#العشق_المتمرد "عندما يزهر الليمون"
#جمان_فريد
الجزء 123 القسم الأول
💖..
هداكا هو الفندق..
اشرلها عليه بصبعه..
رزان بضجر: اوووف طريق طويله..
شبحلها وقال:قصدك من هني لغادي طريق طويله عندك!!
ضحكت وشدت فذراعه وحطت راسها عليه:تعب سفر ودوشة الشناطي.. وناعسني النوم..
هو رفع حاجبه اليسار وشبح للفندق..بعدين قال:ترا حولي حبي شويه..
هي ضيقت عيونها بإستغراب وبعدت عنه...
وقف قدامها وهو يشوفلها...
وهي تشوفله...
ماحستش بروحها الا وهي مرفوعه فوق بين ايديه..
رزان بتفنيصه:حييي العار..
عماد:لا عار لا سو قلبي رانا في روما مش في ****..
وقعد يمشي بيها..
رزان:هههههههه حي نهاري يشوفوا فينا..
هو ضحك وقال :ماحد مدور حد هني ياقلبي..
رزان شافت حواليها:والله يشبحولنا..
عماد:ت اسكتي اسكتي..اسكتي خيرلك..
رزان بضحكه:حي ع العار..
عماد:ماتبيش تسكتي باهي!!
قعد يدور بيها ...
رزان :هههههههه..لااااا..ههههههه...
وقف وهو يضحك قال:دخت..
رزان بضحكه:حتى اني..
عماد قلدها وقال:حتى اني..سلملي الزرياكه ياربي سلمها..وباسها من خدها بقوة...
رزان:هههههههه ياعاري..
عماد قعد يجري بيها ويقول:اهو العار...
قعد يعيط ويقول...La adorooooo...
وهي تضحك بعياط والناس واقفين يشوفولهم بإبتسامه..
هكي لين وصل بيها لفم الفندق..
ووراهم راجل شاد شناطيهم وهو يشوفلهم ويبتسم..
نزلها وخشوا الزوز وهما يضحكوا ...💕
🍁🍁🍁🍁
بعد حضرت محاضرة دامت لساعتين..
طلعت من القاعه ومعاها زميله ليها..
رفقه:خودي صوريه ورني عليا لما تكملي..
زميلتها خدت منها الشيت وقالت:تمام..
مشت البنت للمصور..
اما رفقه قعدت تمشي وهي ادور فمكان تقعمز فيه بروحها شويه..
لقت مكان..
قعمزت وحطت شنطتها حداها..
ربعت ايديها وقعدت توزع فنظرها ع المكان..
شافت حد مألوف..
لابس سروال جينز اسود..وسوريه بيضا ودجامه بيج..ونظارات..
ابتسم لما شافلته وجي ناحيتها..
هي قعدت تشوفله وتحاول تذكر وين شايفاته..
لعند ماوصل فيها وقال:السلام عليكم..
هي بإستغراب:وعليكم السلام..
ضحك وقال؛شكلك مازبطنيش..
رفقه حركت راسها ايمين ويسار بالنفي وقالت:لا..
حول نظاراته وقعد يشوفلها وهو مضيق عيونه من الشمس اللي جايه عليهم..
توسعوا عيونها من المفاجأة
اذكراته
ومجرد ماذكراته انتابها شعور بالإرتباك ممزوج بالخجل..
ياسين:نقدر نقعمز..
هي نزلت عيونها وقالت:علاش؟
هو ابتسم وقال:نبي نحكي معاك فموضوع..
قامت عيونها فيه..
ياسين:جاد جدا..
غيرت عيونها عنه وقالت:تفضل..
ابتسم..ومشي قعمز جنبها بمسافه..
شبحلها وقال:كيف حالك وحال الأهل..
رفقه بدون ماتشوفله:الحمد لله..احمم..
ياسين:الوالده صحتها كويسه..
رفقه:ايه الحمد لله..شن حال خالتي خديجه..
ياسين بإبتسامه:الحمد لله حالها باهي..وتسلم عليك سلام حار..
رفقه بخجل:سلمها..
هو قعد يشوفلها كيف متوترة ومتحشمه وحالتها حاله..
مسح بيده ع لحيته وغير عيونه عنها وهو يشوف القدام قال:خل نخش فالموضوع طول..بس قبل نبدا نتكلم نتمنى منك تسمعيني للآخر..
رفقه بتوتر؛تفضل..نسمع فيك..
ضم ايديه لبعض وهو يشوفلهم قال:بصراحه بدون لف ودوران..اني..احمم..من اول مرة شفتك فيها فالعياده..
شبحلها وقال..
"عجبتيني"..
هي شبحتله برفعة حاجب..
فتح ايديه ورفعهم وهو يقول:ماتفهمنيش غلط ارجوك..نزل ايديه وحطهم ع رجليه وهو يقول..عجبتيني بصدق بجديه يعني..اني ناوي معاك الحلال..
هي اتفاجئت..
غيرت عيونها عنه طول
ياسين:اني راهو والله عمري ماجيت لبنت وفتحت معاها موضوع زي هدا..انتي اول وحده..من اول مرة شبحتك فيها خلتيني نفكر في الزواج
شفتك بنيه هاديه..ومحترمه..ومؤدبه والطيبة متاعك باينه فيك..وحتى..ضحك ضحكه خفيفه وقال..وجميله ماشاء الله..
هي ذابت فحوايجها من الخجل..
حك حاجبه وقال:حتى امي واختي مدحوا فيك هلبه..ضحك وهو يقول..امي ماليهاش سيرة فالحوش الا سيرتك..
شبحتله وقالت:يعني الرغبه الأساسيه رغبة خالتي خديجه..
ياسين رفع حواجبه وقال:لا والله ماهكي..نزل حواجبه وابتسم وهو يقول..امي ولت هادي رغبتها لما شافت انها رغبتي اني..الحق امي قداش ليها تتمنى شي زي هدا..ديما تكلم فيا ع موضوع الزواج..فكل وقت تكلم فيا عليه بطريقة مباشرة وغير مباشرة..واني اللي كنت رافض..هادي اول مرة اني نتكلم فموضوع زي هدا وهي قريب طارت من فرحتها..
رفقه:وعلاش انت ماتبيش قبل؟
ابتسم من قلبه لما حس انها تبي تاخد وتعطي معاه فالكلام رد وهو يقول:بسبب الظروف..ظروف خلتني ننسى نفسي بالمرة...
شبح القدام وقال:بوي في اخر عمره جاته جلطه خلاته طريح الفراش..بعد عرس خوي الكبير بشهرين تقريبا خوي هدا دكتور عايش برا من لما تخرج من كليه الطب طلع برا بيحضر..ولأن دماغه مليح لقي فرصته غادي وهما شدوا فيه وطبعا امي مارضتش الابعد ماينفد شرطها وياخد وحده من هني وهو وافق..روح وتزوج وسافر طول...بعد مرض بوي..وليت اني الكبير ع تلاته بنات وولد..
احني الحمد لله ربي عاطينا من فضله..مع قرايتي شديت الرزق..وقعدت نخدم ع العيله...بلع ريقه وقال..بوي توفى بعد عام بالزبط من مرضه..وبعد موته امي ياما صار فيها قعدنا وراها اني وخوتي
لين ولت زي ماكانت..انخطبت اختي غفران وتزوجت وعرسها دخل علينا الفرح من جديد وغير حالنا..بعد تزوجت غفران بسته شهور..انخطبت اختي التانيه سلوى..وبعد عام تزوجت...والعيله كبرت بصغارهم وصغار خوي اللي قعدوا يجونا زيارات بين فترة وفترة..ابتسم وهو يقول..فرحة امي..كانت اقصى امنيه عندي..نبي امي تفرح وبس..
المهم..بعد عامين هكي جي خوي الصغير وقال بنخطب..
هني امي التفتت عليا وقالت...لازم تتزوج انت قبل..وقتها رفضت الفكرة لسبب واحد..ع خاطرها خفت تقعد بروحها بعد مايجي لاختي الصغيره نصيبها وتمشي ع حالها..قلتلها اني توا مش واتي..خلي يتم خوي مطيع اموره وبعدين نلهى بيه الموضوع هدا..وفعلا..خطبنا لخوي..وتزوج حتى هو...
وجي فجرته موضوع ابتهاج..قعدت مخطوبه عام ونص..وفهالعام ونص ياما صار بيني وبين امي ع موضوع الزواج..اني كنت رافض ع خاطرها وماكنتش نبي نخليها لحد غريب لامرتي ولاغيرها..زعلت مني وخدت مني موقف..ضحك وقال..بش نرضيها..قلتلها تتزوج ابتهاج واني نلحقها طول..وعطيتهاوعد..
وتزوجت ابتهاج...ابتسم بألم وهو يقول...بعدين شهرين بس من زواجها..راجلها مات مقتول برصاصه طايشه جاته وهو يتفرج ع نوبة فعرس لجيرانهم...
موت راجل ابتهاج اللي بعدها طلعت حامل..خلاني نصكر موضوع الزواج للأبد..نبي بس نقعد معاها هي وامي..لأنهم بأمس الحاجه ليا..
ضحك وقال..لكن سبحانه ربي لما يكتب لحد حاجه حتى لو مايبيهاش لازم ياخدها..هي نظرة وحده هداكا اليوم..
حرك ايديه وهو يقول..قلبتني قلب وغيرت تفكيري كله..ضحك..
وشبحلها..
تلاشت ضحكته لما راها تمسح فدموعها وتبكي بصمت..
دموعها دارو فقلبه الهوايل..قاللها بصوت هادي:شكلك حساسه..
رشفت وقالت بنبرة؛حساسة شني!؟االلي حكيته توا يبكي الحجر..قداش انت انسان رائع..انسان بكل معنى الكلمه..بجديات انت انسان..تهبل..
وحطت ايديها ع وجهها وقعدت تبكي..
هو انصدم ع تفاجأ ع تحشم ..صارت فيه حاله وتفركس كله مع بعضه..
حط يده ع كتفها بعدين حولها طول وقال بضحكه مرتبكه؛ماكنتش نبي نبكيك والله..شرحتلك وضعي بس..
فجأة رن تليفونها..
مسحت دموعها بسرعه وهي تحاول تتمالك نفسها وتهدي بكي..
شافت المتصل ناضت طول وقالت..حي البنيه..اسفه لازم نمشي..
ومشت تجري..
وهو معاها بعيونه...
فجأة وقفت..
التفتت واشرتله بيدها وهي تقول:اه اسفه..باي..
والتفتت ومشت كملت طريقها وهي تجري..
هي قعد يشوفلها وخلاص..بعدين تدريجيا بدي يضحك..
شوي هدا ضحك وهو يقول:جايبهالك ياخديجه كنه..جايبهالك..
تنهد بإبتسامه وناض..لبس نظاراته ومشي..
💕💕💕💕💕
واخيرا تركيا..
مالك بضحكه:قداش تحبيها..
نور بضحكه:حلوة الحق..
مالك:مسلسلاتهم كانت اكبر دعايه للسياحه فيها..
نور:صح ملاحظه انهم يتعمدوا يوروا بلادهم وشن فيها من اماكن حلوة..
مالك ابتسم بحسرة وقال:تعرفي يانوارة لو القدافي فهالاربعين سنه دار اللي داروه الأتراك فبلادهم فأقل من عشرين عام بس راهو ليبيا الأولى عربيا فالسياحه كان مش فالشرق الأوسط كله..
نور تنهدت بحسرة وقالت:بلاد قليلة بخت..
مالك :صدقتي .
وصل بيهم التاكسي قدام الفندق..
نزلوا الزوز ..
ونزل السواق الشناطي..
عطوه اجرته وتوكل..
وهما خشوا للفندق بعد ماخدي منهم موظف الفندق الشناطي..
🍁🍁🍁🍁
صورة عمار الخيط..
مرشها كان عاكس صورتها وهي مقعمزة ع السرير..
كانت لابسه توته لونها "حلوي"..ورافعه شعرها فوق..
وسرحانه تفكر فالعمله اللي دارتها..
مش عارفه كيف ترقعها..
كيف يكون شكل اعتذارها منه الموقف اللي حطاته فيه بايخ هلبه..
قللت من احترامه ع الملأ وياريته غير مذنب..
مظلوم..
تأففت بعدين مسحت بيدها ع وجهها وهي تقول:عليك موقف حقير درته ياربي..استغفر الله العظيم..
طق باب الدار..
دلال تنهدت بعدين قالت؛تفضل..
انفتح الباب وخشت نعيمه وع وذنها التليفون:شويه نوارة..
مدت نعيمه التليفون لدلال..
دلال وهي مبتسمه خداته وحطاته ع وذنها وقالت:حمد لله ع السلامه نوارتي..
🌴🌴🌴🌴🌴
الله يسلمك ماما..
سعيده:شن ماخفتيش من الطيارة..
ضحكت رزان وقالت؛شويه مش واجد..
سعيده بضحكه:باهي باهي..تغديتوا ولامازال ؟..
رزان:بنطلعوا توا إن شاء الله..
سعيده بإبتسامه:باهي بنيتي عدي ادهوري وهيجي وبرطعي ياحنه..
رزان:هههههههه..
"رزان"..
رزان:اهو ماما عماد جي نكلمك بعدين..
سعيده:سلمي عليه..بالسلامه..
رزان:يوصل ماما..سلمي ع سيدي والولاد..
سعيده:إن شاء الله يوصل..بالسلامه ماما..
رزان:بالسلامه..
صكرت رزان..
وسعيده مجرد صكرت بنتها انهارت بالبكي..
كانت تحاول تتماسك قدامها وتبين انها عاديه..
وهي من اول ماخشت للحوش لما روحت وشافت لدارها بكت بعبرتها..
بنتها الوحيده..
وطلعة البنت من حوش اهلها واعرة ..
يابال لو كانت بنيه وحيده مافيش غيرها..
كانت لأمها صاحبه واخت ورفيقه..
لما تزوجت..فقدتها فقد قوي هلبه...وكأنها ماتت مش تزوجت..
عزائها الوحيد انها تهنت عليها وعطتها لراجل باهي يحبها من كل قلبه..أكثر من روحه..
💕💕💕💕
خلاص قلبي خلاص..خلاص عمري خلاص..
رزان وهي تبكي فحضن عماد:حسيتها تكابر ياعماد..متأكده..انها تبكي..واجد..
زاد ضمها وقال:وعد مني ياقلبي اني بعد نروحوا نرفعك غادي طول تقعدي عندها نهارين..
رزان:ليش مش اسبوع..
عماد:شن هيااا!!؟اني قلت نهارين وندمت..
ضحكت رزان من بين دموعها..
عماد ورافع حاجبه:واخدك بش تقعدي فحوش ماليك ا!تي اني ماصدقتك قطفتك من غادي وزرعتك فجنان حياتي ياحياتي انتي..
ضحكت بعدين.بعدت عنه وقالت:باهي خليني نعدي نغسل وجهي ونوتي روحي..
شد وجهها بإيديه وقرب باسها بقوة...بعدين بعد وقال؛بري ياعسل..
مشت رزان وهي تضحك..
اما هو تنهد بعدين وخر شعره بإيديه للخلف..
ومشي للمرايه يلقي فنظره ع روحه..
💕💕💕💕💕
🍁🍁🍁🍁🍁
مقعمز فشقته ع الكنبه متاع الصاله وهو حاط رجل ع رجل..
ومربع ايديه..ورافع راسه فوق ومغمض عيونه..
《 دلال:خسارة ماكنت نحترم فيك ونقدر فيك..مانحسابش حركات المراهقين هادي تطلع من واحد زيك.. عيب والله عيب...》
《غير جيت نسيب خالي هانيبال بس كان هدا درت معاك اللازم...》
فتح عيونه وقال:معناها هي حاسه بيا!!؟كاشفتني لكن تتجاهل!!....ضيق عيونه ونزل راسه وهو يقول..من هو هدى اللي يبعتلها فالورد!!؟رفع حاجبه وقال...ماخلصت من الميت!
رجع رفع راسه واتكي بيه ع مسند الكنبه وزفر بالقوة..
ومازال يتسائل من يكون غريمه الجديد!؟
🍁🍁🍁🍁
الساعه 4:30عصرا..
في دار المعيشه..
مقعمز هو ومرته ويشربوا الشاهي الأخضر ويهدرزوا وهما يتفرجوا ع التلفزيون..
نعيمه:قالتلي خلي النت مفتوح بش نبعتلك الصور..
عبدالسلام بإبتسامه:باهي باهي..ربي يسعدهم..
نعيمه:آمين..
عبدالسلام:دلال وين؟
نعيمه :في دارها تقري فالولاد..
عبدالسلام شبح لمرته وقال:نعيمه..
شبحتله وقالت:نعم..
عبدالسلام:عبدالرؤوف رجع طلب مني دلال مرة تانيه..
حطت طاسة الشاهي فالصفرة اللي حداها وشبحت لراجلها وهي تقول:الراجل مايتفوتش الصراحه..
عبدالسلام:صح..راجل محترم ومثقف ومستقيم وليه وزنه فالبلاد..بس المشكله فبنتك..
نعيمه:مش ملاحظ انها حولت ثوب الحزن..هادي اشارة ع انها تقبلت خلاص وماعندهاش مانع تشوف حياتها..هي كل خوفها ياخدوا منها صغارها..وانت بروحك قتلي ان الحاج مختار ماعنداش مانع تتزوج وصغارها يقعدوا معاها المهم الراجل يكون كويس..
عبدالسلام:هو قالي بالحرف الواحد قالي ولدي خداها صغيرة هلبه ومات وخلاها صغيره مانبوش نظلموها خليها تشوف حياتها لو جاها الراجل المناسب..شرطه ان الصغار مايقطعهومش نهائي..
نعيمه:باهي انت علاش ماتقولش الكلام هدا لبنتك..
عبدالسلام:نجس نبضها قبل..
نعيمه هزت راسها بالموافقه وهي تقول:باهي..وربي يقدم اللي فيه الخيره..
عبدالسلام:آمين..وخدي طاسة الشاهي وشرب منها..
🌴🌴🌴🌴🌴
طلعت من فم البوابه..
ماشيه بطريقها لحوش خوها..
حاسه بشي متجمع ع صدرها..
مش عارفه كيف بتخش الحوش ورزان مش فيه..
وصلت فالباب..نزلوا دموعها..
مسحت دموعها وخشت داخل وهي تقول:سعيده..
"تعالي ياغاليه للصاله"..
حولت غاليه شبشبها..
وقعدت تمشي لين وصلت الصاله..
تفاجئت ..
لما شافت حسن مقعمز..
قدمت وقالت:السلام عليكم..
الزوز ردوا عليها :وعليكم السلام..
سعيده:قعمزي خيرك قاعده مصبيه!؟
قعمزت غاليه وهي مستغربه..
حسن:شنو حالك يابنت عمي..
غاليه:الحمد لله شنو حالك انت..
حسن:الحمدلله..
ناضت سعيده وقالت:خل نعدي ندير قهوة..
مشت وغاليه معاها بعيونها وحسن يشوف لغاليه..
عارفها مستغربه ابتسم وقال:غاليه..
شبحتله وقالت:نعم.
تنهد وقال:يابنت عمي اني طايح فورطه كبيرة وماعندي حد يطلع منها من بعد ربي غيرك انتي..
غاليه بإستغراب أكبر وهي تأشر على نفسها:اني!!!؟
حسن ضحك وقال:ايه انتي..
ضيقت عيونها وهي تشوفله ومش فاهمه شي
🍁🍁🍁🍁
ماشيه في الممر متوجه لغرفة الأطباء..
فاتت من حدا زميلتها اللي وقفتها تقول:مروحه نوسه؟
خنساء:ايه تم دوامي..
ملاك بإبتسامه:تمام..سلام..
خنساء ابتسمت وقالت:باي..
ومشت كملت طريقها...
وصلت في الغرفه..
حولت اليونيفورم وحطاته فمكانه..
بعدين خدت شنطتها وبالطوها ومشت طلعت..
وهي ماشيه في الممر لبست البالطو بيها..
مجرد كملت لبسه..
ولت مشيتها بطيئة وهي تشوف فيه جاي من بعيد..
كان كعادته جذاب والنظارات زايدينه النص..
حولهم ..وقعد يشوفلها بإبتسامه..
قلب خنساء رفرف معاها..💗
لما قربوا يوصلوا فبعض..
وقفوا..
حمزة بإبتسامه:مش معطلك عن شي..جيت نشوفك ونروح.
هي ابتسمت بخجل وقالت:مروحه توا..
حمزة:اممم..مانحصلش معاك حتى عشرة دقايق..
خنساء بضحكه:طماع هلبه..
رفع يده وهي مبسوطه وقال:5دقايق ومش منقص ولاتانيه زياده..
ضحكت وقالت:باهي..
ابتسم حمزة وقال:تفضلي يادكتورة..
ابتسمت ومشت وهو معاها وقعدوا يهدرزوا..
لعند ماوصلوا فباب المستشفى..
فاتوا من جنب جماعة الكتيبه المسؤوله عن أمن المستشفى
اللي حاط عينه ع الخنساء فيهم قال بغضب؛من هو ال^%$¥ هدا!؟..
🍁🍁🍁🍁
هاه..شن قولك؟
غاليه وهي متفاجئة:والله ياوخيي ماني عارفه شن نقولك..قصدي انت عارف هي ليش رافضه تعرف أسبابها..وهي مصكرة راسها الحق...
حسن:واني عارف..ولأني عارف طلبت منك تساعديني..نبي منك تخليني نكلمها فالهاتف بس نكلمها نحاول نوضحلها بعض الأمور ونفهمها نحاول نقنعها بس..
غاليه بإبتسامة استغراب:ومن قال ان هي ترضى تكلمك!؟
حسن بضحكه:غاليه!
غاليه ضحكت وقالت:البارقه ياحسن صعب تقنعها بشي هي مش مقتنعه بيه..
حسن:انتي ياغاليه حاولي معاها..حاولي ع الأقل محاولة بس..
غاليه وجعها حسن..وفي نفس الوقت عجبها إصراره حساته يبيها من قلبه..مش مجرد اعجاب تبعاته رغبه..
ابتسمت وقالت:باهي..تو نحاول..
ابتسم حسن وقال:الله يجبر بخاطرك..
غاليه بإبتسامه؛تسلم..
🍁🍁🍁🍁
يدهوروا فشوارع روما..
في ليلة ربيعيه حلوه..الجو فيها بارد بعض الشي..
كان حاضنها ويتمشي هو وياها ويحكيلها عن جياته لإيطاليا وعن اكثر اماكن يحبهم فيها..
رزان:خاطري نعدي للبندقيه ونركب القارب..
عماد:يومين تانيات ونمشوا غادي..
ضحكت وزادت حضناته..
وهو ابتسم..
كانوا ماشيين جنب سياج يطل ع البحر..
فجأة..
قامها فحضنه..
وقعمزها ع السياج وهو محاوطها من ظهرها ويقول:أوووبااا..
هي بضحكه:رد بالك ترخيني..
عماد وهو رافع عيونه العشقانه فعيونها قال:اني نرخيك!؟
ابتسمت بألم..
لما سمعت استفهامه خطر كل شي جارح دارهولها..
كل العذاب اللي عيشها فيه..
كله خطم قدام عيونها لما سمعت استفاهمه...
هو بإستغراب قال:قصدك انتي بجديات تفكري؟!!
تنهدت وقالت:تبي الصراحه..
هو رمش عيونه بسرعه وقال:ايه..
وقلبه كان يدق بقوة خوفا من الكلام اللي حيسمعه
غيرت عيونها عنه و قالت:لعند اللحظه هدي مازلت شاده فقلبي منك..
هو قعد مركز ع عيونها وهي تتكلم..
رزان:اللي عيشتهلي ياعماد خلاني ديما فشك..شاكه..شاكه فقوة حبك وصدقه..ايه صح..كلام الحب والهدايا والمفاجآت وغيره حاجات سمحه وممكن تعبر عن الحب..بس اللي يعبر عن الحب حق..هو الخلاف..المشاكل..الغلط..لو اني او انت غلطنا في بعض غلط بدون قصد..غلط فلحظة غضب..كيف نتصرفو اتجاه بعض!؟..
شبحتله وقالت..اللي درته انت معاي..خلاني..برغم كل اللي نشوف فيه منك توا..خايفه منك..
نظرات عيونه ليها كانت نظرات ندم..واسف..مخلطه بالدموع..
نظرات وجعت قلبها ..شدت وجهها بإيديها وقالت:وخوفي مخليني نبي ندير كل شي يطلع بيدي بش نحافظ عليك ومانغلطش فيك حتى لو بدون قصد..
شد ع ظهرها وقربها ليه وعيونه معلقات فعيونها وهو يقول بعشق:اني اللي بندير كل شي كل شي يطلع بيدي ولامايطلعش بش نمسحه خوفك هدا ونسيك كل شي وجعك مني..
زاد ضمها وهو مركز بنظره ع عيونها وقال:ومانغلطش فيك بكل..ولو غلطت فيك نحاسب نفسي قبل لاانتي تحسابيني..حنحافظ عليك حتى من روحي..ياروح روحي انتي..
هي ابتسمت بعيون مليانات دموع قعدت تمسح ع لحيته وشعره بإيديها وهي تقول:حبيبي انت..
هو رد عليها:عمري انتي..
هي:قلبي انت..
هو:حياتي انتي..
هي:كبيدتي انت..
هو:كلاويا انتي..
ضرباته ع كتفه وهي تضحك قالت:يابارد...
عماد:هههههه..انت خشيتي فالمعلاق معاش عرفت شن نرد عليك..
رزان بزعل مصطنع:معاش بنقولك كلام حلو وخلاص.
عماد بهيام:اني مانبي منك شي توا غير انك تحضنيني بس..
ارتسمت ع وجهها ابتسامه حلوة..
ضماته لحضنها وهي تمسح ع شعره بيد وع ظهره باليد التانيه..
وهو مغمض عيونه فحضنها وناسي الدنيا ومافيها💖
💕💕💕💕💕
واهو شربنا الشاهي قدام الساحل يانور خانم..
نور بضحكه حماسيه:تعرف مش مصدقه..واااو..وع الطبيعه مازال أحلى..
ابتسم مالك وهو يتأمل فيها..
نور شربت من الشاهي بعدين حطاته ع الطاوله وقالت وهي تعد ع صوابعها:مازال نبي نفطر الصبح برا ع الكعك ولبن العيران...وناكلوا غزل البنات..ونمشوا للملاهي..ايه ونركب التاكسي متاع البحر متاعهم اللي يقولوله العبارة..فتحت ايديها وقالت..ويامازاااال فخاطري..
ضحك مالك بعدين رشف من الشاهي وقال:اكتبيهم في قائمة ونشوفوا شن نقدروا نديروا منهم فهالأسبوع..
ابتسمت بحماس وقالت: Ok..💕
💕💕💕💕
🍁🍁🍁🍁
في المربوعه..
كان مصكر ع روحه ويتكلم بالتليفون..
عبدالسلام بعصبيه:لايمكن نقبل شي زي هدا ياخالد وانت تعرفني كويس لاقبل ولاتوا نرضى بالعوج حطوني رئيس غادي بيمشوا بالخطه اللي اني درتها غير هكي لا...............
..............ضيق عيونه وقال بتهكم..والله اني ماكنتش مع الثورة وضد النظام السابق بش نسلم امري وامر أمن الناس لنماذج مايفرقوش عن القذافي فشي.................يديروا اللي يديروه مانيش خايف من حد.............صحيت ياخالد صحيت تصبح ع خير..
وصكر وهو يقول بغضب:كمشة قبط لعبوا فأم البلاد..
ومشي طول طلع من المربوعه..
توجه لدار النوم وهو مايعرفش ان دلال كانت فالصاله مقعمزة فمصلاها وسمعت بعض الكلام وفهمت اللي صار..
دلال بخوف:ياربي لطفك!
🌴🌴🌴🌴🌴
خش للقطعه بسيارته مروح من عمله..
درس السيارة ونزل..
صكر الباب ومشي وهو يدندن..
انتي باغيه واحد يكون دموا بارد..
ساكت ديما جامد تغلطي مايدويش..
اول ماوصل فالدروج ..
سمع صوت خوه يقول
"تووفييق"
ضحك وقال:رررمزيي..
ضحك رمزي ونزله وصل فيه و خداه من ذراعه وقال:تعال نبيك..
توفيق استغرب ولف ومشي مع خوه..
مشوا هما الزوز مسافه لاباس بيها وهما ساكتين..
لعند ماوصلوا للجرف..
توفيق:خير إن شاء الله حسك شغلتني..
رمزي ابتسم وقال:خير خير اطمن..
ابتسم توفيق بإستغراب..
رمزي بتضييقة عيون:تعال هنى..تو مش قتلي قبل انك بدير عرسك بعد نطلع!؟
تلاشت ابتسامة توفيق وغير عيونه عن خوه للوادي بدون مايرد...
رمزي:صاير مشاكل بينك وبين خطيبتك؟.
حركت راسه ايمين ويسار بالنفي ..
رمزي:باهي خيرك هكي مسكت !!؟
توفيق:مازال!؟.
رمزي:شن هو اللي مازال!؟ اصلا توقعتك ادير عرسك مع اختك..للأسف ماصارش اللي توقعته..قت فالعرس ولابعده يحدد...لكن شي..مازلت مسكت..قولي ليش!؟
تنهد بعدين شبحله وقال:مش طايب عليا نتزوج وانت مازلت
رمزي بضحكه:باهي كان ربي مش كاتبلي نتزوج الا بعد عشره سنين تقعد تراجي عشرة سنين!!؟
نزل عيونه لوطا وسكت
رمزي:اسمع جاي
رفع عيونه فيه
رمزي:عجل بفرحك سادك مراجاه ليك فوق العام شاد بنت الناس..وبعدين اني خاطري فالأعراس واجد..ماتعرفش قديش تمنيت واني فالحبس نحضر كل العراس اللي فاتوني..ضربه ع ظهره وقال.. مفروض تعوض خوك ع اللي فاته ياتافه..
ضحك توفيق وهو يتحسس فظهره..
رمزي ضحك بعدين قال:خلي عرسك قبل رمضان ع الأقل امي تلقى من يونسها فغيبة اختك..
ابتسم توفيق بعدين هز راسه بالموافقه..
ورمزي ابتسم وشبح للوادي وقال:خاطري نديروا زردة اليومين الجايات..
توفيق:والله حتى اني...
رمزي:تمام نكلموا الشباب ونسقوا مع بعض..
توفيق:تمام..
سكتوا شويه وهما يشوفوا للوادي..
بعدين غير توفيق نظره لخوه وهو يتأمل فيه ويفكر فحاله..
مازال رمزي مش قادر يتأقلم ع الوضع وانه قاعد يحاول يخش مع اللي فالحياة عادي ويرجع يعيشها زي قبل ..
بس هالشي صعب..
بالنسبه لرمزي الحياة وقفت خمسه سنين..
وسنين الحبس توقف فيهم الحياة عند المحبوس لكن الحياة حقيقة مازال ماشية وماتوقف عند حد..
شبح رمزي لخوه وقال:خيرك تشبحلي هكي!؟
توفيق:ماشية امورك مع خالي حسن..
رمزي:تمام..الحمد لله..
توفيق هز راسه وقعد ساكت..
ومن داخله متأكد ان رمزي مش مرتاح فالخدمه غادي..
حاس ان رمزي زي التايه مش عارف شن يدير ولا كيف يتصرف..
قاعد يخطي فخطوات عشوائية مش محسوبه..
لأنه فعلا رمزي ضايع ومش عارف شن يدير..
رمزي:هي تعال للحوش صقع..
ابتسم توفيق وقال:ايه سميتري..
ولفوا مشوا مع بعض بطريقهم للحوش وهما يهدرزوا..
🍁🍁🍁🍁
انفتح باب غرفة الفندق..
خشت هي بعدين هو خش وصكر الباب..
رزان:كرعيا طاحن ونعسااانه موت اول ما بنوصل فالسرير بنطيح عليه..
ضحك وقال:اني بنصلي العشي ونرقد طول..
وصلوا فالدار..
رزان حولت كندرتها وانطرحت ع السرير بدون ماتحول حتى وشاحها
وعماد ضحك عليها بعدين مشي للحمام
شويه وطلع..
صلى..
بعدين طلع من الدار ..
خدي شيشة ميه محطوطه برا ع الطاوله شرب منها..
وخداها معاه للدار..
حطها ع الكامدينو..
خش للسرير...
ساوا لرزان رقدتها..
وخداها فحضنه..
وقعد يفكر فالكلام اللي صار بينه وبينها اليوم...
كان كلام ثقيل عليه ماقدرش يتعداه..
انوجع هلبه لما عرف انه مصدر قلق وخوف لحبيبته اللي ولت زوجته ومسؤوله منه..
من المفروض يكون هو مصدر امانها مش خوفها..
وراجل زي عماد..
لايمكن يقبل يكون لزوجته غير مصدر أمان ليها وبس..
زاد حضنها وغمض عيونه..
وشويه..جاه النوم ورقد..
🌴🌴🌴🌴
الساعه 12:30..
في المشتشفى..
غير يالبارقه اني اسمعي منه بس..
البارقه بملل:واااك ياغاليه طلعتي عش أكثر منه..
عطتها التليفون وقالت:هي كلها مكالمه وحده بس يقولك فيها اللي عنده وبعدها خلاص..
البارقه :إن شاء الله خلاص إن شاء الله..
خدت التليفون من غاليه شافاته لقت رقم حسن قدامها..
غاليه بضحكه:اني بنعدي اتصلي بيه..
البارقه :عدي خيرلك عدي..
ضحكت غاليه ومشت..
اما هي بالسيف ضربت ع الرقم..
وحطت التليفون ع وذنها..
نادى مرة وحده وانفتح الخط..
"ايوه"..
هي تلخبطت مرة وحده لما سمعت صوته..
"دام مارد حد معناها بنت عمي دارت جهدها والزايد"
البارقه:وع الفاضي والله ع خاطرها هي رضيت نكلمك بش بنقولك كلمتين بس ياولد الناس افهم اني مانبيكش..مانبييش.
حسن:السبب..
البارقه:مانبي نقول لحد كلام جارح فوجهه بس انت اصريت وتحمل معليش..لأنك مشهور فالقبيله كلها بإسم حسن متاع الطاسه..لأن مشاكلك وخشانك فالحرام الناس كلها دوت بيهن ومافيش هل عقلهم فراسهم عطوك بنتهم..هو عمك نفسه مابي يعطيك بناته..وحتى الغافله اللي خديتها قعدت القبيله كلها تدوي بمعاملتك الحقيرة ليها وضربك واهاناتك لين في الأخير طلقتها والناس كلها تقول نفذت بجلدها..قصدي بعد هدى كله تبيني نرضى بيك!؟.
حسن :كملتي!؟
البارقه:هو الحق مازال ياما فخاطري لكن هكي سادك..
حسن:اممم..اني الغالط من الأول لما اصريت عليك نحسابك مراة شخصيتها قويه وكلامها من عقلها..مش من قالوا الناس وحطوا الناس..كانك ع الناس ياما يدووا ع البنادم الباهي واللي مش باهي..وحتى اللي ماعنده عيب يطلعوا فيه عيب بيش يدووا عليه...وحتى انتي يدووا عليك..مانكش سالمه من لساناتهم..لكن لما تخلي كلام الناس هو اللي يمشيك وتحكمي ع العالم من هدى قال صفته وهداك قال نعته معناها انتي وحده تمشي بودانها بلاشخصية..وباهي اللي عرفت هكي من الأول..
وصكر عليها..
هي رمشت عيونها بصدمه..
بعدين نزلت التليفون من ع ودنها وقالت:طلع يعرف يدوي ويحلل شخصيات..ضيقت عيونها وقالت..مالا ليش يقولوا عنه جاهل ومتخلف!!؟...بعدين التافه هدى كيف يقول علي اني بلاشخصيه!!..رفعت حواجبها وقالت..اني اصلا كيف سكتله!!..
غمضت عيونها بعدين فتحتهم وهي تحاول تتمالك أعصابها..
ولفت ومشت تقول :الحق فيا اني اللي خديت بخاطر غاليه...
🍁🍁🍁🍁
خشت للقسم وهي متوجهه لمكتبه..
كانت لابسه بلوزة غليطه لنوها ازرق وطولها للركبه ع سروال ابيض كاجوال...ووشاح أحمر..
وشنطه سوداء بدون يد...وفالرجلين كندرة سودا فلات..
وصلت في المكتب وطقت..
"تفضل"..
فتحاته..
وشافت استاذة مقعمزة ع مكتب مقابل مكتب فاضي..
ابتسمت وسألت:استاذ ضو جي!؟
الاستاذة:الأستاذ ضو ولا عنده مكتب فوق بروحه..واظني اليوم مش جاي..
دلال:اهااا..تمام شكرا..
الأستاذه :العفو..
مشت دلال بعد ماصكرت الباب وهي مضايقه هلبه لان هاليوم حيفوت عليها وهي تأنب فنفسها وتلوم فيها..
🍃🍃🍃
وعدا يوم..
واثنين ..
وتلاته..
ودلال يوميا تمشي غادي لكن بدون فايده..
ماكانتش تلقى فيه لين فالأخير قاللها زميل ليه انه مسافر يحضر مؤتمر برا..
🍁🍁🍁
وكذلك هالأيام كان هاديه جدا..
تجي وتعدي عاديه زي أي يوم روتيني هادي..
💕💕💕
اما الوضع عند عرسانا كان غير..
نور ومالك قاعدين يستمعتوا بوقتهم وهما ماشيين ع اللي كتباته نور في القائمه..
واجواهم كلها حب وفرح وسعاده..
💖بس مافيش سعاده فهاللحظه..
زي السعاده اللي حتحل ع قلب عماد..
لما خش لغرفتهم في الفندق بعد ماكان لوطا يوصي ع عشي خاص طلباته رزان..
خش ينادي..
"رزان...رزونتي"..
ردت عليه..
"فالدار فالدار"..
عماد بضحكه:عارفك فالدار ياشفشفه ماعندك وين تقعمزي ..
وصل فالدار..
وكيف جاي ببخش ..
وقف فمكانه..
لما شافها بصورة عمره ماراها عليها قبل..
كانت صورة فيها كل معاني الأنوثه والجمال..
وهي لابسة روب الدخول..
وجايبه شعرها ع جنب..
ومتزينه احلى زينه...
ابتسم ابتسامه جانيبه ساحره..
مع نظرات عيونه اللي كلها وعشق وشوق..
قدملها..
وهي كل مايقدم كان قلبها يزيد فدقاته..
وصل فيها..
ضمها بقوة وهو يقول:ااااه ياسموحتي ااااه...الليله بس تعرفي عماد قداش عانا وشن عاش وهو بعيد عنك ويتعذب من شوقه ليك ياعمري..
رزان بهيام:نحبك..
بعدها شويه..
وحط عينه فعينها وقال:عاوديها!..
رزان وهي تشوف فعيونه:نحبك💓
مجرد نطقت هالكلمه..
عماد بدي ينتقم انتقام من الشوق ...
كان شغوف ملهوف ..متولع...
وكأنه اعصار من المشاعر ...اللي خدت رزان لعالم ماتتمناش تطلع منه..
الزوز فلحظة الوصل هادي كانوا يذكروا قداش عانوا وتعذبوا ..
قداش انحرقوا بنار عشقهم وشوقهم..
والفراق اللي قهرهم قهر..
💓فهديكا الليله قعدوا للصبح وهما ينتقموا من الماضي..
ويزيدوا يغرقوا فبعضهم اكثر واكثر💓
🌴🌴🌴🌴
بس عاد مش كل الناس صبحهم زي صبح رزان وعماد..
🍁كان مقعمز يفطر لما رن تليفونه..
شافه..لقي خوه خليفه يتصل..
فتح الخط ورد..
حسن ؛صباح الخير..
خليفه بهلع:تي اين خير ياراجل اين خير..محلاتك كلهن متشوش فيهن النار..
كاد قلبه يوقف لما سمع اللي سمعه من خوه وقال بصوت مرعوش:شن تقول انت!؟.
خليفه:تعال بسرعه تعال..وصكر عليه..
وخلاه في صدمه..
رزقه كله راح فيوم وليله..
شيء لايمكن يستوعبه بسهوله لما يسمعه..
ولما استوعب..
طول ناض وطلع يجري من الحوش..
...يتبع....
