فقد خوه الصغير..
جروح قلب ايمن جروح عميقه صعب جدا تبرا صعب...
🍃وياكم في من مجروح زي ايمن واكثر🍃
🍁🍁🍁🍁
مقعمزات التلاته فغرفة مكتب..
واحد من حيوطها متعلق عليه اربعه صور كبار فالحجم...
من اليمين لليسار..
ع يمين..
صورة محمود....
فجنبها صورة عمار...
فجنبها صورة ولد مدينتهم ورمزهم "معمر القذافي"..
وفجنبها صورة عبدالرزاق...
امه كانوا عيونها ع صورة ولدها سرحانه فيها..
ماتسمعش فحماتها اللي كانت تهدرز وتقول..
امينه:قال خشينا سرت..
كامله:والله مانعرفهم المرة الجايه بنعدي يعني بنعدي..
ابتسمت امينه وقالت:حتى نا نبي نعدي..
ابتسمت كامله بعدين قالت:ايه اتصلتي ببنت عمتك اليوم؟
امينه:ايه بعد صكرت من مؤنس كلمتها هي طول..
كامله:بنعدولهم اليوم..
امينه:ان شاء الله..شبحت لهندا شويه بنظرة حزن نفس النظره اللي شافتلها بيها كامله..بعدين قالت:هندا..
هندا شبحتلها..
امينه:بتعدي معانا بعدين للزيارة..
هزت هندا راسها بإيجاب وقالت:ان شاء الله..
برا...
كان مختار خاش للفيلا بعد فتحتله الخدامه..
كان يتكلم بالتليفون مكالمه فيديو ويقول:والله حتى اني توحشتك وااااجد ياسمحه..
آسيا:امتى بتجو موخا..
مختار:وخيركم انتم ماتجونا ياسمحه؟!
جواد:جدي مش فاضي..
مختار:كان يسمحلي جدكم نجيبكم نا هنى..
اسيا:حني وماما..
مختار بضحكه:انتم وماما..
اسيا بحماس:ايه ايه حقه موخا نجحت الترتيب الأول..
مختار بإندهاش مصطنع:ماااشااء الله ع سمحه الشاطره آسو...
معمر:حتى اني نجحت تقدير ممتاز..
مختار عقد حواجبه وهو مبتسم قال:برواا يا الزعيم..
"مختار كان تكلم فعويله عمك تعال هنى"..
مختار بضحكه:خل نعدوا لجداكم وعمتكم بيش يكلموكم..
ومشي لغرفة المكتب ...
"حول غادي.."
"حولي انتي خير مانريشك"..
"هيه اهفت انت وياها"...
ضحك ع عراك آسيا ومعمر وتسكيت جواد ليهم الزوز..
وصل فغرفه المكتب وخش..
وجه الكاميرا لجداه وقال:اهي معاكم حناكم..
خدت منه الهاتف وقالت:عصافيري ياربي نجيهم..
جواد:شنو حالك حناي..
معمر:شنجو حناي..
اسيا:حنينه استاحشتك..
كامله بضحكه:واني استاحشتكم واجد ياروح حنينتكم انتم..
مختار حط ايديه فجيوبه وهو يشوف للدموع فعيون حناه..
وع وجهه ارتسمت ملامح الحده...
وفعقله يفكر فشي..
امه اللي كانت تشوفله هي الوحيده اللي عارفاته...
🌴🌴🌴🌴
الساعه 5:30عصرا..
مقعمزة فدار نومها كانت تمكيج فيها كنتها للعرس اللي بتمشيله..
هي توا تكلم في بنتها فالتليفون..
سعيده بفرح:مبروك ياماما الف مبروك ماينخاف عليك انتي شاطره من يوم يومك..
رزان بضحكه:الله يبارك فيا ماماتي..هي مالا نخليك تكملي مكياجك..
سعيده:باهي ماما ردي بالك ع روحك بالسلامه..
رزان بإبتسامه:حاضر..بالسلامه...
صكرت رزان بعد صكرت امها..
بعدين خدت الريموت وحطت ع القناة اللي تجيب فمسلسل الحب الأعمى..
فجأة..
سمعت باب الحوش انفتح غيرت القناه بسرعه وحطت ع قناة تانيه فيها مسلسل خليجي ودارت روحها منسجمة معاهم..
"فكرونه...رزونه"..
رزان بصوت عالي:فالصاله..فالصاله..
شويه وخش عليها وفيده كيسة هدايا..
وصل فيها وقعمز حداها وحاوطها وبدي يوزع فالقبل المجنونه..
وهي تضحك...
بعدين بعد شويه وهو شادها غنى يقول:
دلوع وشطور حبيبي دلوع وشطور..
دلوع وشطور حبيبي دلوع وشطور..
وسنفور وامور...وقعد يبوس فيها مرة تانيه..
رزان بضحكه؛خلاص باهي...خليني نشوف الهديه..
بعد عنها وهو يضحك ومدلها الكيسه..
خدتها وفتحتها ..
طلعت منها زوز باكوات واحد صغير مسطح والتاني اكبر منه مسطح..
فتحت الصغير لقت حديده اسم فضه منقوش عليها ..
"ميلاد"..
ابتسمت بفرح لما شافتها وقالت:تجنن...
هو قعد يتامل فردات فعلها وابتسامته ع وجهه...
هي قربت الحديده لبطنها وقالت:ريت بابا السمح قداش يحبك من قبل ماتجي وهو ياخدلك فالهدايا..
عماد:اسمع جاي من توا كل واحد يعرف مكانه تمام مافي يتعدا ع حدود التاني ايوه...امك هادي متاعي اني بروحي..
قربها ليه وباس خدها بقوة..
رزان بضحكه؛نهاري!!شن خليتله!!؟
عماد باسها مرة تانيه وماردش..
رزان بضحكه:باهي خلاص..خليني تشوف هديتي..
ضحك وبعد وقعد شادها..
هي خدت العلبه متاعها وفتحتها لقت فيها حديده ذهب حلوة هلبه..
رزان شبحتله وقالت:ربي مايحرمني منك ياقلب قلبي..
عماد وهو يشوف لمكان محدد فوجهها الحلو:ولامنك سموحتي انتي..
وباسها...وطول...
بعدين بعد وخلاها تاخد انفاسها..
ابتسم بعشق وقال:في غدي..
رزان بهيام:اكيد حبي..
عماد وخر شويه وقال:مالا خل نوض نبدل ونصلي وانتي ياسمحه لو تقدري وتيه كان ماتقدريش تو نوتيه بروحي..
وناض وقف..
رزان؛لانقدر..عدي انت دير اللي قلت عليه..
عماد:تمام ياسمح..بعتلها بوسه طايره وغمز..
هي ضحكت..
وهو لف ومشي..
هي ولت تشوف لحديدة الإسم وقلبها يدق بقوة من الشوق..
شوقها الشديد لجية ولدها ع دنيتها يزيد يحليها ويزهي الوانها...
لكن..
نغمه الرساله اللي جتها قطعت عليها لحظة اشتياقها هادي..
قامت التليفون وفتحت الرساله..
(حسبي الله فيك ونعم الوكيل)..
توسعوا عيونها وهي تعاود وتقرا فيها..
وقلبها تسارعت نبضاته من الخوف لما شافت المرسل..
"عمتي كفايه"..
علاش¡¡!!..
لأن بسببها امس صارت مشكله بينها وبين راجلها خلت سعد يقاطعها ومعاش يكلمها..
علاش بعتتها توا؟!
لان سعد جي للحوش وطلع بدون مايعبر كفايه بكلمه ولايهتم لأمرها..
وطبعا هي علقت خطئها كاالعاده ع الشماعة..رزان...
🍃رزان..
اللي رعشت مع بعضها لما قرت الرساله..
غيرت عيونها عنها وقعدت تشبح فالفراغ وهي تفكر..
ليش هدا كله ليش!؟شن رت منها شن دارت هي!؟
وين اتلف وادور ع الإجابه فعقلها..
تلقى الشي الوحيد اللي دارت وهو الغلط الوحيد بالنسبه لكفايه اللي ارتكباته فحقها..
هو انها تزوجت عماد 🍁..
"وين الغدي ياهو"..
انخلعت وشبحتله..
عماد عقد حواجبه وقال؛خيرك انخلعتي!؟..
بلعت ريقها وتصنعت ابتسامه وقالت:هيا هي..
ناضت وفيدها كيسة الهدايا..
هو جاها طبس شدها وسادها تنوض وهو يقول:هيا بازوزتي هيا..
ضحكت مسايرة..
ومشت طلعت وهي من داخل مازال قاعده ترعش..
اماهو قعمز خدي الريموت وقعد يغير...
🍁🍁🍁🍁
الساعه 8:00مساءا...
روح للحوش وفيده وراقي التحاليل اللي تمهم فنفس اليوم بمساعده صديق ليه..
كان من قلبه متمني لو كانت هالوراق ليه هو..
لكن الله غالب..مقدر ومكتوب..
المهم توا يرتاح قلبه ع اخته التانيه..
وصل لوسط الحوش لقي بوه وامه ومقعمزين مع خواته..
وإباء لما شافاته جاته تمشي بسرعه وهي تضحك
زينب بضحكه:وين تشوف حمزة تفرفش عليه..
رباب بإبتسامه:إيه تحبه هلبه..
طبس حمزة وقامها فغمره..باسها من خدها...بعدين شبح لرانيا وقام يده اليمين اللي فيها الوراقي..
رانيا ربعت ايديها وابتسمت بخجل..
وزينب ناضت وهي تزغرط ورباب تزغرط معاها..
وخيري منزل عيونه وهو مبتسم...
زينب مشت لرانيا..
رانيا ناضت وقفت لأمها..
حضنوا بعض الزوز وزينب تقول:مبروك عليك بنيتي ان شاء الله ربي يهنيك ويتمم ع خير..
رانيا وهي مبتسمه من بين دموعها:الله يبارك فيك..
طلقوا بعض..وزينب زغرطت مرة تانيه..
وجت رباب لاختها حضنتها وهي تقول:مبروك ياجحشة..
رانيا بضحكه:الله يبارك فيك ياعنزة..
ضحكت رباب..
خيري ناض ومشي طول للمربوعه..
وحمزة وهو مبتسم خدي بنت اخته ولحق بوه للمربوعه..
وخلوا روان تحضن فرانيا...
بعدين بعدت وقالت:ماما..
زينب بإبتسامه:نعم ماما؟..
روان:بعد رانيا دوري ولا؟
التلاته فنصوا بصدمه وقعدوا يضحكوا..
وروان تشبحلهم بإبتسامه وهي متحشمه..
🌴🌴🌴🌴
فوحده من قبائل بلاد الوادي...
كان في عرس كبير الألعاب الناريه تنسمع في كل الأرجاء..
العرس هدا كان لولد خال ابتسام مرت سليمان..
اللي يكون فنفس الوقت ولد بنت عمة نادره...
مافيش بينهم وبين نادره اي تواصل لكن لان الولد ري لمياء كذا مرة لما تجي لخالتها عجباته وقال لاهله عليها هي رفضاته طول كانت هداكا الوقت تقرا سنه أولى تمريض...
شافت روحها عليه وهزت عليه ع خاطر يسكن فالبلاد ومش مكمل تعليمه!!...وهادي كانت وجهة نظر اهلها حتى هما وقتها...
وقسم ربي للولد توا ياخد دكتورة اسنان ومن وسط طرابلس..
لهدا عزموهم بش يغيظوهم لاأكثر..
☘خشت لمياء هي وامها للخيمه اللي كان مزدحمه ومعبيه لاخرها..
باهي اللي حصلوا فيها كراسي..
نادرة:تعالي هني تعالي..
شدت يد بنتها ومشوا الزوز قعمزوا ع زوز كراسي جنب بعض فاضيات..
لمياء:ردس وهردميسه..
نادره:الشلافطيه هادم شن متوقعه منهم..
لمياء بإزدراء:ووه ع الريحه حتى فالشتي!!
نادره:الخيمه معبيه وضغط طبيعي بيعرقوا وتبدا تفحفح الروايح..
لمياء:ارزيني فالهم غير جابني بس..
نادره:تحملي لين نشوفوا العروسه شن لونها بعدين نروحوا..
لمياء بتذمر:اوففففف..
☘من جهة تانيه فنفس الخيمه..
ابتسام:هدي حماتي الكبيرة سعيده..
اخت العريس الكبيره:مرحبا مرحبا..وسلمت ع سعيده بالخد
سعيده:رحب بيك ومبروك ع وخيك..
اخت العريس:الله يبارك فيك..بعدت وقالت..عقبال ضراريك..
ابتسام؛لا ضراريها واحد واخد والتاني غدوة إن شاء الله فاتحته...
اخت العريس:ماشاء الله ماشاء الله..ربي يهنيهم ويتمم ع خير..
سعيده بإبتسامه:آمين تسلمي..
اخت العريس:انستونا وشرفتونا...خل بنعدي نشوف عمتي عدليه..
ومشت المراة...
بعد مامشت بالزبط سعيده عيونها جو ع لمياء ولانها كانت مقعمزة بعيد وسط الزحمه شكت انها تكون لمياء وان هي مشبهة عليها..
غيرت عيونها عنها ولهت مع مرت خوها..
🍁🍁🍁🍁
خش للحوش لقي امه راقده فالصاله...
مشي كمل طريقه للجناح..
فتح الباب وخش وصكره وراه..
حول من رجليه..
ومشي طول لدار النوم..
وين خش لقي مرته مقعمزة ع السرير وحاطه رجل ع رجل وهي شاده الريموت وتتفرج ع التلفزيون..
شبحتله برفعة حاجب..
هو غير عيونه وجاي بيمشي..
لكن وقف لما سمعها قالت..
"ماتهربش خليك شجاع وواجه"
شبحلها بتضييقة عيون وهو يقول:اني اللي نواجه!!؟
نزلت رجليها من ع السرير وناضت وهي تقول:ايه واجه سمعت حاجه واجعاتك واجه بيها مش تقلب وجهك وتهرب..
حسن بعصبيه:معاد تقولي تهرب..معاد تقوليها..
البارقه بنفس العصبيه:شن تسمي حركاتك هدي قولي!؟وبعدين الكلام اللي سمعته يوجعك صح لكن مش لهالدرجه..وانت تعرف كويس كيف خديتني..
قعد يشبحلها شويه بنظرات غضب..وضم شواربه لداخل بغضب ومشي بيطلع..شداته من ذراعه وقالت:حسن..
هو غمض عيونه وعض ع شاربه بقوة..بعدين فتح عيونه وقال:لهالدرجه كنتي كارهتيني!؟لين تقتلي روحك!!؟
البارقه دموعها نزلوا وهي تقول:انت بروحك قلتها كنتي..كنت..كنت ياحسن..خليك من قبل وشوف لتوا ياراجل ربي يهديك!
هو شبحلها شويه..بعدين نزل عيونه وقال؛باهي خليني نعدي للحمام بنصلي العشي..
هي طلقاته بالسيف..
هو مشي للحمام..
وهي لفت ومشت للسرير بخطوات محبطه ودموعها مازالوا ينزلوا...
🍁🍁🍁🍁
مقعمزات الزوز فالدار يهدرزوا..
مرام:بيعدي هانيبال الصبح..
فضيله:بتعدي معاه؟
مرام:تس تس بنقعد فحوش هلي..
فضيله وهي تشبح للتلفزيون قالت:اها...
مرام قعدت تشبحلها وحست ان في فم فضيله كلام وتبي تقوله..
ابتسمت وقالت؛شن جوك مع الزواج؟.
فضيله شبحتلها وكأنها ماصدقت تسألها ابتسمت بربكه وقالت:باهي ماشي الحال..
مرام سكتت وهي تشوفلها..
تنهدت فضيله بقلة حيله وقالت:نبي حد نحكيله يفهمني ويكون عاقل ويشور عليا لأني غبيه واجد فالحاجات هدي..
مرام ابتسمت بتضييقه عيون وقالت:حاجات شنو؟..
فضيله بلعت ريقها وشبحت للتلفزيون بعدين شبحتلها وقالت:تعرفي انتي قصة الهادي وسميه وكيف تزوجوا يعني..مهما كان فالنهايه كان يوم من الأيام يحبها وحب عمره سنين 11سنه حب وخطوبه وقريب7سنين متزوجين..يعني.احمم.. رفعت حواجبها وقالت..فاهمه عليا!؟
🍁ومن حيفهم عليك قد مرام يافضيله..
حتى هي راجلها كان عنده ماضي ومش اي ماضي..
وان كانت تختلف القصص..لكن فالنهايه الهادي وهانيبال زوجاتهم حاليا مش حبهم الأول...🍁
مرام ابتسمت وقالت:فاهمه عليك كويس..وانتي اسمعيني كويس وحاولي تفهميني باهي؟
فضيله بإنتباه:باهي..
▪▪▪▪▪
فالكوجينه..
كانوا بلقيس وحميده لاهيات بماكلة القهوة..
حميده:سعيده بس بتعدي..
بلقيس بأسف:خسارة تمنيت عمتي وغاليه حضرن..
تنهدت حميده وقالت:غير مجبور يقراها تو ع خاطر اجراءات رانيا كان هدى مستحيل يقرا فاتحه وحناه وغاليه مش حاضرات..
🍁🍁🍁🍁
لا والله يارمزي ماتحط فبالك حاجه ولدي اهم شي هناك وراحتك..
رمزي:سامحوني..
غاليه:غير عليش بس يارمزي..حلفتلك بالله ان اني وامي فرحانات واجد ويخي حناك قالت طيب فيهم اللي تريحوا بعد تعب..
ابتسم رمزي..
غاليه بإبتسامه:اهم شي تصوروا لحظة قراية الفاتحه باللقطه..
رمزي بضحكه:ماتوصيش عماد..
غاليه:هههههههه..مليح بكل...
رمزي ضحك ع كلمتها...
ضحك لكن من داخل كان قلبه واجعه ماتخيلش يجي يوم مهم زي هدا فحياته وغاليه ماتحضراش..
🍁🍁🍁🍁
الساعه 10:00ليلا..
لمياء:طيح والله سعدهم..
نادره ضحكت بكتمان..
لمياء:نحلف عليها اكبر منه..
نادره:مش غير اكبر منه شينه زي الغوله هدا شنو..
ضحكت لمياء..
......
سعيده :ماشاء الله العروس سمحه..
ابتسام:ايه يشكروا فزينها واجد..
سعيده:المهم تكون مراه باهيه وتريحه..
ابتسام؛ايه صدقتي هدى المهم..
فجأة رن تليفون سعيده....
وكان المتصل توفيق...
فتحت الخط وردت:ايوه توفيق......هيا هي هاني طالعه...
صكرت وناضت وهي تقول لإبتسام:بالله عبايتي ياإبتسام..
ناضت ابتسام وقالت:لحظه شوي..
ومشت من حداها..
سعيده قعدت تشبح للعروسه..بعدين مررت نظرها ع الحضور فالخيمه..
تبتوا عيونها لما جوا ع نفس المراة اللي شبهتها بلمياء..
المراة واقفه وتبان حامل..
شويه ووقفت المراة اللي جنبها..
سعيده وهي مضيقه عيونها قالت فنفسها "ايه والله لميا وامها هدين!؟شن جابهم هنى؟!"غيرت نظرها لنساوين عيلة العريس .."زعم يقربولهم!؟غريبه ليش حميده ماقالت؟!"..
ع جية ابتسامه وفيدها عباية ووشاح سعيده قالت:سعيده..
شبحتلها سعيده وقالت؛صحيتي..خدت العبايه والوشاح ولبستهم..
ع جية اخت العريس فيدها كيسه فيها عصير وحلويات ومكسرات وقالت لسعيده:تفضيلي..
سعيده بعد لبست وشاحها قالت؛غير ليش بس؟
اخت العريس:ريت هالحاجه الكبيرة..تفضلي تفضلي..
ابتسمت سعيده وخدتها وهي تقول:صحيتي...
بعدين قالت..بننشدك..
اخت العريس :ع شنو..
التفتت سعيده لمكان لمياء وامها لقاته فاضي..رفعت حواجبها ونزلتهم بعدين شبحت للمراة وقالت:تقربلكم وحده سماها لمياء مصباح*****
ضحكت اخت العريس بتهكم وقالت؛امها تقربلنا من بعيد..
ابتسام:لميا مرت عمر؟
سعيده هزت راسها بإيجاب بعدين قالت:مبروك علي وليدكم وان شاء الله ربي يهنيه هي تصبحوا ع خير..
اخت العريس:ربي يتمم ع ولدك بالخير..بالسلامه..
سعيده :بالسلامه..
ومشت ومرت خوها معاها تسقد فيها...
🍁🍁🍁🍁
متوترة شويه غلوشتي..
غاليه بإبتسامه:معليشي طبيعي شي كيف هدى..لكن بإذن الله تنجحي نجاح قوي يطلع ع دلوله..
ضحكت دلال وقالت:يارب..تنهدت وقالت..خلاص غلوشي مانعطلش عليك سلميلي ع حنينه هلبه..
غاليه:يوصل حبيبتي حتى اني سلمي ع الكل..تصبحي على خير..
دلال؛وانتي من اهله..بالسلامه..
غاليه ؛بالسلامه...
صكرت غاليه..بعدين شبحت لأمها لقتها مازال راقده..
تنهدت وحطت التليفون تحت مخدتها..
وجهت انظارها للأعلى💓وقالت:ياربي توفق دلال وتمم لرمزي ع خير...يارب..
سكتت شويه وهي تفكى..
بعدين خدت نفس وزفرت..وغمضت عيونها بش ترقد..
🌴🌴🌴🌴
مقعمزة ع السرير وهي تشوف لروحها فالمرايه كانت متوجسه وخايفه هلبه..
خايفه تصير حاجه تكسر قلبها...
وهي غارقه فالتفكير..
هو خش عليها..
لما شافها كيف طالعه وهي متزينه ومتهيئتله..
ابتسم ابتسامه جانيبه حلوة وقال:غريبه الليله مابيتي فطومه حداك؟!
حطت شعرها ورا وذنها بخجل وقالت؛تبي عمتها..
ضحك وقال وهو يقدملها:بنتي السمحه الليله قعدت مع عمتها بيش تعطي فرصه لبوها..
شبحتله فضيله وقالت بعبط:فرصه شنو؟!..
الهادي :ههههههه...بعدين حاوطها وقربها ليه وقال...تعالي نقولك فرصة شنو...
💕وبدي الهادي يحكي لفضيله عن فرصته وفضيله ماكانتش مرتاحه هلبه خايفه لو الهادي يزل لسانه وينطق اسم سميه..خايفه لو انه يتخايل فيها سميه...
لكن عدت هديكا الليله وولا حاجه من اللي تخيلتهم فضيله صارت💕
☘اما بنت خالتها..
هديكا الليله بات معاها حسن فنفس الدار..
لكن ع هداكا المندار الطويل فنفس المكان..
وخلاها هي تعدي ليلها كله وهي تبكي بصمت...
🍁ايه صح حسن عارف ان البارقه ماكانتش تبيه..لكن صعب شويه عليه يعدي محاولتها الإنتحار بش ماتاخداش..
يعني شنو بيكون شعور الواحد ولا الوحده لو يصيرمعاهم نفس الشي ويسمعوا من هني ولامن هني ان راجلك او مرتك حاول اوحاولت الإنتحار بش ماترتبطش بيك!؟
حتى لو عاشوا احلا حب بعدين معرفتهم معلومه زي هادي لايمكن تمر مرور الكرام...🍁
🍁🍁🍁🍁
14\2\2017..
💕تمنوا بعض من الطفوله وتعرضوا لهلبه عراقيل ومصاعب ومروا بهلبه مطبات كان من الممكن جدا انها تفرقهم عن بعض نهائيا وتجاوزوها كلها فسبيل انهم يوصلوا لبعض..
اليوم يتحقق مناهم
وربي يوصلهم لمرادهم ويجمعهم بالحلال..💕
🌷في حوش زينب...
كانوا موجودات حمواتها وعزوزتها وسلفاتها..
وسعيده ونعيمه ولطيفه ورزان ورباب..
كلهم متعاونين مع بعض لتجهيز وجبة العشي اللي داروها ميلاد وخيري ع خاطر الفاتحه..
زينب كان حاز فنفسها غياب كفايه..
ونعيمه مأثر فيها تغير كفايه الكبير في مناسبات زي هادي هي تكون بهجة اللمه....
بضحكها وبصارتها وغناها ورقيصها..مرات كانت ادربك ع الطاولات والدواليب والبيبان وتغني وتهيج وتزيد الفرحه اضعاف..
بس للأسف هدا كله معاش موجود..
كفايه معاش كفايه الأولى..
كيف مانقولوا تقول ربي حول بنادم وحط بنادم تاني..
وللأسف هي السبب الرئيسي والوحيد...🍁
🍁🍁🍁🍁
في جامعة طرابلس...
كلية الهندسه..
دلال تستعد لمناقشة مشروعها..
كانت قمة فالأناقه و الجمال برغم التوتر الملحوظ عليها..
كان استاذها المشرف نجيب فرج يحاول يهديها ويرفع من معناوياتها..
وهي كانت تسمع لنصايحه وتحاول تاخد بيهم..
🌸في القاعه اللي حتصير فيها المناقشة..
كانوا موجودين..
بوها وعمتها آمنه وخالها هانيبال ومعاه ضو..
ونور اختها ورانيا اللي اصرت تحضر برغم ان اليوم هدا يعتبر مهم وخاص جدا بالنسبه ليها..ماقدرتش تخلي بنت خالتها وصاحبتها الوحيده بروحها فيوم زي هدا..
وطبعا يوم زي هدا عند دلال..
اهم من يحضر فيه هما صغارها...
جواد..معمر...آسيا..
☘قمر تبارك الرحمن..
ماريه"صديقة دلال":تسلميلي يارب..انت كمان ابنك بيجنن يخزي العين شفتوا صوروا عند دلال..
نور بإبتسامه:تسلمي..
شبحت ماريه لصغار دلال اللي كانوا مقعمزين حدا خالتهم وقال؛مااحلاهن الله يفرحها فيهم..
نور:ويفرحك بي شام..
معمر:خالتي؟
نور شبحتله وقالت:نعم حبيبي.
معمر:امي خلاص توا كملت ولا معاش بتقرا..
ابتسمت ماريه..
نور بضحكه:ايه خلاص كملت..
معمر بتمني:امتى حتى اني نكمل..
جواد؛توا بس بديت راهو..
معمر شبحله ع جنب..
ضحكوا ماريه ونور..
ماريه بضحكه:شو بيجنن هالمعمر شو رايك اخطبك لبنتي شام..
نور:ههههه..
معمر بجديه؛راجي لين نكبر...
ماريه ونور:ههههههههههه..
.......
تبيها تخدم؟.
عبدالسلام:ايه..بش تشغل نفسها..نبيها تعيش حياتها..نبيها تنسى ياهانيبال..
هانيبال شبح القدام وقعد ساكت وضو اللي كان مقعمز حداهم ويسمع فرح هلبه لموقف عبدالسلام..
.......
خشوا دلال ورانيا للقاعه..
رانيا:اشبحي لمشرفك بس وزعي نظرك ع الحضور عادي لكن اكثر شي ركزي ع مشرفك..
دلال هزت راسها وقالت؛تمام تمام..ان شاء الله..
رانيا:موفقه دلوله..
ابتسمت دلال ومشت للمكان اللي حتناقش فيه..
اما رانيا مشت قعمزت فالمكان اللي مقعمزات فيه نور وماريه..
🌸وبدت تناقش دلال فمشروعها..
كانت تحاول تبان واثقه من نفسها وتطرد التوتر...عيونها وهي تناقش كانوا ع استاذها المشرف اللي كان فعلا بنظراته الواثقه فيها يخليها تزيد تتشجع وتعطي احسن ماعندها من إجابات..
عبدالسلام بوها..
ع قد ماكان فخور بيها اللي تجاوزت كل المحن اللي واجهتها فحياتها ووصلت لهاللحظه..
ع قد ماهو خايف عليها وع مستقبلها ومستقبل صغارها...
وكان نفس الخوف اللي يحس بيه هانيبال وهو يشوفلها برغم فرحته بيها..
هانيبال اللي كان مخوفه عيلة خاله مش عارف علاش حاس انهم بعد اللي صار معاهم مؤخرا حيغيروا رايهم من ناحية زواج دلال وقعادها هي وصغارها مع اهلها...
اما ضو..
اللي كان هايم بيها ارتفع عنده الإدرينالين ووصله لمرحلة اكبر من الإعتراف بالحب..
🌸كملت دلال مناقشتها..
كانت جدا موفقه فيها وعجبت أعضاء هيئة التدريس والحضور كذلك..
اللي صفقولها تصفيق حار بعد كملت...
💕💕💕💕
مش تبطن طول روحن..
دلال بضحكه:ياودي حاضر..
قرصها خالها من خدها وهو يضحك وقال:مش عارف ليش يابنت انتي مهما تبكري قاعد نشوف فيك دلوله الصغيرة اللي تلبس فالقفاطين المنفوخات البودريات والصفر والخضر..
ضحكوا البنات..
دلال بضحكه:كنت سمينه وقتها العار..
ضحك وقال:كلكن كنتن سمينات انتي وهالطرشوله هدي ورباب..نور كانت اسمنكن وهي صغيره نتفكر فيها وين تجري خوالها محمد وعمر يموتوا عليها ضحك..
ضحكت نور بإحراج..
والبنات يضحكوا عليها..
هانيبال ابتسم وقال:مبروك عليك وعقبال نوارة وعقبال تفرحي بعويلتك..
دلال ونور مع بعض :تسلم خالي..
لبس نظاراته وشبح للصغار وقال:جوااد هيا جدكم يراجي..
كانوا تلاته واقفين ع كروسة شام بنت ماريه اللي كانت نايضه ويلعبوا فيها..
جواد شبح لماريه وقال:السلام عليكم..
اسيا قلداته وقالت:السلام عليكم...وشبحت لشام وقالت..باي ياحلوة.
ماريه بضحكه:ييي مااحلاكن الله يحفظكن...
ابتسمولها جواد واسيا بعدين لفوا ومشوا مع بعض...
ويحسابوا معمر بيلحقهم..
معمر:نبوسها عادي؟
ضحكت ماريه وقالت بمزح:بوسا مافي مشكله هي خطيبتك..
هو قرب منها وباسها من خدها بعدين بعد وقال:السلام عليكم عليكم .
ولف ومشي يجري يلحق في خوته..
مشوا الصغار مع خال امهم لسيارة جدهم...
اما دلال ونور ورانيا مشوا لماريه وخشوا هما وياها داخل بش تكمل دلال باقي احتفالها..
🍁🍁🍁🍁
في إحدى الشركات الإستثماريه فالعاصمه المصريه..
كان مديرها مقعمز فغرفته..
ورا مكتبه ويتكلم سكايب باللاب توب..
اصيل وهو مبتسم ع جنب:لولا الظروف اللي صارت معانا راهو فاتحتنا انقرت قبل..
ابتسمت مريم بخجل وهي تكلم فيه عن طريق اللاب توب حتى هي
كانت لابسه وشاح لونه" بزاري" ولما قال كلامه خدودها احمروا خجل وولى منظرها حلو بالمره
هو تنهد وقال:تعرفي..
مريم بخجل :امم..
هو جاي بيتكلم لكن بعدين استاقظ لروحه..
سكت..
مريم بإستغراب:خيرك؟
هو ماعرفش كيف يعبر..
تلقائيا حط ايديه ع خدوده وقرصهم وهو يقول:شي..
رفعت مريم حواجبها..
هو ضحك وحرك راسه يمين ويسار وعيونه مغمضات مسح ع لحيته بإيديه الزوز بعدين فتح عيونه وقال:بنقولك اني مسافر اليومين الجايات إن شاء الله..
مريم بإبتسامه:وين؟
اصيل بإبتسامه:تنزانيا..ناوي ندير لعبدالرزاق الله يرحمه كيف مادرت لعمي المرحوم ..
مريم ابتسمت وقالت:والله هدا احسن شي يندارلهم يقعدلهم حسنات بلا حساب ليوم القيامه .
ابتسم وهز راسه بإيجاب...
رن تليفون مريم شافاته وقالت؛اصيل خوي جي بيرفعني لحوش خالي تمام..نكلمك بعدين..
اصيل:ok..نراجي بفارغ الصبر..
ابتسمت بخجل وقالت:باي...واشرتله بيدها تحي فيه بعدين صكرت..
هو تنهد من اعماق اعماقه وقال:..
"شيري💓"
🍁🍁🍁🍁🍁
البنات كانوا متوزعات فقسم دلال يفرقوا فالبكلاوة..
ودلال حتى هي معاهم...
طلعت برا ادور ع زملاء ليها برا...
لقتهم وفرقت عليهم شباب وبنات...
بعد فرقت عليهم لفت بتولي تخش..
لقت ضو واقف بعيد شوي ويشوفلها..
هي ابتسمت ومشتله...
وهو قدملها..
وصلوا فبعض ووقفوا ودلال قالت:وين اختفيت..
ضو بإبتسامه؛كانت عندي حاجه ضروريه فالكليه..
دلال:باهي تفضل..
ضو شبح للبكلاوة بعدين شبحلها:نبي نكلمك فموضوع مهم قبل..
هي استغربت وقعدت تشبحله..
ضو تشجع بقوة وقال وهو يشوف لعيونها:اللي بنقوله ليا ست سنين داسه فقلبي ومش قادر نلمح بيه حتى التلميح..شي بدون ارادتي غصب عني وين ريتك صار معاي..صدقيني اللي حسيت بيه ساعتها لعند توا عمري ماحسيته فحياتي ع قد ماعشت..دلال...اني...
سكت ومسح بيده ع لحيته وهو يوزع فنظره حواليه..
هي عقدت حواجبها بإستغراب وقالت:شن تبي تقول مافهمتش..
شبحلها وهو شاد ذقنه من نظرات عيونها زبطها فهمت لكن تبي تتأكد نزل يده وابتسم بعدين قال بكل جرأة:
"نبيك توافقي كان طلبتك من بوك"...
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
الساعه 5:00عصرا..
في احد مساجد العاصمه..
تحديدا في المنطقه اللي يعيش فيها خيري
كان مزدحم بالناس...
اللي جايين يحضروا عقد القران..
من اهمهم الي جانب الأقارب...
فرج زميل رمزي فالمعتقل..
الراجل اللي ساعد رمزي..
و4من زملائه فالكليه...
بعد صلاة العصر...
الشيخ جي قعمز بيناتهم..
خيري ورمزي..
ع يمين رمزي..بوه وخوه وعمامه وخواله واصدقائه...
وع ايسار خيري وولاده وخوته....
وباقي الحضور ولاد العيله وعدايل خيري ونساباته..
الشيخ طلب من خيري ورمزي يصافحوا بعض...
هادي مش المرة الأولى اللي يصافح فيها رمزي عمه خيري..
بس هالمرة المصافحه هادي كانت غير وكأنها اول مرة..
هادي مصافحه مقدسه...مصافحة الميثاق الغليظ..
اللي حلم سنين رمزي ان يصافحها لخيري...
رمزي كان حاس بشعور لايوصف..
لدرجة الدموع عبوا عيونه...
وبدي يردد ورا الشيخ..
كانت نبرة صوته مرتعشه..
بوه شد ذراعه بقوة...
وعماد يصور فيهم وكان حاس بشعور رمزي فهاللحظه..
رمزي كان يشوف لخيري وهو يردد فكلام الشيخ..
مع كل كلمه خيري يقولها..
كان قلبه يخبط خبط فصدره...
حاس ان كل الموجودين يسمعوا فيه..
بعد تم الشيخ كلامه مع خيري...
كلم الشهود...
هانيبال..ومفتاح خو خيري...
رمزي خلاص معاش طايق صبر..
يبي يسمع من الشيخ الجمله اللي تريح قلبه الولهان المتعذب...
"بارك الله لهما وبارك عليهما وجمع بينهم في خير"
قالها الشيخ..واخيرا قالها...
وقلب رمزي كان يطلع من قلبه...
ناض طول قدم خطوة..
وخر ساجدا لله..سجده شكر 💓..
والكل كانوا يشوفوله وهما مبتسمين..
عماد وهو يصور بعد الكاميرا شوي وقعد يمسح فدموعه بعدين ردها وكمل تصوير..
ناض رمزي وبوه جاه وحضنه طول...
رمزي يبي يشد دموعه حاسهم حيخونوه..
ميلاد ودموعه فعيونه:مبارك ..مبارك...مبارك..
رمزي ماقدرش يرد على بوه..
بعد عنه ومشي القدام بروحه بعيد شويه عنهم..
وقف ..
حط يده فنصه..والتانيه حطها ع وجهه وقعد يبكي بصمت..
خلوه شويه بروحه..
وقعدوا يهنوا فخيري...
اما رمزي..
جاه هانيبال حاوط كتافه وقاله:حلال دموعك هدين والله ماتنلام عليهن..
حول يده من ع وجهه وشبح لعمه بإبتسامه بعدين حضنه..
هانيبال ضمه وهو يضحك ويقول:مبارك مبارك والفال للفرح إن شاء الله..
رمزي رشف وقال:الله يبارك فيك ياعم..
💕💕💕💕💕
كانوا كلهم متجمعين وسط الحوش اللي مقعمز واللي واقف..
واللي مقعمز ع الدروج ويراجو..
كان مفتوح حداهم لاب توب متصلين سكايب بغاليه والحاجه فاطمه اللي جابلهم حميد ايباد يكلموهم منه...
وكانت فنفس الوقت دلال متصله بحميده فيديو اللي كانت تراجي هي والكناين..
فضيله ومرام وبلقيس ولمياء واريج..
💕كانوا فوسط حوش زينب يهدرزوا..
سكتت الهدرزة لما رن تليفون زينب..
كلهم قعدوا يشبحولها..
هي ضحكت وفتحت الخط وردت....
"هاه خيري"...
رانيا قلبها قريب يتقلع من مكانه 💓..
ضحكت زينب بعدين زغرطت...
واللي تعرف تزغرط زغرطت معاها..
💕غاليه تضحك وادمع من الفرح..
والحاجه فاطمه مبتسمه..
💕حميده وبلقيس الزوز قعدوا يزغرطوا...
ومرام وفضيله واريج يضحكوا من الفرحه..
ولمياء عيونها ع بلقيس وتشوفلها ع جنب بإمتعاض..
💓رانيا..
ماقدرتش تعبر عن فرحتها غير بالبكاء..
قعدت تبكي بعبرتها فحضن دلال اللي كانت ادمع وهي مبتسمه بفرح..
رانيا وهي فهالحاله..
خلت حتى عمتها نجيه وبنتها هنيده يدمعوا..
جتها حناها مبروكه وقعدت تفك فيها من دلال وتقول:ياسر ساد..العفو ياربي فرح هدا وانتي تبكي خليتي اللي حداك كلهم يبكوا معاك..
رانيا بعدت عن دلال وحضنت حناها..
مبروكه اللي جاها جاها قعدت تبكي حتي هي..
وهما كلهم ضحكوا من بين دموعهم..
مبروكه ببكي:عن شكالك مرة وحده..
💕💕💕💕💕💕
روحوا الرجاله بروحهم لحوش اهل خيري..
اما الشباب قعدوا يدوروا فشوارع طرابلس بالسيارات..
وكانت وراهم سيارة جماعة النوبه...
💞رمزي كان راكب فسيارة عماد ومعاهم محمد وعمر..
كان عماد مشغل اغنية الحب الكبير ع طول حس المسجل..
رمزي كان متكي بيده ع الروشن ويصفق بصوابعه الأبهام والوسطى ويغني مع الاغنيه بصوت واطي وع وجهه ابتسامه جدا جميله..
اما عماد وعمر كانوا يغنوا بصوت عالي وصوت عمر قمة فالنشاز..
محمد يشبحله من فوق للوطا طول الطريق وهو ولا ع باله..
💕💕💕💕💕
انا عاشق نور عينيك عاشق غرامها وسحرها..
انا روحي مابين ايديك وحياتي انت ملكتها..
هالمقطع كانوا يغنوا فيه البنات مع بعض فوسط الحوش وهما يرقصوا..
ورانيا ترقص فنصهم..
والنساوين يصفقولهم ويضحكوا..
وسعيده ضحكتها بالدموع...
دارو البنات عليها دائرة..
وهي قعدت ترقص فنصهم بفرح..
والبنات الصغيرات سهى واسيا وروان يرقصوا حداها..
ونور تصور فيديو...
ومازالت غاليه تتفرج وهي متصله بيهم سكايب وتصفق وتغني معاهم...
رانيا..
ياما سهرت الليالي وانت فبالي وخيالي..
ياما سهرت الليالي وانت فبالي وخيالي..
بتمنى نظرة منك..
بستنى كلمه منك..
علمني هواك ياغالي معنى الصبر الجميل..
حركت ايديها للبنات بش يغنوا معاها...
والبنات غنوا معاها..
انا عاشق نور عينيك عاشق غرامها وسحرها..
انا روحي مابين ايديك وحياتي انت ملكتها..
كرروا المقطع بعدين سكتوا وخلو رانيا بروحها تغني..
بحبك..كتير..بحبك..كتير...
فجأة...
سمعوا صوت الطقه متاع طبلة النوبه..
كلهم سكتوا..
ومشت رفقه طول للمنظومه وصكرتها...
كلهم قعدوا يسمعوا في النوبه اللي بدت تخبط ع الخفيف..
رباب: فوق السطح فوق..
ماصدقوا سمعوا شن قالت رباب ركبوا كلهم يجروا..
ورباب اللي تكلمت اول وحده اخر من ركب بعد طبت بنتها فغمرها..
💕برا...
كانوا الولاد كلهم فالشارع مع ولاد الجيران وناس من بعيد تتفرج ونساوين ورا الرواشن وفوق السطوح يتفرجوا بالدرقه..
وبدوا يغنوا..
نبدا البادي..اول مانبدا البادي..نبدا البادي بالصلاة على الهادي..
وصلى الله..
💓رانيا كان ادور ع رمزي بعيونها لين لقاته..
كان لابس عربي..زبون لونه ازرق كحلي..وكشابيه من نفس اللون ع كتافه..والعمامه بيضا ع راسه..
واقف يوزع فنظره ع الشباب وهما يغنوا وابتسامته ع وجهه..
قلبها كان يرقص من فرحته وملهوف عليه..
ودموع عيونها بروحهم ينزلوا....❤
بدي الجو ينشط اكثر..
لما غنى عماد..
حبيبي روح السمارة واخد عقلي..
ضحكو هو ورانيا فنفس الوقت...
وكملوا غناها..
والدنيا انقلبت قلب...
والأغاني ورا بعضها كانوا يغنوا فيها الشباب..
حاولوا يقنعوا رمزي يخش يرقص لكن رمزي ماباش..
اكتفي بالتصفيق بس...
لكن ماقدرش ينجى من حركاتهم..
في الأخير جبدوه وشدوه من كل تركينه.
وقاموه وقعدوا ينطروا فيه فوق...
وهما يقولوا..
اووووووووووووووووووه..
ولما ينزل يقولوا..
هييييييييييييييييييييه..
ورمزي يضحك..
اما رانيا..
وووك عليا ووك...
مريم بضحكه:مايصيرله شي ياودي..
اووووووووووووووه..
حطت ايديها ع وجهها وهي تقول...
وووووه ياربي..
والبنات يضحكوا...
🍁من جهة تانيه...
كانت نجيه من فوق السطح عيونها ع شخص واحد بس..
ولدها..
كان تشوف فيه كيف واقف يتفرج عليهم وهو حاط ايديه فجيوبه وع وجهه ابتسامة أسف...
نجيه بألم قالت فنفسها"ربي يعطيك خير منها وليدي"..
🍃نصيبه ياأسامه..وحتى انت سيورك تلقى نصيبك🍃
🍁🍁🍁🍁
ولايخلو الامر طبعا من شوط دربوكه ناشط...
بنكهه شرقاويه..
جارتهم الشرقاويه جت حضرت..
وشاركتهم الفرح بالأغاني...
💕نرجاهم مانرجا كني..
ونعيش معاهم متهني...
وهما يردوا وراها ويصفقوا...
صبرنا ع الغالي كم حول...واللي يصبر ياعين ينول...
زغرطوا بعدين ردوا وراها..
حتى والمرجا مو ساهل...لكن ياغالي تستاهل..
