#العشق_المتمرد "عندما يزهر الليمون"
#جمان_فريد
الجزء136 القسم الثاني..
⏳..
بدت حفلة التخريج بروتينها المعروف ع المسرح..
الا ان مايحدث بين صفوف الحضور كان مختلف وغير معتاد..
في تاني صف ع يسار المسرح
وحده من الخريجات كانت في قمة التوتر تفرك في إيديها فبعض..وقلبها دقاته صوتها مسموع..
ع يمين المسرح في اول صف..
استاذ عقله وقلبه وعيونه مع الطالبه المتوترة وفي نفس الوقت كانت نيران الغيرة والعه تحرق في فؤاده..
بس وين تجي ناره جنب نار الضيف الجالس في طرف رابع صف ع يسار المسرح..
كان يشوف للأستاذ بنظرات قاتله..
وفي نفسه يقول..ياليت النظر يقتل..
يغير نظره عنه..تجي ع أجمل عيون بلون السمي صافية ونظراتها كلها حب وبراءة..
دارلها حركه بأنفه وهو مبتسم..
هي ضحكت..بعدين حطت يدها ع فمها طبعت ع كفها قبله بعدين بعتتها لبوها طايرة...
بوها رفع يده وهي مفتوحه بعدين صكرها وقربها لخده وفتحها وحطها عليه وغمز لبنته..
هي ضحكت..
فهاللحظه التفتت امها تلقي نظره شافتهم الزوز كيف يشبحوا لبعض ويضحكوا..
هو جت عينه عليها تشبحلهم تبدلت ضحكته لإبتسامه..
بنتهم شبحت وين يشبح بوها شافت امها ملتفته تشبحله..
البنية خطرتلها حاجه..
شبحت لبوها واشرتله بيدها شبحلها..
البنت اشرت ع خدها..
هو ضحك وفهم عليها..حط يده ع فمها وباسها وبعتهالها..
هي دارت زيه وشدتها..
ودلال تشبحلهم بإبتسامه..
شبحت آسيا لأمها..واشرتلها بيدها التانيه..
دلال ضحكت بكتمان..
آسيا طيرتلها بوسه بوها..
عمار حط يده ع فمه وهو يضحك بكتمان وحواجبه مرفوعات..
دلال شبحتله برفعة حاجب وبقفا يدها ردت البوسه وشبحت القدام..
عمار عض ع شاربه وهو يضحك بكتمان..
آسيا شبحتله ومطت شواربها للأسفل بأسف..
عمار اشرلها بيده وهو يحرك فيها يمين ويسار ويقول وهو يحرك فشفايفه حركه مبالغ فيها بش تفهمها بنته:عادي..
اسيا ابتسمت..
"حمم اححم"..
شبح عمار لهانيبال..
هانيبال اشر براسه بحركه خفيفه يدوب تنشاف ع عبدالسلام..
عبدالسلام اللي داير روحه مركز مع كلام عميد الكليه..
عمار ارتبك شويه بعدين شبح للعميد وهو يلقي فكلمة..
وهدا كله كان ع عيون ضو..اللي قاعد يسحن فروحه وخلاص..
☘رانيا بضحكه:تهبل آسو..
غاليه بإبتسامه؛تعلقت ببوها واجد..
رزان ابتسمت وقال؛الاب غير عند بنته..ربي يطول فعمره اصفرنا الكبير..
رانيا وغاليه قالوا بضحكه:آمين..
🌴🌴🌴🌴
الو...الو...رمزي..الو.....هاااه..شنو حالك..
رمزي:الحمد لله ياسيدي انت شنو حالك..
ميلاد:الحمد لله ياولدي..غير خبرني عنك شن داير غادي ياولدي شن داير فالقرايه..
رمزي بإبتسامه:الحمد لله ياسيدي مرتاح واموري تمام والقرايه ماشيه تمام ندير في امتحانات تو..ونبي نبشرك..
ابتسم ميلاد وقال؛بشر..
رمزي:الراجل اللي تعرفه خدمني عنده فشركة استيراد وتصدير فاتحها هنى ليها سنين ناجحه واجد ياسيدي..
ميلاد بفرح:ماشاء الله تبارك الله..من وانت صغير ياولدي وانت تلقط فدعي الخير من كل مكان..واني ديما راضي عنك..وديما ندعيلك..ديما يارمزي ياولدي..
رمزي ابتسم بحب وهو يمسح فدموعه قال:ربي يطول في عمرك ياسيدي..ويخليني ديما كيف ماتتمنى..
ميلاد:كون انت كيف ماتمنى بس باهي؟
ضحك رمزي وقال:باهي باهي..
ميلاد بإبتسامه:هي مالا مانعطلش عليك عدي شوف حالك هي..في أمان الله
رمزي بضحكه:سلملي ع جميع..بالسلامه..
ميلاد؛يوصل..بالسلامه..بالسلامه..وصكر..
تنهد بعدين التفت وخش للورشه...
🍁🍁🍁🍁
وصل الحفل لأهم مرحله فيه..
هي تكريم الخريجين بالشهاده..
دلال زادت توترت اكثر ...
اكثر شي موتر دلال وجود عمار..
اللي كان يراجي بفارغ الصبر امتى يسموا اسمها..
كان فخور جدا بيها من كل النواحي..
بالذات لما يتفكر الكلام اللي قراه في مذكراتها..
(كنت ملخبطه اليوم هلبه..اعصابي تعبت هلبه برغم اني قريت لكن مرض آسو اربكني هلبه..جيت مش خاشه لكن الحمد لله ربي بعتلي من يخليني نرجع نقوي نفسي مرة تانيه وخشيت الإمتحان الحمد لله)
▪▪▪
(صفيت موادي كلهم..لكن آسفه ماكانش نجاح باهر..اهو نجاح وخلاص)
▪▪▪
(اني تعبت هلبه..والله مرات نفكر نوقف قرايه خلاص..لولا انك وصتيني كنت وقفت.. اني تعبانه هلبه ياعمار)
🍁🍁🍁
وصلوا في قسمها...
وبدوا يسموا في الأسماء..
وكل احبابها يراجو....
وصلوا في حرف الدال..
كانت هي أول اسم بالحرف هدا...
"الخريجه..دلال عبدالسلام حمد ****"
كلهم وجهوا النظر ليها وهما مبتسمين وآسيا فرحانه اكثر من امها..
ناضت دلال ومشت طلعت من صف الكراسي..
جواد كان يشبحلها بنظرة حب وفخر فرحان ان المراة هادي أمه..
زي ما جده فرحان ان المراة هادي تكون بنته..
اللي تحملت مسؤوليات نادر مايتحملوها من هما فسنها
ومسؤوليتها كأم ماخلتهاش تفشل فتحقيق حلمها..
اجتهدت لين وصلت واهي اليوم تقطف فثمرة كفاح وصبر سنين..
فخور هلبه عبدالسلام الأب بهكذا ابنه..
وخالها اللي معتبرها بنته حتى هو الى جانب فخره بيها زاد احترمها اكثر واكثر..ومن قلبه متمني يستقر حالها عن قريب ويطمنوا عليها..
💓وصلت دلال ع المسرح وقعدت تمشي
بإتجاه الدكاترة وهي مبتسمه..
ضو..كان بعيونه معاها مايشبح كان فيها هي وبس..
اما معشوقها..
فقعد تلقائيا يبني في ابيات الشعر فعقله وقلبه بيت ورا بيت..
ذكر الدكتور اللي سما اسمها انها حصلت ع الترتيب الثاني ع دفعتها..
كل الحضور صفقولها..
وتصفيق صغارها ليها كان بحرارة...
استلمت شهادتها وهي مبتسمه ابتسامة فرح حلوة...
الدكتور:تحبي تقولي كلمه بنتي دلال..
دلال هزت راسها بإبتسامه..
وخر الدكتور وهي مشت وقفت فمكانه..
مررت نظرها ع الموجودين بعدين تنهدت من قلبها وقالت..
هو مافي حد من زملائي وصل هني بسهوله..لكن اني ماوصلتش هني الا بصعوبه بالغه..تعبت..وعجزت وقررت في لحظات ضعف اني نهرب..نوقف قرايه يعني..لكن اجبرت نفسي نكمل اللي بديته..نوصل لأخر لحظه اللي هي هادي..لأني تعلمت ان الحياة هادي فيها صعب وساهل ومش ديما فيها نكونوا اقوياء..ومش..ديما..نكونوا ضعفاء..الطيحه للشخص القوي تخليه ينوض وهو اقوى واكثر ثبات من قبل..
سكتت لما بدوا الحضور يصفقوا..
بعدين وقفوا وهي كملت تقول..هلبه يعرفوا ظروفي كويس ممكن هلبه زي حالتي صعب يكملوا في مجال دراسة زي مجالي..الفرق الوحيد بيني وبينهم اني قاومت ع ضعفي قاومت..وكنت ديما نقول لنفسي ان ربي ماينزلش البلاء القوي الا للعبد القوي...
شبحله هانيبال...
لقاه يشوفلها بملامح وجه حزينه..وهو شاد ع قبضة يده اللي كان حاطها ع يد الكرسي بقوة..
دلال: الحمد لله...ومن بعد الله..نشكر صغاري اسيا معمر جواد اكبر سبب لتمسكي بحلمي..
صدح المسرح بأصوات التصفيق واسيا كانت تصفق معاهم بحماس..
بعدين وقفوا..
دلال:ونشكر عيلتي كلها..وبنت خالتي وصديقتي خريجة سنه 2015 الأولى ع الكليه وقتها..اللي ياما وقفت معاي ودعمتني..
ضحكت رانيا وهي تمسح فدموعها..
دلال:واخيرا..نشكر اجمل واروع واحسن راجل فحياتي حبيبي معلمي واقوا داعم ليا..العميد في **** عبدالسلام حمد****..
عبدالسلام نزل راسه وهو مبتسم ويحاول يشد دموعه بالسيف..
هانيبال شبحله وطبطب ع ظهره..
ونور ملتفته تشبحله ودموعها ينزلوا.
دلال بإبتسامه:والشكر موصول لكل اعضاء هيئة التدريس وع راسهم استاذ نجيب فرج...
ورجع صوت التصفيق صدح فالمسرح..
بعد وقفوا تصفيق ...
دلال:شكرا وآسفه ع الإطاله..
وخرت من ع الطاوله ..
جاها العميد سلم عليها بإيديه الزوز..
عمار صارله مسح شامل لكل مشاعر الحزن..
وحلت محلها مشاعر ناريه لايمكن كبح جماح السنة لهيبها..
طلقت يد الدكتور بعدين مشت نزلت وتصفيق الحضور شغال..
وضو مازال ضايع فدلال..💓
دلال وين وصلت للكرسي سلمت ع صاحباتها..بعدين قعمزت والتفتت لعيلتها وهي توزع فنظرها عليهم اشرتلهم بيدها تحيي فيهم..
وهما كلهم ردولها التحيه..
بعدين تبتت نظرها ع صغارها وهي تبتسملهم وهما كذلك..
بعدين شبحت القدام..
وعمار رايح فيها💓
🍁🍁🍁🍁
معاش سمعتوا شي عن بنت عبد المقصود..
هالسؤال سألاته زينب لحميده بحضور لمياء وفضيله ونعيمه ..
حميده:يومتها بعتت اوسمه مع اريج وتوفيق قعدت معانا يوم كامل..
خواتها ابتسموا بسعاده..
زينب بإبتسامه؛ياوخيتي سلمها شن جوها؟
حميده بضحكه:رايحه زايده ماشاء الله وباديه توقف..
البنات بأصوات متقطعه؛ماشاء الله..
نعيمه:ماأستغربتش!؟
حميده:تس تس تس..بكل..
تنهدت زينب وقالت:ربي يهدي بوها ويرد امها يارب..
كلهم ماعدا لمياء قالوا بأصوات متقطعه:يارب..آمين..
اما لمياء طول التقعميزة دايرة روحها لاهيه بتليفونها..
وهما متجاهلين وجودها..
🍁🍁🍁🍁
مقعمز هو وصغاره معاه ع كرسي طويل..
يتفرجوا عليها وهي واقفه تصور مع بوها وخالها واللي تصور فيهم نور..
وبنات العيله وخالتها واقفين مع بعض بعاد عليهم شويه...
بعد صورت..
نادوها صاحباتها...
طول مشتلهم...
وهو معاها بنظره اللي ماقدرش يحوله من عليها..
وبوها مركز عليه..
مشت هي وصاحباتها قدام الواجهه..
كانوا الخريجين كلهم مجتمعين غادي..
اصطفوا كلهم مع بعض..
وقدامهم واحد بياخدلهم صوره..
عدوا من الواحد..للثلاثه..
بعدين حولوا قبعات بدلة التخرج وحدفوهم فوق وهما في قمة البهجه والسعاده..
والمصور خدالهم صورة...
❤فرحة دلال كانت لاتوصف وعندها هلبه اسباب تخليها اسعد من خلق ربي فهاليوم..
وهو يشوف فيها سعيده هكي يحس بروحه سعيد اكثر منها ع خاطرها..
كانت تتنقل بين زميلاتها تسلم ع هادي تهدرز مع هادي تضحك مع هديكا...
هام فيها وانقطع عن العالم اللي حواليه...حس ان معاش في حد فالدنيا غيره هو وياها...
تلقائيا قعد يغني..
كلك ع بعضك حلو...والاحلى الغزل البعيونك..
تزعل لو ترضى حلو..شوكه بعين اللي يحسدوك..
وجهك حلو..طولك حلو...كلك على بعضك على بعضك..
على بعضك حلو...
وصغاره يشبحوله وهما مبتسمين..بعدين قالت آسيا..
آسيا:بابا..
تنهد وشبحلها بعدين قال:اي نعم ياروحي..
آسيا:بابا جبت لماما هديه؟
جواد؛مش لازم يجيب امي فرحت لانه جي ساد..
عمار شبحله وابتسم بفرح وحط يده ع راسه وقال؛كيف عرفت !؟
جواد:اني نعرف امي كويس..
عمار مسح ع شعره وهو يشوفله بإبتسامه..
معمر:بوي..
عمار شبحله وقال:نعم يازعيم..
معمر:صورتلنا البلاد اللي كنت فيها؟
جواد؛ايه حقه!
عمار ضحك بعدين حط يده في جيبه وطلع التليفون وهو يقول:اكيد مال شنو عطيتكم وعد..
قعد يدور ع المقاطع وهو يقول..اممم..وينهم وينهم..وييينهممم..اهممم..تعالوا تفرجوا..
قربوله جواد ومعمر اكثر..
اما اسيا مشت وقفت بين رجليه وقعدت تتفرج وهو طبس باس راسها بعدين بعد وقعد يحكيلهم ع الموجود في الفيديو..
🍀والعيله يتفرجوا عليهم ويعلقوا اعجابا بالمنظر اللي يشوفوا فيه..
فهالوقت..
دلال:بنمشي لعيلتي..
ماريه بضحكه:وانا كمان زوجي اجا ئال عاملي مفاجأة..
دلال ضحكت وقالت:يهبل راجلك هدا ربي يخليكم لبعض ويفرحكم بشوشو..
ماريه بإبتسامه؛وانتي كمان الله يفرحك بولادك..بس دلوله بدي اسألك..
دلال:شنو؟
ماريه شبحت جهة عمار والصغار وقالت:من هو الزلمه هداك الزلمه الموجود مع ولادك؟!
دلال شبحت لعمار وقالت:بوهم..
ماريه بصدمه:ميييين!!!؟
دلال شبحتلها وضحكت بتفنيصه وقالت:وطي صوتك يانهاري!
ماريه بصدمه؛طيب كيف وين ومن ايمتى!!؟
دلال بضحكه؛روحي توا بعدين ان شاء الله نتصل بيك ونحكيلك.
ماريه:طبعا حبيبتي رح اتصل واسأل مشان اعرف والا مارح نام الليل..
دلال:هههههه..
ماريه سلمت عليها بالخد وقالت؛سلام حبيبتي..
دلال؛سلام..
بعدت ماريه وشبحت لعمار مرة تانيه رفعت حواجبها ونزلتهم وتنهدت بعدين لفت و مشت بسرعه..
ودلال تضحك عليها..
بعدين شبحت جهة عمار والصغار لقتهم مازال لاهيين بالتليفون والصغار منسجمين مع هدرزة بوهم..
ابتسمت بعدين شبحت للبنات وجت بتمشيلهم لولا ضو اللي وقف عليها فجأة..
ضو بإبتسامه:اسف..
دلال وهي مخلوعه:لا..عادي!
ضو بضحكه:كنت فالكليه تميت شغل معين وجيت طول..
دلال ابتسمت بربكه وقالت:اها..اشرت بعيونها ع خالها وقالت..هوينا خالي هانيبال..
ضو بضحكه:عارف وينه..غير نبي نعطيك حاجه مش من قدرك هي..تنهد وقال..ان شاء الله تعجبك..
☘فهاللحظه..
عمار قام عيونه وشافهم..
تبدلت ابتسامته لملامح الغضب...
فتح عينه ع وسعها لما شافه مدلها حاجه تبان زي الهديه..
وخطر عليه طول فقرة في المذكرة قراها تخص ضو..
(تعرف اني نغار ع روحي ليك ممكن اكثر ماتغار عليا..ايه والله..لدرجة اني اليوم درت تصرف متهور واحرجت بيه شخص مادارلي شي..والمشكله انه قريب..نسيب خالي هانيبال حي عليا كان يعرف حي)
🍃هي هني مش شارحه اللي صار بالزبط ولاذكرت اسماء..بس اللي قراه يكفي يخليه يفهم كل شي..
يفهم سبب تغير ضو واسلوبه الفظ اللي تعامل معاه بيه..ويعرف من يكون الشخص اللي قال عنه يعقوب انه يحوم حواليها...وهدا واحد من الاسباب بل اقوى سبب دفع عمار يجي للحفل🍃
شبح طول لهانيبال..
هانيبال كان لاهي مع اخته والبنات يهدرز عليهم..
رجع شبحلهم لقي دلال تكلم فيه لكن ماخدتش منه شي..
عمار بحده:جواد عدي لخالك هانيبال قوله باتي يبيك..
جواد:حاضر..ومشي جواد طول لهانيبال..
وعمار مازال يشوف لضو ودلال..
☘دلال:ارجوك لو سمحت..
ضو:اني قبلت هديتك دلال ليش انتي ماتقبلي!
دلال بضيق:هداكا اعتذار مش هديه!
ضو شبحلها شويه بعدين قال بشي من الحده:تمام يادلال..مانبي نصر عليك مانبيش ندير دوشه..لكن لينا كلام تاني في وقت تاني..هز راسه ولف ومشي طول بإتجاه كلية العلوم وهو معصب..
وهانيبال وعمار يشبحوله..
عمار بغضب:هانيبال كان تعرف حاجه قولها..
هانيبال شبحله وهو عاقد حواجبه وقال:وحق الله مافي حاجه مدرقها عليك..الاولى اني نحكيلك..
عمار:باهي فسرلي اللي داره!..
هانيبال غير عيونه عنه وشبح لدلال اللي كانت تمشي اتجاه البنات اللي معاهم صغارها وباين عليها انها متوترة..
عمار شبحلها وهو عاقد حواجبه و نار الغيرة تاكل في قلبه قعد معاها بنظرة لين وصلت فالعيله بعدين قال؛هانيبال..
هانيبال هز راسه وهو معصب وقال:تو نفهم شن في ونقولك بعدها..
عمار:نبي نكلمها مرة تانيه..
هانيبال؛هدى اللي نبيه حتى اني..خليك هنى..
عمار:قبل تعدي نبيك تجيبلي القيلا متاعي من السيارة..
هانيبال هز راسه بإيجاب بعدين لف ومشي للسيارة..
وعمار حط ايديه فجيوبه وهو مازال يشوف لدلال
☘دلال بعصبيه:قريب عطيته كف..معقوله يوقف عليا قدام خالي وعمار!!باهي اللي بابا مشي قبل ليشوفه..
غاليه:مش تصرف حد عاقل بكل..مادار قيمة ولاقدر لخالها اللي هو نسيبه..
رانيا:تعرفوا!شكله يحب دلال بالحق هدا علاش بدي يتصرف من غير مايفكر..
رزان:اللي يحب وحده حق يدير لهلها حساب..لكن هو بلعاني كان يبي عمار يشوفه..يبي يدخل فعقله حاجه..
التفتت دلال لعمار طول..لقت خالها واقف عليه..يعطي فيه القيلا..
رانيا لرزان:مزبوط كلامك..
دلال شبحتلهم وقالت بقلق:قصدكم عمار توا كيف يفكر فيا!!؟شن فسر اللي شافه!!
غاليه مطت شواربها للأسفل بعدم معرفه..بعدين ضمتهم بأسف..
رانيا؛مش عارفه..
رزان:لو كنتي مكانه شن تفسريه؟!
دلال عضت ع شاربها وهي مضايقه ع الآخر..
غاليه:خالك جاي..
شبحوا وين ماتشبح غاليه..
لقوه قريب يوصل فيهم..
لما وصل قال لدلال بجديه؛اسمعي يامراة حطي عقلك فراسك وعدي تفاهمي انتي والراجل بالعقل..
دلال:توا!!؟
هانيبال:ايه توا عدي هي..
دلال مررت نظرها عليهم..وهما.يشوفولها..
غاليه غمضت عيونها وفتحتهم واشرت براسها للجهة اللي واقف فيها عمار.."بمعنى بري"..
دلال بضيق حولت كاب التخرج ومداته لخالتها مع الطاقيه..
بعدين قالت..ردو بالكم ع الصغار..
هانيبال التفتلهم وين ماكانوا واقفين مع نور ورفقه وقال:معانا معانا..التفتلها وقال..عدي هي..
تنهدت بضيق بعدين مشت..
هانيبال شبحلهم وقال:شن مافيش مكان هنى نعدوله نقعمزوا فيه؟..
رانيا:لا في تعالوا معاي...
هانيبال التفت وقال:نور رفقه..جيبوا الصغار وتعالوا..
نور هزت راسها بإيجاب..بعدين خدت يد آسيا وقالت للولاد:هيا..
مشوا كلهم مع بعض..
وآسيا وهي ماشيه مع خالتها قعدت تشبح جهة بوها وشافت امها وهي ماشيتله..فرحت البنيه وقالت فعقلها الصغيرون ان امها حتولي لبوها ويعيشوا كلهم مع بعض..
🍀🍀🍀
دلال وهي تمشي ناحيته مابتش تشبحله بكل عيونها ع الكرسي تبي تقعمز عليه طول..
وهو مركز عليها وزبطها شن بدير...
لما جت بتفوت من جنبه جي قدامها..
هي رعشت مع بعضها..جت بتفوت من الجهه التانيه..
جي قداها..
هي بلعت ريقها ووجها راح احمر سخون زي النار وهو مركز عليها..
قامت عيونها فيه..
ابتسم..
هي غمضت عيونها بنفاد صبر..بعدين فتحتهم وجت بتفوت بسرعه من حداه..
وقفها بعصاة القيلا لما حطها قدامها...
هي لما شافتلها قلبها وجعها هلبه هلبه...
هو قربلها وقال:وين ماتعدي تلقيني قدامك..مانيش مخليك..
شبحتله لقاته مقرب هلبه بعدت شويه بعدين وقفت مقابلاته رفعت حاجبها وقالت:انت راجل تعرف الدين كويس..مش رايح من بالك اني اجنبيه عنك..
ابتسم وقال:جل من لايسهو..ونا بني آدم..نسهى وننسى..وزيدي عليهن مذهوب شيرة💓
دلال:لا لازم تذكر اني مش ع ذمتك تجنب الحرام..
تبدلت ابتسامته لملامح الحده وقال:وضع مؤقت..
دلال ابتسمت بتهكم وقالت:من قالك؟!
خبط القيلا ع الأرض وقدم خطوه وقال:نا قلت..
دلال قلبها بيفر...هي توا كان.تلقى تحضنه ومعاش تطلقه لاخر لحظه فحياتها لكن من برا بينت العكس وقالت:واني قبل قتلك مش ديما كل شي يمشي ع مزاجك..
عمار تنهد بعدين قال:تعالي نتفاهموا بهدوء بالعقل..
دلال:وتفاهمنا قبل بالهدوء وبالعقل واتفقنا..
عمار بشي من الإنفعال:ع شنو تفاهمنا واتفقنا!!انتي قطعتي الكلام فنصه وعديتي عني وخليتيني!
دلال:والله اني نهيت الكلام لان انت ماكان عندك شي تقوله ينفعني..
عمار شبحلها شويه بعدين قال؛هو سؤال..انتي مازلتي تبيني ولالا..
غيرت عيونها عنه وقعدت تشبح للطريق...
عمار:دلال..انتي مازلتي تبيني ولا لا..
شبحتله وقالت:علاش تسأل فيا السؤال هدا؟
عمار:السؤال هدى هو اهم من أي كلام ينقال...
دلال:اممم..وكان قلت لا ؟!
هو قعد يشبح لعيونها وماباش يرد..
دلال:اني سألتك..كان قلت لا شن يصير شن بدير؟!
ضم شواربه وهو يشوفلها..بعدين رخاهم وقال...
❣عشقتك وعشقي يامراد العفه...انتي في كفه والنساء في كفه...
انتي الهيبه...انتي الموده والوفاء والطيبه...ومو حال بعدك ماندير حبيبه...طول الحياه والعمر نين نتوفى...ولاشعر عن غيرك قدرت انجيبه...لاينتضم في ألابيات،لايتقفى...مهما بعدتي من العيون قريبه...ياحنينه ياأم الغثيث السفه...انتي الحايله بين المنام وطيبه...طفيت نارك ماتبي تطفى...مجروح وجرحي حار فيه طبيبه...عاجز سبايب داي مايعرفها...صاعب دوايا ماقدرش يجيبه...ولا دموع عيني السايله كففا...
ولافيك نساني كثير كتيبه...فكاك من اللي جنها امكتفها...المكتوب يعطي لكل حق في نصيبه...وحظي معاك اسود سواد الغفه...إذا كان قلبي يسعدك تعذيبه...فيه ماتخلي الحاسده تشفى...حكايه غلانا متعبه وصعيبه...مشكور فيها الياس كفا ووفى...عشقتك وعشقي يامراد العفه...
