# العشق_المتمرد "عندما يزهر الليمون"
#جمان_فريد
الجزء138..
⏳..
مقعمزة في وسط حوش شيابينها..
تتفرج ع صور في تليفونها وهي مبتسمه..
شويه رن تليفونها ضحكت وفتحت الخط وردت..
رفقه:يهبلوا يهبلوا..
رزان بضحكه:ومازال في حاجات احلا تعرفي قريب شريت المحل كله..
رفقه:ههههههه..
رزان بضحكه:توا قوليلي انتي شن صار معاك؟
رفقه تنهدت وقالت:مشيت عاينت بعد ماروحت من الجامعه مشيت لدكتورة كويسه تعرفها حماتي قالتلي مع العلاج تحملي...
رزان:ايه اصلا ماهيش مشكله كبيرة هرمونات تتنظم وخلاص..
رفقه:ايه..ضحكت وقالت..وان شاء الله حتى اني نجيب بنيه تولي صاحبة بنتك..
رزان بضحكه:تولي صاحبتها وكنتي بنحجزها لميلاد من تو هاه عطيهم كلهم علم..
رفقه:هههههههههه..ان شاء الله ان شاء الله..
رزان:هاه ناض العريس خل نعدي نشوفه قبل يقلب الحباس ويطلع منه..
ضحكت رفقه وقالت؛تمام بوسيهولي بعدين نهدرزوا ماسنجر باهي..
رزان:ok سلام توا..
رفقه:باي..سلام...وصكرت..
ع جية ابتهاج وولدها يجري وراها ويعيط..
رفقه بضحكه:خيره!؟
ابتهاج قعمزت وقالت:فددني دلعته وحصلت فيه..
يزن:ميكو..ميكو..
رفقه:ههههه..يحب مجدي هلبه..
ابتهاج ابتسمت ونزلت عيونها لوطا..
لاحظتها رفقه وقالت وهي مبتسمه بخبث:ولا بوجه؟!ولا!؟
ابتهاج شبحتلها ووجها مولي احمر وقالت:ايه..صح..
جاها كف ع وجهها..
تحولت ابتهاج في لحظه لغوله :ياحماااار..وشداته وطاحت فيه ع ايديه..
ورفقه بضحكه صدمه:بالشويه مش هكي!!
ابتهاج وهي تضرب فيه قالت:مايبي الا هكي..
ع جية خديجه تجري وفيدها عصاة المغرف:خليه يامكلوبه يامكلوبه خليه...
ابتهاج لما شافت امها بشن جايه طلقاته وناضت بتهرب..
حصلت خبطه باهيه..
عيطت وهي تقول:لااا يما معاش يحترمني هكي!
قعمزت حناه وخداته في حضنها وقالت:خلاص وليدي خلاص..هاني ضربتها..
يزن وهو يبكي:مييكو..
خديجه:حاضر وليدي حاضر اني تو نكلمه عمك مجدي نقوله يجي الليله يزونه وليدي يبيه..
ابتسمت ابتهاج وهي تتحسس في مكان الضربه..
ورفقه تشبحلها وتضحك..
🌴🌴🌴🌴
نبيها بنيه قبل مع فطومه..
غاليه بإبتسامه:من حظ فطومه بش تقعد هي دلوعتكم..
فضيله بضحكه:وكان نجيب غيرها عشره تقعد بروحها فطومتي..
حميده بإبتسامه:باهي امورك كلها تمام؟
فضيله بإبتسامه:الحمد لله رب العالمين كله تمام وقالتلي عادي جدا تجيبي طبيعي ماعندكش مشكله..
غاليه:باهي الحمد لله..
فضيله:الحمد لله..ايه حقه قولن شن صار في المكان اللي بتأجرنه هنى ؟
حميده:ياحنه عدينا وريناه مكان سمح الحق وجاي في مكان كويس..
فضيله:باهي كيف بديرن بين هنى وغادي؟
حميده:دخلنا معانا الساكته بنت طالب..وجميله بنت الشارف..واسماء ونوريه بنات سالم ميلاد هدين بيشدن معاي هنى..وغاليه تقعد هي اللي تمشي لطرابلس..
فضيله:كويس بكل كل اللي سمتيهن طباخات درجه اولى ونظيفات..باهي ورزان شن دايرة غادي.
غاليه:تو رزان بتبدي قرايتها بتشد عنها نرجس مرت حميدا خالها كانت ماسكه معمل وحده من خواتها قبل...
فضيله؛باهي كويس اهم شي ناس عندكم فيهم ثقه..
غاليه؛ايه الحمد لله..
ع خشة الحاجه فاطمه:السلام عليكم..
ردوا عليها :وعليكم السلام..
حولت جردها وبدت اطبق فيه وهي تقول:سمعتن ببنت عبدالمقصود؟
كلهم بإستغراب شبحولها وحميده قالت:خيرها..
فاطمه شدت جردها بعد طبقاته وقالت:خطبوها..
ارتسمت ع وجوههم ملامح الصدمه وغاليه قالت:كيف يمي خطبوها فهمينا؟
فاطمه قعمزت بعدين قال:يبيها الدكتور عبدالباسط وبعت هله يخطبوها وهما قالولهم عطونا وقت تفكر البنت وترد عليكم...
غاليه بقلق؛غبارة كان يعلم محمد!
حميده:وشن دخله هو؟!معاد ليه بيها علاقه اخطا بنته..
غاليه؛هداك عندك انتي بس..
فاطمه مشت بإتجاه دارها وهي تقول:يقعمز ويهني روحه خيرله..
وصلت في دارها فتحت الباب وخشت..
حميده شبحت لغاليه وقالت:زعم حق يدير حاجه!!
غاليه بضيق:مانعلم عنه ياحميده ان شاء الله خير وخلاص..
سكتوا شويه وهما يفكروا بعدين قالت حميده.
حميده بصوت عالي:حنين كملتي واجبك؟
حنين من الدار: مازال شويه بس ماما..
🍁🍁🍁🍁
بتتزوج!؟
انور:ايه..والراجل بيطلع بيها برا البلاد..
ضيق عيونه وقال:والبنات كيف يصير فيهن؟!
انور:هدى اللي جايك ع خاطره..بناتك..الراجل مايبيهنش..
الصديق بغضب:تعدي هي وياه فستين داهيه بناتي بوهن حي مايخليهنش..
انور:خلاص معناها بتاخدهن..
الصديق:من غير كلام..
انور:كويس..تعال نهار الخميس خودهن..الخميس الفاتحه..
الصديق هز راسه بإيجاب وقعد ساكت..
مد انور يده وقال:هي مالا اني بنعدي..السلام عليكم..
الصديق صافحه وقال:وعليكم السلام..
طلق انور يده ومشي لسيارته..
وكذلك حتى الصديق مشي لسيارته وهو يفكر كيف بيدير توا بعد ياخد بناته عنده من بيهتم بيهم من بيعانيهم..
خواته كل وحده لاهيه بهمها..ونساوين خوته لايمكن يفكر يعرض عليهم حاجه زي هادي..
ركب سيارته وتحرك ومازال باله مشغول ويدور على حل..
🍁🍁🍁🍁
الساعه 7:30مساءا..
مقعمزة تتفرج ع التلفزيون وحداها احفادها وولدها يكتبوا في واجباتهم..
خشت عليهم بنتها وفيدها صفرة فيها قهوة وحاجه حلوة...
حطتها حدا امها وقالت:صار نوارة طلعت حامل بوليد تاني..
ابتسمت نعيمه وشبحتلها وقالت:ايه..
دلال وهي تصب في فنجان قهوة لأمها:يولوا صحاب هو عبدالوهاب ان شاء الله..
ضحكت نعيمه..
مجد:امي امتى تجيبيه؟!
ضحكت دلال..
نعيمه بضحكه:شهر 12 حبيبي.
مجد بإبتسامه:قريب ..
ضحكوا دلال ونعيمه..
بعدين دلال مدت فنجان لأمها وهي تقول:خودي ماما..
خدت نعيمه منها..
معمر شبح لأمه شويه بعدين قال:امي..
دلال شبحتله وقالت:نعم؟
معمر:جيبلنا واحد تاني حتى حني..
نعيمه ضحكت وهي تشرب فالقهوة قريب تبزعت من منها..
دلال قريب ذابت فحوايجها من الخجل شبحت للبكرج وقالت:تعالوا خودوا لويزة بالشكلاطه راهو..
ناضوا الولاد طول وجوها خدوا منها..
وهي مازال وجهها محمر وقلبها يدق بقوة..وامها تشوفلها وتضحك بصمت..
🍁🍁🍁🍁
انوسي تعال هني...
شبحلها وجاها يمشي وهو شاد الطاوله..
بادي يتعلم المشي...
وصل فيها وطاح عليها وهي تقول بوجع:بالشويه ياولدي قتلتني...
قعمزاته زين ع رجلها وهي تقول:افف..ساعدني ياربي..
خدت كاشيك رز ابيض مطبوخ وبدت توكل فيه..
ع خشة راجلها للحوش..
كان عقله مش معاه بكل..
مابطلش تفكير في البلاء اللي صاب خوه ومرته..
ومش عارف كيف بيخبرهم..كيف بيوصللهم اللي عرفه..
وصل في دار المعيشه..
وقف في بابها ولقي مرته توكل في ولدهم..
تنهد بعدين قال:نور..
شبحتله..
مالك:بعد تكملي تعالي للدار نبيك..
ارتسمت ع وجهها ملامح الإستغراب..
مالك؛ نبيك فشي ضروري يانور..
نور انتابها شعور بقلق..هزت راسها وقالت:باهي..
مشي مالك..
وهي قعدت تشبح للباب وتتسائل بينها وبين نفسها شن هو الشي الضروري اللي يبيها فيه؟!..
🍁🍁🍁🍁
كول ياماما..اممم ميلو...شاطر حبيبي..
رجعت الكاشيك مرة تانيه للصونيه وهي تقول:تو بتجيك اخت ميلو رد بالك تنغر منها ولاتضربها هدي اختك حبيبي باهي..
ع خشة عماد اللي قال بضحكه:خرفي..كان ماقعدش يقيم فيها ويحدف هدا وجهي..
رزان بضحكه:لالا ولدي سمح مايديرش لأخته هكي..
اتكى حداها وهو حاط راسه ع يده اللي متكي بمرفقه ع الارض وقال:تو تشوفي..
رزان ضحكت بعدين قالت:ايه حقه عماد غدوة ان شاء الله عندي محاضرة الساعه 8 الدكتور قدمها..
عماد:مش مشكله حبي عمتي قالت جيبه امتى ماتبي..
رزان ابتسمت وقالت:بارك الله فيها...
ميلاد:ممم..مممم..
عماد؛وكليه وكليه قبل مايولي علينا..
رزان:هههههه...خزي عليك..وقربت الكاشيك لميلاد ووكلاته..
وعماد يشوفلهم وابتسامته ع وجهه..
🍁🍁🍁🍁
خشت عليه الدار..
لقاته مقعمز ع حافة السرير من القدام ويبان سرحان ومهموم..
قدمتله وقالت:خيرك شن تبي؟
مالك تنهد وشبحلها وقال:ترا جيبي كرسي وتعالي قعمزي قدامي..
وهي مستغربه هلبه..مشت خدت الكرسي من قدام الزيانه
وجاباته وحطاته مقابله وقعمزت..
تنهدت بقلق وقالت:شن في مالك؟
مالك مسح بإيديه ع وجهه..
بعدين نزلهم وضمهم لبعض وقال وهو يشبحلها:تعرفيها الدكتورة اللي اتابع عندها رزان؟
نور:ايه..دكتورة ميساء..
مالك:هادي زمان كانت تخدم معاي..المهم جتني اليوم للمصحه..
نور قلبها انقبض..بلعت ريقها وقالت:علاش؟
غمض مالك عيونه وخدي نفس عميق بعدين فتحهم وقال:كان تعرفي شن قالتلي..
نور بخوف:تكلم طول يامالك قول شن في..
مالك بحزن:قالت ان رزان حامل ببنت..
نور:ايه رزان كلمتني بكري وخبرتني..
مالك:فرحانه هلبه كانت؟
نور عيونها تعبوا دموع وهي تقول:مالك بالله عليك ماتقول فيها حاجه!
مالك مط شواربه لداخل بأسف وقال:البنت عندها تشوه فالدماغ..
خبطت نور فمها بيدها بقوة من الصدمه..
مالك بحزن؛قالت البنت مش حتعيش..بالكتير ساعه بعد تجيبها وتموت..
نور حطت ايديها الزوز ع خدودها وهي مصدومه ودموعها ينزلوا..
مالك بدموع:ماقدرتش تخبرهم هي قالتلي انت خبرهم..واني نبيك تساعديني يانور..
نور بنبرة باكيه؛نساعدك!اني نساعدك في حاجه زي هادي!...
غمضت عيونها بشده وقالت..وووووه ياربي ووووه..محرها...
شهقت وبدت تبكي..
ومالك غصب عنه طاحوا دموعه..
ونور تبكي وهي منهارة..
يرن فودانها كلام رزان وهي تعبر عن فرحتها اللي حملت ببنت..
ناضت من مكانها وطلعت تليفونها من جيبها وهي تبكي وتقول:حيي عليا بكري شويه بس بعتتلي صور الحوايج اللي شرتهم شوف..شوف..ورتله الصور..
ومالك حاط يده ع فمه ودموعه تنزل متلاحقه..
نزلت يدها اللي فيها التليفون وقالت؛كيف ياربي كيف بيصير فيها وين تعرف يارب..
وحطت ايديها ع وجهها وقعدت تبكي بالصوت..
ومالك ناض وجاها خداها في حضنه وهو يدمع بألم ويفكر فيهم..خوه ومرته..
🍁🍁🍁🍁
ماشاء الله ع ولدي !!وصلت بيه يدير حركه زي هادي ويحشمني بش يرضي ست الحسن!
سعد:انتي اللي تجيبي فيه لروحك ياكفايه..حاطه راسك من راس مرته مش عارف شن غيرك عليها هكي شن اللي خلاك تكرهيها لهالدرجه!!
كفايه بإنفعال:ماحاطه راسي من راس حد..البنت هادي معجونه بعجينة امها زيها في كل شي اني ماكنتش نحسابها هكي لين ريت بعيني حقيقتها عاودت تاريخ امه وخلت ولدي يكرهني وخداته مني بعداته عن امه وخلاته يحاربها..
سعد بعدم استيعاب:اني مش قادر نستوعب اللي انتي فيه توا..تغيرتي لدرجة اني معاش وليت نعرفك..ولابالك توا بس بديت نعرفك..مش عارف والله ماعارف..
كفايه ضحكت بتهكم وعيونها معبيات دموع وقالت:لاعادي اني معاش نستغرب شي..بعد ولدي الكبير يدير فيا اللي داره شن بنراجي من غيره..
سعد هز راسه وهو معصب ويقول:اني نطلع..نطلع خبر مانلبز فالدوة..
ولف ومشي طول طلع من حداها..
كفايه بإنفعال:مازال عندك ماتقول!!مازال في غلط اكثر من هكي!! لا الباين اني ماكنتش نعرفك مش انت..
سمعت باب الحوش تصكر بالقوة..
خشت عليها نورهان وهي خايفه قالت:خيركم ماما!
كفايه بدموع:من نهار جبناها الشيطانه هديكا رينا خير..
نورهان:رزان!
كفايه بغضب ممزوج بالحقد قالت: عطيها سرطان..
ارتسمت ع وجه نورهان ملامح الكره..
كفايه مسحت بيدها ع شعرها رشفت وقالت:جيبيلي تليفوني هوينا ع الطاوله..
نورهان مشت للتليفون خداته ومشت بيه لأمها..
خداته امها بقوة..
وقعدت ادور ع رقمها لين لقاته واتصلت طول..
▪▪▪▪
حطت طاجين الدجاج فالكوشه وصكرتها..
والتفتت بضم الحوسه..
رن تليفونها..
مشت طول خداته من فوق التلاجه..
لما شافت المتصل خافت..
خدت نفس وفتحت الخط وردت..
رزان:ايوه عمتي..
كفايه بإنفعال:عمتي!!مازال تقولي عمتي ياحقيرة انتي بعد الحركة اللي درتيها!حسبي الله ونعم الوكيل فيك حسبي الله عليك يابنت سعيده..تلقيه وتتلقيه..
وصكرت في وجهها..
رزان قعدت حاطه التليفون ع وذنها وهي ترعش..
لحظات ونزلت يدها وقالت:الله يسامحك ياعماد..
وقفت ع رووس صباعها وردت التليفون وين ماكان..
والتفتت تكمل ضمان كوجينتها وهي تحاول تتناسى اللي صار وماتخربش ع روحها فرحتها..
🍃تعودت ع عمتها خلاص..خدت مناعه🍃
🍁🍁🍁🍁
في حوش عبدالسلام..
في دار النوم..
عبدالسلام:بنمشي الاربعاء ونروح الخميس..
نعيمه:امم باهي شن رايك ترفعني للبلاد نقعد في حوش ماليا لين تروح..
عبدالسلام :مافيش مشكله..شوفي دلال والصغار قبل..
نعيمه:باهي..
ومشت للباب فتحاته وطلعت من الدار وصكرتها وراها وخلت راجلها يبدل..
اما هي مشت طول للكوجينه اللي كانت فيها بنتها اطيب فالعشي..
وصلت فيها وخشت وهي تقول:دلال..
دلال وهي مقعمزة ع الكرسي وفيدها تليفونها؛نعم ماما..
نعيمه؛بوك قال بيسافر لتركيا يوم الاربعاء..
دلال برفعة حواجب:الله!
نعيمه:ايه واني قتله نبي نقعد فالبلاد الفترة هادي هو قال باهي غير نشوفكم انتم قبل..
دلال:اني الاربعاء والخميس ماعنديش والصغار ماعندهم شي كيف ماهما قالوا..
نعيمه:حتى مجد قالي عنده اختبار غدوة بس.
دلال:خلاص معناها..
نعيمه:باهي..شبحت للكوشه وقال:مازال؟
دلال:شويه بس واطيب الخبزة..
نعيمه هزت راسها بعدين مشت طلعت..
ودلال رجعت تشوف لتليفونها..
مخيمه في بروفايل عمار لازم تشوف كل شي فيه...
▪▪▪▪
"تعبير!"
عمار :ايه تعبير..
اسيا حطت يدها ع ذقنها وقالت:اني صف اول مانعرفش نكتب نعبير يابابا ياذكي!
هو حط يده ع ذقنه يقلد فيها ورفع حاجبه وقال:ومن قال انتي بتكتبيه يابنتي ياذكيه!
هي نزلت يدها وقالت:باهي كيف بابا؟
عمار نزل يده وقال بإبتسامة مكر:ياسكر قلبي انتي ماما المشدقه هي اللي بتكتبه..
اسيا رفعت حواجبها وقالت بتساؤل طفولي:كيف!!؟
عمار اشرلها بيده وهو يقول:هاتي ودنك نقولك..
حطت اسيا وذنها ع الشاشه..
عمار:هههههههههههه...
🍁🍁🍁🍁
حاطه يدها ع خده وهو محاوطها من خصرها ويكلم فيها..
ياسين:خلاص هدينا معاش نبكوا؟
رفقه ابتسمت من بين دموعها:لالا خلاص..غير رد بالك من روحك..
ياسين بإبتسامه:حاضر وحتى انتي راهو العلاج اللي تاخدي فيه لازم بمواعيد منظمه تاخديه ونفسيتك تقعد ديما مرتاحه..ok؟
رفقه بإبتسامه:ok
ياسين وهو يقلد فيها:اوكيي..
هي ضحكت...وهو باسها..وهي بادلاته..
لحظات وبعدوا عن بعض..
خدي الشنطه وشد يدها وهما طالعين من الدار قال:كان تبي تمشي لحوش اهلك بري..
رفقه:ايه بنقعد ليله هني وليله غادي..
ياسين:براحتك..
وصلوا فالباب..
ضمها بقوه وطبع قبله ع رقبتها...بعدين بعد وقال..هي سلام قلبي..
رفقه:في امان الله حبيبي..بالسلامه..
وقفت في الباب وراجاته لين نزل من الدروج..
بعدين صكرت الباب وخشت داخل وهي تمسح فدموعها..
🌴🌴🌴🌴
في حوش رمضان..
في الكوجينه..
غاليه؛طلبيات الشهر هدى واجده..
حميده؛ايه..بنعدي اني والهادي غدوة ناخدو المواد..
غاليه:كويس...
سكتوا شويه وهما يفكروا بعدين قالت حميده..
حميده:تعرفي لعند توا نفكر فحكاية زواج بلقيس..
غاليه تنهدت وقالت:والله حتى اني..كيف بيصير في اوسمه بس..!
حميده حركت راسها يمين ويسار بأسف..
فجأة سمعوا صوت خبطه ع باب برسيانة الكوجينه المسكرة فجعتهم..
غاليه بخلعه:هدى شنو!!
شويه وجي الجواب لما خش محمد زي الوحش للكوجينه وهو يقول:شن اللي تقولن فيه!!
شبحوله الزوز بخوف..
خبط بيده ع الباب وقال:تكلمن الزفت تكلمن..
غاليه بربكه:بنت عبدالمقصود..
محمد رفع حواجبه وهو قلبه يغلي من الغضب والغيرة..
حميده:امي اليوم قالتها..
محمد بحده:وشن قالت تاني !
غاليه:قالت..انهم خطبوها لكن مازال هي ماردت..
محمد قعد يمرر في نظره بيناتهم..
وهما يشبحوله..بعدين قالت حميده؛تندري عليها ولت تقرا ولا!؟
ضحك بسخريه وقال:ماصدقت هدي!
غاليه شبحت لحميده بغيظ..
وحميده تشوف لمحمد..
هو خبط الباب بقوة مرة تانيه ولف وطلع من الكوجينه..
شحت غاليه يد حميده وقالت؛ليش تقولي ولت لقرايتها!؟
حميده نفضت يدها وقالت بنرفزة:وين نندري عليه انه مايعلمش!
غاليه:بكل ياحميده انتي..ان شاء الله مايدير شي للمراة بس..
حميده؛ماعنده مايديرلها..ومشت طلعت من حداها..
وغاليه تأففت بعدين حركت راسها يمين ويسار..
🍁🍁🍁🍁
الساعه 9:45ليلا..
"خشي اسو"..
بعد اذنتلها امها تخش..
فتحت الباب وخشت عليها وفيدها كراسه.
شافتها مقعمزة ورا المكتب متاعها مشتلها طول..
وقفت حداها وقالت؛ماما في عندي واجب..
دلال بإستغراب:واجب شني!؟
اسيا:الأبله قالتلي ديري تعبير عن الأب..
ضيقت دلال عيونها وقالت:تعبير شني اللي يديروه صغار صف اول!!؟
اسيا:ماهو ياماما قالت انتم عبروا بالكلام لحد كبير وهو يكتب..
دلال رفعت حواجبها وقالت:اها..
اسيا مدت لأمها الكراسه وقالت:هي اكتبي ماما..
دلال خدت الكراسه وهي تشوفلها بشك حطتها ع الطاوله وخدت القلم وقالت:هي عبري ياللا بوها انتي..
ضحكت اسيا وقالت:احمم..بابا..راجل حلو هلبه..وبطل مافيش واحد زيه...بابا يحبني هلبه ومسميني سكر قلبي..
دلال:جديده هادي!
اسيا:غير كملي ماما..
دلال:ببباهي..
اسيا:ايه وبابا يحبنا هلبه..ويحب ماما هلبه هلبااااات..
دلال ابتسمت ووجهها ولى احمر..
اسيا:ومسميها الريمه المشدقه..
دلال فنصت وشبحتلها وقالت بعيطه:شن هيياااااا!!؟
اسيا:ايه ماما ديما يقولي كولي كويس بش تسمني وتولي كيف امك مشدقه..واول مايكلمني يقول..شن حال الريمه المشدقه..
ابتسمت دلال بخجل وسرحت بذكرياتها معاه..
《طبس باس راسها من جديد...وبعدين قعد يمسح ع شعرها:تغديتي باهي..
دلال :ايه الحمد لله....
عمار :كويس..اسمعي نبيك تاكلي زيدي اسمني بش يبانن شدوكك》
ضحكت بخجل..
اسيا:ماااما..
شبحتلها امها وقالت؛خيرك !
اسيا؛هيا كملي..
ضحكت دلال وقالت؛باهي وشن تاني..
آسيا:وبابا حبيبي يبينا نعيشوا معاه يقول..ماطايبه عليا..عقدت حواجبها وقالت..شن هي!؟ ماطايبه عليا....
رفعت عيونها فوق وهي تفكر..
وامها تضحك وخلاص..
اسيا :تس افف..شن هي ياربي؟!
رفعت دلال حاجبها وقالت:بري اسألي بابا وقوليله شن هي الكلمه اللي قلتها بعد ماطايبه عليا..
اسيا حركت سبابتها يمين ويسار بالنفي وقالت؛لالا لالا ماقالي شي..بابا ماقال شي اني بس ماما قلت..
ضحكت دلال وضمتها لحضنها..
واسيا حضنتها وقالت:ماقالي شي ماما..
دلال بضحكه؛باهي حبيبتي باهي مش بابا انتي قلتي..وقالت فسرها"سوسة الاصرار ع المحاوله مستحيل تخليها"💕
🍁🍁🍁🍁
وهالسوسه يادلال مش عند عمار بروحه...
ضو..مصر ع المحاوله..مش مفهوم ان كان عنادا او يأسا..
ولاهو مايبيش يستسلم بسرعه....
الحب اللي فقلبه عمره سنين مش فيوم وليله بيسلم فيه وينساه بالذات وانه دار ع خاطره هلبه..
🍁بس اللي عند مجدي هو امل...
امل كبير في الله انه يجعل ابتهاج من نصيبه بالذات بعد بدي يلاحظ عليها علامات ميول اتجاهه..
ومش عارف يصدقها ولايكذبها ويقول وهم..
🌼🌼🌼
راقدات الزوز مع بعض ع الارض في دار المعيشه..
ابتهاج راقده ع ظهرها..
ورفقه راقده ع جنبها الايسر وتشوفلها وتسمعلها..
ابتهاج؛نربينا مع بعض..ايه صح هو اكبر مني بعشره سنين..لكن تربيت معاه..هو هكي من يوم يومه..خدوم وطيب وحنين هلبه ودمه خفيف..ووالله يارفقه سنين عمري معاه ولا مرة حسيت تجاهه بشعور اخطى شعور الأخوة..
اني ماحبيت حد فحياتي غير بهاء الله يرحمه..
رفقه:الله يرحمه..
ابتهاج تنهدت وقالت:لكن توا مش عارفه شن جاني يارفقه مش فاهمه هكي من لاشي نظرتي ليه تغيرت معاش ولت زي قبل بكل..
رفقه بإبتسامه:كيف ولت؟
ابتهاج ضحكت بخجل وقالت:مش عارفه..بديت نحس بشعور حلو اتجاهه وين نشوفه نحسه..تبدلت ملامح وجهها للضيق وهي تقول..لكن مش عارفه علاش حاسه ان في عنده وحده اللي قاعد ماتزوجش لتوا...
رفقه:ههههههههه..
عقدت حواجبها بإستغراب وقالت:شن يضحك فيك..
رفقه بضحكه؛ياعبيطة العبيطات..انتي الوحده اللي عنده ولتوا ع خاطرها ماخداش..
توسعوا عيونها بدهشه وهي تشوفلها...وقلبها قعد يدق بقوة..
رفقه:معقوله لهالدرجه عميا يابوجه! اني ليا معاكم شهرين..
فشهرين بس عرفت ان مجدي ميت فيك يابنتي..
وابتهاج تسمعها وهي مذهوله...ومش مستوعبه اللي تسمع فيه...
🍁🍁🍁
وكذلك نور مازال مش مستوعبه اللي عرفاته..
هديكا الليله بابت تبكي فحضن راجلها...
تأثرت هلبه..ومن اللي يملك قلب حي ينبض ماياثرش فيه شي هدا!؟
وزياده ع هكي هي حامل...تخيلت لو كان هي فمكانها ماقدرتش تتحمل هالوجع حتى فعالم الخيال..
🍃ظناك اللي قاعد يكبر في داخلك يوم عن يوم..حبه في قلبك انزرع من لما عرفتي بوجوده فيك..يجيك حد فيوم ويقولك مش حيعيش..حيموت اول ماتولديه..ياااه مااقساه من شعور ع الأم..
يابال ام زي رزان تمنت يرزقها الله ببنيه..
ولما وصلت في تحقيق امنيتها..
كانت كسراب بقيعه يحسبه الظمأن ماء من شدة العطش🍃
🍁🍁🍁🍁
بس..
العداله الإلهيه..لازم ولابد تتحقق..توا ولابعدين..
دنيا ولا آخره لازم تتحقق..
وكل ساقي يسقى بما سقى...
🍃الساعه 2:00ليلا...
فدارها..
راقده بروحها....
راقده بعمق...
فجأه..
فتحت عيونها..وناضت قعمزت..
شيئا فشيئا ارتسمت ع وجهها ابتسامه...
بعدين ضحكت..
حطت يدها ع فمها وباستها ..
وكررت نفس الشي اكثر من مرة..
فجأة بطلت...
ناضت من مكانها ..
ومشت طلعت من الدار...
ومنها من الحوش...
مشت بإتجاه الدروج...
خشت تحتهم ..شحت شكارة الفحم خدت منهم فحمه بعدين مشت بيها للجنان قعدت ادور عليه..
وقفت في الخلفيه منه...
وجت للحيط وبدت تكتب..
كتبت ع الحيط كله...
بعدين فجأة وقفت..
لوحت الفحمه...
ومشت ولت من وين ماجت..
خشت للحوش..
وولت لدارها...خشت سريرها...وولت رقدت..كيف ماكانت راقده...
🍁🍁🍁🍁
تاني يوم..
جامعة طرابلس..
كليه العلوم..
الساعه 10:00صباحا..
عند كراسي المظلات..
راوند بضحكه:مليون مبروك رزونه وان شاء الله تجي طرفوشه لأمها..
رزان ضحكت وقالت:ان شاء الله..
فجأة سمعوا روشن من رواشن مكاتب قسم علم الحيوان اللي جنبهم انفتح..
شبحوله الزوز..
كان روشن سكرتيرة رئيس القسم..
فتحاته..وبان عليهم ضو واقف في المكتب ويكلم فيها..
رواند شبحت القدام وقالت:طول العطله عقلي وقلبي معاه..الراجل هدا مش عارفه شن دار فيا يارزان..
رزان شبحتلها بضيق بعدين شبحت القدام..
رواند:كان نلقى من يدلني كيف ندير معاه ولاكيف ننساه...بجد يارزان هدا بالذات اثر فيا هلبه..
رزان:انسيه..في عنده وحده يبيها...
شبحتلها راوند وقالت وهي مبتسمه بتهكم:دلال ولا؟..
رزان قعدت ساكته..
رجعت شبحت القدام وقالت:عارفه..عارفه يارزان..وياريت بعد عرفت قدرت نحوله من عقلي..
تنهدت رزان بحزن واحتفظت بصمتها..
اما رواند رجعت شافت للروشن..مالقت حد..
ابتسمت بسخريه ع حظها اللي مايبيش يتعدل..
🍁🍁🍁🍁
مقعمزة تفطر فالكوجينه..
فرده طن..مع طاسة حليب وشاهي..
فجأة خش عليها ولدها..
عامر:امي..ترا نوضي..
نادره بإستغراب:خيرك؟!..
عامر:غير نوصي يما نوضي بنوريك حاجه..
حطت اللي فيدها وناضت..
هو مشي بإتجاه باب الكوجينه الخارجي وهي لحقاته..
طلعوا برا...
خداها من يدها ومشي بيها مسافه وهي تقول:خير بلاك ياولد؟
عامر وصل للمكان المقصود وقف وقال:يام هدا شنو المكتوب ع الحيط!!
قعدت نادرة تشوف للحيط...
وهي مش فاهمه شي من المكتوب..
كله كان طلاسم وخربشات مش مفهومه بكل..
كيف جت بترد ع ولدها...
انتابها شعور شديد بالمغص في بطنها..
حطت يدها عليها وقعدت تتوجع بقوة..
عامر بخوف:يام ..خيرك يام!
فجأة...
بدت نادرة ترجع..
عامر بفجعه:ياام...!
بعد عنها والتفت شاف حواليه لقي سطل..
جابهولها يجري...
حطه تحتها...ونادرة ترجع بقوة..قريب اطلع احشائها...
🌴🌴🌴🌴
واقف ع الكاصه يشوف في الفلوس اللي فالدرج متاعها..
رن تليفونه..
قامه وشاف المتصل..
صكر الدرج واشر ع الولد اللي يخدم عنه يولي لمكانه..
وهو فتح الخط ومشي طلع برا المقهى..
عمر:هاه لميا..
لمياء وهي ترجف:بالله عليك تعالى ياعمر توا..
عمر بخوف:ليش شنو صار؟
لمياء:توا كلمني بوي ياعمر قالي امي تعبانه هلبه..
عمر:مفروض اطلعوها برا يالميا..
لمياء:باهي ياودي غير تعالى توا تربح..
عمر:باهي باهي هاني جاي..
صكر عليها..بعدين تأفف وولى للمقهى..
وصى اللي يخدموا عنده..بعدها مشي طلع لسيارته..
ركبتها وتحرك بإتجاه الحوش..
🍁🍁🍁🍁
في الجامعه..
كلية العلوم...
عطكن الهني يامتلفات..
حدهم بضحكه:ماتبي الا هكي القصقاصه هادي..
تغريد ضحكت وقالت:تعالوا نقعمزوا هنى..
بلقيس مشت تجري وهي تقول:اني في النص فالنص
وقعمزت..
وهما يضحكوا عليها..
جوها وقعمزوا حداها..
وحده ع يمينها والتانيه ع يسارها..
شويه وقالت حدهم:قولي بيسا شن صار فالموضوع اللي جاك..
بلقيس:طيرته..
تغريد:هدى تالت واحد..
بلقيس بضحكه؛تصدقن اني مستعجبه..لما كنت بنت العرسان اللي جوني كلهم ع بعضهم 4 بس بس..وتوا فتلات شهور جوني تلاته!!
ضحكوا البنات..
بلقيس:عن نفس مصكرة عليه الموضوع هدى بالطابيه السودا..تول نبي نقرا وناخد شهادتي ونربي بنتي وبسسسسس...
حدهم:احسن ماديري..
تغريد:راحه بال..
بلقيس ضحكت وغنت:انااااااااا..اعتزلت الغرام..
اعتزلت الغرااام...تنهدت ونزلت راسها وقالت..عطه دمدام هالغرام مادار فينا خير..
تغريد وحدهم شبحوا لبعض بعدين شبحوا القدام..
الزوز فنصوا عيونهم بصدمه...
هي قامت راسها وشافت لتغريد وقالت:شن مستعده تخشي للقفص المصدي.!؟
عقدت حواجبها بإستغراب..بعدين شبحت وين ماتشبح..
وياريتها ماشبحت...
هي كانت حاسبه حساب شي زي هدا من لما قررت ترجع لقرايتها..
وكانت تحساب روحها عادي جدا حتواجه الموقف هدا بدون ماتتحرك فيها شعره..
لكن توا..
كل شي فيها تحرك...
وقلبها بالذات...اللي صارت فيه الهوايل منين راه عن قرب..
من هديكا المرة معاش شافته..
كانت مظهره متغير هلبه..
لحيته كابره..شعره طول شويه..
كان لابس طاقيه ع راسه..وعيونه مدرقات بالنظارات..
كان حاط ايديه فجيوبه ويشبحلها..
بلعت ريقها...وناضت وقفت..
طاحت منها شطنتها اللي كانت ع حجرها..
طبست خدتها ومشت بسرعه وهي شادة دموعها ماتبيش تبكي..
والبنات ناضوا وراها طول...
هو ضم شواربه لداخل بضيق...
بعدين جاي بيمشي يلحقهم..شاف مراد جاي من بعيد..
تجنبا للمشاكل والفضايح..
لف ومشي بيطلع من الكليه رغما عنه...
~~~~~~~~~~~~~~~~~~~~~~~~~~~~~
