#العشق_المتمرد "عندما يزهر الليمون"
#جمان_فريد
الجزء132 القسم الثاني
⏳...
بعد يومين🍃
11\2\2017
مقعمزة فالصاله والصغار مقعمزين حواليها ويراجو معاها في اتصال ما..
حماتها وسلفتها فالكوجينه يطيبوا في ماكلة القهوة..
فجأة..
رن التليفون..
هي انخلعت والصغار انخلعوا معاها..
طول فتحت الخط وردت...
فضيله بقلق:هاه شنو بشر..
جاها صوت راجلها وهو مبتسم يقول:كلهم نجحوا فؤاد ورمضان وقصي وحنين..
فضيله مررت نظرها وهي تضحك صاحت بصوت عالي:نجحتوووا...نجحتوا...وتطلقها زغروطه تنسمع للوادي...
الصغار كلهم صاحوا بفرح:هيييييه..وقصي قعد يصفر..
فضيله ناضت وقفت وهي تغني:
نجحوا يامبروك عليهم...عن عين الحاسد نرقيهم..
طلعوا حميده وبلقيس وهما يضحكوا وين وصلوا فيهم قعدوا يصفقوا ويشتوا معاها..
وحنين ترقص والولاد يصفقوا وهما يشبحولهم ومبتسمين..
بلقيس بضحكه:منين جبتيها الشتاوة هدي؟
فضيله بضحكه:اخترعتها تو...
وحميده تضحك..
بلقيس:نجحوا يامبروك عليهم...عن عين الحاسد نرقيهم..
وحميده وفضيله غنوا معاها..
💕هدا كله والتليفون فيد فضيله وهي تصفق بيه وناسيه الهادي ع الخط..
اللي ماقدرش يصكر بكل قعد يسمع فيهم وهو يضحك ومشاركهم الفرحه ومركز على كل كلمه تقولها فضيله ضحكها غناها..💕
بلقيس وهي تصفق لاحظت التليفون فيد فضيله الشاشه مضويه وفي اتصال الخط مفتوح..
بلقيس:فضيله هاتفك...
فضيله عقدت حواجبها وشبحت للتليفون فيدها..
توسعوا عيونها وعضت ع شاربها ورداته لودنها وهي مبتسمه بإحراج:هادي..الو..
الهادي بضحكه:طيب فينا اللي تفكرتي..
فضيله غمضت عيونها بإحراج وقالت:آسفه من الفرحه بالعويله..مشت طلعت وقفت في الفم..
وهما يشوفولها ويضحكوا..
برا..
فضيله:هادي بنقولك..
الهادي بإبتسامه:قولي..
فضيله:جيب معاك حاجات سمحه هكي نزيدوا نفرحوهم..يعني حلويات طورطه هكي..
الهادي بإيتسامه:حاضر..
فضيله بإبتسامه:يحضرلك الخير..هي مانعطلش عليك بالسلامه..
صكرت..بعدين خدت نفس وزفرت..
وولت خشت داخل...
اما الهادي..
فكان يضحك وهو يقول:فضيعه المراة هدي فضيعه..
شغل السيارة وتحرك ...
🍁🍁🍁🍁
روح للحوش بش يتغدا..
وين خش سمع صوت مرته وهي تأن وتتوجع..
قلبه طاح من الخوف..
جي بيمشيلها..
قابلاته امه..
حدهم الكبيرة:معليشي معليشي تو بعد تاخد دواها تولي كويسه..
حسن بصدمه:كييف!!قصدك ديما هكي يصير فيها؟.
ع جية بنته اللي كانت طالعه من الدار بعد عطت مرت بوها الدوا لما شافت بوها تفاجئت..
هو لما راها قال:خيرها ليش تعيط هكي؟!
هي كانت متحشمه هلبه نزلت عيونها وقالت:طبيعي بابا الفترة هادي تو تعدي..
شويه وسمع صوت بكاها بالعبرة والألم..
حسن بخوف ممزوج بالعصبيه:غير كيف طبيعي وهي تعيط هكي وتبكي!؟
حدهم :يابابا الدكتورة قالت هكي...
هو يسمع فصوت بكاها وقلبه يتقطع..
امه قالتله؛هكي ياولدي كل يوم بعد تاخد الدوا شويه وتهدا..
حسن شبح لبنته..بلع ريقه وقال وهو عاقد حواجبه:عدي اقعدي ماتخليها بروحها..
حدهم بتوتر:حاضر بابا غير نمشي نجيبلها ميه..
حسن:اني تو نجيبها بري انتي..
ومشي طول للكوجينه..
وحدهم طول مشت لدارها..
حدهم الجده بضيق:لاحول ولاقوة الابالله..
☘في دار حدهم..
خشت حدهم ووقفت ع البارقه وقالت؛ها احسن توا؟
البارقه ببكي:سيدك اللي يدوي برا؟
حدهم بضيق:ايه هو..
زادت البارقه فالبكي..
وحدهم وجعها حالها هلبه..
شويه وطق الباب..
حدهم مشت للباب فتحاته..
لقت بوها واقف وفيده تلاته شيش ميه مدهملها وهو يسمع فصوت بكاها..
خدتهم حدهم وهي تشوف لملامح الألم الباديه ع وجهه وكأنه يحاول يخفيها..
بعد خدتهم مشي طول..
هي تنهدت بحزن وصكرت الباب..
التفتت للبارقه اللي سمعت صوتها الباكي وهي تقول:ليش يدير معاي هكي ليش؟!ليش يعامل فيا هكي شن درتله بس؟!
حدهم معاش قدرت ادس اللي صار فهداكا اليوم..
هي دست بش ماديرش البارقه مشاكل مع أمها...
وتوا شافت ان الوضع مايتحملش سكات اكتر من هكي..
جتها وقعمزت حداها وقالت:بارقه..بابا سمع كلام امك يومها..
البارقه سكتت عن البكي وقعدت تشوفلها بصدمه..
حدهم بضيق:الكلام اللي سمعناه واعر يابارقه عليه هو بالذات..
حطت ايديها ع وجهها وقالت بألم:آااه منك يمي آااه..
🍁🍁🍁🍁
ادور بتليفون فالدار وهي موجه الكاميرا متاعه ع كل تركينه فيها وتقول:شن رايك سنو..
سناء بإعجاب:كله يهبل لموشه..
لمياء بإبتسامه:بجديات!
سناء:والله كله حلو..
لمياء وجهت الكاميرا ليها وقالت:مبعده يوم 20\3..
سناء بضحكه:مال اني شن نقول بنجيب فرمضان
لمياء بضحكه:مازال مااستنتيش زيي اني..ليك 5 شهور حامل اما اني8..
سناء:هههههه..ايه...ضيقت عيونها وقالت..ايه حقه بنقولك بتمشي لعرس عيلة*****
لمياء بإستياء:لا عمر مصكر راسه..
سناء:ماهو انتي اختي ع قد ماانتي ذكيه تجيك لحظات تولي فيهم غبية الغبيات..كيف تحكي لراجلك عن واحد كان يبيك زمان؟!
لمياء بنرفزة:استفزني وهو يحكي ع مغامراته وهادي كانت تبيني وهادي لتوا تلحق فيا ومش عارفه شني نضت حكيتله وعاد هو ماصدق شدها فراسها...
سناء:تعلمي تشغلي عقلك حتى وانتي معصبه مرة تانيه..
لمياء مطت شواربها بملل وقالت:باهي امي امتى بتجي.
سناء:قالت غدوة..
لمياء:تمام خل بنصكر منك ونكلمها بايات..
سناء:ok..تشاوات..
صكرت سناء..
ولمياء بعدها طول اتصلت بأمها..
نادى مرتين وانفتح الخط..
لمياء:ايوه امي..
نادره:اهلين لمياء شن جو..
لمياء:تمام..شن جوك انتي وشن حال بوي والباقي..
نادره:تمام..كلنا حالنا باهي الحمد لله..ايه غدوة جايه ل*****
لمياء:عارفه سنسن قالتلي توا..
نادرة:اها..بتحضري العرس ولا؟
لمياء بضيق:لا عمر عفسلي فيها..
نادرة ضيقت عيونها وقالت:علاش!!؟
لمياء:هكي داره كبد..الحق اني قريب نموت عليه العرس خاطري نحضره ونشوف شن بيديروا..
نادرة سكتت شويه بعدين قالت:لميا..
لمياء:اممم..
نادرة:يعرف راجلك اني جايه نحضر العرس؟
لمياء:لالا ماقلتش لانك فالأول قلتي فالشك نحضر..
نادرة:مليح بكل..قوليله امي جايه لخالتي بطير عليها السو ارفعني نبات غادي..
لمياء؛سو شني يام اللي بطيريه؟!
نادرة:مش راجل خالتك دار عمليه ع الزايده!
لمياء بضحكه:ليه شهر يام..
نادرة ؛واني هدا وين فضيت..
لمياء سكتت وهي تفكر..
نادرة:اسمعيني كويس..لما يجي مروح بعدين.....................
🍁🍁🍁🍁
بنعدي اني..امال ولدها مريض..
حميده:لاباس عليه..بترفعي معاك كنتك؟
سعيده:توفيق ماباش..
حميده :وااك منه ولدك هدى طلع معقد كيف عمه محمد..
سعيده :الله غالب عقليته واعره..
حميده بهمس:ان شاء الله مايديرلها كيف ماداير عمه مع مراته..
سعيده:بش بعدين سيده يوريه!اريج خط احمر عندي اني وياه..
ع خشة قصي للكوجينه شبح لأمه وقال:يمي..
سعيده:نعم..
قصي:خلي سيدي ياخد مراة اخرى..
ضحكت حميده بصدمه..
سعيده وهي مضيقه عيونها بصدمه:شنننن هووو!!؟
قصي خاف وقال:عادي يمي كيف عمي حميد وحتى عمي الهادي...
حميده شاده ضحكتها بقوة..
سعيده بنفاد صبر:تعرف كان مااختفيت من قدام وجهي تو ماضاله الا باطحاتك بالطوبو..
قصي زاد خاف لف ومشي طالع وهو يقول:بكل يمي انتي..
سعيده برفعة حواجب:ريت الفرخ ريت!!
التفتت لحميده..
حميده كانت شاده ضحكتها بالسيف لما شبحتلها سعيده انفجرت ضاحكه..
سعيده غصب عنها ضحكت وهي ماطه شواربها للأسفل.
حميده بضحكه؛ردي بالك يقول الكلام هدى قدام سيده..ههههه يحطها فراسه راه..
سعيده برفعة حاجب:بيش نتوحش عليهم الزوز..
حميده:ههههههه
☘برا..
كانت فضيله مقعمزة هي وبلقيس والصغار ع صفرة الغدي..
وفحجرها فطومه توكل فيها..
وتوكل فالصغار..
اللي تفترشله لحمه..واللي توكله سلاطه مع غداه كان نساها..
واللي تهدده كان ماتغداش كويس تحرمه من نوع حلو اديره بعد الغدي..
بلقيس كانت تاكل وتتفرج عليها بحب وتتمنى لو كانت زي فضيله مراة قويه وتعرف كيف ادير الوضع اللي تعيش فيه..
برغم انها تبان انها مش سعيده هلبه من ناحية الزواج لأن المراة ولاالراجل المتزوجين جديد يبان عليهم هالشي لو من عيونهم..
وهي لاحظت هالشي فعيون فضيله..
كل شي فوجهها يضحك ماعدا عيونها...
🍁🍁🍁🍁
المراة...
ديما يقولوا قلبها يحس بقوة..
من ناحية زوجها تحديدا ..
تعرف لو تغير عليها فجأة..
معناها بدي يعوم فبحر غير بحرها..
ونور..
من بعد لقائها بإسراء وهي مش قادرة تبطل تركيز فتصرفات وتحركات مالك..
لكنها ماخلتش مالك يحس بحاجه نهائيا..
هي توا عايشه فشك كبير..
خصوصا بعد ربطت وقت زيارة اهل إسراء بمواقف مالك هديكا الفتره وتصرفاته قلبها ينقبض من النتيجه اللي توصللها..
☘كانت فالحمام متاع دار النوم...
مقعمزة فجاكوزي ميه فيه اعشاب بش تسترخي..
كانت مخليه باب الحمام مفتوح بش كان ناض ولدها عيط تسمعه..
كانت فهداكا الوقت تفكر وخلاص...
شويه وسمعت تليفونها يرن
مادورتاش لين فصل...
عاود رن مرة تانيه كذلك مااهتمتلاش..
فالتالته..
تأففت...
بعدين ناضت...
نشفت ولبست الدشمبر ومشت طلعت من الحمام..
شافت جهة سرير ولدها لقاته مازال غارق فالنوم..
شبحت بعدين للخماسيه اللي كان محطوط عليها تليفونها..
مشتلها وخداته لما شافت المتصل فتحت الخط وردت بلهفه..
نور:هاه حلا بشري.....
فهالوقت خش مالك للحوش..
كان جايب نفس الخبر اللي توا تتلقى فيه نور من صاحبتها..
لما وصل فالدار شافها بمنظرها الحلو هدا..
وهي تتكلم فالتليفون وتضحك وتقول:الله يبشرك بالخير ياحلا..الله يبارك فيك..حتى انتي مبروك عليك...
تلاشت ضحكتها وحست بقشعريره سرت فجسدها..
لما ضمها فجأه..وطبع قبله ع رقبتها وطول..
هي ارتبكت وقالت لصاحبتها:تمام..صحيتي..حلا..باهي...باي...
صكرت وحطت التليفون فمكانه وقالت:مالك..
هو بعد وجي عند وذنها وقال بصوت هادي:روحه..
نور:معليشي حول شويه..
مالك زاد ضمها ودفن وجهه فرقبتها وهو يشم فريحتها..
وهي حاسه ان مش قابلاته..
هو تكلم وقال:بشيشتي ليها فترة جافله..ومسيبتني..
نور :لامش مسيباتك..لكن انت ديما مشغول وتروح متاخر لما اني نرقد..
مالك:باهي توا روحت بكري هلبه..نبي نبشرك..وناخد منك حلاوة البشاره..
وبدي ينهال عليها بالقبل..
وهي من داخلها وكأنها تستنجد تبي شي يبعدها عنه فهاللحظه..
ماتبيش الصده تجي منها هي بشكل مباشر بش ماياخدش موقف والله اعلم كيف يكون شكله..
ولدها وكأنه قلبه الصغير حس بأمه..
ناض..وبدي يبكي..
هي ماصدقت بعداته بسرعه ومشت لولدها وهي تقول:هاه ماما حبيبي هاه جيتك..
هو قعد يشبحلها برفعة حواجب..
حط ايديه فنصه وقال:خلاص مدام نورحطيتنا ع الرف!؟الدلال والحب كله لهالزغده بس!؟؟
نور :هيا ماما هي حبيبي
وبدت ترضع فيه..بعدين قالت..تلقى غداك فالمكرويف مالك سخن بس ..والسلاطه مغطيه كويس ع الدولاب..
مالك شبحلها شويه بعدين قال:تمام..نتغدا ونلهى بيك مافيش مهرب يابشيشة راهو..
رفع حاجبه وهو يمرر فنظره عليها بعدين مشي طلع..
وخلا نور مضايقه ع الآخر...
🌴🌴🌴🌴
مقعمز يتغدا فدار التقعميز وهو يتفرج ع التلفزيون..
وهي فنفس الدار تقض في غلافات المخاد متاعها بش تغسلهم..
عمر وهو ياكل؛الرز اليوم فيه بنه زايده..
لمياء بضحكه:فيه سر خديته من حميده..
عمر:ايوه تعلمي منهن تربحي..
وقفت قض المخده ورفعت حاجبها وهي تشبحله..
هو ولاكأنه قال حاجه ياكل ولا ع باله..
فجأة..
رن تليفون لمياء..
هي التفتت شبحتله وهو محطوط ع الطاوله..
بعدين شبحت لعمر شويه ورجعت شبحتله ومشت ناحيته فتحت المايك وفتحت الخط وحطاته ع الطاوله..
"الو..لميا"
ولت لمياء للمخاد وهي تقول:ايوه يما..كيف حالك..
عمر قعد يمرر فنظره عليها وع التليفون..
"الحمد لله كيف حالك انتي وعمر والعويله غادي".
لمياء:الحمد لله كلنا تمام...يسلم عليك عمر يما..
عمر نزل راسه للصونيه ورجع ياكل..
"عليك وعليه السلام وليدي...بنقولك لميا"
لمياء هي تقض فمخده تانيه:نعم يما.
"اني غدوة بإذن الله جايه للبلاد لحوش خالتك نبي نطير السو ع عمك رجب"..
عمر "هدى وين تفكرت!"
لمياء:اياه يما نساها عمليته الراجل تو تلقي خالتي حرجانه منك..
"الله غالب لهيت مع اختك دنيا فمحوالها من الحوش واختك سناء ووحمها مافضتيش بكل..المهم توا قولي لعمورة يجيبك ونبيك تباتي راهو"..
رفع عيونه وشبح للتليفون وهو ياكل ففخدة الدجاجه..
لمياء شبحتله وقالت:اهو يما يسمع فيك..
"حداك هو"
لمياء:ايه يما يتغدا..
"صحتين ولدي.."
عمر بلع وقال:احمم..حم..سلمك خالتي نادرة..
"وليدي بالله عليك جيبها غدوة ان شاء الله لحوش خالتها مستاحشتها هلبه ونبي نهدرز عليها ليها وقت معاش جتنا"
هو شبح للمياء شويه..
ولمياء تشوفله بنظرات رجاء...
نزل راسه للصونيه وقال:باهي ياخالتي حاضر تو نجيبها..
"وتخليها تبات"
عمر هز راسه بالموافقه وقال:ونخليها تبات..
ابتسمت لمياء بفرح بعدين بعتتله بوسه طايرة..
هو ضحك..
"سلم وليدي..جبرت بخاطري ولدي صحيت"..
عمر:مش بجميلي ياخالتي بنتك ومن حقك تشوفيها..
"سلمك ياربي..بالله قولي شن حال اميمتك"
عمر:حالها باهي الحمد لله..عمليتها نهار الإربعا..
"ربي ينوضها بالسلامه وتروحلكم وهي سالمه وغانمه"..
عمر:إن شاء الله..بارك الله فيك ياخالتي..
"ربي يحفظك وليدي...لميا"
لمياء:نعم يام..
"جيبي معاك وريقات حبق من جنان عمارتكم"
لمياء بضحكه:ان شاء الله...
"هي مالا مانعطلش عليك..بالسلامه توا"
لمياء :سلمي ع بوي..بالسلامه..
"يوصل..بالسلامه بالسلامه"
مشت لمياء للتليفون وصلت فيه شافت للشاشه لقت الخط تصكر..
"ليش ماتجي تبات هنى امك"..
السؤال صدم لمياء واربكها لكن فيسع لقتله اجابه وحاولت تقولها بثقة شبحتله وقالت:هي جايه لخالتي اصلا وميه فالميه يبيها تقعد ليله وحده هدا علاش تبيني نجيها..
عمر هز راسه بعدين قال:الحمد لله..
رفع الصفره وناض ومشي طلع بيها من الدار للكوجينه..
لمياء بعد طلع زفرت براحه..
بعدين مشت للمخاد اللي قضتهم خدتهم وطلعت بيهم من الدار للحمام...
🍁🍁🍁🍁
بعد تغدا وكمل...
مشي للدار...
وين خش لقاها لابسه توته حلوة لونها موف ضابطه ع جسمها..
واقفه ع المرايه وتمشط فشعرها..
ابتسم بشوق وعشق..
ومشالها..
حول دجاكه متاعه ولوحها ع السرير..
هي كانت متوترة..
وصل فيها..
حول المشط من يدها وحطه ع الزيانه..
بعدين حاوطها وقربها ليه قعد يشم فريحة شعرها..
هي كانت حاسه بضيق شديد..
مالك بصوت هادي:زعلانه مني بشيشتي؟
نور غمضت عيونها بعدين فتحتهم وقالت:مداير حاجه تزعلني انت؟
مالك عقله طول قاله ان مرته سامعه حاجه من حد..
ضمها وقال:مانقدرش ندير..
نور...
"انت تحبني حق مالك!؟"
سؤال وجعله قلبه قطعه تقطيع...
وفباله طول جي هداكا اليوم الأسود واللي صار فيه..
زاد ضمها اكثر وقال بلهفه ممزوجه بالخوف:شن السؤال هدا عمري!؟تي اني مش بس نحبك..اني نموت ع خطاوي رجليك ياقلبي انتي..وقعد يبوس فراسها...
نور دموعها نزلوا طول..
وهو بعد..وحط ايديه ع كتافها ولفها ليه شافها تبكي..
حط ايديه ع وجهها وقرب وجهه لوجهها وقال:علاش تبكي ياعمري علاش!؟شن اللي مخليك تشكي فحبي نوارتي..شني قوليلي..
نور شبحتله بعيونها اللي يدمعوا:يعني انت تحبني حق مستحيل تفرط فيا وادير شي يخليك تخسرني ولا؟..
ضمها بقوة لصدره بقوه من خوفه ليجي يوم وتتاخد منه..
او هي تهجر حضنه للأبد..
مالك وعيونه معبيات دموع:قلب مالك انتي مانعيشش من غيرك اني بكل مانقدرش..
دفن وجهه فرقبتها وانهال عليها بقبل وهو كله لهفه وخوف..
هي معاش تحملت قلبها اللي يعشقه انوجع عليه وصدقه صدقه لأنه يحبه..
لأنه يحبه لازم يصدقه..
حاوطاته وضماته بقوة وقعدت تبكي..
وهو نزلوا دموعه رغم عنه وهو يسمع فصوت بكاها...
وحاول مايبينش لما قال بضحكه:يامهبوله خيرك شن جاك حتى نفاسك قداش ليه تم..
هي ضحكت من بين دموعها..
وهو باسها ع كتفها بعدين قال:نموت فيك وفي ضحكتك ياعسل..ومستاحشك موووووت.
ضحكت تاني..
هو قال:مانقدرش اني ع الضحكه الحلوة هادي...
ورفعها فوق..
جو عيونهم فبعض..
لفت ايديها حوالين رقبته وهي اللي بادرت بتقبيله الأولى..
وهو بادلها بشغف شديد والخوف ملازم لكل هالمشاعر...
طفا نار شوقه...
لكن ماقدرش يخلي خوفه يتبدد ويتلاشى..
🌴🌴🌴🌴🌴
الساعه 5:00عصرا..
مقعمزات التلاته فالدار يهدرزوا..
وحداهم حنين تتفرج ع الرسوم المتحركه..
وفطومه تلعب بالألعاب..
واوسمه راقده..
حميده:كان كلمنا لميا..
فضيله بإزدراء:فكينا من فسختها الصباح هدي..
ضحكوا بلقيس وحميده..
فضيله؛خسارة مرام تمنيتها هي اللي تحضر..
حميده:ماتقدر تغيب عن اختها الناس تمشي عليها وتجي..
فضيله؛باهي جاته خفيفه راجلها فايزة..
حميده:ايه الحمد لله..
"فضيله".
حميده:صبي يافضيله معاد نضبحوا كان ع اسمك تو..
ضحكت فضيله وناضت وهي تعض ع شاربها وترمش فعيونها متصنعه الخجل..
ومشت طلعت..
بلقيس بضحكه؛عسل هالفضيله هدي..
حميده بضحكه:يتهنى بيه الهادي ياحنه..
بلقيس:ماني عارفه وينه عنها زمان..اللي جاب الخليقه هديك وخلاها ادره كبودنا..
حميده:انتي عاشرتيها عام مش كامل..شن نقولوا حني اللي قعدنا 7سنين متحملين دراه كبدها..
بلقيس:فكنا الله منها وعوض الهادي خير..
حميده:ايه الحمد لله..
☘برا..
فضيله وهي تاخد من الهادي فباكوا الطورطه وصفرة الحلويات قالت بضحكه:سلمك جياب..وع قولت الشراقه نعنك ماتغيب..
هو قعد يضحك..
فضيله بإبتسامه:عدي بسرعه غير دبشك وصلي خل نحطلك غداك..
ولفت ومشت طول للكوجينه..
هو قعد معاها بعيونه لين خشت للكوجينه..
تنهد بإبتسامه..
بعدين مشي متوجه لحوشه..
🍁🍁🍁🍁
في صاله حوش فايزة اخت مرام..
كانوا النساوين مرصوصات رص فيها..
الزحمه هادي ع خاطر الحادث اللي داره راجل فايزة من يومين..
مرام كانت مقعمزه حدا زوز جارات..
وحده اسمها فوزيه عبدالواحد..
واللي فجنبها جارتهم الحشريه المشهورة..سعاد ارحومه..
والزوز كانوا يهدرزوا ومرام تسمعلهم...
فوزيه:بالله!
سعاد:والله العظيم وعاد مش قولة قال اني سمعتها بوذاني قالت حوشى بنيته بالمنحه راجلي ماحط فيه قرش..
فوزيه:معقوله تقول كلام كيف هدى قدام النسوان واطيح من قدر راجلها؟!
سعاد:هدى اللي صار ياحنه....وراهو طبيعي طلعت برا وقرت ع حساب الدوله وخدت فلوس يافلوس راهم..طبيعي هي اللي تكون دايره الحوش..راجلها ماعنده..
مرام:مرات تشاركت هي وياه مافيهاش مشكله لو تعاونوا وبنوا الحوش مع بعض..
فوزيه:قالتلك قالت بنيت الحوش بمنحتي..
مرام وهي تشبح لسعاد:مرات المراة قالت بنيته اني وياه غير سعاد فاهمه خطأ..
سعاد:وليش بنفهم خطأ؟!نسمع كويس راني مازلت ماطرشت...
مرام:ماقلتش طرشتي قلت فهمتي غلط..
"مرام"..
شبحت مرام لأختها فايزة لواقفه في الفم..
ناضت وهي تقول:معاد تنقلي كلام ياسعاد الا وانتي متأكده منه..
ومشت طول لأختها..
سعاد برفعة حاجب:مالا شنو ماهو صاحب العله..
فوزيه:حتى اني حسيتها تحسست شكلها حتى هي دارت كيفها..
سعاد:من غير كلام..هانيبال حوشه اضرر واجد من الصاروخ اللي ضربه وامه قالت فلوسه كلهن حطهن فالبني وفالعرس.منين بيجيب حقه تصليحه والضي والمواد الصحيه والزواق والأثاث؟!كله منه هي...
فوزيه:الحق اني ماتوقعت هانيبال يقبلها ع روحه من مايعرفه ويعرف عزة نفسه..
سعاد:الظروف ماخلت عند حد لاعزة نفس ولاغيره..شوفي كم واحد من القبيله تزوج وحده عندها بعته وهو لايقرا ولايخدم ولايقدم...
فوزيه تنهدت وقالت:صدقتي ياسعاد..
وقعدت تبع بعيونها فمرام وهي تفرق ع النساوين فالشاهي..
وسعاد كذلك تشوفلها لكن بنظرات كلها غيظ...
🍁🍁🍁🍁
خلاص ياماما خلاص معليشي بنتي مش اخرالدنيا..
نورهان وهي تبكي بحرقه فحضن امها:وليت ساقطه ياماما..كلهم تو يعزروني بيها..كلهم ياماما...اني ع خاطر عماد ياماما ماقدرتش نقرا كويس...يامااااما..وقعدت تبكي بالعبره..
وامها قعدت تبكي معاها...
▪▪▪▪▪
هيا حبيبتي..
رزان:هيا هاني وتيت..
شد يدها وساعدها تمشي..
لين وصلوا فالباب..
عماد:حبي نطلب منك طلب بالله تحملي ع خاطري..
رزان:اني نموت ع خاطرك قلبي..
عماد باس راسها وقال:بعيد السو عليك عمري..
وصل فالسيارة..
فتح الباب وساعدها تركب..
بعدين صكر الباب..
ومشي هو ركب وتحرك..
طلع من الحوش..
وتوجه لحوش اهله..
فالطريق وقف ع محل اكسسورات مشهور خدي منه لاخته حاجات تحبها..
بعدين تحرك وكمل طريقه لحوش اهله..
☘☘☘
سكتت عن البكي لكن مازالوا دموعها ينزلوا..
وامها تمسح ع شعرها وتبوس فراسها مرة مرة..
شويه سمعت بابا الحوش انفتح..
كفايه:اهو جي عماد..
نورهان رشفت ومسحت دموعها ومازالت فحضن امها..
لحظات..
وسمعوا باب الحوش الدخلاني انفتح...
قعدت كفايه تشوف لباب الصاله..
شويه وبانوا عليها عماد ورزان...
تجاهلت رزان وشبحت لعماد وقالت:تعال لوخيتك وليدي..
جاها طول وهو فاتح حضنه ويقول:تعالي حبي تعالي..
ناضت نورهان وجاته..
هو قعمز ع روس صباعه وحضنها وقال:معليشي قلبي معليشي..كانك ع السقاط ياما سقطت قبلك..
رزان مشت لعمتها مدت يدها وسلمت وهي تقول:كيف حالك عمتي...
كفايه مدت روس صباعها من غير ماتشوفلها وفيسع سحبتهم وهي تضحك ع كلام ولدها..
نورهان:اني شاطره اصلا مانسقطش..توا بس ع خاطر في الإمتحانات ماقدرتش نقرا نفكر بس فيك وخايفه تصيرلك حاجه فالحرب خفت هلبه..
زاد ضمها وقلبه ينعصر عليها..
ورزان صخفت عليها...
كفايه وهي ترشف:مال شنو وليدي بعد اميمتك مابيحسك حد زي اختك..
طنشت رزان..
اما عماد ماكانش يسمع الا فكلمات اخته.
بعدها شويه وشد وجهها بإيديه وقال؛حبي شن رايك توا نطلعوا ندهوروا اني وياك.
نورهان:ايه خاطري زي زمان لما ترفعني بروحي وندهوروا ونتعشوا..
باس راسها وقال:خلاص سنفورتي..بري البسي وهاك هادم البسيهم..
خدت منه الكيسه وباساته من خده بعدين مشت طول طلعت تجري من الصاله..
وعماد ابتسم بعدين وقف ع حيله ومشي قعمز حدا امه شد يدها وقال:سامحوني والله ماكنت نبيكم تعيشوا هدا كله..
حطت يدها ع يده وقالت:ربي يسامحك وليدي معليشي اهو الحمد لله ربي ردك سالم غانم مافيك سو .
ناضت وقفت وقالت:ترا تعالى معاي بنوريك حاجه..
عماد ناض معاها وقال:حاجة شنو..
كفايه:حاجات نبي نوصيك عليهم ...
ومشت وهو معاها..
ورزان كأنها هواء..
تنهدت وقعمزت ..
فتحت شنطتها بطلع التليفون قعدت ادور فيه مالقتاش..
تأففت بعدين قالت...استغفر الله العظيم..
☘وقعدت مقعمزة بروحها..
لين سمعت صوت عماد يهدرز مع امه واخته فالممر..
وشويه وسمعت الباب تصكر..
خافت تخشلها عمتها تستفرد بيها..
لكن..
مرو 3 دقايق..بعدهم خمسه..وعشره..وزياده خمسه دقايق..
حوالي تلت الساعه ومابانتش..
ومن التلت ساعه..
لساعه واتنين وتلاته..
ورزان بروحها فالصاله...
تعبت من التقعميز تمددت لكن ماقدرتش ترقد..
غصب عنها دمعت...
بش تفرج عن روحها شويه..
🍃ااه ياقداش وحده عاشت زي حالتها وممكن اسوأ🍃
فنفس الوقت..
فالسياره..
كان يسوق وهو حاط التليفون ع وذنه ويقول:تي وينها هادي خيرها ماتردش!؟..
ونورهان تشبحله ع جنب..
نزل التليفون ودرس ع تركينه..
بعدين اتصل بأمه...
ينادي ومايرد حد..
عماد:تي وينهم هادم!!...
اتصل ببوه...
شويه ورد عليه..
عماد:هاه بوي كيف حالك.......الحمد لله.......روحت ؟.......باهي بالله عليك اني حاط رزان فالحوش غادي بكري نتصل بيها ماتردش وامي حتى هي.........باهي نراجي فاتصالك...صكر...
وتنهد بضيق..
نورهان:بترفعني للمطعم اللي قتلك عليه..
عماد هز راسه وقال:باهي..شويه تانيه...
▪▪▪▪▪
خش للصاله..
شافها مقعمزة قال:السلام عليكم..
رزان ؛وعليكم السلام..وناضت..
سعد:قعمزي بنتي قعمزي استريحي..
قعمزت رزان..
سعد:بنتي خيرك ماترديش ع هاتفك راجلك قال من بكري وهو يتصل بيك..
رزان؛نسيته فالحوش ياعمي..
سعد:اها...باهي عمتك وين..
رزان بضيق:مانعرفش..
سعد هز راسه بعدين قام تليفونه واتصل بولده طول رد عماد..
سعد؛ناسية تليفونها فالحوش.........باهي...
مدالتليفون لرزان وقال..يبي يكلمك..
خدت رزان التليفون..
وسعد مشي طول طلع من الصاله..
رزان:ايوه..
عماد بشي من العصبيه:كيف تنسي تليفونك فالحوش قوليلي كيف!!
رزان بتوتر:مانيش عارفه نحساب روحي حطيته فالشنطه..
عماد:تحسابي روحك صار!!.....
رزان قعدت ساكته والدموع فعيونها..
عماد؛صكري صكري...جاي توا..
هي نزلت التليفون وقعدت تشبحله ودموعها طاحوا...
☘في اقل من عشرة دقايق كان عماد فم الحوش..
اتصل برقم بوه مرة تانيه..
والتليفون مازال عند رزان لأن سعد ماولاش..
فتحت الخط وردت:ايوه..
عماد:قاعد عندك هو؟..
رزان:عمي عطهلي وخش داخل..
عماد:باهي..اطلعي.
رزان:حاضر...
صكرت..
وحطت التليفون ع الطاوله..
بعدين ناضت ومشت بسرعه ع قد ماتقدر وطلعت من الصاله..
ووقفت فالفم تنادي:عمي..ياعمي..عمي سعد..
رد عليها سعد من اعلى الدروج وهو يقول؛نعم بنتي..
رزان قامت راسها وشبحتله:عماد جاني بنطلع..
سعد؛في امان الله..
رزان؛تسلم عمي..تصبح ع خير..
سعد:وانتي من اهله..
نزلت راسها ومشت بإتجاه الباب..
وصلت فيه لبست كندرتها وطلعت...
☘برا..
كان عماد مدرس السيارة قدام الباب..
والست نورهان متربعه ع الكرسي القدامي..
طلعت رزان من الباب البراني..
نزل عماد من السياره...
ومشي للكرسي الخلفي فتحه..
رزان مشتله..
وصلت فيه هو ساعدها تركب بدون مايكلمها..
وهي عرفاته معصب وتغاضت..
زي ماتغاضت عن تقعميزت اخته القدام وهي فالخلف..
صكر الباب...
ومشي ركب وتحرك طول..
🍁طول الطريق يهدرز مع اخته وفايت رزان..
حست رزان انه مضايق من شي تاني غير حكايه التليفون اللي نساته..
وصلوا لوحده من المطاعم اللي تحبهم نورهان...
وكذلك غادي كان جاف جدا مع رزان..
وهي مش فاهمه علاش....
🍁بعد تعشوا...
روح بنورهان الأولى بعدين توجهوا لحوشهم..
رزان:خيرك عماد؟
عماد:ماخيرني شي..
رزان:معقوله هدا كله ع خاطر نسيت هاتفي..
عماد بشي من الأنفعال:اي ياهانم ع خاطر نسيتي هاتفك..تعرفي عقلي شن جابلي لما نتصل بيك وماترديش..تعرفي فشن فكرت..قلت اكيد امي نزلت فيها توا ووجعتها وهي تعبت ولاصارتلها حاجه..زفر بقوة بعدين قال..استغفر الله العظيم خفت عليك من امي انتي متصورة حاجه زي هادي!..
رزان بدموع:انت طلعت وخليتني غادي وتوا تقولي خفت عليك من امي؟
عماد؛انذهبت شيرتي اقسم بالله انذهبت حالة اختي خلتني مانفكرش الا فيها هي بس..
رزان غمضت عيونها وفتحتهم وهي تحاول تهدي روحها حطت يدها ع يده وقالت:حبيبي بالله ماتكدر روحك خلاص وعمتي والله ماجت حتى من ركني اقسم بالله..واختك كانت فحاله توجع واجد..وفالنهايه هي اولى بيك مني..
قام يدها وباسها بعدين حطها ع صدره جهة قلبه وقال:اااخ..نحبك اني نحبك نموت فيك يابولينغه..
رزان من بين دموعها؛ههههههههههه..يابارد..
عماد بضحكه:يموت فيك البارد...
🌴🌴🌴🌴
الساعه 10:30ليلا..
مقعمزين فالصاله يهدرزوا..
الاب والام..
والولاد التلاته..
ومعاهم الكنه...
رمزي:تو نديرولك زردتك غدوة ان شاء الله..
توفيق:مني ليك هديه حاجه ماصارتش..
قصي وهو مبتسم بفرح:وانت ياسيدي..
ميلاد؛اني شن !!؟ساد باركتلك..
قصي:باهي اني نقولك الهديه اللي نبيها..
بوه قعد يشبحله..
وخوته ومرت خوه يضحكوا..
اما امه فكانت تشرب فالشاهي وتشوفله بتضييقة عيون..
قصي:في أبله فالمدرسه سماها اماني طيبه واجد وسمحه وجوها مش عادي..
ميلاد ضحك بتهكم وقال:وشن تبيني نخطبهلك!!؟..
ضحكوا...
قصي؛تي لا انت اخطبها...
🍃ساد الصمت المكان..
كلهم توجهت انظارهم لسعيده..
اما ميلاد :فيك الخير الوحيد اللي طلعت تحس بسيدك حق وتحبه...الله يبارك فيك اني كان جبت ماجبت كان قصي..
سعيده وهي رافعه حاجبها تشبحله من فوق لتحت..
وهو يضحك وحاجبه اليسار المرفوع..
رمزي:والله حتى اني نحبك ونبيك تعيش حياتك تبيني نخشلك فالموضوع ماعنديش مشكله..
حركت عيونها لرمزي وقعدت تشبحله من فوق للوطا..
وهو يشبح لبوه وع وجهه ملامح الجديه وكأنه يدوي من جده..
توفيق:العرس من بابه لمحرابه علي اني..
ميلاد رفع يديه فوق وقال:الحمد لله اللي وهبني هالذريه الصالحه..
سعيده مررت نظرها عليهم كلهم وهي تشبحلهم من فوق لتحت..
اريج زي أي كنه تحب تستغل فرص زي هادي بش تزيد تحبب عزوزتها فيها...
اريج:والله ياعمي مانك لاقي زي عمتي سعيده لو درت البلاد كلها..
ميلاد:ياخسارة مانشكر فيك ياأريج ونوصي فراجلك عليك..
اريج:واني نبي مصلحتك ياعمي زي عمتي سعيده والله مانك لاقي..
سعيده نفشت ريشها وقالت بكبر:عارف روحه والله مالاقي كيف ظفري..وعارفاته مايديرها..
ميلاد:دوة بس..من داخل ترعشي مع بعضك..
رمزي وهو يشوف لأمه قال بضحكه:خلاص ياشيخ ساد راهو جهاز الإنذار خدم..
توفيق بضحكه:حتى اني نقول هكي..نبصروا ياسمحه انتي الخير والبركه..
قصي:اني مانبصر..
سعيده ناضت وقالت:جنيت ع روحك ياسفتول..
ناض قصي بسرعه وطار يجري ..
طلعت من الصاله ووصلت في الممر طبست خدت شبشب توفيق وهي تقول:الطريحه والله لما تاخدها..ومشتله..
واللي فالصاله ميتين ضحك..💓
🍁🍁🍁🍁🍁
بعد ماصلى العشي فالصاله..
خش للدار..
لقاها راقده هي وبنته الصغيره..
ضحك وقالت:بتبدي تحتلي السرير يافطومه!؟خربتي ع سيدك ..
غير عيونه وشبح لفضيله تنهد بإبتسامه..
بعدين لف..
ومشي خدي بطانيه..وصكر الضي وطلع للصاله...
🍁🍁🍁🍁
تاني يوم...
الصبح...
الساعه 9:30 صباحا..
راكبه فجنب خوها فالسيارة..
تسأل فيه من بكري سؤال وهو مايردش عليه..
"وين ماشيين"..
وصلوا للمكان المقصود..
حمزة: انزلي..
رانيا :مانيش نازله لين نعرف علاش جبتني هني..
خبطها ع راسها وقال:كساحه الراس هدا ماعندك..جايبك بش اديري تحليل دم..
رانيا بخوف:خيرني شن فيا!!؟
حمزة بإمتعاض:فيك الطقه..
رانيا :غير قولي علاش ياحمزة؟
حمزة مط شواربه بملل وقال:فحص زواج..
ارتسمت ع وجهها ملامح البلاهه..
حمزة:بيقروا فاتحتك يوم التلات...
رانيا ؛حمزة خيرك وخيي شن جاك بش تهتري هكي؟!
حمزة بنرفزة:نهتري عينك ياتافهه..فاتحتك انتي وهداكا الأصفر يوم التلات..
ارتسمت ع وجهها ملامح الصدمه وهي تشبحله..
هو قعد يشبحلها بريبه وقال:ادوخي نقتلك..
بدت تتسارع انفاس رانيا..
حمزة؛ادوخي نعفس فيكم راهو..
انقلبوا عيون رانيا بعدين تسكروا وجت طايحه ع الكرسي..
حمزة بخوف وغضب:ياعنننن شياطين جد شيطانكم قلتلهم يرفعها سند الزفت!..فرخه رانيا رانيا...قسما بالله كان مانضتي توا نشرينك كف يقعد يرن فوذنك ليوم الدين..
بدت تضحك...بعدين فتحت عيونها..
حمزة غمض عيونه بشده بعدين فتحهم وقال؛تخففي فدمك!انزلي يابهيمه انزلي تو يبانلك..
رانيا بضحكه؛غير احلف قبل حق اللي قلته..
حمزة:رانيا انزلي..
رانيا؛هههههههههه..
وفتحت الباب ونزلت...
وهو ابتسم بعصبيه وحرك راسه ايمين ويسار بعدين نزل...
يتبع ....
