#العشق_المتمرد "عندما يزهر الليمون"
#جمان_فريد
الجزء136 القسم الثالث..
⏳...
الساعه 7:00مساءا..
بفستان احمر قاني طوله لفوق الرقبه وبدون اكمام ضابط ع جسمها..وشعرها مرفوع فوق ذيل حصان بطريقه حلوة..
ومكياج بسيط زاد ابرز جمال ملامحها...
تصدرت دلال احتفال تخرجها اللي داروه في صالة صغيرة حلوة في العاصمه...
حضروه الأقارب وبعض الجيران والمعارف المقربين..
ماكانتش ناويه دلال دير احتفال تخرجها في الصاله لكن رزان اقترحت عليها اديرها فالصاله بش يسوقوا لمعمل مأكولات المناسبات والافراح اللي افتتحوه..
اللي اطلقوا عليه اسم (غزلان الوادي)
المعمل ليها هي وعماتها حميده وغاليه...
وحيشغلوا فيه عاملات ثقه يعرفوهم كويس..
واتفقوا ان حميده وغاليه يتبادلوا في المشي لطرابلس للخدمه..وعماد هو اللي يرفع ويجيب..
طبعا عشي الليله والحلو من المعمل نفسه..
🍀اول ماقدموا عصير هافانا دايراته غاليه..ومعاه ماكرون كذلك من عمل ايديها هي..وكانوا حاطين ع كل طاوله كروت المعمل فيه ارقامهم وعنوان المعمل...
وفكرة التسويق هادي كلها كانت لرفقه...
❤❤❤❤
شغلوا اغاني النجاح فبداية الحفله..
لكن بعدين البنات غيروا الجو لما ناضوا بيرقصوا ونوضوا دلال معاهم...
اول اغنيه شغلوها كانت اغنيه صابر الرباعي..
"يادلوله"
ضحكت دلال اول ماسمعتها..
والبنات يغنولها فيها وهما يصفقوا...
واسيا حداها ترقص....
وهي شبحتها وشدت ايديها وبدت ترقص هي وياها..
والبنات حواليهم يرقصوا ويغنوا...
"يادلولة..عليك نموت يااحلى من طعم التوت..
يادلولة..عليك نموت والضحكه تلمع ياقوت"
💓💓💓💓
ومن صوت صابر الرباعي..لصوت عمار مختار..
اللي كان مقعمز في بالكونه الشقه يشرب فالقهوة ويفكر فيها خطرت عليها الاغنيه قعد يغني فيها..
شكون كيفك يابنيه شكون ماثما غيرك فالكون..
دلني وريني من غير حبك أش نكون....دليني وريني من غير حبك أش نكون..
ابتسم وهو يغني..
يادلولة...عليك نموت...يااحلى من طعم التوت...
يادلوله...عليك نموت..والضحكه..تلمع ياقوت...
ضحك..بعدين سكت وهو يفكر فالحديث اللي دار بيناتهم اليوم...
تبدلت ملامح وجهه المبتسمه لملامح إستياء ممزوج بالحزن لما اذكر اهم جزء من حديثهم مع بعض..
<< ..المسألة عندي مش تافهه زي ماانت شايفها..راهو اني بديت نخاف منك ثقتي فيك مهزوزة..شن ضمني لو مادرتهاش وهربت مرة تانيه وخليتينا!؟
عمار بصدمه؛دلال!!!شن اللي تقولي فيه هدى!!
دلال:نقول فالحق..اللي هنا عليك السنين هادي كلها تعيش من غيرنا عادي وارد جدا تكرر نفس الشي لأنك متعود..لما الدنيا تعاكسك تضعف وتهرب مرة تانيه وتخلينا...>>
زفر بضيق...بعدين رشف من فنجان القهوة...
🌴🌴🌴🌴
يمي بنرقى نزل الحصيرة من فوق..
نجاة من الكوجينه:باهي باهي..
بعد سمعت رد امها ركبت الدروج...
وصلت للسطح..مشت وين مافي الحصيرة..خدتها وقامتها..
ومشت بتنزل بيها..وقفت لما شافت ألعاب ناريه بعيده تخبر ان في عرس في القبيله..
قربت من السياج ووقفت عليه وقعدت تتفرج وهي مبتسمه...
شويه..وتنهدت..وغيرت عيونها وبنظرة عابرة جو ع الشارع قدام حوشهم...
توسعوا بصدمه لما شافت سيارة محمد..ومش هكي وبس..نزل المرش وشبحلها..
هي قعدت واقفه فمكانها تشبحله مش قادره تتحرك..
وهو فنص فيها وحرك راسه يأشرلها تنزل..
هي تبدلت ملامح الصدمه ع وجهها لملامح الغضب..
رفعت حاجبها وحطت الحصيرة ع السياج بعدين حطت ايديها عليه وقعدت تتفرج ع الالعاب الناريه تحديا فيه..
هو زاد فنص فيها..فتح باب السيارة ومازال مقعمز فيها..
هي سمعت صوت الباب..وقعدت فمكانها ماتحركتش..
هو بغضب صكر باب السيارة بقوة..
وهي ماتحركتش منها شعره..
محمد وهو يشوفلها:صار هكي انتي! بااهي..
وحط يده ع كلاكس السيارة وضغط عليه بقوة...
هي انخلعت وشبحتله طول..
وهو يضغط اكثر ويشوفلها بتحدي..
بلقيس بغيظ:تافه..
خدت الحصيرة بسرعه ومشت نزلت بسرعه..
هو ابتسم بنصر..
بعدين شغل السيارة وتحرك بسرعه قبل مايطلع واحد من الجيران برا يشوف شن في..ولما مالقي حد قال بعصبيه يدعي ع من تسبب فهالإزعاج:لغم
وولى خش داخل وصكر الباب..
🍁🍁🍁🍁
فالصاله..
وهما مقعمزات يتعشوا..
رزان وهي توزع فنظرها ع الحضور:واضح عجبهم العشي..
غاليه وهي تشوفلهم:ان شاء الله..
دلال:اكيد يعجبهم ماكله نظيفه والبنة زي العسل هدا غير التنسيق..
حميده بإبتسامه:ع سيرة التنسيق في وحده نشدت ع الحركات اللي درتهم للكراسي والطاولات تحساب دايرهتن مهندسة ديكور..
كلهم شبحولها بنظرات اندهاش وفرح..
رفقه:وشن قولتيلها..
حميده بضحكه:طبعا حبيبتي بنقوللها هدى تنسيقي..حسيتها تفاجئت..
نور:حلو هلبه خويله فكروا فالموضوع هدا..
غاليه:خل نمشوا خطوة خطوة ينجح المشروع هدى قبل بعدين نفكروا نوسعوه..
رانيا:صح مزبوط..
سكتوا شويه وهما ياكلوا بعدين قالت حميده..
حميده:رفقه..
رفقه وهي تاكل:اممم..
حميده؛كملتي كل شي خلاص؟
رفقه بلعت وقال:امم..كل شي والحمد لله..افتكيت من اللودان فرمضان..
دلال؛صح..طلعة السوق فرمضان مانحبهاش نطلع ليله وحده بش وناخده كله فنفس الليله..
نور:لتوا مش عارفه كيف!!تطلع ليله وحده وتاخد احلا واحسن شي..واني نقعد بتلاته اربعه ليالي ندور وفي الاخير ناخد حاجه مش راضيه عنها..
ضحكوا وقالت غاليه:حظوظ هي راهو..
ابتسمت نور بحسرة وشبحت للصونيه وقالت:صح حظوظ..
شبحولها دلال ورفقه ورزان..وغاليه استاقضت لروحها شن قالت برغم ان الكلمه مش مقصودة لكن غاليه اضايقت من نفسها هلبه لأنها قالتها لنور...
حميده:رمضان السني بيجي في عز حنحاطي شهر 6..
رانيا:ايه ربي يعيننا ع صيامه..
رزان تنهدت وقالت:ان شاء الله حناي ماتتعبش غادي الحمو قوي واجد..
غاليه:إن شاء الله...
🍁🍁🍁🍁
زيارة غير متوقعه..ولاغير مرغوب فيها!؟
عمار بضحكه:الاتنين..
عبدالرؤوف:هههههه..الله غالب صحيح وجه صاحبك..
عمار ضحك وقال:حاشاك..تفضل اشرب قهوة..
خدي عبدالرؤوف الفنجان وقال:سمعت انك المده اللي فاتت كنت فتنزانيا..
عمار هز راسه وهو مبتسم وقال:اها..وجت حتى الدكتورة ميريلا..
ابتسم عبدالرؤوف وشبح للفنجان وقال:جاتك بش تسألك..
عمار:ايه..
قام عيونه فيه وقال:شن قالتلك..
عمار:ماتكلمتش واجد سألت بس..
عبدالرؤوف ابتسم وهز براسه بعدين رشف من فنجان القهوة..
عمار شبحله شويه وقال:عندي فضول نعرف..كيف تعرفت عليها وخديتها؟
عبدالرؤوف ضحك وقال:استغربت كيف ماسألتش هالسؤال قبل هكي..
عمار؛قلت خليه هو يحكي..
تنهد عبدالرؤوف وقال:ياسيدي..كيف ماتعرف قصة بوي ومرضه..وتعرف بوي راجل مايعرف يستسلم..اصر اني نطلعه برا بش يتعالج واقل شي يرجع يصبي بمساعدة القيلات مدام في امل..المهم مايقعد ع الكرسي المتحرك..
المهم..اني درت اللي يبيه وسألت عن احسن بلاد تقدر تعالج حالته..دلوني ع اتنين المانيا وسويسرا..ولأن سويسرا كانت اغلى شوي..عدينا لألمانيا..
دخلته لمستشفى كبيره غادي..والدكاترة زادو عطوه وعطوني امل..
عمار:هي كانت مسؤوله عن حالته؟
عبدالرؤوف ابتسم وقال:تس ..وقتها كيف صكرت العام تخدم فالمشفى..تعرفت عليها بطريقه ماتخطرش ع بالك..
عمار ضيق عيونه وقال:كيف!!؟
سرح عبدالرؤوف وهو عاقد حواجبه لما اذكر الموقف..
⚡فلاش باك..
اواخر سنه 2007..
كان ماشي في الممر بطريقه لغرفة الأخصائي..
الممر كان شبه فاضي..
لما وصل لاخره جي بيلف ايسار...
وقف والتفت وشبح ايمين لما سمع صوت عراك بالكلام..
وين شاف لمصدر الصوت..
لقي واحد شاد وحده من ذراعها ويبان منظره منظر مجرمين..
وهي كانت تحاول تخلص روحها منه..
فجأة شافه حاط موس ع رقبتها...
هو طول بدون تفكير ولاتردد مشي ناحيتهم..
وصل فيها جبد الراجل من كتافه وحدفه ع الحيط..
الراجل انصدم...
وهي قعدت تشبحله بصدمه وترجف من الخوف فنفس الوقت..
عبدالرؤوف تكلم باللغة الإنجليزيه وهو يقول:ماذا تفعل!
الراجل رد عليه بنفس اللغه وقال:وماشأنك..اغرب عنا هذه ابنتي...
هي ردت بصوت يرجف:لست ابنتك..من الآن فصاعدا انا لست ابنتك لم اعد اريدك فحياتي...اتركني وشأني ايها المجرم...
وطول مشت تجري وهي خايفه وعبدالرؤوف معاها بعيونه..
الراجل:ميريللا ياميريلا...
هي التفتت ورفعت سبابتها وهي تهدد:سأبلغ عنك الشرطه..سأجعلك تموت فالسجن واتخلص منك ومن قذارتك...
ولفت وكملت جري...
الراجل:اتسجنين والدك ياميريللا!!..
قالت بصوت عالي باكي:لست ابي..
وطلعت من الممر...
عبدالرؤوف كان متألم من اللي يشوف فيه..
اما الراجل فقال عن بنته.لفظ نابي لما سمعه عبدالرؤوف ماتحملش جاه وضربه بوكس ع وجهه طيحه...
الراجل حط يده ع فمه وقعد طايح فمكانه ماقدرش ينوض كان واضح عليه انه مدمن وجسمه منتهي من المخدرات...
🍃عبدالرؤوف:بعدين طول عديت بلغت امن المستشفى هما بلغوا الشرطه وجو رفعوه..واني بعدها قعدت ندور عليها هي فالمستشفى كلها..ابتسم وقال..شدتني واجد...وفعقلي قعدت ملامح الخوف والألم اللي ريتهن ع وجهها وهي تشوف فبوها كيف توجع منين خبطه ع الحيط..ضحك وقال..كان نقولك هكي حسيت انها حنونه واجد..مش عارف..المهم شدتني وانشغلت بيها طول بدون مقدمات..
اتكي عمار بمرفقه ع يد الكرسي وحط يده تحت خده وقال:وبعدين امتى شفتها مرة اخرى؟
تنهد عبدالرؤوف وقال:بعد يومين بالزبط بالصدفه...
تلاقينا قدام الباب بالصدفه..
ماحسيتش الا بذراعي ضاربه كتفها..
ابتسم عمار..
🍃وقفوا الزوز وهما يشوفوا لبعض..
بعدين هو ابتسم وقال:تفضلي..
هي ابتسمت وهزت راسها وخشت..
وهو خش وراها..
هي قعدت تمشي كم خطوة بعدين وقفت والتفتت شبحتله بإبتسامه..
هو ابتسم وجاها وقف عليها وقال:كيف حالك..
ميريللا بإبتسامه:بخير..بفضلك..
هو ضحك وقال:بل بفضل الله هو من ارسلني اليكي..
هي شبحتله شويه بعدين قالت؛اظن بأنك عربي..
هو ابتسم وهز راسه بإيجاب..
هي ضحكت وقالت:من اين تحديدا؟
عبدالرؤوف:ليبيا..
هي تفاجئت هلبه...
عبدالرؤوف ضحك وقال:لااستغرب ملامح المفاجأة التي بدت ع وجهك
ميريلا:عن جد انت ليبي؟!
هو عقد حواجبه بإستغراب وضحك نص ضحكه..
هي ضحكت وقالت؛انا المانية الجنسية بس اصلي عربي..لبنانيه..انولدت وكبرت هون بس طبعا لازم روح وزور بلدي بكل سنه..
عبدالرؤوف ابتسم وقال:اها..
ميريللا ابتسمت وقالت:اسمي ميريللا..
عبدالرؤوف بإبتسامه؛عبدالرؤوف...
ميريللا:تشرفت فيك..
عبدالرؤوف:شكرا..
ميريللا:امم..عندك حدا هون ولاجاي مشانك
عبدالرؤوف؛عندي الوالد..
ميريللا:طيب فيك تعطيني اسمو..ابتسمت وكملت تقول..مشان ردلك معروفك معي..
هو ابتسم وقعد يشوفلها بنظرات حلوة هلبه..
نظرات اخجلتها وخلت قلبها يدق بقوة لأول مرة..
🍃وعطيتها اسمه واهتمت بيه واجد لدرجة ان بوي قعد ينادي فيها يابنتي بدل دكتورة..
وخشت حياتي وخشت قلبي وغيرتني خلتني..خلتني..نحب الحياة بصدق..
عمار:حلو..لكن كيف عرفت بعدين ان الراجل اللي تهجم عليها يكون باتها؟
عبدالرؤوف شبحله وقال:بعد وقت من تعارفنا تجرأت وسألتها وهي مش بالساهل جاوبت..
🍃ميريلا بحزن:مهم كتير تعرف؟
عبدالرؤوف ضم شواربه لداخل بعدين قالت:مهم ومش مهم..
ميريللا بإبتسامه:كيف..
عبدالرؤوف ابتسم وقعد ساكت..
هي ضحكت..بعدين تنهدت وقالت:فعلا..بيكون بيي مع الأسف
تبدلت ملامح ابتسامته لملامح الضيق
ميريللا:اهلي متل مابتعرف مهاجرين من لبنان بسبب الحرب وبعد رحلة طويله من العذاب استقروا بألمانيا..بي وامي اشتغلوا كل شي لحتى يقدروا يعيشوا هون..وبعد خلفوني زادت صعبت عليهن الحياة..بس حاولوا يقاوموا...لحتى صار عمري 6سنين..بيوم فقنا ومالقينا بيي..فكرنا انو تأخر بشغلوا...ابتسمت بتهكم وقالت..وتأخر اكثر واكثر..يوم واتنين وتلاته..اسبوع...وشهر..وامي كانت بحالة صعبه كتير وهي عم بدور عليه فكل محل ممكن تلاقيه فيه..لحتى خبرا واحد من رفئاتوا انو سافر ومعاد يرجع..
ارتسمت ع وجه عبدالرؤوف ملامح الإستياء..
تنهدت بالم وقالت:امي انهارت لما عرفت..مرقت عليها وعلي ايام صعبه كثير كنا مانلاقي فيها شي ناكلوا..
مرقوا شهرين ونحنا من سيء لأسوأ عم نعيش بالصدقه لحتى بيوم...تعبوا عيونها دموع ونزلتهم وهي تقول..اخدتني امي وكان في معا ست كبيرة طول الطريق كانوا عم يحكوا ماقدرت افهم عليهن كتير..المهم..وصلنا قدام مبنى كبير..وفتنا لجوا..استقبلونا راهبات..فوتونا لجوا
امي ضلت عم تحكي معن كتير..وبعدين..ضمتني بقوة وهي عم تئلي..ديري بالك ع حالك حبيبتي..كيف بدي دير بالي ع حالي وانا بهداك العمر مابعرف!؟ابتسمت بتهكم بعدين قالت..اخدتني وحده من الراهبات من ايدي وانا امشي معا واطلع ع امي بدي ياها تجي معي بس مع الأسف..ظلت واقفه بمحلا وهي عم تبكي لحتى اختفت من قدام عيوني..
عبدالرؤوف بحزن:كانت دار ايتام..
ابتسمت وهزت راسها بإبجاب بعدين قالت:اخدت ع الوضع بصعوبه هونيك..بس بالاخر تعودت..وامي طبعا ماتركتني نهائيا كانت عم تجي تزورني كل نهاية اسبوع..عشت بظروف احسن من اللي كنت فيا بكتير..دخلت المدرسه..وضحكت وقالت..وكنت كتير شاطره..
ابتسم..
ميريللا:واستمرت حياتي بالملجأ لصار عمري 13سنه..بيوم اجت امي وكان في معا رجال عرفتني عليه ع انو زوجا..كان سوري..خفت منو كتير..مابعرف ليه..تنهدت وقالت..المهم انو امي رجعت اخدتني من الملجا اللي تركتوا وانا كتير زعلانه لأني فارقت ناس كتير حبيتون فيه..تنهدت وكملت تقول..المهم اني رحت مع امي والعم ماهر لبيتون...ماكنت مرتاحه وكنت كتير خايفه..
عبدالرؤوف بضيق:راجل امك شكله طلع اسوأ من بوك..
ميريللا؛ههههههه...بالعكس كان زلمه طيب كثير فوق ماتتصور..
رفع حواجبه وابتسم..
ميريللا بإبتسامه:عاملني متل بنتو واعز رباني وكبرني لحتى فتت ع الجامعه..وبعدا صرت اشتغل واصرف ع دراستي ماكان بدي كلفوا اكثر بس هو كان حنون كتييير احن حتى من ماما علي..ماكان يمرق يوم بدون مايعطيني فيه مصاري بيئلي انتي بتدرسي طب يابنتي والبلد كل يوم عم تغلى اكتر..وانا كنت اخد منو وردلوا اياهن بجيبة وحده جواكيتو اللي كانوا بالخزانه وهو ياحرام كان عم يفكر حالوا ناسيون ويرجع يعطيني اياهن..
ضحك عبدالرؤوف..
وهي كانت تضحك..وفعز ضحكها دموعها نزلوا وهي تقول..الله يرحموا توفى وانا بالسنه التالته..
هو تلاشت ضحكته..
ميريللا؛قهرني موتوا كتير متل ماقهر امي..ضلينا وقت طويل ونحنا عايشين بحزن وألم لغيابو النهائي..رشفت وقالت...الحياة من بعدوا بالنسبة لألنا صارت ناقصه..مسحت دموعها وقالت..لكنا استمرت..وكملناها انا وامي..
عبدالرؤوف بحزن؛باهي انتي قلتيلي كنتوا تزوروا في لبنان كل عام اقاربكم مااقترحوش عليكم تروحوا يعني ترجعوا..
ابتسمت وقالت:تس..ولانحنا كان بدنا...
عبدالرؤوف:امم..فهمت..باهي..بوك..منين طلع مرة تانيه!!؟
ضحكت بتهكم وقالت:والله مابعرف..بيوم دق باب البيت فتحتوا وشفت رجال منظروا حلو..بس عيونوا كانت كتير بتخوف...ماعرفتوا اول ماشفتوا..هو سألني عن ماما..ولما سألتوا من يكون..ئلي انا زوجا...ع طول عرفت انو هو...سألني من بكون..ئلتلوا ميريللا..ضحكت وقالت..بدون.مقدمات حضني وع قولت بنتي حبيبتي اشتئتلك ومن هيك يعني...واني ماحسيت اتجاهو بأي شي..
طبعا امي لما شافتوا مسحت فيه الأرض وطردتوا وهددتوا ازا اجا مرة تانيه رح تخلي الشرطه يشحطوه من البيت...
وفعلا..ماعاد اجا..بس ظل عم يلحقني بكل محل يستعطفني يحكيلي قصص وروايات وانا قلبي الله يسامحوا كان يرق لحالو ويشفق عليه ويصدقوا..وصرت عم اعطيه نص راتبي تا يصرف ع حالو..وماكنت بعرف انو كان عم يصرفوا ع السم الهاري..مخدرات..عرفت هالشي كتير متأخره..ولما عرفت قطعت علاقتي فيه..وصرت اهرب منو ونجحت في اني خليه مايلاقيني..
عبدالرؤوف؛ماجاكم للحوش؟
ضحكت ميريللا وقالت:غيرنا البيت من بعد مااجا اول مرة ماما ماارتاحت لحتى غيرنا مكان السكن وعملت جهدا حتى مايلاقينا..بس هو ماكل ولامل لحتى كمشني..بهداك اليوم اللي انت انقذتني فيه..
ابتسم وغير عيونه عنها..
وهي ضحكت وقعدت تشبحله..
🍃قعدنا عام ونص مع بعض..عام ونص اني نحبها وهي ماتعلم..
عمار عقد حواجبه وقال:عام ونص!!اني نهارين وخطبتها طول وبعد شهرين خديتها..وحق الله كان قعدت كيف ماانت قعدت ممكن..استغفر الله قتلت ع خاطرها حتى القتل ..
عبدالرؤوف بضحكه؛انت معروف عاد ماتعرف حاجه سماها صبر ع حاجة تبيها تقعد وراها لين تاخدها..
عمار ابتسم وقال:في مسائل القلب بالذات ياعبدالرؤوف مافي صبر..
ابتسم عبدالرؤوف وقال:واني معاد قدرت نصبر اكتر ماصبرت وقتها..
🍃خير رؤوف شو صاير !!
عبدالرؤوف ابتسم بإحراج وقال:آسف جدا خوفتك..هو مافي شي...وفي نفس الوقت..في...
ميريللا بإستغراب؛كيف مافهمت؟!
عبدالرؤوف تنهد بعدين بلع ريقه وقال...
"نحبك"
ميريللا انصدمت وهي تشبحله..
هو بلع ريقه ومازال يشوفلها ويراجي فردها..
🍃ردت فوقتها؟
عبدالرؤوف بضحكه؛تس..قعدت شهر كامل وهي مخليتني نشوفها من بعيد مخليها براحتها بش تفكر..وبعد شهر ردت عليا وقالت..بنعطيك فرصه..
ضحك عمار..
عبدالرؤوف:طول خطبتها..وبعد شهر تزوجنا...
عمار؛هلك ماعارضو؟
عبد الرؤوف؛نهائيا وبوي كان فرحان بيها واجد..
عمار:وبوك هو نفسه كان سبب الطلاق..
عبدالرؤوف بأسف؛ايه..بس من غير قصد.
عمار:هي قالت لأنه يحب بوه واجد انفصلنا..
عبدالرؤوف:كان يبي يروح بعد تم علاجه..وقالي روح بيا وولي لمرتك..لكن اني ماقدرت نخليه بروحه..وهي طول طلبت الطلاق..قالت مانقدرش نعيش غادي..ولانقبل نخليك تسيب بوك ع خاطري..اني وقتها قلبي كان واجعني واجد كيف بسهوله هكي تخلت..عصبت وقعدت نقول فكلام جارح واجد من وجع قلبي قلته..
🍃عبدالرؤوف بعصبيه:عادي هكي تقولي فيها ومش فارق معاك بكل طلقني طول..حتى ماتبي تجربي ع خاطري مرات تتأقلمي غادي مرات اني وياك نقدروا نقنعوا بوي يولي معانا مرة تانيه..لكن انتي طول تخليتي ياميريللا..تخليتي طول لأن مصلحتك معاي تمت..
ميريللا بصدمه:مصلحتي!!
عبدالرؤوف بإبتسامه ساخره:ايه..مصلحتك..النعيم والحياة المرهفه..والاستقرار اللي مالقتيه كان معاي اني..
🍃عمار بصدمه:لبزت واجد ياراجل واجد..
عبدالرؤوف بأسف:ماعطيتهاش فرصه ادافع عن نفسها طول قلتلها اني حنطلقها تاني يوم وفي نفس اليوم نروح لليبيا..
عمار حط يده ع وجهه وقال:شن العار اللي درته هدى!!؟
عبدالرؤوف نزل راسه بإحراج وهو يشوف لتليفونه..
نزل عمار يده وقال:والله هدي مراة مافي اعقل منها..مراة حكيمه..مفروض تكره اي ليبي تشوفه قدامها بسببك..تعرف انها ماحكتلي عنك كان كل خير ولامرة غلطت فيك بكلمه..خلتني نحترمك اكثر من قبل طبعا قبل مانعرف شن كنت ادير فالوقت نفسه..
قالها وهو يشوفله بنظرة حاده وحاجبه مرفوع..
ضحك عبدالرؤوف بعدين شبحله وقال:سبحان ماقدر لهدى كله..
ابتسم عمار وقال:سبحانه..
🍁🍁🍁🍁
الساعه 12:00ليلا..
واقفه ع مرايا وهي تمشط فشعرها المبلول وتحكي بحماس..
رزان وهي مبتسمه بحماس:ماشاء الله قديش نشدوا عليه وقديش عجبهم العشي والحلو وكل شي وفي ناس حجزت من توا لمناسباتها بعد رمضان من توا..
حطت المشط..خدت الستريشه لمت بيها شعرها فوق وهي تقول:متحمسه واجد عماد
التفتت ومشتله وهي تقول:تتوقع ننجحوا اكثر ونكبروا مودي..
عماد وهو مستلقي ع ظهره وفاتح حضنه قال:تعالي قبل بعدين نقولك..
ضحكت وجاته خشت حضنه وهو ضمها وقال:بإذن الله تنجحوا وتكبروا وتولوا اشهر من نار ع علم يا فكرونتي انتي..
ضحكت رزان..
عماد؛وتوا الهي براجلك ياقلبي بش ربي يرضى عليك ويوفقك وييسر امرك...
رزان:هههههه..قامت راسها وقعدت تشبحله وقالت..نحبك موت..
عماد؛أاااخ..ووضمها وقربها وباسها..وكملوا باقي ليلتهم وهما يحبوا في بعض..💓
🍁🍁🍁🍁
الساعه 1:30ليلا..
طلعت من دارها وهي متوجهه للباب بتطلع للجنان تبي تقعمز فبرودة ربي شويه لين يجيها النوم..
لما وصلت فالباب وقفت وين سمعت حد ينادي فيها
التفتت وتفاجئت لما شافت فضيله واقفه وراها قالت وهي مستغربه:فضيله!
فضيله بإبتسامه:سامحيني خلعتك..
دلال ابتسمت وقالت:ولايهمك..تبي حاجه؟
فضيله تنهدت وقالت؛ماجانيش نوم..
دلال بإبتسامه؛باهي تعالي نطلعوا من جهة الكوجينه من هني المربوعه الرجاله راقدين فيها..
هزت فضيله راسها وهي مبتسمه..
بعدين مشوا مع بعض للكوجينه فتحت دلال الباب..
وطلعوا برا..
مشوا طول للكراسي وقعمزوا عليهم..
دلال:حلوة الحفله ولا؟
فضيله بإبتسامه؛واجد..
ابتسمت دلال..
فضيله ابتسمت وسكتت..
دلال وهي تشبح لفضيله قالت:شن مسهرك لتوا؟
تنهدت فضيله بحزن وقالت:عقلي مايفكر كان ففطومه يادلال..ماني عارفه شن صاير فيها..شن تاكل شن تشرب شن تلبس وين ترقد وكيف ترقد..كيف عايشه فحوش هل امها..من قبل البنات حكولي كيف كان وضعها منين جابوها من غادي وامها معاها..كيف يكون وضعها تو..
دلال:مش خالي الهادي مشي شافها وقال حالها وباهي وكويسه!
فضيله:ايه قال هكي بش يطمني اني بس..لكن اني نعرف الهادي من عيونه يادلال مايقولش فالحق..
دلال شبحتلها شويه وقالت:لهالدرجه حبيتيها يافضيله..
فضيله تعبوا عيونها دموع وهي تقول:تقول بنتي تقول اني اللي جايبتها يادلال..نحب خوتها واجد لكن هي بروحها عندي..نزلوا دموعها مسحتهم وهي تقول..اني ماعنديش فرصه بيش نحمل ونجيب صغار..وربي عوضني بعويلة الهادي يادلال..مامصبرني كان فؤاد ورمضان كان خدتهم حتى هما..مش عارفه شن كان صار فيا...
دلال حطت يدها ع ذراع فضيله وقعدت تمسح عليه وهي تقول:ربي يردهالك يارب ويعطيك ع قيس نيتك يافضيلة...
ابتسمت فضيله وقالت:حتى انتي ان شاء الله...
نزلت دلال يدها وقالت :آمين..
🍁وكملوا هدرزتهم ع الحفله وتكلموا ع بلقيس وقرموا لمياء شويه وضحكوا...وهكي لين نعسهم النوم الزوز وخشوا رقدوا مع الساعه الثالثه صباحا🍁
🍁🍁🍁🍁
اليوم اللي بعده..
الساعه 9:00صباحا..
كانوا مرام ونعيمه اول من ناض..
شربوا قهوة فالجنان وهدرزوا وحداهم عمار يلعب فالجنان..
بعدين ناضت الحاجه فاطمه وطلعت قعمزت حداهم وشربت القهوة وكملوا هدرزتهم معاها ومرة مرة يجيها عمار ويلعب عليها وهي تلعب عليه وتغنيله..
وشويه وناضوا الباقي...
وقعدت دلال بس اللي راقده..
وماتندريش ع آسيا شن قاعده ادير من وراها فدارها..
☘حلوة هلبه بابا حلوة..
عمار بإبتسامه؛اممم..باهي وامك كيف طلعت..
آسيا؛حيي..ماما..حي يابابا..
عمار بضحكه وهو رافع حواجبه قال:خيرها!!
آسيا:طلعت طرف مش عادي..
عمار؛ههههههه..
آسيا:والله بابا..لبست قفطان..بابا..
عمار بضحكه:معاك ياقلبي معاك..
آسيا؛ايه..لبست قفطان لونه عنابي..شويه بس بابا..
ومشت حطت الآيباد ع الطاولة وتكاته ع الحيط..بعدين بعدت وقالت:تشوف فيا بابا..
عمار بضحكه؛ايه ياسمحه ايه نشوف فيك..ا
آسيا:ايه بابا..لبست قفطان عنابي لهني..واشرت ع ركبتها بعدين قالت..ودارت شعرها فوق..ورفعت شعرها فوق..بعدين نزلتهم وهي تقول..ودارت روج لونه زي القفطان...كلهم هكي يشبحولها هكي..هي وبس..
عمار وقلبه يقربع تقربيع وهو يتخيل فالوصف قال:رقت روحها!!
آسيا بتساؤل:شني؟!!
عمار ضحك وقال؛يعني قرت قرآن قبل تجي للحفله..
آسيا:ااااااه..فهمتك..هي تحط فيدها ع راسي وتقرا قرآن ديما قبل مانطلعوا ديما..
عمار ابتسم وقال:وهي من يقرا عليها..
آسيا رفعت عيونها وهي تفكر بعدين قالت؛مانعرفش..
ضحك عمار بعدين قال:انتي تحفظي الفلق والناس وآية الكرسي ولا؟مش انتي قلتيلي هكي..
آسيا؛ايه بابا حافظتهم..
عمار؛كويس انتي اقري ع ماما باهي ديما وين تجي طالعه..وبالذات وين تكون طرف كيف ماقلتي..وضحك..
آسيا: حاضر بابا..باهي خل نكملك..ماما بعدين ناضت رقصت..
عمار:لاااا..الله يرحمك والديك ياسمحه باتك ماتركبي باتك ذنوب ياقلبي..
آسيا :خيرك بابا!!!؟
عمار:هههههه..ياسمحه انتي نوريك الفطور اللي درته؟
اسيا؛ايه بابا وريني وريني...
ضحك عمار وقال؛ماشاء الله تبارك الله..
🍁🍁🍁🍁
الساعه 12:00قبل الظهر..
مطار معتيقة..
زينب:لميا عيونك عليها يالميا ردي بالك..
فاطمه:ياسر عاد ماتكترنش ع ماوصوكن..
لمياء بضحكه؛خايفين عليك ياعمتي عندهم حق..
كفايه:كل يوم بنتصلوا بيك خلي تليفونك بحداك..
لمياء بإبتسامه:باهي ان شاء الله..
سمعوا صوت نداء الرحله..
زينب حضنت امها وقالت:ربي يوصلكم سالمين يارب..
فاطمه:ان شاء الله ان شاء الله..انتن رد بالك ع رواحكن راكن صاحبات مرض..ورمضان جاي ردن بالكن..
ابتسمت كفايه..
وزينب قالت والدمعه في عينها؛حاضر يمي حاضر..
🍀بعدين جوهم الرجاله..
خدي عمر امه ومرته ومشوا بطريقهم لطيارة رحلتهم..
والبنات بعد مشت امهم قعدوا يبكوا..
وكذلك اللي فالحوش..كانوا يبكوا مش لأنها بتسافر لا..بل لانهم فرحانات بأن ربي جبر بخاطر امهم ونولها مرادها..
🍃🍃🍃🍃🍃🍃🍃
وتمر الأيام وتبعها الأيام..
والكل يستعد لقدوم شهر الخير..
برغم ان وضع البلاد فهالشهر ينغص علينا مرات فرحتنا بقدومه لكن يقعد هو بجمال اجوائه طاغي ع كل شي..
🍁🍁🍁
استعدادات عمار كانت غير..
عمار اللي ماباش يخلي الناس اللي عاش معاهم اصعب سنين عمره وكانوا سبب في انقاذه من الضياع التام...
تعود ينظملهم برامج فشهر رمضان..وبما إن رمضان كان شهر القرآن فأهم البرامج كانت تخص القرآن..
ختمات جماعه..مسابقات حفظ..ودروس بين الصلوات..
كذلك برنامج مساعدات للناس المحتاجه...
الجميل في هذا..
ان عمار كان مخلي صغار ع اطلاع بالشي اللي يدير فيه بالذات جواد..كان عنده فضول شديد اتجاه حياة بوه فهديكا البلاد وشن يدير فيها...وكذلك كان يزيد يتعرف ع بوه اكثر واكثر..
🍁اما رائدات الأعمال...
غاليه وحميده فكانوا يسوقوا لمعملهم ع الفيس..
وكذلك بين جيرانهم ومعارفهم فالبلاد..لأنهم ناويين يخدموا فيها وفطرابلس كذلك
وكان اكتر شي فرحهم هو تسليمهم مهمه تجهيز عشي حفله رفقه اللي حتندار في اكبر صاله فطرابلس وبحضور ناس من الطبقه الراقيه..يعني حيكون هدا اكبر اعلان تسويقي ليهم..
🍁اما ضيوف الرحمن
فكانوا عايشين احلى ايام عمرهم بالذات الحاجة فاطمه اللي الإبتسامه مافارقتش وجهها نهائيا.
بعتت لمياء للبنات صورة لأمهم وهي لابسه جلابيه وشاربه اول مرة فحياتها تلبس هكي وطلعت فيهم حلوة هلبه.
💓رانيا بضحكه:محلاها ياربي شوفي ضحكتها يام.
زينب بإبتسامه؛فرحانه هلبه
💓كفايه وهي تشوف للصورة:اميمتي ربي يتقبل منك يارب وعقبال الحجه بجاه النبي
💓نعيمه:اشي اشي ع امي اشي
دلال بضحكه:وخيتي سلمها
💓ميلاد:الله عليك امي وخلاص..ههههه
غاليه بإبتسامه:فرحانه واجد..
سعيده بإبتسامه؛ومن اللي يعدي غادي ومايفرح ياغاليه..
ميلاد تنهد بإبتسامه وقال؛ربي يوصلنا..
🍀وكانت لمياء تبعتلهم فصور الغدي والعشي..وتصورلهم في عزوزتها وين ماتكون بش ترضيهم وترجع تكسبهم..
🍃🍃🍃🍃
وخش شهر رمضان..
وعدى منه 5أيام...
صارت فيهم هلبه مفاجآت
🍁رزان ربي يهديك ياقلبي معقوله يصير فيك هكي وماتكلمنيش!!
رزان وهي تمسح فوجهها بالفوطه؛عارفه خيرني..
عماد ضيق عيونه وقال؛خيرك.
رزان بإبتسامه وهي رافعه حاجبها:بعد التروايح تعال ارفعني نحلل
رخي عيونه وارتسمت ع وجهه ابتسامه نصر وقال:حتى اني العمده ياسمح قول وفعل..
ضرباته بونيه ع بطنه وقالت؛ياسخيف مازال الدنيا صيام..ومشت طلعت للكوجينه..
وهو طلع وراها يضحك ويقول:تي غير شن قلت اني استغفر الله وخلاص
🍁🍁🍁
وطلعت رزان حامل بعد مارفعها عماد تحلل هديكا الليله...
لكن مش بس رزان اللي طلعت حامل...
🍁🍁🍁🍁
خش للحوش بعد ماروح من صلاة التراويح..
وهو متوجه لدار النوم سمع صوت نور وهي تبكي وتتكلم..
وقف فباب دار المعيشه وقعدت يسمع..
نور ببكي:مانبيش منه صغار يادلال ساد انيس والله وين نشوفه ولدي يصخفني..نحس بالذنب اللي اخترتله واحد زي مالك يكون بوه........مبالغه شنو يادلال.!!معقوله بعد هدا كله مش حاسه بيا ومش فاهمتيني!!!..........كرهته اني كرهته اني نبي ربي يخلصني منه يادلال مش يزيد يربطني بيه..
مالك الكلام كان ينزل ع قلبه زي السم..كل كلمه تخش لوذنه زي السيف...
حس روحه فهديكا اللحظه بيموت حق..
بل تمنى الموت حق...
مشي طول للدار وعيونه يذرفوا فدموع حارات..ماقدرش يمنعهم..
ومع هذا قعد يسب ويلوم في نفسه..هو اللي وصل نور لهالحاله...هو اللي خلاها تتألم لهالدرجه...لدرجة انها ماتبيشي يكون بو صغارها..
🍁غير حوايجه ومشي طول بعدها طلع من الحوش وهدا كله ونور ماحستش بيه نهائي...
🌴🌴🌴🌴
اما فالبلاد...
الساعه 12:00ليلا..
مقعمزات فالدار بتفرجوا ع التلفزيون..
ولأن الضي كان هارب..فتحوا المولد..
حميده وغاليه كانوا متحمسات مع المسلسل..
لكن فضيله كانت مش معاه بكل..
فضيله بتعب:المولد قلبلي راسي..
غاليه:عدي ارقدي في دار امي..
فضيله؛ايه صح..ناضت بصعوبه وهي حاسه بدوخه..
بعدين مشت بإتجاه الباب وهي تقول:نوضني نتسحر مش تنسن..
حميده؛غير امتى نسيناك..
فضيله بضحكه تعب:غير امتى نوضتيني انتي.
ضحكت غاليه.
حميده:باهي عدي ارقدي عدي..
فضيله ضحكت وكملت طريقها للباب..
لما قربت توصل فيه حست الدنيا ضببت فعيونها..
لحظات....
وطاحت مغمى عليها...
واصوات صراخ غاليه وحميده وصلت لبرا..
سمع الهادي عياطهم وهو خاش للقطعه..
خاف هلبه..
طول مشي يجري بإتجاه للحوش..
كيف وصل الركابه رن تليفونه..
فاته وركب وخش للحوش..
شاف فضيله طايحه بين ايدين حميده وغاليه واقفه حداهم والتليفون ع وذنها..
الهادي بخوف؛خيرها فضيله!
شبحتله حميده بخوف..
وغاليه التفتت وقالت؛هي بسرعه عدي ولع سيارتك تحرك..
الهادي شبحلها شويه بعدين لف وطلع يجري..
🍁🍁🍁🍁
فضيله وهي مقعمزه ع السرير في حجرة فالمستشفى قالت:والله ناكل باهي..اهو خواتك شاهدات ياهادي..
الهادي بإستياء:ع اللي مايعرفك يافضيله..
غاليه؛خلاص توا اللي صار صار فالجديد نطعمها بإيديا..
ضحكوا..
والهادي ضحك وهو يحرك في راسه يمين ويسار..
شويه وخشت الدكتورة وهي مبتسمه وفيدها ورقه وتقول:هاه فضيله شنو حاسه توا؟
فضيله بإبتسامه:الحمد لله يادكتورة خير من بكري..
غاليه:شن عندها يادكتورة.
الدكتورة ضحكت وقالت:عندها بيبي..
كلهم شبحولها بصدمه...
الهادي بصدمه:شن عندها!!؟
الدكتوة ضحكت وقالت؛فضيله حامل ليها 5أسابيع..
غاليه ابتسمت بإندهاش وشبحت لفضيله وعيونها غرقوا بالدموع...
حميده بضحكه فرح ودموعها ينزلوا:سمعتي يافضيله..
الهادي قعد يشبحلها وهو متفاجأ ع الآخر وابتسامةالفرح ع وجهه...
اما فضيله فكانت تشبح للدكتورة بصدمه وخلاص..
الدكتورة:وضعك تمام ومافيش عندك اي مشاكل يافضيله..بس نبيك تهتمي بزياده اكثر وتردي بالك الحمل في السن هدا يبي اهتمام كبير جدا..
حميده:من اليوم وبرا غادي فضيله معاد قايمه قشه من وطا..
جتها غاليه وحطت يدها ع راسها وقالت:فضيله.
فضيله بصدمه:مش مصدقه ياغاليه..
غاليه بإبتسامه؛مافي شي صعب ع ربي يافضيله..
حميده:جبار خواطر ربك يافضيله.
قامت عيونها ومررت نظرها عليهم..
تبتتهم عند الهادي وشيئا فشيئا بدت تضحك والدموع ينزلوا ورا بعض من عيونها..
والهادي يضحك ودموعه معبيات عيونه..
اما الدكتورة مدت الورقه لحميده خدتها..ومشت طلعت من حداهم..
💓💓💓💓
هديكا الليله الهادي روح بفضيله وخواته وهو واخد حلويات اشكال والوان...
مشي حلا عيت خوه ميلاد..
وبعدين عيت عمه..
وبعدها مشي لحوش خوه هانيبال كذلك عطاه نصيبه..
ومرام لما سمعت الخبر فرحت هلبه لفضيله واتصلت بيها طول..
وطبعا حميده بدورها اتصلت بالعيله كلها وخبرتهم..
وهما فرحوا من قلوبهم...
واتصلوا بيها بش يشاركوها فرحتها...
☘☘☘
فرحة فضيله..
تمنتها غاليه هلبه...
غاليه اللي قعدت سهرانه لبعد آذان الفجر وهي مقعمزة ع الركابه فم الحوش وهي تفكر..
تفكر فالمكتوب عليها وقاعده تعيش فيه..
توصل ديما لنتيجه وحده..
ان ربي ارادلها هالقدر...واختارلها الأصلح بيها ديما..
مش ديما الزواج والصغار يكونوا نعمه..مرات يكونوا نقمه بلاء هم...مصيبه..
هلبه متزوجات توا يتمنوا يكونوا مكان غاليه...
غاليه اللي ربي اراد يعطيها قيمه مختلفه عن قيمة هلبه نساوين فالدنيا...
ممكن غاليه لو تزوجت وجابت صغار ماكانتش حتحظى بالمكانه العاليه اللي عندها توا فقلوب افراد عيلتها..
حتى اللي يغلط فيها منهم يتمنى ترضى عليه وترجع تكلمه ومن كبر قيمتها مستحي يجي يعتذر زي عمر...ومحمد توا اللي نزل من الدروج وشافها وهي مقعمزه..
خاف وجاها طول وقال:خيرك مقعمزة برا فهالوقت!؟
غاليه شبحتله توا وقالت؛انت خيرك مارقدت لتو؟
محمد عقد حواجبه وغير عيونه عنها وقال:عدي خشي ارقدي ريحي روحك شويه..
غاليه:وانت ماتبيش تريح روحك؟
محمد مشي نزل من الركابه وقال:عدي ارقدي ياغاليه عدي..ومشي بإتجاه سيارته..
هي قعدت معاه بعيونها لين شافاته ركب السيارة وشغلها بعدين تحرك..
تنهدت غاليه بحزن وقالت:ربي يهديك بجاه هالأيام المفضله..
وناضت ركبت الركابه ومشت خشت للحوش وصكرت الباب..
...يتبع...
