#العشق_المتمرد"عندما يزهر الليمون"
#جمان_فريد
الجزء 130 من القسم الاخير "2"
⭐..
تصبحي ع خير حدود..
حدهم ردت عليهم بإبتسامه:تصبحوا على خير..
ومشت متجهه لحوش جدها..
كانت رزان واقفه مع نور ورفقه قدام الباب يشوفولها..
نور:مسكينه مابعدها..
رفقه:تحاول تكون قويه..
رزان تنهدت وقالت؛كلنا نفس حالتها..
ارتسمت ع وجه نور ورفقه ملامح الحزن..
فجأة رن تليفون نور بنغمة رسالة ماسنجر..
شبحولها رزان ورفقه..
هي قامت تليفونها وهي مبتسمه شافت الرساله..
(نبي نكلمك عمري استاحشت صوتك)
ساوت وشاحها وقالت:نستأذنكم بنات..
ومشت من حداهم..
والزوز يشوفولها بضيق..
راجتها رفقه لين بعدت عنهم بعدين قالت:تعرفي حاجه رزان؟
رزان شبحتلها وقالت:رفقه انتي تعرفي؟
رفقه وهي تشوف لنور كيف تتمشى وهي تتكلم بالتليفون وابتسامتها ع وجهها..قالت بألم: ايه ليا وقت..
رزان بتعجب:ليش ماقتيلي؟
رفقه شبحتلها وابتسمت بتهكم وقالت:خفت نطلع فاهمه غلط..
ابتسمت رزان ابتسامه ألم ممزوجه بالتهكم ورجعت تشوف لنور ورفقه حتى هي شبحتلها..
🍃نور بضحكه:لالا وين عاقل شويطين مابطلش حركه يبي يطلع خلاص..
مالك ابتسم والدموع ينزلوا من عيونه
🍁🍁🍁🍁
تغسل فطروف البطاطا اللي بدير بيهم الطاجين..
خش عليها راجلها وقال:ياودي مش لازم حتى حاجه وحده ساده..
مرام؛لا وين نهاري حاجه وحده من كثر جيانهم هما؟
ابتسم بعقده حواجب بعدين خش رفع كمامه وقال:نعاونوك..
ضحكت وقالت؛اطلع اطلع..
جاها وقف وراها وحط ايديه ع راسها وبدي يلخبطلها فشعرها وهو يقول:مانيش طالع وقولي توا شن تبي ندير معاك..
مرام :اااي ههههههه..ياودي..ماتعرفش..
قعد يخض فراسها وهو يقول:قوولي..
مرام:ههاااااههههه..باهي...باهي..
طلق راسها وضمها وقال:شن ندير..
مرام:طلع المكرونه المبوخه من الدولاب..وافتحلي حكة الطماطم واغسل اللحم لو تقدر..
وخر عنها وخبط كتافها خبطه خفيفه وقال بتشديد ع الحروف:ok..
ولف..
حط ايديه فوسطه وهو عاقد حواجبه قال:وينهن الحاجات اللي قلتي عليهن؟
مرام:ههههههه..
🍁🍁🍁🍁
لبسوا البنات وطلعوا لخوتهم..
مشوا كلهم فسيارة حميد..
ميلاد راكب جنبه والبنات لتالي...
وطول الطريق وهما يهدرزوا ويضحكوا ويسترجعوا فذكريات ايام وزمان..
وكان لايخلوا جوهم من المناقرات بين زينب وميلاد..
وهكي لين وصلوا لحوش هانيبال..
هانيبال لما وصلوا مشي فتح باب الكونشيلو...
لما شافهم مع بعض ضحك من قلبه..
حس روحه فرحان هلبه ومش عارف علاش..
تمنى هديكا اللحظه لو يقدر يجيب باقي خوته...
وتكون لمة خاصه بيهم هما بس..
لكن مع الأسف بينه وبين واحد منهم خلاف كبير صعب جدا حله حاليا..
صكر الباب وجاهم وهو يقول:مرحبا مرحبا مرحبا..ياأهلا وسهلا...💕
🍁🍁🍁🍁
حطت الصفرة وقالت:عشاك حنينه..
فاطمه كمكمت سبحتها فبعضها وهي تقول:ربحتي يابنيتي..
حطتها ع تركينه وسمت بالله وبدت تاكل..
دلال مشت طلعت من حداها..
شافت للصاله لقتها بنتها تتعشى مع حنين وروان..
بعدين التفتت القدام وكملت طريقها للكوجينه..
وصلت فيها وخشت..
لقت غاليه تتكلم بالتليفون:باهي ياخالي..مرحبتين بيكم....حاضر....سلم ع عمتي كامله والبنات.....يوصل...ان شاء الله......قدامك كل خير....بالسلامه..بالسلامه..
نزلت التليفون وشبحت لدلال وقالت؛خالي بيجي غدوة ان شاء الله..
دلال:سمع بحنينه؟
غاليه:لالا ماقالي شي عنها..تقريبا هدي جيته فالشتي..
دلال بقلق:زعمه عرفوا بمشية مؤنس لسرت..
غاليه "وكان يعلموا بعبدالرزاق!":لالا ماظنيش..
دلال :ربي يستر..
غاليه تنهدت وقالت:ربي يستر..
🍁🍁🍁🍁
مقعمز فمكتبه سرحان بتفكيره...
طق الباب..
استاقظ وقال:تفضل..
انفتح الباب وخش صديقه وقال:توقعتك روحت..
عبدالسلام؛شويه تانيه وبنروح..
خش عبدالرؤوف وقعمز مقابله وقال:باهي اللي ماروحت الموضوع اللي نبيك فيه يخليني نلحقك لحوشك..
عبدالسلام بإستغراب:إن شاء الله خير!..
تنهد وقال:تعرف اكيد احفاد الحاج مختار كلهم..
عبدالسلام:ايه..
عبدالرؤوف:واحد منهم..استشهد فالحرب من20يوم تقريبا..
عبدالسلام بصدمه:مني؟
عبدالسلام:ولد محمود الله يرحمه سماه عبدالرزاق..اني ماعنديش خلفيه كبير عن الشهداء اكثر من احصائهم العددي..امس بس علمت من قريب ليا مقاتل غادي جي لمكان الإمدادات اللي كنت موجود فيه وقتها..سألته ع الاوضاع وهو عطاني المستجدات..المهم كلام جاب كلام قعد يحكيلي ع الناس اللي حاربت من سرت ذكرلي اسمه وقال صغير فالسن...
عبدالسلام وهو مصدوم؛واحد من التوأم مواليد 96 ولا97..
عبدالرؤوف بأسف:الباين ان ماعندك علم وبالتالي حتى الحاج مختار وعيلته مايعلموش..
عبدالسلام حرك راسه ايمين ويسار بالنفي بعدين قال:اصلا هو كلمني وقالي انه غدوة جاي لليبيا ويبيني نكون موجود فالبلاد لو ماكنتش مشغول..
عبدالرؤوف قعد يشبحله شويه وهو يفكر بعدين قال:نعدي معاك؟
عبدالسلام :تمشي معاي؟
عبدالرؤوف:طبعا لو فيها كيف؟
عبدالسلام غير عيونه عنه وقعد يفكر شويه بعدين قال:باهي..
عبدالرؤوف هز راسه بعدين ضم شواربه لداخل وقال؛قدر الله وماشاء فعل..ناض وقف وقال..نستأذن تو..
عبدالسلام ناض وقال؛خلاص اني طالع..
عبدالرؤوف ابتسم.وقال:هي..
خدي عبدالسلام تليفونه ومفتاح مكتبه ومشي طلع هو وعبدالرؤوف..
🍁🍁🍁🍁
واقف قدام المسبح..
حاط ايديه فجيوبه من الصقع..
كان لابس كبوط ولاف شال ع رقبته وحاط سماعات فوذانه وهو يتكلم بالتليفون..
اصيل وعيونه مليانات دموع:مش عارف يامريم شن ندير..قاعد نهرب وبس..
وين نقابل امه نهرب وين نقابل امي نهرب وين نقابل جدي وجداي نهرب..
مريم ودموعها ينزلوا:مابعدك الحق..بس لامتى بتقعد ساكت..قوللهم وخلاص زي ماقلت لخوه..
اصيل:مريم..نا ماقلت شي لمختار هو علم بروحه منين قلت بنعدي لمزرعة الخيول..نا وين نضايق نقعد فيها..لحقني لغادي وعلم..
مريم وهي ترشف:ردة فعله كانت غير متوقعه ..
اصيل:كان حاس..كان عارف...
مريم تنهدت وقالت:ربي يفرج علينا كلنا والله البلاد هادي معاد ينعاش فيها..
اصيل بألم؛هدى ليش نبيك من تو تهيئي نفسك للعيشه برا..
🍁🍁🍁🍁
فوق..
فدار مختار..
كان مقعمز ع سريره وهو تاني ركابه لفوق..
حاط تليفونه فوقهم وهو شاده بإيديه الزوز والسماعات فوذانه..
ويتفرج ع فيديوات ليه هو وتوأمه ويبكي بحرقه وهو يكتم فبكاه..
《ياودي زيد غادي يالصقه..
عبدالرزاق:ربي حطني معاك فبطن وحده وخلاني نطلع نا وياك فنفس الدقيقه..
مختار:كذاب..انت طلعت بعدي ب4دقايق..
عبدالرزاق:ههههههه مش مهم المهم وراك ومعاك وحنقعد لاصق فيك وكاتم ع نفسك لين نموتوا جميع..
مختار؛انت تموت قبلي واني بعدك..
عبدالرزاق بضحكه:لالا جميع..نموت تموت معاي..تموت نموت معاك..
مختار:لصصقه..
عبدالرزاق:ولا في ئوة فالكون ممكن تفرئنا حبيبي
مختار مط شواربه للأسفل وهو يضحك عليه..
بعدين قال وهو يشوف للكاميرا:شن هالعاهه اللي جبتهلي يمي!》
قلب التليفون ع وجهه..
وحط ايديه الزوز ع جبهته وانهار بالبكي...
🍁ع بعد مسافه بسيطه من دار هو وخوه..
دار امه...
كانت راقده ع السرير وحماتها وعزوزتها حداها يبكوا بصمت وكل وحده شارده فتركينه..
كامله تذكر فخبر موتة ولادها الزوز كيف تلقاته...
وامينه قلبها والعه فيه النار وعقلها عند ولدها الكبير...
🌴🌴🌴🌴
حط يده ع راس اخته وهو يقول:بإذن الله يرجع سالم معافى مافيه سو انتي غير احسني الظن بالله ياكفايه..
حميد:خلاص الحرب شبه قربت تنتهي..محاصرينهم فمكان واحد بس هدا ماقعدلهم وعن قريب يتحرر ان شاء الله ويروحوا كلهم مافيهم شر..
زينب وكفايه برجاء:ياارب..آمين..
🍁فالكوجينه..
نعيمه وهي واقفه ع الحيط متاع الكوجينه ومقابلها هانيبال واقف مربع ايديه..
ومرام واقفه ع اللاوندينو..
نعيمه:الراجل طلبها مرة ورده بوها بعدين طلبها مرة تانيه وهي رداته وتوا طلبها مرة تالته وبوها يبي يصكر الموضوع من عنده..واني مانبيش لأن الراجل صراحه مايتعوضش كامل والكمال لله..والصغار يعرفوه ويحبوه وغير هكي يعرفوا عيلة خالي ويمدحوا فيه ويشكروا يعني حيرضولها تاخده وتربي الصغار معاه وهما مرتاحين...
مرام نزلت عيونها لوطا وهي مضايقه..
هانيبال؛باهي شن المطلوب مني توا اني؟
نعيمه:انت قريب عليها هلبه وهي ديما تقتنع بكلامك تقدر تأثر عليها..حاول تقنعها..اني عارفه انها فالبدايه حتقول لا..لكن انت حاول معاها تعرف كيف تقنعها ياهانيبال..
هانيبال رفع حواجبه بعدين نزلهم وقال؛نحاول..نحاول يانعيمه لكن ما نوعدك بشي راهو..
نعيمه هزت راسها وقالت:نقول ان شاء الله تلين معاك..
ومرام تسمع وساكته وموجوع قلبها ع خوها..
🍁🍁🍁🍁
فم البوابه واقفه وتوصي..
سعيده؛هو مفروض مانوصيك عليها ياغاليه غير باش قلبي يطمن..
غاليه:باهي امتى بتطلعوا؟
سعيده؛الصبح بكري بيرفعني توفيق وبعدين بيولي للزاويه يبات عند نساباته ويروح بمرته اليوم اللي بعده..
غاليه؛باهي..ان شاء الله تحل عويناتها ع خير..
سعيده:آمين..تصبحي ع خير..
غاليه:قدامك كل خير..
سعيده لفت ومشت مروحه لحوشها وغاليه خشت داخل..
ع جية رباب:خيرها مرت خالي؟
غاليه:عزيزة اختها غدوة عمليتها بتعديلها..
رباب:واك خطروا عليا الجياب..يارب يارب نجيب ومؤنس معاي يارب..
غاليه بإبتسامه؛يارب..هي تعالي نخشوا..
رباب:هي..
مشوا الزوز خشوا من باب المروحه وتوجهوا للدار..
وصلوا فيها وخشوا..
لقوا رفقه حاطه راسها ع بطن رزان ورزان تضحك..
والبنات حواليهم يشوفلهم ويضحكوا..
غاليه بضحكه؛تحرك مرة اخري..
رزان بضحكه؛ايه..
رفقه:لما حطيت راسي ع بطنها معاش بي يتحرك الشويطين..
وخرت شويه وهي تشوف لبطن رزان قالت بتكشيخ:تحرك يامعفن تحرك اسمع كلام خالتك..
ورجعت حطت راسها ع بطن رزان..
وهما يضحكوا..
رزان بضحكه؛حيي..
رفقه بضحكه متفاجئة:تحرك تحرك..نجيه ياربي اللي يسمع فالكلام..
رزان بضحكه:مهبوله..
دلال شبحت للمياء وقالت؛شن لمياء مازال ماعرفتيش..
لمياء:الحق المرة هادي مانبي نعرف شي نبيه يجي بخلقه تامه وصحيح بس..وتكمل معاي هالمره..
ارتسمت ع وجوههم ملامح الشفقه..
غاليه:بإذن الله تكمل معاك وحق الله لمته ولا لمتها كلها عليا ماكم حاطين فيها قرش..
لمياء ضحكت وهي متفاجئة..
رباب:ربي يسلم عمتهم..
دلال:ويطول فعمرها هالعسل ويزهي ايامها
رزان؛ويخليها دوم فرحانه ويجبر خاطرها..
بلقيس؛ويفتحها فوجهها وين ماتعدي..
غاليه تضحك وعيونها معبيات دموع..
لمياء:اجعني مانفقدك ياغاليه..
غاليه بضحكه؛تسلمي يارب..
ع خشة حميده:رقدن البنات..
لمياء:ايه حقه علاش نورهان وسهى ماجوش؟
رفقه:سهى قعدت مع امي..
غاليه:نورهان عند عمتها ع خاطر القرايه..
لمياء:واهوا اسيا وروان والولاد جو وعندهم قرايه..
غاليه:نورهان ماتحبش تغيب..
لمياء:اها..!
بلقيس شبحتلها ع جنب حستها تقصقص..
حميده؛وك عليا صقع صقع..
مشت خشت بين بين دلال وبلقيس وتغطت معاهم..
ضحكوا الزوز..
🍁🍁🍁🍁
فالحوش القديم..
نور كانت مقعمزة فالسقيفه تكلم فراجلها رسايل..
وفوسط الحوش من داخل..
رانيا:صقع يابنادم قتلك صقع..
رمزي بضحكه؛اها..هاااه..سرت الماليه لرقبته..
رانيا بإبتسامه :ايوه هكي كويس..
ضحك وربع ايديه وقال:تعرفي رنو...خاطري توا ندير العرس لولا هالظروف بس..
ابتسمت بخجل وقعدت ساكته..
رمزي رفع حاجبه وقال:شكلك ماتبيش؟
رانيا ساوت وشاحها وقالت بخجل :مبردك...ايه حقه تعالى هني وقولي..هديكا السنكوحه قاعده تكلم فيك..
رمزي؛دوارة مشاكل تبي ادير مشكله وخلاص..
رانيا:نبي قلبي يطمن..
رمزي :اااخ منك وخلاص..والله العظيم قعدت نمشي وعيوني فالوطا ع خاطرك
رانيا بإبتسامه:ايوه هكي حبيبي الشاطر اللي يحبني ومايرضاش يدير حاجه تزعلني حتى فغيابي..
رمزي بضحكه:هكي ولاهكي مانديرش وانتي تعرفي..ولازم تعرفي حاجه تانيه اهم..الكليه فيها غيري واجد مش غير زويل خطيبك بيحطنه البنات كلهن فروسهن
رانيا؛لا ياعمري لا..منك انت مافيش هلبه..انت مشيت غادي وريت السناكيح والمساخيط استغفر الله واللي لاتعرفه راجل ولامراة..والهايفين..انت غادي عمله نادره..راجل مصنع منع اشقر وعيونه شهب شخصيه تقتل حبيبي غير مشيتك ساده وصوتك لما تتكلم يدوخ...هدا كله حبيبي مش متوفر غادي..
رمزي رفع حواجبه وقال؛اني فيا هدينا كلهن!؟اووو طلعت حاجه صح..شبحلها بطرف عينه وهو رافع حاجبه اليسار..حافظي عليا زين زين..
رانيا بغرور:انت قاعد فقلبي ومسكرة عليك محبوس حبس لايمكن تتحرر مني..
ابتسم بعشق وقال:اني اسيرك من لما كنت عيل صغير نقرا فالإبتدائي راني..ولين نريح كيف جدي عبدالله واني اسيرك..
ابتسمت بخجل وعيونها لوطا
ع جية نور تكركب ببطنها:حمزة حمزة.!!
رانيا بخلعه :حي عليا!
رمزي:اني بنحط فرقبتي رقبه عارف
رانيا بخوف؛وراس ميزو اطلع..مانبيشي يحرمني الجيان هني..
نور:تي هيا راهو يتكلم بتليفون فمستراح الحوش..
رمزي بعصبيه:اللهم وسع بالي..
ومشي طول طلع من فم البوابه..
نور:هي تعالي للكوجينه ناخدوا حاجه حاجه نديروا رواحنا رافعينهم غادي..
رانيا:هيا هي..
ومشوا الزوز للكوجينه..
ع خشة حمزة للحوش طق الباب وقال؛في حد هني؟
شويه وبانوا عليه..
وحده شاده سخان والتانيه شاده غربال..
حمزة وهو عاقد حواجبه؛شن ديروا..
نور ابتسمت بربكه وقالت:بعتتنا خالتي غاليه.
هو مامشتش عليه غاليه مستحيل تبعت نور وهي بوضعها هدا لكن لأن بنت خالته واجعاته بسبب اللي يعرفه فوتها..
حمزة:باهي روحوا بسرعه ليل وصقع..
نور:باهي..
وخر عن الباب..
مشت طلعت نور ووراها رانيا اللي كانت تتجنب تشوف لخوها..
وهربت طول..
حمزة حرك راسه ايمين ويسار بعدين مشي بطريقه للمربوعه الدخلانيه..
فهالوقت..
روح حميد بخوته من حوش هانيبال...
🍁من روشن الدار شافتهم حميده وقالت؛روحن اللات..
غاليه.بضحكه؛معليشي حميده مرة تانيه نعدوا حني.
حميده شبحت لغاليه ووجهها معكرش قالت:اننننن..
كلهم ضحكوا..
"هههههههه"
دلال بضحكه:يضاحكوا ياحناتي..
رانيا وهي خاشه الفراش:ياريتني لصقت معاهم..
تغطت بالبطانيه..
ع خشة زينب وكفايه ونعيمه..
غاليه:شكلها لمه سمحه.
زينب؛تهببل..
نعيمه:ماتمنيت نروح..
كفايه قعمزت حدا رفقه وقالت:ايه والله غيرت جوي..
غاليه ناضت وقالت:خالي بيجي غدوة ان شاء الله..
نعيمه:حق!
غاليه:ايه..بنعدي نرقد حدا امي اني تصبحن ع خير..
ردوا بأصوات متقطعه:قدامك كل خير
مشت طول طلعت من الدار..
كفايه التفتت ع رزان لقتها راقده..
بعدين شبحت لنور لقتها كيف تغطت وبترقد..
حميده وهي تصكر فالروشن :ايه احكولنا كيف كانت لمتكم؟
لمياء اللي كانت تسمع بس ركزت معاهم وهما يحكوا عن مرام وشن دارتلهم...
🍁🍁🍁🍁
تاني يوم..
الساعه 10:00صباحا..
تسقد توفيق بأمه لطرابلس...
واهل حوش رمضان كانوا كلهم نايضين يضموا استعدادا لجية خالهم وعيلته..
ورباب مشوا معاها رانيا ودلال بش اضم الشقه لانها حاسبه حساب يجوها هي الأولى...
🍁وفعلا..
اول مادرست سيارة الحاج المختار..
نزلوا النساوين واتجهوا للعمارة وين مافي شقة مؤنس بعد عرفوا ان رباب تراجي فيهم..
وامينه بالذات كانت تبي تعرف كل شي بالتفصيل عن مشية ولدها...
حكتلهم رباب اللي صار بالزبط وهي كيف عرفت..
وامه وحناه يسمعوا ويبكوا ورباب تبكي معاهم..
🍁اما الحاج مختار..
مشي لأخته طول بعد عرف شن صاير معاها.
مقعمز جنبها مقابلها..شاد يدها وهو يقول؛لامايجي الأهمال هدى يافاطمه لاقدر الله المشكله تطور وتكوني فشي وتصبحي فشي تاني..
فاطمه؛عندك حق ياوخيي..باهي قولي شنو حالك انت..
تنهد وهز راسه وهو يقول بضيق؛الحمد لله الحمد لله..
فاطمه؛يفرج الله ياوخيي يامختار..
مختار:يارب..يارب..
🍁🍁🍁🍁
حدهم بدموع؛صدقيني هدا اللي صار..
هندا ودموعها ينزلوا:هدى وانت شيخ ياأيمن ياولدي شيخ وتعرف حق امك عليك..
حضنتها حدهم وقالت:اعذريه ياعمتي اعذريه ايمن راجل عنده غيريه مايتحملش..
هندا ببكي:ماجابوا من طبع باتهم شي..عمهم عمهم..الله يرحمهم الزوز...ويردلي ضراريا مافيهم سو يارب العالمين..
حدهم ببكي:اللهم آمين..
🍁ولأن وضع عيلة الحاج مختار النفسي صعب بسبب اللي سمعوه..
مشوا البنات كلهم لشقة رباب...
ماقعد مع فاطمه كان بنتها غاليه..
فاطمه:كراعي دارتها فيا..
غاليه بحزن؛الله غالب يمي..
🍁🍁🍁🍁
ع الغدي..
جتهم حدهم الجده وحلفتلهم يجوها..
وهما ع خاطر حلفتها مشوا..
بينما رباب روحت مع اختها رانيا لحوش جدها لأن نفسيتها تعبت هلبه..
اول ماوصلت غادي رقدت...
ورزان وين شافت حالتها تعبت نفسيتها حتى هي...
🍁🍁🍁🍁
ع الغدي..
جو عبدالسلام ومعاه عبدالرؤوف..
وصلتهم كانت مع وصلة هانيبال بعيلته..
نزللهم طول...
اما مرام مشت بصغارها للحوش..
راها محمد من فوق جايه...
خش لبلقيس وقاللها:وتي روحك بنرفعك لحوش هلك.
بلقيس:ليش!!؟
محمد؛كان تبطلي مرة وحده تناقشيني بس!!تأفف بعدين قال..هداك ومرته جو تريحتي توا..
تنهدت بلقيس بضيق وقالت؛باهي..
وناضت توتي فروحها هي وبنتها..
محمد:لبسي البنت دبش باهي صقع سم..
بلقيس بضيق:باهي..
محمد وهو يشوف لبنته بإبتسامه؛شمحه...اها شمحة انتي..طالعه لأمك ولا..ايه هي شمحه لكن متعبتني..
بلقيس ضحكت بتهكم وقالت فنفسها"اني اللي متعباتك صار!!لاحول ولاقوة الا بالله"..
🍁🍁🍁🍁
تعرف عبدالرؤوف ع باقي افراد عيلة دلال...
انسجم معاهم وهما فيسع تقبلوه..
برغم انه يبان راجل اكابري وليه وزنه..لكن كان قمة فالتواضع قدامهم..
لهدا..
هانيبال قرر يحاول مع دلال...
🍁بعد الغدي..
فم الحوش..
مقعمزين ع الركابه يهدرزوا..
هانيبال:دلوله راك محتاجه لراجل فحياتك مازلتي صغيره وعويلتك محتاجين يكون معاهم راجل يعاملهم كيف بوهم..واني لاحظت ضراريك يحبوه..
دلال بحده؛هدا بالذات لا ياخالي لأني حاسه انه مش مزبوط..
هانيبال ضيق عيونه وقال؛كيف؟
دلال قعدت ساكته..
هانيبال:دار معاك حركة غلط..
دلال حركت راسها ايمين ويسار بالنفي..
هانيبال؛باهي خيره شن مشكلته؟الراجل مواقفه كلهن تشهدله بالذات فخطف سيدك..
دلال بإنفعال؛اني هادي بالذات مش خاشه دماغي نحس فيها لعبه منه بش يجبرني نوافق زي مادار........
وسكتت.
ضيق هانيبال عيونه وقال:زي مادار من؟
دلال وجهها تغير لونه..
هانيبال:دلال....قصدك اللي صار لسيدك في 2007 عمار وراه؟
دلال طاحوا دموعه طول..
هانيبال غمض عيونه وهو يقول؛والله من الأول حسيت في إن..فتح عيونه وقال...ماتريحتش لتغييرك موقفك وقتها وموافقتك عليه..
دلال.مسحت دموعها وقالت:مسامحاته دنيا وآخره عشت معاه احلا ايام عمري..كان ليا زوجي وبوي وخوي..كان ومازال ليا كل شي ياخالي..لهدا ياخالي زواج من بعده مستحيل نتزوج..
هانيبال شبحلها شويه بعدين ابتسم وقال؛ع راحتك..
ابتسمت دلال وقالت؛ماحد فاهمني غيرك..
ضحك وقرصها من خدها..
داخل..
فالدار..
مرام كانت مقعمزة تشوف فتليفونها..
وحداها بنتها نايضه..
وولدها راقد ع حجرها..
ولمياء متكيه وتشبحلها مرة مرة..
شبحت مرام للبنات وقالت: بالله حداكم الصغار خوي جي بنطلعله شوي..
رانيا:باهي..
حولت مرام راس ولدها بالشويه عن رجلها..
وحاطته ع المخده..
بعدين ناضت ومشت طلعت وهي تحط فوشاحها اللي كان ع كتافها ع راسها..
رباب:دلال برا..
ضحكوا البنات..
ولمياء ضيقت عيونها وهي تحاول تفهم قصدهم وقالت فنفسها "شكله في شي تاني غير مقلب التراب"..
برا...
هانيبال ناض وقف لما شاف ضو جاي بعيد ووقف حدا باب الجردينه لما شاف دلال مع هانيبال..
دلال وقفت لما شافاته وقالت:بالله خالي راجي شويه..
وخشت داخل..
ع طلعة مرام..
ابتسموا لبعض..
ومشت مرام كملت طريقها..
ودلال خشت وتوجهت للدار اللي فيها البنيات الصغار..
لقتهم يرسموا..
دلال:اسيا تعالي..
اسيا سيبت اللي فيدها وناضت لأمها وحنين وروان يشبحولها..
وقفت ع امها وقالت:شنو ماما..
شدتها من يدها وقالت:تعالي..
طلعوا الزوز ودلال تقول:عمو ضو جي باهي تو تطلعيله وتقولي اسفه عمو ضو سامحني ماكانش قصدي..
اسيا حطت يدها ع عيونها من الخجل وقال:حي ع التحشيم..
ضحكت دلال..
طلعوا الزوز وصلوا برا..
لقوهم واقفين ع الدرجه اللي قبل المستراح..
دلال مابتش تشبحله قالت لبنتها:هي بري..
مشت طول اسيا..
نزلت من الركابه ومشتلهم وهي متحشمه ع الآخر.
وضو وهانيبال ومرام يشوفولها بإبتسامه..
هانيبال ومرام مستغربين..ضو بس اللي فاهم..
ركبت الدرجه وجاته وقفت قدامه..
غطت عيونها وقالت:حي ع التحشيم ياربي..
قعدوا يضحكوا..
هانيبال بضحكه:خيرك..
اسيا نزلت ايديها ورفعت عيونها فضو وقالت:اسفه عمو ضو..مش قصدي..سامحني
ونزلت عيونها لوطا ضو:ههههههههه..
قعمز ع روس صباعه قدامها وقال:نسامحك لكن بشرط..
اسيا شبحتله بتساؤل طفولي قالت:شن هو؟
ضو:نبيك تقوليلي الحروف الأبجديه العربيه كلهن بالترتيب..
ابتسمت بحماس وقالت :ساهله..
وبدت اسيا تقول فيهم ورا بعضهم لين قريب النفس يهرب عليها تاخد نفس وترجع تقولهم..
هانيبال بضحكه:غير خودي نفس..
ومرام تضحك..
آسيا:ن ه و ي... ونعرف حتى الإنجليزيه..شويه بس..بلعت ريقها وقالت.. ABC وتقول فيهم..
وضو يقول..ماشاء الله ماشاء الله ماشاء الله.
ودلال تشوفلهم من بعيد وهي مبتسمه بإستغراب..
آسيا: XYZ...ابتسمت ابتسامه عريضه وقالت..هاه وتوا..
ضحك ضو..وشد راسها بإيديه وباسه.
وهانيبال ومرام يشوفوا لبعض وهما يضحكوا..
بعد ضو وقال:ربي يحفظك ويحميك ياآسو..
اسيا:سامحتني ولا..
ضو:مانزعلش منك اني بكل..
هانيبال:غير كان تفهمونا شن صار بيناتكم..
ضو:تس..هدى سر بيني وبينها..
اسيا بإبتسامه:ايه سر..
هانيبال:ايااااح..
☘عمر كان جاي بيقول لمرته هيا بش يروح بيها..
لما شافهم وجهه تغير..
غير عيونه عنهم..
وصل فالركابه لقي دلال واقفه قاللها:بالله دلال خشي قولي للميا توتي روحها..
دلال:حاضر..
لفت وخشت داخل..
عمر وهو ماشي شبح جيهتهم من فوق نفسه رفع يده وقال:خير ياضو..
ضو شبحله ووقف رد عليه بنفس الحركه:خير خير..
مشي عمر..
وهانيبال كان يشوفله وهو يمشي اضايق منه ع الحركه اللي دارها كان مفروض يجي يسلم عليه سلام باهي..
لكن عمر كان واخد موقف مع محمد بالذات بعد سمع منه سبب الكلام اللي قاله يوم العركه ووافقه عليه..كان مستعد يوافقه عليه بعد سمع كلام لمياء..
داخل..
خشت دلال للدار وقالت:مرت خالي..خالي عمر قالك وتي روحك..
ناضت لمياء قعمزت وقالت:باهي..
ودلال مشت للحمام بش تتوضى للعصر لأنه قريب..
🍁وتت لمياء روحها..
سلمت ع الموجودات..
ومشت طلعت من جهة فم البوابه..
وصلت فراجلها..
عمر :اركبي..
لمياء فتحت السيارة وركبت..
عمر ركب وقاللها:مرت محمد مهناش ولا؟
لمياء:ايه رفعها لحوش ماليها..
عمر شغل السيارة وقال:معاد يبيها تخالط مرام..قالي كانت مرته راضيه تبطل قرايه بعد الزواج ولت تكلمت فيها المدة اللي فاتت قال اكيد منها هي..
لمياء رفعت حاجبها بعدين نزلاته وقالت:هي صح تتكلم هلبه ع الخدمه والقرايه والمراة لازم تكون عندها شهاده ومش عارفه شني..
عمر مط شواربه لداخل بأسف بعدين تحرك طول..
🍁🍁🍁🍁
الساعه 5:00عصرا...
عبدالرؤوف:مش اول مرة نجي ل***** وإن شاء الله الجايات اكثر..
ميلاد:مرحبتين بيك..تآنس وتشرف..
عبدالرؤوف بإبتسامه:بارك الله فيكم.
شبح لعبدالسلام..
عبدالسلام فهم نظرته ناض وقف وقال:حاج مختار..
كلهم شبحوا لعبدالسلام..
مختار وهو مضيق عيونه:نعم..
عبدالسلام:تعال شوي لوسمحت..
مختار شبحله شويه بعدين ناض وقف وهو يقول:يالله..
ناض عبدالرؤوف وقال:هي السلام عليكم..
كلهم ردوا عليه :وعليكم السلام.
ومشوا التلاته طلعوا من المربوعه..
بعد طلعوا..
ميلاد بإستغراب:زعم شن عندهم مع الخال؟
حميد مط شواربه للأسفل بعدم معرفه..
الهادي قعد يشوف للباب وهو مستغرب..
اما هانيبال فكان شبه فاهم شن في..
🍁🍁🍁🍁
امي امتى تكملي..
دلال:شويه تانيه امي امتى نكمل ناديكم..
جواد:باهي..
ومشي طلع من الكوجينه لفم البوابه وخلا امه تكمل ديران الفطيره..
فالدار..
رزان ورباب فالدار يتفرجوا ع الأخبار وايديهم ع قلوبهم..
ونور مقعمزة لاهيه بتليفونها تقلب في الفيس:توا صبح فامريكا ولا؟
رزان ورباب وهما لاهيات بالتلفزيون:ايه..
نور هزت راسها ورجعت لهت بالتليفون...
🍁فالكوجينه..
دلال وهي تغسل في ايديها تغني:
لأنك حبيبي..لأنك حبيبي..
لأنك حبيبي عودت عيني ..عودت عيني بيك
لأنك حبيبي لأنك حبيبي.
لأنك حبيبي حليت عيني..حليت عيني فيك..
تنهدت وهي شاده دموعها بعدين كملت باقي الأغنيه..
•••••••••
واقفين الزوز حدا المربوعه وهما يشوفوله كيف ماشي بإتجاه عمارة ولاد عبدالله..
عبدالسلام بألم:زعمه كان عارف..
عبدالرؤوف بأسف:تس..كان متوقع..بس حكايه مشية حفيده التاني تو ندور وراها ونعرف وينه بالزبط..
•••••
فحوش الحاج عبدالله..
كانت الصاله معبيه بنساوين العيله وصوت هدرزتهم ينسمع لبرا..
كانت هندا مقعمزة حداهم جثة بس..
وحدهم مرة مرة تشوفلها..
فجأة..
رن تليفون أمينه..
استاقظت هندا طول وشبحتلها..
امينه استغربت..
ناضت من مكانها ومشت من حداهم وهندا معاها بعيونها..
كامله:والله ماكان ليه لزوم تعبي روحك وتجي وانتي هكي مفروض حني نجوك مش انتي..
فاطمه:جيتوني ولاجيتكم كله سوا سوا..
حدهم الكبيرة:هدي فاطمه..
ابتسمت فاطمه..
وكامله ضحكت..
برا...
طلعت امينه ومشت طلعت من الباب الفاصل..
خشت لمستراح العماره..
صكرت وراها الباب ومشت لبوابه العمارة..
وصلت فيها وفتحتها..
لقت بوها واقف وع وجهه ملامح الألم واضحه..
امينه ماتت من خوفها حطت يدها ع صدرها وقالت:باتي!
مسح بيده ع وجهه وقال:لاإله إلاالله..إنا لله وإنا إليه راجعون..
امينه بصوت مرتعش:باتي..قول فمن جت ياباتي!!
مختار بألم:ولد خوك..عبدالرزاق..
"استشهد"..
امينه شهقت شهقه قويه وحطت يدها ع فمها...
لكن...
أمه...
هندا..
اللي لحقتها وسمعت اللي قاله خالها..
حست بنار ولعت فيها من اسفل رجليها..
انتشرت في كل جزء من جسدها المنهك من الآلام..
حست بروحها بتطلع..
وصلت لعند حنجرتها ووقفت وخنقتها خنق..
حولت وشاحها ولوحاته..
وجتهم تجري وهي تقول بصدمه وذعر...
"عبدو..عبدو ولدي..ولدي عبدو..عبدالرزاق..!"
🍁في نفس الوقت...
كانت طالعه دلال من الكوجينه وماشيه بطريقها للدار اللي فيها البنات...
خشت عليهم الدار لقت..
رزان تتفرج ع التلفزيون..
ورباب سارحه..
ونور شاده تليفونها و تهدرز ع الماسنجر الباين..
هي انطرحت ع الفراش وقعدت تشوفلهم..
ضحكت لما ركزت نظرها ع بطونهم..
رزان حامل في السادس..
رباب الثامن..
ونور خاشه شهرها..
دلال:هههههههه..زي فوسيات حوش عيت عبدالله..
شبحولها التلاته بحده..
دلال:ههههههه..اضحكوا وياسر نكد..
رباب بحزن:فرقة ضحكنا ورجالتنا غايبين علينا و ماشيين يتلقوا في الموت..
رزان بدموع:كارهه حياتي من غيره..وقعدت تبكي..
نور قعدت تشوفلهم بحزن..
ناضت دلال قعمزت:انتوا استودعوهم الله ولا خلاص معاش تخافوا ولا تشكوا في ان ربي مش حيصون الأمانه حاشاه سبحانه..ماتغلطوش غلطتي..
مسحت رزان دموعها ..
ورباب رشفت وهي تمسح فدموعها.
دلال:وبعدين انتم حوامل حرام عليكم اللي ديروا فيه لبيبياتكم..شوفي رباب كيف وجهك مولي من فقر الدم..
وانتي رزان رايحه صفرا وتحت عيونك اسود..
فكروا بس نهار لما يروحوا بإذن الله يلقوكم في احسن حال ويفرحوا..
رزان بضحكه من بين دموعها :بعدين عماد يقولي شكلي غيابي زايد ناقص عندك ويبدا بالدسكه الحزينه متاعه..
ضحكوا التلاته..
فجأة رن تليفون نور بنغمة ماسنجر..
دلال:قوليله معاش يسافر بالله..نبي نعرف اما مؤتمرات يحضر فيهم وهو 24ساعه شاد التليفون..
نور بضحكه:قالي اني توا في المؤتمر والجو ممل قلت نكلمك..
ضحكوا...
رباب :ايه حقه دلال بكري ضو جي لمرام ريتيه..
حطت دلال يدها ع وجهها وهي تضحك بإحراج :ايه وياريتيني ماريته عليك موقف..
التلاته بإنتباه:شن صار!!!!
دلال:طلعتله اسيا تتأسفله والبنت عاد لصقت فيهم ومعاش بت تولي..لين جابهالي خالي هانيبال لقيته حاطلها فجيب القفطان 100جني..
التلاته تفاجئوا..
دلال:انحرجت ع الآخر..
رباب:نقولك دلوله وماتزعليش مني الراجل حاط عليك العين.
رزان ونور قعدوا يشوفوا لردة فعل دلال..
تلاشت ابتسامتها وتبدلت بملامح الضيق..
فجأه..
"آاااااااااااااااااااه..آاااااااااااه..يانااااا علي يانا عليك ياهنداااا يامنكوبه ياهنداااا...يامقهورة ياهندااااا"
البنات انخلعوا..
ودلال اللي كانت اخف وحده فيهم..
ناضت تجري للروشن..
فتحاته وفتحت البرسيانه وشافت برا..
انصدمت بقوة فاللي راته..
هندا..
كانت طالعه برا من غير حجاب..
تعيط وتخبط..
قريب تجنح من قوة نارها...
🍁فنفس الوقت..
رمزي ورانيا اللي كانوا واقفين فم بوابه الحوش القديم لما سمعوا العياط..
مشوا الزوز مع بعض يجروا لمصدره...
فاتت قدامهم وهما ماشيين لأرض الحاج عبدالله سيارة توفيق مروح بمرته..
الزوز كذلك سمعوا العياط..
كانوا مرعوبين بمعنى الكلمه
مش هما بس حتى النساوين اللي كانوا داخل الحوش كلهم...
كامله لما سمعت عياط هندا
من الرعشه من قدرتش تنوض من مكانها..
قعدت مقعمزة وتشبح فالفراغ بصدمه..
واللي حداها فاطمه،غاليه،حدهم،حميده،امال..
يكلموا فيها وهي ماتسمعش فيهم
اما زينب ونعيمه وكفايه ومرام طلعوا لمستراح الحوش
يسمعوا في العياط ويبكوا بألم
وحدهم واقفه فم الباب وحتي هي خاشة فحالة صدمه..
مش عارفه هندا ع من تعيط
تطرد ففكرة ان عياط هندا توا ع راجلها...أيمن
🍃المراة برا تعيط..
كانت من غير حجاب لابسه ماليه صوف طويله بيضا ع سروال اسود..
تخبط وتنوح..
وخالها مقعمز ع روس صباعه يبكي وهو مدرق وجهه بإيديه..
وحماتها من قوة الرعشه كانت تشبحلها وتبكي بالعبرة ومش قادرة تتحرك..
الرجاله..
عبدالسلام وعبدالرؤوف طول ولوا خشوا للمربوعه..
هانيبال بغضب:معقوله مافيش وحده قدرت تطلع ادخلها!!
ميلاد بألم:لا حول ولاقوة إلا بالله..
🍃رفقه اللي كانت راقده فالدار التانيه
ناضت مفزوعه ومشت طلعت تجري من دارها للدار اللي جنبها
رفقه بفجعه:عياط مني هدا!!
رباب تبكي بالعبرة..
ورزان تبكي وهي حاطه يدها ع بطنها وتتوجع..
نور ببكي :هادي هندا..ان شاء الله مش أيمن ياربي..
ودلال مازالت واقفه تشوفلها بصدمه..
🍃رانيا ببكي:المراة..المراة..
رمزي شادها وع وجهه ملامح الألم..
فالسيارة..
اريج ببكي:ياربي!!ياربي!!
وتوفيق يتأفف من قوة ضيق صدره...
🍃🍃🍃
مسحت دموعها بقوة..
رفعت وشاحها من ع كتافها ولبساته..
التفتت للشماعه وين مافي ملاية خالتها غاليه..
كان لونها اسود..
مشتلها بسرعه وجبدتها..
وطلعت تجري...
والبنات يشبحولها..
وصلت دلال فم البوابه..
بانت عليها كيف ناضت وقفت وهي تقول..
"ولييييدي ياناري وليييدي"...
قعدت تجري..وفيدها الملايه...
لقتها حطت يدها ع بلوزتها جت بتشقها...
وصلت فيها دلال..
غطتها بالملايه...
هندا لما رتها قالت؛ولدي يادلال...ولدي....ولدي يادلال لحق باته وعمه..لحق عمه يادلال...
دلال بعد غطتها ضمتها بقوة وهي تقول ببكي:
"ولا تحسبن الذين قتلوا في سبيل الله اموات بل احياء عند ربهم يرزقون"
انهارت هندا بالبكي لما سمعت الآيه..
حضنت دلال بقوة وقعدت تبكي بعبرتها..
ودلال تبكي معاها...
مختار حول يده وقعد يشبحلهم وهو يبكي..
وامينه حطت ايديها ع وجهها وقعدت تبكي بقوة..
شويه..
وخدت دلال هندا ومشت بيها للعمارة وهي تقول:
افرحي بيه ياهندا افرحي..مات راجل..شهيد ياهندا شهيد ولدك..
وهندا تبكي بعبرتها..
خشت بيها دلال داخل..
وصكرت وراها بوابة العمارة...
🍁🍁🍁🍁
امريكا..
ولاية بوسطن...
الساعه 11:30صباحا..
طلع من القاعه اللي كان فيها المؤتمر..
فجأة..
سمع صوت عبدالمعز ينادي فيه:دكتور مالك..مالك..
وقف مالك بالسيف..
وصل فيه عبدالمعز وقاله:خيرك مستعجل هكي!!
مالك:رحلتي بعد ربع ساعه..
عبدالمعز بإستغراب:مروح؟
مالك:ايه..
عبدالمعز:ان شاء الله غير مش صايرة حاجه؟؟!
مالك:زي ماتعرف زوجتي ع وشك ولاده لازم نكون معاها..
عبدالمعز رفع حواجبه ونزلهم وهو يقول:كان هكي ماعندي مانقول..قبل نبي نعرفك ع دكتور صربي كبير معروف هني لعل يجي يوم وتقرر تكمل دراسه ادير معارف هني ينفعوك..
ابتسم وقال؛مشكور جدا دكتور...وتوا ياريت تسمحلي معاش عندي وقت..
عبدالمعز بإبتسامه؛تفضل..في امان الله..
مالك:السلام عليكم..
ومشي طول..
اما عبدالمعز ولى للقاعه وين وصل في الباب لقي قدامه بنته..
اسراء:وين الدكتور مالك؟
عبدالمعز:مروح..قال زوجته ع وشك ولاده ولازم يكون معاها..
اسراء:اهاا!
عبدالمعز:تعالي بابا خل نكملوا شغلنا بسرعه بش نلحقوا حتى حني نمشوا للولايه اللي فيها خوك..
اسراء ابتسمت مجامله وقالت:تمام..
وفي نفسها قالت"روح لمرتك يادكتور وخود وقتك اللي مازالك معاها مش حطول هلبه وتولي"
🍃🍃🍃🍃
بعد يومين...
في احدى المحاور...
خود هاك يابو ميلاد..
خدي عماد التليفون وقال:منور يازعيم..
ضحك وقاله:عدي غادي لكن ماطولش..
عماد بإبتسامه :حاضر...
مشي عماد مسافه...واتصل ببوه...
🍁خبره سعد ان الكل فالبلاد..
ولأن وقته محدود..صكر منه واتصل بخاله محمد..
🌴🌴🌴
كانت رزان متكيه..
تعبت اليومين اللي فاتوا..
حتى لحوش الحاج مختار مامشتش بش تحضر العزي..
ورفقه قعدت معاها..وفالليل كانت تروحلهم غاليه..
رفقه:رزونه شن حالك توا؟
رزان هزت راسها وقالت بصوت يدوب طالع:باهي..الحمد لله..
"رزاااان"
الزوز استغربوا..
رفقه:عمي محمد؟!
"رزااان تعالي لدار حناك تعالي"..
قلب رزان بدت تسرع نبضاته...
مدت يدها لرفقه وقالت:عماد!!عماد!!..
رفقه بسرعه نوضتها ومشوا مع بعض طلعوا من الدار..
لقوا محمد واقف فدار الحاجه فاطمه وهو مبتسم قاللها:اجري ماعنداش وقت..
طلقت رفقه وقدمت بسرعه..
وصلت فعمها..
محمد: اهي معاك..
حول التليفون من ع وذنه ومدهولها وهو يقول..
هاك رزان هاك..
خدت التليفون من عمها اللي مدهولها وطلع من حداها..
حطاته ع وذنها بلهفه وقالت:آلو..
"ياآالووو"..
حطت يدها ع فمها وقعدت تبكي..
"ايااااه علينا عاااد"..
ضحكت من بين دموعها وقالت:استاحشتك..
رد عليها وهو يقلد فصوتها قال..
"استاحجتيني"..
رزان بضحكه وهي تسمح فدموعها:مبردك..
"ههههههه..فزغولتي انتي..شن دايرة"..
رزان بإبتسامه ودموعها ينزلوا:نبرز..
ضحك وقال:وغريمي..
رزان:بادي يتشيطن..يتحرك قصدي..
"اوووووو ههههههه"
فجأة انسمع صوت رصاص..
قلبها قريب وقف..عيطت وهي تقول بهلع:عماااد..الووو عماااااد...عماااد...
"الو"..
حطت يدها ع قلبها وقالت بنبرة باكيه وهي تعارك:اني الظالمه اني اللي خليتك تعدي اني الظاالمه..
عماد بضحكه:تسكتي يازرياكه خلاص..صوت ضرب رصاص في الهوا عادي مافي شي..
رزان:ايه ايه مشيه ع غيري!!..
عماد:هههههههههههههههه.
رزان رفعت حواجبها:تو شن يضحك فيك يابارد قول..
عماد بضحكه:نقولك شن خطر عليا وانتي تكلمي فيا هكي!؟.
رزان وهي مبتسمه برفعة حاجب :شن خطر عليك..
قال وهو يقلد فصوتها...
" كرهتك...وعفتك.. وصفحتك مزقتها من حياااتي خلاااص...
...اني عمري ماكنت لواحد كيييفك ولاواحد كيييفك ممكن يكون ليا..."..
عماد:كان ماكنتيش ليا ماتكونيش لغيري يابطه..انتي لعمدة قلبك بس..
رزان بضحكه:عليك ذكريات سمحه تذكر فيها!!
ضحك عماد وهي ضحكت..
وفي عز هالضحكات اللي كانت طالعه من القلب ..
صوت انفجار قوي اخترق مسامعها..
انقطع بعدها ع طول الإتصال..
توسعوا عيونها وهي تقول بصوت مخنوق :
"عماد"..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
الله اكبر الله اكبر..
الله اكبر ولله الحمد...
الله اكبر....
🍁التكبيرات هادي كانت تكبيرات عيد النصر..
واخيرا انتصرت قوات البنيان المرصوص..
اللي كانوا فعلا بنيان مرصوص برغم اختلاف توجهاتهم وقبائلهم ومدنهم الا انهم وقفوا جنب بعض وكأنهم بنيان مرصوص...
ونصرهم الله تعالى من عنده..
¤وماالنصر الا من عند الله¤
نصر....
ماتحققش الا بعد مااندفعت ضريبته...
اكثر من 2000 قتيل نحسبهم عند الله من الشهداء...
🍁🍁🍁
ايمن..ياايمن..
ايمن ركب دروج الريفودجي بسرعه وهو يقول بلهفه:بشر ياخوي بشر..
الراجل بإبتسامه:الحمد لله رب العالمين..افتكينا منهم هم وانزاح بلي وربك رفعه..
غمض ايمن عيونه بشده وزفر بقوة بعدين قال:الحمد لله..
جاهم صوت زغروطة العزوز ام الراجل..
الراجل:هدى غير ماتعرفي تزغرطي يمي!
العزوز:لولا العيب راني رقصت مش غير زغرطت..
أيمن والراجل:هههههههههه..
🌴🌴🌴🌴
واخيرا ياريي الحمد لله...الحمد لله..
غاليه ودموعها ينزلوا:ليك الحمد والشكر ياربي.
الحاجه فاطمه:ياربي فرحني بشوفتهم يارب..
غاليه وحميده:اللهم آمين..
🍁فحوش ميلاد..
سعيده:غير ليش تبكي تو ياماما!..
رزان ببكي:نبكي لأني مش عارفه كان يوليلي راجلي يمشي ع كرعيه ولا...حطت يدها ع فمها وقعدت تبكي..
سعيده :يابنتي ربي يهديك..تو مش اتصل بينا مؤنس وقال ان اصابته مش خطيره!
رزان:ومن بعدها معاد اتصل ياماما 16يوم عدن مانعلموا عنه شي ياماما..
سعيده بوجع:يابنتي حرام اللي ديري فيه فروحك والله غير ربي كاتب لعيلك عمر كان هدى راك خسرتيه..
حطت رزان يدها ع بطنها وقعدت تبكي بصمت..
وامها تمسح ع يدها وتقول:قلبي مايكذب عليا يابنتي متأكده انه حيروحلك مافيه سو..وقولي قالتها امي..
رزان ببكي:يارب ياماما...ياااارب..
🍁🍁🍁🍁
الساعه 12:00ليلا..
خش السرير جنبها...
وغطاها كويس..
وقعد متكي ع المخده..يتأمل فملامح وجهها البريء..
يخطر عليه كل مايشوفها الذنب اللي اقترفه..
واللي كره روحه ع خاطره..
ويبدا يذرف فدموع الندم..
مالك"والله مانستاهلك..كلب زي اني انتي حرام فيه.."
قربلها..
وطبس باس ع راسها بوسه لطيفه..
بعدين بعد..وولى لمكانه وهو يتأمل فيها..
ويعيش حالة جلد الذات اللي ليها فترة طويله ملازماته...
🍃🍃🍃🍃
24\12\2016..
🌴الساعه 9:00صباحا...
طلع من الحوش للجنان..
لقي امه مقعمزة ع الدروج متاع فم الحوش..
كانت لافه روحها بشال كبير وغليظ..
ولابسه وشاح غليظ..
ع قفطان حوش..
دموعه عبوا عيونها..
مشالها..
نزل درجه اتنين.
وقعمز فالثالثه جنبها..
حاوط كتافها بذراعه وقال:ليش طالعه فالصقع تو تمرضي..
هندا ابتسمت بتهكم من بين دموعها وهي تقول:ماعاد لاحاسه بصقع ولانو..ولاخريف..ولاربيع...مااعاد حاسه بشي..ولاعاد يهمني شي نمرض ولانصح مادام كباديا عدوا عني وخلوني..
مختار :ونا يمي!!نا وين من هدى كله؟ مانيش كبدك ولاكيف!! مانستاهلش تعيشي ع خاطري؟!
غمضت هندا عيونها بألم..بعدين ميلت راسها ع كتف ولدها وقعدت تبكي بصمت وهو يبوس ع راسها ويمسح ع ذراعها...
بعدين تنهد..
وشبح للباب..
جي بيغير عيونه بعدين ردهم فيسع...
فتحهم ع وسعهم وقال بصدمه:امي..من مخلي الباب محلول؟
هندا رشفت وقالت:باك جدك..
مختار:معناها محلول حق!!..
فتحت هندا عيونها وضيقتهم بإستغراب..
مختار بصدمه..
"أيمن"..
هندا بعدت عنه وشبحت للباب..
لقت ايمن واقف في الباب وهو يشوفلهم ويضحك ويبكي فنفس الوقت..
هندا بصدمه:تشوف فيه كيف مانشوف فيه ولا مانتخايلش!!
مختار:قصدك يمي حتى انتي تشوفي فيه كيف مانشوف فيه!!
ايمن مش قادر ينطق من فرحته برجوعه ليهم يضحك ويبكي في نفس الوقت..
وهما مازالوا يشوفوله ومش مصدقين يحسابوا ارواحهم يتخايلوا..
ع طلعة اصيل من الباب..
لما شاف ايمن قال بصدمه:ايمن..ايمن!!
مشي يجري..
نقز من اول درجه لأخر درجه ومشاله يجري..
وصل فيه وخداه فحضنه وهو يقول:ايمن ودين الله الا ايمن..
ايمن بضحكه:ايه وحق الله غير معاش تضربني ع ظهري بروحه مدقدق من عند غادي..
مختار ضحك بصدمه وقال؛امي ايمن ياامي صبي ياامي صبي..
ناضله مختار ومشاله يجري حضنه بقوة مع اصيل..
وهندا مازالت مقعمزة..
حاطه ايديها ع رجليها وتذرف فالدموع وتضحك فنفس الوقت..
ايمن كانوا عيونه عليها..
بعد خوه وولد عمته..
ومشالها بسرعه..
نزل عند.رجليها وقعد يبوس فيهم..
بعدين رقي لإيديها وقعد يبوس فيهم.
بعدين باس راسها وحضنها بقوة..
وهي تحضن فيه وتبكي وتضحك..
ع خشة الحاج مختار للحوش وفيده شكارة خبزة شعير..
لما شافهم قال:ايمن!
اصيل وهو يمسح فدموعه قال بفرح؛ايه ياجدي ايمن ايمن ياجدي..
مختار غمض عيونه بشده وقال؛ليك الحمد والشكر ياجبار القلوب..
ع طلعة كامله من الباب بعد سمعت الدوشه وين شافت ايمن..
من الفرحه دارت تصرف تلقائي..
زغرطت..
من فرحتها...زغرطت...
🍃سبحانه جبار القلوب..من باطن الحزن يخلق الفرحه🍃
🍁🍁🍁🍁
فتحت باب الشقه وخشت وكنتها معاها..
امينه:نضموها ضم خفيف ونروحوا..
رباب:انتي اليوم روحي لحوش جدي مختار ياعمتي اني حداي خالاتي..
امينه صكرت الباب وقالت:لالالا مستحيل نخليك راك قريب تخشي شهرك بإذن الله قاعده معاك لين تجيبي وبعون الله راجلك يكون معانا..
رباب برجاء:يارب ياعمتي يارب..
طق الباب..
امينه:هدي اكيد خالتك غاليه مش حترتاح لين تعاونا..
ابتسمت رباب..
امينه:ربي يعطيها ع قيس نيتها ويفرحها..
رباب:آمين..
امينه مشت للباب وفتحاته...
لما شافت اللي واقف قدامه
قعدت جامده فمكانها من الصدمه..
رباب قعدت تشوفله زي المسبوهه وخلاص..
مؤنس بضحكه:رغم اني خففتها اللحيه قبل نجي بيش تعرفوني..
رباب شهقت وقالت:عمتي!!
امينه ارتسمت ع وجهها ملامح البكاء تتصارع معاها ملامح الضحكه..
جاته طول وحضناته..
وهو حضنها بقوة...
اما رباب..
فنصت وقالت:حييي!!..ووووه..
بعدوا عن بعضهم وشبحولها..
رباب بعياط؛بنجييييب...منوووسسييي..زودليييي..
💕💕💕💕💕💕
في نفس الوقت..
طالعه من حوش اهلها ادب ع رجليها..
وصلت في ممر فم البوابه..
قعدت تمشي...
لين وصلت فالبوابه..
سمعت صوت هدرزة غاليه ومحمد..
وغاليه كانت تضحك..
استغربت..
خشت داخل..
وصلت فالكوجينه...
حطت ايديها ع فمها...وعيونها متوسعات ع الآخر وقعدت ترجف مع بعضها..
غاليه بضحكه من بين دموعها:شن رايك فهالمفاجأة ع الصبح..
محمد قعد يشوفلها وهو مبتسم..
💕اما هو..
كان واقف وهو متكي ع الرخامه..
ويشوفلها بنظرته اللي تعشقها..
مبتسم بشقاوة..ورافع حاجبه حاجبه اليسار..
كان شعره طاول شوي ولحيته كابرة شوي..
ولابس توته عليها كبوط...
وع راسه طاقية صوف مغطيه وذانه..
تنهدت تنهيده طالعه من اعماق اعماقها...
بعدين حطت ايديها ع وجهها وبدت تبكي بالعبرة...
محمد :البكايه هدي ياراجل.
غاليه بضحكه:رزونه..
هو قدملها وقال:ماتواخدونيش معليش...
وصل فيها وخداها فحضنه...
محمد نخص غاليه..
غاليه فنصت..
خداها من يدها ومشوا طلعوا من الكوجينه..
عماد:قلبي...حياتي..فكرونتي..
رزان ببكي:والله معاد معديها حرب وكان تجينا اسرائيل..
عماد:هههههههههه..
رزان نشت صدره بغيظ..
عماد:اااااههههه..يامسومه...ههههههه
💕💕💕💕💕
الساعه 10:00صباحا..
حلوة حلوة قوليلي!!
البارقه بضحكه:كيف الغزاله الشارده غير هي عدي اجري.
طلعت تجري من دارها وهي فرحانه بطير..
شافتها حناها ضحكت..
وصلت برا شدت فرينو وين شافت بوها..
حسن وهو رافع حاجبه:تعالي..
مشي ومشت وراه وهي تحاول تكتم لهفتها...
وصلوا فالمربوعه..
حسن:خشي..
حدهم:احمم حمم...
خشت..
وبوها رد الباب ردان ومشي..
هي لما شافاته قعدت تضحك ودموعها ينزلوا..
ايمن بضحكه:قديش تبيلها تصبايتك هدي؟
حدهم ضحكت وقالت:ولاشي..
مشتله تجري...
وصلت فيه وتعنقاته بقوة.
وهو حضنها بقوة وغمض عيونه....💕
💕💕💕💕💕💕💕
مانعيش بلاكم...
إنتوا الهوا والزاد...مانقدر نعيش بلاكم..
لو اتخالفوا الميعاد..والله ماننساكم..
معاكم عرف الفرح..وبيكم نسيت الجرح..
يافرحتي بملقاكم..
حسيت بيه الدفا..فأحضانكم يااولافي..
وذقت حلو الغلا..ولهايب الشوق الخافي..
انتوا اشواقي كلها..وانتو لعيني خلها..
والشهد هو ذكراكم..
نشتاق وين تغيبوا..ونشتاق وين تجوني..
انرايف عليكم واجد..وانتم قبال عيوني..
معاكم عرفت الفرح...وبيكم نسيت الجرح..
يافرحتي بملقاكم..
...يتبع....
