#العشق_المتمرد "عندما يزهر الليمون"
#جمان_فريد
الجزء 124 القسم الثاني
🌟...
••••••••قبل يومان•••••••••
الساعه 8:30صباحا..
كان راقد فدار بروحه الروشن مفتوح عليه وهو مستغرق فالنوم..
شبه الليله اللي قبلها مارقدش من عياط بناته وامهم معاهم سيبلهم دار النوم وطلع للدار التانيه رقد فيها..
فاق من نومه وهو مفزوع ع صوت نغمة اتصال صادرة من هاتفه اللي كان محطوط ورا المخدة..
قعد يتلاحق فيه بيده لين شده..
رقد ع ظهره ورفع تليفونه فوق شويه مقابل عيونه اللي كانوا ضيقات..
قال بإستغراب وبصوت ناعس:محمود!!؟..شن يبي ع الصبح!!
تنهد..
بعدين فتح الخط وحطه ع وذنه وقال:امم نعم..
محمود:صباح الخير..
الصديق:صباح الخير..خيرك متصل توا..
ضحك محمود وقال:خير اكيد..غير بنقولك اليوم جاي عمك من العجيلات لحوش خوك شعبان كلنا بنعدوا نتغدوا غادي..
الصديق مسح وجهه بيده بعدين قال:شن فكره بينا تو؟..
محمود ابتسم:اهو تفكرنا وجانا..لازم تجي ياصديق راهو..
الصديق:باهي باهي..اخطم عليا كانهدا..
محمود:باهي..هي بالسلامه تو..
الصديق:بالسلامه..
صكر...بعدين غمض عيونه وقال:شن خطرنا عليه!!..
رد تليفونه لمكانه..
بعدين حط ذراعه ع عيونه وكمل نومه..
🍁🍁🍁🍁
الساعه 9:00صباحا..
مقعمزة ع سريرها وشاده فيدها صورته
ودموعها ينزلوا من خدودها سيل..
وهي تذكر في الحديث اللي صار بينها وبين امها وبوها..
⚡فلاش باك..
بنتي مافي حد جابرك ع شي لكن لازم تعرفي انك بحاجه لوجود راجل فحياتك يابنتي مش حتقعدي بروحك لأخر عمرك!
دلال بدموع:اني مش بروحي بابا اني عندي صغاري..
نعيمه:صغارك سيورهم يكبروا واللي هدا بيلهى فعمره وتقعدي انتي بروحك!..خلينا من بعدين..خلينا فتوا راني لااني ولابوك دايمينلك يابنتي ماحد عارف الدنيا شن داسه لازم بنتي تتزوجي ضروري ليك ولصغارك..
دلال بلعت ريقها وقالت:اني مانبيش مانبيش..
نعيمه:كيف ماتبيش ياماما لأمتى بتقعدي هكي قوليلي راك مازلتي صغيره حرام عليك راهو..
نزلوا دموع دلال وهي تقول:من الأخير قولولي كان معاش تقدروا ع مسؤوليتنا اني وصغاري خل ناخدهم ونمشوا نقعدوا مع جدودهم..
نعيمه بنفاد صبر:أفففف يابنتي منك اففف..
عبدالسلام:ماتضغطيش عليها يانعيمه..شبح لبنته وقال..هي عارفه كويس ان حني مش قالقين منها لاهي ولاصغارها وانها تقول هكي بلعاني بش نسكروا الموضوع...
دلال نزلت عيونها لإيديها اللي كانت تفرك فيهم ببعض..
عبدالسلام:تمام بنتي ع راحتك زي ماتبي...مانيش جابرك ع شي..لكن...زيدي فكري..مش فالموضوع هدا..لا..فكري فحياتك بشكل عام....فكري كويس بنتي..
⚡الوقت الحاضر..
بدت تغني بصوت نبرته باكيه..
علقت عيني..
فالجايين..
وقلت اكيد الحبيب اولهم..وصلوا ومالقيت الحبيب معاهم..
كذبت عيني...كذبت عيني.
وعلقت عيني..فالماشيين لقيت الحبيب اولهم..
تميت نرفع فالتراب وراهم كذبت عيني..
وغاب نور عيني..
برا..
اسيا كانت حاضنه حناها وتقول:خيرها ماما حنينه؟
نعيمه بحزن:راسها يوجع فيها ياحنينه..
آسيا:عطيها بنادول..
نعيمه:باهي تو بعدين نعطيها..
شويه خش مجد ومعاه ولاد اخته وهو يقول:مالك خش الزنقه امي..
فالدار..
مازال تغني بنبرة باكيه.
🍁في الجايين مغيب آاااه...مغيب
وفي الماشيين أولهم آااه...أولهم...
آااه...مني هارب...تميت نتبع فيه...مني هارب..
آااه تميت نتبع فيه...آااه مني هارب ...
رشفت وكملت...
فجرته درت الطريق مسارب...
ياويلي آاااه تميت نتبع فيه ...
قطع عليها صوت امها وهي تقول:دلال بنتي..
شبحتلها ومسحت دموعها وقالت:نعم..
نعيمه : بنتي اختك وراجلها قريب يوصلوا نوضي اغسلي وجهك ماما هي واستقبلي اختك..
دلال : حاضر...
تنهدت نعيمه بألم وطلعت من حداها...
اما هي ناضت صكرت باب الدار...اتكت براسها ع الباب وانهارت بالبكي....
دلال ببكي: آاااااه يااااربي اااااه صبرني ياااارب صبرني بنموت من غيره يارب 💔
🌴🌴🌴🌴🌴
زينب بتجي غدوة..ونعيمه العشيه هي وكفايه..
حميده:باهي وحميد شن صار فيه..
غاليه:حميد بيجي نهار الإثنين..
فاطمه:اسمعن من توا اختارن من بيعدي للكسوة مش كلكن بتعدن راهو..
غاليه:خلي يجن البنات كلهن وبعدين نشوفوا..
حميده:ماقالوش من بيعدي ومن بيقعد من خالاته..
فاطمه:بتعدي عزيزة بس..ومن نساوين خواله مرت خليفه..
حميده تبدلت ملامح وجهها للإمتعاض..
غاليه:مشكله نساوين ولادك لمن بتقولي عدي ولمن بتقولي اقعدي..
حميده بضحكه:نديروا قرعه..
غاليه بضحكه:مبردك..
فاطمه:اني نختار من تعدي منهن خل يجن كلهن وتو نقول من هي اللي تعدي..
حميده وغاليه شبحوا لبعض وهما رافعات حواجبهم ومبتسمات بمفاجأة..
🍁🍁🍁🍁
الساعه 11:00صباحا..
طلعوا من قاعة المحاضرات هي وصاحبتها بعد ماكانوا يديروا في الإمتحان ماقبل الأخير..
رفقه:قراية الهم هادي..غير امتى يجي غدوة ونفتك..
صاحبتها :سعدودك اول يوم عطله عندكم عرس..
ضحكت رفقه وقالت:قداش متلهفتله..
ابتسمت صاحبتها..
طلعوا للباحه متاع الكليه..
وكملوا طريقهم وهما يهدرزوا..
صاحبتها:هههههههه..جووو
رفقه:هههههههه...
هدت صاحبتها ضحك وهي مضيقه عيونها ومركزة بنظرها ع جهة محدده وقالت:رفقه مش هداكا مروان
رفقه وقفت فمكانها وشبحت وين ماتشبح صاحبتها..
لقت مروان واقف وحواليه بنات يكلموا فيه ومنهم المبتسمه بإعجاب ومنهم اللي تضحك..
تنهدت بملل بعدين قالت:هي تعالي نمشوا للكافتيريا جعانه..
صاحبتها :تمام..
كملوا الزوز طريقهم..
ومروان ركز عليهم..صرف البنات بطريقة ما وتبعهم طول..
رفقه:الزمالطو الأسود يمشي مع كل شي نفكر نشري منه..
صاحبتها:حلو ومع الألوان الغامقه يزيد حلاوة..
رفقه بإبتسامه:صح..
"رفقه"
"رفقه اوقفي"
صاحبتها:مروان يارفقه..
رفقه بتذمر:اففف..
وقفت ..
صاحبتها:سابقاتك..ومشت كملت طريقها..
ومروان طول جي وقف قدامها..
مروان:تسمعي فيا وماتبيش توقفي!
رفقه:شن تبي مروان..
مروان رفع حواجبه وقعد ساكت..
رفقه بإنزعاج:قول شن عندك مروان ماعنديش وقت ساعه ونروح..
مروان هز راسه وهو يقول:تمام..تعالي نقعمزوا ..
رفقه:مروان نختصر عليك..
رفع حاجبه..
رفقه:مروان خلاص..خلاص يامروان انسى زي مااني نسيت..طلعني من راسك..لو شن ادير يامروان مستحيل نوليلك مستحيل..بجديات مروان..والله معاد ليك فقلبي حاجه صدقني
مروان تهكما:امممم..لا الباين المرة هادي حق في حد تاني خدي مكاني
رفقه غيرت عيونها عنه ومابتش ترد
مروان:تمام..تمام يارفقه...وسعلها وقال..بري لصاحبتك
هي مشت طول بدون ماتشبحله حتى الشبح..
هو قعد يتبع فيها بعيونه المليانه غضب ودموع ويقول بتوعد:باهي..تو تشوفي..
ومشي بطريقه لخارج الكليه وهو يغلي غلي من الغضب والغيره..
🌴🌴🌴🌴
الساعه 1:00ظهرا..
ومنين طلع عمك هدى؟..
الصديق وهو يلبس فشبشبه:ليه عمر عايش فلعجيلات.حياته كلها غادي..
قعدت تشوفله شويه بعدين قربت منه وقالت:يعني توا انت بتغدا فحوش خوك..
شبحلها شويه..
حس وكأنه صعقه كهربائيه صابت راسه خلاته يشوف قدامه ضي اشبه بضي البرق..لحظات واختفي..
ضيق عيونه بعدين فتحهم ع وسعهم غيرهم عنها وقال:ايه..
والتفت للباب وفتحه وطلع وصكره وراه..
حليمه برفعة حاجب:انظر شن وراها قصة عمه هدي..اكيد ورث ولاحاجه كيف هدي...
يلاا سيوره يبان..
سمعت أصوات بناتها الزوز يبكوا قالت:اعوذ بالله منكن ومن اللي يضنيكن..
ومشتلهم طول وهي تصيح:عطييكن مايرفعكن عن شبح وجهي..
برا..
وصل في الباب البراني..
فتحه..وطلع..
تفاجأ لما شاف زوز من خوته فسيارة خوه محمود..
صكر الباب وتوجه للسيارة..
وجي عند الباب الخلفي..
فتحه وركب وهو يقول:السلام عليكم..
ردوا عليه السلام..
وتحرك محمود طول...
🍁🍁🍁🍁
حطت صفرة الغدي وهي تقول:يمييي..غااليه هي تعالن تغدن..
شبحت لبنتها وقالت..سيبي الشقفه وتعالي لغداك..
تأففت حنين وحطت ايبادها ع تركينه وزحفت ع ركابها وقعمزت جنب امها..شبحت للكفته وقالت..تهبل هدي ماما..
حميده:ماتمدي يدك ع شي لين يجن خالتك وحناك..
شويه..
وخشت الحاجه فاطمه..
ووراها غاليه..
واللي هادي قعمزت فمكان..
فاطمه:بيديروا كسوة كبيرة لبنت برقه..
غاليه:صار بيديروها!
فاطمه:بكري وين عديت لحوش عمك ريتها فسوابيت محطوطه فوحده من الديار..
حميده:حسن زعمه ولاامه وخواته!؟
غاليه بضحكه:حسن متأكده..
ضحكت حميده..
اما فاطمه خدت كاشيكها وبدت تاكل..
شافت الكفته وقالت..راحت في طيابك بنه سمحه واجد ياحميده..
حميده برفعة حاجب:توا بس يمي!؟
فاطمه:ايه توا بس..قبل كانت نص نص..
غاليه بضحكه:امك ماتعرف تجامل..
حميده بضحكه:المهم توا عجبها طيابي وشكلي بنفوتك ياغاليه خانوم..
غاليه :تبيلك واااااااجد..
حميده:باهي تو نشوفوا..
فاطمه:خلاص تغدن واسكتن..
ضحكت حنين.
وهما شدوا ضحكتهم وبدوا ياكلوا..
🍁🍁🍁🍁
ف الطريق..
كانوا خوته مقعمزين فالسيارة ع أعصابهم..
اللي فجنبه مرة مرة يشوفله..
ومحمود كذلك مرة مرة يشوفله من مراية السيارة..
وهو كان عادي جدا..
يتبادلوا في أطراف الحديث مرة مرة...
وصل محمود للطريق اللي ترفع لحوش خوهم الكبير شعبان..
اول ماخشت السيارة للمنعطف اللي يرفع للشارع اللي فيه الحوش
ملامح وجه الصديق بدت تتبدل للخوف..
وصدره بدي يضيق...
ركز عليه محمود..
وخوه اللي فجنبه شافه كيف قام يده وحطها ع صدره..
محمود نزل المرش متاع الرواشن كلهم..
خش الشارع..
الصديق خدي نفس عميق بعدين قال:الجو مولي يخنق..
خوته تأهبوا لأي طارئ..
خلاص..
وصلوا فالحوش..
كلكس محمود..
الصديق بدي يحس بخوف شديد..
صقع من الخوف..
انفتحت بوابة الحوش..
خشت السيارة
وخو الصديق اللي فجنبه يراقب فيه كيف يحك ففخده بيده وعلامات الخوف الشديد باينه ع وجهه..
خوهم شعبان الكبير كان واقف فم الحوش
انفتحوا البيبان..
ونزلوا محمود وخوته..
بس الصديق ماباش ينزل..
محمود طول مشاله..
جي عند بابه وفتحه وقال:خيرك!انزل..
تنهد الصديق بقوة...
بعدين نزل..
صكر خوه محمود الباب..
ومشوا مع بعض لخوتهم..
والصديق فحالة يرثى لها..
واكثر شي كان يحس بيه ضيقة الصدر..
لدرجة انه كان يتنهد بإستمرار..
وصل فخوه الكبير ومد يده وقال:شنو حالك..
شعبان وهو مركز ع ملامح خوه:الحمد لله..
طلق يده وقال..هي تفضلوا خشوا..
خشوا الولاد الأربعه ورا خوهم..
الصديق لما خش كان حاس بشي فداخله زي
اللي يصارع فجسده.
وهو بدي يتشنج..
خوته كانوا خايفين هلبه ومش عارفين شن ممكن يصير بعد يخشوا للمربوعه..
وصلوا فالمربوعه..
وخشوا بالواحد وهما يلقوا فالسلام..
واخر من خش الصديق..
عيونه طول جو ع عيون زوز رجاله..
هيئتهم يبان عليها هيئة الإلتزام الديني..
وواحد فيهم اكبر من التاني بشوي..
جحظوا عيونه تلقائيا وكان حاس بشي فداخله يخبط ويعيط ..
هو رفع يده لوجهه ومسحه..بعدين نزل ع رقبته وشدها والتشنج بدي يوضح عليه..
وخوته يراقبوا فحركاته..
ومعاهم الرجاله الزوز..
🍁🍁🍁🍁
4:00قبل العصر..
درسوا سيارات مالك وعماد فالقطعه...
فالحوش داخل..
كانوا بلقيس وسميه موجودات ومعاهم رزان تراجي فعزوزتها وسلفتها..واكيد قبلهم كلهم راجلها اللي ليه اسبوع مسافر وميته من شوقها ليه💗..
وهما يهدرزوا فالدار..
والمكيف عليهم مفتوح..
وقدامهم صفرة شاهي اخضر وصونيه فطيره..
كانت سميه مركزة بالنظر ع بنتها فاطمه اللي كانت تحوم ع غاليه واطيح عليها وتلعب معاها وغاليه تلاعب فيها وتبوس قريب تاكلها من لطافتها ولعبها الحلو وخفة دمها..
وسميه بتنفجر ماتبيش بنتها تحب غاليه اكثر منها زي ماصاير لبنات العيله اللي غالبا مايفضلوا فغاليه ع امهاتهم واولهم رزان ورباب..اللي كانوا من صغرهم معاها لعند هاللحظه..
قطع عليها غوصها فأفكارها المريضه..
خشة نعيمه وكفايه ونور ودلال عليهم..
تلقائيا ناضت رزان وقفت..
سلموا البنات في الأول ع امهم..
وبناتهم سلموا ع خالاتهم..
بعدين العكس..
بعد سلمت كفايه ع بلقيس قدمتلها رزان وسلمت عليها..
والزوز يسألوا عن الحال والأحوال..
بعد السلام ع الكل..
قعمزوا..
فاطمه:شنو حال رجالتكن وعربكن..
نعيمه وكفايه:الحمد لله يمي...مابيهمش كويسين..
غاليه:شن جو نور ودلوله..
الزوز ردوا بإبتسامه:تمام...الحمد لله خالتي..
حميده:اشيه اشيه نورهان شن السماحه هدي..
نورهان:اصلا من زمان سمحه..
ضحكوا خالاتها..
بينما حنين كانت تشوفلها بشيء إزدراء..
نعيمه:شن جوك بلقيس وشن دايره مع الحمل..
بلقيس بإبتسامه:كله تمام الحمد لله..
كفايه:شن بتحضري عرسنا ولاعرس بنت خالتك؟.
بلقيس بضحكه:اني تو كنتكم يعني من هل العريس..
ضحكوا كلهم ماعدا سميه..
فاطمه:صحه ليك..
اسيا وهما يتكلموا كانت تشبح لنورهان كيف تشبح لرزان..
بعدين شبحت لأمها وخافت..
حميده:وين الولاد؟..
كفايه:الكبار ولا الصغار..
رزان شبحت لعمتها كفايه.
حميده:الصغار..
نعيمه:شافهم قصي ناداهم لحوشهم..
حميده:بلاستيشن عاد..
غاليه:مانا شابحين وجوههم للمغرب..
"أمي"..
قلب رزان رفرف مجرد سمعت صوته💓
شبحولها حميده وغاليه وبلقيس شافوها كيف ابتسمت ابتسامة فرح ممزوجه بالخجل..
كفايه:تعالوا امي تعالوا..
رزان تنهدت من قلبها وعيونها فالباب..
شويه..
وبانوا الزوز مالك وعماد..
بس الكل ارتسمت ع وجوههم ملامح المفاجأة ومنهم الإعجاب لما جو عيونهم ع عماد..
غاليه :ايه ده ايه ده ايه ده!!
حميده:لك اولي اولي اولي..
كلهم ضحكوا..
ماعدا رزان اللي كانت حاطه يدها ع فمه وتشوفله بعيون متوسعات من المفاجأة..
عماد كان مغير المظهر الخارجي متاعه كليا..
محلق شعره..
مخفف لحيته..وكانت لبسته غامقه صادا..
سوريه نص كم زرقاء كحلي..وسروال جينز اسود..
بس السلسله اللي حطها فرقبتها من لما كان عمره 17سنه ماحولهاش قاعده زي ماهي..
وكذلك نظاراته العسليه معلقات ففتحه الصدر متاع السوريه..
كان مختلف هلبه هلبه وبان في عمره حق...
فاطمه:ايوه هكي الصح..اسمح من قبل بوييين..
ضحكوا..
مسح بيده ع لحيته وهو رافع حاجبه الإيسار وابتسامته ع وجهه ويسرق فالنظر لمرته ويقول:عجبتك طومتي؟
فاطمه:واااااااااجد..
غاليه:اول مرة يعجبها حد فالدنيا حناك وتعبر عن اعجابها بيه هكي..
حميده:ايه..راهو انت هكي خديت درجة النجاح بتقدير ممتاز عند FM..
كلهم ضحكوا..
فاطمه بضحكه:ياسركن قطاف..وانتم تعالوا سلموا..
ضحكوا الولاد وخشوا داخل..
سلموا ع الكل..
وعماد وين وصل فرزان شد ع يدها وغمزلها بعينه..
وهي مازال مسهمه فيه 💓..
ابتسم بعدين سلم ع مرت عمه بلقيس وولوا هو وخوه للباب..
حنين:عماد لما خدي رزونه ولى احلى..
ضحكوا وهما متفاجئين..
نورهان:خويا حلو من زمان..
دلال ونور شبحوا لنورهان..
حميده:ياودي عارفينه سمح غير اسكتي انتي ياخنفوسه بس..
ضحكوا على نورهان..
ونورهان ماضحكتش..قعدت تشوف للساعه اللي فيدها ويبان عليها حرجت وماركز عليها حد كان أمها..
فاطمه:وليدي مالك بننشدك..كراعي هدي متعبتني واجد..من عند ركابي نحس فيهن ثقال واجد وين نصبي..ومش قادرة نتنيهن كيف قبل..
مالك:ع الغالب حناي عندك احتكاك..
غاليه:حتى اني قلتها..ركابها منفخات..
مالك:لازم تعايني اهمالها اكبر غلط..
نعيمه:ربي يهديك يمي..
فاطمه:خلاص بعد تحز حوسة العرس نقول لمحمد يقلني..
هما يهدرزوا..
وعماد ورزان يتبادلوا فنظرات العشق والشوق وماحد مركز معاهم غير حميده اللي كانت شاده ضحكتها...
🕸🕸🕸🕸🕸
"اااااااااااااااااااااااااااااه"
كان هدا صوت صراخ رجل..
الصوت كان هادر ومخيف...
الصوت كان يصم الأذان...
لكن كان يوجع القلوب ويقطعها...
كان صوت عذاب...
عذاب شديد..
صاحبه كأنهم قاعدين يحرقوا فيه بالنار..
الصوت كان طالع من حوش شعبان خو الصديق...
الصوت كان صوت الصديق..
اللي كانوا شادينه خوته الأربعه ومعاهم مساعد الراقي..
الراقي اللي كان يتلى...
¤ماجئتم به من السحر
إن الله سيبطله...
الصديق كان يصرخ بأعلى صوته ويتصرع ولون وجهه لين راح اسود...
إن الله سيبطله...
الصديق...
آااااااااه خلوووووونيييييي....
إن الله سيبطله..
اسسسكت..
إن الله سيبطله..
اااااااااااااااااه..اااااااااه..خلوووووني..خلوووووونييييي..
وقعد يصارع فيهم بقوة وهما بالزور يشدوا فيه..
محمود دموعه كانوا ينزلوا ماتحملش..
وخوه الكبير كان ضام ايديه الزوز لبعض وهو مغمض عيونه بشده وقلبه يتقطع ع خوه..
والشيخ يتلى..
¤إن الله لايصلح عمل المفسدين¤...🍃
-------------------
تتكلم بالتليفون وهي ادور في الحوش..
حليمه:اسمعي يارحمه نبيها قطوس فشكارة تسمع الكلام يقولولها تموتي تموت راهو خوي نار واعر كان علت صوتها عليه يخبطها خبطه يقتلها...
-------------------
¤وماهم بضارين به من أحد إلا بإذن الله...
هاااااااااااه..هااااااه...هاااااااااااه....سكتوووووه...اسسكووووت
شعبان:لا إله إلا انت سبحانك اني كنت من الظالمين..
وماهم بضارين به من احد إلا بإذن الله..
كان الصديق يسمع ويصرخ بأعلى صوته منظره منظر واحد يصارع فالموت...
منظر واحد مكبل بأغلال يبي يفكها....يقطعها...
كانوا يشدوا فيه بكل قوتهم..
ومحمود وهو يشد فيه يبكي بدموعه ويردد..
حسبنا الله ونعم الوكيل..
-----------------
حنين:ماما وين قفطاني بنوريه لآسيا ونورهان..
ناضت حميده وقالت:هي شويه..
مشت للدولاب..
فتحاته..
وطلعت القفطان اللي كان معلق بالشطار ومغطي بغلاف نايلو...
وراته حميده لكل من فالدار وقالت؛شن رايكم فقفطان بنتي..
كلهم بأصوات متقطعه..
يهبل ..محلاه..يجنن..ماشاااء الله..
وحنين تسمع في آرائهم وهي مبتسمه بفرح..
آسيا:حلو هلبه هلبات..
قرصت حميده خد آسيا وقالت:نجي الهلبه هلبات..
نورهان:من شارهولها؟
حميده شبحت لنورهان وقالت:اني..
نورهان:اني متاعي كبير اكبر من هدا...خداهولي بابا..
حنين تلاشت ابتسامتها..
غاليه وبلقيس شبحوا لحنين بألم..
ونور ورزان ودلال شبحوا لنورهان بحده..
وحميده قعدت تشوفلها بنظرة حاده ممزوجه بالحزن..
كفايه بضحكه:بيبدوا البنيات يتنافسوا من توا كل وحده تقول متاعي احلا..
نعيمه بضحكه:زي رباب ودلال ورانيا زمان..
فاطمه قعدت تشبح لنورهان وهي تقول:ايه..صغار...صغار...
---------------------
¤اخرج منها مذموما مدحورا¤...
الراقي يقرا في الآيه..
والصديق كان شبه منهك بين ايديهم..
حط يده بتعب ع بطنه..
وهو يسمع فالراقي يعاود في الآيه...
فجأه..
ناض قعمز..
قربله مساعد الراقي كروانه فاضيه..
فنفس اللحظه..
وكأنه في شي اندفع بقوة من بطنه رقي لعند ماوصل لحلقه...
وقعد يرجع الصديق بقوة...
وكأنه يطلع فروحه..
واللي كان يرجع فيه شي مقرف لونه اسود...وريحته كريهه فوق الحد...
الراقي:مأكول...
شعبان شبحله..
والراقي يشبح للصديق كيف يرجع...
وقعد يرجع ويرجع...
فآثار الآذى اللي مكث فبطنه سنين وفكل مرة كان يتجدد..
اذى خداه اول مرة نهار كلي اول عشي فحوش صديقه ناجي..
كانت حليمه دايراته بإيديها واضافتله لمساتها السحريه الشيطانيه..
وقعد فكل مرة وين يجي للحوش لازم ياكل من سحر حليمه..
اللي بدي تدريجيا يسيطر عليه ويغير من افعاله وصفاته..
كانت حليمه مش بس ادمر فعلاقته مع زوجته والناس المحيطين بيه اللي هي مش راغبه فوجودهم حواليه بس..
حليمه كانت ادمر فيه هو بحد ذاته...
دمراته من جميع النواحي..
نفسيا..
دينيا...
وحتى جسديا...
🍃بعد ماافرغ جهده كله وهو يرجع...
طاقته شبه نفدت..
انهار بين ايديهم وغاب عن الوعي..
بس ماكانش غيابه عن الوعي اغماء ولادوخه..
لا...
هو بس رقد..رقد من التعب الشديد..
شبحوا خوته للشيخ بصدمه..
الشيخ:راقد راقد..
محمود:قصدك خلاص هكي ياشيخ؟!
الشيخ:لاوين خلاص!؟كيف بدينا ...هادي المرحله الأولى بس..لو سمحتلنا يااخ شعبان لازم نقعدوا عندك يومين تانيات..
شعبان:اقعدوا كيف ماتبوا..المهم طلعوا منه هالبلي الأحرف..
رجع الشيخ شاف للصديق وهو يقول:بإذن الله...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
"حمييييده"..
انفتح الباب الفاصل بين ارض عبدالله ورمضان..
وخشوا منه يجروا غاليه وسعيده وزينب وكفايه...
غاليه وهي تجري:حييي الصديق الصديق..
وقفوا لما وصلوا فبدايه ممر فم البوابه يشوفوا..
ع جية نعيمه ورباب ودلال وقفوا حداهم..
وكلهم ابصارهم متوجهه للجهة اللي كان واقف فيها الصديق..
ومعاه زوز من خوته...
وقدامه الهادي وحميد..
الهادي بغضب:طلعوه من هنى خير ماوالله ننبلى فيه توا..
حميد وهو يشد فيه:غير اسكت ياهادي خل نفهموا..
الصديق وهو داهش:وين مرتي وبنتي ياحميد..
محمد:مرت منو ياتاعب انت وبنت منو..
الصديق:ياناااس بتهبلونييي انتم بتهبلووونييي..زفر وقال..حميده وين..وين حميده..
قدمله عمر وضربه بوني..
بسرعه جاه محمد شده...
والصديق شد فمه وهو يشبح لخوته..
محمود:غير استهدوا بالله..خلونا نتفاهموا..
داخل..
حميده..
طلعت من الدار..
تمشي ومع كل خطوة تخطيها كانت ترجف مع بعضها..
وقلبها ينبض بسرعه من الخوف والصدمه..
رجليها كانت مش حاسه بيهم وهي تمشي..
وبنتها اللي تبكي وبنت خوها وراها..
وصلت فم الحوش القدامي..
فنفس اللحظه..
اللي نزلوا فيها هانيبال وعماد ورمزي من سيارة عماد اللي درسها فالساحه الكبيره..
طول فاتوا يجروا للمكان اللي صايرة فيه الدوشه..
فاتوا المستراح..
فالوقت اللي طلعت حميده فيه وقفت ع الركابه..
خطموا من قدامها..
وهانيبال يقول:هدى شن يدير هنى؟؟!!
فنفس اللحظه..
الصديق حول يده من ع فمه وقال بشي من الرجاء وهو يوزع فنظره عليهم:اسمعوني..اسمعو.....
سكت..
لما عيونه جو ع حميده..
قال بصوت ملهوف:حميده!..
خوتها التفتوا ومعاهم خليفه اللي ولعت فيه النار لما راها من بعيد شوي واقفه..
هانيبال بغضب وهو يحرك فيده ويأشر بصبعه للحوش:خشي..تحركي خشييي داخل..
هي استاقضت لروحها..
طول لفت وخشت وهي ترعش ودموعها ينزلوا..
وحنين قعدت واقفه تشبح لبوها وهي ميته من الخوف ودموعها ينزلوا..
والصديق يشوفلها بصدمه..
تغير عليه شكلها...كبرت هلبه..كبرت..
جاها رمزي طبها...
وهي مازال تشوف لبوها..
خش بيها للحوش..وهو يشوف لعمته كيف واقفه وتبان عليها حالة الصدمه القوية..
ودموعها ينزلوا من عيونها سيل..
ورزان حتي هي تبكي..
رمزي :رزان عينك منهم..
رزان هزت راسها بإيجاب..
طلع رمزي وصكر باب الحوش..
حنين انهارت بالبكي..
امها شبحتلها..
لكن ماقدرتش تتحرك من مكانها..
رزان شافت لعمتها..بعدين مشت لبنت عمتها وطبست عليها وحضنتها وهي تقول:خلاص حبيبتي خلاص..
شويه..
وخشت الحاجه فاطمه تجري من فم البوابه وهي تقول:حميده..ياحميده..
حميده شبحت لأمها..
ومشتلها طول وخشت فحضنها وهي تبكي..
وامها تمسح ع ظهرها...
وعيونها ع حنين اللي تبكي فحضن رزان...
ومازال صوت العراك والدوشه اللي جاي من برا مستمر...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
••••••••قبل يوم•••••••••
...يتبع..
