العشق_المتمرد "عندما يزهر الليمون"
#جمان_فريد
الجزء136 القسم الأخير
⏳..
"باهي اللي ريناك ياسي"
الجمله هادي قالها هانيبال متهكما لصديقه ونسيبه ضو وين ماهما واقفين في جنان حوش الحاج عبودة..
ابتسم ضو ورد عليه يقول:شنو حالك..
ضحك هانيبال بتهكم بعدين قال:الحمد لله..شنو حالك انت..
ضو حط ايديه فجيوب السوريه العربيه وهو يقول:الحمد لله..ضيق عيونه بتسائل وهو يقول..بتغدا هنى ولا فحوش هلك؟
هانيبال:بنتغدا هنى لكن تو بنعدي للقطعه..
ضو:امم..تمام تجي تتغدا هنى وتقيل وبعد العصر نعدوا اني وياك غادي نعيد حتى اني..
ضيق هانيبال عيونه وهو يشوف لضو بنظرات شك..
ضو رفع حواجبه وابتسم وحرك راسه بتساؤل..
بمعنى"خيرك ؟"
هانيبال تنهد بعدين لبس نظاراته وقال:نشوفك ع الغدي..خبط بيده ذراعه ضو وقال..بالسلامه تو..
ولف ومشي للباب..
ابتسم ضو ابتسامه جانبيه ولحقه ..
فتح هانيبال الباب وطلع...
وضو صكره وراه..
تنهد ورفع حواجبه ونزلهم بعدين لف وخش للحوش..
🍀اما هانيبال فكمل طريقه للقطعه وهو منزل راسه لوطا يشوف للأرض...
يفكر في ضو لوين يبي يوصل بالزبط؟
هانيبال كان قلق من جواب السؤال هدا هلبه..
تنهد ورفع راسه لما خش للقطعه..
شاف سيارات ولاد كفايه وسعد وخيري مدرسات حوالين شجرة النبق..ابتسم..
وكمل للحوش يبي يسلم ع خواته قبل..
وصل في الركابه..
ركبت وكمل للباب حول شبشبه وخش..
لقي البنيات الصغيرات مقعمزات مع بعض..
لما شافوه ناضوله وهما يقولوا...
"هاني..خالو هاني"..
هانيبال طبس وهو يقول:اهلا اهلا..
جوه بالوحده سلم عليهم بالخد..
عيدوا عليه وعيد عليهم...
بعدين وقف ع حيله وقال:عطتكن غاليه شكلاطه؟
آسيا:ايه من اول ماجينا..
"خالو".
شبح القدام لقي رانيا جايه وفيدها الرضاعه وهي مبتسم..
وصلت فيه..سلموا ع بعض بالخد وعيدوا بعدين قالت رانيا..
رانيا وهي تخض فالرضاعه؛النساوين داخل..
هانيبال:باهي اضبحيلي عليهن..
رانيا بتسهويك؛من؟النساوين!؟
رفع هانيبال قفا يده..
ضحكت وهربت تجري للدار..
نزل يده وشبح للبنات للصغيرات لقاهم يشبحوله وهما يضحكوا..
هانيبال بإبتسامه:وين سهى مازال ماجت؟
حنين؛قالت ماما غاليه فالطريق..
مسح ع شعر حنين وقال:بابا بيجيك العشيه بيطلعك يدهور بيك..
حنين بفرح:حقه!!
هانيبال:ايه حقه..
حنين ابتسمت بفرح والبنات يشبحولها وهما مبتسمات ببراءة وفرحانات لفرحتها..
"هنيوه"..
رفع راسه لقي زينب ونعيمه وكفايه جاياته..
هانيبال؛عزايز..
ضحكوا كفايه ونعيمه.
زينب مدتله يدها وقالت:لا انت اللي صغير..
صافحها بقوة..
زينب بوجع؛لا لاا..والله نعيط الله..
رخي يده وهو يضحك وسلم عليها بالخد وعيد عليها وهي عيدت عليه...
فالدار..
دلال كانت مقعمزة وفحجرها فارس ترضع فيه بالرضاعه وهي تقول:فيه هلبه من المرحوم محمود ولا؟
كامله اشرت ع دلال وقالت؛هاه ريتن..
اصاله بضحكه:انتي وامي في كل شي متفقات.
دلال بضحكه:بجديات والله..الله يرحمه شايفه صوره ملامح فارس قريبه عليه..
هندا وهي تشوف لفارس بإبتسامه:صح بدي يجيب منه..
ع خشة نعيمه؛دلال رباب نوضوا عيدوا ع خالكم..
رباب:شويه بس خل نغير لهالمنجوهه حوايجها بزعت ع روحها الميه..
دلال:امينه تاخدي فارس؟
امينه بإبتسامه؛مال شنو جيبيه حبيب جداه..
ناضت دلال بفارس وهي مبتسمه
وحمواتها سليمه واصاله يشبحولها..
عطت فارس لجداه..خداته امينه بمرضعته..
ودلال مشت طلعت من الدار..
وسليمه واصاله معاها بعيونهم لين طلعت..
🍁🍁🍁🍁
فالمربوعه الخارجيه..
ماشاء الله رمضان كامل..
ايمن بإبتسامه:ايه والحمد لله..
عمار بإبتسامه:بعدين نبي نسمع منك تلاوة..
ايمن:عندي صفحة ع انستقرام ديمه نزل فيها مقاطع تلاوة.
عمار:راك تقولي توري فوجهك؟
ايمن بإستغراب؛ايه ليش؟..
عمار حرك راسه يمين ويسار وهو يقول:غلط..لو صوتك فالتلاوة جميل خلي اللي يسمع يخشع وينشغل باللي يسمع فيه مش بحاجات تانيه..يعني متلا صور فيديو مناظر طبيعيه وانت تتلى..خل الناس تحس بالكلام وتفهمه وتنشغل بيه بدال ماينشغلوا بحاجات اخرى اضيع عليهم اجر الإستماع وضيع عليك انت اجر التلاوة بالذات ياعمي انت ربك عاطيك وجه حسن ممكن يفتن النساء لو يشوفنه ويشغل العقول عن معنى كل كلمه من كلام ربك..تخيل بدال ماتكسب اجر تكسب ذنوب..
ضحك ايمن وقال وهو مندهش:الحق نشوف في تعليقات مش ولابد ونحدف فيهن كنت نقول عليهن خفيفات وتافهات..لكن الباين الغلط مني اني..
عمار:انت تتحمل جزء من الغلط..المهم تو تغير طريقتك من هنى وبرا غادي..
ايمن ابتسم وقال:حاضر..
الحديث هدا كان يدور بين العم وولد خوه في جهة من المربوعه الكبيره المعبيه رجاله..
وكانت عيون جواد معاهم..
شويه ناض من حدا الولاد ومشالهم..
عمار:نا خشيت جديد ع الفيس بوك..الإنستقرام نسمع بيه سمع بس..
ضحك ايمن وقال؛تو نبعتهلك..
عمار ابتسم وقال:كويس..شبح لتليفونه وقال..فتحت البلوتوت..
ضحك ايمن وقال؛باهي.
عمار بضحكه:لازم نجاروا الوقت..
ايمن بضحكه:اللي يسمعك يقول نديد جدي..راك كيف صكرت الأربعين..
ضحك عمار وخبط ايمن ع قفاه وايمن يضحك..
وصل فيهم جواد وقال:نقعمز معاكم بوي عادي؟
ايمن؛ولدك هدى ادب يمشي ع رجليه..
عمار رفع حاجبه اليسار وقال؛لمن بيطلع يعني؟!!
ضحك ايمن..
عمار ابتسم وقال لجواد؛اكيد ياباتي من غير سؤال..
جاه جواد وقعمز جنبه بالزبط..
عمار حاوطه بذراعه..وجواد ابتسم..
عمار:وصل..
ايمن:تمام هات نفتحلك حساب..
عطاه الهاتف..
خداه ايمن وبدي يفتحله فالحساب..
وعمار يهدرز ع جواد..
بعد دقائق..
ايمن؛تمام..هكي ولى عندك حساب ع الإنستقرام..اهو جنك اقتراحات واحد منهم نا..وهدى اصيل..وهدى العم هانيبال..وهدي...شبح لعمه وعطاه التليفون..
لقي اقتراح لحساب اسمه مكتوب بحروف اللغه الإنجليزيه..
"BASH MOHANDSA"
عمار رفع حواجبه بعدين قال؛تمام صحيت..
ابتسم ايمن مجامله وشبح لخوه مختار اللي كان مقعمز جنب اصيل وعثمان ويهدرزوا مع بعض..
شويه وانفتح الباب وخشوا هانيبال ومعاه حميد وولاده وهما يقولوا:السلام عليكم...
كلهم ردوا عليهم باصوات عاليه متقطعه:وعليكم السلام..
وخشوا وبدوا يسلموا ويعيدوا ع الموجودين..
🍁🍁🍁🍁
الساعه 12:30قبل الظهر..
واقفات فالكوجينه يوتوا للغدي وهما يهدرزوا..
البارقه:هدي انظر منين تجيب فاخباركم..
فضيله:فالبلاد مافي شي يدرق يسمعن خواتها ويعاودن..
البارقه:لكن خبر حملك ماطلعتوه انتم..
فضيله:تلقيه طلع بالغلط من هني ولامن هني..
البارقه وهي تفكر:مش عارفه اني حاسه ان في حد يجيبلها في اخباركم بدليل الحركه اللي دارتها لما خدت بنتها ليش مادارتها كان بعدين ليش مش من الاول..
فضيله:ماهي قبل كانت تسكن فالشرق وتوا فزليطن ساهل جيانها للبلاد..
البارقه:باهي انتي بروحك مش قتي انها من لما خدت بنتها وخلتها عند هلها ما جتها بكل..
فضيله سيبت الموس والبصل وضيقت عيونها وهي تقول:شن تبي تقولي يابارقه؟
البارقه حطت كيسة الرز ع الرخامه وقالت:في حد من العيله يرفعلها فالاخبار..
فضيله سكتت وهي تفكر فكلام البارقه..
والبارقه قعدت تشوفلها وهي تفتح فكيسة الرز..
وقفت لما سمعت بنت خالتها وهي تقول..
"المومياء لميا"..
ضحكت وقالت:اني ماتوقعتش غيرها..
فضيله بإزدراء:المخلوقه هدي اعوذ بالله منها..مش عارفه كيف خشت لعيت رمضان..
البارقه بضحكه:كيف ماخشت سميه..
ضحكت فضيله وقالت:صح...
🍁🍁🍁🍁
شن هدا؟
سناء؛رز ابيض..
عقدت نادرة حواجبها بإستغراب وقالت:اللي فالحوش كلهم ياكلوا فالكسكسي..
قرصت لمياء خد امها وقالت:ليك انت ياسمح..
نادرة:لالالا تبوني نخلي كسكسي دنيا وناكل هدا!
دنيا وهي تحبب فالكسكسي بالدهان:امي راهو هادي توصيات عمي مصباح مش منا حني بس والله يدير قايله سودا كان راك تاكلي في الدهانات والطبايخ..
سناء بضحكه:فكينا من فصلات صبيح ياندو..
ضحكوا..
ونادرة قعدت تحرك فراسها يمين ويسار وهي تضحك..
🍁🍁🍁🍁
الساعه 4:30قبل العصر..
في سيارة اصيل..
عمار:نبيك تحكي اللي تعرفه..
هانيبال بإنفعال:تشن تبيني نحكيلك!؟
عمار ضم شواربه لداخل وتنفس بعصبيه..بعدين شبح لهانيبال شويه وقال:نسيبك ضو عبودة شن عنده مع..
سكت وغمض عينه بشده بعدين فتحها..ضم شواربه بغضب وشبح القدام..
هانيبال:مافي شي ياعمار ما..في..شي..
عمار بضيق ممزوج بالعصبيه:ع العموم كان في حاجه تو نعرفها..شبحله واشر عليه بسبابته وهويقول..ونبيك تفهمه ان بنت اختك مرجوعها لراجلها خليها تترسخ في راسه الحاجه هدي..
هانيبال:تو انت قاعد تقولي قوله ماقوله والراجل مافي شي فراسه من اللي فبالك بكل..لو في كنت عرفت حتى لو ماقال اني صاحبه ونعرفه زين..
عمار رفع حواجبه وهو يشبحله وقال:اها..تمام..كلامك ضمانه راهو..
رفع حاجبه هانيبال وهو يشبحله..
عمار نزل حواجبه وشبح القدام وقال:قتلك اللي عندي..
شبحله هانيبال شويه بعدين قال:باهي..خلاص توا صكر ع الموضوع لانه بعدين شويه بيجي..قبل بنجي اني وياه بعد العصر لكن اتصالك جابني تو بروحي..
عمار هز راسه وقعد ساكت..
هانيبال شبح القدام وقال فنفسه"ربي يعدي هاليوم ع خير"..
🍁🍁🍁🍁
بنمشي اول الأسبوع بندير شمعه لوجهي وسير..واليوم اللي قبل الحفله بديرلي جلسة عناية بالبشرة ومعاها الحمام البخاري..
حميده وهي تاكل فالعوينه:مانكش منقيه حواجبك؟
رفقه:لالالا مانيش قاربتهم بكل..
دلال:حتى اني مامسيتهمش بكل لتوا..
حميده؛حتى تنظيفه بسيطه..
رفقه:ولا حتى نفوت من جنبهم..ليش ياكبدي نخش حياة جديده واني ملعونه..
رزان وهي ترضع فولدها؛الحمد لله مامسيتهن..
رباب قالت؛نقيتهم هلبه لما كنت صبيه..وبعد انقرت فاتحتي مؤنس عطاني قلة السماح لو مسيتهم قعدت نشقر بس..
حميده عكرشت وجهها وقالت:ماني عارفه ليش تعسروا في الدين..ان الله غفور رحيم ياهووو..
دلال:غفور رحيم للي يدير الغلط وهو غافل ولاجاهل ولااللي يغلب عليه هوى نفسه وبعدين يندم..مش للي عارف ان الحاجه هادي غلط ومع سبق الاصرار دارها..
رزان:نص واضح وصريح عمتي"لعن الله النامصه والمتنمصه"
حميده تنهدت بعدين خدت حبة عوينه تانيه وقعدت تاكل فيها ومابتش ترد..اقتنعت بكلامهم لكن مابتش تبين..
رباب غيرت الموضوع وقالت:شن ناويين بديروا
لغدوة؟
حميده بضحكه؛النساوين الكبار كلهن وزعناهن لحوش عمي عبدالله عزموهن ع العشي..
رفقه:ههههه..حلو خل نهيجوا براحتنا..
ع خشة نور بولدها اللي كانت لفاته بفوطه لأنها مدوشتله..
دلال:صحه صحه ع عسولي صحه..
ابتسمت نور وقعمزت بيه حدا حوايجه
رزان ولدها كمل رضاعه حطاته ع كتفها وقعدت اطبطب ع ظهره وهي تقول:قديش خاطري تجيني بنيه..
رباب بإبتسامه؛يهبلوا البنيات..
حميده؛وانتي نور..
نور وهي تلبس في ولدها:وليييييد..
رفقه:علاش ماتحبيش البنات؟!
نور:لا مش مانحبهمش لكن هكي نتمنى نجيب ولاد بس وفالنهايه اللي يجي من ربي يامحلاه..
رباب:ايه يامحلاه..شبحت ايمينها لولدها وبنتها اللي راقدين حدا بعض ابتسمت وقالت؛لكن الحق فرحت وين جاني فروسي وليد..
دلال:اني بالنسبه ليا مافيش فرق لكن نفضل البكر وليد..الولد الكبير يكون لأمه ولدها وراجلها وخوها..ربي يحفظلي كبيري..
رزان رفعت حاجبها وقالت؛لكن ردي بالك وين يكبر وتزوجيه تقرشي ملحة مرته..
شبحوا لبعضهم وقعدوا يضحكوا..
ورزان شبحت لولدها وهي مبتسمه وقالت:عن نفسي مستحيل ندير هكي فولدي..
هدوا ضحك وشبحولها..
شويه وبدت رزان تغني...
سعدي بيه سعدي بيه ..ان شاء الله من جاب يربيه..
ماتشمتله عادي فيه...ودير حجاب السدر عليه..
سعدي بيه سعدي بيه...ويارب القدرة عليه..
رباب بإبتسامه؛تهبل الاغنيه هادي ديما نغني فيها لفروسي..
شبحتله وبدت تغني..
وجبر جبير جبر جبير...إن شاء الله وليدي يولي كبير..
ويبدا يجبد فوق البير...واللي يقول عليه يصير..
زينب كانت فايته من قدام الدار لما سمعت بنتها تغني وقفت فالفم وهي تشبحلها بإبتسامه رباب شبحتها وابتسمت..
نور وهي تمشط فشعر ولدها كملت غني..
وبيك جبور وبيك جبور...بيك جبور بيك جبور
سانيتك ماتقعد بور...مداير فيها زرع وثور..
دلال بضحكه:وخيتي انوسي بيدير مزرعه وتيران..
ضحكوا..
ضحكت دلال بعدين قالت:حتى اني بنغني ع وليداتي..
شبحولها...وهي بدت تغني..
بيك جبر وبيك جبر...وعدوك مايطق شهر...
بيك جبر وبيك جبر..ولاتشبح عازة ولاشر...
وكفايه طالعه من الدار التانيه..
سمعت صوتهم وهما يغنوا وزينب واقفه فالباب..
مشت طول وقفت حداها..فالوقت اللي بدت فيه نور تغني مرة تانيه وهي ترقص فأنيس..
بيك جبار وبيك جبار..وعدوك مايطق نهار..
بجاهك يامن حج وزار..بيك جبار وبيك جبار..
لولا ولدي عقلي طار...نحلف مانقعد فالدار..
دلال ورزان ورفقه شبحولها بحزن..
وكفايه ركزت عليها وهي تغني في اخر مقطع صوتها زي اللي انخنق..
لكن نور شدت روحها وكملت..
لين العود اليابس يخضار..يزهى قليبي اللي محتار..
سكتت وقعدت تبوس في ولدها..
كملت رباب غني..
زينك زين وزينك زين..وزين الخشم وزين العين..
وزين الحاجب والعرنين..ويازين خوالك الاتنين..
زينب بضحكه:ايوه ايوه..
بعدين رباب حطت ايديها الزوز ع قلبها وغنت بهويام:
وزين اوبيك ضي العين..
كلهم:هههههههههههه..
زبنب بضحكه:قرده..
ورباب تضحك...
🍁🍁🍁🍁
الساعه 6:30 مساءا..
هانيبال يبخبخ قدام المربوعه..
وع يمينه واقف عمار وع يساره واقف ضو
ضو:يعني انت تو مش مستقر فمكان واحد؟
عمار:امم..وقريبا بإذن الله حنستقر..
ضو:اها..وين في مصر ولاتنزانيا؟
عمار:في ارض الله الواسعه..
ضحك ضو نص ضحكه وغير عيونه عنه وشبح للوادي..
وعمار يشبحله من ورا النظارة بحده..
وهانيبال مرة يشبح لهدا ومرة لهدا ومرة يدير روحه مركز ع الطوبو..
شويه وعمار ابتسم ابتسامه جانبيه وقال:الا حق ضو ليش قاعد لعند توا مااستقريت..بما انك جبت سيرة الإستقرار
هانيبال حرك عيونه بإتجاه ضو..
ضو ابتسم:المواصفات اللي فبالي لقيتهن متأخر وان شاء الله عن قريب نستقر مع صاحبتهن..
حرك هانيبال عيونه لعمار..
عمار هز راسه وقعد ساكت..
وهانيبال ركز ع العرق البارز في جبهته فافضل يدخل:تشربوا شاهي ولاقهوة..
ضو:الشاهي شربناه نبوا قهوة..
هانيبال؛عمار..
عمار بحده؛قهوة..
شبح هانيبال للولاد الصغار اللي كانوا يلعبوا بالبطش نادى وهو يقول:قصي..قصي..
شبحله قصي وجاه طول وقال؛نعم عمي..
هانيبال؛عدي قوللهم يديروا قهوة..
قصي:حاضر..
وطار يجري للحوش..
عمار اللي كان دمه يغلي فعروقه يحاول يكتم غضب وغيرته قال لهانيبال:ترا هات شوي..
هانيبال طول مدله الطوبو...
خداه عمار وقعد يبخبخ..وضو يشبح للوادي وهو مبتسم..
اما هانيبال فكان ع اعصابه..
🍀معاه عمي عمار وعمي ضو..
دلال فنصت وقالت؛باهي باهي..
قصي لف وطلع من حداها جري..
دلال:زعمه تصير حاجه!!؟..حركت راسها يمين ويسار وقالت..لالا هادم رجاله كبار نهاري مش مراهقين..
هزت راسها ومشت خدت البكرج من الشباك وهي تقول..ايه مستحيل...
🍁🍁🍁🍁
فم بوابه الحوش القديم..
كانوا مفرشات حصيره ومقعمزات يهدرزوا..
زينب؛وين المشكله امينه؟
امينه:بعد هالعمر ياوخيتي يازينب؟
نعيمه؛هدا طليقك وبيردك وين العيب ؟!
اصاله؛عيينا وحني نقولولها في نفس الكلام..
امينه: مش عارفه مش متقبلتها..
كفايه؛لا تقبلي حبيبتي تقبلي..ولي للراجل وكملي باقي عمرك معاه خير ماتقعدي بروحك..
هندا:صح..ونا قلتلها نفس الدوة..
لطيفه:مادام ولادك شجعوك تولي زي ماقلتي معناها اقل شي ع خاطرهم وليله..
امينه سكتت وهي تسمع فيهم وتفكر فكلامهم..
سعيده:راجلك ونسك ياامينه تلقوا بعضكم توا بالذات بعد تزوجوا ضراريكم وكل واحد.يلهى بروحه تلقيه هو يلهى بيك وتلهي بيه ان شاء الله حتى بالمناقرات والعراك..
ضحكوا..
شبحت امينه لسعيده وهي مبتسمه الكلام اللي قالاته سعيده من قلبها وصل لقلب امينه..
قلب امينه اللي ماحبش راجل غير صبري وكان يراجي فدفعة قويه تخلي صاحبه ياخد قرار الرجوع...
وامينه خدت قرارها لكن ليه شروطه..
🍁🍁🍁🍁
ماشي بإتجاه ممر فم البوابه وهو يلعب بالمفتاح ويغني...
لولا الما لولا الما ماكان كاين حي..
وصل في الممر وخشله وجي للروشن وكمل يغني..
لولا الما ولولا الما ماكان كاين حي...
ضحكت دلال وقالت:تبي ميه خالي..
ميلاد بإبتسامه؛نبي ميه..طاسه كبيره..
دلال بإبتسامه؛حاضر..
مشت للشباك وخدت اكبر طاسه..
ميلاد ركز بنظره ع الرخامه شاف صفره عليها شنترو وفوقه تلاته فناجين قهوة قال:لمن القهوة..
دلال وهي تصب فالميه؛لخالي هانيبال وصحابه..
ميلاد بإستغراب؛من صحابه ماقال بيجوه صحاب..
جت دلال لخالها بطاسه الميه وقالت؛قصدي ضو عبوده..
خدي منها الطاسه وقال:والتاني من؟
دلال نزلت عيونها للبكرج وقالت:ولد عمي مختار..
ضحك ميلاد بعدين قعد يشرب في الميه..
ودلال طفت ع القهوه وخدت البكرج ومشت تصب فيها فالفناجين..
كمل ميلاد شراب وقال:الحمد لله..مد لدلال الطاسه وقال..بنتي بعد تكملي اطلعي شويه نبيك..
دلال شبحتله وابتسمت بضيق بعدين خدت الطاسه وقالت؛صحه..
ميلاد ابتسم وقال:سلمك..ومشي قعمز..
شويه وجي رمضان حميد..
ميلاد؛شيخ رمضان..وين عدا سيدك..
رمضان:مشي هو وعمي سعد وعمي عبدالسلام..
ميلاد؛اها عارف وين عدوا..
رمضان:من يدير فالقهوة؟
طلعت دلال بالصفره وقالت:بترفعها انت..
رمضان؛ايه..
دلال مدتله الصفرة..
خداها ومشي..
وهي مشت وقعمزت حدا خالها..
ميلاد شبحلها بإبتسامه وقال؛شنو حالك دلوله..
دلال ابتسمت وقالت:الحمد لله خالي..
☘☘☘
وصل رمضان بالصفره ومدها لعمه..
خداها هانيبال وقال:فيها زهر...
عمار شبح للصفره..
هانيبال:فايحه..هدي قهوة عرب طرابلس..
رمضان:زي قهوة امي الله يرحمها..
عمار وضو شبحوا لرمضان وقالوا مع بعض:الله يرحمها..
هانيبال:الله يرحمها..
رمضان:دلال دارتها هادي..
عمار تقول ضربه الضي لما سمع اللي قاله رمضان..
وضو شبح للصفره وابتسم..
هانيبال عقد حواجبه وتوتر:احمم..باهي عدي..
رمضان هز راسه ولف ومشي..
هانيبال مد الصفره لضو ومالحقش يقول تفضل الا وتجي الصفره منقلبه باللي فيها..
وهو ضو حصلوا فجرتها دوش..
عمار:اسف عيني بالهون نحسابها بتجي ع شجرة الكرمه..
هانيبال قعد يشبح لعمار..
وضو قال؛عادي مش مشكله..معذور.
شبحله عمار..
هانيبال غير عيونه عن عمار وحاول يتمالك اعصابه..
طبس رفع الصفرة والفناجين وهو يقول:حصل خير..
ضو بضحكه:الجو نو وهو برد علينا..
عمار؛شكلك مازال خاطرك..
ضو:هههههههه..
هانيبال ناض وقف ونادى بعصبيه:رمضااان حمييد..
رمضان جاه يجري وصل فيه وقال:نعم..
هانيبال بعصبيه:هاك ارفعها..
رمضان:حاضر..خدي الصفره ومشي بيها..
حط هانيبال ايديه في نصه وهو يشوف القدام وملامح الغضب ع وجهه..
وضو مشي قعمز ع الكرسي..
اما عمار كمل تبخبيخ وجميع سيناريوهات جرائم القتل تخطر في باله حاليا..
🍁🍁🍁
في نفس الوقت..
ميلاد:باهي ياخالي عندك حق وكلامك كله مزبوط..لكن حتى انتي لتو مش مستوعبه ان الراجل كان عايش فحالة نفسيه صعبه..قعد يعد ع صوابعه..فقد كراعه وفقد عينه..شاف الموت مرات ومرات..وقف عد وكمل يقول..حطيتي روحك مكانه!!راهو يابنتي مرار الهزيمه بروحه يكفي يدمر البنادم نهائي تي في ناس عاديه مؤيده لمعمر لما انهار حكمه ومات جتهم حالة نفسيه..يابال عمار يابنتي وانتي عارفه منو وشنو كان عمار..تعرفي..نعرف ناس كيفه..انتحرت حتى الإنتحار يابنتي.
دلال تنهدت بحزن وقعدت ساكته وهي تفكر فكلام خالها..
ميلاد؛نقولك حاجه..عمار لعند هاللحظه نفسيته مازال تاعبه وهو راهو قاعد يعالج في روحه..ويبي منك تصبي معاه وتكوني جنبه لين يولي احسن من قبل..
دلال شبحتله وقالت:باهي كيف يكون تعبان نفسيا وهو دار اللي داره للناس فالبلاد اللي كان عايش فيها؟
ميلاد:اللي فهمته..ان عمار وقت عدا غادي كان يبي يعيش في مكان مايذكره بشي من حياته الاولى..يبي حياة بسيطه زهيده مافيهاش اي شي من مظاهر القوة والنفود والرفاهيه..يبي يهرب من الشي اللي واجعه..كيف اللي نفي روحه بروحه..لكن اللي راه غادي غيرله تفكيره بالمره..عندك علم لعند ماعدا غادي ماكانش يدوي؟!الناس اللي غادي هما اللي خلوه يتكلم...
دلال قعدت ساكته وتسمع فالتفاصيل اللي ماتعرفهاش وبإنتباه تام..
ميلاد؛تعرفي شن قالي..قالي اني ياميلاد شفت غادي ناس اقوى مني ايمان وتمسك بحبل الله عايشين حياة صعبه صح لكن ايمانهم كان اقوى واثبت من الجبال..قال وين ريتهم كيف كانوا ملهوفين وهو يتعلموا مني فطريقة الصلاة الصحيحه حسيت ان ربي بعتني ليهم..بيش يساعدوني مش بيش نساعدهم..هكي قال..
دلال:شكله توالف معاهم هلبه..
ميلاد؛تقول هله وناسه..
ابتسمت دلال..
ميلاد:تعرفي يابنتي لو سمعتي منه شن ري وشن شاف حتقدري المعاناة اللي عاناها..انتي عانيتي وهو عانى واللي راه هو اكثر من اللي ريتيه..اقل شي انتي كنتي بين هلك..لكن هو كان بروحه..وماتقوليش اختار هكي..هو انجبر كسرة الراجل يابنتي مايفهمها الا الراجل اللي كيفه...
يابنتي اسمعي مني..ولي لراجلك وربي انتي وياه عويلتكم العويله ع خاطرهم يابنتي ولي..
دلال نزلت عيونها وتنهدت بحزن..
ميلاد:ربي يهديك للي فيه الخيره..
دلال شبحتله وقالت:آمين ..
ع طلعة آسيا؛ماما..
دلال شبحتلها وقالت؛قتلك ماما مش توا بعدين بري العبي مع البنات..
اسيا بزعل:باهي..ولفت خشت داخل..
ضحك ميلاد..
ع جية رمضان بالصفره وهي فهديكا الحاله..
شبحوله الزوز..
دلال بصدمه:خيرها هكي الصفره؟!
رمضان:طاحت من عمي هانيبال..
ميلاد ناض وقال؛وينهم هم؟
رمضان؛قدام المربوعه..
ميلاد:اها...
ومشي بطريقه ليهم..
دلال خدت الصفرة من رمضان وهو مشي ورا عمه..
هي فقعدت تشبح للصفرة بإندهاش وخشت بيها داخل..
🍁🍁🍁🍁
الساعه 8:30مساءا..
في جنان حوش برقه..
حسن؛نحط ع راسه وسلاحه ونقوله اجره بالسيف!
برقه؛انت بكلمتين تقدر تخليه يبيعها لولدي..
حسن؛صاحبي صح لكن مش للدرجه هدي..الراجل يبي يأجر لناس ماتجيه من وراهم مشاكل..
برقه؛قصدك حني متاعين مشاكل؟!
حسن غمض عيونه بنفاد صبر بعدين فتحهم وهو يقول:
من الاخير مانقدر نديرلكم شي...ترا بالله اضبحولي ع المراة بسرعه..
برقه حطت يدها فنصها ورفعت حاجبها وقالت؛ماعندكش نساوين هنى..
رفع حواجبه وفتح عيونه ع وسعهم وهو يشوفلها..
وهي قعدت تشوفله بنظرة تحدي..
رخي حواجبه وعيونه وقال؛ترا بالله صلي ع النبي وخشي ناديلي المراة..
برقه لفت ومشت وهي تقول:ماعندكش مراه عندنا..
وخشت وصكرت الباب..
حسن قعد يشبح للباب وهو جامد فمكانه..
شويه..واندفع طول بإتجاه الباب وين وصل فيه بدي يدق بقوة ...
في دار المعيشه..
كانوا مقعمزات اخت برقه وفضيله والبارقه..
لما سمعوا صوت التخبيط..انخلعوا..
فضيله:الستر هدى شنو؟
فجأة رن تليفون البارقه..
قاماته بتشوف منو لقاته حسن..فتحت الخط طول وقالت:الو..
حسن بإنفعال شديد؛اطلعيي هياا اطلعي..
البارقه ناضت وهي ترعش قالت؛باهي..باهي..
ومشت طول طلعت من الدار..
وبدريه "ام فضيله" وفضيله طلعوا وراها..
وصلت البارقه فالشماعه خدت عبايتها وشنطتها ومشت بسرعه يإتجاه الباب..
فضيله:شن في يابارقه..
البارقه وهي ترعش:والله مانعرف.
وين وصلوا في الباب اللي مازال يدق بقوة وشافوها واقفه قدامه فهموا كل شي..
البارقه:اسمعي حولي من طريقي حولي تربحي..
برقه:عدي خشي داخل..
بدريه؛شنو في يابرقه!
برقه:بنتي عطيتها وبنردها هدى اللي في يابدريه..
البارقه مشت للباب هي دفتها جت ع فضيله اللي شدتها وهي تشوف لخالتها بصدمه..
البارقه وهي مصدومه قالت بإنفعال:شن تبي مني انتي شن تبي؟!
بدريه:برقه يابرقه خافي ربك يامراة..
برقه:فكني من قطافكن وانتي يافرخه عدي خشي داخل بالطيب خير ماقسما بالله نقول لخوتك يقتلوهلك قدام عيونك..
زادو انصدموا بدريه وفضيله..
اما البارقه بدت تبكي هي تقول بصدمه؛انتي شنو قولي شنو حرام عليك..تجبرك ربي بيعاقبك عليه يامراة افهمي..
"بااارقه اطلعيي اطلعيي"..
البارقه خبطت بيدها ع خدها وهي تقول بعياط:ياحياتك السودا يابارقه..ياطياح سعدك من امك يابارقه..
برقه:بتخشي توا ولاكيف..
فضيله بنفاد صبر ودموعها ينزلوا؛خالتي سادك بلي اسود حرام عليك ربك فوق يامراة ربك فوق..
قامت برقه تليفونها وقالت:ماتبوهاش تعدي بالطيب انتم..
البارقه:شن بديري..مسحت دموعها وهي تقول بعياط..شن بديري!!
برقه؛الو..مسعود....طلعوه طالعه..
نزلت التليفون وقالت:مازال ماجاباته امه اللي بيكسر خشم برقه..تريس بهيبتهم ماقدروا يحطوا راسهم براسي..ع اخر الوقت كلب كيف هالكلب يمشي كلامه عليا!
بدريه قعدت تشبحلها بأسف وهي تحرك فراسها يمين ويسار..
وفضيله والبارقه يشبحولها وهمامصدومات..
شويه وسمعوا اصوات عراك برا...
وكأن الرجاله يدافوا او يتعاركوا باليدين..
"حولوا حولوا..والله نحرقكم حرق والله..والله نهد الحوش ع روسكم..حولوا"
والبارقه بدت تخبط ع وجهها..
وفضيله تحاول توقفها وهي تبكي..
بدريه:قسما بالله من بعد هاليوم لاعاد نبيك ولاعاد نبي نعرفك..
برقه؛لا جعلك وليتي..
ومازالوا يسمعوا فصوت العراك..
"اطللع"..
"حوول قتلك حول..قتلك حول"..
واخر شي..
سمعوا صوت ضرب رصاص..
عيطت البارقه ع طول حسها..بعدين سكتت فجأة..
فضيله بفجعه؛بارقه..بارقه..
البارقه وهي ترعش:في..حاجه..نزلت..مني.
برقه طول شبحت للأرض تحت بنتها..
رعشت مع بعضها..
لما شافت بقعة دم ...
...يتبع...
