#العشق_المتمرد "عندما يزهر الليمون"
#جمان_فريد
الجزء 120 القسم الثالث
💓...
جاه بوه بسرعه..
وقف قدامه وجبد السلاح من يده وهو يقول بعصبيه:شن قاعد ادير انت!!
عماد غمض عيونه بنفاذ صبر وهو يقول:بوي جيبه جاي..
سعد فاته ومشي للسياره..
وعماد ماشي وراه وهو يقول:بوي جيبه يابوي..بوي..
وصل سعد فالسياره فتح الباب الخلفي ولوح الكلاشن داخل وهو يقول:مانحساب روحي مربي بلطجي يهد ع الناس ويهدد فيهم..وياريتهم اي ناس..خوالك يا قليل الربايه..
عماد كان يحاول يتمالك اعصابه قدامه قاله بشي من الهدوء:مش ع خوالي يابوي..
صكر سعد باب السيارة بقوة وشبح لعماد شبحه قسماته نصين..بعدين مشي من حدأه..
فهالوقت
انفتح باب المربوعه وطلعوا منه الرجاله كلهم..
عماد لما راهم رجع هاج الثور اللي فداخله..
جاي بيقدملهم بوه شده..
عماد:يابوي..ال....غمض عيونه وقال ...استغفر الله العظيم..
🍁بومصلح:مرة تانيه كونوا ع بينه مع الناس ماتعرضوهم لهالمواقف..
ميلاد مش عارف شن يقول..
هانيبال:الحكايه صار فيها سوء فهم بس..
بو مصلح:ومش حيتصلح بنتكم عندكم..
هانيبال بعصبيه:باك تحساب مازال نبوا نعطوها لغير لولد عمتها!!ماعندنا بيكم لزوم توكلوا ع الله..
محمد وهو يضحك بكتمان قال:كول ع راسك..
ضحك عمر لما سمعه..
بو مصلح شبحله بحده..
واحد من خوته":هيا ياحاج هيا ..
مشي بو مصلح مع خوه وهو مازال يتمتم ...
جمعه:خير ياجماعه شن صاير!!
التفتوا لقوا الجيران واقفين يتفرجوا..
سعد:ريت العار اللي درته ياباشا!!
عماد رفع حاجبه بكبر وماباش يرد..
شوي تحركت سيارات الرجاله..
ومشت طلعت من القطعه..
فهاللحظه..
سعد:بشير..
بشير:هي..
جبد سعد يد عماد ومشي بيه للمربوعه..
وعماد كان عارف شن بيصير لهدا كان في ع وجهه ملامح ابتسامه نصر خفيفه جدا..
وصلوا في ميلاد.
سعد:ميلاد لازم نحسموها ياخوي ويرتاح راسي وراسك..
شبح ميلاد لعماد من فوق للوطا..
وعماد غير عيونه عنه حياءا..
ميلاد؛تفضلواياسعد وبشير..بس هدى يقعد برا..
اشر بصبعه عليه وهو يقول فيها بدون مايشبحله..
طلع سعد يد ولده وقاله؛برا امشي قعمز فسيارتك..
عماد غمض عيونه وفتحهم وهو يهز فراسه بإيجاب ..
بعدين لف ومشي لسيارته..
خشوا الرجاله..
وقعد هانيبال اللي مشي يفهم الجيران شن صار ويصرفهم..
وفعلا كل حد مشي ع حاله ماعدا زوز..
جمعه اب بلقيس..
والحاج عبوده اب مرام..
مشي هو وياهم وخشوا للمربوعه...
هانيبال قبل يخش شبح لسيارة عماد..
ابتسم ابتسامه جانبيه مع قرنة الحواجب...بعدين خش داخل..
والسي عماد.فالسيارة..
فاتح اغنية لحبيبه وليد التلاوي ويغني معاه..
غزالي لامانسلم فيه..عيوني لو يبي نعطيه..💕
💕💕💕💕
فالحوش..
كانوا النساوين متوزعات ع الرواشن اللي يطلوا ع الساحه اللي صار فيها الحدث..
بعد فضت..
حميده وهي تصفق:
سلم ولد العمه الداني...ماخلاها البراني..
ضحكوا..
وصفقت معاها غاليه وقعد تغني..
وعموده قالها...رزونه ليا نا..
كلهم قعدوا يضحكوا..حتى من سعيده..
🍃استسلمت..ومحلاه من استسلام🍃
باهي وهما يغنوا وفرحانين هكي..
صاحبة الشأن وين؟..
رزان...
حطوا رواحكم فمكانها..شن تحسوا فهاللحظه!؟..
عيوني دمعوا لمجرد اني تخيلت روحي فمكانها..
المراه..تحب الراجل اللي يحارب ع خاطرها ومايسلمش فيها..
تحب الرجل اللي يعتبرها وطن ليه..مستعد يدفع عمره كله ولايسلم فشبر منه..
حب مقدس..💖
المراة هني مش بس تزيد تحب الراجل اللي دار هكي ع خاطرها...لا
حتى ثقتها بنفسها تزيد لما تحس ان عندها قيمه كبيره..
تحس حتى بأنوثتها اكثر...
يرفع من معنوياتها فوق فوق....
💓هدا كله حست بيه رزان وهي مقعمزة فدار المعيشه بروحها..
مشبكه ايديها فبعض..
مبتسمه ابتسامه حلوة..
وعايشه فعالم تاني..
وكأنها فحلم...
تسمع فيهم يغنوا ويضحكوا برا وفرحانين..
تزيد تفرح..
وقلبها يفرفح ويرقص من السعاده..
قبل نص ساعه..
كانت اتعس من خلق ربي...
وخلال نص بس..انقلبت الموازين وتغير كل شي وولت اسعد من خلق ربي..
💕💕💕💕
شن قولك ياخوي ميلاد؟..
هدا السؤال طرحه بشير خو سعد الكبير بعد تكلم فرزان لعماد ولد خوه..
كلهم كانوا يراجو فرده..
عبدالله:ميلاد ياولدي ولد اختك ولدك وانت الاعرف بيه يصلحلها خير من البراني..
حسن:عماد راجل ماشاء الله عليه الحق ومافيش بو مايتمناش راجل كيفه لبنته..
عبودة؛لو تسمحولي ياجماعة الخير..
ميلاد:تفضل ياحاج..
عبودة:من رايي تنشدوا البنت حاليا بعدين تعطوا الجواب..
شبح سعد لميلاد..
ميلاد هز راسه بإيجاب وقال:هو هدى...
ناض وقال:نستأذكم شوي وجاي..شبح لهانيبال وقال..تعال ياهانيبال..
ناض هانيبال وقال:حاضر..نستاذن..
ومشوا الزوز طلعوا من المربوعه...
برا ..
عماد راهم من مراية السيارة طالعين ومتوجهين للحوش..
قعد معاهم بعيونهم..
لين ركبوا الدروج..
وخشوا...
ضحك وقال:بياخدوا راي البازوزة..ماعندها ماتقول خلاص ملعقتي ونعرفها..💕
💕💕💕💕
واقفه فالصاله وهي فقمة الخجل..
وقدامها بوها وعمها..
ميلاد:الجواب اللي بناخدك منك توا ماتقدري تولي فيه بكل بعدين فاهمه؟..
هي هزت راسها بإيجاب..
هانيبال:خودي قرار عقلاني يارزان..
قامت عيونها فعمها بعدين نزلتهم وقالت:عندي شرط..
الزوز ضيقوا عيونهم بإستغراب..
ميلاد:شن هو؟..
رزان:يوافق رمزي..
هما شبحوا لبعض..بعدين شبحولها..
قامت عيونها وقالت:قبل رمزي بعتلي مع عمي محمد..قالي لو يجيبلك عرب ***** كلهم ماتوافقي عليه..
ميلاد:امتى صار الكلام هدى؟!!..
رزان:ليه مدة انشد عليه عمي محمد..
هانيبال هز راسه بإيجاب بعدين قال:ماعندك شي غيره تقوليه..
رزان حركت راسها ايمين ويسار نافيه..
ميلاد :باهي..هي هانيبال..
هانيبال:توكل..
مشي ميلاد وهانيبال وراه..
وقعدت بعيونها معاهم وهي تفرك في ايديها فبعضهم بتوتر..
🍁🍁🍁🍁
هو كان فسيارته يشوف من المرايه فخواله نازلين من الدروج وهما يتكلموا..
بعدين شاف ميلاد توجه للمربوعه..
وهانيبال متوجهله..
هو بلع ريقه..بعدين فتح الباب ونزل..
لقي هانيبال فوجهه قاله بشي من الحده:تعال..
مشي هانيبال..
وهو صكر الباب ولحقه..ودقات قلبه تزيد فقوتها💓
وصلوا للمربوعه..
خشوا..
عماد؛السلام عليكم..
ردوا عليه السلام..
مشي طول قعمز جنب بوه..
بعد قعمز هو وخاله هانيبال..
عبدالله قال:شن صار معاكم..
ميلاد:البنت عندها شرط..
عماد قعد يشبح لخاله بإنتباه..
وكله آذان صاغيه..
ميلاد غير عيونه لمحمد وقال:قات رمزي قال لو يجيبلك عرب **** ماتوافقي عليه..
عماد انصدم..وشبح لمحمد..
محمد شبحله وقال:ايه قالي اني هالكلام واني وصلتهلها..
ميلاد شبح لسعد وقال؛البنت شرطها خوها يوافق..
سعد:معناها نراجو لين رمزي يطلع؟!..
عماد بفزه؛اكيد لا...
كلهم شبحوله..
عماد؛اني نمشيله غادي غدوة ان شاء الله ونكلمه مني ليه ومانيش مروح الا بموافقته..
ميلاد من داخله عاجبه اصرار عماد..بس مش قادر ينساله اللي داره..
لهدا حب يقرصه من ودنه بقوة...
ميلاد؛حتى اني عندي شرط..
شبحوا كلهم لميلاد..
وعماد شبحله بشي من الخوف..
سعد:شن شرطك يا ميلاد..
ميلاد وهو يشوف لعماد بتحدي قال:مهر البنت نبيه 200ليرة ذهب..ذهب..شدد ع حروف الكلمه لما قالها مرة تانيه..
صدم الكل شرطه..
الهادي:ميلاد؟!!
ميلاد:هدى اللي عندي..
"حاضر نجيبهم ونقرا فاتحتها "..
هو شبحله وقال:لو جبتهم ليك اللي تبيه..
عماد:ماتقولوش بتاخدوا رايها الكلمه منك انت ناخدها توا وقدام الكل..
ميلاد حس ان عماد يتحدا فيه فتحمس وقال
"عليا الطلاق ماضال الا قاري فاتحتها فنفس الأسبوع"..
فغرت الأفواه..
كلهم زادوا انصدموا..
كيف ميلاد.الشيخ يحلف حلفة زي هادي!!؟..
لكن عماد فرح بيها فرحه ماتنوصفش..
الحلفه هادي لارجعة فيها..
ابتسم بتحدي وقال:خلاص..
ميلاد خبط بيده ع ركبته خبطة خفيفه وقال:خلاص..تم الكلام..
سعد التفت لعماد لقاه مبتسم بفرح..
شبج عماد لبوه لقاه يشوفله بنظرة تخوف..
تعكرت ابتسامته وارتبك..
💕💕💕💕💕
فهديكا الليله العشي اللي كانوا دايرينه لعيت مصلح..
تعشوه عيت الحداد ..
سبحان القادر ع تغيير حدث كامل فلحظه..
حتى الأجواء تغيرت..
والنفوس تريحت..
سعيده ممكن قاعده واخده موقف من عماد..بس من داخلها كانت متأكده ان بنتها مش حتكون سعيده غير معاه هو وبس..
وقعدت تدعي بينها وبين نفسها ان ربي يجعل كل الخيره فاللي صار..
💓مقعمزات يتعشوا ويهدرزوا..
اما هي فكانت تحرك فكاشيكها فالصونيه وهي سرحانه ومبتسمه بروحها..
كانت تشوفلها بلقيس وهي مبتسمه..نخصت حدهم..
شبحتلها ..
حدهم:غير وين سافرتي يابلقوسه وين..
بلقيس:لديار الحبيب الغالي..
حدهم:وشن ديري غادي..
بلقيس:نحب فيه ويحب فيا وحاجات تاني ماتنقالش للصغار..
حدهم ضربت بلقيس ع كتفها..
وبلقيس قعدت تتحسس فيه وتضحك..
ورزان شافتلهم وقالت بضحكه:مهبولات..
حدهم بضحكه:تعرفي فرخه رزان لو كنت مكانك توا نمشي جري لتليفوني ونتصل بيه..
بلقيس بضحكه:اي والله حق شن تراجي يافرخه..
قرنت حواجبها وقالت:وين بنكلمه وليش بنكلمه ان شاء الله!!؟مازال ماصار شي لتو..
حدهم:مسمومه ونعرفك وتوقعتك تردي عليا هكي..
بلقيس:تبي الحق يستاهل خله هكي يقعد ينحرق ومايوصل فيها لين يتشوشط..
حدهم بتفنيصه :اكثر من هكي!!؟..
رزان برفعة حاجب:ما زال ماري شي هو اصلا..
بلقيس وحدهم شبحولها وهما موسعات عيونهم..
رزان شقلبت عيونها وقالت:مازال لازم يتمرمد اكثر من هكي..
حدهم:اهو بيمشي لمصراته من الصبح بش ينفدلك شرطك..والله اعلم مسكين شن بيدير بش يجيب مهرك راهم 200ليرة ذهب فهالوقت اللي فيه الدولار ب7جني..
رزان بغرور:والله اللي يبي الورد...
بلقيس :شوفيها كيف تتكلم!!؟..ولت معاش تشوف فحد هدي راهو!!
حدهم بضحكه:يحقلها..
بلقيس شبحت لرزان برفعة حاجب..
ورزان رمشت عيونها بغرور..بعدين ضحكت..
وهما ضحكوا معاها...
💕💕💕💕
هههههههههههه...ولدي هدا ياناس ولدي مايسلم فحاجته..
مالك بضحكه:الحمد لله مشت ع خير..
هدت كفايه ضحك بعدين قالت:لكن هلبه 200ليرة ذهب..
مالك:ولدك قال نجيبهم..
كفايه:باهي حتى اني عندي شرط..نبيهم يسكنوا فوقي وليدي الكبير نبيه معاي..
مالك رفع حاجبه وقال:ليه الله الوسطاني..
كفايه بضحكه:الوسطاني جنبي حتى هو مش بعيد..ايه..يعني ع هكي عرسكم مع بعض؟
مالك:من غير كلام هادي
كفايه تنهدت بإبتسامه وقالت:الحمد لله..
💕💕💕💕
ههههههه..جو عليه عماد..
سند:صحه لإيده راجل..
زينب بضحكه:خسارة فاتنا الجو كله..
رانيا ضحكت..
حمزة شبحلها وقال:رانيا حطيلي عشي..
ناضت رانيا وهي تقول :حاضر..
راجاها لين خشت للكوجينه..بعدين شبح لأمه وقال..
حمزة:رمزي بيطلع يوم 14\2..
زينب بفرحه:الله؟؟!
سند بإبتسامه:ايه قدموله التاريخ هو ومجموعه معاهم ع خاطر حسن سلوكهم..
زينب ابتسمت وعيونها ع بنتها فالكوجينه وع طول بدت تفكر ففرحتها اللي حتكون فرحتين..
فرحة طلعته..
وقراية فاتحتها..
💕💕💕💕
الله ع عماد!!
دلال بإبتسامه:خطر عليا فجنونه عمار الله يرحمه..
نور بضحكه:عاد جنون عمار الله يرحمه امي اكتر وحده تعرفه..
نعيمه برفعة حواجب:ركبني السكر..
ضحكوا..
بعدين هدوا ضحك وقالوا باصوات متقطعه :الله يرحمه..
دلال وهي مبتسمه من بين دموعها:ع هكي عماد ومالك عرسهم مع بعض مازال..
نعيمه:ايه قالتلي كفايه مع بعض..
ابتسمت نور ابتسامة فرح ممزوجه بالخجل..
💕💕💕💕💕
الساعه 12:00ليلا..
كانت فالدار بايته معاها بنت خالها ويهدرزوا ع حدث اليوم هما ورفقه مكالمه فيديو..
رفقه بعياط:يااااااربي علاااش فاااتني..
الزوز:ههههههههههه
رفقه:قراية الشياطين هادي ارزيني فيها..
رزان بضحكه:انتي اصلا ماكنتي تبي تجي..
رفقه:ماهو نحساب الموضوع بيقعد شور هداكا مصلح ولا شن اسمه هدا..
حدهم بضحكه:طيره العمده وجي فمكانه .
رفقه بضحكه:مايصح الا الصحيح غصب عنك ياملعقه..
ضحكت حدهم..
ورزان شقلبت عيونها وهي تضحك..
فجأة
طق الباب..
رزان:من ؟
"افتحي"
حدهم:توفيق..
عطت رزان التليفون لحدهم وناضت..
مشت للباب فتحاته..
توفيق:من تكلمي؟..
رزان:رفقه..
توفيق:باهي صكري منها توا وصكري هاتفك وجيبيه جاي..
ماناقشتش خوها نهائي..
لفت ومشت لحدهم خدت منها التليفون وقالت لرفقه:سلام توا روفي تصبحي ع خير..
رفقه وهي مستغربه:باي..
صكرت رزان من رفقه..
وصكرت بعدها التليفون..
ومشت طول لخوها مدتهوله..
هو خداه منها ومشي..
وهي صكرت الباب..
حدهم؛مافهمتش!!؟ شن صار توا؟
رزان شبحتلها وقالت؛مايبونيش نتواصل معاه قبل يصير شي رسمي..
حدهم بضحكه:عندهم الحق..اللي هناك بان.
ضحكت رزان بعدين مشت قعمزت حداها وقالت؛زعمه رمزي يوافق؟..
حدهم:اكيد من غير كلام لما يلقى الموضوع كله واقف ع كلمه منه اكيد حيوافق..اني توا مانفكر كان ف 200ليرة..
تنهدت رزان وغيرت عيونه لحكة الشاميه المحطوطه ع الكامدينو بعدين ابتسمت..
💕💕💕💕
ليلتها عماد..
كان ساهر فسيارته..
يرتب فأموره ويدير فحساباته بش يدبر في المهر فأقرب وقت ممكن..
وحدد وقت لهالمهمه...10بس..معنداش صبر لأكثر من هكي..
ولأنه ماكانش مبذر..وكان ديما عنده فلوس مدسوسات ع جنب لأي طارئ..فيسع مادبر في 200ليرة...
بس همه الاكبر توا فرمزي..
ماكانش عنده علم ان رمزي واخد منه موقف قوي لهالدرجه..
يفكر فالكلام.اللي بيقولهوله يخليه يغير موقفه تجاهه..
🍁ممكن مارقدش اخطا ساعتين..
ناض ع اذان الفجر بالزبط..
تحرك بسيارته للجامع ..
صلى الفجر والصبح..
ومنه طول لطرابلس..
كان واصل غادي الساعه 9:00بالزبط..
خش بسيارته للحوش..
درس من هني..
امه فتحت باب الحوش من هني..
فتح باب السيارة ونزل..
نزلت الدروج بسرعه وجاته..
فتحت حضنها ليه...وهو تغمرها..
كفايه:سيد التريس..
ضحك عماد..بعدين وخر وباس راسها...
ضرباته ع ذراعه وقالت؛جبتها بذراعك..
عماد برفعة حاجب:من الاول عارف ماتجيش الا هكي..
ابتسمت بعدين قالت؛باهي قولي كيف بدير للمهر..
عماد:تمشي الأمور يام تمشي..الحوش اللي بنيته في ***** بنبيعه وخلاص..
كفايه:ايه وتسكنوا فوقنا فالدور الثالت..
عماد ضحك وقال:مشيت مشيت وبنسكن فيه ..
كفايه؛تكره تجاور اميمتك؟..
حضنها وقال:شن تقولي ياغاليه بس!!اني بس كنت نبي نستقل بروحي عن اي شي دايره بوي نبي نعرق بروحي ع كل شي يخصني
كفايه؛خلي هادي استثناء ع خاطر اميمتك..
قرن حواجبه وقال بضحكه:غريبه ماكنتيش شاده فيا هكي قبل..
كفايه:ماك كنت تبي تاخد البوبلاله هديكا ماعندي ماندير بزومتها..ابتسمت وهي تقول..اما توا عاد بتاخد رزونه البهي والزين والزهي..نبيها لاصقه فيا 24ساعه..
عماد رفع حواجبه وقال فنفسه"بناخدها بش تلصق فيك انتي يام!!؟" وضحك...
كفايه:شن يضحك فيك؟..
ابتسم ووجهه مولي أحمر وهو يقول:لا غير تخايلتك عزوز حرفه ..
كفايه برفعة حاجب:بعيد السو عليا..اني عزوز كيوته وعسل ونهبل..
عماد:ههههههههه..نموت فيها الكيوته..
طبس باسها من خدها بعدين وخر وقال: هيا يا كيوته ديريلي فطور بسرعه بنطلع..
كفايه بضحكه:باهي..خش خش..
مشي عماد ركب الدروج وهي وراه تسأل فيه؛بوك توا طلع من غادي..
عماد:ايه حقه من قاله هو؟
كفايه بضحكه:اني..
عماد:واكيد الدكتور وصلهالك..
كفايه:لما اتصلت بيه كان حداي..
عماد:اهاااا..
خش للحوش..
وهي خشت وراه وصكرت الباب..
🍁🍁🍁🍁
الساعه11:00صباحا..
طز فيهم اخر همي..
لمياء بغيظ:إن شاء الله ماتتهنى لاهو ولاهي
سناء:خليني منهم توا وقوليلي بتكلمي امي ولا شنو؟
لمياء بشي من القرف:على شني تبيني نكلمها؟ع وجدي الحفيان اللي عنده عقاب ورشه وعايش مع امه وخواته فحوازة!!
سناء :ويبيني ويحبني وقداش ليه يجري فجرتي..ويقولوا خودي اللي يحبك مش اللي انتي تحبيه..
لمياء بإزدراء :تو من جدك بعد عماد تاخدي وجدي..
سناء:ايه ومن جد جدي..وامي اني تو نكلمها..
وناضت وطلعت من حداها..
لمياء:طيح سعدك..اصلا غبيه ومسكسكه زيك وجدي وهلبه عليها..
🍁🍁🍁🍁
الساعه 2:00بعدالظهر...
كان مقعمز ع الكرسي ويشوف للكرسي اللي قدامه وهو يهز فرجله بتوتر..
انفتح الباب..
قام عيونه وشبحله..
خش ولد خاله لما شافه قرن حواجبه..وارتسمت ع وجهه ملامح الغضب..
صكر الحارس الباب..
ولد خاله قال:ليش جيت!؟
ناض ووقف فمكانه وهو يقول:جيت لولد خالي وصاحبي من صغري..اللي تربيت اني وياه وكبر معاي وكبرت معاه..
ابتسم تهكما وقال:درت اعتبار كبير للي قلته تو!..
تنهد ورد يقول؛شن ماقلت عندك حق يارمزي..اني غلطت ونعترف اني غالط وغارق فالغلط من ساسي لراسي..وجاي نطلب السماح..
قعد يشوفله بإمتعاض بدون مايرد بكلمه..
عماد:رمزي..كلنا معرضين للغلط..اني وانت واي حد دامه بنادم لازم بيجيه يوم ويغلط..
رمزي:يغلط..غلط ينقبل يقدر الواحد يسامح عليه..لكن اللي درته انت اكبر من الغلط بواجد..
عماد:رمزي..مانعرفكش حقود وقلبك اسود..
رمزي :هدى مش سواد قلب ياعماد..هدى جرح قلب..اللي درته جرح قلبي وقلب خالك وقلب مرت خالك وقلب خوي ولد خالك..وحتى...تنهد وقال..قلب اختي بنت خالك..
عماد غمض عيونه بعدين فتحهم وقال؛صح..بس ماجرحتش الا لإني انجرحت..وجرح مش ساهل يارمزي لو كنت مكاني والله ماتتحمله..
رمزي نزل عيونه وهو قارن حواجبه وقعد ساكت شويه بعدين رفع عيونه فعماد وقال:واني نفكر بيني وبين روحي ونحاول نلقالك مبرر للي درته لأني مش مستوعبه لعند توا..مش مستوعب شي كيف هدى يطلع منك انت..قلت عماد مايديرش هكي الا لو كان اللي اندارله شي قوي واجد غيره مرة وحده..
ضم شواربه لداخل ورفع حواجبه ونزلهم بعدين قال...مع هدا قلبي من ناحيتك مالانش..ماتحملتش اللي درته فسيدي وخوي..
عماد:باهي شن تبيني نديرلك بش تسامحني..
ضيق رمزي عيونه وقال؛خيرك انت تترجى هكي !؟..
عماد رفع حواجبه وقال؛معاش عرفنالك يارمزي.!!
رمزي؛هدى اسلوب واحد جاي يطلب السماح؟!
عماد :من الأخير..اني جاي طالب اختك..
رفع رمزي حواجبه وابتسم تهكما وهو يقول:اها!!..
عماد:ايه..اهااا..هو هدا واختك قالت مانوافقش لين خوي يوافق..
رمزي بإبتسامه:اختي حتى هي..
عماد:باهي قولي..شن راضي ولا راضي..ماهو ماعندكش غير انك ترضى..رمزي فكنا من الجو الكفر..سهلها عليا بش ربي يسهلهالك مع بنت عمتك..
نزل عيونه وهو مبتسم ووجهه ولى احمر..
عماد:تعرفني مرابط كان وقفتلي فيها توقفلك حتى انت..
رفع عيونه فيه وهو يشوفله بتعجب قال؛من امتى!..
عماد بتذمر:اففففف..
شد رمزي ضحكته بعدين بدل ملامحه للجديه و قال:قبلها نبيك تعطيني وعد راجل..
عماد قعد يسمع بتلهف..
رمزي:ان اللي درته قبل معاد يتكرر..وانك تحط اختي فعيونك من داخل..
ابتسم بفرح وقال تلقائيا:فوسط قلبي من داخل مش عيوني بس..
فنص فيه..
ضحك عماد وقال:من الحماس معليشي عديها..
ابتسم رمزي ابتسامه خفيفه وحرك راسه ايمين ويسار..
عماد فتح ايديه وقال:نجيك ولاتجيني..
رمزي هو يشوفله بنص عين قال:الملزوم....
عماد من فرحة قلبه قدمله طول وحضنه بقوة وقال:نسيبي الغالي..
رمزي حط ايديه ع ظهره وهو يضحك..
🌴🌴🌴🌴
واقفه فروشن الكوجينه تهدرز هي وعمتها..
رزان:عمتي حميده بتروح مخر اليوم؟..
غاليه:ايه..تي خشي يابنت صقع..
رزان:لالا بنعدي..غير جيت بنعطيك من البسبوسه اللي درتها الصبح..
غاليه بضحكه:امم..جيتي ع خاطر البسبوسه صار!!
رزان شقلبت عيونها وغيرتهم عن عمتها وقعدت تشبح ايسارها..
وغاليه تضحك عليها..
فجأة رن تليفون غاليه..
رزان شبحتلها بلهفه..
مشت طول غاليه لتليفونها...
خداته من ع السكريه..
وفتحت الخط طول لما شافت المتصل..
غاليه:ايوه..
"وزوجني بنتك ياخال...
ياخدها غيري محال"..
ضحكت غاليه وقالت:عارفاته رموزة اني قلبه ابيض من الحليب..
ابتسمت رزان بفرح وقلبها يرفرف من السعاده💓..
غاليه بإبتسامه :باهي توا هالعقبه وتخطيتها..قعدت عقبة المهر...
عماد:مستعد نبيع كبدي ونجيبه..
ضحكت غاليه وقالت:ماعندها مادير بيك كان بعت كبدك..
ضحكت رزان..
عماد بضحكه:العقربانه هادي الشومه كله فجرايرها..
غاليه بضحكه:مش خسارة فيها رزونه ام العيون الحور..
تنهد عماد من وسط قلبه..
غاليه ضحكت وقالت:هي مالا نخليك تعدي تجري ع المهر..سلامات..وصكرت عليه وهي تضحك..
بعدين التفتت لرزان وهي تضحك وترقص فحواجبها..
رزان ابتسمت بخجل ومشت هربت...
غاليه ضحكت بعدين تنهدت وقالت؛يارب كملها ع خير..
🍃🍃🍃🍃🍃
ومرت 5ايام..
عماد كان يجري فيهم ع المهر وكذلك يجهز فشقته ويرتب فأموره للعرس..واستعدله تماما..
يوم الإربعاء..
الساعه 5:30عصرا..
فحوش ميلاد..
تحديدا المربوعه..
حط قدام خاله صندوق صغير وقال:المهر اللي طلبته
ياخال..عندك علم جيت بيه من طرابلس لهني ووراي تلاته سيارات حمايه راهو كان شدني حد فالطريق رحت اني وياه..
🍃يبي يبينله قداش عانى وتحمل بش ينفذ شرطه🍃
ميلاد قعد يشوف للصندوق..
عماد ركز عليه..
قدم وفتحه..
شاف ميلاد القطع الذهبيه تبرق فعيونه..
رفع عيونه فعماد..
عماد ابتسم برفعة حاجب وقال:تقدر تعدهم وتتأكد بروحك..
رجع ميلاد شاف للصندوق بعدين :صكره..
عماد صكره الصندوق..
شبحله ميلاد وقال:خود صندوقك وعدي..
تلاشت ابتسامه عماد وقعد يشوفله بصدمه وهو يقول:خالي!!راك حالف بالطلاق!!
ابتسم ميلاد بملل وقال:قصدي عدي اطلع ماعندي بندير بيك وبيه..المهم شرطي ونفدته..نتلاقوا نهار الإثنين فالجامع..
عماد:وعلاش مش يوم الجمعه...
ميلاد رفع حواجبه..
عماد ابتسم بربكه وقال:باهي السبت..
ميلاد فنص فيه..
عماد خاف وقال بإرتباك:خلاص..الاتنين..
رخي ميلاد عيونه وقعد يشوفله بطرفهم..
عماد:رغم اني والله ياخال حتى من التحليل درته..وواتي ليه 4ايام..
ميلاد:عماد.. وكمل يقول وهو مشدد ع الحروف..اط..لع..
ناض عماد وهو يشوفله..
ميلاد:خود ذهبك معاك..
عماد: هدا مهرها ياخالي عطهولها..
ميلاد شبحله شويه بعدين هز راسه بإيجاب وقعد ياشر بيده للباب..
عماد ضحك..
بعدين لف وطلع وهو يقول:السلام عليكم..
ميلاد قعد بعيونه معاه لين طلع..
بعدين ابتسم..
💕💕💕💕
حطت الصندوق ع الكامدينو وقالت:هدى مهرك ياحنه..
رزان قعدت تشبح للصندوق وهي مبتسمه..
سعيده ابتسمت بعدين قالت:سيدك قال قوليلها توتي روحهاغدوة الصبح بنرفعها دير التحليل..
نزلت رزان عيونها وابتسمت بخجل..
وامها تشوفلها بإبتسامه..
🍃🍃🍃🍃
ويمروا تلاته ايام..
كانوا تلاته سنين بالنسبه لعماد..
ماقدرش فيهم يمشي للبلاد نهائي بطلب من خاله هانيبال بش مايديرش حركات متهوره ويلبز ع روحه..
كذلك..
فهالثلاته ايام..
كان الكل يجري ويوتي ليوم الفاتحه..
بيديروا عشي كبير ..
لأن الحاضرين عددهم كبير..
اهل سعد..وصحاب عماد..
ومن النساوين بتجي بس عمته وداد..
🍁🍁🍁🍁
الأحد العشيه..
جو البنات كلهم ومعاهم حميد بعيلته..
كانت الاجواء من اجمل مايكون كلها فرح ففرح...
حتى الناس اللي حضرت بقلوب مش صافيه اضطروا يتغاضوا عن احقادهم مؤقتا..
بس فنفس الوقت حاولوا يبردوا ع ارواحهم..
🍁انخطبت!؟..
لمياء:ايه..فضانيتها الخميس اللي فات..
زينب برفعة حواجب:ربي يهنيها..
نعيمه:كله نصيب وقاسمه ربك وان شاء الله ربي يهني الجميع..
ابتسمت لمياء مجامله وقالت:آمين..
🍁🍁🍁🍁
ع بالي حبيبي ع بالي حبيبي..
اغمرك ماأتركك..
رزان بخجل:رفقه ياصامته صكريها..
حدهم بضحكه:تهيأ فيك لغدوة ياغبيه..
رزان:سكري فمك..
رفقه بضحكه:رزونه غدوة فاتحه بس مش دخله راهو..
حدهم :هههههه..
رزان ووجهها لونه بلون حبات الرمان وهي مغمضه عيونها بشده:سخيفات..قليلات ادب..
وحدهم ورفقه ميتات بالضحك..
💕💕💕💕
كان واقف قدام المرايه متاع المحل..
ويحدث فنفسه..
وخر شعره بيده للخلف وهو يقول:نقص منه شويه!!؟
حرك راسه ايمين ويسار بالرفض وهو يقول:لالا فالعرس نقصه منه..فالعرس..
تنهد..
بعدين حط يده ع لحيته وقعد يمسح عليها وهو يقول:نخففها؟!..شويه مش هلبه...هز راسه ايجابا وهو يقول..تمام نخفف من اللحيه بس..
حط يده ع صدره وقعد يمشي عليه ويقول وهو مبتسم ويقول:هانت ياقلبي هانت اصبر شويه تانيه بس..
"عماد"..
التفت وقال:نعم..
منير بضحكه:ذكرتني بحالتي قبل الفاتحه ..
عماد ضحك ونزل عيونه وهو متحشم..
منير بإبتسامه:ربي يباركلك ويهنيك والله لولا ظروفي كنت اول الحاضرين..
عماد قام عيونه فيه ابتسم وقال:فالعرس إن شاء الله..
منير: إن شاء الله..
🍁🍁🍁🍁
وفاتت الساعات..
وهما الزوز يعدوا فيها ويستنوا بفارغ الصبر..
لاهي رقدت..ولاهو رقد💓
من الفرحه..
وفي نفس الوقت..
خايفين يغمضوا عيونهم ويرقدوا ولما يفيقوا يلقوه مجرد حلم..
ماينلاموش اللي مر عليهم افقدهم الأمل ان يوم زي هدا ممكن يجي ويكونوا لبعض ع سنة الله ورسوله..
💖💖💖💖
تاني يوم..
25\1\2016
الكل زي خلية النحل..
جري هني وهني..
برغم ان الجو شتي..
لكن الأجواء العائليه الدافية ماخلتهم يحسوا ببرودة الجو.
الكل كان يتحرك..
حتى غزلان ولطيفه اللي ثقلوا بحملهم..
حتى لمياء وسميه وان قلنا انه قدام الناس بس بش مايقولوا عليهم..
حتى العروس نفسها بش تخفف شويه من التوتر اللي تحس بيه..
برغم انها ماسلمتش من التعليقات والمناشبه..
💕💕💕💕💕
قبل العصر بساعه..
خشوا 6سيارات للقطعه وكلاكساتهم قلبوا الدنيا
النساوين كلهم وقفوا فالرواشن يتفرجوا
نزلوا الرجاله من السيارات..
كانوا الرجاله الكبار يستقبلوا فكبار الحاضرين
بينما الشباب فكانوا كلهم حماس للنوبه اللي اعضاء فرقتها كانوا ع اتم الإستعداد بش يبدوا بوصلتهم..
كانوا من اصدقاء عماد حاضرين تيفسا ورافع وغيرهم
عماد كان لابس عربي الكاط لونه عسلي..
ورافع كذلك كاط اسود..
بينما تيفسا كان لابس افرنجي..
وكذلك خوته وولاد خالته لبسوا عربي..
وبوه وخاله ميلاد..اما الباقي افرنجي بسبب الصقع..
من واحد من الرواشن..
كفايه:الله وحد ع وليدي طالع زي الغزال صقر امه..
ضحكوا خواتها..
غاليه بضحكه:ربي يحفظه من يوم يومه سمح عموده..
حميده:صحابه كلهم طروف الدعوة هدى..
كفايه:طبعا ياماما ولدي مايحادي كان اللي زيه..
زينب بضحكه:كفايه زودتيها راك..
نعيمه بضحكه:بتبدا بجو العزايز الحرف..
ضحكوا ..
كفايه:عزايز حرف صار يانعمولا!!باهي تو نخلي بنتك تجيك كل يوم تشكيلك مني تو تشوفي
نعيمه بتفنيصه:ووك عليا!!..
سعيده:مادام هكي خلاص قاعدين ع البر مازلنا..
كفايه :واااك عليا اني..نبصر نبصر يايامي..
كلهم:هههههههههههههه..
💕وبدت النوبه تخبط..
واول مابدوا يغنوا بإيقاع بطيء..
"نبدا البادي بالصلاه ع الهادي.."
كانوا الرجاله الكبار واقفين يتفرجوا ..
والشباب يغنوا بحماس..
شويه شويه ووتيرة الحماس بدت ترتفع مع الأغاني الحماسيه..
والقطعه انقلبت قلب..
والنساوين منهم يتفرج..ومنهم اللي يرقصوا..
ورزان ماحولتش عيونها عن عماد نهائي..
فاتت فوق تلات ارباع الساعه..
والعصر قرب يأذن..
كان اخر ماغنوا مع الفرقه..
ورافع هو اللي بدي بيها..
زوجني بنتك ياخال..
صيحات الشباب علت..
والنساوين اول ماسمعوها ضحكوا ..
رافع..
ياخدها غيري محال..
وبدت النوبه تخبط من جديد..
وكلهم يغنوا فيها بصوت عالي..
رافع جاب عماد من ذراعه وقعد يرقص فيه ويغني
وعماد اللي كان ديما يهيج فمناسبات زي هادي كان متحشم شوي..
بس بعدين انطلق وقعد يرقص وهما خللوه الساحه..
و قعدوا يغنوا بس
جت العشقه فبنت خويلي..
ميلاد بصوت واطي:شن القطاف هدى!!؟..
عبدالسلام وحميد ضحكوا..
سعد بإبتسامه:شباب يانسيبي شباب..
خيري بضحكه:فوت ياراجل كله يوم فالعمر..
ابتسم وحرك راسه ايمين ويسار..
فالروشن💕
رباب:ااخ فرخه رزان حاسداتك..
نور:حتى اني..
حدهم:مال شن نقول اني..
رزان:واك ياكبدي ع شن حاسديني بس احني ماوصلنا لهاليوم لين قريب ودرنا..
ضحكوا..
بعدين قالت بلقيس:مازال بعدين..بعد تنقرا الفاتحه.
البنات بصوت واحد:اوووووووو..
رزان وهي تشوف لعماد كيف يرقص قالت بخجل شديد:اسكتن ياسخيفات..
كلهم:هههههههههه..
💕💕💕💕💕
بعد كملوا هياجتهم..
توجهوا كلهم للجامع ع آذان العصر..
بعد الصلاة..
جت اللحظه المرتقبه..
وكل ما يقرب عماد من تحقيق امنيته..
لهفته تزيد وتزيد...
💓لما حط يده فيد خاله..
ويد الشيخ كانت فوقهم..
كانوا عيون هانيبال ع ولد اخته..
ركز ع صدره اللي قاعد يعلا ويهبط من قوة النفس..
ضحك ضحكه خفيفه..
الشيخ..
بارك الله لهما وبارك عليهما وجمع بينهما على خير ...
الدعاء اللي قاله الشيخ هدا..
كان احلى شي يسمعه عماد فحياته لهاللحظه..
ماقدرش يتحكم فنفسه..
بعد قال الشيخ الدعاء..
رفع قبضة يده لوجهه وهو مغمض عيونه بشده قال:وووه..
فتح عيونه وقال..الحمد لله الحمد لله..
كلهم ضحكوا بصدمه..
وهو ضحك بإحراج وقال :ماتواخدونيش حلم عمري راهو..
جبده هانيبال وحضنه وهو يضحك..
وعماد حضن خاله بقوة وكان يبذل فكل جهده بس الدمعه العالقه فمحجر العين ماتنزلش قدام حد..
💕💕💕💕
قروهاااا ياهووو قرووها..
هدا كان صوت غاليه بعد صكرت من محمد اللي بلغها بالخبر..
صدحت اصوات الزغاريد فحوش ميلاد..
وكفايه من فرحتها مشت لرزان طول وحضنتها..
لاهادي قدرت تشد دموعها ولاهادي..
بس اللي صار لرزان فهديكا اللحظه..
من فرحتها الشديده انهارت بالبكي..
ولما سألوها خيرك..
ترد بعبرتها...فر..حانه..فر..حانه..💕💓💓💓
شويه وبدت تهدا وهي فحضن امها...
وبدي شوط الدربوكه...
نور العين قري فاتحته ..
جاب الريم اللي جارحته..
شبحت غاليه لرزان وغمزتلها ورزان ابتسمت بخجل..
حميده..
كيف الصقر يحوم وراها ...صكر راسه لين خداها..
زغرطوا ...وقعدوا يردوا وراها..
كفايه..
هكي العين لقت غايتها..
ورزونه كنة عمتها...
ضحكوا...بعدين زغرطوا وعاودوها وراها بصوت عالي..
سعيده زادت حضنت بنتها وهي تناشب فيها ورزان تضحك بخجل..
💕💕💕💕💕
روحوا الرجاله...
وطبعا دارو شوط نوبه استمر لساعه..
بعدين خشوا للمربوعه..
عماد ماكانش عارف شن يدير..
قريب يهبل بش يشوف رزان..بس مالقاش فرصه نهائي..
💖عشوا الرجاله..
وتعشوا النساوين ع الساعه 9:00بالزبط..
رافع ماقعدش بعد قروا الفاتحه تسقد طول لطرابلس..
وقعد تيفسا..
تيفسا:برا باهي..
عماد ناض..
ومشي طلع من المربوعه.
وتيفسا كان معاه بعيونه وهو يضحك..
عماد وهو ماشي قعد ياخد فشهيق وزفير..
قابله محمد فالطريق..
محمد :خير ياطير..
عماد:اخطاني خيرلك..
ضحك محمد وقال:كلهم فحوش جدك حتى الملعقه معاهم..
ابتسم بفرح وقال:مليح بكل..
محمد فنص..
عماد:قاري فيها فاتحه راني قاري فيها فاتحه..
مشي ومحمد مشي وراه وهو يضحك..
💕فالحوش..
مقعمزين فالصاله يهدرزوا وجوهم يجنن 💕
"امي"..
رزان رعشت مع بعضها...طول ناضت ومشت للدار وصاحباتها ناضوا معاها وهما يضحكوا بكتمان..
اما لمياء ناضت خشت دار تانيه..
كلهم لاحظوها لكن طنشوا..
كفايه:خش امي خش..
شويه
وانفتح باب المروحه وخش عماد..
منين روه اللي تعرف تزغرط زغرطت..
ناضوله خالاته وعمته قعدوا يسلموا عليه ويباركوله..
وهو يسلم ويرد..وعيونه يدوروا فيها..
حميده وهي تصفق غنت..
نور العين علم من يومه..مسدس طالع من روما..
زغرطوا تاني .
وقعدوا يغنوا عليه ويصفقوا..
وهو مبتسم و متحشم ومنزل عيونه لوطا..
💕بعد شتوا عليه كم شتاوة..
طلعوا من حداهم هو ومحمد..
بس قبل يطلع اشر لغاليه..
غاليه طول ناضت وطلعت وراه..
فالسقيفه..
غاليه:نعم..
عماد:الشفشه داخل؟..
غاليه بضحكه:ايه..
رفع حاجبه وقال:تمام..قوليلها قالك راجلك ديريلي عصيده ..
محمد ضحك وقال:العصيده ولت سبر...
ضحكت غاليه..
عماد:ندوي جد..قوليلها بعد ساعه نبيها واتيه..
غاليه بإبتسامه:ديرلك انت بروحك؟..
عماد:ايه..
غاليه:باهي..
تنهد وقال:هي محمد..
ضحك محمد وقال:هي..
مشوا الزوز طلعوا..
غاليه رفعت حواجبها ونزلتهم وهي تقول:رقتله..
لفت وخشت داخل ومشت طول للدار اللي فيها رزان..
اول ماخشت قالت:صبي ياشفشفه راجلك يبي عصيده..
قعدت تشبحلها زي المسبوهه لما سمعت كلمة راجلك..
غاليه:رزان سمعتيني!!؟..
رزان :عليا اني..
حدهم:لا عليا اني!..
قرصتها رزان..
حدهم:اااي ياشفشه..
غاليه بضحكه:هي صبي تحركي..
رفقه:نوضي رزان راجلك ولى خلاص..
بلقيس:تبي الذبح راك..تحركي يادراه..
رزان بإنزعاج؛ باهي..هاني نايضه الهم..
ناضت ومشت طلعت من الدار وغاليه والبنات يضحكوا عليها..
💕هي خشت للكوجينه وكانت متوترة ع الآخر..
ع السريع كانت ادير فالعصيده وهي خايفه يطب عليها فأي لحظه..
كملتها..
دارتها فصونيه وغطتها..
غسلت ايديها وطلعت تجري..
مجرد خشت من باب المروحه..
هو خش من فم البوابه..
ومنها طول للكوجينه..
خش ..
واتصل بغاليه ..
غاليه ردت ..
"هاه عماد"..
عماد:قوليلها تجي تاكل معاي..
غاليه :شويه بس..
عماد:قسما بربي كان ماجت نخش نجيبها بروحي..
غاليه ضحكت بصدمه وقالت:باهي باهي..
عماد: عندها خمسه دقايق..وصكر..
ومشي قعمز ع الكرسي..
داخل..
دلال:نوضي رزان حرام عليك..
بلقيس:ياسرك دلع زايد وصبي..
غاليه:هي حبيبتي رزونه صبي عدي لراجلك عيب تتصرفي معاه هكي..
تنهدت بضيق وناضت..
ومشت طلعت..
وهما يضحكوا عليها كيف تمشي وهي خايفه تقول ماشيه للجبهه..
💕💕💕💕
وصلت فالكوجينه..
قبل تخش ساوت روحها وشعرها..
بعدين خدت نفس عميق..
وزفرت..
وبعدها مشت للباب..
اول ماوقفت فيه..
لقاته مقعمز...
ويشوف لساعته وهو يهز فرجله...
زبطاته معصب..
قام عيونه وشافها..
هي تقول ضربها الضي..رجفت مع بعضها من نظرة بس💓
اما هو برغم شوقه العارم ولهفته الشديده
الا انه قعد محافظ ع ملامح وجهه الجاده..
رفع حاجبه وقاللها وهو يأشر بسبابته:جيبي الطاوله الصغيره اللي غادي حطيها قدامي بعدين حطي عليها الصفره..
هي بدون ماتقول كلمه..
مشت خدت الطاوله من تحت الرخامه..
وجاته حطتها قدامه ..
وهو معلق عيونه فيها..💓
بعدين خدت الصفره ومشت حطتها ع الطاوله..
عماد:جيبي كرسي وقعمزي قدامي..
هي دارت اللي قاله بدون ماتتكلم
هو قصدا كان يدير هكي يبيها تتكلم وتعارك وتكشخ لكن تصرفت بطريقه مش متعود عليها منها وهالشي حسسه انها مش فرحانه
قعمزت قدامه..
عماد:كولي...
هي مدت يده وبدت تاكل..
وهو ياكل ويشبحلها..
هي كانت يدوب تاكل..
متوتره من شي كل البنات الطبيعيات يتوتروا منه ويخافوا عادي جدا..
بس عماد فهم غلط..
وقف ماكله وقال:مجبورة عليا!؟..
قامت عيونها فيه وهي تشوفله بإستغراب..
عماد:بيني وبين نفسي من بكري ندووا..نقول زعمه حق خلاص معاش تبيني واضطرت توافق ع خاطر الموقف اللي درته يومها؟؟...حق اللي نفكر فيه !؟قولي..
رزان:تو انت تدوي من جدك ولاتتسهوك..شن بيجبرني يعني..جو خدوا رايي لو كنت مانبي قت لا وماحد يقدر يجبرني ع العكس..
قلبه انتعش بعد اللي سمعه منها..رفع حاجبه وقال:باهي ليش تتصرفي معاي هكي..
هي رفعت حاجبها وقالت:وتسأل فوقها!!؟باك تحسابني رضيت عنك!؟قلبي مازال مليان منك واجد واجد..
نزلت عيونها اللي تعبوا دموع وحطت ففمها لقمه من العصيده..
هو ابتسم بعشق..
وكمل ماكله..
لعند ماتمت العصيده..
هي طول ناضت غسلت يدها..
وهو يشبحلها وخلاص💓
بعد كملت التفتت وقالت:تبي حاجه تانيه..
هو ابتسم ع جنب وقال:تعالي فكيلي كمام سوريه..
شبحت لإيديه بعدين قالت:باهي..
هو ناض وقف..
وهي جاته..
فتح ذراعه وهو ماد ايديه..
بدت بيده اليسار قعدت تفك فالكم..
هو توا مشاعره فعز ثورانها 💓
وقلبه جن جنونه....صوت دقاته من قوته تنسمع..
حاوطها بيده التانيه...
وضمها ليه...
هي انأسرت بريحة عطره..
ودفي حضنه خلاها تريح مره وحدها..
راسها انحط ع صدره...
وقعدت تسمع فالمجنون اللي داخل وتعرف شن صايره..
غمضت عيونها..
وهو قعد يضم فيها ومصكر عليها بإيديه وهو مغمض عيونه ويقول:آااااه ياقلبي..هدا وين ارتحت ياعمري..هدا وين ياحياتي انتي...ياروحي...زاد ضمها وهو يقول..اااه ياربي..الحمد لله...الحمد لله...💓
وهي تسمع ورايحه فيها..
ذايبة زي مااذوب الزبده💕
الزوز نسوا هما وين..
مايذكروا فشي كان هما وبس..
ماتبيش تسيب حضنه..
ولاهو يبي يخليها..💕💕
"ههههههه"..
انخلعت لما سمعت صوت ضحكة امها جاي من الصاله..
فاقت ع روحها...وطول بعدت عنه وهي تقول:شن دير ياسخيف ياقليل الادب!!؟
هو قعد يضحك..
رزان ووجها متلون بألوان الطيف قالت بعصبيه:شن يضحك فيك ترا..
قرب منها وقال:نضحك ع الختشه اللي مازال مش مستوعبه اني وليت راجلها..
قرص شفايفها بعدين باس صوابعه اللي قرصوهم..
هي قريب ماتت..
حطت يدها ع فمها وقالت بصوت مكتوم:والله ماتحشم..
ومشت طلعت تجري هاربه من الكوجينه..
عماد بضحكه:ياربي شن ندير معاها..عسل معسل هالبازوزه💕
تنهد تنهيده طالعه من قلب عاشق شوق العالم كله فقلبه..
بعدين مشي للاونيدنو..
وقعد يغسل في ايديه..
وهو مبتسم وسرحان في اللي صار قبل شوي💕
اما هي..
لما خشت من باب المروحه..
استغلت ان الكل منشغل بالهدرزة..
خشت لدار حناها وصكرتها عليها..
ومشت قعمزت ع واحد من المنادير..وهي حاطه يدها ع قلبها اللي قريب يطلع من مكانه..
شويه فاحت عليها ريحة عطره..
اذكرت هديكا اللحظه وكأنها رجعت عاشتها مرة تانيه..
ابتسمت بعشق وقالت:نعشقه موت هالبارد💓
...يتبع...
