#العشق_المتمرد "عندما يزهر الليمون"
#جمان_فريد
الجزء 138 القسم الثالث..تكمله
⏳..
الساعه 11:00ليلا...
طلع من دار النوم وصكر الباب بهدوء..
حط ايديه فجيوب التوته...
بعدين مشي ..
قعد يدور في الحوش وهو يخمم...
مشي للصاله وطلع منها وخش الصالون وطلع منه ومشي للمربوعه وطلع منها بعدين ولى مرة تانيه ومشي لدار المعيشه..
خش قعمز فيها...
قعدت يدور بعيونه فيها وهو مضايق ومستوحش مش قادر يتخيل شكل الحياة من غيرهم الحوش حيفضى من بعدهم..
ناض من مكانه ومش طلع من الدار...
وتوجه لدار آسيا..
فتح الباب وخش لقاها ومتغطيه كويس..
قربلها وحط يده ع جبهتها بيشوف كان عنده حرارة ولافيها شي عادته مايخليش فيها بالذات وين يقرب الشتي...
لما تأكد انها كويسه..مشي طلع من دارها وصكر الباب وتوجه لدار الاولاد.
فتحها بهدوء وخش لقاهم راقدين..
لكن جواد غطاه كان محول شويه..
قربله وغطاه كويس..
بعدين شاف حرارته وبعدها حرارة خوه..
وبعدهم حرارة خالهم..التلاته مافيهمش شي..
لف ومشي طلع من الدار..
لما صكر الباب دار صوت نوض جواد..
شبح للباب شويه بعدين قال بصوت ناعس:جدي..
ورجع غمض عيونه ورقد...
🌴🌴🌴🌴🌴
تاني يوم...
الساعه 10:00صباحا..
"وين الطاقيه ياسعيدة"..
سعيده مشت وقفت فم باب الكوجينه وقالت:فالقجر ياميلاد فالقجر الاول متاع الزيانه ياميلاد دور زين تربح...
ميلاد من الدار:مراة تانيه فالحه توتي حوايج راجلها قبل كل شي وين تنوض الصبح..
سعيده بحمقه:مراة تانيه هدي اللي تخدم عليها انت..
هو بعد لبس الطاقيه ضحك وطلعلها بيرد عليها يجي قدامه الباب الخلفي وفي من واقف فيه...
ميلاد:عن شكلك مرة وحده ياكلب..
التفتت سعيده وضحكت بصدمه بعدين مشت تجري وهي تقول "رمزي"..
وصلت فيه..
هو ضمها وهي حضناته بقوة..
ميلاد وهو جايهم؛امس قريب متت واني نفكر فيك نقول هدى خير مايرد ع هاتفه خيره مااتصل اليوم والله عبيت فهاتفي 70جني رصيد بيش نهدرز عليك براحتي
بعدوا هو وامه عن بعض وجي لبوه وهو يقول:سامحني ياسيدي نبي نديرها مفاجئة..
ميلاد ضربه بوكس ع صدره وقال:مانبولك مفاجأت..
ضحك رمزي وحضنه وكب ع راسه..
وميلاد طبطب ع ظهره وهو مبتسم...
🍁🍁🍁🍁
ايوااه ايوااه عريس ياشيخ ايمن..
ايمن حط طاسة الحليب والشاهي قدام عمه وقال:وانت؟
عمار خدي الطاسه وقال:نا..بإذن الله ندير عرسي معاك..
ايمن شبحله وهو متفاجأ..
عمار بضحكه؛اها مال شنو..بندير عرس ومش اي عرس..
ايمن بضحكه:ياودي انت إدير كل شي
كلي عمار كسرة الخبزة وهو مبتسم برفعة حاجب ويشبح لأيمن ع جنب..
وايمن يضحك بعدين قال:ايه حق امتى سباق جواد؟..
ابتسم وحرك سبابته حركه دائريه وهو ياكل..
ايمن:غدوة..
عمار هز راسه بإيجاب..
ايمن ابتسم وقال:ربي يجعل الفوز من نصيبه..
ابتسم عمار وبعد بلع قال:ان شاء الله...
🍃🍃🍃
وفات هاليوم...
وجي اليوم اللي بعده....
كان هاليوم مهم هلبه لعمار من ناحيتين..
وكذلك لدلال نفس الشي...
🍁كانوا مع بعض في صفوف المتفرجين...
بينه وبينها مسافه..هو وياها يتمنوها تختفي ويولوا مع بعض زي ماكانوا قبل..
روح في جسدين..💖
💕بدت المسابقه اللي مشارك فيها ولدهم وكانت مسابقة قفز حواجز فمساحه محدوده..
لما جي دور جواد..
الزوز كانوا يتفرجوا عليه بلهفه وتوتر..
وعمار كان مركز عليه هلبه..
اما جده فكان يشوفله وهو مربع ايديه..
كان مبتسم بثقة ومتأكد ان حفيده حيفوز...
وفعلا..
كان جواد قد ثقة جده...
ابهر بوه...وفرح امه...
وهو فرح هلبه وافتخر بنفسه اللي ظفر اليوم بالفوز فوجود الفارس الكبير والده..
☘☘☘☘
عمار بإبتسامه:انت ابهرتني مش عجبتني وبس..
ابتسم جواد بإحراج..
عمار:لا..ارفع راسك وخليك فرحان بروحك ومعتز بيها..انت مش عادي بكل..
الكلام اللي يسمع فيه من بوه زاد فرحه وخلا ثقته بنفسه في اعلى درجاتها...
جواد:خل بنمشي لأمي وجدي..
عمار هز راسه وهو مبتسم وقعد معاه بعيونه لين وصل في جده وامه..
شاف عبدالسلام كيف باس ع راسه..وجواد حتى هو كيف باس ع راسه جده..
حس بالإمتنان اتجاه عبدالسلام..اللي رباله صغاره احسن تربيه..
بعدين شبح لأمهم لقاها تشوفله..
لما شبحلها غيرت عيونها لولدها..
هو ضحك وحرك راسه يمين ويسار...
🍀شويه...
وطلعوا وركبوا سيارتهم..
روح عبد السلام وعمار وراه اللي ماشي ياخد الرد على طلبه..
°°°°°°°°°°°°°°°°°°°°°▪▪▪▪▪▪▪▪▪▪▪▪
في المربوعه دخلانيه..
كانوا مقعمزين..
عبدالسلام ونعيمه..
وعمار ودلال والصغار...
جواد حدا امه..
ومعمر واسيا حدا بوهم..
ومجد جنب بوه...
دلال وهي تشوف لبوها:من بعد رضاك بابا اني موافقه..
ابتسموا عمار والصغار..
دلال:لكن مانبي شي يصير توا قبل ما امي تجيب
نعيمه ابتسمت ونزلت راسها لوطا..
عمار شبح لعبدالسلام وقال:ونا هدى اللي نبي نتكلم فيه..العرس بإذن الله حيكون فأخر اسبوع من12
شبحوله التلاته بإستغراب ونعيمه قالت:عرس!
عمار:ايه عرس ونبي نديره كبير..انتم ماعليكم فشي نا نتكفل بكل شي واعتبروه تكفير مني ع غلطتي معاكم ومعاها..
شبح عبدالسلام لدلال..
ودلال نزلت عيونها لوطا...
رجع شاف لعمار وقال:ندير لبنتي عرس خير من الأول بإذن الله..
ابتسم عمار بفرح وقال:ع بركة الله..
ابتسمت دلال بخجل...
وزع نظره عبدالسلام عليها وع الصغار بعدين قال:ع حسب مافهمت منك انك مش حتقعد في ليبيا..
عمار هز راسه بآيجاب..
عبدالسلام:كيف بيصير في قراية الصغار..
شبحلهم عمار وقال:تنحل بإذن الله مش صعبه..
هز عبدالسلام راسه وهو مبتسم وعيونه لمعت فيهم الدمعه.
وعيون حفيده جواد عليه...
فهاللحظه جواد فهم واستوعب انه حيخلي الحوش اللي كبر فيه وتربى فيه..
..اول مرة يركب فيها خيل كان جده معاه..
اول ما خش للمدرسه جده كان معاه..
جده اللي رباه..كبره..قراه..ولما يمرض يقعد فوق راسه لين يصح..
جده اللي كان ديما يشجع فيه ويدعم فيه...لين خلاه يحقق هلبه انجازات في سن صغير...
جده اللي قدر يعبي فراغ خلاه بوهم...
فهاللحظه بس..جواد...حس وعرف الفرق الكبير فالشعور اللي يحسه اتجاه بوه الحقيقي...واتجاه بوه المعنوي....
شعور الأبوة...حسه بمعنى الكلمه مع جده عبد السلام..
شبح لبوه وقال:نبي نقول حاجه...
شبحوله كلهم..
عمار:قول ولدي..
ودلال تشوف لولدها بإستغراب..
جواد:نبي نقعد هني مع جدي وحناي..
كلهم انصدموا..
وبالأخص عمار وعبدالسلام..
جواد شبح لجده وقال:كان يخليني جدي بنقعد معاهم مانبيش نمشي مع حد..
دلال وعيونها دمعوا:كيف جواد ماما!!؟
عمار يشبحله وبس...
جواد شبح لأمه وقال:اني نبي جدي ياامي..
زادوا انصدموا عمار وعبدالسلام..
ومجد بيطير من الفرحه..
اسيا:ماتبيش بابا؟
جواد شبحلها وقال:نبيه بوي لكن حتى جدي نبيه..جدي يحبنا هلبه ودار ع خاطرنا هلبه حاجات نبي نقعد معاه..
عبدالسلام بصدمه؛جواد...ولدي!
جواد:تخليني جدي عندكم؟
نعيمه شبحت لعبدالسلام ودموعها ينزلوا...
عبدالسلام وهو يشبحله بلع ريقه وقال:اكيد ياجدي نخليك مالا شنو..لكن بوك وامك هما اللي يقرروا ولدي..
دلال شبحت لعمار ودموعها تنزل...
عمار كان منزل عيونه لوطا ويفكر...
جواد شبحله وقال:تخلوني بوي؟
عمار قام راسه وشبح لدلال بعدين قال:ماعندي مانقول ياولدي..فعلا جدكم احق بيكم مني...
دلال ابتسمت من بين دموعها..
عمار:نخليك لكن عندي شرط..
جواد:شرط شنو؟.
عمار:في الصيف تقعد معانا حتى شهر...حني نجوا هنى ولاانت تجينا ويجيبك واحد من ولاد عمتك..طبعا بعد اذن امه وجده..
عبدالسلام شبح لدلاال وقال؛شنو بابا؟
دلال رشفت وقالت:مانبيش نخلي ولدي بعيد عليا..لكن مادام معاكم يابابا اني بنقبل فوق من نفسي بنقبل ع خاطره وخاطرك وخاطر مجد..
مجد نزل راسه لوطا وهو في قمة الفرح..
عبدالسلام شبح لجواد وقال:تعالى..
ناض جواد مشي لجده..
وين وصل فيه ضمه عبدالسلام بقوة وباس راسه..
بعدين غطا بإيديه عيونه وقعد يبكي..
دلال ناضت ومشت طلعت من حداهم وهي تبكي..
ونعيمه تشوفلهم وتبكي..
واسيا حتى هي تأثرت وبان ع وجهها الحزن...
اما عمار فكان يشوفلهم وهو مبتسم ابتسامة رضا ممزوجه بالألم...
~~~~~~~~~~
