#العشق_المتمرد "عندما يزهر الليمون"
#جمان_فريد
الجزء 131 القسم الخامس
⏳..
30\1\2017
الساعه 1:00ظهرا..
كلية الطب..جامعة طرابلس..
واقفات ع بعض وحده تسقد فالتانيه..
نور بإبتسامه:خلاص تولي نتلاقوا فحوش رزونه إن شاء الله..
تاله بإبتسامه:إن شاء الله..باي توا..
نور وهي تأشر بيدها تحيي فيها:باي..
مشت تاله بسرعه للباص اللي يروح بيها..
اما نور توجهت لسيارتها..
وهي ماشيه اتصلت براجلها..
حطت التليفون ع وذنها وتراجي امتى يفتح الخط..
نادى مرتين وانفتح الخط..
نور:ملوكي..
مالك:روحي..
نور:شن جو توا..
مالك:خدمه ليه ليه..
نور:باهي قلبي مش معطله عليك غير بنقول توا بنمشي لحوش اهلي ناخد انوسي ونمشي لحوش رزان..
مالك:تمام تمام..
نور:بتجي تتعشى ولا؟
مالك:كان قدرت كان ماقدرتش عاد ماتنسنيش..
نور بضحكه:غير امتى نسيتك بس..تمام حبيبي يلا باي توا..
مالك بضحكه:فأمان الله..
صكرت نور وهي تضحك..
وكملت طريقها لسيارتها..
وين قربت توصل فيها..
طلعت فوجهها..
إسراء...
هي تفاجأت لما شافتها..
جت بتتجاهلها وتمشي..
وقفت قدامها وقالت بضحكه:شكلك معاش تزبطيني..
نور شبحتلها ببرود وقالت:ايه الحق مش مارة عليا قبل..
اسراء من داخلها تغلي تبي تخنقها..تقتلها..
لكن اخفت هالشعور بالكره الشديد وهي تقول بإبتسامه:مافيش باس نذكرك بيا..اني ومالك زوجك كنا أصدقاء وزملاء..
نور رفعت حاجبها وقالت:اها..تقريبا اذكرتك..اهلا..
اسراء بإبتسامه:سمعت بيك جبتي..مبروك..
نور:الله يبارك فيك..
اسراء حطت يدها فجيب شطنتها وقالت:هادي هديتي لأنوس..
نور شبحت للباكو اللي فيدها وهي تحاول تتمالك اعصابها بقوة..
اسراء وهي مبتسمه:قبل نحسابوا خالتي كفايه بتعزمنا ع اللمه هدا علاش شريتها غير خسارة طلعت اللمة عائليه..والهديه متسميه ع وليدك السموح حرام تقعد قلت لنفسي مادام امه مازال تقرا فالكليه نمشي ونعطيهالها..تفضلي..
نور تبي تبين انها عاديه قدامها مدت يدها وخدت الهديه وهي تقول:تعبتي روحك..مشكورة..
اسراء بإبتسامه:لا تعب شني الامور غالي عليا راهو..
نور ابتسمت من فوق نفسها..
اسراء عقدت حواجبها وقالت:ايه حقه استغربت هلبه لما شفت سلفتك وماشفتكش يوم زيارتنا لحوش عمو سعد ع خاطر مشية عماد للحرب وقتها..
ضيقت نور عيونها وهي تفكر..
ماطولتش هلبه فالتفكير بش فهمت اسراء ع شن تحكي..
نور لحظتها حست بصدرها ضاق هلبه..
ماتبيش تفهم اكثر ولا تتعمق فالتفسيرات..
ولاتوصل لأي شي..
تبي تفهم بس انهم جوهم بش يواسوهم بحكم علاقة الصداقه اللي بيناتهم وان مالك يومها رفعها لحوش اهلها لأنها فعلا مستاحشتهم وتبي تمشيلهم..
او لأنه مايبيش يضايقها بشوفة اسراء..
ماتبيش تفسر اكثر..
ماتبيش..
ولاتبي تبين لإسراء انها قدرت تخليها تتلخبط من جملة قالتها..
نور:اها يومها مشيت لأهلي كان ليا وقت عليهم مامشيتلهمش..
إسراء ابتسمت ورفعت حواجبها بعدين نزلتهم وهي تقول:اممم..
نور بإبتسامه مجامله:ع العموم مشكورة مرة تانيه..معليشي مستعجله لازم نمشي..باي..
ومشت فاتت من حداها بطريقها للسيارة..
واسراء قعدت معاها بعيونها لين ركبت سيارتها وشغلتها وتحركت..
ابتسم بتهكم بعدين مشت...
🍁🍁🍁🍁
في حوش رزان..
فالكوجينه..
رفقه وهي هايمه فريحة تطييب رزان:الله ياربي قريب ناكله من كسكاسه...
ضحكت رزان..
رفقه؛عطيني السر مادخليش بيك..ع قد ماحاولت فيها بش تطلعلي تفحفح هكي وطعمتها زي اللي فالعراس شي..
رزان:هههههه...باهي تو نقولك كيف..اول شي ياحنه....
قطع عليها صوت تليفون رفقه اللي رن..
رفقه وهي تقيم فتليفونها بش تشوف مني:شويه روزي..ابتسمت وقالت..عن اذنك ياسمح..
ومشت طلعت من حداها..
ورزان قعدت معاها بعيونها وهي مبتسمه قالت فنفسها"واضح تحبه بجد"..
تنهدت براحه بعدين التفتت تشوف لفازوات المسير بش تشوفه كان طاب وتحطه فحوافظه من توا..
برا..
خدت شعرها اللي كانت رافعاته ذيل حطاته على جنب وهي تلعب بيه وتقول بإبتسامه:لاحبيبي جيت من توا بش نعاونها العزومه ع العشي..
ياسين وهو يمشي بقرب مهبط الطائرات:اها..تمام..لكن تردي بالك تروحي بروحك زي مادرتي المرة اللي فاتت..
رفقه بضحكه:ياودي باهي كلمت قيس يجيني..
ياسين:متأكده!
رفقه:ههههههه..والله الا جاي قيس يروح بيا
ياسين:كان صار معاه شي وماقدرش يجي كلميني طول..
رفقه بإبتسامه:حاضر..
ابتسم ياسين وقال:تمام توا بري عاوني بنت عمك وتعلمي شويه..
رفقه:هههههههه باهي باهي..
ياسين بضحكه:يللا سلام..
رفقه بإبتسامه؛باي...
وصكرت..
بعدين لفت ومشت للكوجينه...
وصلت فيها وخشت لقت رزان توزع فالمسير..
مشتلها وخدت كاشيك وبدت تعبي معاها..
رزان:خيره؟
رفقه بإبتسامه:يأكد عليا مانروحش بروحي يادارلي مردوح ليلة روحت بروحي من حوش نورنهار عزمتنا اخر مرة..تصدقي ماعرفتش انه عصبي الا فهداكا اليوم..
رزان:كلهم يكونوا حلوين وهاديين لما تسمعي الكلام وكان مرة غلطتي بدون قصد يطلع الوحش اللي فداخلهم..
رفقه بضحكه:ايه..
سكتوا شويه بعدين قالت رزان:خسارة مانكمش جايين فالعرس..
رفقه تنهدت بحزن وقالت:مازال مش قادرين نخشوا فرح.. حتى حفلة بنت خالي اللي كانت الخميس اللي فات ماحضرنهاش..
رزان بحزن:والله لعند توا ماقادرة نصدق..ننسى مرات انها ماتت وين نذكر نحس كأنه كذب..
رفقه والدموع عبوا عيونها:الله يرحمها..
رزان:الله يرحمها ويجعل مثواها الجنه..
فجأة رن جرس الحوش..
رزان:اكيده دلال ورانيا..
رفقه مسحت دموعها وابتسمت بعدين قالت:تو نمشي نفتح..
خلت اللي فيدها ومشت تجري طلعت من الكوجينه...
وصلت فباب الحوش فتحاته...
وطلعت ومنها للبراني..
فتحاته وهي مدرقه فالتركينه..
خشت دلال وفإيديها زوز باكوات كبار موالح قالت:السلام عليكم..
رفقه:وعليكم السلام..
خشت وراها رانيا وفإيديها صفرة حلويات وباكو طورطه قالت:روفي..
صكرت رفقه الباب وقالت:ياهلا..
دلال:اشيه اشيه طالعه عسل..
❄كانت رفقه لابسه فقطان اسود شتوي ضابط ع جسمها طوله لعند الركبه..وفيه رقبه..وتحت شخشير لحم اسود..
ع رقبة القفطان لابسه سلسله فضيه مطلية بالذهب الأبيض..
قايمه شعرها فوق ذيل حصان ومنزله خصلات ع وجهها وراسمه عيونه ومدايرة مسكره...
بسيطه بس حلوة هلبه..
اما رانيه كانت لابسه سروال جينز اسود ع فانيله موف شتويه وجاكه طويله لونها اسود ووشاح مخربش بالأسود والموف..
ودلال لابسع قونه لونها ياجوري ع بلوزة بيضا وجاكه طويله لونها ياجوي ووشاح ابيض فالياجوري الغامق..❄
جتهم رفقه سلم عليهم بالخد..
بعدين خشوا التلاته مع بعض داخل..
دلال:نور جت؟
رفقه:لا مازال..
وصلوا فالباب الدخلاني جتهم رزان..
رزان:ياهلا ومرحبا..سامحوني تعبتكم..
دلال بتصنع العصبيه:اسكتي بلا دراه كبد رقيتهالي راك..
ضحكوا البنات..
قربتلها رزان سلمت عليها بالخد بعدين مشت طول دلال للكوجينه..
بعدها جت رزان لرانيا سلمت عليها بالخد ومشوا مع بعض للكوجينه..
☘هادي الجردينه...
شبحولها رفقه ورزان..
رزان:منظرها قنين..
فتحت دلال الباكو التاني:وهدا البوريك..
رفقه:حلو حلو منظره..
دلال:هي شغلها حلو هلبه ونظيف..
رفقه:هادي اهم حاجه النظافه..
رن جرس الحوش..
دلال:نور اكيد..
رفقه:اني تو نفتح..
وطلعت رفقه تجري طيران..
دلال:دايرة كسكسي؟
رزان:ايه..
دلال:نحسابك بديري رز..
رزان بضحكه:غيرت رايي اليوم الصبح..الكسكسي اخف..
رانيا: باهي من بيجي كله..
رزان وهي تعد ع صوابعها:مرت تيفسا واختها..وارملة سيفاو الله يرحمه....وخواته الزوز..ومرت منير اللي يخدم معاه..
رانيا:سته نساوين بينا حني 11..والرجاله عماد وصحابه3 ومالك 5رجاله..
دلال:3قعاد..
رزان:ايه هكي..
ع خشة نور وهي تقول:شيتكم خالاتي..
ناضتلها دلال وقالت:هاتيه جاي حبيب خالته..
مداته نور لأختها وهي تضحك..
سلموا ع بعض...
بعدين مشت نور سلمت ع باقي البنات..
رفقه:طرحتك مش عاديه نور..
نور بضحكه:اول مرة نلبس قفطان هكي..
رزان وهي تمرر فنظرها عليها:طالع عليك يهبل..
نور حطت يدها ع بطنها:مشكلتي فبطني مش عارفه شن نديرلها بش تخش..
رزان:عماد بيعدي بعد عرس خالي الهادي لتركيا بيجيبلي كريمات شد البطن والترهلات تو نوصيه يجيب من كل حاجه زوز..
نور:تسلميلي رزونتي..
🍁🍁🍁🍁
ديروا اللمات والعزايم وامشوا ع بعضكم وجو وخلوني اني هني بروحي زي الكلبه..
هادي كفايه تسقي فالغدي وهي نازله فكناينها..
وبنتها نورهان تسمع فيها بغضب قالت لأمها:ماتعدليش عليهم ماما...
كفايه حطت الصواني بقوة ع الطاوله وقالت:الحق مش عليهم هما الحق ع خوتك خوتك اللي يهزوا فروسهم وراهم..
اللي ياخد مراة ينسى امه...لكن مانقول كان ربي ياخد الحق واللي يدير يلقى..
ونورهان تشوفلها كيف تذرف فالدموع وتزيد تحقد اكثر ع رزان وتبدا تكره نور..
🍃مستاهل الموضوع!!؟لا والله مامستاهل للعين العادله اللي تحكم بالحق مش بالعواطف اللي تخلينا منحازين احيانا للغلط..مافي شي يستاهل اللي دير فيه كفايه توا..بس في هلبه زيها يبوا يعطوا ارواحهم حق بتصرفاتهم الأنانيه الظالمه هادي ويستخدموا فإعتبارات معنويه ربي عطاها..
اني امك..
اني بوك..
اني اختك..اني خوك..
اني ولدك.اني بنتك..
يعني وكأن اعتباراتهم هادي تعطيهم الحق يديروا مايبوا في غيرهم ويجبروا الطرف الآخر يخليهم هما الأولويه الأولى فحياته وغيرهم مش درجه تانيه لا بل حتى للدرجه العاشرة مايبوهمش يوصلوا...🍃
🌴🌴🌴🌴
شن رايك؟
غاليه بإبتسامه:ماشاء الله سمحه واجد ونازكه..
الهادي:جد ياغاليه!
غاليه بضحكه:والله العظيم..
ابتسم بعدين تنهد وقال:زعم ماتضايقش بعد تجي وتلقى الاثات متاع الحوش قديم..يعني ماتقولش كان لمرتك الاولى ومن هالكلام!؟
غاليه:فضيله مش هكي ياهادي بكل..لازم تفرق بينها وبين سميه..
الهادي:خايف بعدين اديرلي كيفها ماهو فالاول هديك كانت راضيه بأي شي المهم نعيش معاك لأخر يوم فعمري..وع عينك اللي صار بعدين..
غاليه:اني نضمنهلك فضيله يالهادي صدقني حتقول لروحك ويني عنها من زمااان...
ضحك الهادي..
غاليه بضحكه:ربي يهنيك ويفرحك ويهدي سرك يارب..
الهادي بإبتسامه:ويحفظك ياغاليه..
ابتسمت بعدين قالت:خل نعدي نسقي الغدي..
ومشت من حداه..
وهو تنهد بعدين رجع شبح لدار النوم الجديده وفقلبه يتمنى ان حياته تتجدد للأجمل مع اللي بتشاركه فيها..
💕واللي بتشاركه فيها كانت توتي فشناطي بتاتها وهي فرحانه..
ومرة تسرح بخيالها وتذكر كيف كانت ايام لما تشبح الهادي فالقطعه..ولا خاطم فالطريق ولا تشوفه صدفه في محل او فالمستشفى ايام كانت تدرب..
كانت فهداكا الوقت صغيرة..ومشاعرها قويه هلبه مسيطره ع كل شي فيها..ومخليها تحلم بالهادي انه حيكون يوم من الأيام راجلها..لكن مع الوقت هالحلم مات..تلاشى بالنسبه ليها بعد عرفت ان في فحياته وحده تانيه...انكسر قلبها..لكن لأنها كانت قويه تجاوزت هالشي وكملت حياتها عادي...
حتى لما جي اليوم اللي عرس فيه الهادي قامت عرسه زي مادارت مع غيره من ولاد القبيله...
وسبحانه ربي...
من الاول كان مقسوم ليها..لكن لهالمقسوم وقت معلوم ماينفعش يجي قبل وقته..
واهوا جي وقته يافضيله وربي خلاك عوض جميل للهادي يعني يافضيله حتكوني انتي حبه الحقيقي والقدر الجميل المدسوس ليه من قبل مايجي للدنيا...
زي ماقال محمد حماقي...
💕دي خير فحياتي جاني وهل ومن حظي انو متشالي💕
🍁🍁🍁🍁
بعد العصر..
لبست رزان قفطان حوامل مغربي حلو هلبه لونه عنابي فالذهبي..وطلقت شعرها ومكيجتها دلال مكياج بسيط وحلو..
كانت فدارها تلبس فذهبها..
فالوقت اللي روح فيه عماد من الخدمه بش يستقبل ضيوفه..
كان جايب معاه فواكه وعصاير خش حطهم فالكوجينه..
بعدين مشي للصاله...
سلم ع بنات العيله وسألهم عن الحال والأحوال ولعب ع أنيس شويه..
بعدين مشي لمرته فدار النوم...
خش للدار وهو يقول بصوت هادي:رزونتي..فكرونتي..
هي كانت تلبس فخراصها..
وقف وقعد يتأمل فيها كيف كانت طالعه قمة فالجمال..
وحنه الخطيفه اللي صابغه سودا في ايديها زادت هبلاته فيها..
قعد يمرر فنظره ع القفطان وهو يقول:الله يبارك ع الغزاله اللي عندي ياناس..آااه ياني والله ماعاد عندي جهد معاك يامراة انتي..
ضحكت وهي تساوي فشعرها بعد لبست خراصها شبحتله وقالت:شن رايك؟
عماد قدملها وقال:تنشدي فيا اني ع رايي!!؟اني كان نلقى ناكلك ماكله ياهمي..
قعدت ادف وتقول وهي تضحك:ترا ريح جمالك...وخر...
عماد:حضن بس ياشفشه..
رزان بضحكه:اها كان هكي باهي..
خشت فحضنه ولفت ايديه عليه..
وهو يضحك ويقول:فزغوله مكركبه..
🍁🍁🍁🍁
فالصاله..
كانوا رانيا ودلال ورفقه لاهيات يشوفوا صور ع تليفون دلال ويهدرزوا عليهم..
اما نور اللي كانت ترضع فولدها كانت سرحانه..
وتفكر فاللي صار فالجامعه...
تحاول تهرب من التفكير فيه تلقى روحها موليتله غصب عنها وترجع تتفكر فالحوار اللي صار بيناتهم وكل ماتجي تفسره ترجع تهرب من التفكير فيه من اول وجديد..
استاقظت وشبحت لولدها لقاته موقف رضاعه وراقد..
ساوت روحها..وغطت ولدها زين وحطاته فالمندار اللي جنبها..
فجأة..
رن جرس الحوش..
دلال:جو جو..
ناضوا البنات ساووا الصاله كويس وطلعوا منها بش يستقبلوا الضيوف..
فات قدامهم عماد ومشي طلع قبلهم..
ورزان وراه...
وقفوا ورا الباب الدخلاني....
عماد استقبل صحابه ودخلهم للمربوعه..
بعدين طلعت دلال استقبلت النساوين ودخلتهم داخل...
رزان بإبتسامه:مرحبتين مرحبتين آنستونا..
ايناروا بإبتسامه:الله يآنسك..
وسلموا ع بعض بالأحضان..
وباقي البنات قعدوا يسلموا ع تاله وارملة سيفاو وخواته ومرت منير..
بعدين سلمت عليهم رزان...
ودخلوهم داخل للصاله...
💕هدرزوا شويه...
وبدت الضيافه..
ورفقه تصور بالحاجه...
عصير وماكرون...
بعد شويه شاهي وحلويات والهدرزة والضحك ماوقفوش..
كذلك عند الرجاله برا..
وقعدوا هكي لعند ماآذن المغرب وصلوا..
بعدها خشوا دلال ورانيا ورفقه للكوجينه يوتوا فالعشي..
فهالوقت..
جي مروان لحوش خوه اللي عزمه ع العشي..
تيفسا بضحكه:نهنيك بجديات مواضيع راقيه وكلام حلو وتقديمك ممتاز..
مروان ابتسم بإحراج وقال:تسلم بارك الله فيك..
منير:هو صح اللي قلت عليه ياتيفسا لكن في عندي نقد بسيط مواضيعك اغلبها منكدة وحزينه وتقليب مواجع..
عماد بضحكه:صدقت فيها..
مروان بإبتسامه:هادي الحياة يامنير اني هني نطرح مواضيع تمس الناس..
منير:لكن الناس يبوا شن يخفف عنهم شويه..
مروان:اوكي اني مرة مرة ندير فحلقات فرايحيه بالذات ليالي الخميس..يعني مرة هكي ومره هكي لازم نوازنوا ونديروا حاجه حتى لو كانت ترفيهيه تنفع اللي يسمعولنا ولو شويه
منير ابتسم وقال:ماعندي مانقول الحق غلبتني..
موسى:ربي يحفظك يامروان
مروان ابتسم وقال:تسلم.
🍁🍁🍁🍁
فالصاله
ع اساس اخت صاحبه وتبي تتعرف ع مرته وادير معاها صحبه وهكي يعني..المهم قعد وين يجي صاحبه يجيب فأخته معاه..تصاحبت هي ومرته ولوا صاحبات صاحبات لدرجة انها بدت تحكيلها حتى فأسرارها الزوجيه..وبدت تجيها للحوش من غير مايجيبها خوها ومرات يحطها ويمشي
رزان بإنتباه:وبعدين؟!
مرت منير:مرة قالت جتني بعد العصر وكان راجلها مهناش وهي قالت بتخش دوش ولأنهم واخدين ع بعض عادي خشت للحمام وخلتها بروحها..قالت واني ندوش فجأة اذكرت اني حاطه طنجرة الفاصوليا نطبخ فيها ع النار وماطفيتش عليها لبست دشمبر وطلعت من الحمام للكوجينه ع السريع..قالت واني طالعه سمعت اصوات ضحك وكلام بايخ ينقال بمياعه قالت مشيت وتبعت الصوت لين وصلت فالسقيفه..وكان نقوللكم شن شافت..
نور واعصابها تالفه:شني!!؟
مرت منير:شافت ياحنه راجلها شاد اخت صاحبه فالتركينه والباقي مش لازم نشرحه..
رزان حطت ايديها ع خدودها وهي مصدومه..
ونور ارتسمت ع وجهها ملامح الإشمئزاز..
ايناروا بصدمه:شن دارت بعدين؟..
مرت منير:من صمتتها ولت للحمام وقعدت فيه قريب نص ساعه وهي مقعمزة ع حاشية البانيو تحاول تستوعب اللي شافاته..بعدين طلعت..ووين طلعت مشت لدارها لمت قشيشها واتصلت بخوتها يروحوا بيها..
وقتها هو كان منتلف والكلبه متاعه قاعده فالحوش وين رتها طالعه بشناطيها قعدت تجري فجرتها خيرك يافلانه علاش ديري هكي ماردتش عليها ولاقدرت حتى تشوفلها..
لين جو خوتها وروحوا بيها وحكتلهم كل شي مشوله عطوه طريحه قريب قتلوه وخلوه يطلقها..
رزان بأسف:يانااري عروسه جديده الزفت ماصكرت السنه!!
مرت منير:واخدها علاقه وحب وغرام شوفي شن صار..
تاله:النماذج هادي ماتعرفش الحب اللي يحب حق مايخونش..
رزان شبحت لنور بألم وقالت:صدقتي اللي يحب حق مايخونش..
ونور كانت وقتها سرحانه فالقصه اللي سمعتها وعقلها يرفع فيها ويجيب..
ايناروا:ربي يباعد علينا بنات الحرام..
وحده من خوات سيفاو:اللهم آمين..
نجوى اخت سيفاو:كلا انتي يارزان احمدي ربك ليل ع الراجل اللي عندك ايام كان خاطبك مايقيمش فعيونه فالبنات ع قد مايديروله وقصته مع ناهد خير دليل..
اخت سيفاو التانيه:نذكر فيه نهار جي بيهد ع حوشهم يقول لموسى اني خاطب ياموسى بيديرولي معاها مشكله..قداش وجعني وقتها وجي خاطري نمشي لناهد نعجنها طريحه..
ضحكوا..
إيناروا بضحكه:قصة حب عماد ورزان من ماشهدش عليها ومن يعرفش قداش عماد يموت ع رزان يقول هادي بنية قلبي.
ابتسمت رزان بخجل..
مرت منير:ربي يخليكم لبعض دوم ويبعد عليكم ولاد وبنات الحرام..
رزان بإبتسامه:اللهم آمين..
ونور تشوف لرزان وهي مبتسمه بس من داخل كان صدرها مغموم ومطبق..
برا...
دلال:قيمي هادي روفي حطيها حدا الباب..
رفقه ساوت وشاحها وخدت الصفرة رفعتها وطلعت بيها..
وصلت بيها للباب وحطتها حداها..
طق الباب..
فتحت الباب ع بالها عماد..
طلع فوجهها مروان..
هو لما راها انتفض قلبه وهو انتفض معاه..
لكن هي طول لفت ومشت بسرعه..
قعد واقف لحظات وهو يمسح ع لحيته وشعره...ويحاول يرجع لوعيه..
بدي خدي نفس وخش طبس رفع الصفرة وطلع بيها..
🌴🌴🌴🌴
سمح القفطان..
حنين:ايه..
الصديق مد خده وقال:هيا..
ابتسمت وقربت لبوها باساته من خده..
هو ابتسم..
شبحلها الصديق وقال:تعالي..
قربتله..
حط فجيبها باكو مربع ومسطح صغير وقال بصوت واطي:عطيه لماما..
حنين:باهي..
الصديق:ردي بالك تخلي حد يشوفك..
حنين:باهي..
قرص خدها ضحكت بعدين قالت:باهي نبي نخش نوري لماما قفطاني..
الصديق بإبتسامه؛عدي وسلمي عليها واجد..
حنين:باهي..
خدت الكيسه ومشت للباب وقفت ع روس صباعها فتحاته وطلعت خش محمد..
لقي الصديق واقف قاله:سامحني عطلتك ع خدمتك..
محمد ابتسم مجامله وقال: مافيش مشكله..
مشي الصديق للباب وقال:تصبح ع خير..
محمد:قدامك كل خير..
طلع الصديق لبس كندرته..
وطلع محمد وراه يسقد فيه..
فالحوش...
فدار البنات..
غاليه:يهبل يهبل يهبل عليك ذوق عند الصديق..
حميده بإبتسامه:ايه ذوقه حلو...
حطت حنين يدها فجيبها وطلعت الباكو ومداته لأمها وقالت:هدي ليك..
غاليه قعدت تشبحلها..
حميده خدت الباكو وهي متفاجئة فتحاته..
لقت فيه تعليقه فضه مطلية بالذهب بسيطه..
تعليقه وخراص وخاتم...
غاليه بإبتسامه:غير بالله عليك زيدي فكري..
صكرت حميده الباكو بإنزعاج وقالت:وين يجي مرة تانيه بنردهله ومشت طول طلعت من حداهم..
حنين:ليش عصبت؟!
غاليه تنهدت وقالت:قوليلي شن جابلك تاني غير القفطان..
حنين فتحت الكيسه وبدت اطلع فالحاجات التانيه..
غاليه تشوفلها بضيق..
🍃تبي اختها ترجع للصديق ع خاطر حنين🍃
🍁🍁🍁🍁
بارقه...يابارقه..تي وين عدت المراة؟!
شوي جاته وخشت وهي ترقص وتغني..
قولي وش تبي...وش تبي..قولي وش تبي
وش تبي..
وصلت فيه وقعدت تنخ وشعرها يضرب فوجهه..
قولي وش تبي وش تبي..
حسن:هههههههه..تي بطلي يامهبوله..
شد شعرها ولفه ع يده بش وقفها وهي تضحك..
البارقه بضحكه:شنو تبي؟
حسن بإبتسامه:الكتيب وين..
اشرت بيدها ع قجر الكامدينو وقالت:هوينا..
طلق شعرها ومشي للقجر فتحه وطلع منه الكتيب..
البارقه:شنو تبي فيه؟
حسن:شن دخلك..
شداته من ذراعه وقال؛حي عليك كان تاخد عليا..
حسن:ههههههه...قربلها باسها وبعد وقال...متلفه..
طلقاته وهي تبتسم بخجل..
وهو ضحك بعدين مشي طلع من حداها..
البارقه:آاااه مقنينتك ياحسن..
فجأة..
حطت يدها اسفل بطنها وهي حاسه بوجع...
كان شديد..لحظات واختفي..
البارقه بألم:اففف...استغفر الله..
التفتت للسرير وانطرحت عليه..
🍁🍁🍁🍁
الساعه 10:00ليلا..
فم الباب..
رزان وهي تسلم ع مرت سيفاو:بالله عليكم عاودوها..
مرت سيفاو:إن شاء الله فخلاصك..
ايناروا:سامحونا تعبانكم وكلفناكم..
دلال ورزان ورانيا باصوات متقطعه:
ريت هالحاجه الكبيرة مافي شي من قيمتكم...مادرنا شي...
اخت سيفاو:بارك الله فيكم..
رن تليفون اخت سيفاو:هيا موسى يتصل..
نجوى:هيا وصال..شبحتلهم وقالت..تصبحوا ع خير..
كلهم ردوا:قدامكم كل خير..
وطلعوا...
ايناروا:هيا تاله تيفسا رن عليا..
تاله:هيا..
ايناروا:ياريت تتفضلوا عندنا المرة الجايه إن شاء الله..
رزان:إن شاء الله..
ايناروا وتاله:تصبحوا ع خير..
ردوا:قدامكم كل خير..
ومشوا طلعوا...
صكرت رزان الباب وشبحت للبنات:خشوا خيركم مصبيات هنى..
رفقه اللي كانت لابسه بالطوها ووشاحها:جاني قيس بنطلع..
رن تليفونها ردت:هيا طالعه..
صكرت وجت للبنات وسلمت عليهم بالوحده..
بعدين فتحت الباب وطلعت وصكراته وراها..
وهي ماشيه..
كان قيس واقف ع مروان ومالك وعماد وسند..
مروان قعد معاها بعيونه وعماد يشوفله..
ومالك يدوب شبحلها شبحة كره..
ركبت سيارتها...وصكرت الباب وشغلتها..
قيس:هي..مالا..نشوفوكم ع خير..
عماد:مش تقطع تعالى ورينا وجهك حتى فالمحلات..
قيس بضحكه:إن شاء الله..تصبحوا ع خير..
ومشي طول طلع من الباب..
بعد طلع طلعت رفقه بسيارتها برا...
مشت وخوها مشي وراها...
سند:حتى اني خلاص النوم نازل عليا..
مالك:والله حتى اني..
عماد:هدا الشتي يقولك خود مخده وبطانيه وارقد..
سند وهو يشوف لتليفونه قال بضحكه:مايبي كان النوم..
اتصل برانيا وقال:هيا رانيا..بعدين صكر...
مالك:حتى اني مروح خلاص..
☘واتصل مالك بنور..
وطلعت هي ودلال..
دلال فسيارتها وهما ومروان وراها لين وصلوها للحوش بعدين روحوا..
فالطريق..
نور كانت ساكته وسرحانه ومالك مستغرب فيها..
مالك:اشش..نوارة..
نور:اممم..
مالك:سمعينا صوتك..
نور تنهدت وقالت:نعسانه ونبي نرقد..
مالك :والله حتى اني..باهي قوليلي شن جو العزومه..
نور من غير نيه تجاوب:حلوة..
مالك:شكلك بترقدي رسمي..
نور:اممم..
مالك:هي قريب نوصلوا خلاص..غطي انيس كويس..
نور شافت لولدها ساوتله غطاه بعدين رجعت سرحت وهي تشبح للروشن...
🍁🍁🍁🍁
رزان وهي تحول فذهبها:والله البنات ماخلوني نمس حاجه..
عماد وهو متكي ع السرير:لقيتهم زي الوخيات..
رزان بإبتسامه؛وخياتي هما..
ابتسم عماد..
جت رزان للتوته الشتويه اللي لابستها وبدت تحول فالقفطان..
شويه وعماد:ههههههههههههههههه..
رزان بضحكه:ع شن تضحك يابارد..
عماد؛ههههههههه والله فضيعه يابازوزتي الحمل مخليك تحفه..
رزان بضحكه:صامت..
عماد:ملحيني..
ضحكت رزان..
كملت لبس توتها..
وولت للزيانه رفعت شعرها كعكه وبدت تمسح فالمكياج بعدين قالت:مودي شن صار فالمشيه للسوق..
عماد دار روحه اطرش..
رزان؛عماااد..
عماد:هممم..
رزان؛السووووق..
عماد:يوووووق..
رزان:علااااش باهي!؟
عماد:اففف..رزونه ماتعصبنيش عليك قلبي واطلعيلي جنوني..كلمه ومانيش معاودها سوق لاااا ممنوع حرااااام..
رزان سكتت وهي مضايقه وكملت مسح مكياجها...
وهو لهي بتليفونه..
بعد كملت خدت اللي مسحت بيه المكياج ومشت بيه الكوجينه لوحاته فالكناسه..
وولت للدار..
عماد شبحلها وقال؛تعالي..
رزان بزعل:شن تبي؟.
عماد؛تعالي يابطه خيرلك تعالي..بتقعدي حرجانه احرجي لكن وين تجي ترقدي ترقدي هني..وحط يده ع صدره..
هي تنهدت بزعل..
ومشت خشت ع السرير وجاته..
هو فتح حضنه وقعد يغني..
اهو جي اللي مهبلني اهو جي اللي مهبلني..
اهو جي يغار عليا نغار عليه اللي مهبلني..
حطت راسها ع صدره وهي شاده ضحكتها..
وهو ضمها وقال بضحكه:فكرونه..💓
🍁🍁🍁🍁
بعد رقدت ولدها فسريره..
غيرت حوايجها..
ومشت لشنطتها..
طلعت منها هديه اسراء وقعمزت ع السرير..
فتحتها ..
لقت فيها حديدة اسم منقوش عليها..
انيس مالك...
وكانت نقشة اسم مالك مميزه عكس اسم انيس اللي كانت عاديه..
نور قعدت تشبحلها وبس..
ع خشة مالك..
مالك:ايه شن تحكيلنا..
نور:شن بنحكيلك!؟شي..هدرزة نساوين عاديه..
مالك مشي خش حداها فالسرير وهو يقول:خيرك نور حاسك مش ع بعضك..
نور شبحتله وقالت:لا عاديه مافيا شي..مالك
مالك:امم.
نور:قاعد تمشي للعياده اللي كنت تخدم فيها زمان؟.
☘السؤال خلا مالك طول يفكر ان رفقه مقايله حاجه..
مالك:علاش تسألي!؟
نور:هكي وخلاص خطروا ع بالي اليوم لما قالت رانيا حمزة ليه وقت مسيبها من لما ردوه وين خطب خنساء..قلت زعمه مالك علاقته بيهم زي قبل ولا دار زي عمتي اللي قاعده تتواصل معاهم عادي بعد اللي صار لخالتي زينب...
هو حاول يضبط اعصابه..ويخفي ارتباكه ويخلي روحه عادي..
مالك:عادي يعني من لما سيبت الخدمه عندهم نذكر ماشفتش الدكتور معز كان مرتين بس وصدفه..
نور:يعني ماكنتش موجود لما جو لخالتي ع خاطر مشية عماد للحرب؟
هني مالك فكر ان رزان قالتلها بس علاش قالتلها وتوا؟!ع طول وصل للجواب ان رفقه حاكيه لرزان وهما الزوز ياقايللها شي ياملمحين بشي..
مالك ضيق عيونه وقال:نذكر هداكا اليوم ماروحتش من الخدمه حتى بوي لام عليا يالاش ماجيتش سلمت..تعالي هني قوليلي علاش تسألي فيا الاسئلة هادي لشن تبي توصلي مافهمتش؟!
نور بدون مايحس ردت الهديه للشنطه وهي تقول:اليوم لما حكت رانيا ع حمزة خوها كيف صكر راسه ومعاش يبي يخطب بعد ردوه اهل خنساء وكيف رزان قالت ان عيلة خوهم جو لخالتي وكيف هي ماتقبلتهمش خطر عليا نسألك لو علاقتك بيهم قاعده زي قبل ولا لا مجرد فضول..
حمزة...رفقه...رزان..
الاسماء الثلاته هادم قعدوا يدوروا فراس مالك..
حمزة وشاف شي مرة وشك فيه..
معقوله يكون حاكي لرانيا؟!
رفقه وشافت شي..اكيد حاكيه لرزان..
واللي توا قالاته نور سيناريو سريع ألفاته بش ماتحاولش تبينله انها عارفه شي..
هدا كله فكر فيه مالك فهالثواني..
بس حاول كذلك يبين انه عادي وانه مش محل شك ولاإتهام...
رد عليها وقال:تس تس مش زي قبل وانتي عارفه ليش يانور ولاتبي نذكرك..
نور ضحكت وقال:باهي خلاص فوت الموضوع...
مالك شبحلها شويه بعدين ابتسم وقال:شفتك جايبه حاجات معاك واني ميت جوع مالحقتش ع العشي..
حطت نور شنطتها ع السرير وقالت بضحكه:نسخنه ونجيبهولك..
مالك بإبتسامه:تمام..
ناضت نور ومشت طلعت من الدار..
ومالك معاها بعيونه ومازال يفكر..
🍁🍁🍁🍁
تاني يوم..
الساعه 1:30ظهرا...
انفتح باب الحوش..
خش وفيده زوز كياس كبار..
صكر الباب ورمي سبيدروه..
ومشي وهو ينادي:اميي..كيييفو...كيفووو..ياعسل...
نزلت من الدروج وهي تقول:عماد..
عماد وهو ماشيلها:امي..
وصل فيها بعد كملت نزول وطول خداها فحضنه وباس راسها وقال:شن جوك اليوم..
كفايه بإبتسامه:الحمد لله..انت كيف حالك اليوم..
عماد:الحمد لله..
مابتش تسأل عن رزان مش اول مرة عماد يوميا لازم يجيها وفكل مرة كانت تسأل عن حاله ومادورش فرزان بكل وهو فاهم ليش..
شد يدها وقال:تعالي الصاله..
ومشوا مع بعضهم للصاله..
خشوا مع بعض...
قعمزها وقعد واقف قدامها مدلها الكيسه وقال:شوفي وعطيني رايك..
خدتها وفتحتها طلعت منها قفطان مناسبات مناسب لعمرها حلو بالمرة وفخم..
ابتسمت وقالت:ليش مكلف ع روحك ولدي وانت كيف طالع من مواويل مصاتك مصان..
هو فهم تلميحها لكن مادورش:فداك ياغاليه اني كلي ومااملك ليك ياحبي..
كفايه:ربي يحفظك ويحميك ويرضى عليك..وقالت فنفسها"ويهديك"..
عماد:ومايحرمني منك ياضي عيوني..مدلها كيسه تانيه وقال..هادي للشفشه نورهان..
كفايه خدتها وقالت:ربي سلم وخيها ولايفرق بيناتكم ويبعد عنكم كل من يبي فيكم سو ويفرقكم
تلميح تاني عماد متعود يسمعه ويطنش فيه..
مشي قعمز حداها وقال:مافيش قهيوه..
كفايه:قهيوة شني توا وقت غدي خل نوض نسقيلك..
هو يبي يروح يتغدا فالحوش مع مرته دايرتله غدي هو طالبه منها...
اول مرة يطلع من خدمته الظهر ع خاطر الغدي وقال فباله نخطم نشوف امي بعدين نروح..
لكن توا خلاص مايقدرش يقول لأمه بنروح نتغدا مع مرتي من غير شي كارهتها..
ابتسم بقلة حيله وقال:باهي..
🍁🍁🍁🍁
رزان كانت حاطه يدها اسفل ظهرها وهي تسقي فالفتات اللي ناضت من الصبح دارت الفطيرة متاعه ودارت جنبه امطبن...
كانت تاعبه من وقفتها طول النهار...
وهي تسقي رن تليفونها بنغمة رساله..
حطت الساقم فالطنجره ومشت تشوف فيه..
خداته من ع الطاوله وفتحت الرساله...
(حبي بنعطل اليوم سامحيني)..
هي ابتسمت وقالت:توقعته مش حيروح قبل العشيه..شبحت للصونيه وقالت..نحطها فالمكرويف بعدين يتعشاه وخلاص..
كتبتله رساله وبعتتها..
(ولايهمك مودي)
☘هو قراها وابتسم بضيق...
"عماد تعال للكوجينه"...
عماد:هيا جاي يام...
☘ومن غدي صبح فالشاهي ومن الشاهي "قيل ياعماد" قيل عماد وناض قبل العصر صلاه وناوي بعدها يروح..
اقعد ياعماد اشرب معاي قهوة..
وقعد عماد شرب قهوه..
ويخش مالك بمرته وولده ومعاهم نورهان اللي كانت عندهم..
وشداته نورهان...
وهكي عماد لقي روحه قاعد عندهم لين آذن المغرب...
ع خشة بوه...
فرح لما راهم..بالذات حفيده اللي خداه من امه وقعد يلاعب فيه...ويهدرز على ولاده..
بس وهو يهدرز سأل عماد وقال:امتى جيت انت..
عماد بشي من الضيق:من الظهر..
ضيق عيونه وشبحله وقال:رافع مرتك لحوش عمها؟
كفايه مطت شواربها بملل ونور تشبحلها..
ومالك يشبح لخوه..
عماد:تس..قاعده فالحوش.
سعد:كييف!!مخلي مرتك بروحها الوقت هدا كله؟!
كفايه من غيظها تلقائيا قالت:شن بتاكلها الغوله!!
نورهان شدت ضحكتها..
اما سعد شبحلها بحده...
وعماد برفعة حواجب..
كفايه:قصدي انت زمان تخلي فيا بروحي وتمشي تخدم ماصارلي شي..
سعد :كنت ساكن فوق حوش اهلي وامي الله يرحمها ماكانتش تخلي فيك بروحك واني مهناش..الله يرحمها قداش كانت تحبك وتقول كفايه بنتي التانيه..
كفايه برفعة حاجب:الله يرحمها..
ناض عماد..
هي شبحتله..
عماد بشي من الغضب:تصبحوا ع خير..
ومشي طول طلع من حداهم...
كلهم دارو رواحهم عاديين لما شبحتلهم كفايه..
بالذات سعد اللي قال لنور:بيجي ليك انتي..
ضحكت نور وقالت:كلهم يقولوا فيها ماعدا مالك..
ضحك مالك..
اما كفايه ناضت من مكانها وهي ماشيه سمعت سعد يقول
"وتي العشي"..
بلعت ريقها وقالت:حاضر...وطلعت
وبنتها ناضت ومشت طلعت وراها...
وسعد لاحظ هو ونور...
🍁🍁🍁🍁
طول الطريق كان عماد يسوق وهو متنرفز من أمه هلبه ع قد مايدير معاها مافيش فايده..
وصل لحوشه..
خش بالسيارة ودرسها..
ونزل منها الحاجات..
ومشي طول للباب..
وهو يفكر فرزان اللي خلاها بروحها لعند آذان العشي..
ولأن ايديه كانوا معبيات..
طق الباب برجله...
داخل..
هي كانت مقعمزة تتفرج ع مسلسل الحب الاعمى وهايمه فبوراك..
لما سمعت طقة الباب انخلعت..
ناضت بالشوي عليها ومشت طلعت من الصاله وهي تقول:هيا..
طق مرة تانيه..
ضحكت وقالت:ياودي باهي..
وصلت فالباب طق مرة تالته..
رزان :هههههههه..
فتحت الباب وهي تغني..
اهو جي اللي مهبلني اهو جي اللي مهبلني..
اهو جي طق الباب فتحته اني اللي مهبلني..
وعماد يضحك وفرحان من داخل ان جوها عادي ومش زعلانه..
صكرت الباب وهي تشوف فيه شن جايب قالت:واااي منك انت واااي..
هو حاط الحاجات وجاها وقال:خيرك تعيطي..طبس عليها وهو يقول..اها خيرك..وعض خدها ورزان تضحك..
بعدين باسه وبعد وهو يقول:خشي قيسهم..
رزان قامت وحده منهم ومشت للصاله وهي تقول:خل يتم مسلسلي قبل..
عماد خدي باقي الكياس ولحقها وهو يقول:غير كان نعرفه ع شن يحكي هالمسلسل اللي واخد عقلك..
وصل فالصاله..
لقاها مقعمزة بالكيسه وتتفرج...
هو شبح للشاشه..
ويشوف عمك بوراك اوزجفيت متربع فيها..
تبدلت ملامح ضحكته للحده وهو يقول:هدا المسلسل اللي تتفرجي عليه!!
رزان شبحتله واذكرت ان عماد يغار منه ومايطيقاش بكل من ايام حريم السلطان..
ابتسمت بربكه وقالت:ايه قصته سمحه وتجنن يحكي ع واحد ووحده ولا..
وقعد تبع فيه بعيونها كيف بعد ماحط الكياس مشي خدي الريموت وغير وحط ع قناة الخضراء..
هي ضحكت بصدمه:عماد!!..
قعد يحرك فيده اللي فيها الجهاز ويقول وهو رافع حاجبه:تحركي قيسي الحوايج بش كان في حاجه ماجتش عليك انرد غدوة ونجيب غيرها..
ناضت وهي تضحك وتقول:المهم مانطلعش السوق..
قعمز وحط رجل ع رجل وماباش يرد عليها..
وهي مشت خدت الكياس وطلعت من حداه وتضحك..
🌴🌴🌴🌴
فحوش بوها...
كانوا امها ومرت خوها يتفرجوا ع نفس المسلسل..
وحداهم ايهم راقد..
سعيده؛اني مانحبه هدى اللي سماه كمال يعز عليا امير الحق..
اريج:ههههههههه..
سعيده بضحكه:والله حق شخصيته مازال احلى بواجد..بالله شوفيه كيف يدوي ويمشي وكيف يشبح والله احلى من هداك...
اريج بضحكه:صح شخصيته احلى بس كمال يهبل..
سعيده:كيف رزان من زمان قالبتلي بيه راسي..
ع خشة ميلاد اللي كان يسمع فيهم :من هو هدى اللي احلا وشخصيته ومش عارف شنو..
اريج زي المراة الطيبه خدت ولدها وانسحبت من حداهم وهي شاده ضحكتها..
اما عمتك سعيده رفعت حاجبها وهي تتفرج مابتش تعبره..
قعمز حداها وهو يشوف للتلفزيون وقال:تو هالشكالات هاديم شن فيهم ماينشاف..
سعيده تجاهل تام..
ميلاد شبحلها وابتسم ع جنب ونخص ركبتها بسبابته وقال:نحكي مع من اني..
سعيده:ماتشوفش فيا نتفرج..
ميلاد بضحكه:كان تقولي ليش قالبه عليا ليك شهر لتوا..
سعيده:عارف روحك انت هدى ليش ماسألتش كان تو..
ضحك وقال:ترا تعوذي من الشيطان يامراة ياما قلتي وفوتنا..
شبحتله ع جنب...
☘من باب الحوش الخلفي خش توفيق..
وهو ماشي شاف مرته فدار المعيشه مقعمزة بروحها استغرب..
خشلها وقال:خيرك مقعمزة بروحك هنى..
اريج بضحكه:تعالى..
ابتسم وهو عاقد حواجبه وجاها:شنو في؟
اريج:عمي وعمتي بروحهم فالصاله يرضي فيها شكله..
ضحك توفيق وقال:كان نعرف شن اللي مخليها حرجانه منه شهر كامل..
ضحكت اريج..
طبس توفيق خدي ولده وهو يقول:بسم الله..شبحلها وغمز وقال..هي صبي نرقوا لشقتنا خل نرضيك حتى اني..
ضحكت اريج بخجل وناضت ومشت طلعت هيا وياه..
فالصاله...
سعيده تتفرج..
وميلاد يشبحلها برفعة حاجب..
نرفزه استكرادها حمق وقال:وحق الله الراجل اللي واخديته بنات البلاد كلهن تمننه حتى وين عديت لبريطانيا الأنجليزيات ما خلنيش فحالي وعدي انشدي نجاة قوليها شن يحكيلك جمعه عن سفرة بريطانيا زمان...
هي قعدت تشبحله بصدمه..
ناض وقال:مش غير زمان لتو وحق الله كان ننوى الف حوش يفتحولي ببيانهم...
ومشي من حداها وهو حامق ..
لما فات من الصاله رفع حاجبه وهو مبتسم بمكر..
سعيده بصدمه:ينوى شني يامصيبتي السودا!؟..
طلقت الجهاز وناضت وراه بسرعه...💕
🍁🍁🍁🍁🍁
كان مقعمز فالصاله وسرحان ومازال يفكر فحال امه مع مرته ولأمتى بيقعد هدا حالها..
شويه..
وطلعته وهي لابسه اللبسه اللي خداهالها...
هو لما شافها:اشيه اشيه اشيه..عسسسسسل..
هي ضحكت وقالت:هو ذوقك حلو من زمان نعرف..بس يعني وين المشكله لو مره طلعت اخترت بروحي؟!
عماد:طلووع للسووووق لااااااااا..نقطه اخر السطر..
رزان بغضب:ديكتاتوري طاغيه متجبر ..
عماد :وطلوع للسوق لااااا..
رزان:متخلف رجعي ..
عماد:السوق لااااااا..
رزان بعياط :حراااام علييييك حرااااام..
عماد وهو يرقص فحواجبه :السووووق لااااااااا...
رزان برفعة حاجب:مالا دور وين ترقد..
ومشت تجري للدار في اخر لحظه صكرتها فوجهه..بالمفتاح..
عماد:تو نوريك ياملعقه..يابازوزة تو تشوفي..
رزان:هههههههاااااه..
عماد تنرفز:راهوناخد عليك 3 فنفس الليله..نديرها وتعرفيني..
طول انفتح الباب..
رزان وهي شاده البطانيه ومخده فيدها:تهدد فيا ولا..هاك خودهم..
حطتله البطانيه والمخده قدام.الباب وصكراته..
عماد بصدمه:وصلت معاك لهني..بااااااهي..
وخداهم ومشي للصاله وهو حامق منها..
وهي كذلك كانت مضايقه خاطرها فطلعة السوق هلبه هو حارمها منها..
في نساوين يموتوا فالسوق وهي منهم..لما ادبش لازم تطلع بروحها وماتروح لين تكون لايده ع المحلات كلهم ايام كانت بنت..
ولما منع عنها السوق بعد الزواج حاولت تتأقلم مع الوضع لكن ماقدرتش بالذات لو حكوا قدامها البنات ع طلعاتهم للسوق..
🍁🍁
مرت الساعات..
وعماد مشي للكوجينه فتش فيها ولقي صونية الفتات والمبطن سخنهم ولحس الصواني لحس...
بعدين غسل الماعين...
ومشي ولى للصاله وهو يضحك ع حاله...
بعدين قعمز كسد ع التلفزيون...
وهكي لين جت الساعه 12:00..
هي...
كان واجعها خاطرها عليه...
ماقدرتش ترقد غمضه متعوده نومها بس يكون فحضنه تتوسد صدره وتريح فنومه هنيه...
ناضت من السرير ومشت طلعت من الدار..
للصاله...
وين وصلت فيها وخشت لقاته راقد ع المندار وحداه دفايه..
وجعها هلبه..
مشتله وصلت فيها وقعمزت حداه..
رزان؛مودي..عماد..عمدة قلبي..
عماد وهو حاط ذراعه ع عيونه:بري ارقدي بري..
رزان:زعلان حبي؟..اسفه ياقلبي..
ماباش يعبرها.
رزان:مودي مش قصدي طيرتهلي ماك..
ماباش يرد..
رزان:عماد..
لارد..
هي عاد من غير شي دمعتها ع سبله يابال حامل والهرمونات حالتهم حاله..
بدت تبكي..
هو حول ذراعه وقال:تعالي جاي تعالي..
ضحكت من بين دموعها وجاته..
عماد:عطيني بظهرك ..
ضحكت تاني..
ورقدت حداه وهي عطياته بظهرها..
هو غطاها كويس..بعدين ضمها وقال:اسكتي وارقدي ولاكلمه..
رزان بضحكه:حاضر..
غمضت عيونها..
وهو غمض عيونه وابتسم...💓
🍃🍃🍃🍃
وعدا يوم....
وجي اللي بعده...
والكل كانوا متوجهين للبلاد كعادتهم فطريق وحده مع بعض بش يحضروا عرس الهادي...
ونقولوا..
ربي يتمم ع خير...🍃
...يتبع....
