#العشق_المتمرد "عندما يزهر الليمون"
#جمان_فريد
الجزء 124القسم الأخير
🌟...
تندم والله تندم...والله ندمك..والله ندمك..الله..
كانت تقول فهالكلام وهي تلم فحوايجها..
مرت خوها معاها تلم فحوايج البنات وفداخلها صاير مهرجان من فرحتها باللي قاعد يصير..
برا..
كان يدور في الحوش ويدور ..
وخوته واقفين فوسط الحوش..
شويه جاهم..وهو يقول بصدمه:قسما بالله بنهبل بنهبل..شد راسه بإيديه وهو يقول..كيف صار هكي كيف..وامتى صار..امتى !!؟
محمود:معقوله صديق مانك مذكر شي بكل!!
شعبان:مانكش مذكر انك خديت حليمه اخت صاحبك وبنت رمضان حرجانه عند هلها....وبعدين طلبت منك الطلاق وانت مابيتش اطلق....
محمود: بعدين روحت معاك وسكنتها فوق الحوش هدى هي وبنتها...
هو كان يمرر فنظراته المصدومه عليهم ومش مصدق اللي يسمع فيه..
لاعارف روحه يحلم..
ولايكوبس..
ولافمقلب...ولاشنو بالزبط..
مش قادر يفهم..
مش قادر يستوعب..لا اللي يشوف فيه ولااللي يسمع فيه..
محمود:ياما درت فيها...حتى مرة...
شد شعبان ذراع محمود بالقوة..
الصديق وهو يمرر فنظره عليهم بريبه:كمل...حتى مرة شنو!!؟
محمود غير عيونه عنه وقال:عطيتها طريحه لين قريب ماتت بين ايديك..
توسعوا عيونه بصدمه..
وقعد قلبه ينبض بقوة...
وريقه يبلع فيه كإنه يبلع فسم..
فجأة...
انفتح باب الدار ..
وطلعت منه حليمه وبنتها الرضيعه فغمره..
ووراها مرت خوها شاده شنطه فيدها والبنيه الكبيره فغمرها..
غير عيونه ليهم..
حليمه قالت:والله ياصديق كان ماندمتك مانبداش اني حليمه..
قعد يشبحلها بنظرة غريبه..
فات من حدا خوته ومشالها..
هي خافت..
وخوته حتى هما خافوا..
واحلام تشوفله بترقب..
وصل فحليمه وقعد يشوفلها..
وهي تشبحله...
بعدين التفت لخوته وقال:قتولي قديش ليا متزوجها!؟
محمود:فوق العامين...
التفتلها..
بعدين نزل عيونه للطفله اللي فحضنها..
قعد يشبحلها لحظات..
بعدها شبح ايساره عيونه جو فعيون فرح اللي كانت تشوفله وتضحك ببراءة وماده ايديها وتحاول تتلاحقه وتقول...
"بب..بب..بب"
عيونه تعبوا دموع..
ورجع ردهم لحليمه..
هي كانت تشوفله بحده وعيونها معبيات دموع..
الصديق:مانبيش نشوفك هنى بكل...
التفت لخوته وقال:قولوا لخوها يجي يتلفها...
ومشي توجه للباب...
وخوته لحقوه وهما ينادوا فيه ويسألوا ..
"وين ماشي"..
حليمه بصوت يرجف:مالحقتش...مالحقت...
احلام"ياما بيصير مش حتلحقيه ياشيطانه"...
🍁🍁🍁🍁
برا..
هي تحرك..هي بسرعه ارفعني لحوش رمضان..
محمود:اصبر شوي ياصديق..
بإندفاع مشي للسياره..
فتح الباب وركب..
ولع السياره..
وخوته جري مشوا ركبوا معاه..
وهو تحرك بأقصى سرعه بإتجاه القطعه...
🍁🍁🍁🍁
تفضل بشن نقدر نخدمك..
مروان قعد يشوفله وهو مبتسم ابتسامه تهكميه..
عقد ياسين حواجبه بإستغراب وقال وهو مبتسم:شكله في حاجه مزعلاتك...
مروان:هلللبه..هلبه...فوق ماتتصور..
ضحك ياسين وقال:تفضل قول شن مزعلك فشن غلطنا معاك نصلحوه..
مروان:انت تستغبى...تستعبط!!؟
تلاشت ابتسامه ياسين وقعدت عقده الحواجب..
مروان :بتفهمني توا انك مش مذكرني!!؟
رفع حواجبه وقال:اني نتعامل مع عشرات الوجوه يوميا قداش بنذكر لنذكر..
مروان ابتسم بتهكم وقال:اني بالذات ماننتساش..لكن عادي مافيش مشكله..تو نذكرك..
حط ياسين يده تحت ذقنه ورجع يشبحله بعقدة حواجب..
مروان حط رجل ع رجال وقال:اني ولد عمة...رفقه..
نزل ياسين يده وحطها ع الطاوله..
وملامح وجهه تبدلت للحده..
مروان ضحك بتهكم وقال:شكلك اذكرت كويس...مليح..
خل نخشوا في المفيد...نزل رجله وناض شوي ساوي كرسيه وخلاه مقابل ياسين بالزبط..
قعمز وحط ايديه ع الطاوله وقال:انت راجل كويس وولد عيله..ويبان عليك محترم..لهذا بننصحك نصيحه..ماتحطش روحك فمواقف بايخه...ماتخلي حد يستغلك بش يوصل للي يبيه..
تبدلت ملامح وجه ياسين للإمتعاض وهو يشوفله..
مروان:بنت خالي..اني وياها يعني..شبه عاطي فيها كلمه..من لما كانت صغيرة وهي تقرا فالإعدادي فتحت عيونها عليا ومعاي...وقعدنا مع بعض سنين..كبرت ع حبي اني..
مؤخرا تشاكلنا شويه هكي..وصارت زعله قوية شوي..والباين رفقه من قوة زعلها المرة هادي تبي تغيظني شوي..اشرله بسبابته وقال..بيك انت...وابتسم بإستفزاز..
ياسين رفع حواجبه..
مروان وخر واتكي ع الكرسي وقال:اعتقد فهمت عليا..
وصلت الرساله...
ياسين نزل حواجبه وقعد يشبحله بملامح باردة..
مروان ناض وقف وهو يقول؛سامحنا عطلناك..موفق..
رفع يده تحية وقال...السلام عليكم..
نزل يده ومشي بإتجاه الباب وهو مبتسم بثقه..
فتح الباب..وطلع وصكره وراه..
ياسين قعد يخبط بصوابعه فالطاوله وهو يفكر..
وع وجهه مرسومه ملامح العصبيه..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃
الساعه 3:00بعد الظهر..
انطلقت السيارات ورا بعض ..
والكلاكسات مسموعه فأرجاء القبيله..
كانوا متوجهين للزاويه...
رافعين الكسوة...
اللي مشوا من النساوين..
فاطمه..حدهم..
سعيده..رزان..
امال...صبريه..
زينب..نعيمه..
ومن الكناين بإختيار الحاجه فاطمه..
لطيفه..
والبنات...
رباب...ودلال...
وام مرام..مرضيه..
ووحده تانيه من عزايز القبيله...
مشت الكسوة..
لكن الحدث اللي صار قبل لتمشي الكسوة مازال قائم..
🍁فمربوعه حوش الحاج عبوده..
كانوا موجودين...
الحاج عبدالله..
وحميد..
وهانيبال..
وخليفه..
مع الصديق وخوته محمود وشعبان..
والشيخ الراقي حاضر..
ومعاه طالب علم..
حميد بصدمه:لاحول ولاقوة إلا بالله..
الصديق:جيبولي المصحف نحلف عليه اني لعند تو مش مصدق ان خديت عليها..واني طلقتها...مش مصدق اللي صاير تو..قريب نهبل اقسم بالله..بنهبل..
هانيبال:معقول مش متفكر شي بكل!؟
الصديق:كل اللي نذكره ياهانيبال ان المده الأخيره صارت بيني وبين اختك مشاكل..وكلها من الضغط النفسي اللي صايرلي بسبب مشاكل فالخدمه..وهي بسبب اللي صارلها وانتم تعرفوه نفسيتها تعبت...لكن كنت عاذرها..ووالله وبالله ماكنت حاط فدماغي شي لاناخد عليها ولانطلقها..
محمود:واني نشهد حرضوه واجد ياخد وحده اخرى وهو رفض بقوة وقال صكروه عليا الموضوع هدى..
حميد بتعجب:والله الواحد ماعارف شن يقول..شي لايصدق الحق..
الراقي:السحر ياخوي من اسمه سحر..يذهب عقل البنادم بشكل أو بأخر..والاخ الصديق السحر اللي اندارله كان يتجددله بإستمرار وكل ماله يسيطر عليه لين نساه بالمرة انه كان متزوج قبل وعنده بنت..
عبوده:الله يجيرنا من الشر والاشرار..ويعافينا..وانت ياولدي احمد ربك اللي نجاك غيرك واجد راحو ضحايا للسحر..
تنهد الصديق وقال:الحمد لله..
شعبان شبح لطالب العلم وقال:تو حني نبوا نعرفوا زواجه من المراة الأخرى....وطلاقه لزوجته الأولى..
باطل ولا لا...؟
خليفه شد ع قبضه يده بقوة خوفا من الإجابه..
وخوت حميد وخوت الصديق كانوا منتبهين مع الراجل وقلوبهم تنبض بقوة..
اما الصديق فكان خايف ومتوتر وهو يفرك فإيديه فبعض ويستنى في الإجابه..
طالب العلم بدي اجابه بثناء ع الله والصلاة على نبيه..
وذكر مجموعه من الأحاديث الشريفه اللي تخص الحدث اللي صاير..
كانت المقدمه تبين الإجابه شن هي..
ملامح وجه الصديق بان عليهم الإستبشار..
بينما خليفه وجهه ولى اسود
طالب العلم: وبناءا على ماسبق فإن زواج المسحور وطلاقه...
"باطل"..
خوتها شبحوا لبعض وهما مضايقين..
بينما الصديق برغم ضيقه من بطلان زواجه من حليمه اللي جابت منه حتى الصغار..
الا انه فرح ع الآخر اللي مازال حميده قاعده ع ذمته..
🍁🍁🍁🍁
إمعنقر طاقيته ماذل ...اللي شرطوه عليه نقل..
الشتاوة هادي كانوا يرددوا فيها اهل العريس بعد جاهم خبر قرايه فاتحة اريج وولدهم...
والكسوة كان مطرحه قدامهم.... كانت كسوة معتبره ع قولة حميده...
هي اللي اختارت اغلب بضاعتها...
وكان كله من احلى وارقى شي...
امال..
يابنيه سعدك مامنه...اللي جيتي لسعيده كنه..
ردوا وراها كلهم
ونجاة كانت تصفق وادور فعقلها ع شتاوة....
ولقت وغنتها..
يلي كيف الريم زويله...طلعناه زكاة ع عيله..
ردوا وراها كلهم...
رزان
انتي صليتي وبوك دعي...اللي حصلتي خويا اني..
ردوا وراها
وحده من قريباتها..
سماحة زول نظافة نيه...تسأل تلقاها زاويه..
زغرطوا نجاة وزغرطوا معاها نساوين عيلتهم..
وبعدين رددوا البيت..
سعيده...
الصيت الباهي لينا فيه...السيل يتبع فواديه..
زغرطوا وردوا وراها...
نجاة
إن شاء الله يانوارة عيني...بالصيت الباهي تفوتيني..
ردوا وراها...
صبريه..
وجعنك غرسه ماطيحي...وين تميح عزوزك ميحي...
ابتسمت سعيده...
جميله ام اريج..
حوش العز اللي رباك بقدرك للزينين عطاك..
ردوها وراها..
زينب..
يامبروك على الحبيب...سجلناها فالكتيب...
ردوا وراها...
نعيمه..
امك جاباتك ليلة عيد...اللي حصلتي هالصنديد..
زغرطوا..
وردوا وراها...
نجاة..
الغالي جانا ماجيناه...عرف يختار خوال ضناه..
ردوا وراها نساوين عيلتهم بحماس..
دلال..
إن شاء الله تجينا كيفنا...فرحانين بضيفنا..
ردوا وراها..
رباب..
ان شاء الله تجينا كيفه هو...لاتعارك لاتحب الدوة..
وحده من بنات العيله..
ياوين عرفها بنت أصول...جاهم للمربوعه طول...
ردوا وراها..
نجاة..
يابنيه كان جيتي لأمك...مشكورة ماحد يذمك..
💕واستمرت هالحرب الكلاميه اللطيفه..
لين حسمتها لطيفه...
لما غنت..
إن شاء الله يعيشوا هما الزوز...رفاقه كيف قلوب اللوز...
💕💕💕💕💕💕💕
🌴🌴🌴🌴🌴🌴🌴
ماشيين التلاته بطريقهم للقطعه وهما يهدرزوا...
هانيبال:باهي اللي اقتنع يسكت لعند يتم العرس..
حميد:قصة ياراجل.ولا فالخيال..
هانيبال:لا ع بال ولاع خاطر..تنهد وقال...اختك توا كيف بدير..كيف بيصير فيها هي وبنتها..زعمه ترضى تولي؟!
خليفه اللي كان يسمع وساكت قلبه كان ينحرق حرق..
حميد:شن ماكان قرارها لازم نوقفوا معاها..
هز هانيبال راسه بإيجاب...
🍁🍁🍁
فهالوقت..
كانوا اللي قاعدين فالحوش شبه متنكدين..
حتى لما جاهم خبر قراية فاتحة توفيق يدوب زغرطوا...
غاليه..
كانت فوحده من الديار مع حنين مصكرين عليهم..
هدتها ورقدتها..
وبعد رقدت البنيه قعدت غاليه تبكي بصمت ع حال اختها اللي كل ماتقول اتعدل خلاص..يطلعلها شي جديد يقلب حالها..
......
فم البوابه..
سميه:تتوقعي توليله..
لمياء:مش عارفه...بس ان شاء الله تولي اللي ينقص ينقص..
ضحكت سميه...
🍁🍁🍁
زعمة توليله!!؟
سؤال...
كانت تفكر حميده فإجابته مطولا..
وهي مقعمزة فوق سطوح الحوش بروحها..
ليها ساعتين مقعمزة تفكر..
فكل اللي صار..
قاعد بين عيونها..
القديم والجديد..
اللي صارلها كله معاه..
اللي صار لبنتها يلي مجرد تسمع اسم بوها تخش فعقلها وتطلع...
تفكر فإن اللي داره فيهم كله ماكانش بإرادته وماكانش واعيله..
يعني مالاش ذنب..
يعني هو مش ظالم...
هو مظلوم...
زيها بالزبط..
وزي بنتهم...
بس مع هذا كله...
قلبها عليه كان صوان...
حاسه انها مستحيل تقدر تبلع العذاب اللي عاشاته..وتنساه..
وتبدا معاه من أول وجديد..
قطع عليها تفكيرها...
صوت خطوات سمعتهم يقربوا منها..
التفتت..
واتفاجئت ع الآخر..
ناضت ببطء وقفت وهي تشوفله بعيون جاحظات من الصدمه...
الهادي وهو عاقد حواجبه قال:ردي بالك توليله..ردي بالك...مانقولك هكي ع خاطر شي..لكن صدقيني مش حتعيشي معاه مرتاحه بكل...
حميده ابتسمت بتهكم وقالت:غريبه توقعتك ماتصدق تفتك مني وتقول خلوها تنتلف معاه..
الهادي ضيق عيونه وقال:ماتغير شي بالنسبه ليا..هو ممكن دار اللي داره من غير وعي..لكن انتي كنتي واعيه..
نزلت حميده عيونها لوطا..
الهادي :اني توا لانبي نحاسبك ولانعاتبك..هي نصيحه قلتها تبرئة ذمه قدام الله وخلاص...
وانتي...حرة...
غير عيونه عنها ولف ومشي للدروج..
هي قامت عيونها فيه وقعدت تشوفله..
لين وصل للدروج وجي نازل..
غمضت عيونها وتنهدت..
بعدين فتحتهم..
ووزعت نظرها ع المكان...
بعدها ساوت وشاحها..
وتوجهت للدروج بش تنزل...
🍁🍁🍁🍁🍁
انقرت فاتحة حسن والبارقه..
وكانوا نساوين عيلتها يباركوا ويهنوا وهي دايرة روحها فرحانه..
والضحكه مشركه الوجه...
فضيلة الوحيده اللي قلبها مش مطمن لتصرفات بنت خالتها..
اما امها مش هامها شي...غير انها تعطيها وتنهي المشكله اللي هي افتعتلها...
🍁🍁🍁🍁
هدى الحق ياناجي..
واميرة راهي مظلومه راحت ضحية افتراءات اختك...
ناجي بغضب:ليش ماقتي من الأول..ليش!!؟
احلام وهي متصنعه الخوف:اختك هددتني..قالتلي...لو تقولي اللي تعرفيه نرمي عليك بلي حتى انتي..ونقول لخوي اني ريتك تخوني فيه مع واحد من صحابه..
ناجي بصدمه:كييييف!!؟
احلام دمعت وهي تقول:والله...ومش هكي وبس...قالتلي غصبا عني لازم نعدي للسحارة لما تبعتني....واني خفت واجد منها ..انتم تصدقوا فكلامها هي وبس..شن ماتقول تصدقوا انتم وسيدكم...من بيصدقني كان قت اللي عندي قولي!!
اكيد مصيري حيكون زي مصير اميرة...
ناجي معاش يشوف فشي..
مشي طول طلع من الدار..
وقف فالباب وشاف لبوه اللي كان واقف يسمع برا وقاله:سمعت بوذنك!؟سمعت...هدي بنتك..هدى حليمه..
بوها وعيونه يقدحوا شرار من الغضب:مانيش ماسكم عنها...
ناجي كأنه ماصدق خدي الضي الأخضر من بوه قال بصوت عالي:احلااام...يااحلااام..
طلعت احلام تجري من الدار..
ناجي:تعالي وراي.....
طول مشالها وين ماهي...
ومرته وراه..
فاتوا من قدام امها اللي كانت مقعمزة ع كرسيها المتحرك..
كانت تشوف لولدها ومرته كيف ماشيين ورا بعض..
وع وجهها ملامح الآسف..
ثواني..
وسمعت بنتها تعيط وتقول..
"وين رافعين بناتي ويييين..ويييين"..
شويه وبانت على امها احلام وهي شاده البنات الزوز..
وهي ترعش مع بعضها..
لحظات...
وسمعوا صوتها وهي تعيط..
"سييييييدي..
ياااااسييييدي..تعاااالالييي...
ياسيييدي"..
وبوها طول مشي لباب الحوش فتحه وطلع..
"ياناااااس ....يانااااااااس"..
وامها تسمع ومن داخل قلبها يتوجع..
تقعد بنتها..ضناها..
اما احلام برغم خوفها من الموقف
الا انها كانت متشمته فيها...ومستحلية كل خبطة تنزل عليها بالسبته..."حزام البنطلون"..
وحست فنفس الوقت براحه.....
🍁🍁🍁🍁
مع المغرب..
تحركوا السيارات من جديد بإتجاه حوش برقه..
واللي مامشاش لكسوة اريج..
مشي لكسوة البارقه..
البارقه..
اللي انصدمت فكسوتها لما شافتها..
حاجه فوق الوصف..
انقام قدرها قدام الناس بكل معنى الكلمه..
لما جو يطلعوها بش يديروا السبر..
كانت سرحانه بتفكيرها فاللي يدير فيه حسن..
هل حق حب فيها..
ولا مجرد رغبه لااكثر ...
للحظه حست بشي داخلها تحرك..
لكنها تجاهلاته وبقوة...
وعزمت انها تنفد اللي فراسها وتوصل للي تبيه وتربي حسن وامها مع بعض...
🍁🍁🍁🍁🍁
الحدث اللي صار اليوم..
مستحيل يمر مرور الكرام..
فالزوايا والتراكين مازالوا يتهامسوا عليه..
وفضلوا يسكتوا عن الحديث عنه علنا لين يتم العرس ع الخير...
الساعه 3:30صباحا..
رزان وهي واقفه ع روشن الكوجينه:لتوا نرعش مع بعضي وين نذكر اللي صار...
عماد وهو واقف ع الروشن من برا:وجعني الراجل الحق..
رزان:حتى اني وجعني..لكن عمتي وجعتني اكثر..اللي راته معاه مش شويه..ماتفرقش واجد ان كان يدير فيه بوعيه ولا لا...المهم انه داره..وقدام بنتها مسكينه..كان نست عمتي شن بينسي حنين..
تنهد عماد وقال:لاحول ولاقوة الا بالله وخلاص..ربي يسترها وإن شاء الله اخرتها خير..
رزان:يارب..
ابتسم بعدين قال:هي بري سموحي ارقدي وارتاحي تعبتي اليوم..
رزان بإبتسامه:حتى انت عدي ارقد..
عماد:حاضر..من عيوني ياعيوني اني..
ضحكت وقالت:تصبح ع خير..
عماد:وين وين..شن تصبح ع خير هكي حاف بلا حاجه حلوة!؟
ضحكت وقالت:باهي...هاه..
لصقت خدها ع الحديد..
هو قرب وباسه..
بعدين بعد وهي شبحتله وتضحك..
عماد:تضحكي ياشفشه..تو نوريك لما نروحوا...
ضحكت وقالت؛عدي ارقد خيرلك..
ولفت ومشت تجري طالعه من الكوجينه..
عماد:ايه اهربي ياملعقه اهربي اهربي...لولولولولولو..
ورزان ميته بالضحك..
كملت طريقها لباب المروحه..
خشت وصكراته وراها..
مشت لوحده من الديار كان ضيها مفتوح..
خشت لقت البنات فايقات ومعاهم غاليه..
ونور مبتسمه بفرح..
رفقه:تعالي اسمعي روزي...نور حامل..
اتفاجئت رزان وقالت:كيف عرفتي!!
نور:من قبل مانجو نعرف لكن تحشمت نقول الحق.. ع خاطر كيف يعني حملت بسرعه هكي...لكن دلوله كشفتني..
دلال بضحكه:لاحظتها راده بالها من تصرفاتها وحركاتها هلبه حسيت في شي قررتها وخليتها تعترف..
رزان بإبتسامه؛مبروك نوارة تحلي عويناتك ع خير..
نور:تسلمي والفال ليك يارب..
رزان اكتفت بالإبتسامه..
وغاليه مركزة عليها...
حستها اضايقت لأن وجهها تغير لما سمعت..
🍃اللي ضايق رزان وقتها انها اذكرت اللي صار ليلة الدخله..وبسببه طبيعي تتأخر فالحمل..لكنها خافت من المقارنات...وفالمقارنات شعبنا مايرحم🍃
🍁🍁🍁🍁
وجي اليوم اللي بعده..
كان يوم السهريه الكبيرة...
من بدايته لنهايته هاليوم كان هادي ولطيف وحلو بأجوائه..
برغم حديث المعازيم المستمر عن الحدث الجلل اللي صار اليوم اللي قبله..
ونظراتهم لحميده اللي ضايقتها...
لكن كانت تتجاهل وتقوي فروحها قدامهم وتعول وتجري هني وهني ولاكإن صارت حاجه..
وفي الحقيقه هي كانت تشغل فنفسها عن التفكير المستمر فاللي حيصير بعدين...
🍁🍁🍁
بس رفقه..
ماحست بشي فاليوم هدا...
والسبب اختفاء ياسين امس واليوم..
لاكلمها ولابعتلها حتى رساله..
ولا رد ع رسالة بعتتهاله تقوله فيها انهم وصلوا..
حست بشي مش مزبوط وخافت ليكون ياسين ولاحد من اهله صاير فيهم شي...
🍁اتصل بيها ياسو كلمها وقوللها اللي صار..
ياسين:تس..مانبيهاش تتنكد وادير مشكله.
ابتهاج:باهي ماتقولش توا هي مشغوله عليا وتخمم ليش لاكلمتها ولادورتها..
ياسين بضيق؛مانبيهاش تحس بشي..من نبرة صوتي تزبط ان في حاجه....خلي يعدي العرس ع خير وبعدين نكلمها..
ابتهاج:ياسو...
ياسين:هممم..
ابتهاج:ماصدقتش كلام ولد عمتها صح؟...
غير عيونه عنها وشبح للروشن..
ابتهاج:ياسين...
ياسين:نبي نتأكد منها هي ياإبتهاج...اني لتوا مش عارف شعورها اتجاهي شنو بالزبط..لازم نتأكد منها...
ابتهاج:تمام..لكن بنبهك..رد بالك تخسرها ياسين رد بالك..
هز راسه وهو يشوف للروشن..
ومن داخله كانت النار تاكل فقلبه..كل مايخطر عليه مروان وكلامه..
مش ساهل ع الراجل مهما كان منفتح ..وعقليته متحرره ..يقبل يكون في حياة المراة اللي يحبها الرجل التاني...
🍁🍁🍁🍁
يوم الخميس...
ماكانش يفرق فوضعه عن يوم الإربعاء فأجواء..
غير تجهيزات العرسان..
حسن وتوفيق....
توفيق بالذات اللي مابطلش وهو يعزم ع مبكبكة الليله وبازين غدوة...
والولاد متحمسين اكثر منه.....
اما حسن..
فماكانش حاس بشي نهائي..
كان كل شي مدايره عادي جدا...
وماأهتمش نهائي بتفاصيل طلته فهالليله..
واكثر من ملاحظه بنته...
مش باينه فيه الفرحه بكل...
🍁🍁🍁🍁
الساعه 8:30ليلا..
ياروجه كانك شاطرة ...الليله تخشي خاطره...
هدا البيت كانوا يغنوا فيه بنات العيله بحماس..
واريج العروس الجميله الخجوله..
كانت مقعمزة ع الكوشة تشوفلهم وهي متبسمه بخجل..
قيسه بوه عليه مربح...فالعين السودا يصبح..
هدا البيت كان ع البارقه..
اللي كانت طالعه قمه فالجمال..ومقعمزة ع الكوشة جنب اريج وتشوفلهم...وع وجهها ابتسامه خفيفه..
سعيده..
اني وخيي ماكيفه والي...كنز ذهب وسومه عالي...
زغرطوا بعدين رددوا البيت وراها...
رزان...
انا وخيي مافيش مثيله...بأفعاله فايز فجيله..
ردوا وراها..
وامها وعماتها وخالاتها يزغرطوا...
بلقيس..
روجه ياغاليتي اني...جعنها دارك دار هني..
زغرطت امها والنساوين اللي جايين مع نجاة جايبين اريج..
ورددوا ورا بلقيس البيت..
بلقيس..
سيف كبير وعلقتيه...ولد ميلاد وخدتيه...
صاحوا بصوت عالي..
بعدين رددوا وراها البيت..
وسعيده ورزان يزغرطوا...
حميده حبت تناشب العرايس بشتاوة قالت فيها..
كان خديتي راي عزوزك ..مفتاح الجنه عكوزك...
ضحكوا....
سعيده:اسمعي كلامي ياكنتي تخشي الجنه..لادوري امك لاخالتك..
زينب وكفايه ضحكوا..
واريج تضحك بخجل..
نجاة وهي تشوف لسعيده بربع عين...
الله ياجعنك كيف البيه..في حيشان البرانيه..
سعيده شبحتلها بطرف عينها..
وهي تغني وتشتي فشتاوتها مع اللي يردوا وراها..
فضيله..
مربوحه مشوارك رايق ...يامشكاي بعد نضايق..
ابتسمت غاليه وقعدت تردد فيها وراها مع اللي يردوا..
والبارقه تشوف لفضيلة بإبتسامه..
غاليه..
اجعل ليلتهم ضاويه..كيف طريق الزاويه..
وقعدوا يرددوا فيها معاها والزغاريط تصدح اصواتها فالقطعه كلها...
🍁🍁🍁🍁
عند الرجاله..
اعتقني بالله عليك..نكونوا فمرتك نصبحوا فيك انت..
هانيبال:مرتي عندها حق واني مؤيد ليها وبقوة راك خلاص راك شبت وكبرت سادك..
ضو:ياودي بنولي راهب مانيش متزوج بكل هي تريحوا..
غير هانيبال عيونه للحاج عبوده وقال:ماتبي الاجلدات سماح بعكوز سيدك..
ضو شبح لبوه لقاه يشبحلهم غير عيونه وقال:زعم مكلمك..
هانيبال ضحك..
ضو شبحله وقال:والله مكلمك..
هانيبال قعد يضحك وخلاص..
"جواد"..
شبح ضو طول للي ينادي في ولد دلال..
لقاه ولد عمته مؤنس اللي كان مقعمز حداهم..
غير عيونه لجواد اللي كان جاي لمؤنس..
كان لابس عربي وعمامه لونها قهوي..
لما وصل فمؤنس..
مؤنس:العمامه هدي متاع من؟
جواد حط يده ع طرفها ولفه ع رقبته وهويقول:متاع بوي..
ضحك مؤنس وقال:مش قتلك ياأيمن مستحيل نغبى فيها..كان لابسها هي بس ايام الحرب..
ايمن:مانحسباها قاعده لهالوقت..خطرن عليا ايام زمان لما رقوه ودار حفلة كبيرة..كان لابسها ع البدله العسكريه
قعد ايمن يتخيل فيه قدامه ويوصف..كانت لون واحد مش صاعقه..وكان مدخل سوريتها داخل..وتاني كمامه للمرفق..وين يصبي يحط ايديه ورا ظهره...
مؤنس:هو نفسه فالحرب كيف ماوصفته تو..
جواد بعيون معبيه دموع:نبي صور لبوي..نبي فيديو..نبي نسمع صوته وهو يقرا فالقرآن..امي ماعندهاش الا صورة وحده بس معلقتها ع الحيط فدارها..نبي تكون عندي وحده تانيه ليا فدارنا اني ومعمر..
الزوز قعدوا يشبحوله بألم ومن داخلهم كانوا يسبوا فأرواحهم اللي استرسلوا قدامه فالحديث عن ذكريات بوه ونسوا وجوده..
أيمن:احمم..تو نقول لجدي قبل يجي فرمضان إن شاء الله يجيب معاه اللي عنده..
مؤنس كان مفنص عيونه ويبلع فريقه وهو يحاول يمسك دمعته..
حط يده فجيب سوريته العربيه وطلع تليفونه وقال:اصبر شوي..
قعد يدور ع حاجه فيه لعند مالقاها..
ووراها لجواد:هدي اني واخدهله وهو فالجبهه بدون مايعلم..
خدي جواد الصورة وقعد يشوفلها..
بعدين شبح لمؤنس وقال:شويه ونجي..
مؤنس ابتسم وقال:عدي..
مشي جواد بسرعه بإتجاه فتحه الخيمه..
وعيون ضو وهانيبال معاه..
ضو كان مخنوق بكل معنى الكلمه..
تنهد تنهيده ضيق..
خلت صاحبه يشوفله بنظرة شك..
بعدين غير عيونه عنه وشبح لعبدالسلام..
لقاه يشبح فالفراغ سرحان ويبان من وجهه انه مهموم..
استغرب فيه وحس ان فيه حاجه..
🍁🍁🍁🍁
طلعت دلال من الخيمه لقت ولدها قدامها..
دلال:خيرك جوادي..
جواد:شوفي امي...مدلها التليفون..
استغربت دلال وخدت التليفون..
وشافت الصورة..
رفعت يدها وحطتها ع قلبها..
اللي من قوة دقاته تحسابه بيوقف...
والدموع عبوا العين وفاضوا...
وولدها يشوفلها ويقول:امي عندك صور لبوي تانيات غير هديكا الصورة..
دلال كان عندها البوم كامل..وفيديوات فتليفونها لكن كانت تتجنب توريهم لصغارها خوف من الألم اللي حدخله لقلوبهم..
بس لما شافت نظرة عيون جواد اللي كان مشتاق يشوف بوه حتى فالصور..
حست روحها ارتكبت غلطة كبيرة..
مش ساد انحرموا من وجوده فحياتهم..
هي زادت حرمتهم من ذكرياته..
تنهدت وقالت بإبتسامه من بين دموعها:عندي امي عندي..لما نروحوا ان شاء الله نوريهولكم..
جواد ابتسم..
دلال:استناني امي ننقل الصورة لتليفوني ونجي..
جواد:باهي..
ولت دلال خشت داخل..
وجواد قعد برا..
شويه طلعوا البنيات الصغيرات مع بعض..
اسيا وروان وحنين..
جواد:وين ماشيات..
اسيا:للحوش بتساوي حنين شعرها تلخبط..
شبح لحنين اللي كانت محوله توكتها من شعرها...
خطر عليه الموقف متاع بوها اللي صار من يوم..
حضره هو وباقي الصغار..وكان جدا مؤلم بالنسبه ليه وحنين وجعاته هلبه هلبه...
اسيا:نمشوا جوادي..
جواد:بروا..
مشوا البنيات مع بعض..
وعيون جواد قعدوا مع حنين لين اختفت من قدامهم..
اي شي متعلق بالأب...كان يوجع فجواد هلبه اللي كان محتاج وجود الأب فحياته بقوة...
🍁🍁🍁🍁
الأب...
الأبوة...
شعور مقدس...
مايشبهش شعور الأمومه صح..بس شعور يخلي من الراجل اللي غالب ع طبعه الغلظه والقسوة فبعض الأحيان..
كتله من الحنان تمشي ع الأرض..
الصديق وهو راقد ع السرير..
وعيونه فالسقف سرحان..
بين عيونه كانت بنته حنين
دموعه ينزلوا بألم وهو يفكر.
كيف كبرت البنت بعيده عليه..
كيف كانت تشوفله بخوف وكأنه وحش بشع مرعب..
وين يذكر اللي قالوهوله عن معاملته ليها ولأمها ينخنق ..
وقلبه ينفطر من الوجع...
ويزيد ينقم ع الشيطانه اللي تسببت في هدا كله..
وين خطرت عليه حليمه..
جي بين عيونه الطفله الصغيرة اللي كانت متلهفه وتردد..
"بب..بب..بب"..
صوتها كان يرن فوذنه..
اذكر بعدها الطفله الرضيعه اللي كانت فحضن حليمه...
غطا وجهه بإيديه..
وبدي يبكي بالعبرة..
يبكي بالصوت...
يبكي ويبكي..
وخوه محمود اللي كان بايت معاه فالحوش فالدار التانيه..
كان يسمع فصوت بكاه وهو متألم عليه هلبه..
🍃مصعب اللي عاشه الصديق وقاعد يعيشه مصعبه..مصعبه من اختبار🍃
🍁🍁🍁🍁🍁
الساعه 11:00ليلا
رفعوا العرايس لحياشهم
اريج كانوا معاها رزان وبلقيس ودلال وغاليه..وين مشت لشقتها
اما البارقه رفعوها حمواتها التلاته وحميده
الزوز كانوا فقمة التوتر...
لكن البارقه كانت حالة التوتر عندها اكبر...
لأن الليله هادي تحديدا حتنفد اهم خطوة فالخطه متاعها
وصلوا بيها لجناحها
دخلوها لدار النوم..
وحميده كانت تبصر عليها وتحاول تخفف عنها التوتر بالهدرزة...
شويه وطلعوا وخلوها...
بعد سمعت صوت باب الجناح تصكر..
تنهدت وقالت:معاد تخافي يابارقه خليك قويه وتحملي..
🍁🍁🍁🍁
عند اريج..
بعد حطوها البنات مشوا...
قعدت ادور فدار النوم وهي تفكر بصوت عالي..
اريج:يارب نتوفق الليله ونربحوا التحدي..وحتى غدوة..
تسمع فيهم يدرجوا في العرسان بالكشك..
ضحكت وهي تقول:قداش متحمسه..
لوطا..
وصل توفيق للدروج اللي يرفع لشقته..
ضربه محمد ع كتفه..
ابتسم..
بعدين مشي طول وركب..
عماد:البكبوووكي يابونسب..
ضحكوا الولاد..
وتوفيق كمل طريقه وهو يضحك..
وصل فشقته..
تنهد..
بعدين طلع المفتاح..
وفتح الباب وخش..
صكره وراه وتوجه طول لدار ..
خش وقال:زاويه...
اريج بضحكه:*****..
ضحك وقال:تي وين ماشيه بيها السماحه كلها هدي وين قوليلي
ضحكت اريج بخجل بعدين قالت:خلينا توا من سماحتي..ونخشوا فالجد
توفيق بضحكه:متحمسه اكثر مني..
اريج وهي تضحك قالت:هلبه..
ضحك وقال:تمام..بدلي بسرعه وخشي للكوجينه تلقي كل شي فيها..خل نكلم عمتي غاليه ترقالك تعاونك..
حركت ايديها الزوز ايمين ويسار بالرفض وهي تقول:لالا مانبي معاي حد..العبرة من التحدي هدا اني ندير كل شي بروحي..
ضحك وقال:باهي يازاويه ع راحتك....
ضحكت وقالت:هي مالا اطلع خل نغير..
هوابتسم وقال:خل ناخد دبشي قبل..
مشي توفيق للدولاب فتحه وقعد يطلع فدبشه..
وأريج تشبحله بإبتسامه..
طلعهم وصكره والتفت لأريج..
غمزلها..
وهي ابتسمت بخجل..
وهو ضحك ومشي طلع من الدار...
وهي مشت طول صكرت الباب..
بعدين توجهت للدولاب طلعت منه بجامه حرايريه لونها اشهب..
فكت التسريحه..
وبعدها حولت الفيلو..
ولبست البيجامه..
كانت عباره عن تلاته قطع..
سروال...وكت...وطرف فوقاني طوله لعند اعلى الفخد نص كم وفيه حزام..
بعد لبستها..
خدت فيلوها وعلقاته ع الروشن..
بعدين مشت للمرايه..ساوت شعرها...
وبعدها طول طلعت من الدار..
وهي ماشيه تستكشف فالشقه لقت بدلة راجلها محطوطه ع الكنبه برا...
ضحكت ومشت خدتها...وولت بيها للدار...
حطتها ع الكرسي..
بعدين ولت طلعت...
وهي ادور شافت الكوجينه ..
خشت..
قابلتها المرقه معلقه..
ضحكت وقالت:موتي كل شي..
مشتلها طول وخدتها من ع العلاقه ولبستها..
وقالت وهي مبتسمه بإنفعال:بسم الله..
💖وبدت اريج اطلع فماعين العواله لقت كل شي موجود..
طنجرة كبيره..
وقعاد..وصفر..
وكل مواد المكرونه المبكبكه..
كانت زي الطقاشه ع قولتنا..
خلال ساعه إلا ربع كانت المكرونه طايبه..
واريج مستفه القعاد بصفراهم والكواشيك..
صبتها فالصواني..
بعد كملت..
صورتهم بتليفونها..
بعدين اتصلت بتوفيق..
اريج:كله واتي توفي...
توفيق:تم..خشي الدار وصكري عليك..
اريج بإبتسامه:OK..صكرت..
وبعدين قعدت تشوف لإنجازها..
وهي فرحانه..
وفيسع مشت جري للدار..
خشت سكرت ع روحها....
💕💕💕💕
فالخيمه..
خشوا صفر المكرونه للخيمه وحده ورا التانيه..
خوال...وعمام..
ولاد العيله..
الصحاب..
قدموا وبدوا ياكلوا...
وتوفيق يشوفلهم كيف ياكلوا بشهيه ابتسم بفرح..
فحوش الحاج رمضان...
صونيه محطوطه فنص الكوجينه..
واللي هادي شاده كاشيك وتمضع وتتبنن..
زينب بلعت وقالت:زي العسل..
رزان بإبتسامه:ماشاء الله..
لطيفه:شكله بختك قوي فالكناين ياسعيده..
ابتسمت رانيا..
سعيده بضحكه:قولوا ماشاء الله..
كفايه:مش خير من كنيناتي..
ضحكوا كلهم...
ورزان ونور ابتسموا بحب..
اما بلقيس كانت فرحانه هلبه بمدحهم لبنت خالتها وحست بالفخر..
ولمياء تاكل وعيونها عليها..وكان تلقى تاخد روحها..🖤
🍁🍁🍁🍁
بعد ماانمسحت صواني المكرونه مسح..
وسمع توفيق المديح فتطييب مرته لين شبع حتى من عماته وبنات العيله..
ركب لمرته اللي كانت تستنى فالنتيجه ع نار..
خش للحوش..
صكر الباب ومشي طول للدار..
خشلها..
كانت مقعمزة ع كرسي وهي تراجي..
لما راته وقفت وقالت:هاه شنو..
توفيق ضحك وقال:ماتحديت الا واني عارف شن عندي...رفعتي راسي يازاويه..
اريج ضمت قبضات ايديها ورفعتهم فوق وهي تقول بضحكه فرح..:يسسسسسس..
جاها طول وحاوطها من خصرها وقامها وقعد يدور بيها وهي لفت ايديها ع رقبته وحضناته وتضحك بعياط من الحماس وهو يضحك معاها...💕💕💕💕
🍁🍁🍁🍁
فنفس الوقت..
كانت البارقه مازال تراجي..
البارقه:اففف..هدى وينه لتو...
سمعت باب الجناح انفتح..
رفعت حاجبها..
ورسمت ع وجهها ملامح التكبر..
وقعدت تراجي فخشته وقلبها يدق بقوة من الخوف..
خش..
وقال:السلام عليكم..
هي ردت :وعليكم السلام..
جي للباب..
تشوفله كيف بيصكره..
بلعت ريقها...
لما رده..
شافت وراه مندار كبير...
خداه...
ورجع فتح الباب..
مشي بيه..
وفرشه حدا الدولاب..
وهي تشوفله بإستغراب...
بعد فرشه..
مشي للدولاب فتحه..
وطلع منه شرشاف ومخده حطهم ع المندار...
بعدين حول الكاط اللي لابسه..
وقعد فالسوريه العربيه..
مشي بالكاط..
للجهة اللي تخصه فالدولاب..
فتحه وعلق فيه الكاط..
بعدين صكره..
ومشي للزيانه...
حول ساعته وحطها عليها..
بعدين حول خاتمه..
بعدها قام عيونه فالمرايه فك بطم السوريه من عند الرقبه..
بعدين..
لف ومشي للمندار...
وقعمز عليه وهو يقول:ياالله..
البارقه بصدمه:على من طلقت السلام لما خشيت؟
حسن وهو يفتح فالشرشاف قعد يهدرز مع روحه:بعد صلاة الجمعه نعدي وخلاص...
البارقه فتحت فمها وهي تشوفله بعدم استيعاب..
هو تمدد ع الفراش..
وتغطا بالشرشاف...
البارقه ناضت من السرير وقامت فيلوها وجاته وقفت عليه وقالت:هيييه انت هيييه...شن قصدك بالحركات هدين..
هو حط يده تحت راسه وقعد يشوفلها وهو يقول:شن تبي؟!
هي لخبطها السؤال..
ماعرفتش شن ترد...
هو كان يمرر فنظره عليها وقلبه ذايب💓
لكن مظهره كان بارد مافيشي اي تعابير..
قاللها ببرود:هوينا العشي فالكوجينه كان تبي تتعشي..وعندك الشاشه قدامك..
تعشي وانتي تتفرجي..ولما بتجي ترقدي اطفيه..مش تنسيه والع وترقدي..
البارقه كان ترمش فعيونها بصدمه وهي تشوفله..
حسن:هي توا خليني نرقد النوم بيغلبني..تصبحي ع خير..
لف ع جنبه وعطاها بالظهر..
وهي مازال تشوفله بصدمه..
ضحكت ضحكه خفيفه بتعجب..
بعدين ضيقت عيونها...والتفتت شبحت للشاشه بعدين شبحتله..رفعت حاجبها وقالت فسرها "باااهي"..
💓مشت للدولاب..
طلعت روب مثير...
غيرت الفيلو ولبساته..
بعد علقت الفيلو فكت التسريحه..
وساوت شعرها الاسود الطويل...
التفتت شبحتله لقاته مازال بنفس الوضعيه..
هزت راسها بتوعد..
بعدين مشت طلعت من الدار للكوجينه..
لمت اللي هناك من العشي وحطاته فصفرة...
ومشت بيها للدار..
حطتها ع السرير..
ومشت للشاشه فتحتها..
بعدين خدت الجهاز من ع الطاوله اللي تحتها..
ومشت للسرير قعمزت..
قعدت تقلب فالقنوات لين خلت ع قناة جايبين فيها مسلسل عايزة اتجوز الكوميدي...
علت الصوت...
وقعدت تتفرج..
وتاكل...وتضحك بصوت عالي قصدا...
تبي تزعجه...
لكن فالحقيقه هي ماكانت تزعج غير فنفسها..
وبتموت فداخلها من الغيظ..
اللي خطتتله كله ماصارش منه..
صدمها حسن بهجوم معاكس..
ماكانتش حاسبتله حساب نهائي...
البارقه وهي تاكل فطرف المبطن بغيظ وتشوفله قالت بهمس:مازال في أيام جاية ياحسن وتو تشوف..
وحسن اللي ماقدرش يرقد غمضه
كان يضحك عليها بصمت وهو يقول فنفسه"تو تشوفي شن يدير فيك حسن اللي مش عاجبك يابنت برقه"
...يتبع....
