#العشق_المتمرد "عندما يزهر الليمون"
#جمان_فريد
الجزء 138 القسم الثالث..
⏳..
وصلت للحوش..
درست قدام الباب..
وهو درس وراها...
انفتح الباب..خشت بسيارتها وهو قعد واقف في مكانه..
يشوف للباب كيف تصكر بعد ماخشت..
اما هي..
درست سيارتها ونزلت منها..
وطول مشت خشت للحوش تجري..
دلال:ماما..ماااما..
نعيمه طلعت من الحمام بعد ماكانت واقفه ع الغساله وقالت بإستغراب:خيرك؟
دلال وقفت فمكانها وقالت:بابا اليوم امتى يروح؟
نعيمه:يروح 4 زي العاده..
دلال بتذمر:اففف..
نعيمه قدمتلها:خيرك تنفخي شنو في؟
دلال تنهدت وهي تشوف لأمها بضيق بعدين قالت:عمار برا..
نعيمه رفعت حواجبها وقالت:وخلتيه برا وخشيتي!!؟
ومشت من حداها طول خدت الوشاح من ع الشماعه وحطاته ع راسها وقعدت تلبس فيه وهي ماشيه...
ودلال قعدت واقفه فمكانها وهي مضايقه..
🍀طلعت نعيمه برا..
وصلت فالباب الخارجي وفتحاته لقت سيارة هونداي موديل 2017 مدرسه قدام الباب وهو مقعمز فيها..
لما سمع الباب انفتح شبحله وشافها...
فتح الباب وطلع القيلا ونزل بيها...
وهي تشوفله بإبتسامه..
صكر الباب وجاها وهو مبتسم...
وصل فيها وقال:السلام عليكم بنت عمتي شنو حالك..
نعيمه:وعليكم السلام..حمد لله ع سلامتك..تفضل ولدي خش..
ابتسم بسعاده لما سمع منها كلمه ولدي بعدين قال:الأفضل تبلغي عمي عبالسلام قبل..
نعيمه:باهي استنى لحظه..
ولت خشت وطلعت تليفونها مم جيب ماليتها واتصلت طول براجلها..
وعمار واقف يستنى...
لحظات وطلعت نعيمه وقالت:تفضل خش ولدي نص ساعه تانيه وجاي..
عمار هز راسه وقال:يزيد فضلك..
وخرت ع الباب وهو خش..
جي نظره من تحت النظاره ع دلال اللي كانت واقفه تشوف للباب ولما خش وشافها هربت داخل..
ضحك ضحكه خفيفه..
نعيمه صكرت الباب وقالت:الصغار ع جيه..
عمار:مايتعبوا فيكم فالنوضة الصبح؟
نعيمه بضحكه:معمر بس..
ضحك عمار وقال:لاهداك باين عليه عاصي..
نعيمه:لكن شاطر فقرايته والمدرسات يشكروا فيه..
عمار:الحمد لله..
وصلوا فباب المربوعه الخارجيه..
فتحاته نعيمه وقالت:تفضل..
عمار:يزيد فضلك..حول من رجليه وخش داخل..
وهي كانت تشوفله كيف يحول في كندرته من رجله الصناعيه...
ابتسمت بحزن..وخشت وراه..
هو وصل في نص المربوعه وقعمز وحط القيلا متاعه جنبه..
نعيمه قعدت واقفه وهي تقول:امتى روحت..
عمار:امس في الليل كنت هناي..قعدت عند واحد صاحب تعرفوه عبدالرؤوف المصراتي..
نعيمه بإبتسامه:اكيد عبدالرؤوف ربي يبارك فيه..
ابتسم عمار وهز راسه..
فجأه سمعوا صوت باب الحوش البراني يطق..
نعيمه بضحكه:روحوا..خل نطلعلهم...
ولفت ومشت وعمار معاها بنظره وهو مبتسم لاحظ انها حامل...
واسترجع بوجوده في المربوعه واستقبالها ليه وحملها ذكرى بعيده..بالنسبه ليه كانت من اجمل الذكريات..
ضحك وين خطر عليه شن دار بعدين حرك راسه يمين ويسار...
🍀برا..
نعيمه بعد فتحت الباب خشت اسو الأولى بعدين الولاد...
وكلهم كانوا يقولوا ورا بعض:السلام عليكم..
وهي ترد:وعليكم السلام..وصكرت الباب..
اسيا:ماما روحت حنينه؟
نعيمه بإبتسامه:ايه روحت..
ومشت وهو مشوا معاها بيخشوا..
نعيمه:شن درتوا فاختباراتكم مجد وجواد..
جواد:جاوبت الحمد لله...
مجد:حتى اني امي جي ساهل..
نعيمه:كويس..
شافت اسيا ومعمر متوجهين للحوش قالتلهم:اسو عموري تعالوا هني...التفتوا وشبحولها بعدين جوها..
نعيمه:بروا خشوا للمربوعه..
معمر:علاش حناي!؟.
نعيمه بضحكه:نسيقوا فالحوش..
هما شبحوا لبعض بعدين مشوا للمربوعه..
لما وصلوا في فمها وقعدوا يحولوا فكنادرهم..
ركزوا مجد وجواد ع الكندره الكبيرة قدام المربوعه مش لعبدالسلام...
جواد شبح لخوته وقال:بوي في المربوعه!..
اسيا ومعمر شبحوله بعدين خشوا طول يجروا..
وجواد وراهم..
اما مجد نزل راسه بحزن بعدين لف ومشي للحوش..
🍀عمار قعد يسمع في كلامهم..
لما خشوا عليه لقوه فاتح حضنه ويضحك..
اسيا بفرح:بابا حبيبي..
وصلوا فيه ضمهم كلهم وهما حضنوه بقوة..
🍁🍁🍁🍁
داخل..
دلال طلعت من دارها بعد بدلت..لقت مجد خاش..
يمشي بحزن..وراسه لوطا..
وقفت فمكانها وقعدت تشوفله لين خش دار الولاد وصكر الباب..
استغربت ومشت بإتجاه الكوجينه..
وصلت فيها وخشت لقت امها توتي فالقهوة..
دلال:خيره مجودي مروح مضايق؟!
نعيمه ابتسمت بحزن وقالت:مجد ناغر من عمار..
دلال شبحتلها شويه وهي تفكر بعدين فهمت وقالت:تصدقي ماما نفكر فالحاجه هادي هلبه..
نزلوا دموع نعيمه مسحتهم طول وقالت؛معليشي يتعود وسيروه يكبرله خوه ويونسه..
قعمزت دلال ع الكرسي وهي تشوف لأمها بضيق...
▪▪▪▪▪
مقعمزه ع رجله..
وولاده حواليه ويسمعوا في اختهم شن تقول..
اسيا:والأبله حطتني عريفة الفصل..
عمار بإندهاش مصطنع:ماشاااء الله ماشااء الله..
معمر:حتى اني عريف وجواد فكل صف هو العريف..
ضحك وقال:ايوه هديم عويلة عمار ديما فالصدارة ..
هما قعدوا يشبحوله وهما مبتسمين..
عمار رفع حواجبه..بعدين رفع يده بالشويه بالشويه وهو يحركه فصوابعه حركه تموجيه...
وهما يشوفوله بإستغراب..
وصلت يده فالنظاره حطها عليها..
وهما يشبحوله بنفس النظره..
هو بحركه سريعه حول النظاره...
اسيا حطت ايديها ع فمها بعد شهقت بإندهاش..
والولاد فتحوا عيونهم ع وسعهم وهما متفاجئين ع الآخر..
عمار ضحك وقال:هكي احلى!؟
اسيا ضماته وقالت:ديما حلو باباتي..
حاوطها وحضنها وقال:عيون بنتي حلوات هدى ليش تشوف في باتها ديما حلو..
جواد:تشوف بيها بوي؟.
عمار:اممم..تأدي الغرض..يعني تنفع..
معمر بإبتسامة:فرحت هلبه بوي.
حط يده ع شعره وهو مبتسم..
وجواد قال:حتى اني بوي..
عمار شبحله ودارله حركه بأنفه..
ابتسم جواد ..
اسيا بعدت وجت عند خد بوها وباساته بقوة..
وعمار:الله.....محلاااها بوسة بنتي..
بعدت اسيا وهي تضحك بعدين ضماته مرة تانيه وهي تضحك..
🍃ماباش يقوللهم ان العين مجرد منظر لااكثر..يبيهم يفرحوا بيه ويشوفوله بنظره مختلفه حلوة ماتخليش في انفسهم شي الاحراج اتجاه شكله اللي حتى لو ماحسوش بيه توا حيحسوه بعدين🍃
🌴🌴🌴🌴
ترا بالله ياناصر شوف السيارة هدي..
ناصر:خير ياعمي ميلاد تاعب تحس في حاجه..
الولاد اللي يخدموا عنده قعدوا يشبحوله بقلق..
ميلاد قعمز ع الكرسي وقال:لالا مافيا شي غير عييت اليوم..
ناصر قعد يشبحله..
هو مرر نظره عليهم وقال:كملوا خدمتكم كملوا..
بعد سمعوا اوامره اللي هدا لهي في خدمته..
اما هو...خدي نفس بعدين ناض وقف وطلع تليفونه من جيبه وطلع وقف قدام الورشه..
دار اتصال بشخص ما وحط التليفون ع وذنه..
🍂🍂🍂🍂🍂
حاطه يدها ع بطنها وتبكي بألم...
وفيدها التانيه شاده قفطان صغير جدا اكبر من يدها بشويه...
رن تليفونها..
حطت القفطان ومسحت دموعها و ناضت مشت للتليفون..
خداته من ع الطاوله..
لما شافت المتصل ابتسمت من بين دموعها..
فتحت الخط وردت..
رزان:السلام عليكم سيدي شنو حالك..
ميلاد بإبتسامه:وعليكم السلام بنتي انتي شنو حالك..
رزان:الحمد لله سيدي اني كويسه فخيار خيري..انت شنو حالك وحال صحتك..
ميلاد:اني الحمد لله كويس يابنتي مابياش..شنو حال المشاغب الصغير..
ضحكت رزان وقالت:اهو قدامي يلعب..
ميلاد بضحكه:ترا عطيهلي نكلمه..
ضحكت رزان ومشت لميلاد ولدها اللي كان يلعب بالمكعبات..
قعمزت جنبه وحطت التليفون ع ودنه وقالت:كلم جدو..قول الو..
ميلاد شد التليفون وقال:الو...
وباقي اللي قاله طلاسم مش مفهوم منها شي..
ميلاد:صار حالك باهي..باهي قولي شن داير مع امك وسيدك..
وميلاد الصغير رد بلغته هو..
ميلاد الكبير:اها..لا كلا سيدك يستاهل عطيه ع راسه كل ماتشوفه باهي ياولد جدك انت..
رزان:ههههههههههه..
وولدها قاعد يدوي ومعاش يبي يسكت بكل...وهي تضحك من قلبها..بعد ماكانت تبكي حزنا من قلبها💔
🍁🍁🍁🍁
ماشيه فالطريق وتتكلم بالتليفون..
حميده:ايه توا ماشية لمدرسة حنين.....لا غير بنسأل عليها ونشوف مستواها.......مش اكتر من ربع ساعه.....باهي...بالسلامه..بالسلامه..
صكرت بعدين حطت التليفون فالشنطة..وقعدت تشبح القدام وهي تمشي بطريقها للمدرسه..
وصلت فيها وخشت داخل..
لما خشت شبحت لجلابيتها لقت كمها مش مساوي..ساواته وشبحت القدام..
توسعوا عيونها لما شافاته طالع من مبنى المدرسه ويمشي فالساحه الفاضيه..ماراهاش في البدايه..بعدين شافها..
ركز عليها عرفها..طول ابتسم..
هي ارتبكت هلبه وقالت بهمس:ليش جاي زعمه؟!
قعدوا يمشوا الزوز.
هو بإتجاهها وهي تحاول تتجاهله..
لما قربوا من بعض هو وقفها وقال:حميده شنو حالك..
هي وقفت بالسيف وردت:الحمد لله عليش جاي!؟
هو ضحك وقال:ماهو بنتي تقرا هنى!..
حميده:قصدي انت جاي لانهم كلموك في شي يعني!
الصديق ابتسم وقال:وليش مانجي لين هم يكلموني!؟بنتي تقرا هنى جيت نسأل عليها..
حميده:اها..باهي وشن قالولك..
الصديق بإبتسامه:اكيد بيشكروا فيها..شاطره مؤدبه اخلاقها عاليه..وكلام واجد فرحني ورفع راسي..
حميده:الحمد لله..حتى اني جيت بنسأل عليها بس مادام انت سألت خل نعدي لعملي..السل....
قاطعها وقال:لحظه حميده بالله شويه بس..
حميده:مستعجله عندي ماندير..
الصديق:والله ماني مطول واجد..
حميده شبحتله شويه بعدين قالت:باهي لو سمحت قول اللي عندك فيسع..
ابتسم وقال:باهي..غير نبي منك تسمعيني بالعقل بس..
حميده :باهي خش فالموضوع..
هز راسه وغير عيونه عنها بعدين بدي يحكي...
🍁🍁🍁🍁
كنت معاه اليوم ماقاليش!..
عمار بإبتسامه؛نا قتله ماتخبر حد مانبي نربك حد معاي..
عبدالسلام:مافيهاش ربكه بكل..
عمار ابتسم وقال:اهو هدى اللي صار..
عبدالسلام :لكن توا ماتقدرش تهرب من عزومة الغدي..
عمار بضحكه:اساسا جيت ع وقت غدا مش ناوي نهرب..
عبدالسلام ضحك بعدين مرر نظره عليه وقال:الباين الفترة اللي فاتت كنت مشغول هلبه
عمار بإبتسامه؛امم كيف ماتشوف..غير جلسته بحيث خلاجسمه كله قعد مقابل عبدالسلام ومرافقه الزوز ع ركابه..وايديه شبكهم في بعض وقال...نا اليوم جايك بنكلمك في موضوع مهم جدا جدا..
عبدالسلام حط رجل ع رجل وحط يده ع مرفقه وضيق عيونه وقال:ان شاء الله خير!
ابتسم عمار وقال:خير بإذن الله خير..ناجايك اليوم نبي نطلب منك بنتك دلال زوجه ليا ع سنة الله ورسوله..وشن ماتبوا..حط يده ع صدره وقال..ناحاضر للي تبوه انتم وللي تبيه هي مستعد كله انفده..
عبدالسلام سكت شويه بعدين قال:اني ياعمار نبي منك شي واحد بس..نبي تخليني نعطيك بنتي مرة تانيه واني مطمن وضميري مرتاح..مانبيش نرجع نلوم روحي مرة تانيه ونندم ونقول ياريته ماصار ولاكان..
وهو مازال حاط يده ع صدر وخر للخلف..ونزل يده حطها ع رجله وقال بثقه..اعطي وانت مطمن ومرتاح ومش حتندم بالعكس حتحمد ربي..
ابتسم برفعة حواجب وقال:ان شاء الله..هدا مانتمنى..نزل حواجبه وقال..ع العموم الراي فالأول والاخير رايها هي وشن ماكان رايها اني واقف وراها..
عمار ابتسم ابتسامه جانبيه وهز راسه بإيجاب..
🌴🌴🌴🌴
الصديق:نبي بناتي كلهن يكبرن عندي ياحميده..
حميده بملامح حاده تحاول تخفي بيها قلقها قالت:والمطلوب؟!
الصديق:نبيك تنسي كل شي صار زمان ياحميده وانتي عارفه شن اللي صار كويس ليا عذري ياحميده..راني عايش حياة مانتمناها لعدوي..بروحي مافي معاي حد مقطع بين عويلتي ومانيش عارف كيف نجيبهم يعيشوا معاي في حوش واحد..تعرفي بناتي التانيات كل اسبوع عند وحده من خواتي وراهن يرعن فيهن بالسيف ياحميده..
حميده غيرت عيونها عنه وهي مضايقه هلبه..
الصديق:اني مانبي نجبرك ع شي..وفي نفس الوقت مانبيك تظلميني ياحميده راني مازلت شاريك يابنت الناس ونبيك كيف قبل ماتغير شي..
شبحتله بعدين تنهدت وقالت:صديق..اني مانيش كيف قبل بكل لاشاريه ولانبي..ولاعاد نبي نشري حد خلاص..مرتاحه ع الآخر فحياتي وبنتي كيف ماانت تشوف وتسمع عايشة احسن عيشه..نفسيتها تحسنت صحتها تحسنت ماناقصها شي واني مانبي نغير عليها الحال وبناتك من هديك المراة اني اخر وحده تطلب منها ترعاهن وتربيهن اللي داراته فيا امهن يخليني نكرههن كيف مانكرهها هي مستحيل نقبلهن مهما صار..وبعدين من قال تخلينا في حالنا وبناتها عندنا عندي اني بالذات..شن يدريني شن مازال دير فيا وحده كيفها ماتخاف ربي..نزلوا دموعها مسحتهم وقالت..تبي ندورلك ع مراة كويسه نعرف واجد ندلك عليهن..لكن اني لا يالصديق..مستحيل..
هو كان عارف ان هدا حيكون ردها..وحاول معاها وهو متمني انها ترضى...مش متأكد...
ضم شواربه لداخل بأسف بعدين هز راسه وقال:كيف ماكنت متوقع..غير عيونه عنها...تعبوا دموع وهي شافتهم...بعدين رجع شافلها وقال بإبتسامه..مال سامحيني اللي خديت من وقتك..
حميده هزت راسها وقال:ربي يسير امرك ويفتحها عليك..السلام عليكم...
ولفت ومشت بسرعه...
خدت نفس وزفرت..
بعدين غمضت عيونها وفتحتهم...
وصلت في باب المدرسه وطلعت..
وهو كان ماشي وراها بمسافه بسيطه..
طلع ومازال يشبحلها..
وصل فباب السيارة وعيونه معاها لين ادرقت من قدامهم..
نزلت من عينه دمعه..بعدين شبح للباب وفتحه وركب وصكره..وشغل سيارته..ومشي فطريقه...
🍁🍁🍁🍁
الساعه 3:30بعد الظهر..
لمت حاجاتها وناضت وهي تقول:مروحه صبايا..
زميلاتها:سلام..بايات..
رانيا:سلام..
ومشت طول بتطلع من مبنى مكان عملها...
طلعت وقامت تليفونها بتتصل بحمزة..
وهي تشوف في رقمه...
حست بشي غريب...
وكإن في حد واقف جنبها..لاصق فيها..
انفاسه تلفح فخدها...
قريب لدرجه كبيره..
هي عقدت حواجبها وشبحت جنبها..
شافت عيون شهبا تشوف لعيونها مباشرة..
شهقت بخلعه ووخرت..
هو قعد يضحك..
هي حطت يدها ع صدرها وقعدت تشبحله وملامح الفجعه ع وجهها..
هو قال بضحكه:خيرك!!
رانيا زادت ركزت عليه وهي تشبحله بخلعه وصدمه..
وهو يضحك وخلاص..
نزلت يدها وقدمتله وصلت فيه..
حطت يدها ع ذراعه وهي تشوف لوجهه...
هو حط يده ع يدها ونزلها وقعد شادها وقال:توقعت تفرحي وين تشوفيني..
رانيا عيونها امتلوا دموع وهي تقول:رمزي!
رمزي قلدها وقال:رمزي!! اكلب رمزي ياكنين انت..
رانيا دموعها نزلوا وهي تقول:خزي عليك يامعفن..
وبدون ماتحسب حساب لأي شي خشت حضنه..
هو ضحك بإحراج وحط يده ع ظهرها وقال:خلاص رنرونه مش فالشارع قدام الناس!..
ورانيا مش معدله ع حد وهي في حضنه حست براحه وامان الدنيا كلها..
رمزي:رانيا حبيبتي والله مايجي عيب..
"ماشاء الله والله ماشاء الله"
طول رانيا بعدت عن رمزي وهي منفصه عيونها من الخلعه التانيه..
رمزي وهو مبتسم بملل:قول حمد لله ع سلامه قبل..
حمزة وهو جايهم:قلنهالك ع هالهاتف عشرين مرة..
ومد يده..
صافحه رمزي..وحمزة جبده وحضنه..
ورمزي ضحك وحضنه حتى هو ورانيا واقفه تشبحلهم وهي مبتسمه ودموع الفرح معبيات عيونها💕
🍁🍁🍁🍁
خش عليهم الكوجينه شاف بنته تصب فالشاهي فطواسي معبيات لوز..
ابتسم وقال لمرته؛هيا سقدوا الراجل بيروح ناوي البلاد..
دلال:شويه بس بابا..
نعيمه شبحت لعبدالسلام..
عبدالسلام غمزلها واشر بعيونه ع دلال..
نعيمه هزت راسها وابتسمت..
كملت دلال وخدت الصفره والتفتت لبوها وقالت:خود بابا..
قدم بوها وخدي منها الصفره بعدين مشي طلع بيها..
دلال شبحت لأمها وقالت:اطلعي ماما تو نكمل اني..
نعيمه:باهي..
ومشت طلعت من الكوجينه..
اما دلال التفتت للماعين ابتسمت وبدت اضم فيهم..
▪▪▪▪▪
في دار الولاد..
مجد:خلاص توا بتروحوا مع بوكم..
جواد قعد يشبحله ووهو ساكت..
معمر:مش اليوم..
مجد:ايه لكن قريب..
وجواد يشبح لخاله ومازال محتفظ بصمته..
مجد:تعالولنا زي ماتجينا نور وانيس..
جواد:اللي يسمعك يقول بنروحوا توا؟!
مجد:توا ولا بعدين بتروحوا فالاخير..وشبح للتلفزيون وهو شاد دموعه بالسيف وجواد يشبحله..
🌴🌴🌴🌴
الساعه 4:00قبل العصر..
طلع من المقهى ومشي بطريقه لسيارة صاحبه..
فتح الباب وركب وهو يقول:السلام عليكم..
صاحبه رد السلام..
وتحرك طول....
شبحله وقال:شن صار معاك تاني؟..
رد عليه وقال:تو نحكيلك..
سكت صاحبه وشبح القدام...
وقعدوا محافظين ع صمتهم لين وصلوا في مكان ما..
درس السيارة ونزل..
وصاحبه نزل معاه...
والزوز مشوا خشوا للوادي...
هانيبال:حطيت عقلك فراسك؟..
وقف ضو وشبحله وقال:نفكر نطلع برا خلاص..
هانيبال ضيق عيونه وقال:وين بتعدي؟
ضو:بريطانيا..
هانيبال قعد يشبحله وهو ساكت..
ضو خدي نفس بعدين قال:احسن حل والله احسن حل للي كيفي..
هانيبال:ايه وتعدي تاخد وحده تانيه من غادي!
ضحك وقال:هديك قصتي معاها تعرفها كويس طيش مراهقين مش اكثر
هانيبال بضحكه:لاعادي تجي مراهقه متأخره اطيح وحده غادي وتجي تقولك نبيك وتقوللها حد الله بيني وبين الحرام اني مسلم نعرف نتزوج بس وهي لانها بتهبل ع منظر كيف منظرك تقبل وتتزوجها اسبوع وبعدين كل حد يعدي فحاله
ضو:هههههههه..بعدين هدا ضحك وتنهد وقال..النساوين كلهن ع بعضهن معاد نبي نعرفهن نبي نعدي نقرا وبس..
هانيبال ابتسم وقال:عدي اقرا..وغير جوك وعاود حساباتك..
ضو تنهد وهز راسه بإيجاب..
فجأة رن تليفون هانيبال...
قامه وشاف المتصل..شبح لضو..
وضو بشبحله بتضييقة عيون..
هانيبال فتح الخط ورد:يااهلا ويامرحبا..حمد لله ع السلامه ياسي..
ضو غمض عيونه بنفاذ صبر وفتحهم وبعد عن هانيبال..
وهانيبال يكلم في عمار وهو معاه بعيونه:تمام نراجي فيك عند *****...باهي..حاضر..بالسلامه...
صكر وقال لضو:وين عديت...
ومشاله..
🍃يبي يوقف معاه ويدعمه ويقويه ويدله ع الطريق الصح ويفتحله عيونه عليه...الرفيق الصالح🍃
🍁بس في من بأفعاله نفر كل اللي حواليه منه وقعد بروحه لاقادر يشارك حد همومه ولالاقي من يشاركه اصلا..
وفي عز هالوحده وهالوحشه الشيطان يدورله ع ثغرة يخش منها وفي الحاله اللي فيها محمد الباب كان مفتوح ع وسعه..
☘مقعمز ورا مبنى المكان اللي يخدم فيه يدخن..
ع جية زميله اللي ليه فتره حاط عليه ويراقب في وضعه..
جي وقف حداه وقال:حمود وليت ادخن اكثر مني...
محمد بحده:ترا عدي خيرلك مش رايقلك بكل راهو..
هو ابتسم وقعمز جنبه وقال:تبي الحق ليا فترة نشوف لوضعك كيف متغير..برغم اني مانحبلك شبح وجه لكن ماهنتش عليا..
محمد بغضب:بتصبي من حداي توا ولاكيف!؟
ضحك وناض بعدين قال:حاضر حاضر كيف ماتبي..لكن بنقولك حاجه..انت راجل صح مش ليك الوضع اللي معيش روحك فيه..
قام عيونه وشبحله..
ابتسم وقال:معدي معدي غير قعدت حاجه اخيره بنقولها..كان احتجت فيوم تفضفض لحد..تفكرني..
ولف ومشي...
ومحمد قعد معاه بعيونه لين ادرق..بعدين شبح القدام وقال:ناقص غير انت...
وطلع سيجارة تانيه ولعها وبدي يدخن من جديد..
🍁🍁🍁🍁
غير اقعد ولدي بات هني وغدوة الصبح تسقد..
رمزي بإبتسامه:سامحني ياعمي لازم نعدي لاختي نشوفها حتى هي ونبات عندها ونتسقد الصبح ان شاء الله منها غادي..
خيري:اه كان هكي ماعندي مانقول اختك هادي..
مد رمزي يده وقال:سامحوني في تعبكم..
خيري صافحه وقال:تعب شني هدا ولدنا راك..
رمزي ابتسم وقال:ربي يحفظك ياعمي..هي توا بالسلامه..
خيري:في امان الله..
طلق يده..ورمزي لف ومشي ركب سيارته..
بعدين كلكس لخيري...وخيري حياه..
تحرك طول...ورانيا تشبحله من فوق وهي تبتسم بعشق وتتنهد 💕
🍁🍁🍁🍁
الساعه 5:30 بعد العصر..
انفتح باب الحوش وخشوا...
مصباح:والله الواحد مايرتاح كان في حوشه..
نادره:صدقت..المهم توا ان الامور كلها تمام معاش صار شي تاني..
مصباح:لالا طول ها 15يوم ماصارت فيه حاجه بكل..
عامر:باهي الحمد لله..وصكر الباب..
نادره وهي تفك في بطم جلابيتها قالت:باهي ماعرفش منو..
مصباح:قال لا..مايقدرش يعرف حاجه زي هادي..
تنهدت وقالت:ربي يكفينا شرهم..ومشت طول لدارها..
وولدها حتى هو مشي لداره..
اما راجلها قعد يدير في دورة ع الحوش..
🍁🍁🍁🍁
تعالى جاي يابطه تعالى..
والبطه يمرد باللعبه اللي فيده هارب من خاله..وفي الاخير حصل عليه طبه وقامه وهو يقول:يافورتي..
ضحكت رزان وقالت:مايستغرب راهو تلعب معاه ياخد عليك طول
رمزي وهو يشوفله:ماشاء الله ماشاء الله..
رزان ابتسمت وقالت:قولي تقدر تولي تاني..
رمزي:ايه..ترامب رجع عن قرار المنع
رزان:الحمد لله
رمزي ابتسم وقال:اني نحدد امتى نرفع رانيا
رزان وهي متفاجئة:كيف قصدك من غير عرس ولاشي!!
ضحك رمزي وقال:لا ياهبله..ناوي ان شاء الله ندير الفرح شهر 4 قبل رمضان..مانبي نغم حد نبيهم يديرولها عرس سمح..
رزان بإبتسامه:ان شاء الله..باهي معناها انت بتسافر مرة تانيه؟..
رمزي:ايه اجازتي شهر بس..
رزان:حتى شهر كويس نلحقوا نشبعوا منك شويه..
ابتسم وشبح لميلادلقاه حاط في فمه ودن اللعبه ويشبحله..
حولها رمزي وقال:كخا...احا..
ميلاد عاود دكها في فمه مرة تانيه..
رزان:ليسانس عناد ولدي هدى..
رمزي:ع اساس ماعنده من وين يجيبه سيده سيده..
وانفتح باب الحوش وخش سيده وهو حامل ومحمل ويقول:اصفر باشاااا..
رمزي:عووومد..
ضحكت رزان..
حط عماد الحاجات في وسط الحوش ومشي للصاله..
🌴🌴🌴🌴
الساعه 7:00مساءا..
وصلوا السيارات قدام واحد من المساجد وقت اقامة الصلاه..
نزلوا الزوز من سياراتهم...
هانيبال وهو يشوف لعمار:وحق الله التريس يقعدوا طول عمرهم تريس..
ضحك عمار وجاه خبط بيده ع كتفه بعدين قال:هي بسرعه خل نلحقوا ع الركعه الاولى..
مشوا الزوز حولوا اللي فرجليهم وتوضوا..
بعدين خشوا للجامع..
كانت الركعه الأولى كيف باديه والإمام كيف كمل الفاتحه وقري سورة تانيه..
وقفوا فالصف...كبروا وخشوا فصلاة الجماعة..
والزوز كانوا خاشعين مع الصوت اللي يتلى في آيات من سورة يونس...
¤إليه مرجعكم جميعا وعد الله حقا إنه يبدئ الخلق ثم يعيده ليجزي الذين ءامنوا وعملوا الصالحات بالقسط¤
كان الصوت للشيخ أيمن اللي يؤم بجماعة كبيرة في المسجد صلاة المغرب..
🍀🍀🍀
وفي مسجد تاني يبعد بمسافة لاباس بيها..
¤إن الله عنده علم الساعه وينزل الغيث ويعلم مافي الأرحام وماتدري نفس ماذا تكسب غدا وماتدري نفس بأي أرض تموت إن الله عليم خبير¤..
الله اكبر..
ركع الإمام ميلاد وركعوا وراها جماعة المأمومين اللي كانوا منهم خوه الهادي وولد عمه حسن..
في غياب محمد اللي ولى يهمل فالصلاه بعد ماكان مداوم عليها في وقتها فالجامع...
🍁🍁🍁🍁
الساعه 10:30ليلا..
مقعمزات الزوز ع الركابه فم الحوش ويهدرزوا...
وقدامهم حنين مقعمزة ترسم في كراسة الرسم..
غاليه:ياريتني عديت مع امي وفضيله ليا وقت ع اللمات..
حميده:الخدمه مخليتنا مش ملحقات على شي..
غاليه:صح..
سكتوا الزوز شويه بعدين قالت حميده..
حميده بضحكه؛دلوله بطير من الفرحه..
غاليه بإبتسامه وقالت:دلوله قديش ليها طايبه من لما جونا اخر مرة..
حميده:هي من الاول طايبه غير تحب تدلع تعرفيها انتي..
غاليه ضحكت وقالت:اني اللي نعرفها..
ابتسموا الزوز بعدين غاليه شبحت لحميده وقالت..
غاليه:تعرفي..مستغربه فيك؟..
شبحتلها حميده وقالت:في شن مستغربه؟!
غاليه:يعني لو وحده تانيه غيرك راهي مافوتت الفرص اللي جنها والزوز من رجاله هي عارفه انهم يحبوها حق..
حميده ابتسمت بتهكم وقالت:وشن خديت منه حبهم ياغاليه غير الهم والغم ووجع القلب وبس..شبحت القدام وقالت..اني وحده من البنات اللي كانت تخدم ومكتفيه بروحها وعايشه حياه هاديه ومرتاحه لكن مارضتش بيها ماشافتهاش حياه كانت تفكر ان الحياة للمراة حق فالزواج ..ان يكون عندها راجل وادير صغار كيفها كيف نديداتها..طرت من فرحتي منين جاني الصديق عزري وعمره قريب من عمري وراجل سمح وحالته كويسه ويحبني وغير شن نبي يجيني..من اول ماتزوجت واني قعدت نتلقى فصدمه ورا التانيه..الصدمه بالواقع بحقيقة الحاجه اللي كنت نشوف فيها من برا سمحه واجد..شبحتلها وقالت..وانتي تعرفي اللي عشته ياغاليه كويس وبشن مريت..تنهدت وقالت..بعد الكسر الكبير اللي انكسرته ربي جبرني ووقف معاي ووقفني ع كرعيا مرة تانيه خدمت وتحملت مسؤولية نفسي وبنتي..صح عانيت من كلام الناس..بس ع قد مانقدر تجاهلته وكملت حياتي كيف مااني نبيها..مش ساهله حتى هي صح..بس مرتاحه فيها اكثر حاسه روحه مستغنيه بنفسي وبنتي مستغنيه بيا عن كل حد..عايشه بكرامتي بين خوتي وهلي..حتى لو صار بيناتنا مشاكل وكلام جارح قاعد اهون بواااجد من الذل اللي عشته قبل..خليفه والصديق ماهمش فرص ياغاليه..خليفه والصديق هما رجوع لنقطه الصفر..وممكن لو خديت واحد فيهم ندمر اكثر من قبل..تنهدت وكملت تقول..الحمد لله الحياة اللي عايشاتها توا مافيش احلى منها..وهدى ماقسم الله وراضيه بيه..
غاليه بإبتسامه:كلامك حلو واجد..يهبل كلامك..نحس فيك قلتي اللي فخاطري كله..
حميده بإبتسامه:ع فكره انتي اكثر وحده محظوظه فينا..ربي يحبك ياغاليه..
ضحكت غاليه وعيونها معبيات دموع وقالت:ربي يحبنا حني اتنين..وكل حد خدي اللي مقسومله فهالدنيا والخيره في اللي يختاره ربي ديما ياحميده..
حميده بإبتسامه حب:ونعم بالله..
ع جية الولاد يجروا..
قصي وفؤاد ورمضان..
جي قصي لحنين ومدلها طرف شكلاطه وقال:خودي حنين..
حنين شبحت للشكلاطه وخدتها..
غاليه وهي تشوفلهم:مش غريب عليا المشهد هدى..
حميده فنصت عيونها وقالت:لالا تحركي من مكانك..
غاليه بضحكه:وخيره قصي رمزي في شن احسن منه.
حميده:لا رموزة ياكبدي سعيده ماعاد جابت بعده ولاد الحق..
ضربتها غاليه وقالت وهي تضحك:خزي ياكلبه وخيره توفيق!
حميده:ماخيره شي لكن مش حنين ويطفطف كيف رمزي ربي ينجيه..
غاليه تنهدت وقالت:استاحشته واجد..
حميده:حتى اني..
سكتوا شويه وهما يشوفوا لفؤاد كيف يذوق فحنين مش شكلاطته..
غاليه:لا عاد هدى ماعندك ماتقولي فيه..
حميده:هييي ولد سميه!!ووك عليا..
غاليه:ههههههههههه..
🍀وكملوا سهرياتهم الخريفيه تحت ضي القمر مع الصغار وطبعا ماارتاحوش لين حصلوا طرف طرف شكلاطه..💕
~~~~~~~~~~~~~
