#العشق_المتمرد "عندما يزهر الليمون"
#جمان_فريد
الجزء135القسم الثالث
⏳..
ضيق ضو عيونه وقال:خيرك نحس فيك انظر كيف..مش فرحانه..
تنهدت مرام وقالت:ضو..
رفع حواجبه وقال:اممم..
مرام..
"تصدق!!ولد خال هانيبال عمار..طلع حي"
🍃صدمه...صدمه...صدمه....
صدمه مضاعفه حسها ضو..يعني كل اللي سمعوا الخبر كانت صدمتهم فوجوده ع قيد الحياه..
لكن ضو فوق هكي...وجود عمار ع قيد الحياة قتل كل امل ليه في حب حياته..انهى كل الفرص..
خلا دلال بالنسبه ليه حلم وحتقعد حلم تحقيقه توا من المستحيلات🍃
ضو ردة فعله كانت تعبر عن صدمته..
ردة فعل خوفت اخته..
رفع حواجبه وضحك ضحكة تهكم...
مرام بخوف وحزن:ضو..
ضو بدي يضحك من جده اكثر واكثر..
مرام قعدت تشبحله بصدمه وخوف وعيونها تعبوا دموع..
وضو يضحك...
بعدين قعد يقول بضحكه وهو يخبط فكفوفه ببعض:والله ياراجل..حاله..هههههههه
مرام بريبه:ضو!
ضو:هههههههههه..لاحول ولاقوة...ههههههه..عليك حاااله..
ولف ومشي وهو يضحك..
ومرام جامده فمكانها وتشبحله وخلاص..
لعند ماأختفي من قدامها وسمعت باب داره تصكر..
وهو مازال يضحك..
🍁🍁🍁🍁
غير خيرك ياماما خيرك ياحبيبي..
هادي رزان وهي قايمه ولدها فغمرها وتمشي وتجي بيه فالدار والولد يعيط ع قد مادارتله ماباش يسكت..
وهي من قلة حيلتها ووجع قلبها عليه قعدت تبكي معاه..
طلع عماد من الحمام بعد ماكان يدوش..
مشي للدار طول..
خش وهو يقول:خيره!توا كان مافيه شي ويلعب..
رزان ببكي:مش عارفه شن جاه يبكي وخلاص قلبي يوجع فيا عماد..
وقلب عماد تقطع عليه وعليها..
جاها طول وهو يقول:بعيد السو ع قلبك من الوجع...ترا هاتيه حبي هاتيه...
رزان مدتهوله..
خداه منها بحذر وقال:بري قلبي ديري كان بديري حاجه..
رزان وهي تشوف لميلاد:لالا مش متحركه من هنى لين يسكت..
ابتسم عماد وقال:باهي..
وقعد يمشي بيه ويجي فالدار وهو يغنيله...
هوها ياهوها كلبه يلعن بوها..
ورزان تشوفله وهي تضحك من بين دموعها..
لحظات بس وميلاد بدي يهدى لكن مازال مارقدش..
عماد:خلاص حبي بري ديري اللي وراك شويه ويرقد..
رزان وهي تمسح فدموعها قالت بضحكه:ريت المعفن طول سكت عندك..
عماد وهو يشوف لميلاد كيف ساكت ويشبحله:تو في حد مايرتاحش فحضني!؟
قام عيونه وشبحله وهو رافع حاجبه..
هي شقلبت عيونها ومشت طلعت من حداه..
ضحك وقال:مسمومه..شبح لولده وقال..امك هادي عقربانه..لكن تهبل..هي ارقد هي..هوها ياهوها...
وقعد يمشي ويجي بيه وهو يحاول يرقده..
ورزان مشت خشت للحمام..
🍁🍁🍁🍁
طلع من دار النوم بإتجاه دار المعيشه يبي يدير عليهم طلة قبل يرقد..
وين قرب من دار المعيشه سمع صوت بكي..
كان صوت بكاها..
قلبه قريب وقف من الخوف..
خشلها طول شبحلها..
لقاها رافعه ركابها وهي ثانيتهم لفوق ودافنه وجهها فيهم وهي محاوطته بإيديها وتبكي..
قدملها وهو يقول:نور..خيرك تبكي؟!
هي رفعت راسها وشبحتله بنظرة حقده مغرقتها الدموع..
اربكاته النظرة ومع هذا كرر سؤاله..
مالك:علاش تبكي؟
نور ناضت بعصبيه ومشت طول فاتت من حداه وطلعت من الدار وهو مشي وراها..
مالك:نور...نور...
هي قعدت تمشي لين وصلت وسط الحوش..
وقفوا الزوز مقابلين بعض..
هي بغضب من بين دموعها قالت:تسأل فيا علاش نبكي بكل وقاحه تسأل فيا علاش نبكي!؟بعد كل اللي درته ومازال تسأل!؟
مالك بألم:نور ياعمري..اقسملك بالله نادم بنموت..مقهور من روحي كاره نفسي والله ياما تمنيت ربي ياخدني بش نرتاح من العذاب اللي عايشه..
نور بتهكم:عذاب شني اللي يعيشه واحد زيك انت..راك تقولي عذاب ضمير! وينه الضمير اللي عندك! ولا بالك يكون عذاب الحب..هههههه..اللي زيك انت مايعرفش يحب حد كان روحه
اني الغبيه اللي مافهمتكش من الأول اني الحمارة ونستاهل مايجيني اللي عطيتك فرصه ورضيت بيك بعد عرفت كيف تفكر...بنبرة باكيه كملت تقول..نبكي ع قهرة عمري فيك انت اللي نحسابك تحبني اكثر من روحك نحسابك بتصوني..نحساب قيمتي عندك كبيرة..لكن ياخسارة طلعت مانسوا شي وماننفعك في شي..
هو كان يسمع ومايبيش يقاطعها يبيها اطلع اللي فقلبها كله معاش ادس وتكمد فنفسها..
بعد كملت كلامها اللي كان يحرق فقلبه قال:لو كانت قيمتك عندي مش كبيرة يانور راني مش قاعد ندير فالمستحيل بش ترضي عليا..نعترف اني كلب وواطي غلطت غلطه كبيرة لكن والله والله العظيم الندم اللي اني فيه ماحسه بنادم يانور
شبحتله بإزدراء بعدين مشت وهي تقول:زهقت كبدي من نفس الكلام اللي تقول فيه ديما زهقت كبدي من كل شي يخصك من العيشه معاك كلها ع بعضها تحملت فوق من طاقتي خلاص معاش قادرة نتحمل..
هو كان يمشي وراها ويسمع فيها شن تقول..
لين خشت لدار النوم وهو وراها ويسمع.
وصلت فالدولاب فتحاته..
بسرعه قدم وصكره بقوة وقال:ماتحلميش..
نور دفاته وهي تقول:حول عليا غادي حول..
مالك:ع جثتي يانور تطلعي..
نور دموعها نزلوا وهي تقول بعصبيه:معاش نبيك معاش طايقاتك..حول..
قربلها وهو يقول بلهفه وحزن:مانقدرش نعيش من غيرك نور..
نور وخرت ع دولاب وقعدت ادف فيه وهي تقول:بعد حول..خليني..نكرهك اني نكرهك...
شد ايديها بقوة ونزلهم وهو بقول:واني نحبك موت نعشقك اني..
نور قلبت وجهها عنه وقالت برجاء:خليك بعيد بالله عليك..
رفع ايديها وحطهم ورا ظهره وزاد قرب من وذنها وهو يقول؛مانقدرش..
نور ببكي:بالله عليك بالله عليك..بعد..بعد..
هو غمض عيونه ودموعه نزلوا وهو يشم فريحتها ويقول بنبرة صوت مخنوقه:سامحيني...بالله عليك..سامحيني..
نور غمضت عيونها بشده وقالت:حرام عليك اللي ديرلي فيه حرام..
حاوطها من خصرها وضمها بقوة وهو دافن وجهه فرقبتها..
نور ببكي وتوسل:لا..والنبي لا..يامالك...
مالك قعد يبكي بصوت ويزيد يضم فيها اكثر واكثر..
وهي شبه انهارت قعدت تبكي وخلاص...
🍃اللي صار بعدها شي خارج عن ارادتها..هي تحبه هلبه حب شديد..ع قد مادار ماقدرتش تخلي قلبها يكرهه..
القلب مايقدر حد يتحكم فيه حتى وان كان للعقل غالبا سلطة فوق سلطته..الا انه مايقدرش يخليه يمسح حبه لشخص ما مهما دار لو كان القلب نفسه مايبيش يمسحه..
ونور فهالحاله قلبها كان اقوى من كل شي فيها..ضعفت قدام مشاعرها...🍃
🍁🍁🍁🍁
طلعت من الحمام بعد مادوشت وهي لابسه ديشمبر..
كانت تنشف فشعرها وتفكر فحالة بنت عمتها واجعها حالها..
بين عيونها ملامحها الحزينه والدموع المحبوسات فعيونها قدام الكل وهما يسألوا فيها عن راجلها وهلبه اسئلة هي قعدت قدامهم عاجزة عن الإجابه..
وصلت فدار النوم...
لقت راجلها راقد ع جنبه اليمين بالنوم.. ابتسمت بعدين مشت شافت سرير ولدها لقاته مستغرق فالنوم حتى هو..
تنهدت بإبتسامه...
بعدين مشت لدولابها بش بطلع حوايجها..
🍀طلعتهم ولبست..
بعدين مشطت شعرها...ودهنت ايديها بكريم مرطب..
ومشت طول للسرير خشتله..
حطت راسها ع المخده وهي تتأمل فراجلها اللي كان عاطيها بظهره...
حست انها مستاحشاته هلبه..
قربت منه لين ولت وراه بالزبط وغمضت عيونها وهي مبتسمه...
🍁🍁🍁🍁
الساعه 2:00ليلا..
كانت في عز نومها لما فاقت فجأة وين حست ببنتها تتحرك فحضنها..
البنت كانت تأن واضح انها تحلم..
دلال:آسيا..آسيا..هزتها شويه وهي تقول...آسو ماما..
ناضت البنيه وهي مخلوعه شبحت لأمها وقالت بخلعه:بابا..
دلال عيونها دمعوا وقلبها وجعها..
آسيا:ماما نبي بابا...
دلال بألم:باهي ماما غدوة يجي بابا..
آسيا:لالا نبي بابا توا..ماما حلمت ندور ع بابا مالقيتاش ماما نبي بابا....
دلال بتبكي خلاص..
أرتسمت ع وجه آسيا ملامح البكاء وهي تقول:نبي بابا با..با..
وبدت تبكي..
دلال ضمتها وقالت بنبرة باكيه:حاضر ماما..حاضر..توا نتصل بيه هي..
اسيا بعدت عنها وقالت:ايه اتصلي ماما..
مسحت دلال دموعها وهي تهز فراسها بإيجاب..بعدين خدت تليفونها من ع الكامدينو..
خشت ع الأرقام لقت رقم اصيل تحشمت هلبه تتصل بيه فهالوقت..
آسيا:هيا ماما..
ضمت شواربها لداخل بضيق وضربت ع الرقم وعطت التليفون لآسيا..
▪▪▪▪
مكالمة سكايب ..
اصيل:ههههههه..شفشه..
مريم بضحكه:والله حق..
فجأة رن تليفون اصيل..
استغرب وقامه يشوف المتصل..
مريم:مني؟!
اصيل بإستغراب:مرت خالي دلال..
استغربت مريم..
فتح الخط اصيل ورد:ايوه..
آسيا:اصولي..
اصيل بضحكه:آسو..
ضحكت مريم..
آسيا:ايه..اصولي نبي نكلم بابا..
اصيل برفعة حواجب:اها..باهي ياسمحه صكري توا بيش نبعتلكم رقمه فرساله هي..
اسيا بإبتسامه عريضه:باهي..باي...
نزلت آسيا التليفون بعدين شافت لأنها وقالت:بيبعت رقمه رساله قالي..
دلال هزت راسها بإيجاب وخدت من بنتها التليفون تتأكد كان المكالمه فصلت...لحظات..وجت الرساله..
اسيا بلهفه:بعته!
دلال هزت راسها بإيجاب..وخدت نفس واتصلت..
▪▪▪▪▪
فهالوقت..
كان هو مقعمز وع رجليه لاب توب يخدم عليه مايخص اعماله فالخليج والمغرب والعربي..
رن تليفونه..كان جنبه ع السرير..
شبحله..بعدين خداه وشاف المتصل..ارتسمت ع وجهه ابتسامه مفاجأة وقلبه قعد يدق بقوة💓
خدي نفس وقال:اكيد بتفصل عادي مش مشكله اللي تقوله ع قلبي كيف العسل المهم تكلمني..
فتح االخط ورد:اي نعم..
"بابا"
عمار بمفاجأة:حبيبة بابا اسو قلبي..
اسيا بفرح:بابا انت وين..
عمار بإبتسامه:فالحوش..
آسيا:بابا استاحشتك هلبات هلبه..
ضحك عمار وقال:ونا توحشتك واجدات وااااجد..
اسيا ضحكت وقالت:مش راقد ولا؟
عمار:لا راقد وتوا نكلم فيك من الحلم..الله يامحلااه من حلم..
آسيا بحزن:اني بابا حلمت ندور عليك ومعاش لقيتك بابا خفت هلبه ونضت وقعدت نبكي..
قلب عمار انعصر من الألم..
ودلال تشوف لآسيا كيف تتكلم ودموعها ينزلوا..
آسيا:بابا..
عمار بنبرة حزن:روح بابا..
آسيا:معاش تخلينا ولا؟
دلال حطت يدها ع فمها بش تكتم بكاها..
اما عمار نزلت من عينه دمعه وقال بإبتسامه:مانيش مخليكم بكل لاانتم ولاامكم..
اسيا ابتسمت بفرح وقالت:باهي غدوة تجينا بابا؟
عمار:بكرا مانقدر لإني مشغول بنتي..
أختفت ابتسامه آسيا..
امها رشفت وهي تمسح فدموعها وتشوفلها..
عمار؛آسو بابا غدوة ان شاء الله دايرلك مفاجأة سمحه راجيها باهي..
رجع ضحك وجهها البريء وقالت:حقه!!
عمار مسح دموعه وقال بضحكه:حقه ونص..
آسيا ضحكت وقالت:حماااااس..
ضحكت امها..
وهو ضحك معاها..
آسيا شبحت لامها وقالت:ماما غدوة بابا بيديرلي مفاجأة..
عمار قلبه زاد قوة فالدق..
دلال:قوليله حتى اني مدايرتله مفاجأة..
سمعها هو واستغرب وتحمس هلبه اكثر من بنته ولاقال قلبه نهدا💓
آسيا:شن هي ماما؟
عمار رفع حواجبه
دلال:بعدين نقولك..
آسيا:اممم..سر...باهي ماما بديرلك مفاجأة بابا..
عمار بإبتسامه:ونا نراجي..
آسيا؛باهي اني بابا مافياش نوم نبي نهدرزوا..
عمار بضحكه:ياعسل انتي هدرزي هدرزي لين تعيي..
آسيا بضحكه:باهي..
عمار:راجي شوي...صكر..
اسيا؛الو..بابا..الو..
دلال استغرب..
آسيا مدتلها التليفون وقالت:خيره ماما..
خداته دلال وهي عاقده حواجبها بإستغراب وقالت:فصل..
طول رن مرة تانيه وكان رقمه هو..
فتحت دلال الخط وعطاته لآسيا..
اسيا خداته وحطاته ع وذنها وقالت:بابا..
عمار: يامحلى كلمة بابا من فمك والله مافي بنادم فالدنيا سمعها حلوة هكي كيف مانسمع فيها..
ضحكت آسيا..
عمار بضحكه:هي هدرزي هي..
أتكت آسيا ع السرير وبدت تهدرز ع حفلة الختمه بالتفصيل وامها اتكت جنبها وتسمع فيها وهي مبتسمه..
ومرات تضحك..وبوها يضحك..ع تعليقاتها..
والزوز كانوا مستمتعين ع الآخر بهدرزتها...
لعند ماهي بدي ياخد فيها النوم..
آسيا بنعس:بابا اني بنرقد كمل انت وماما تصبح ع خير..ومدتلها التليفون
هو ضحك..
ودلال خدت التليفون وهي تفنص فيها..
بعدين قعدت تشبح للشاشه وهالمرة مش هاين عليها تصكر فوجهه...
هو ماباش يصكر لين هي تصكر..
وهي اجبرت نفسها تنهي المكالمه وفصلت الخط...
حطت التليفون ع الكامدينو حداها...
بعدين شبحت لصورته ابتسمت بأسف...
شويه وغيرت عيونها عنها وشبحت لبنتها لقتها راقده براحه..
حطت راسها ع المخده جنبها وهي تتأمل فيها بحب.
فجأة..رن تليفونها بنغمة رساله..
غمضت عيونها وقعدت تضحك..
بعدين فتحتهم ومدت يدها للكامدينو تتلاحق فالتليفون..
خداته..
قرباته لوجهها وفتحت الرساله..
عندك ﻋﻠﻢ ﻣـﺎﺃﻳــﺲ ﺩﻗﻴﻘﻪ ،، ﻋﻨﺪﻱ ﻗﻠﺐ ﻓﻲ ﻋﺸﻘﻚ ﻋﺠﻴﺐ
ﻭﻋﻨﺪﻙ ﻋﻠﻢ ﻣــﺮﻫﻔﻬﺎ ﺭﻗﻴﻘﻪ ،، ﻋﻨﺪﻱ ﻛــﺒـﺪ ﻭﺍﺯﺍﺗﻚ ﺣﺒﻴﺐ
ﻭﻋﻨﺪﻙ ﻋﻠﻢ ﻣﺎ ﻳﻤﺸﻲ ﻃﺮﻳﻘﻪ ،، ﻋﻨﺪﻱ ﻋﻘﻞ ﻣﻦ ﻏﻴﺮﻙ ﻋﻄﻴﺐ
ﻭﻋﻨﺪﻙ ﻋﻠﻢ ﻓﻲ ﺳﺎﻋﺔ ﺍﻟﻀﻴﻘﻪ ،، ﻋﻨﺪﻱ ﺑﺎﻝ ﻓـﺎﺗﺤﻠﻚ ﺳﺮﻳﺐ
ﻭﻋﻨﺪﻙ ﻋﻠﻢ ﺑﺎﻟﻌــﻴﻦ ﺍﻟﻐﺮﻳﻘﻪ ،، ﺗﻬﺬﻝ ﺩﻭﻡ ﻣـﺎﻗــﻴـﻬﺎ ﺳﻜﻴﺐ
ﻭﻋﻨﺪﻙ ﻋﻠﻢ ﺑﺎﻟﻨﻔـﺲ ﺍﻟﻌﺸﻴﻘﻪ ،، ﻟﻲ ﻣﺎﺗﺮﻳﺪ ﻣـﻦ ﺩﻭﻧﻚ ﻧﺼﻴﺐ
ﻭﻋﻨﺪﻙ ﻋﻠﻢ ﺑﺎﻟﻨﺎﺭ ﺍﻟﺤــﺮﻳـﻘﻪ ،، ﻭﻳﻦ ﺇﺗــﻐــﻴـﺐ ﺗﺒﺪﺃ ﻓﺎﻟﻠﻬﻴﺐ
ارتسمت ع وجهها ابتسامه حلوة وقلبها غارق فبحور اشعاره اللي ديما تسحر فيها شن ماكان وضعها معاه..
ماتحسش بإن شوقها ليه جريمه فحق كرامتها..ولا الشعور الحلو اللي تحس بيه توا وهي تقرا فكلامه اهانه لكبريائها..
لأنه كله مخفي عنه..وهو ماأرتكبش فحقها خطأ لايغتفر..
🍁زي نور توا..
اللي تبكي تحت خيوط الميه المنسابه عليها..ع جسدها اللي كانت تفرك فيه بقوة وهي تبكي بحرقه...
تفرك فيه لين ولى أحمر..لين اندمي
مش حاسه بشي غير بوجع كرامتها..حست نفسها رخيصه وضعيفه..اللي سلمت نفسها ليه بسهوله هكي بعد اللي داره فيها..
نور توا حاسه روحها كأنها ارتكبت كبيرة من الكبائر..منقرفه من روحها وكارهتها لأبعد حد..
🍁اما هو..
فكان متمدد ع السرير وهو مضايق..
مضايق من اللي صار..من اللي دارته هي لما استاقضت لنفسها ولت فحالة اشبه بحالته هو لما ارتكب الذنب مع اسراء واستاقض منه..
حس ان اللي صار توا بيناتهم زاد أزم الوضع اكثر واكثر..
شويه وطلعت من الحمام وهي لابسه الدشمبر وتبكي..
هو ناض قعمز وقعد يشوفلها بألم وقلبه قاعد يتمزق..
نور تبكي وترجف وهي اطلع فحوايج تلبسهم..
خدتهم وطلعت بسرعه من الدار...
وهو يشوفلها بعيون دموعهم كانت تنزل حارقه ع وجهه..
🍁🍁🍁
وفي من فنص الليل الشوق نوضه..
هو يحساب روحه عطشان يبي يشرب ميه..
لما تحرك حس بجسمه من الخلف ناش حاجه..
التفت براسه لقاها هي حاطه يدها ع خشمها وشبه عيونها مسكرات وتقول:آيي..
هو ضحك ولفلها بجسمه كله وقال:شن اديري هني انتي..
بعدت وحطت راسها ع المخده وقالت بنعس:خلاص ارقد..
هو ضحك وقربلها وحاوطها وقال:تس مش راقد..
حولت ايديها من ع خشمها وقعدت تشبح لعيونه..
عماد وهو يشوف لعيونها بشوق قال:مش ياسرك زعل..
رزان تشبحله بزعل وساكته..
عماد:عاقبتيني وعذبتيني بما فيه الكفايه..ساد ياقلبي والله تعلمت وتبت خلاص..
رزان:ماهو انت فكل مرة هكي تجرحني بالكلام وتقهرني بعدين تقول تبت وسامحيني..
عماد:باهي هو لساني مرات متبري مني..قلبي من فينا مايغلطش بلسانه..كلنا مرات نقولوا كلام حار من ورا قلوبنا..
رزان؛في كلام نتحملوه وكلام لا
عماد غمض عيونه وفتحهم وهو يقول:عندك حق مزبوط..واني اسف اسف اسف..واللي تبيه مني بش ترضي عني نديره غير ارضي انتي بس..
رزان نزلت عيونها وقالت ؛باهي حول نبي نرقد..
عماد؛تس انسي..
قامت عيونها وشبحت لعيونه وقالت؛عماد..
عماد:والله حرام عليك حبي حتى قدام ربي حرام تباتي تلعنك الملايكه للصبح..
رزان بضحكه:انتم هدى ماحافظين من الدين الرجاله..والشرع حلل اربعه..
عماد بضحكه مكر:ايه كان المراة تصكر راسها وترقد ملعونه لين تصبح.. نمشوا للحاجه التانيه اللي حافظينها..رفع حاجبه وكمل يقول..الله غالب ماخليتولناش حل تاني..آااه..اي اي اي..حولي..
ورزان تقرص فيه من رقبته بغل..
عماد بوجع:تي خلاص ياودي خلاص..احح...
هي طلقاته ومازالت تشبحله بغل..
عماد:ههههههه..مسمومه ونموت فيها..قرب وهو يقول..حني عليا قلبي ساد جفي..
هي ارتسمت ع وجهها ابتسامه ونزلت عيونها..
وهو هالإبتسامه يعرفها كويس ابتسامه رضا..
ماصدق راها..وانقض عليها بلهفته واشواقه الملتهبه وهي كانت زي حاله واحرف...
وصار الوصال بعد طول زعل وجفي وبعد...❤
🍁🍁🍁
بس في من مكتوبله يشتاق ويحلم بلحظة الوصال لكن ماينولهاش..تقعد مجرد حلم وخلاص..
وهو لما يوصل لهالنتيجه يرفضها ويرفض الإستسلام ويقرر انه يواصل الحرب لأخر لحظه..
الحب والغيره حيدفعوا ضو انه يحارب ع خاطر اصدق حب فحياته...
وفالحرب...مافيش اي محضور فمواجهة العدو والغايه فيها تبرر الوسيله...
☘تقلب ع جنبه اليسار وهو يقول:ميت حي...مانيش مخليهلك..ماكنت تستاهلها لاقبل ولاتوا...
تنفس بغضب بعدين غمض عيونه ومن داخل وقاده نار الغيرة نار طاردة للنوم جيابه للسهر العذاب..
🍁🍁🍁🍁
تاني يوم...
الساعه 9:00صباحا..
طلع من داره وهو يتكلم بالتليفون..
اصيل؛ان شاء الله تو نقوله ونرد عليك..تمام...وعليكم السلام..
صكر وارتسمت ع وجهه ملامح الإمتعاض وهو يقول..صحيح وجه اكثر مني الراجل هدى..
ع طلعة خاله من داره..
شافله اصيل وقال:صباح الخير ياخال..
عمار صكر الباب وقال:صباح الخير..شد قيلته بيده اليمين وقال..فمن تكلم ع الصبح..
اصيل:قول من كلمني الصبح..
مشي عمار بإتجاه الكوجينه وهو يقول:من..
اصيل وهو ماشي وراه:عبد الرؤوف..
كمل عمار طريقه للكوجينه وهو ساكت..
اصيل:شاد يبي يعزمك لحوشه..
وقف عمار ع الثلاجه وقال:شن يبي؟
اصيل؛عازمك وخلاص..
عمار فتح التلاجه وطلع منها شيشة مية معدنيه وصكر باب التلاجه بقوة..
اصيل فنص..
وهو مشي بإتجاه الطاوله...وخر الكرسي بعصاة القيلا..
وقعمز عليه..
فتح الشيشة.
سمى بالله وقعد يشرب..
واصيل واقف يشوفله..
نزل الشيشه وحمد الله همسا بعدين قال:كلمه وقوله جايين..
اصيل رفع حواجبه وقال:حاضر..
عمار:ديرلنا فطور قبل..
اصيل بضحكه:حاضر..
عمار بحده:شن يضحك فيك؟!
اصيل:امس نا درت العشي..
شبحله ع جنب..
اصيل رقص حواجبه..
عمار تنهد بملل وناض..
رفع العصا وقعد يأشرله بيها بمعنى حول..
اصيل ضحك وبعد عن التلاجه ومشي للطاوله...
وعمار جي للتلاجه وفتحها وبدي يطلع منها فالحاجات...
اصيل قعمز ع الكرسي وهو يتأمل فيه...
زمان وهو بكامل صحته ماكانش يتنازل يمشي يجيب طاسة ميه وهما موجودين لازم يبعت منهم حد..وتوا يتشارك معاهم فتحضير العشي والغدي برغم انه فوضع يخلي اللي حواليه يخدموه اجبارا...
استاقض لما سمعه قال..
"شاهي..ولانسكافيه"
ابتسم وقال:شاهي..
عمار هز راسه وكمل باقي شغله..
قعدوا ساكتين شويه بعدين عمار قال:نفكر نعدوا لمدراس العويله نهاية الدوام..هكي نطلعوا نتغدوا جميع..
اصيل بإبتسامه:لكن اليوم عطله..
ضيق عمار عينه وقال؛عطله!
اصيل بضحكه:ايه ياسيدي1\5 عيدالعمال.
ضحك عمار ضحكه متهكمه..
اصيل؛ومش هدي وبس عد ع صوابعك..عطله 17 قهاير وخساير..وعطلة 23\10 المقلب الكبير..زايد يوم الشهيد..ع يوم 24\12 ع اساس عيد استقلال..ايه وفي عطلة بداية السنه الهجريه..
عمار رفع حواجبه ونزلهم بعدين قال:كان غير البلاد تغير حالها للأحسن للي كانوا هما يتمنوه خلهم يعيدوا ويعطلوا..
اصيل:انت شن ريت منين جيت..ولاقبل تجي ماسمعت شي عنها؟!
عمار تنهد بألم وقالت:تمنيت نسمع مايسر ولا نسمع اللي يزيد القهرة والحسرة..حط سبابته ع وذنه ونحاها وهو يقول..حتى اللي سمعته شكيت فيه وقت يبالغوا..لعند ماجيت وريت بعيني..وياريتهم طلعوا يكذبوا ويبالغوا..
اصيل كان يسمع فكلامه ويفكر فيه وهو يشبح فالفراغ وابتسامة تهكم مرسومه ع وجهه..
زفر عمار بعدين قال:خلينا تو من هالسيرة اللي تغم..بنقولك الحاجات نبيك توصلهن العشيه..
اصيل بإبتسامه:باهي..والمشيه لعبدالرؤوف..
عمار رفع حاجبه وقال بحده:فالنهار..
اصيل:تم خل نقوله..
عمار حط الشاهي ع النار بدون مايرد بكلمه..
اصيل شبحله شويه بعدين ناض طلع من حداه بش يكلم ع الرؤوف...
🍁🍁🍁🍁
الساعه 10:00صباحا..
ناض من النوم وهو مفزوع...
نزل من السرير طول ومشي طلع من الدار طول لغرفة المعيشه..
لما خشلها لقاها فاضيه..
قلبه انقبض قدم بسرعه لسرير ولده شاف فوسطه لقاه فاضي..
لف وطول مشي طلع بسرعه منها..وتوجه لدار النوم..
خشلها ومشي للدولاب فتحه..
تنفس براحه لما شاف حوايجها قاعدات زي ماهما...
صكره وفتح الجهة اللي فيها حوايج ولده لقاهم ناقصات شويه..
هو بش يطمن روحه قال فعقله اكيد فحوش اهلها..
مشي طول للزيانه كان عليها تليفونها..
خداه وخش ع الرسايل كتب رساله وبعتها..
قعد يراجي فالرد قعد 5 دقايق بالزبط واقف يراجي لعند ماجاه الرد..
(في حوش اهلي ماتخافش مروحه)
هو بعد قراها ابتسم بحزن...
🍁🍁🍁
في دار اختها..
نور:بالله عليك نبي نطلع دلال لأي تركينه..
المهم نطلع اني وياك..
دلال بقلق:باهي حبيبتي باهي..
نور خدت نفس بعدين قالت:خل نطلع نكلم ماما ع انيس..
ومشت طول طلعت من الدار ودلال معاها بعيونها وقلبها واكله الخوف عليها..
مظهرها الخارجي ما يوحي بشي يخوف جايه وهي بكامل اناقتها وممكيجه لكن عيونها كانوا حمر ومعبيات دموع..
مشت دلال طلعت حوايج تلبسهم وهي تفكر فحال اختها..
كملت لبس وخدت شنطتها وتليفونها وطلعت من دارها..
وهي ماشيه قابلتها آسيا وقالت:نمشي معاكم..
دلال:لالا ماما اقعدي مع حنينه..
آسيا سكتت وهي مضايقه..
وصلت دلال في الممر لقت نور واقفه ع امهم..
نعيمه:غير ماتعطلوش بوكم بيروح من حوش عمكم ع الغدي قالي نبي نتغدا معاكم..
دلال:حاضر ماما..هيا نور..
نور؛هيا..سلام ماما..
دلال:سلام..
نعيمه؛سلام...وقعدت معاهم بعيونها وهما طالعات وقلبها مش مرتاح حاسه ان نور فيها حاجه..
🍁🍁🍁🍁
هي هادي اخر وحده..
رزان بضحكه:خلاص اخر وحده راهو..وفتحت فمها وكلت كسرة خبزة فيها قطعة جبنه الهرم..
بعد كلتها هو طبع ع خدها قبله طويله...
وهي تمضغ وتضحك..
فجأة رن تليفونها..
رزان بلعت وقالت:ترا شويه قلبي..
عماد بعد عن خدها وجي عند وذنها وقال:فوتيه..
رزان بضحكه:عماد ياسرك خلاص..
هو ماعدلش عليها وقعد يوزع فقبل من غير حساب وهي تضحك..
والتليفون فصل ورجع يرن مرة تانيه..
رزان حطت ايديها ع ايديه اللي كانوا محاوطينها وقالت:حبيبي اكيد شي ضروري حول شويه..
عماد بعد وفكها وقال:هي بري بسرعه وزعيهم وتعالي..
رزان ناضت من حجره وهي تضحك..
ومشت بطريقها لدار النوم..
وصلت فتليفونها اللي ع الزيانه..
خداته وشافت المتصل استغربت..
فتحت الخط وردت:ايوه نور..
نور بنبرة باكيه:رزان..
رزان بخوف:خيره صوتك نور!؟
نور:فاضيه رزان؟بنجوك اني ودلال..
رزان:ايه ايه فاضيه..تعالوا..
نور:باهي حني فالطريق..
رزان:تمام تمام نراجي فيكم....سلام..
صكرت وحطت التليفون فمكانه..
بعدين بسرعه مشت طلعت من الدار...
وصلت فالصاله وقالت:عماد البنات جياتني صبي غير دبشك واطلع..
ناض عماد وقال بإنزعاج:تي من اللي جايك ع صبح ربي وقته هو!
رزان:معليشي حبي بالله البس واطلع..
عماد:باهي مني اللي جايك..
رزان:دلال ونور..
عماد عقد حواجبه وهو يشوفلها..
رزان رفعت حاجبها.
عماد:حبي مانبيش مشاكل..
رزان بضيق:تس افف..عماد شن تشوف فيا قدامك بالله عليك ليش ديما هدي نظرتك فيا ماتغير بكل..
عماد تنهد بضيق وقربلها وقال:ياعمري مش قصدي ورب الكون ماقصدي..
وصل فيها وشد وجهها بإيديه وقال:اللي نقصده ان الدوة فحاجات هادي بين النساوين والله ماهي دايرة غير المشاكل..
رزان:وانت من قالك انهم جايين يحكوا فالموضوع هداك!؟نور ماحكت لحد من هلها عن شي..وهي قالتلي جايه معاي دلال معناها دلال انظر خيرها.
عماد:وليش يجوك انتي؟
رزان:وليش مايجوني؟!
ضحك عماد وقال:معاش ندووا معاك بكل انتي كل كلمه تفهميها بالعكس..طبس باسها..بعدين بعد وقال..خل نمشي نوتي روحي هي..
ابتسمت..
رجع باسها بقوة وقال:عسلللل..
وطلقها ومشي للدار وهي تضحك..
شويه وسمعت صوت عياط ميلاد..
نادها عماد وهو يقول..
"تعالييييله"
رزان بضحكة:جايه جايه...
ومشت بسرعه للدار..
🌴🌴🌴🌴
الساعه 11:00صباحا..
واقف فجنان حوش نساباته واب زوجته واقف عليه ويكلم فيه..
عبودة:العناد ياولدي يهد حياش مايعمرها..انت تنازل وهي تتنازل والمركب يمشي..اهم شي ماتعطوا فرصه لحد يخش بيناتكم قريب ولابعيد بالذات كلام الناس نعرف روحي مش داير غلط وماشي بما يرضي الله ماعليا في حد..الناس راهي بتدوي بتدوي..درتوا غلط ولامادرتوا..
هانيبال وهو يهز فراسه:مزبوط عندك حق..غير مرات الواحد يطلع عن طوره ويتصرف من غير مايفكر ويحسبها..
عبودة:معليشي تصير اهم شي الواحد يتعلم من اللي صار معاه..
هانيبال؛اكيد..
عبودة:هي مال اني عندي مكان بنعديله..سلامتك..
هانيبال:تفضل..
عبوده:السلام عليكم..
هانيبال:وعليكم السلام..
مشي الحاج عبودة للباب وهانيبال سقده..
طلع وصكر وراه الباب..
"شريخان"
التفت هانيبال لقي ضو قايم في غمره هويام..
وفيده التانيه شنطة اخته..
ومرام معاه شاده فيدها شنطة الصغار وعمار يمشي جنبها..
لما شاف بوه مشاله يجري..
هانيبال قعد يشوفله وهو يضحك وقال لصاحبه:دكتور شن جو..
ضو وصل فيه وقال بإبتسامه:تبوني دكتور بالسيف..
هانيبال قام ولده وقال:امتى روحت انت؟
مرام:امس العشيه..
ضو بإبتسامه جانبيه:شن اللي سمعناه هدى حق ولاكذب؟
مرام رفعت حواجبها وهي تشوفله..
هانيبال ضيق عيونه وقال:لاحق وحق الحق..
ضو رفع حواجبه ونزلهم وهو يقول:سبحان الحق..
هانيبال شبح لمرام..
مرام شبحتله ونزلت عيونها..
رجع شافله وقال:تو نزيدوا نهدرزوا مرة تانيه..
ضو هز راسه وعطي البنت لأمها وقال:إن شاء الله..
خدت مرام البنت وهي تشوفله..
وهو كان مبتسم مجامله والضيق باين فعيونه..
مرام:الغدي واتي سخنوه لما يجي وقته..
ضو حط ايديه فجيوبه وهز راسه بإيجاب..
مرام:هي بالسلامه..
ضو:بالسلامه..
هانيبال:نتلاقوا..
ضو:إن شاء الله..
مشي هانيبال بإتجاه الباب فتحه..خلا مرته تطلع هي الأولى..
بعدين طلع هو بعدها ووراهم ضو بالشنطه..
التفت هانيبال خداها منه..
ضو قعد واقف فالباب يشوفلهم لين ركبوا كلهم السيارة بعدين تحرك هانيبال وهو يحي فيه بحركة اليد..
وضو ردهاله وهو مبتسم مجامله..
نزل يده...بعدها لف وخش للحوش وصكر الباب بقوة..
🍁🍁🍁🍁
حاطه قبضة يدها ع فمها وملامح الغضب مرسومه ع وجهها
والدموع معبيات عيونها..
وهي تسمع فأختها تتكلم وتبكي..
نور ببكي؛مش عارفه كيف ندير يادلال ضغطت ع روحي هلبه وحاسه روحي خلاص مش قادرة نتحمل نقعد مع واحد زيه خلاص..
رزان تشوفلها بألم وهو موجوعه ع حالها..
نور ببكي:حاسه روحي رخصت روحي هلبه بقعادي معاه بعد اللي صار..وين نشوف..وين نشبح حواليا ونشوف الرجاله اللي يحبوا بالحق..نتحسر ع روحي..نت...وحطت ايديها ع وجهها وانهارت بالبكي..
جتها رزان خدتها فحضنها وهي تقول:خلاص نور خلاص..
ودلال مازال ع نفس الوضعيه وهي تشوفلهم..
رزان؛مش تقولي رزان تواسي فيا..بس والله العظيم والله العظيم يانور عماد ديما يحكي ع حال مالك اموره ملخبطه نفسيته زي الزفت كاره روحه..هو نفسه مش قادر يسامح روحه..مش عماد قعد مقاطعه مده ولا؟ كيف رد علاقته بيه..ردها نهار جانا مالك هنى للحوش حالته تبكي الحجر يانور..ايه هو غلط وغلطه كبير لكن نادم عليه واجد..لو كان مايحبك يانور والله ماعبرك ولاصار فيه هكي ع خاطرك..
نور ببكي:اللي يحب مايخونش يارزان..
رزان بعدتها شويه وقالت:اشبحيلي..
شبحتلها نور وهي تبكي..
رزان؛نسيتي شن دار عماد زمان نسيتي..
نور:داره من غيظه ..
رزان:خيانه سماها خيانه مهما كان شكلها وكيف ماكانت تتسمى خيانه..لكن ريتيه شن دار بعدها ولا..واني ماسامحته ورضيت ياخدني الالأني عارفه انه يحبني واجد..وكان مايحبني راهو مادار ع خاطري اللي داره...وحتى انتي مالك لو مايحبك ماصار فيه هكي ع خاطرك..
نور هدت بكي شويه وهي تفكر فكلام رزان
دلال حولت يدها من ع فمها وقالت:ربيه..خليه يعرف ان الله حق..لكن انسي الطلاق يانور..نقولك هكي ع خاطرك انتي قبل الكل..
نور قعدت تشبحلها وهي تبكي..
دلال:انتي تحبيه هلبه يانور..وحتى هو يحبك لكن غلطه هدا لازم يتربى عليها..
رزان:اني مع دلال فكلامها..
نور قعدت تمسح فدموعها وهي تفكر فكلامهم...
🍁🍁🍁🍁
الساعه 1:45 بعد الظهر..
فتح باب السيارة وبدي ينزل...
وهو يشبحله بإبتسامه..
لما نزل وصكر الباب..
مشاله طول وهو يرحب بيه ويقول:مرحبا مرحبا بالسرتاوي المناضل..
اصيل ضيق عيونها وهو مبتسم بإستغراب..
اما خاله فكان يشبح لعبدالرؤوف بكبر..
وصل فيه ومد يده..
عمار صافحه...
سلم عليه عبدالرؤوف بالخد وهو يقوله:حمد لله ع سلامتك..
عمار:الله يسلمك..
بعد عبدالرؤوف وجي لأصيل وسلم عليه وهو يقول:اهلا وسهلا..
اصيل صافحه وقال:اهلا بيك..
طلق عبدالرؤوف يده وقال:تفضلوا تفضلوا..
مشي عمار واصيل معاه وعبدالرؤوف معاهم وتوجهوا للحوش من داخل..
🌴🌴🌴🌴
خالي قال غدوة بيجوا وحتى عمار يمي..
فاطمه بإبتسامة فرح:منين قتي حتى عمار رعشت مع بعضي.
غاليه بضحكه:اني بروحي لما قلتها رعشت
حميده بضحكه:باهي خلنا من رعاشكن وفكري يمي شن بنديروا..
فاطمه؛اللي تبنه كله سجلنه فورقه يعدوا ميلاد والهادي يجيبوه..وقولولهم يختاروا اكبر 4كباش بيش يذبحوهم..
حميده:حاضر..خل نعدي نجيب ورقه وقلم...
ومشت طلعت من حداهم..
غاليه بإبتسامه؛كلمني هانيبال بكري وقالي روح بمرام.
فاطمه ابتسمت براحه وقالت:الحمدلله ياربي..
غاليه:الفال لغيره..
فاطمه تعكرت ابتسامتها وقالت:كان حط عقله فراسه ان شاء الله يردها كان قعد ع ضلاله ان شاء الله لا..
تنهدت غاليه بضيق..
🍁والمضلول اللي تحكي عليه امه..
كان مدرس سيارته مقابل حوش جمعه عبدالمقصود..
كان يشوف للحوش من ورا نظاراته بنظرة حزن ممزوجه بالشوق..
ليها ولبنته...
يبي يشوف بنته لكن في نفس الوقت مايبيش يعفس فحوشهم من بعد ماطلقها..
وهو يشوف للحوش..نزل نظاراته لما بانت عليه راكبه فوق السطح شويه واختفت..
قعد مركز بنظره عليه شويه وراها مرة تانيه وهي ماشيه بتنزل...
بعد ادرقت من قدام عيونه قال بغضب وغيره:شورها ماصدقت تطلق!..
لبس نظاراته بعصبيه بعدين شغل سيارته وتحرك طول للقطعه...
🍁🍁🍁🍁
مقعمزين الثلاته فالصالون..
كان عبدالرؤوف هو اكثر من يهدرز وعمار يدوب يتكلم..
واصيل يجامل فيه مجامله..
عمار وهو يشوفله كيف مقعمز وحاط رجل ع رجل ويتكلم معاه بكل ثقة وأريحيه
يخطر عليه كلام بوه ويحس بكل ذرة فيه قاعده تنحرق حرق
معاش تحمل اكثر...لهدا قال..
عمار:اصيل خالي..
شبحله اصيل..
عمار:معليش تعدي تشوف شن صار في اللي اتفقنا عليه الصبح؟
اصيل فهم ع خاله ابتسم وقال:تم..ناض وقال..مشوار ساعة وجاي..
عبدالرؤوف ناض معاه وقال:نراجو فيك..
ابتسمله اصيل مجامله بعدين قال:السلام عليكم
عمار :وعليكم السلام..
عبدالرؤوف:عن اذنك شوي...
عمار هز راسه بدون مايشوفله..
مشي اصيل وعبدالرؤوف معاه يسقد فيه...
لحظات..
وولى عبدالرؤوف وهو يقول:اصيل شاب ممتاز جدا..
قعمز مقابله وكمل يقول..نادرا مانلقوا شباب كيفه ناجحين هكي فسن صغير..
عمار حول نظاراته وقعد يشوفله بعقده حواجب..
ضحك عبدالرؤوف نص ضحكه وقال:نعرف النظرة هدي كويس كيف ما نعرف صاحبها..
عمار:ودامك تعرف النظرة وتعرف صاحبها ادير اللي درته!
حط عبدالرؤوف يده تحت ذقنه وهو متكي بمرفقها ع يده الكرسي وقال:شن اللي درته..
عمار:تستفز فيا انت!
نزل يده وقال:لو انك تهدا شويه اني حنحكي معاك بالعقل وانت ياتقبل كلامي ياتلوحه وراك..
عمار شبحله شويه بعدين قال:تمام..هديت..احكي بالعقل..بشي يقبله عقل كيف عقلي نا عقل راجل بدوي وانت تعرف من يكون الراجل البدوي..
كان يتكلم باللكنه البدويه الصافيه بشي من الغضب..
عبدالرؤوف بإبتسامه؛نعرفه كويس..وتشرفت اني يوم كنت صديق مقرب ليه..وكيف مااني نعرفه هو يعرفني ويعرف اني كيف تربيت ومعدني شنو من الناس..تنهد وقال..اني تكلمت فموضوع بنت خوي عبالسلام واني والله العظيم ماكنت نعرف انها كانت زوجتك انت..قالي بوها زوجها كان عسكري كبير فالنظام السابق لكن ماقالي من يكون الا بعد طلبتها منه..
عمار رفع حواجبه وقال:وحتى بعد عرفت الحيت واصريت فالطلب!
عبدالرؤوف :وهاك بروحك قتها بعد عرفت الحيت واصريت فالطلب..عويلتك نعرفهم زين تقربت منهم وحبوني وحبيتهم واجد وهما اللي خلوني نصر...فكرت ان نربيهم نربي عويلة صديق قديم كان ليه عليا جمايل واجده..وبعدين..ابتسم ع جنب وقال..هو الاخ يرد مرات خوته لو كان عندها عويله واني معتبرك خوي..
ضيق عمار عينه وقال:نيتك كانت اكبر من هكي..
عبدالرؤوف:تبيني نكون صريح ونحكي بدون قص للكلام..
بلع عمار ريقه اللي كان زي الحنظل وقلبه كان كان جمرة مولعه وكأن عبدالرؤوف بكلامه قاعد ينفخ عليه بش يزيد ناره.
عبدالرؤوف:نحكي بصراحه..الاخت دلال مراة شخصيتها قويه صغيرة فسنها لكن كانت قد روحها..تكلمت معاها مرتين وفالمرتين كانت جدا صارمه جدا حازمه وحاده جدا فالكلام..
وشخصيتها هدي كانت وحده من اسباب اصراري عليها..
عمار رفع القيلا شويه ونزلها بقوة ع الأرض وهو شادها..
ابتسم عبدالرؤوف وقال:لكن اصراري هدى ماصمدش واجد فالمرتين قالت..اني مرات راجل واحد بس...
ابتسم ابتسامة غرور خفيفه..
عبدالرؤوف:ايقنت فأخر مرة ان مراة كيفها ماتليق بي حد غيرك ولا هي يليق بيها حد غيرك..انت كنت مروض خيول من الدرجه الأولى وبصمتلك بالعشرة بعد عرفت الاخت دلال..
عمار:ياريتك عرفت من اول مرة ردك فيها باتها..
عبدالرؤوف:تعرفني مانستسلم بسرعه..
عمار:اخرتك استسلمت..
عبدالرؤوف:اها استسلمت نعترف مش عيب في معارك فالحياة هدي لازم نخسروهن مش فكلهن نكونوا فيهن رابحين.
ابتسم عمار تهكما لما فهم قصده من كلامه ورد يقول:في حروب خسارتهن شرف كبير للمهزوم وخزي كبير للمنتصر..
ابتسم عبدالرؤوف ابتسامه جانبيه وهو يقول:كل واحد يشوفها من زاويته ياصاحبي..
عمار رفع حواجبه ونزلهم بعدين قال:هدي اولك حرب تخسرها؟!
ضيق عبدالرؤوف عيونه وهو مبتسم بإستغراب..
عمار:قلبك خسر حروب قبل هدي؟
تلاشت ابتسامة عبدالرؤوف وعقد حواجبه وهو يشوف لعمار..
عمار ابتسم وقال:قالولك كنت فألمانيا قريب عامين؟
بلع عبدالرؤوف ريقه وهو يشوفله بنفس النظرة وعيونه تعبوا دموع..🍁
🍁🍁🍁🍁
الساعه 5:30مساءا..
كانت صالة حوش عبدالسلام معبية ببوكسات هدايا اشكال والوان..
كانت من عمار لصغاره والجميل جدا فالموضوع انه حسب مجد وولد نور كذلك..
كانت الهدايا عبارة عن ملابس والعاب..
واجهزة تابلت ليهم كلهم..
اسيا كانت بطير من الفرح وهي تشوف للقفاطين والتوكات تقول اول مرة فحياتها تشوف قفاطين وتوكات..
والولاد كذلك كانوا فرحانين بهدايا بوهم..
جدهم وهو يشوفلهم كان فرحان لفرحتهم..وحناهم كذلك وخالتهم..
وامهم عيونها ع آسيا وبس وقلبها كان يوجع فيها عليها..
ماكانتش متصورة ان بنتها لهالدرجه فاقده وجود الاب فحياتها...
🍁الأب اللي استقبل مفاجئتها بفرح شديد..
بعتتله مع أصيل البوم فيه صور صغاره فكل مراحل عمرهم ..
ودفتر مذكراتها اللي كتبتله فيه تفاصيل حياتهم واهم الحاجات اللي صارت فيها..
عمار قرر يشوف الصور ويأجل قراية المذكرات..
نفسيا ماكانش متهيأ كان عارف ان هالمذكرات حامله فداخلها مايدمي قلبه ويحرق روحه..
وهو غدوه عنده مواجهه جديده لازم يكون مستعد ليها من جميع النواحي...
🌴🌴🌴🌴🌴🌴🌴🌴🌴🌴🌴🌴🌴🌴🌴🌴🌴
الساعه 12:00قبل الظهر..
في الطريق..
لمياء:مية فالميه يطلع واخد عليها وحده تانيه..
عمر:عليك تفكير عندك..
لمياء:باهي فسرلي قعدته السنين هادي كلها برا وهو لا هو محبوس ولاصايرتله حاجه...عايش حياته عادي..
عمر:تي غير منو اللي قالك انه عايش حياته عادي ..سيورنا نعرفوا اسبابه..غير اسكتي بس..
لمياء:باهي اني بنسكت توا لكن انت خليك مذكر كلامي..
تنهدت عمر بملل وقعد ساكت..
☘وصلوا للقطعه..
خشت سيارة عمر...
درسها فالساحه..
نزلت لمياء وبنتها فغمرها وفيدها صاكوها ومشت بإتجاه ممر فم البوابه..
لما وصلت فم البوابه وخشت..
رمت كندرتها وهي تسمع فأصوات الهدرزة والضحك..
خشت من باب المروحه..لقت البنيات الصغيرات..مقعمزات فالصاله ويهدرزوا..
فاتتهم ومشت طول للدار..
وين خشت تقول عطاها كف ع وجهها لما شافت مرام متربعه فصدر الدار..
معاش عرفت تخش ولاتطلع..
مرام شبحتلها بإبتسامه نصر..
كفايه بضحكه:لمياء خيرك متي وانتي واقفه..
ضحكت سعيده..
والباقي شدوا ضحكتهم..
لمياء بشي من الركبه:اها..لا غير شورني دخت من السيارة..ومشت طول لعزوزتها تسلم عليها..
وهما يشوفولها وابتسامات المكر بلا حساب...
وهي تسلم وين وصلت في مرام..سلموا ع بعض باليد..
بعدين كملت سلامها ع الباقي وين وصلت فغاليه وحميده..
فاتتهم وهما دارو روحهم ماشافوهاش..
بعدين مشت قعمزت حدا نعيمه..
لمياء:كيف حالك نعيمه وشن دايرة مع الحمل..
نعيمه:الحمد لله..ماشي الحال..
لمياء هزت راسها وهي تمرر فنظرها عليهم وقريب تموت من الغيظ فداخلها..
شويه وسمعوا صوت هانيبال وهو يقول..
"يمي خشوا القبيله"..
قلب دلال قعد يرقى وينزل..
كلهم كانوا متشوقين ع الآخر..
الحاجه فاطمه ناضت بمساعدة حفيدتها رانيا..
ناضت ومشت طلعت..
في منهم طلع وراها..
ومنهم من شد الروشن ودلال منهم..
زينب وسعيده وكفايه طلعوا مع الحاجه فاطمه من فم البوابه..
اما لمياء وفضيله وغاليه ورفقه ورزان ونور طلعوا من فم الحوش القدامي..
ونعيمه ودلال ولطيفه وحميده واقفات ع الروشن...
☘فاطمه مشت بروحها لين وصلت لاخر ممر فم البوابه وقعدت واقفه..
كانوا الرجاله كلهم برا..
وايمن كان في قمة التوتر...
وحدهم كانت تشبحله وهي واقفه فوق السطح هي ومرت بوها وحناها وعماتها امال وعزيزة..
كان ياخد فالنفس ويزفر بطريقه غير ملحوظه الا لحسن اللي كان واقف جنبه..
شد ذراعه وقال؛تو يجي وتشوفه..
ايمن؛مش قادر نصبر..
ضحك حسن وهو يشد ع ذراعه..
فهاللحظه..
خشوا سيارتين للقطعه..
سيارة الحاج مختار وعيلته..
وسيارة مؤنس بعيلته ومعاه خالته اصاله..
وصلوا في الساحه ودرسوا ورا بعض..
نزلوا اللي فيها..
الرجاله ماقدروش يقدموا ع خاطر النساوين..
راجوهم لين يمشوا...
وايمن كان يشوفلهم بصدمه..
وين عمه..عمه وين..ليه فوق 24ساعه وهو يراجي فيه علاش ماجاش!!
خوه مختار شبحله وركز ع نظراته وقال:ورانا ورانا هو واصيل.
شبحله وابتسم بتوتر..
مجرد وصلوا النساوين فالحاجه فاطمه..
خشت سيارة اصيل القطعه..
راها الحاج مختار وقالهم؛اهم وصلوا..
قدموا الرجاله..
وايمن قعد واقف فمكانه وهو يرجف ويشوف للسيارة..
كانت مظلمه مش باين منها شي..
بدت تقرب وتقرب..
لعند مادرست فنص الساحه بالطول..
فهاللحظه هادي الرجاله خشوا فحالة ترقب ماقدروش يقربوا اكثر..
بس كان هانيبال يشوف للسيارة بلهفه..
فتح اصيل الباب ونزل وهو مبتسم..وصكره..
شبح لأيمن ضحك ضحكه خفيفه..
انفتح الباب التاني..
وايمن عيونه عليه..
بانت عصاة القيلا هي الأولى..
بعدين بانت رجل...ولحقتها التانيه..
بان عليه طرف العمامه البيضا والكشابيه البيج..
شويه وبان هو بالجنب وهو يصكر في باب السياره..
بعدين شبح القدام..
عينه جت ع ايمن..
تعبت دموع تلقائيا والدموع طاحوا وحده ورا التانيه..
قدمله طول...
ايمن قدمله هروله.
عمار وقف فمكانه...وايمن وصل فيها وحضنه بقوة وهو دافن وجهه فرقبته شم ريحته ومن وسط قلبه قال...
"آاااااااه ياباتي..آاااااه"
وانخنق بعبرته وقعد يبكي بالصوت..
عمار طلق القيلا وضمه بقوة وهو يتحسس فيه ويبكي معاه بصمت..
الكل يتفرجوا وهما متأثرين ع الأخر..
فاطمه وكامله والبنات وهندا امه تبكي بعبرتها..
وبنات فاطمه وكناينها احفادها..حتى هما...
ودلال تبكي بصمت وقلبها مفطور من الالم...
🍀جواد ومعمر كانوا يشوفوا لأيمن..
جواد بالذات قعد يفكر علاش بوه وايمن يحبوا بعض لهالدرجه..
بوهم بكي فلقائه بيه زي مابكي فلقائه بيهم...
تحرك فضوله وزادت الأسئله فعقله...
🍁بعد ايمن وشد راس عمه وكب عليه..
بعدين باس خدوده..
ونزل ع ايديه وقعد يبوس فيهم..
وعمار من داخل منهار...
قام راسه ايمن وشد وجه عمه وقال بنبرة باكيه فيها بحه:ااه ياربي..ياربي...مش عارف شن نقول اقسم بالله..وضمه مرة تانيه..
عمار ببكي:قطعتني ياولد حرام عليك..
ايمن لما سمع صوته زاد ضمه اكثر واكثر
وحدهم تشوفله من فوق وهي تبكي بالعبرة
بعده عمار وشد وجهه بإيديه وقال: الله كيف كبرت ورحت راجل مصنع امام وشيخ..ورحت سمح بزايد ياجحش..
ضحك ايمن من بين دموعه..
عمار قربه ليه وطبع قبله عميقه ع جبهته..
وايمن يضحك بفرح ودموعه يصبوا..
"مش غير هو اللي مستاحشك"
بعد عمار عن ايمن..
والتفت ايساره لمصدر الصوت..
شاف هانيبال..
وشاف ذكريات..وشاف شريط احلى ايام العمر..
شاف اكثر انسان يفهم عليه من بعد بوه وزوجته..
ضم عمار شواربه لداخل بإبتسامه بعدين قال
"ولد عمتي وصاحب عمري.."
قدموا الزوز لبعض..
وحضنوا بعض بقوة..
هانيبال:يامرحب يامرحب بالرجل الذي لايموت..
ضحك عمار وضربه ع ظهره وقال:قاعد كيف ماانت...
ضحك هانيبال وضمه بقوة..
وعمار زاد ضمه...
ودلال تشوفلهم من الروشن وهي مبتسمه من بين دموعها..
🍁🍁🍁🍁
اني بنعدي العشيه مش تو..
ضو وهو واقف فم دار بوه وقال:واني بنعدي من تو..
عبودة:تعذرلي منهم..
ضو هز راسه وقال:حاضر...
ومش متوجه لدار وع وجهه ملامح الحده..
وصل فداره ابتسم نص ابتسامه وخش وصكر وراه الباب..
...يتبع...
