#العشق_المتمرد "عندما يزهر الليمون"
#جمان_فريد
الجزء 125 القسم الأول
🌟..
راقده ع جنبها اليمين..
حاضنه مخده..
ومغطيها شرشاف لعند نصها..
شعرها مفرود ع المخده اللي راقده عليها..
ولأن الجو صيف..رقدت وهي محوله الطرف الفوقاني من قميص النوم.."الروب"..
ملامحها وهي راقده كانت فاتنه اكثر من وهي فايقه..
هو كان واقف حدا السرير ويتأمل فيها..
راجل مرته بهالفتنه والجمال كيف يقدر يتمنع عنها؟!
يقدر الراجل يتمنع عن مرته لو كان يحبها بجنون..
كيف !!؟
كيف يحبها بجنون ويتمنع عنها!؟
ماتخشش العقل!؟
الراجل لما يحب...
كبريائه يكون في اقوى حالاته..
يبدا وكإنه يستنى فزله ع الحب هدا بش يكبح جماحه..
يسمحله فالبدايه ياخد راحته ويخلي صاحبه يتنازل هلبه
لعند مايوصل لمرحله طفح الكيل عند الكبرياء..
هني الكبرياء يوقفله بالمرصاد يحطله حد بش مايذلش صاحبه أكثر...
ومع هدا الحب يقعد هو هو...
الحب حاجه مكانها فوق...
يعني حاجه معنويه عميقه وكبيره وعاليه..
الغرائز ماتتحكمش فيها..
يعني لو حسن كان واخد البارقه عن اعجاب بس..
كان اجبرها عليه حتى فالعلاقه الزوجيه..
لكن حسن هني يحبها...
واللي يحب يبي اللي يحبه يبادله نفسه الشعور..
بش يعطوا الزوز لبعض من جميع النواحي..
وحسن لأنه يحبها وعارف انها ماتحباش..مااجبرهاش علي شي هي ماتبيشي..
لكن فنفس الوقت...حيجبرها ع حبه 💕
ومااجمل الإجبار ع الحب💓
وطبعا هني المقصود بالإجبار مش الغصب ع الحب لا..إجبار من نوع تاني يحس فيه الطرف انه مش مجبر ع الحب..
بل انساقله انسياق بدون مايحس..💕
💓حسن بدون مايحس ع نفسه كان واقف لمده طويله وهو يشوفلها ومش منتبه للوقت اللي عدا وهو واقف هالوقفه..
لعند مافيقه تليفونه اللي رن..
طول مشاله بسرعه..
وهو يبلع فريقه..
ويحاول يستاقظ من اثر تخدير البارقه💕
خداه من ع الفراش ومشي طلع بيه برا الدار..
فهاللحظه هي بدت تفتح فعيونها..
قعدت تتحرك فمكانها وهي ادور بعيونها فالمكان..
شويه ووعت كويس..
واذكرت هي وين..
ناضت بالشويه قعمزت..
وهي تحرك فشعرها من فوق توخر فيه..بعدين دارته ع جنب وهي مازال تشبح للدار بملامح ازدراء وعصبيه..
نزلت ايديها..
وحولت الشرشاف..
نزلت رجليها لوطا..
بعدين وقفت..
خدت طرف الروب اللي كانت حطاته حداها..
لبساته ...
وهي تسمع فصوت حسن يتكلم بالتليفون..
تأففت..
بعدين التفتت..
فنفس اللحظه اللي هو جاي بيخش فيها للدار وهو ينهي فالمكالمه..
جو عيونهم فبعض..
هو غيرهم عادي جدا وكأنه ماشبح لشي..
وخش وهو يقول؛خلاص نشوفك بعد الصلاة ونتفاهموا..
هي شقلبت عيونها ومشت طلعت من الدار..
وهو تبعها بعيونه بدون ماتشوفله لين طلعت..
تنهد بعدين قال:تم...وعليكم السلام...
صكر..
بعدين مشي للزيانه..
حط هاتفه عليها
شبح من المرايه لمكانها اللي كانت راقده فيه...
ابتسم..
التفت للباب...
بعدين رجع شاف للسرير...
قدمله وقعمز عليه..
خدي الشرشاف...
وقربه ليه ببطء..
اول مالامس انفه..
شم ريحة حلوه هلبه...
غمض عيونه وهام معاها...
وقلبه يخبط خبط💓
عمره ماحس بهالمشاعر..ولاعمره اهتملها اصلا..
وماكانش متوقع ولاعمره تخيل انه بعد يوصل الخمسين سنه..يعيشها..وبقوة...
فتح عيونه لما سمع صوت باب الحمام انفتح..
طلق الشرشاف وناض طول مشي للدولاب فتحه وهو فقمة الإرتباك..وقعد ع اساس يدور ع شي مش عارفه شن هو..
ع خشتها هي للدار...
قعدت تشوفله برفعة حاجب وهو واقف ع الدولاب ويدور..
فكرت تتصبح عليه بالإستفزاز وتردله اللي داره الليله اللي فاتت..
البارقه:اسمع ماعنديش خلوق ندير فطور عدي دير بروحك..
هو طلع حوايج من الدولاب وصكره وشبحلها وابتسم ببرود وقال:صباح النور..
شقلبت عيونها ومشت للسرير وقعدت تساوي فيه..
حرك راسه ايمين ويسار وهو ماشي يحط فحوايجه ع الكرسي ويضحك..
هي شافاته كيف يضحك رقيتلها..
حطت المخده فمكانها وقالت؛شن يضحك فيك..
التفت وشبحلها وقال:شن دخلك؟
هي معاش عرفت شن ترد..يصدم فيها بأسئلته...
البارقه بكبر مصطنع:مادخلي الا لاني حسيت انك تضحك عليا..
حسن:وليش بنضحك عليك!!؟
البارقه رمشت عيونها بإرتباك بعدين قالت بنرفزة:والنبي فوتني ترا
ومشت طلعت من الدار وهي معصبه..
هو قعد يضحك عليها...
وصلت فالكوجينه وقالت:شن هدى ياربي ماينطاق..
قعدت ادور وتقلب فالدواليب ع القهوة..
لين لقتها
طلعتها وهي تقول:الحسنه الوحيده اللي دارها لعند توا انه جاب القهوة اللي نحبها..
هو جي وقف فم الكوجينه لما قالت الجمله هادي..
ابتسم وهو يذكر فحاجه
⚡فلاش باك..
تحب قهوة *****
حسن:متأكده!؟
حميده بضحكه:وليش بنكذب عليك يعني..
غاليه بضحكه:ايه تحب القهوة اللي قات عليها حميده..
حميده:اسمع رد بالك تحاول تكلمها ع الصبح قبل تشربها راهو ماتعرفش شن تقول ولاش ادير قبل تشربها..
ضحك حسن
غاليه بضحكه:هي عصبيه شوي راهي..
حميده:ماتغشيه..شبحت لحسن وقالت..عصبيه واااااااجد.
ضربتها غاليه
وحسن يضحك عليهم
⚡الوقت الحاضر..
حطت البكرج ع النار..
والفتت لقاته واقف فم الكوجينه.
حسن ببرود؛تحسبيني فيها؟
البارقه بحده:لااا..
ومشت بتطلع للدار بش تصلي..
فاتت من حداه وهو يشوفلها بطرف عينه بعدين ضحك وخش للكوجينه...
🍁🍁🍁🍁
نور الدنيا ودي اقولك..
اللي بيني وبينك كان احلام..
كان غرام ماودي انسى..
خش عليها الكوجينه وهي توتي فالفطور ويسمع فيها تغني لنوال الكويتيه..
كانت ترقص وتغني وهي توتي فالفطور..
توفيق بضحكه:صباح الفل..
التفتتله وقعدت تغني:وينو حبيبي...
ضحكت بعدين قالت...صباح الفلات..
قرب منها قرص خدها وباس صوابعه اللي قرصه بيهم وهو يشوف للفطور وقال:والله مانحسابك فالحه هكي..
اريج بضحكه:مش كان البنيه الوحيده معناها مدلعه وماندير فشي..
توفيق بإبتسامه:تو اختي رزان مدلعه صح لكن فالحه..
ابتسمت اريج..
شبحلها وقال:العشيه بإذن الله بنتسقدوا لطرابلس..طيارتنا المغرب..
اريج :حيي نحسابه غدوة!؟
توفيق:لا اليوم مش غدوة..اني قتلك اليوم اللي بعد يوم الدخول السفر..
اريج خبطت بيدها ع جبهتها وقالت:فهمتها ع غدوة اني..
توفيق:عادي مافيش مشكله وتي شنطة خفيفه نبيك تشري دبش من غادي..اللي يعجبك تاخديه..
اريج ابتسمت وقالت:مش هدا قصدي..قصدي اني مش متهيئة نفسيا..
توفيق بضحكه:تو نهيئك اني..
ضحكت اريج بخجل..
وتوفيق ابتسم وقرص خدها تاني وقال:مازلتي متحمسه..
اريج :من الصبح موتيه المغرف..
توفيق:ههههههههههه..
🍁🍁🍁🍁
فحوش الحاج رمضان..
فاقوا بالغصب الصبح بعد نوضتهم الحاجه فاطمه بالهزايب..
غاليه كانت فالحوش القديم توتي فالقلايه للرجاله اللي كانت بكميه كبيره طيبتها فطاوة كبيره ع المركاب..
وحميده حاصله فخبزة الفرن..
اما الباقي..
فكانوا يضموا فالحوش..
البنات..
وغزلان ولطيفه بس من الكناين..
اما مرام ولمياء كانوا مقعمزات فالدار اللي اضم فيها دلال مع رانيا ويهدرزوا..
وبلقيس فاقت متأخره وخشت للحمام..
الوضع كان منرفز زينب..
كيف لمياء ومرام وبلقيس مايديروا فشي..
او بالأحرى كيف مرام مقعمزة مادير فشي..
لما جت بتحط مقبس المكنسه الكهربائيه فالضي سمعت صوت غاليه وحميده خاشات من فم البوابه..
شافتلهم..
لقت وحده قايمه طاوا ..والتانيه صونيه فيها خبزة الفرن..
طلقت مقبس ومشتلهم..
وغزلان اللي كانت تلمع فالطاوله شافتلها كيف فاتت من باب المروحه وتبان معصبه..
وصلت فباب الكوجينه اللي كانوا فيها نور ورفقه ..
وحده توتي فالصفر والتانيه تغسل في ماعين القهوة متاع الرجاله..
ومعاهم غاليه وحميده..
ع طلعة بلقيس من الحمام..قالت :صباح الخير..
زينب ردت بدون ماتشوفلها:صباح النور..
بلقيس مشت بإتجاه باب المروحه وهي مستغربه..
بعد فاتت منه قالت زينب:شن اللات هدوكا لأمتى بيقعدوا مقعمزات..ولا ع خاطر حوامل مايتحركوش..
الكلمه طاحت فوذن محمد اللي جاي بيخش من فم البوابه وقف فمكانه لما سمع كلام اخته..
حميده:خيرهن؟
زينب:شن خيرهن ياحميده؟!اللي هادي مقعمزة وشاده بطنها وتهدرز وتضحك ومخليينا نحوسوا فالحوش بروحنا..
اللات لمياء ومرام يطقوا فالحنك فدار حايسه تضرب تقلب راجو لين ينوضوا دلال ورانيا بش يضموها..
ولا ست بلقيس اللي هدا وين ناضت...
غاليه:سهروا امس..
زينب:كلنا سهرنا امس..
حميده:حوامل معليش..
زينب:ماحملناش قبلهم لين نخشوا التاسع وحني نجروا هني وهني..
غاليه:مرام هانيبال معاركها قاللها ماتخليش ولدك وتلهي عنه..
زينب بتهكم :ايه هو هدا..هادو خوتكم..اللي يدير مراة راسه ينخبط..ويقعد يهز فيه وراها..
محمد مجرد سمع الكلمه هادي خش داخل طول..
لمحاته غاليه قالت:حي!!..
ومشت طول طلعت من الكوجينه لحقاته..
حميده:والله ماوقته يازينب..
زينب:لا وقته..
ونور ورفقه الزوز يديروا فشغلهم وهو متنرفزات من زينب ع الآخر..
فنفس الوقت..
بلقيس وهي لابسه الملايه بعد كلمت صلاه واقفه فنص الدار وتهدرز:والله اني ماشديت روحي كان بالسيف قريب ضحكت فوجهها..
مرام بضحكه: هي ماتعدلش بكل..
لمياء:عندها كناين؟..
مرام:ايه زوز..
دلال بضحكه:ياناري عليهم وين ماتمشي تحشم فيهم..
"بلقيس"..
انخلعت بلقيس من الطريقه اللي ناداها بيها محمد
مشت طول للباب..
وهما معاها بعيونهم..
وصلت فم الباب..
وفالصاله كانوا موجودات لطيفه وغزلان ونعيمه..
وقفوا شغلهم وقعدوا يشوفوله..
بلقيس:نعم..
محمد:هكي تشبحي فيهن كلهن يتحركن حداك وانتي مصبيه ادقي فالحنك وتقرمي!!
لمياء رفعت حواجبها وع وجهها ابتسامة شماته خفيفه..
بلقيس بلعت ريقها وهي منحرجه ردت وقالت:تو كيف نضت..
محمد:مصح وجهك وخلاص الساعه عشرة ونص الحوش كله نايض من الفجر وانتي اخر من ينوض..
غاليه:محمد..
قاطعها وهو يقول بصوت عالي:غاليه..اطلعي منها..
غمضت غاليه عيونها بعصبيه..
محمد:تحركي للكوجينه عاوينهن ..
بلقيس كانت شاده دموعها بالسيف قالت:حاضر..
نزلت عيونها من الإحراج ومشت للكوجينه..
محمد بعد فاتت من حداه...
مشي وراها..
بعدين فاتها ..
وصل فم البوابه لبس فرجله وطلع وهو مضايق ع الآخر..
فالصاله..
زينب وجعتها بلقيس ماكانتش تبيها فيها لهدا كملت هي باقي الحفله ومشت للدار وهي تقول:الدوة مش ع بلقيس بس كلكم نوضوا تحركوا..كلنا حملنا وعولنا وتحركنا وبطونا واصلات لرقابينا..
مرام :عينك ع عمار دلال..
دلال بضيق:باهي..
ناضت مرام بصعوبه ومشت طلعت من الدار..
فاتت من حدا زينب وهي متجاهلتها..
وكملت طريقها للكوجينه ولمياء وراها وهي رايقه ع الآخر عصفورين انضربوا بحجر واحد..
وهي ماشيه نادتها نعيمه وقالت:تعالي حولي معاي الفراشات لميا..
لمياء:باهي..
مشت نعيمه خشت الدار التانيه ولمياء وراها..
اما زينب تجنبت تشبح لغاليه وهي ماشية للمكنسه اللي شغلتها وبدت تكنس..
تنهدت بعدين شبحت للطيفه وغزلان لقتهم يخدموا ..
غيرت عيونها عنهم ومشت للكوجينه..
🍁فنفس الوقت..
لما جت خاشه بلقيس للكوجينه..
كانت بتبكي خلاص..
قالت بنبرة صوت ترجف:ترا..حولي..حميده
حميده بعدت وهي تشوفلها..
لما جت واقفه ع الطاوله..
ماتحملتش طول انهارت بالبكي ..
وحطت ايديها ع فمها بش مايطلعش صوتها..
ع خشة مرام..
حميده بضيق:محمد هدى طبعه واسلوبه من يومه هكي يابلقيس..
نور وعيونها معبيات دموع:عصبي بزياده لكن والله يحبك..
ورفقه تشوفلها بعيون مدمعات وجعتها بلقيس ع الآخر.
ع خشة مرام..
مرام:معليشي بلقيس كلهم هكي..
وقدمتلها وهي اطبطب ع ظهرها..
بلقيس مسحت وجهها..
بعدين خدت نفس وزفرت وقالت:خلاص خلاص..ماصار شي..رشفت وقالت..ماصار شي..
مشت لحماله الكواشيك خدت منها كاشيك..وولت للطاوة وقعدت تحرك فيها..
واللي حواليها شبحولها شويه..
بعدين شبحوا لبعض بضيق..
واللي هادي لهت بحاجه..
شوي خشت غاليه ..
شافت لبلقيس بألم بعدين لهت معاهم فتجهيز الفطور..
والكل بفضل زينب..تنكد ع الصبح..
ماعدا لمياء...
🍁🍁🍁
بينما فحوش ميلاد..
كانت الحاجه فاطمه غادي ومعاها بنتها كفايه..
يفطروا هما وسعيده ورزان والحاجه حدهم ويهدرزوا وجوهم لطيف..
🍁🍁🍁
فحوش عبدالله..
وتت امال صفرة فطور حلوه للعرسان ..
حطتها قدام باب الجناح..
طقت الباب....بعدين مشت...
شويه وفتح حسن الباب شاف الصفره..
طبس رفعها وخش بيها داخل وصكر الباب..
مشي للكوجينه ..
خش...
وحطها ع الطاوله..
حول الشرشاف وشاف اللي تحته..
ابتسم وقال:ماشاء الله..
خدي بريوشه..
ومشي لدار النوم...
وصل غادي وقف فمكانه وهو حاط البريوشه ففمه..
لقي مرته لابسه قفطان لونه خمري ضابط ع جسمها ربع كم وطويل..وتمشط فشعرها الأسود سواد الليل وطوله يضرب لنص فخدها..
هي ماشفاتاش..
وهو واقف مسهم فيها💓..
لما لفت شعرها ع جنب التاني بش تمشطه شافاته..
هو استاقض لما جت عينها فعينه..
نتش من البريوشه..بعدين قال ببرود وهو يمضع بإستفزاز:الفطور...برا..
غير عيونه للروشن اللي كان معلق عليه الفيلو قال وهو يمضع:خوك..بيجي..اممم...يرفعه..
بعدين مشي..
هي غمضت عيونها وحطت ايديها ع وجهها وقالت:صبرني ياربي على مابليتني..
نزلت ايديها ..بعدين زفرت..
وشبحت للمرايه..زينت شعرها بمشبك حلو لونه اسود..
بعدين مشت طلعت للكوجينه...
لقاته مقعمز فوسط الحوش ياكل ويشوف لتليفونه ..
شبحتله بربع عين بعدين شقلبتهم وخشت للكوجينه..
حركت عيونها للصفره شافت شن فيها..
بعدين غيرت عيونها للبكرج متاع القهوة..
كان مطفي تحته ومغطي..
فتحت الغطا لقتها طايبه بالوجه..
تخيلاته وهو واقف عليها يكمل فتطييبها..
شيئا فشيئا ارتسمت ع وجهها ابتسامه خفيفه..
بعدين..
استاقضت لروحها فيسع بدتلها للحده وخدت البكرج ومشت بيه للفناجين بش بتصب فواحد منهم وتشرب..
🍁🍁🍁🍁
مع الساعه 12:00...
اريج بدت بتطييب البازين..
طيبت الطبيخه..
بعدين حطت طنجره دحي مطبوخ ع النار..
رن تليفونها..
طلعت من الكوجينه تجري ومشتله فدار النوم..
كان ع الزيانه خداته وشافت المتصل ضحكت..
فتحت الخط وردت..
أريج:كوكااااا..
كوكب صاحبتها:لاااا مادام رديتي عليا هكي معناها امورك تمام التمام..
ضحكت اريج بخجل وقالت:باهي صكري فمك..
ضحكت كوكب وقالت:باهي قوليلي شن صار فالمبكبكه..
اريج:نزلت صورها ع الفيس..
كوكب:ايه ريناهم لكن الطعمه شنو شن راي اللي كلوها فيها..
اريج:عيب عاد يابنتي راني اني اللي مدايرتها ..
كوكب بضحكه:العبد الواثق..
اريج بضحكه غرور مصطنعه:مال شنو..واثقه من روحي وعارفه شن عندي..
كوكب بإبتسامه؛باهي والبازين..
اريج :توا حطيته ع النار..خايفه منه الحق..تحدي البازين احرف بهلبه..
كوكب:عاد انتي عند هل البازين ردي بالك..
اريج :ماتزيديش تخوفيني..
ضحكت كوكب بعدين قالت:ايه يسلموا عليك البنات رتاج وريهام وفاطمه ..
اريج بضحكه:سلمهم وسلم من جاب سلامهم...
🍁🍁🍁🍁
المشكله المراة سهرت البارح عالماعين مع البنات وكانت اخر من رقد..تلوحت زي الشرتوله من التعب..
رانيا:ايه معانا غسلتهم وماروحتش من الحوش القديم الا وهي ضامه الحوسه اللي غادي ع قد مادرنالها لما حلفت سكتنا..
دلال؛بلقيس مراة خدومه ومش مقصره وديما يد بيد مع خالاتي وحناي فالحوش..ظلمها خالي محمد بتصرفه هدا..
نور :سامحيني فيها رانيا خالتي زينب هي السبب..
شبحولها الزوز بإستغراب...
رفقه:نزلت فيهم هي ومرام ولمياء وقالت كلام اخي بكل وهو سمعها وخش هايج مايشوف فشي..
رانيا انحرجت من تصرف امها وقالت؛ربي يهديها امي ربي يهديها..
دلال بشي من الغضب:اللوم مش ع امك اللوم ع خالك اللي يمشي بودانه..فاهم الرجوله غلط..كان هزب مرته وكشخ عليها قدام خواته يولي راجل مسيطر ومرته مش حاكمه فيه..
رانيا:خالي ونعزه هلبه صح..بش شخصيته خيي خيي مانحبهاش..
رفقه:حتى اني..
نور: اني من موقفه مع خالتي كفايه ايام الثورة نظرتي فيه تغيرت...
دلال:ربي بهديه ويصلح حاله...ع خاطر هالمراة الباهيه والله ماتستاهل..
رانيا بضيق:ربي يكون فعونها...
🍁🍁🍁🍁
وهالمراة الباهيه ماقعمزتش بكل وهي تعول مع حمواتها ع الغدي اللي داروه فالحوش القديم..
دارو بازين بش يعاونوا بيه بازين اريج...
وبلقيس عجنت العجينه وكانت طول الوقت ساكته مابتش تتكلم بكل..
وحمواتها يراقبوا فيها وخايفين عليها تصيرلها حاجه..
المراة حامل..
حامل..
هدا اللي زاد وجع قلب محمد وخلاه يكره روحه..غضبه عمي عيونه بالمرة..
جرحها واهانها قدام الكل ..
وماقدرش وضعها..فكر بس فوضعه هو كراجل قدام خواته..
مشي لصلاة الجمعه وروح وهو مش ع بعضه..
حداه يهدرزوا ويتناقشوا ويبصروا ويضحكوا..
وهو مش معاهم ..
جابوا الغدي وتغدوا...
كلهم استمتعوا بالبازين الا هو يدوب كلي وماتبنن شي..
وبعد كملوا الغدي..لبسوا توفيق وبصروا عليه وهما يعلقوا ع بازين مرته..
وهو يحاول يشاركهم بإبتسامة مجامله مش قادر يضحك من قلبه💔
قلبه اللي مش راضي ابدا ع افعاله مع المراة اللي يحبها ..
ونقم عليه ع خاطرها...
🍁🍁🍁🍁
الساعه 4:00قبل العصر..
تفضلي عمتي..
خدت سعيده بوكس مغلف بغلاف حلو كبير شوي وقالت:تسلمي بنتي..
بعدين مدتلها بوكس تاني وقالت:هدا لعمي...
خداته سعيده وهي مبتسمه..
اريج بإبتسامه مدت كيسه هدايا صغيره لرزان وقالت:هدا ليك رزونه..
رزان ابتسمت وخداته وقالت؛مشكورة حبيبتي..
ابتسمت اريج وقالت:العفو..
بعدين مدت كيسة هدايا تانيه اكبر بشوي وقالت:هدا لسلفي رمزي..
خداته سعيده وقالت:ربي يحفظك بنتي.
اريج:ويحفظك عمتي
بعدين
سعيده خدت صندوق صغير متاع ذهب من حداها مداته لاريج وقالت:هدي من عمك ميلاد بنتي..
خداته اريج بإبتسامه وقالت:ربي يطول فعمره..
رزان وسعيده: آمين..تسلمي..
سعيده:اني عاد هديتي عطتيهلك نهار الكسوة..
ضحكوا رزان واريج..
سعيده بإبتسامه:خلينا تو فالمهم بنتي..
انتبهت معاها اريج..
سعيده:مانفرض عليك شي..تبي تقسمي من تو انتي حره..
امتى ماتبي تنزلي انزلي ع راحتك..وين ماتبي تعدي عدي بعد تاخدي شيرة راجلك..المهم يقعد بيناتنا الإحترام والتقدير ونحفظوا اسرار بعضنا...ونكونوا لبعضنا فالفرح والشده..
اريج بإبتسامه:إن شاء الله..
رزان:اعتبريني اختك الكبيرة..مش حماتك اني اصلا مانبي نديره الجو هدى..مادابينا نكونوا صاحبات..
اريج بضحكه:من زمان صاحبات..
رزان بضحكه :صح..
سعيده ابتسمت وقالت:خلاص بنتي توا ارقي وتي روحك معاد في وقت..
اريج ناضت وقالت:صح..بالسلامه توا..
سعيده ورزان :بالسلامه..
لفت اريج ومشت طول لفم الحوش الخلفي..
بش نرقى لشقتها اللي دروجها ع برا..
رزان:تهبل..
سعيده :ماتقول خالتها نجاة بكل..
رزان:هههههههه...
🍁🍁🍁🍁
بعد العصر..
كانوا نعيمه وكفايه وولادها..وحميد...
متجهزين للمرواح...
وعمر ولمياء كذلك متجهزين للمشيه لطرابلس عرس سناء حيبدا الأسبوع الجاي...
طلعوا من القطعه ومعاهم توفيق اللي رفع مرته لحوش خالتها..
سلمت ع امها اللي قاعده غادي والدموع كانت حاضرة وبقوة..
كلها خمسة دقايق..
وطلعت طول لراجلها..
وتوكلوا لطرابلس...
🍁🍁🍁🍁
الساعه 6:00مساء..
زينب والحاجه فاطمه مشوا لحوش عبدالله..
ماكانش موجود فالحوش..
غير غاليه ورانيا ومرام ورباب جاية تهدرز...
وبلقيس كانت راقده فالدار التانيه..
شويه وخشت سميه ببنتها...
سلمت ع الكل بعدين قعمزت...
سميه:حتى العرسان عدوا..
غاليه:ايه بعد العصر ع طول..طيارتهم المغرب..
سميه؛يمشوا ويجوا بالسلامه..
كلهم:آمين..
سميه:حميده وين؟..
غاليه :فالمربوعه..
سميه:زعمه كيف بيصير فيها تو؟
غاليه تنهدت وقالت:إن شاء الله خير وخلاص..
كلهم قالوا بأصوات متقطعه:إن شاء الله..
-------------
قاعده ع ذمته!!؟
هانيبال:ايه..قاعده ع ذمته..
غيرت عيونها عن خوها وقعدت تشبح فالفراغ وهي مصدومه..
ميلاد:اسمعي..
شبحتله..
ميلاد:القرار ليك تولي ولا لا...اللي تبيه انتي يمشي..
هانيبال:انتي زيدي فكري ع راحتك من هنى لنهار الخميس..
ميلاد:نهار الخميس بيجي هنى ..تطلعي تقعمزي معاه وتبلغيه قرارك بروحك..مانبوه يحس ان حني مدخلين فقرارك بكل تفاهمي انتي وياه..منك ليه..
انتابها شعور بالخوف..
بلعت ريقها وقالت:باهي..
برا...
فالمستراح...
شوفي حنين..
حنين وهي ترسم..طلقت القلم وشبحت لرسمة روان وقالت:حلوة..
ابتسمت روان ورجعت كملت رسمتها..
اما حنين وين جت بتاخد القلم طاح من حجرها...
وقعد يدحرج ع الارض..
حطت كراستها ع تركينه وناضت بتلحقه..
والقلم مازال يدحرج لين طاح من الدرج..
نزلت حنين وراه بتاخده..
وخرت وهي خايفه..
لما شافاته استقر حدا رجل خالها الهادي..
قعدت ترعش..
كيف جت بتمشي..
شدها من ذراعها..
روان قعدت تشوفلهم وحتى هي خافت..
البنت قعدت تشبح لخالها بنظرات ذعر..
هو طبس خدي القلم...
بعدين قعمز ع روس صباعها قدامه ومدلها القلم وقال:خودي..
هي رفعت يدها اللي كانت ترجف وخداته بسرعه..
والهادي يشوف للخوف اللي فعيونها وقلبه كان يوجع فيه من نظراتها..
خطم قدام عيونه كل اللي داره معاها...
غضبه من بوها خلاه يظلمها..وهي بريئة مالهاش اي ذنب
وبعدين يطلع حتى بوها مظلوم...ومالاش ذنب..
يااه يالهادي...
انت ظلمت البنت اكثر من بوها...وآذاك ليها تعدا اذى بوها بمراحل..
ممكن بعد تكبر البنت وتوعى وتفهم كل شي تسامح بوها وتنسى...
لكن انت..شن اللي بيخليها تسامحك وتنسى اللي درته فيها!
حنين بخوف:نبي..نعدي
اتفاجئت...
البنيه الصغيره لما لقت روحها فحضن خالها
خالها اللي كان يمسح ع ظهرها بحنان وكإنه يبي يمسح اثار الجروح اللي تسببلها فيهم..
ويمسح من ذاكرتها كل مشهد قاسي كان بطله هو..
وهالمشهد صار ع عيون محمد اللي كان جاي من الزريبه بعد ماعشى الشواهي..
فعز ضيقه..
فرح...
وابتسم بحب وهو يشوفلهم..
وروان تشوفلهم وهي مبتسمه ابتسامه بريئة تعبر عن فرحها من اللي راته..
وصدف القدر..
خلت حد تاني يشوف هالمشهد..
فضيله..
اللي كانت جايه تشوف بنت خالتها وتطمن عليها ومعاها مرت خوها..
وهما خاطمين من حدا حوش الحاج رمضان بطريقهم لحوش عبدالله...
ارتسمت ع وجهها ابتسامه حلوة وهي تشوفلهم..
وعيونها تعبوا دموع...
هي ع درايه بكل شي..غاليه كانت تحكيلها..وكانت واخده موقف قوي منه بسبب اللي سمعاته عنه من معاملته لبنت اخته..وماصدقتش انه هو نفسه الهادي اللي تعرفه..
اللي كان اسمه ع مسمى..
ومعروف بحنانه وحبه للصغار...كيف يدير هكي مع بنت اخته!؟..
بس اللي راته توا خلاها ترجع تشوفله بنفس نظرة ايام زمان💖
فاتوا هي ومرت خو البارقه ومازال ابتسامتها ع وجهها وقلبها يرفرف بشعوره💓
بعد الهادي بنت اخته وقال:هي عدي..
البنيه قعدت تشوفله بريبه..
بعدين لفت ومشت ركبت الدرجه...
وكملت طريقها وين مافي بنت خالتها..
ناض الهادي ووقف ع حيله..
ابتسم براحه..
بعدين..
مشي توجه لحوشه..
_________
رباب:وامتى تبدي خدمه؟
مرام:ان شاء الله بعد الولاده يعني الفصل الجاي بإذن الله..
رانيا بإبتسامه:موفقه يارب..
مرام بإبتسامه:تسلمي حبيبتي..
وسميه تشوفلها بحسد..
رباب؛ايه حقه خالتي شن صار فحكاية فلوس الأرض مش قالوا باعها خالي حميد..
ضيقت سميه عيونها بإستغراب..
غاليه:ايه نهار الأحد الجاي ان شاء الله كلنا بنعدوا لطرابلس ونلتموا عنده وهو يوزعهن..
رانيا:خالي حسن وخالي خليفه بيحضروا؟
غاليه :ايه..
مرام:ايه قالي هانيبال بيتوزعن فحوش حميد..وحسن بيوزعهن...
رباب:ايه مفروض حد غير الورثه هو اللي يوزعها..
سميه كانت تسمع وهي مصدومه لأبعد حد..ماعندهاش علم بأي شي ماتندري ع شي..الهادي ماباش يقوللها شي..لأنه عارفها...حتتسلط ع الفلوس من قبل مايوصلوا وتشرتعهم ايمين ويسار في حاجات فارغه وهو ناوي يدير بيهم شي ينفعهم القدام...
فكر انها ممكن تعرف من غيره...
فحال عرفت كان حيعرف كيف يصرفها لكن منه هو مباشرة لا...
وهي لاعرفت منه ولامن أي حد تاني...
غاليه ركزت عليها كيف كانت تشبح لمرام بصدمه..عرفت اللي فيها...لأنها ماشاركتش نهائي فالحديث ع الموضوع هدا..
لهدا بسرعه غيرت الموضوع...
غاليه بإبتسامه مرتبكه..:محلاه لون شعرك مرام صبغتيه غادي؟
شبحتلها سميه..
مرام بإبتسامه:ايه..
رانيا:تهبلي تهبلي ومع الحمل زدتي حلاوة..
ابتسمت مرام بخجل:عيونك الحلوات رانيا..
سميه دكت ففم بنتها الرضاعه وهي تسحن سحن..
رباب:وكليها مرت خالي مش ديما ع الحليب..إباء بنتي بديت نوكل فيها فالزبادي..
مرام:ايه صح عمار ولدي فعمرها وكلته زبادي..
سميه لما تكلمت مرام شبحتلها بحده وقالت:نعرفوا ..رانا متعلمين مش جاهلين يادكتورة...ماتنفخيش روحك علينا..
كلهم انصدموا فرد سميه..
بالذات مرام....
غاليه:سميه!!
سميه بعصبيه:سميه سميه سميه...الله يلعن الساعه اللي جتكم فيها سميه..
طبت بنتها وناضت ومشت طلعت من الدار وهي مازال تردد:الله يلعن هديك الساعه...
طلعت من فم الحوش ع خشة حميده..
اللي اتفاجئت بيها كيف طالعه وشن تقول وهي طالعه..
مشت طول خشت داخل..
وصلت فالدار ..
خشت وهي تقول:خيرها سميه!!؟
رباب:اللي جاها جاها..
رانيا:والله ماعارفين شن صارلها فجأة..نهدرزوا عادي ومرام كلمتها عادي انفجرت فيها وقالت كلام غريب..
حميده شبحت لمرام..
اللي كانت مازال مصدومه من اللي صار وماقدرتش تنطق بكلمه..
غاليه.فهاللحظه وهي تشبح لمرام فكرت فاللي حيصير بين خوها ومرته ع خاطر قصة الورث اللي ماتعلمش بيها...
قلبها قبضها بقوة..
ناضت من مكانها..
ومشت طول طلعت من الدار...
حميده:غاليه...وين ماشيه ياغاليه...
مشت وراها خطوتين بعدين وقفت فمكانها وهي تقول:لاحول ولاقوة الا بالله...
_____________
كيف اني اخرمن يعلم كيف!!؟
الهادي:انتي خليتي روحك اخر من يعلم..من اول ماسمعتي بقصة الأرض هدي وانتي تنقي..بيع حصتك ياهادي..نبي نغير بفلوسها اثات الحوش..نبي ندير كوجينه خارجيه..نبي ندير دار نوم لفطومه...وتبي وتبي وتبي...وع ماتبي انتي..خبط كفوفه فبعض وهو يقول..يريحن الفلوس..
سميه حطت يدها فنصها وقالت:وليش انت شن ناوي ادير بيهن الفلوس!!!قصدك توا خطر عليك ادير حاجه عليها ثمره!!
ابتسمت بتهكم وقالت..هدى وين قول راحن الفلوس حق..
هو وصل لأقصى مراحل الغضب كيف جاي بيرد عليها..
طق الباب بقوة..
الهادي بغضب قال من تحت سنونه:موليلك..
هي شبحتله بنظرة استهزاء وهو ماشي بيفتح الباب..
وصل فيه..
فتحه..
لقي غاليه..
خشت طول وصكرت الباب وهي تقول:استهدي بالله ياهادي تربح..
الهادي:وصلتهلي لعند هنى خلاص..واشر بيده ع مقدمه انفه..
غاليه:غير اهدا انت اني تونكلمها..وينها هي..
الهادي بإمتعاض:فالصاله..
هزت غاليه راسها ومشت طول خاشه للصاله..
ووراها الهادي..
اول ماوصلت غاليه الصاله وبانت ع سميه..
سميه خبطت ايديها فبعض وقالت بصوت عالي متهكمه:كملت..
ضيقت غاليه عيونها وهي تشوفلها..
والهادي جي من وراها وهو عاقد حواجبه..
سميه وهي تشوف لغاليه قالت بعصبيه ممزوجه بالوقاحه:شن انتي ماعندك شي اديريه فحياتك غير انك تدخلي فحياة غيرك..وتحطي خشمك فكل شي مايخصكش..لهالدرجه حاسه بالفراغ!!ماوراك شي اديريه فحياتك غيرك انك تدخلي فحياة خوتك ونساوينهم!!؟قولي!!؟
أول مرة فحياتها تنهان هكي غاليه..
اول مرة تسمع كلام جارح وقاسي لدرجة انه حطمها من داخل تحطيم.....
كسرلها قلبها..
كسرلها خاطرها...
وألمها ألم...
أيما ألم..
حدها رفعت كفها وقالت بصوت مخنوق وهي منزله عيونها لوطا..
"آسفه"..
نزلت يدها...
ومشت بسرعه للباب..
فتحاته وطلعت وصكراته وراها..
وخوها...
اللي قعد معاها بعيونه اللي نظراتهم كانت مزيج بين الصدمه والألم والغضب...
ردهم من جديد للمراة اللي كانت ليه ديما معول هدم..
اول مراة عطاها قلبه من 20سنه فاتت..
وحبها بصدق وبنيه صافيه..
وياما دار ع خاطرها..
وصدق انه تحبه لما استناته سنين..
وبرغم صدمته فيها بعد الزواج..
بعد اكتشف حقيقة حبها ليه..
وحقيقتها كإنسانه..
صبر عليها وتحمل وفي كل مرة يوصل فيها لطريق مسدود هو وياها..يرجع ياخد بيدها من جديد ويمشي بيها فطريق تانيه..
يلقى نهايته مسدوده..
يرجع وياخد بيدها من جديد ويمشي بيها فطريق ثالته من جديد..
يلقى الطريق هادي حتى هي مسدودة...
تأكد...
لا هي تقدر تكمل فطريقه..
ولا هو مازال يقدر يخليها تكمل معاه فطريقه..
عارف ان نهايتها معاه دائما حتكون مسدودة...
لهدا ...هالمرة..
فكر..
قرر...
نفد...
بملئ إرادته...
هي كانت تشوفله برفعة حاجب ونظرات عيون غاضبه ومترقبه فنفس الوقت..
وهو كان يشوفلها بحزم...
وقال.....
"المي والملح اللي بيني وبينك تم.."
نزلت حاجبها ونظرة عينها تبدلت للبرود...
وهو مازال يشوفلها بنفس النظرة قال..
"إنتي طالق"
🍁🍁🍁🍁
خشت للدار....
وصكرت وراها الباب..
لوحت شنطتها بعصبيه..
وفيدها تليفونها كانت حاطه ع رقم ياسين...
اتصلت وحطت التليفون ع وذنها ..
حطت يدها التانيه فنصها وقعدت تمشي وتجي فالدار..
لعند ماانفتح الخط..
وقفت وقالت:آلو..
رد وقال:ايوه..
رفقه برفعة حاجب:باهي..طلعت عايش!؟
هو قعد ساكت..
رفقه عقدت حواجبهاوقالت:معليشي فهمني..شن معناها التصرفات هادي!!؟نبعتلك رسايل ماتردش نكلمك ع الماسنجر تشوف الرساله وماتردش..نتصل بيك ماتردش..
وتوا ترد ومن فوق نفسك...قولي شن في؟!
🍁🍁🍁🍁
طلعت من الحمام اللي خشتله من أول وصلوا شقتهم..
وين خشت للدار..
لقت راجلها متمدد ع السرير ومغمض عيونه..
مشتله وقعمزت حداه..
حطت يدها ع صدره وقعدت تنوض فيه:مودي...عماد..حبيبي رقدت!؟..
عماد بصوت متعب:اممم...
استغربت فيه..
حطت يدها ع خده فتحت عيونها ع وسعهم من الخوف وقالت:حي نهاري حرارتك راقيه!!
ناضت بتمشي هو شد يدها..
شبحتله..
يدوب فتح عيونه بتعب وقال:ماتخافيش..حبي..
هي عيونها تعبوا دموع...طبست ع يده وباستها..
بعدين وقفت ع حيلها وقالت:تو نجي..
بالسيف فك يدها وخلاها تمشي..
ورجع صكر عيونه بتعب من جديد..
🍁🍁🍁🍁
ابتسمت بتهكم وهي رافعه حاجبها وقالت:انت يعني توا صدقته!؟
ياسين وهو يفرك فجبهته فيده قال:اني ماقلتش هكي يارفقه..نزل يده وقال..لكن اني من حقي نعرف اني شنو عندك!!؟يعني واخدتيني ع محمل الجد ولا......
وسكت..
ابتسمت بسخريه وهي مغمضه عيونها بأسف بعدين فتحتهم وقالت:اعتقد انت بروحك كذا مرة مدحت فتربيتي وتقول اكثر شي يعجبني فيك خجلك..احلا حاجه فيك انك تتحشمي...الشي اللي لاحظته هدا فيا ع شن يدل!؟مايدلش ع ان الإنسانه اللي تتعامل معاها..لاتعرف تلعب ع حد ولاتستغل حد....ولاتضحك ع حد..
اني يا ياسين كنت صريحه معاك من اول يوم ومادرقت عليك شي..ولو كانت عندي نيه مش كويسه راهو ماقتلكش بكل ع علاقتي السابقه اللي وصفتهاع انها فاشله....وخيرتك وقتها تكمل ولاتمشي ع حالك...وانت اخترت تكمل..ولا؟..
ياسين كان مضايق هلبه من نفسه...كلامها هدا بينله انه جرحها وغلط فيها..
رفقه ودموعها تنزل:تعرف اللوم لاعليه ولاعليك ياياسين اللوم كله على اني اللي رجعت عطيت فرصة لنفسي نكرر نفس الغلطه ....اسفه جدا لإني وثقت فيك وشفتك غير عنه ..اسفه بجد..
وصكرت عليه...
وقعدت تبكي بصمت وقلبها موجوع ع الآخر..
مشت قعمزت ع السرير بهده..
وشدت تليفونها بإيديها الزوز وقعدت تكتب فرساله..
فنفس الوقت اللي كان فيه ياسين يتصل..
هي تفصل عليه وتكمل كتيبه وايديها يرجفوا...
وياسين عاود وهي رجعت فصلت عليه..
بعدين رشفت...
وهي تحول فالحظر من ع رقم مروان..
بعتتله الرساله...
مشت...
بعد تأكدت انها مشت حطاته فالحظر من جديد..
ورجع اتصل ياسين..
فصلاته مرة تانيه وحطاته فالحظر حتى هو..
بعدين لوحت تليفونها ع السرير..
وحطت ايديها ع وجهها وقعدت تبكي بكتمان...
وقلبها موجوع....
...يتبع....
