#العشق_المتمرد "عندما يزهر الليمون"
#جمان_فريد
الجزء 133القسم الرابع..
⏳...
25\4\2017
الساعه 12:30 ليلا...
واقف في فيرندا الغرفه يتكلم بالتليفون..
"شن حال الحاج مختار؟"
تنهد عبدالسلام وقال:شن بنقولك ولاشن نحكيلك يانعيمه بس..
نعيمه بحزن:للدرجة هادي حالته صعبه!؟
عبدالسلام سكت شويه بعدين قال:الحاج مختار حاله باهي يانعيمه مافيه شي..
نعيمه ضيقت عيونها بإستغراب وقالت:مافيه شي!!؟مش ع اساس اصيل قال انه تعبان هلبه..
عبدالسلام:مافيه شي يانعيمه مافيه شي قتلك..اصيل هو اللي طلع يبينا نجو..
نعيمه :كيف!!؟
عبدالسلام:زي ماسمعتي هو اللي يبينا ع خاطر شي مايخطرش ع البال حتى الخطور شي لعند توا والله العظيم ماقادر نصدقه ولانستوعبه..
نعيمه خافت هلبه..قالتله:عبدالسلام قول شن في خوفتني هلبه...
ضم شواربه لداخل بعدين قال:اول ماوصلنا هني................
🍁🍁🍁🍁
يسمع فأصواتهم وهما يهدرزوا فالصالون ع موضوع هادي تاني مرة يسمع عنه دوة..
"زواج دلال"..
واللي كان حارق دمه وهو يحكي فهالموضوع واساسا هو اللي فتحه...
مختار:باهي ياجدي هي تبي تتزوج حقها..تاخد الولاد وحني ناخدوا بنتنا..
مختار الجد بقلة صبر:قعدلي شوي ونفصل عليك فصله ماعمرها صارت..
مؤنس بحده:عدي ارقى لدارك..
مختار شبح لمؤنس بحده..
مؤنس ردله نفس النظره..
هز مختار راسه وناض من بحداهم وهو يمشي بغضب..
طلع من الصالون لقي اصيل قدامه فات من جنبه ومشي طول..
اصيل قعد معاه بعيونه وهو يشوفله كيف راكب الدروج..
بعدين غير عيونه عنه وقعد يفكر...
《 وقالت:خالك غاب عني 7سنين ع انه ميت..وغيابه هالمده شرعا طلعني من ذمته...يعني ماتجيش تقولي مرت خالي..》
زفر...بعدين قال بصوت هامس:مشكله والله...
شبح لباب الصالون وقال:ربي يسهلها غدوة وخلاص...
غير عيونه ع الباب ومشي لداره وهو يحرك فراسه يمين ويسار...
🍁🍁🍁🍁
مقعمز ع السرير بالطول..
حداه الكامدينو اعلاه بريزة ضي "قابس كهربائي"..
حاط فيه مقبس لجهاز شحن يشحن بيه رجله الصناعيه..
ع الكامدينو غطاء عينه اليسار..
كان مربع ايديه ويفكر ...
في اللي صار اليوم..واللي حيصير غدوة واللي مازال بيصير القدام..
حط قدامه الإحتمالات السيئة وقعد يهيأ فنفسه ليها...
وقعد يتخيل فيها صارت معاه....
خطر عليه ردة فعل دلال...
تلقائيا ارتسمت ع وجهه ابتسامه وتنهد بعدين قال...
"معليشي..معليش"..
🍁🍁🍁🍁
"عبدالسلام واعي لروحك شنتقول!!".
عبدالسلام رفع حواجبه ونزلهم وهويقول:والله ماني عارف..
سكتت نعيمه معاش تكلمت..
عبدالسلام؛نعيمه!
سمع صوت تنهيده قويه بس..
عبدالسلام :عندك حق شي يخلي اللسان يعجز ع الكلام..
تنهدت نعيمه بحسرة بعدين قالت:عبدالسلام..
عبدالسلام:نعم..
نعيمه:ردبالك ع دلال ماتخليهاش بروحها تربح..
عبدالسلام؛ماليش هلبه جاي من دارها..قبل نكلمك..قعدت معاها لين هدت ورقدت..
سكتت نعيمه..
وهو قعد ساكت...
لحظات ونعيمه قالت:عبدالسلام..بالله بجديات تدوي!!حي حي!؟هو..هو نفسه!!؟
ضحك رغم عنه وقال:تعرفي..خاطر ع بالي نولي للفندق اللي هو فيه ونشوفه مرة تانيه..بش نزيد نتأكد..
نعيمه تنهدت من جديد بحرقه وقالت:استغفر العظيم وخلاص..والله نرعش مع بعضي ياراجل...
عبدالسلام:هدا وانتي سمعتي سمع بس مالا كان ريتيه بعيونك شن صار فيك!
نعيمه بقلق:هدا علاش نبيك تمشي تبات حدا بنتك خايفه عليها هلبه ياعبالسلام...مانكش غابي فاللي صار معاها قبل..
عبدالسلام هز راسه وقال:نصكر منك توا ونمشيلها...
نعيمه:باهي..كان صارت حاجه كلمني تربح والله عقلي طار من راسي..وقلبي مقبوض ..
عبدالسلام:بري خودي كصبر ولا اشربي ميه وسكر..وكانك ع بنتك ماتخافيش عليها اني معاها..
نعيمه؛باهي باهي..تصبح ع خير..
عبدالسلام:تصبحي ع خير...وصكر...
🍁اما نعيمه بعد ماصكرت طيحت التليفون فحجرها..
وحطت ايديها علي وجهها وهي تقول...
"لاإله إلا الله"..
🍁🍁🍁🍁
في نفس الوقت...
فالغرفه اللي فيها دلال
كانت راقده ع جنبها الأيمن فالسرير..
وشاده فيدها تليفونها وتتفرج ع مقطع فيديو ليه هي صوراته...
كان فالعيد الأربعين..
صوراته وهو لابس البدله العسكريه الرتبه والنجوم مزينات كتافه..
الطاقيه فيده..ورافع كمامه لمرافقه وماشي بإتجاه السياره وهي معاه بالكاميرا وتغنيله..
والعقل يريده..والعقل يريده..
والعقل يريده ضابط جيش سلاحه فإيده..
هو كان مبتسم لعند ماوصل فالسياره.. فتح الباب وركب...
هي قعدت ترقص بكتافها وهي تغني..
يامامي نريده يامامي نريده ضابط جيش سلاحه فإيده.
ضرب الكاميرا بالطاقيه ضربه خفيفه وهو يضحك ويقول:عدي خشي داخل عدي..
وهي تضحك ومازال تغني..
لبس طاقيته ونظاراته..
دلال:اه ياقلبي اني...
عمار بضحكه وهو عاقد حواجبه:تي عدي خيرلك..
وصكر الباب وهي تضحك...
وقف الفيديو...
عاوداته مرة تانيه ودموعها سيل بللوا مخدتها...
كانت هالمرة مركزة بنظرها علي رجليه وهو يمشي...
وركزت ع عيونه وهو يشوفلها ويضحك..
جي بين عيونها منظره اللي شافاته بيه اليوم..
قداش في فرق كبير من الأمس البعيد واليوم فرق كبير...
طلعت من الفيديو وهي تبكي وخشت ع صوره..
خشت ع صورة ليه تحبها هلبه وهو راكب الخيل..
صورة من ايام التسعينات..واخدينهاله من عرض فعرس خوه وهو واقف وقوف ويجري بالحصان..
حطت يدها ع فمها وغمضت عيونها بشده وبكت بحرقه وألم...
بكت من قلبها الموجوع ..بكت بقوة...
شويه ورجعت فتحت عيونها..مسحت دموعها وشافت للتليفون وغيرت الصوره لصورة تانيه هي نفسها اللي حطتها ع طاولة مكتبها مؤخرا...
قربتها ليها وهي تتأمل فيها وتبكي تشهق...
قربتها اكتر وانهالت عليها بالقبل وهي مغمضه عيونها بشده....
بعدين ضمت التليفون لصدرها بقوة وزادت بكت اكثر واكثر...
💓...
هو...
انتابه شعور حلو هلبه فجأة...
خلاه تدريجيا ابتسم بعدين بدي يضحك ويقول :بديت انت هاه بديت...ههههههه..وحده من الأتنين ياتسب فيا..ياتسب فروحها وتقول..ياريتني ماخليته ياريتني قعدت معاه اااه لو نقدر نمشيله..اااه ياااربي...قال الكلام وهو يقلد فصوتها...بعدين قعد يضحك...ويضحك...
لكن شويه شويه وبدت تتلاشى ضحكته لين اختفت وحلت ملامح الألم...وعينه تعبت بدمعها وفاضت...
🍁🍁🍁🍁
اما هي..
سمعت باب غرفتها انفتح بعدين جي صوت بوها وهو ينادي..دلوله بابا...
هي طول حطت التليفون تحت المخده وغمضت عيونها ومثلت انها غارقه بالنوم..
بوها لما وصل فالدار...اللي كان بابها مفتوح شافها قاعده كيف ماخلاها..
تنهد بضيق...
بعدين غير عيونه للكنبه اللي برا...مشالها وتمدد عليها وقعد يفكر...
🍁🍁🍁🍁
26\4\2017
الساعه 11:00صباحا..
الكل كانوا مقعمزين فغرفة المعيشه...
جده وجداه وامه وخالاته وخوته وولد عمه ومرت عمه هندا..
ومرت خوه رباب..
مختار الجد:اصيل!ادوي ياولد قول شن عندك..
غمض عيونه وخدي نفس عميق بعدين فتحهم وشبحلهم...
كامله كانت حاسه بقلبها ناخصها منظر اصيل مش طبيعي بكل..
كامله:خوك وولد خالك مابيهمش؟!
امينه وهندا ماتوا من خوفهم وشبحوله..
اصيل حرك راسه بالسرعه بالنفي وهو يقول:لالالا والله مافيهم حاجه بالله..
مؤنس:بكري شوي كلمت ايمن وعثمان اتصل بيا الفجر يسأل ع حال جدي..
مختار الجد بنفاد صبر:تي باهي تكلم وقول اللي عندك...
اصيل بتوتر:بالله عليك ياجدي وسع بالك معاي تربح..
كامله:خليه يحكي ع مهله يامختار..
الحاج مختار سكت وهو يشوف لأصيل بإمتعاض..
اصيل مسح بيده ع وجهه بعدين ضم كفوفه الزوز لبعض وقال:والله بجد ماني عارف من وين نبدا ولاشن نقول..وزع نظره عليهم وكمل يقول..اللي بنخبركم بيه تو حاجه كيف الحلم..كيف المعجزة..حاجه يعني ماتتصدقش فيسع..حاجه تحط العقل بالكف..اقسم بالله من شهر لهاللحظه والله مازلت ماصدقت..
هو يتكلم وهو يسمعوله بإصغاء تام..
مافيش ولا حد من المقعمزين جي فباله اللي بيقوله أصيل حتى بالكذب ماعدا شخص واحد...
كامله اللي لون وجهها انخطف بعد سمعت كلامه وقلبها قعد ينبض بقوة وسرعه قالتله:هي حاجه وحده نا مستعده نصدقها لو كذبتها الدنيا كلها..
كلهم شبحولها...
نزلوا دموعها وهي تقول:نا اصلا حاسه ومصدقتها..وحق الله قلبي عمره ماكذب...
البنات بدوا يخافوا...
والرجاله يشوفوا لأصيل بريبه واستغراب...يراجو فيه يكمل كلامه..
غيروا عيونهم عنه وشبحوا لكامله بصدمه لما سمعوها قالت..
"قول خالك عمار طلع حي..قولها تربح"..
الحاج مختار شبح لأصيل بترقب وهو حاس بقلبه بيطلع من صدره..
اصاله بصدمه:اصيل!!!حق كلام امي!!؟..
اصيل ارتسمت ع وجهه ابتسامه حزن لحال جداه وقال:سهلتيها عليا واجد ياجدتي...
خالاته وامه...
فيهم من خبطت وجهها وشهقت بصوت عالي بعد سمعوا كلامه..
ورباب حطت يدها ع فمها وهي مصدومه ع الآخر..
اما هندا قلبها غصب عنها مش بإرادتها قعد يدق بقوة وهي تشوف لاصيل بنظرة صدمه ممزوجه باللهفه..
الحاج مختار درق عيونه بيده اللي كان متكي بمرفقها ع يد الكنبه وقعد يقول بصوت يرجف:اصيل ياولدي..راني راجل كبير وطالع من مرض...معاد عندي حيل راهو..
كامله كانت حاطه ايديها الزوز ع صدرها وهي مغمضه عيونها بشده وتراجي فرد أصيل..
اصيل تأثر هلبه من الموقف دمعوا عيونه وقال:خالي حي يرزق ياجدي...خالي عمار حي يرزق..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
21\3\2017
خدمتيني خدمة عمري يااسراء الحقيره بدون ماتحسي..
كانت تقول فالكلام هدا وهي ماشيه بشنطة فيها ولدها...
ومتوجه للسيارة..
فتحت الباب الخلفي وحطت ولدها ع الكرسي وصكرت الباب..
بعدين مشت بسرعه ركبت السيارة شغلتها وتحركت طلعت من الحوش...
🍁كانت ناويه تخلي ولدها عند رزان وتتحرك طول للعنوان اللي بعتاته اسراء فرساله..
مجرد ماوصلت فم حوش رزان..
رن تليفونها شافت المتصل استغربت..
فتحت الخط وردت :ايوه عماد..
عماد بتوتر:نور..شن جو..
نور:تمام..انت وين؟..
عماد بإستغراب:فالحوش!.
ابتسمت نور بنصر وقالت:بالله افتح الباب اني فم الحوش..
عماد نزل التليفون لوطا ومشي للباب وهو فقمة الإستغراب..
وصل فيه وفتحه..
لقي نور قدام الحوش بولدها..
خشت طول وهو وسعلها بش خشت كويس..
صكر الباب وقال:نور شن في!!؟..
نور وهي ماشيه للباب الدخلاني:تو تعرف شن في..
ومشت خشت..
وهو بسرعه لحقها وقال بغضب:شن ملبزة يارزان بس...
خش للحوش...
لقي نور واقفه فوسط الحوش مع رزان اللي كانت تبكي..
نور بعصبيه:شن هيااا!!؟..
رزان ببكي:ماعندي مانقول والله ماعندي مانقول بعد هكي خلاص..
عماد فهم ان هو اللي لبز وهلبه مش شويه..
جاهم وهو يقول:غير شن في يانور تكلمي..
نور شبحتله بغضب وقالت:من قالك عرفت بحقارة خوك من رزان!!؟...
عماد شبح لرزان لقاها رافعه حاجبها وهي تمسح فدموعها وتشبح لنور..
غير عيونه لنور لما سمعها قالت:حقارة خوك عرفتها من الكلبه متاعه...وع فكره ماقلتش كل شي راهو..
عقدت رزان حواحبها وهي تشوفلها بإستغراب..
طلعت نور التليفون من جيبها وقعدت تفتش فيه وتقول:خوك مايستحقش بكل تخرب حوشك ع خاطره..
حطت ع الفيديو وفتحاته ومدتله التليفون..
هو خداه وعيونه يشوفوا لنور بريبه..
بعدين شبح للفيديو...
تبدلت ملامح وجهه للصدمه الشديده..
قرب التليفون وهو يشوف يبي يتأكد ان هدا خوه...
وللأسف طلع خوه...
نور بتهكم:وتوا توا بعد يطلع من خدمته بيمشي يتلاقى هو وياها فشقه..شقه ياعماد..
رزان حطت ايديها الزوز ع فمها بعد شهقت بصوت عالي..
عماد شبح لنور وهو مصدوم بقوة مش قادر يتكلم..
نزلوا دموع نور وهي تقول:توا الحقيرة متاعه بعتتلي رساله وقالتلي شكلك تحسابي الفيديو فوتوشوب..تعالي شوفي لايف بش تتأكدي..وبعتتلي معاها العنوان متاع العماره ورقم الشقه..
تبدلت ملامح وجهه عماد للغضب مدلها تليفونها وقال؛تعالي معاي..
مشي..
نور شبحت لرزان بعدين رشفت وقالت:انيس فأمانتك رزان..
هزت رزان راسها ودموعها مابطلوش نزول وهي تشوف لنور بألم...
🍁طلعت نور مع عماد برا ..
عماد:تعالي معاي..
نور هزت راسها ومشت ركبت معاه السياره..
🍃خاف عليها عماد تنفعل فالطريق وهي تسوق ودير حادث ولا تصيرلها حاجه🍃
بعد صكر الباب شغل السيارة وتحرك طول...
🍃طول الطريق ولا كلمه...
الزوز كانوا يراجو امتى يوصلوا وخلاص..
وكبد عماد ع خوه دم كان يشوفه حيضربه لين يطلع روحه..
اما نور..
فكانت لاهيه تكتب فرساله بتبعتها لرقم معين..
🍁شعور الإنتقام كان هو الشعور الغالب ع قلبها مش حاسه بغيره حاليا🍁
-----------------
وااو اميمه بجديات ذوقك فضيع.
اميمه وهي تلعب بشعرها قالت بغرور:مال شنو حبيبتي..
ناديه بإبتسامه:انتي كان تسمعي الكلام بس..
شقلبت اميمه عيونها بملل..
سميه بضحكه:والله عندها حق ناديه غبيه اللي تريح علي****
اميمه:اني تبت عن الزواج ساد مرة تنزكر وماتنعاد ع قولة السوريين الحاجه الوحيده اللي كسبتها منه لؤي ربي يخليهولي غيره معاش نبي شي..
فجأة رن تليفون سميه بنغمة رساله..
قامت تليفونها مع ع الطاوله وفتحتها..
(ماما اني اسراء بعتتلك رساله من تليفون صاحبتي تليفوني تم شحنه..ماما تعالي لشقة ***** وجيبيلي معاك*****)
سميه:هادي خيرها!!.
اميمه:من هي!
سميه:اسراء قالتلي تعالي لشقة **** وجيبي معاك ****شكلها مش حاسبه حسابها..
اميمه:شن رفعها لشقتي!!؟..
ناديه؛شقتك قريبه ع عياده عبدالمعز..
سميه بقلق:شكلها تعبانه..عاودت اتصلت بالرقم..
🍁رن تليفون نور..
عماد شبحلها بطرف عينه بعدين ركز فالطريق..
نور:عماد ترا صكر الرواشن..
عماد نفد طول برغم استغرابه وعدم فهمه للي قاعد يصير..
فتحت نور الخط وقالت:الو..
"ايوه بنتي..انتي صاحبة اسراء بنتي ولاتخدمي معاها؟"
نور:نخدم معاها خالتي فجأة تعبت وقالتلي روحي بيا ل شقة ف***** لانها قريبه من العياده..
سميه:باهي ترا عطيهالي
نور:فالحمام هي...
سميه بقلق:باهي باهي..خلاص جايه..ردي بالك عليها بنتي..
نور :ماتوصيش خالتي...
صكرت سميه وناضت طول ..
اميمه:بنمشي معاك..
ناديه؛وبتخلوني فحوشكم بروحي؟
اميمه وهي ماشيه:تعالي معانا كان هدا..
ناضت ناديه وقالت:هدا اللي بيصير...
مشت وهي تقول بصوت عالي:سبقتكم لسيارتك..
🍁سميه خدت اللي وصوها عليه..
وخدت شنطتها ومشت طول طلعت ومعاها حماتها..
رفعتهم كلهم اميمه...
🍃مافي شي خلاهم يدققوا فأي حاجه من اللي صار..
كله يبان عادي عندهم...
ونور كانت متأكده ان الشقه ليهم بعد عرفت عنوانها لانها قريبه من عيادة بو اسراء لهدا فكرت فهالحيله اول ماجتها الرساله وهي متأكده انها حتنجح وفعلا نجحت..🍃
🌴🌴🌴🌴
مقعمزات فالكوجينه يهدرزوا ويوتوا فماكلة القهوة..
بلقيس:تحفه نوع الحار اللي درتيه امس ياحميده..
فضيله؛والله حق نتمناك اديري وتبيعي..
حميده بإبتسامة دهشه:لهالدرجه!؟!
غاليه بضحكه:من ماقالك هالكلام ياحميده..ابتسمت وكملت تقول..الله يرحمها غزلان قالتلي قبل نفكر نفتح معمل حار وندخل حميده معاي..
حميده وهي متفاجئة؛بالله؟!
غاليه تنهدت بحزن وقالت:والله..كان عاجبها طيابك واجد قالتلي حنافس بقوة كان خشت معاي حميده..
حميده بحزن:قالتلي قبل فبالي ليك حاجه نقولك عليها بعد نتمها..لكن قضاء ربي سبق..
التلاته قالوا بأصوات متقطعه ونبرة حزينه:الله يرحمها..
سكتوا التلاته وكملوا خدمه..
وبلقيس مرة مرة تشبح لغاليه..
شويه وقالت:غاليه..
شبحتلها..
بلقيس:نبيك فموضوع..
شبحولها فضيله وحميده.
غاليه وهي تقرض:موضوع شنو.
بلقيس:موضوع خطوبه..
وقفت غاليه تقريض وقالت بإستغراب
:خطوبه!!..
وحميده تشوف لأختها بإبتسامه وهي عاقده حواجبها.
بلقيس:ايه..اني حكيت لحميده وفضيله واستشرتهن كان نفتح معاك الموضوع ولالا لإني خفت ترفضي..
حميده:قريب بلقيس راجل ربي عاطيه وصغير فالعمر..
فضيله:نديدك مواليد 73..
غاليه :متزوج قبل!!؟
بلقيس:ايه لكن خلاص معاش في بيناتهم مي وملح ناوي يطلقها..
غيرت غاليه عيونها للكبده وقعدت تفكر..
فضيله:عنده منها 4صغار..
شبحت غاليه لفضيله..
بلقيس:امهم تبيهم قات امي..وين علمت بيه ناوي يتزوج قالتله جيبهم صغاري مايقعدوش مع مرت بوهم..
حميده:اريحلك هكي..تاخديه وكأنه عزري...
غاليه شبحت لبلقيس وقالت:شن يقربلك؟
بلقيس:ولد خال امي...
فضيله:*****عز الناس..
غاليه قعدت ساكته وهي تفكر...
فضيله بضحكه:جاتك فرصه كيف فرصتي..وان شاء الله تعيشي كيفي ني ولده وبنته وهني..
ضحكوا بلقيس وحميده..
وغاليه ابتسمت..
حميده هدت ضحك وقالت؛فكري ع مهلك ..
بلقيس؛ايه خودي وقتك..
غاليه تنهدت وسكتت..
فضيله:فكري واستخيري غويليه..
غاليه شبحتلها شويه بعدين هزت راسها بإيجاب..
التلاته ابتسموا بفرح..
وغاليه ابتسمت وقالت؛إن شاء الله خير..
🍃فرصه قد لاتكرر..وهي تفكر تقتنصها قبل ليفوت القطار نهائي 🍃
🍁🍁🍁🍁
ماشيه جايه فالصاله وهي تزازي ببنتها بش ترقد..
وشاده فيدها التليفون تشوف لصور منزلتهم غاليه ع الفيس
كانوا صور سهريه دايرينها فحوش بلقيس..
ماخلت بلقيس ماضيفتهم فيها..
كانت كاتبه فوقهم غاليه..
(مريت خوي الغاليه..ان شاء الله ديما عاليه)..
وخشت شافت التعليقات وزادت انحرقت:حقيرات مكر فيا اني عارفه..لكن باهي تو تشوفوا..
🍁🍁🍁🍁
ماشي بطريقه لباب الحوش وهي تسقد فيه..
هانيبال:عارف وشفته لكن توا مانيش فبابه اصبري عليا شوي..
مرام:اني نديره
وقف وشبحلها
مرام:مافيها شي ياهانيبال هدى حوشنا اني وياك..شن فيها كان درت فيه حاجه بفلوسي..ساد انت اللي بنيته واثثته وحطيت فيه دم قلبك..خليني اني هالمرة ندير فيه حاجه اقلها نحس انه حوشي ونتحمل مسؤوليته معاك..
هو شبحلها شويه..بعدين رجع شبح للسقف الصاله اللي بدت فيه الرطوبه بسبب سقوط الأمطار طول فصل الشتي..
غير عيونه للباب وقال:باهي..تو نشوف غدوة ان شاء الله..
ابتسمت مرام ولحقت عليه شدت ذراعه..
هو شبحلها وقال؛خير دعوتك..
هي ضحكت ووقفت ع رووس صوابعها وباساته بعدين بعدت وقالت:هي توكل..
ابتسم وهو عاقد حواجبه ويحرك فراسه ايمين ويسار بعدين طلع وصكر الباب..
هي تنهدت براحه بعدين لفت ومشت لدار النوم...
🍁🍁🍁🍁
وصلت سيارة عماد فالشارع اللي فيه العمارة..
فالوقت اللي وصلت فيه سيارة مالك..
شافها عماد وقف ع تركينه وقعد يراقب فيه..
ونور تشوفله بحقد...
نزل من السياره...وكان يبان عليه تردد فخطواته..
بعدين خش للعماره...
عماد شد الدومان بقوة من الغضب..
شويه ووصلت سيارة درست قدام العماره ...
نزلت منها اسراء وكانت حاطه ع راسها وشاحها حط ولابسه نظارات..
نور:هي هادي..
عماد بغضب:زبطتها ..
خشت اسراء للعمارة...
عماد غمض عيونه بشده وهو يقول:الله يلعنكم..فتح عيونه وجاي بنزل..
نور قالت:ماتنزلش توا استنى..
شبحلها بإستغراب وقال:شن بنستنى!!
نور:غير شويه بس ياعماد..وقعدت تشبح القدام...
وعماد قعد يشبح معاها...
ع جية سيارة درست ورا سيارة مالك بالزبط..
عماد:مافهمتش شن تبيني نستنى بس..
نور بقلة صبر:غير راجي..ان شاء الله هما..
انفتحوا بيبان السيارة..
نزلوا ام اسراء ومرت عمها وعمتها...ومشوا خشوا للعماره..
نور:انزل توا..
شبحلها عماد برفعة حاجب..
نور:غير هيا انزل ياعماد..
هز راسه وفتح الباب ونزل..بعدين صكره ومشي للعماره..
نور بلعت ريقها ومسحت بسرعه دمعتها اللي نزلت وقالت:هدا اقل شي نديره...
🍁🍁🍁
فالشقه..
مالك بعصبيه:انتي وحده مهبوله مريضه مريضه..انتي مش طبيعيه بكل..
اسراء بعصبيه؛توا طلعت مريضه ومش طبيعيه ولا!!؟لكن قبل لما كنت تتصرصر زي الكلب بش نمشيلك امورك مع بابا كنت كويسه وعين الله عليا!!
مالك؛تكلمي زين خيرلك...
اسراء؛تكلم زين انت قبل..
مالك بإزدراء:تي اني الحمار اللي جيت اصلا..وكيف جاي بيمشي من حداها شداته من ذراعه وقالت:تعرف يامالك كان مادرتش اللي نبيه وخطبتني من بابا لما نخليك مفضوح وين ماتمشي..
مالك بتهكم؛وتفضحي روحك!!..
اسراء قعدت تشبحله بغل وهي ساكته..
وهو يشوفلها وع وجهه ابتسامه سخريه..
فهاللحظه انفتح باب الشقه..
هما الزوز جمدوا فمكاناتهم..
سميه؛سرو...اسراء...
وصلت داخل ..
وقفت جامده ولاحركه..
وعمتها ومرت عمها اللي كانوا جايين ورا امها..
الزوز انصعقوا من اللي شافوه...
وهما تصلبوا فمكانهم..
🍁عماد كيف وصل لباب الشقه لما شاف رقمها..
طول قعد يطق بقوة ع الباب..
يطق ويطق ويطق...
لين انفتح الباب...
طلعت اسراء تجري وهي تبكي...
ووراها عمتها...
نزلوا ورا بعض من الدروج..
هو شبحلهم بعدين شبح القدام ومشي خش داخل...
سمع صوت نقاش حاد بين خوه وسميه..
مالك:بري شدي بنتك وربيها كويس بعدين تكلمي..
سميه بغضب ودموعها ينزلوا:لولا خوفي من الفضيحه كنت قربعتها ع راسك ياوسخ ياعديم التربيه..
وناديه تتفرج ع المشهد بإستمتاع..
ع خشة عماد اللي قال:كان بنتك متربيه ماوصلتش لهني..
مالك انصمت لما شاف خوه..
عيونه جحظوا فيه من الصدمه وهو يشبحله..
سميه وناديه التفتوا لعماد..
عماد:بنتك هي اللي جاباته للشقه كانك مركزة..ومش غير هكي وبس بش تخرب بينه وبين مرته بعتتلها رساله فيها العنوان متاع العمارة بش تجي وتشوفهم...
مالك من توالي الصدمات وكأنها لكمات قاعده تنزل ع وجهه حس الدنيا لفت بيه...
سميه كذلك زادت انصدمت لما فهمت اللي صار كله...
شبحت لعماد بحده وقالت؛خود خوك واطلعوا اقلبوا وجوهكم..
عماد قدم لمالك وشده من ذراعه وجبده وهو يقول:غير جيتي مراة واكبر مني..
سميه؛صكر فمك واقلب خليقتك انت وياه..
عماد:باهي باهي باااهي..
وصل في باب الشقه..
فتح الباب دفه خوه برا..وطلع بعده وصكر الباب..
🍁بعد طلعوا انهارت سميه بالبكي..
وناديه خدتها فحضنها وقعدت تواسي فيها ع الأساس..
وهي متشمته ماواجعها حال🍁
برا...
عماد كان منقرف من خوه لأبعد حد..
شبحله من فوق لتحت بإزدراء وهو يقول:عاجبك منظرك هدا..عاجبك اللي درته فروحك!!خسارة...قداش كنت نشوف فيك راجل..خبط بيده ع صدره وقال..كنت نقول مالك اعقل وارجل مني..كمل بإزدراء يقول...طلعت لاليك فالرجوله ولاتعرفها اصلا...
شبحله بإحتقار وقال:حتى الدفال خسارة فيك...
شبح القدام ومشي نزل
مالك..
كان مش قادر يحرك رجليه
هول الصدمه وقوة الموقف فشلوه تماما..
والأنكى من هدا ان نور تعرف كل شي..
حط يده ع الحيط وقعد ينزل بالسيف..
يبدل فخطاويه بالسيف..مش حاس برجليه بكل..
وهو نازل قعد يتكرر قدامه اللي صار اكثر من مرة..
وفوذنه يرن كلام خوه...
ماحسش بروحه الا وهو برا العمارة..
مشي لسيارته وركب وقعد مقعمز فيها وخلاص..
🍁اما عماد..
لما ركب للسيارة لقي نور منهاره من البكي..
تحرك بيها طول لحوشه..
حاول يهديها بالكلام مانفعش كل مالها تزيد تبكي..
لعند ماوصل لحوشه..
نزلوا الزوز وخشوا داخل..
نور فوقتها سكتت ع البكي بس كانت تبان فحالة صدمه..
وكأنها اليوم بس عرفت بخيانة زوجها...
لما فتح عماد الباب وخشت..
رزان اللي سمعت صوت الباب طلعت تجري من الصاله..
لما وصلت برا وقفت فمكانها وين شافت حالة نور..
ارتسمت ع وجهها ملامح الألم وجتها بسرعه حضنتها..
رجعت نور انهارت بالبكي...
ورزان قعدت تبكي معاها..
وعماد كان مستاء ع الآخر..وتمنى لو طاوعاته يده وقدر يضرب خوه ويفش فيه غله..
نور اللي كانت تبكي بالعبره..
صمدت هلبه وقاومت هلبه وجهدها طاح بمعنى الكلمه..
رزان حست بيها ثقلت بين ايديها فهمت انها فقدت الوعي:نور...نور...نور....شبحت لعماد وقالت..عدي جيبلي ميه وسكر تحرك...
مشي عماد يجري للكوجينه وهو متفلوش..
اما رزان بصعوبه خدت نور قعمزتها ع الكرسي وبدت تفكلها فوشاحها بش تاخد النفس..
🍁🍁🍁🍁
مقعمزات يتفرجوا ع التلفزيون ع احد المسلسلات التركيه
اسمه"انت وطني"
كانت مركزة معاه هلبه بالذات فقصة "جودت وعزيزة"
مش هي بس حتى بنتها اللي قالت سؤال صدمها..
"ماما زعمه بابا يطلع حي زي الراجل هدا!؟"
حناها شبحتلها بصدمه وقالت:اسو حبيبتي بري لجدك قوليله تبي شاهي وكاكاويه؟..
اسيا هزت راسها بإيجاب بعد مافهمت ان حناها تغير فالموضوع..
ومشت طول طلعت من الدار..
شبحت نعيمه لدلال لقتها تتفرج ودموعها ينزلوا وتمسح فيهم..
تنهدت بألم وقعدت ساكته...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
26\4\2017..
فالطريق...
اصيل:لازم تتفاهموا لازم تفهموا منه ويفهم منكم..الله غالب هدى امر واقع قضاء وقدر..ربي هكي كاتب..لازم نسلموا لحكمه...
عبدالسلام:لولا الصغار اللي بينها وبينه ماكنتش اجبرتها تجي معاي..
شبح اصيل للمرايه..
لقي دلال تشبح للروشن وهي تبكي بصمت وملامح الغضب ع وجهها..
تنهد وقعد ساكت...
وساد الصمت طول الطريق لعند ماوصلوا في الفيلا...
🍁في جنان الفيلا..
كانوا كلهم برا..
كلهم...
حالتهم يرثى لها..
بالذات حالة الحاج مختار والحاجه كامله..
هي كانت تمشي وتجي وضامه ايديها لبعضهم وتراجي ع نار...
ومختار واقف تحت شجره وهو مربع ايديه ومنزل راسه لوطا وعيونه مغمضات..
لما نزلوا عبالسلام وبنته من السيارة..
ماحد كان بوعيه بش يلهى بيهم..
جتهم رباب...
حضنت دلال بقوة ودلال حضنتها...
اما اصيل فدخل عبدالسلام للمربوعه...
بعدين رباب خدت دلال ودخلتها داخل
قعدوا ع هالحال 5دقايق بالزبط
بعدها
طلع اصيل من المربوعه وفيده تليفونه..
مشالهم طول وصل فيهم وقال:قريب يوصل..
رفع الحاج مختار راسه وشبحله..
وكامله وقفت والتفتت وشبحت لأصيل
اما امه وخالاته وخوه ومختار الحفيدوامه..
اللي كان منهم مقعمزين ع الكراسي ومنهم ع الدروج...
اول ماسمعوا شن قال ناضوا وقفوا وهما يشوفوا لأصيل..
فجأة...
سمعوا صوت كلاكس..
قلوبهم قريب وقفت...
اصيل مشي باتجاه الباب...
تلقائيا الباب انفتح..
وخشت سيارة مرسيدس لونها اسود..
وهما بعيونهم معاها...
كلهم يرجفوا كلهم..
💓وهي اللي كانت واقفه مع بنت خالتها
فالروشن ويشوفوا لنفس المشهد..
كانت ترجف بكل مافيها...
🍃درست السيارة...
انفتح الباب الخلفي...
وهما ع اعصابهم...
اول ماشافوا..
عصاة القيلا..
نزلت دمعه من عيون امه...
بوه نزل ايديه وين راها..
انفتح الباب بصعوبه...
نزلت رجل ولحقتها التانيه...
ووقف وهو عاطي بالظهر..
هندا حطت يدها ع قلبها...💓
هو وخر خطوة بصعوبه..
بعدين صكر الباب بعصاة القيلا...
هي كانت تشوفله من الروشن والدموع سيل ويدها ع فمها...
ورباب تشوفله بصدمه ممزوجه بالألم..
خواته...
ولد خوه وولد اخته..كانوا يراجو امتى يلتفت..
وبوه وامه يبوا يمشوله بش رجليهم مابتش تتحرك..
🍃هو ..
خدي نفس ...بعدين..
شويه شويه التفت...
شافوه...
ولاعرفوا يفرحوا...
ولا يحزنوا ...
ولاينقهروا....
رجعته من الموت بالنسبه ليهم عيد...
لكن بأي حال عاد هذا العيد....
...يتبع..
