#العشق_المتمرد "عندما يزهر الليمون"
#جمان_فريد
الجزء 133 القسم الثالث...
⏳..
اني في حلم من احلامي اكيد..
اكيد مالا شنو...اكيد حلم من الأحلام اللي ديما نشوفه فيهم..
مستحيل اللي اني فيه توا يكون غير حلم..
مستحيل يكون حقيقه!
مستحيل يكون واقع!
مستحيل...مستحيل يكون عايش السنين هادي كلها ومايطلعش الا لتوا!!
مستحيل يخليني اني وصغاره السنين هادي كلها!!
ايه هدا حلم..
حلم...
حديث نفس..
اضغات احلام...
ايه..هكي..ايه..متأكده..
باهي نبي انوض منه..
علاش مش قادرة انوض..
علاش مافي حد فيقني...
ياربي نبي نفيق منه..ياربي فيقني..
ياربي نبيه حلم..
راضيه تخليه كابوس..
غير مايكونش حق اللي نشوف فيه يارب..
يارب..
🍃للأسف يادلال هالمرة مش زي المرات اللي فاتوا..
دلال..انتي هالمرة ماتحلميش..هالمرة اللي تشوفي فيه حقيقه واقعه تماما..
دلال اللي قدامك توا فعلا عمار
اللي قعدتي سنين تبكي عليه..قهر..حسرة..حزن..
وياما تأملتي وتأملتي ان حيجي يوم ويولي..لأن قلبك رفض تصديق انه مات اصلا..
بس...
علاش راجى السنين هادي كلها!؟علاش خلاك تعيشي عذاب كبير ماباش ينتهي!!؟علاش طلع توا !!؟🍃
دلال توا فعقلها قعد يدور سؤال واحد بعد تأكدت ان اللي شافاته حقيقه..يقين مافي مجال للشك خلاص...
السؤال هو..
هنت عليه اني وصغاره نعيشوا سنين طويله بعاد عليه ومحرومين منه!!!؟
السؤال هدا..
خلا دلال يجتاحها شعور بالغضب الشديد..غضب عمرها فحياتها ماحساته اتجاه حد..غيره هو توا...
نزلت ايديها الزوز لوطا..
تبدلت ملامح الصدمه وعدم الإستيعاب ع وجهها لملامح الغضب..لين احمر وجهها...
كورت قبضة ايديها الزوز بقوة..
رماته بنظرة قاسيه...
بعدين...
مشت وهي فقمه الغضب تجاه الباب..
اصيل شافله وهو يقول:مرت خالي..
بعدين التفت القدام ولحقها...
اما هو..
غمض عينه بأسف ونزل راسه لوطا وهو يبلع فريقه..
وعبدالسلام مازال واقف يشبحله لكن بنظرة خذلان وأسف..
🍃دلال..
فتحت باب الغرفه وطلعت بسرعه وهي تمشي بغضب..
مش عارفه وين تمشي..
المهم تمشي وخلاص..
كل ماتمشي كل مايجي بين عيونها هو...
اكثر شي ثبت فعقلها..
عينه اليسار المغطيه...
ورجله اليمين اللي واضح جدا من وقفته عليها انها مش طبيعيه..
ومنظر القيله اللي كان شادها بيده اليمين اثبتلها هالشي..
قلبها تقطع تقطيع..
حطت يدها عليه...ودموعها نزلوا وتبدلت ملامح وجهها للحزن..وقعدت تبكي بالصوت...
بعدين..
جي بين عيونها ابتسامته المميزة اللي كان مغطي التجاعيد اللي تصاحبها لحية سودا خفيفه غازيها الشيب...
ابتسمت غصبا عنها..وقلبها بدت نبضاته تتسارع💓..
بعدين..
جت قدامها نظرة عينه اللي تبان كلها شوق واعجاب شديد..
فكرت انها اكيد زادت احلوت مدام هو شبحلها بهالنظرة..
ضحكت مرغمه..
وقفت..
غمضت عيونها...
حطت يدها التانيه فنصها وقالت بهمس:توا بنفتح عيني نشوف سقف داري قدامي واني راقده فسريري..
بلعت ريقها..
خدت نفس عميق وقالت بهمس:
واحد..اتنين...تلاته..
فتحت عيونها..
لقت روحها واقفه في ممر الفندق نفسه...
فتحت عيونها ع وسعهم وقعدت تشوف حواليها بش تزيد تتأكد..
حطت ايديها ع وجهها وهي تقول:معقوله ياناس!!..
"مرت خالي"...
لما سمعت صوت اصيل..
سمعت بشن ناداها..
رجع انتابها شعور الغضب..
نزلت ايديها وشبحت ايسارها وقالت بعصبيه:معاش تقول مرت خالي..معاش تقولها..
اصيل قعد يشوفلها بصدمه..
دلال بعصبيه ودموعها ينزلوا:مازال نسمعك تقولها نعطيك كف نطيرك لخالك هدا...ضيقت عيونها وقالت...شن خطر عليه توا قولي اها..شن خطر عليه!!؟وبعدين تعالى جاي..انت من امتى تعرف؟!
اصيل:اقسم بالله ماعلمت كان من شهر بس..
دلال مسحت دموعها وقالت وهي تشوفله بنفس النظرة:قصدك حتى جدك وجداك وامك مايندروش!!؟
اصيل بتوتر:مافي حد يعلم...
دلال بصدمه اشرت ع نفسها وقالت:وجايبيني اني من غادي بش نعرف وهما اللي معاه فنفس البلاد مايعرفوش!!
اصيل بضيق ورجاء:عطيه فرصه يحكيلك ويشرحلك اللي صار معاه ..
دلال :ولا ربع فرصه..مانبي نسمع منه شي..تي يااصيل لو هو عام..ولاعامين ولاتلاته ممكن نعطيه فرصه ونسمعه لكن هادم سبعه سنين يااصيل سبعه سنين مافي حد منكم خافي عليه اللي ريته فيهم..ياريته صخف ع صغاره اللي عاشوا سنين وهما حاسين بالنقص من غيره..اللي ياما تمنوا لو كان موجود معاهم..في اول يوم يمشوا فيه المدرسه..لما ينجحوا...لما يجيبوا من المدرسه ورقة اجتماع مجلس الآباء وهما يتمنوا لو يعطوهاله هو بدال مايعطوهالي ولايعطوها لجدهم..حطت يدها اللي كانت ترجف ع عيونها وهي تبكي بصمت..
واصيل يشوفلها بألم..
خطم من بحداهم واحد شافلهم ومشي..
اصيل شافه كيف شبحلهم شافلها وقال:تعالي نتفاهموا داخل..
مسحت دموعها وقالت بحده :مانبي نتفاهم مع حد..
اصيل:يامرت خالي.....
قطعاته وقالت:معاش تقول مرت خالي قتلك..وخالك هدا برا قوله يولي من وين ماجي تعودنا ع قلته خلاص..
اصيل وجعه الكلام رد عليه بحده وقال:ماتقدري تحرميه من صغاره..
عقدت حواجبها وقالت:من اللي بيحرمه منهم!!؟يقدر يشوفهم امتى مايبي..هدا اذا تقبلوه اساسا!..
اصيل بإنزعاج:يامرت خالي راك تظلمي فيه..
دلال ضحكت بتهكم واشرت ع روحها وهي تقول:اني اللي ظلمته!!خبطت كفوفه فبعض وهي تضحك بسخريه وتحرك فراسها ايمين يسار...بعدين شبحتله وقالت:قول لبابا نراجي فيه لوطا..
اصيل:وين يامرت خالي اني حجزتلكم هنى!!
دلال عكرشت وجهها وقالت بسخريه:هني!!..تبدلت ملامح وجهها للحده وقالت..مستحيل نقعد معاه فمكان واحد..
ومشت من حدا اصيل..
اصيل بشي من العصبيه:يامرت خالي غلط هكي..
وقفت والتفتت وقالتله:قتلك معاش تقولي مرت خالي..
اصيل بعناد:مرته تبي ولاماتبي..
دلال ابتسمت بتهكم وقالت:خالك غاب عني 7سنين ع انه ميت..وغيابه هالمده شرعا طلعني من ذمته...يعني ماتجيش تقولي مرت خالي..
اصيل انصدم فاللي قالاته وماقدرش يرد عليها بكلمه..
🍁في نفس الوقت..
فالغرفه..
فتح عينه ورفع راسه وشاف لعبدالسلام لقاه يمرر فنظره ع رجله وعينه..
ابتسم بألم وقال: تصديق كذبة الموت اهون بواجد...
عبدالسلام شبحله من فوق لتحت وقال:فعلا..
"ياريتك ميت "..
قعد يشبحله بنظرة حاده ممزوجه بالألم...
وعبدالسلام شبحله بأسف..
بعدين مشي باتجاه الباب..
وصل فيه فتحه وطلع...
قعد يمشي بعصبيه وهو مش قادر يصدق اللي صار قبل شوي.
مسح بيده ع وجهه..بعدين حرك راسه يمين ويسار بأسف..
وصل في اخر الممر شاف اصيل واقف..
وقف عنده وقال:وينها..
اصيل بدون مايشوفله قال بضيق:قالت تراجي فيك لوطا..
عبدالسلام طول مشي من حداه بسرعه...
اصيل تنهد بضيق...
بعديم مشي وولى لغرفة خاله...
وين وصل فالباب فتحه وخش...
صكره ومشي داخل..
وين وصل في اخر الممر شاف خاله مازال واقف وسرحان يشبح فالفراغ...
اصيل:انت قلت بنواجه ونتحمل النتايج...
ابتسم بعدين شبحله وقال:ايه لأني متوقعهن....
اصيل:متأكد انهم حيسمعوك ويفهموا منك ويتفهموك..
هز راسه وهو مبتسم بعدين عقد حواجبه وقال:شن قالتلك؟..
اصيل ابتسم ع جنب وقال:ماخلت ماقالت اول مرة نشوفها فاصله هكي..لكن تعرف..عيونها كانن فرحانات..
ضحك عمار نص ضحكه وشبح جهة الروشن..
اصيل ابتسم وقال:اخرتها حتسمعك وتفهمك اني متأكد..
ابتسم عمار بضيق وقعد ساكت وهو يشوف للروشن..
اصيل:ايه حقه بنسألك..هي تو حق مش ع ذمتك؟!..
شبحله طول وقال:هي قالتها؟!
اصيل هز راسه وقال:ايه...صح كلامها!؟
عمار قعد يشوفله وهو متفاجأ ع الآخر...
قعد يفكر فدلال كيف ماراحش من بالها نهائي وواضح انها ماصدقتش موته لدرجة انها فكرت فتفصيل زي هدا واستفسرت عنه...
هني ادرك هو مدى صعوبة تفهمها لأسبابه اللي خلاته يبعد السنين هادي كلها..
وممكن مستحيل تقبل أعذاره مهما كانت..
حس بشي تجمع ع صدره وكتم انفاسه..
مشي طول بإتجاه الروشن..
واصيل يشوفله كيف يتحرك بالقيلا ورجله الصناعيه..
كل مايركز ع الشي يزيد قلبه يوجعه اكثر واكثر..
فتح الروشن وقعد ياخد فالنفس..
اصيل قدمله وقال:هدي راهي المواجهه الأولى..مازالك زوز تانيات اصعب ..
عمار شبحله وقال:مستعد نتحمل ردود افعالهم مهما كانت..لازم نتحملها بيش هما يعطوني فرصه ويسمعوني..
رجع شبح برا الروشن وقال:عديلهم ماتخليهم بكل..نا لو احتجتك تو نكلمك..
اصيل:حاضر...ماتبي شي توا؟..
عمار:تس..
اصيل شبحله شويه بعدين قال:تمام...السلام عليكم..ولف ومشي بيطلع من الغرفه..
شويه..
وسمع عمار الباب تصكر..
صكر الروشن...
بعدين تنهد..
وقعد واقف فمكانه يشبح القدام وفداخله حديث يدور بينه وبين نفسه...
🍃عمار...
بررلهم كيف ماتبي تبرر لروحك وتبيهم يفهموك..
هما ماعاشوا شي من اللي عشته ولايعلموا عن اللي مريت بيه..
لو تصرفوا معاك بقسوة فهدى من حبهم ليك...
ولو كنت مكانهم كانت ردة فعلك اقسى بواجد..
بس برغم هكي..
نتمنى من قلبي يعذروني..
يعذروا راجل..انكسر بدال المرة الألف..
راجل كان عايش عمر فالقمه وبين يوم ليله لقي روحه فالهاويه...
راجل فقد قيمه..فقد وطن..فقد حياة وهو قاعد يتنفس..
تغرب فبلاده مرة..
وتغرب برا منها مرة اخرى..
راجل كانت خبطة رجله ع الوطا تهزها من تحته..
توا راح بالسيف يحطها ع الوطا وبالسيف يرفعها وياريتها غير رجله حق...
راجل بعد كان يشوف الجارح فوسط السمي لايح بجناحه يقنص عليه يجيبه ع الوطا يامصروع ياينازع..
راح يشوف بعين وحده نظرها بالهون البعيد ماتوقه زين وباهي اللي قريب مازالت تشوف..
راجل عاش فالظلام سنين..
تحرم ع لسانه الكلام...يخاطب فغيره بالإشاره...
راجل...
ولا نقول بقايا إنسان...
متواري عن احبابه بيش مايشوف فعيونهم نظرة حزن عليه ولاشفقه..متواري عنهم بيش مايحس روحه راح عليهم عاله..
متواري عن عويلته بيش مايخافوا من شكله ولايشوفوه ناقص مش كيف ابهات اندادهم...
متواري عن حبيبه..مايبي يشوف عيونها يشبحوله كان بنظرة هايمة ومشتاقه...
مايبي ينقص قدره فعيونها ولو مثقال ذرة....
متواري عن وطن..
ولانقول بقايا وطن....كسرته هي كسرتي قهرته هي قهرتي غربته هي غربتي...وجرحه..هو جرحي..
لانقدر نداويه...ولاهو يقدر يداويني...
نفسي العزيزة أبت تخليني نعيش الذل بين هلي وناسي..
والحمدلله ربي كفاني الذل حتى فغربتي...
لكن..
اكتشفت تو اني كنت جبان كيف ماقال ولد اختي...جبان كبير.
ارتسمت ع وجهه ابتسامه وهو يذكر فأهم حدث صار فحياته بعد سنين طويله ماكانش حاسبله اي حساب ولاتوقع يصير معاه حتى فالخيال..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
10\3\2017
في احدى القرى المسلمه النائيه فدولة تنزانيا...
"Amary"
كان مقعمز ع كرسي لوح وسط ارض خضراء واسعه..
وفيده دفتر يكتب فيه..
لما سمع حد ينادي فيه بالأسم المتعارف عليه فهديكا القريه..
ابتسم..
وقام راسه وشبح القدام..
كانت في بنيه سمراء البشرة عمرها بين 12\13عام..
محجبه....برغم مظهرها البسيط الا انها كانت جميله جدا بضحكتها البريئة اللي وين يشوفها يرتاح..
كان جاياته تجري بدفتر رسم كبير فيدها..
وصلت فيه وقالت وهي داهشه باللغه العربيه الفصحى..
"اكملتها"..
هو ابتسم بلهفه وقال:ارني اياها..
البنت مدتله الكراسه اللي فيها الرسمه..
ارتسمت ع وجهه ملامح الذهول وهو يشوفلها..
وعينه تعبت بالدموع..قال بصوت هامس..
"ريمي الفالي"
البنيه بإستغراب سألت:جميله؟!
عمار شبحلها وقال؛جدا..
ابتسمت البنت بفرح بعدين قالت:حفظت سورة العلق..
عمار:واخيرا..
ضحكت البنت..
وهو ضحك...بعدين شدالدفتر متاعها مع دفتر الشعر بيده اليسار..
وباليمين شد القيله وناض وقف..
البنيه:حان وقت حلقة التحفيظ..
هز راسه وقعد يمشي والبنيه معاه...
قعدوا ساكتين بعدين قالت:جاء الكثير من الزوار بالأمس..جميعهم يريدون حفر آبار الماء..
ابتسم وقال:جميل..
البنيه؛ولكننا نريد غير ذلك..نريد المزيد من مصاحف القرآن..نريد مدارس..نريد مستشفى كبير..
عمار قعد يسمع فيها شن تقول ويفكر فكلامها..
في القرى هادي المسلمين مش لاقيين مصاحف يقروا فيها قرآن...
في منهم مش حافظين السور القصيرة من القرآن..
منهم ماكانش يصلي صح..
منهم مكانش يعرف حتى يتوضا صح..
برغم هدا كانوا حريصين جدا ع دينهم وفروضهم ويحاولوا يطبقوا اللي يعرفوه..
هو لما جي هني مع يعقوب اول مرة من 5سنين ماكانش فحالة نفسيه جيده..
كان فاقد القدرة ع النطق...
لسانه ماكانش راضي ينطق بغير احرف القرآن فصلاته...
كان يتواصل مع يعقوب عن طريق الكتابه..
طلب منه يبعده عن كل شي يذكره بالماضي...
ويعقوب رفيق دربه فالشده والغربه جابه لهالقريه مسلمه ونائية وبعيده عن اي شي يذكره بالحياة اللي يعرفها..
جابه..
وخداله حوش فيها..
وقعدوا فيها مع بعض...
كان يعقوب قائم بكل شي يخص عمار..
كان مسلمه عمار ادارة اعماله فالجزائر والإمارات وقعد يعقوب يحرك فالمشهد كله من بعيد...
كان يجمع فأخبار اهله فمصر وليبيا لكن قعد مايقارب العامين محتفظ بيهم لنفسه...
ابتعاد عمار نفعه..
ووجوده بين ناس طيبه وع الفطرة خلاه شيئا فشيئا يتعافى..
كان مرة مرة يعقوب يطلع فيه يدهور بيه فأرجاء القريه كان يحاول يطلعه من العزله اللي هو فيها..
وفعلا بدي يطلع من عزلته لما شاف حال الناس غادي..
حريصين بشده ع دينهم..لكن ماكانوش يعرفوه صح..
كانوا بأمس الحاجه لحد يعلمهم..
يروي عطشهم بمعرفه المزيد عن دينهم..
🍃اكثر مشهد ترسخ فذاكرة عمار وهزه بقوة من داخل..
هو رؤيته للناس فواحد من المساجد كيف حريصين ع الصلاة فوقتها فالمسجد..لكن مع الاسف ماكانوش يصلوا صح..
وبعد كملوا صلاتهم..
اللي يقعد منهم يتوجه لرف خشبي موجود فجدار المسجد..
فيه بضع من الصفحات لمصحف قديم جدا قسموه اهل القريه بين بعضهم بش يقروا فيه وللأسف كان صفحات مهتريه..
كانوا يحاولوا يقروا..
ومنهم يمرر عليه فالنظر حتى وان كان مايعرفش يقرا المهم ملا عيونه من كلمات الرحمن..
عمار وقتها حس اتجاههم بمسؤوليه كبيرة..
للحظه تخيل انه طالع فمهمه عسكريه بأمر عسكري من السلطات العليا لابد وانه ينفده ع اتم وجه..
لكن الواقع يقول ان مهمته هالمرة اسمى واعظم..والأمر جي من فوق سبع سماوات لاسلطه تعلو ع سلطته ولاأمر فوق امره..
وهدا اللي ينقال عنه تكريم وتكليف فعلا..
وعمار ادرك هالشي تماما...
🍃وبدي بتنفيد مهمته كان يحاول يتواصل معاهم بشتى الطرق لعند مالقاله يعقوب واحد يتقن اللغة العربيه..
عن طريقه بدي يعلم فيهم...
ومع الوقت تعلم حتى لغتهم بش تسهل عليه المهمه...
وسبحانه اعانه ويسرله امره وخلاه ينجح شويه شويه فمهمته...
وياكم فرح يعقوب بتغير حاله هدا...
لكن مع هكي اختار انه يسكت ومايجيبلاش سيرة ليبيا ومن فيها نهائيا....
🍁🍁🍁🍁🍁
قرر عمار يدير حلقة تحفيظ فالحوش اللي يسكن فيه..
كان يبي يعلم القرآن للأطفال الصبح..
والكبار بعد صلاة المغرب..
وطبعا طلب من يعقوب يجيبله كل شي ناقصه بش يعلمهم التعليم الصحيح..
واهم شي المصاحف لكن كانت مجزأة ع حسب اجزاء القرآن بش تساعدهم فالتعلم...
ماكانتش مهمه سهله..
وعمار رجل المهمات الصعبه..
كان يبذل فجهده معاهم..
ابرز صفة سيئة تغيرت عند عمار...هي ضيق البال..
يعني هو باله مش واسع وصعب فالتعامل..
واللي صار معاه ومخالطته لهالناس وانغماسه فتنفيد هالمهمه خلاه راجل باله اوسع منه مافيش..
وبدت اطباعه الحاده تغلبها اللطافه واللين ...
🍁بعد ماقضى شهر كامل وهو يدرس فيهم...
تحرك فداخله حنين قوي اتجاه اهله
وناسه..
تحديدا صغاره...
🍃كان مقعمز هو ويعقوب يتعشوا..
يعقوب بضحكه:والله وصار منها الحاجه رحيمه وتعلمت المبكبكه..
يدوب ابتسم عمار..
يعقوب ركز عليه وقال:زعيم...شنو في؟..
حط يده ع صدره بعدين خدي نفس وقال:الفترة هدي يخطروا عليا عويلتي واجد..امي باتي ..هلي..وسكت..
يعقوب حط الكاشيك وقال:ناوي تروح..
عمار بفزة:لالالا..مش هدى قصدي..بس نبي نعرف شن صار فيهم...
يعقوب:اممم..باهي بنقولك..
قعد يشبحله بعقدة حواجب..
يعقوب:ريت لما بعتني ليهم اخر مرة بيش نقوللهم اللي تبيهم يعرفوه..
عمار بقلة صبر:اختصر..
يعقوب بضحكه:حطيت ناس غادي تجيبلي فاخبارهم..
عمار بلهفه:شن عندك خبر!..
يعقوب بإبتسامه:جواد خش المدرسه..ومعمر التمهيدي واسيا دخلتها امها حضانه..
حط عمار يده ع فمه وهو يشوف ليعقوب بعين مليانه دموع..
يعقوب؛عندي ليهم صور..
شد روحه بقوة خاف ينهار ويبكي قدامه..
مسح بيده ع وجهه بعدين شبحله وقال:عندك تو..
يعقوب:ايه...
طلع تليفونه من جيبه...حطله ع الصور ومدهوله..
الصور كان واخدهم يعقوب من حساب دلال ع الفيس...
عمار ضحك والدموع من عينه تنزل رغم عنه وهو يقول:هدى جواد...ياالله!!كيف راح يالله!!
قعد يتملى من.الصورة يمسح فدموع عينه بعنف بش يشوف..
وقلب يعقوب موجوع عليه..
غير بعدين لصورة فيها معمر واسيا..
لما شافهم قال بحرقه وبصوت يدوب طالع:
ياااالله!...
غمض عينه بشده بعدين فتحها وقال:يارب عطيني الصبر يارب يارب...
يعقوب بألم؛انت ليش تعذب فروحك هكي..روحلهم ياراجل روح..
عمار بإنفعال:شن يديروا بيا كان روحت..شن يديروا بأب عاجز..وين يجي يرقد فالليل يفك رجله الصناعيه ويحطها فالشحن..ولامنظر عيني كيف تبيهم يشوفوني بيه..شبح للصورة وركز بنظره ع آسيا وقال..الملاك هدي كان شافتني مانعلم شن يصير فيها...مسح دموعه وقال...خليني بعيد...خليني بعيد خير ليا وليهم..
مدله التليفون..
خداه...
خدي القيلا وناض ومشي طلع من حداه...
🍃مع الوقت..
بدي عمار ياخد فاخبارهم منه اول بأول..
كان يفرح ويرتاح باله عليهم وكل ماله يتأكد ان بعده خير ليهم من قربه...
لعند مافي يوم...
🍃يعقوب:مستغرب فيك كيف ولامرة نشدتني عن زوجتك..
عمار شبح للنهر اللي كان مقابل حوشه بضيق وقعد ساكت..
يعقوب:كان قتلك ان في من خطبها..
شبحله طول بصدمه...
يعقوب:خيرك انصدمت!.شن متوقع يعني..
عمار بحده:قول اللي عندك طول..
يعقوب؛في من خطبها..وفي من يحوم عليها...
ارتسمت ع وجهه ملامح الغضب وعينه كانت تقدح شرار من الغيره..
يعقوب:هي ترد وتصد...
ارتخت ملامح وجهه...
يعقوب:فالجامعه يقولوا عنها المراة اللي رابطه ع راجلها سنين...
عمارابتسم ابتسامه جانبيه حلوة و رجع شبح للنهر...
يعقوب:مش طول العمر راهو...
تبدلت ملامح ابتسامته للحده وقال:يعقوب...لشن تبي توصل..
يعقوب:مادام سألت معناها تعرف..
قعد يشوف شويه للنهر..
بعدين خدي القيلا ومشاله..
ويعقوب يشوفله بأسف...
🍃كمل حياته طول هالسنين وهو معاهم ومش معاهم...
لعند مامرض يعقوب واشتد بيه المرض وعمار اجبره اجبار يمشي يعالج برا..
وهو رضخ لرغبته..لكن قبل يسافر خدي منه وعد انه يرفع معاه سره للقبر...
وللأسف سافر يعقوب ومعاش رجع تاني...
خبر موته فتح جرح جديد فقلب عمار المهتري من الجروح..
وحسسه بالغربه من اول وجديد...
حزن عليه بكل معنى الكلمه..
كان صديق حقيقي...عملة نادرة اللي زيه صعب يتكرر...
وقعد عمار فوحدته هادي...يفكر هلبه فحكاية الرجوع بس مش قادر ياخد خطوة خوفا من اللي حيصير معاه لو رجع...
الخوف...
للأسف الشديد...شي جديد خش عليه..ماكانش شخص يخاف من المواجهه ابدا كان مقدام وشجاع جدا...لكن اللي صار معاه واللي مر بيه بدل الشجاعه بالخوف..
بس مكانش خوف من الموت...
بل كان خوف من المزيد من الإنكسارات...
🍃🍃🍃🍃🍃🍃
رجوعا ليوم 10\3\2017...
هو معلم قرآن عربي من وين بالضبط مانعرف..بس كان يساعدنا وايد فالتواصل مع اهل هالقريه والقرى المجاورة..
اصيل :كويس يعني يقدر يوصلني اللي نبيه...
عضو احدى الجمعيات الخيريه قال:بإذن الله..تفضل وياي...
مشوا مع بعض لحوش الراجل المقصود..
اصيل:بصراحه لما جيت هني لقيت ان في مناطق ممتازة للإستثمار..
الراجل:ايه في وايد..
اصيل:ليا تو هنى قريب اسبوعين كنت مداير رحلة استطلاع باك نلقى مكان يعجبني..اهوا..تجارة مع الدنيا..وتجارة مع الله..
الراجل:عصفورين بحجر واحد..
ابتسم اصيل وقال:بالزبط..
الراجل:قربنا..
شاف اصيل القدام لقي حوش بسيط..
حواليه ارض خضراء...
ومقابله نهر.. مقعمزين قدامه الصغار ويشربوا..
ااصيل:المية صالحه للشرب؟!
الراجل:هو صناعي يعني البشر مسوينه شي بسيط...سواه الريال اللي قتلك عنه عشان طلاب حلقة التحفيظ اللي يرجع لبيته يعبي مويه يشيلها وهو راد من الحلقه..
اصيل؛تشوقت نشوفه..
ابتسم الراجل..
وين قربوا من الحوش قعدوا يسمعوا فصوت الطلاب يقروا جماعيا..
"اقرأ بإسم ربك الذي خلق¤خلق الإنسان من علق"..
وصلوا فم الباب اللي كان مفتوح..
الراجل بدي ينادي:استاذ Amary...
اصيل بضحكه؛كيف عربي وهدى اسمه؟.
الراجل بإبتسامه:معروف فالقريه بهالإسم..
اصيل:اها..
شبح اصيل للباب..
قعد يسمع فصوت خطوات غريبه وكأن الراجل يمشي بصعوبه..
اصيل:معاق؟..
الراجل:رجله مبتوره ومركب صناعيه..
اصيل بأسف:اها..
ركز بنظره ع الباب لما طلع الراجل..
شبحله عادي فالبدايه..
لكن..
لما شاف ان الراجل يشبحله بعينه الوحيده بصدمه...
توسعوا عيونه ع الآخر وقال بشي من اللعثمه:لا إله إلا الله...ياربي..لاإله..لاحول...يارب..
الراجل بإستغراب:عسى ماشر اخوي!!
بعدين شبح لعمار لقاه واقف جامد فمكانه وهو يشوف لأصيل..
واصيل حط ايديه ع راسه وهو يشوفله بعدم استيعاب....
🍃🍃🍃🍃🍃🍃🍃🍃🍃🍃🍃🍃🍃🍃🍃🍃
21\3\2017...
الساعه 4:00مساءا...
كان طالع من مكتبه وهو يتكلم بالتليفون بعصبيه..
مالك؛انتي وحده مريضه رسمي..
اسراء:ايه مريضه ومهبوله والله يامالك لو ماجيتش للعنوان اللي بعتهولك اقسم بالله نمشي لحوش بوك ونفضحك قدام عيلتك كلها..
مالك طلع للفيرندا وقال من ورا سنونه بغضب:يامريضه شن تبي شن تبي فأمي..
اسراء:تبي تعرف تعالى...يااني نديرلكم زياره فحوشكم ومش تهديد فاضي راهو...
غمض مالك عيونه بنفاذ صبر وقال:باهي..
اسراء ابتسمت بفرح وقالت:نتلاقوا بعد نص ساعه..ورد بالك تلعب بالنار...
مالك :باهي بري اقلبي وجهك..وصكر فوجهها وقال بغضب ..الله يلعني الله يلعني...
🍁🍁🍁
هي بعد ماصكر عليها...
طول خشت الرسايل وهي مبتسمه بمكر..وكتبت رساله وبعتتها..
لنور...
🍁🍁🍁🍁
فتح باب الحوش وخش..
صكره وراه برجله لأنه كان شاد فيده شكاير خضرة وفواكه..
مشي للكوجينه..
خشلها حطهم ع الطاوله..
بعدين مشي لدار النوم..
وين وصل فيها..
سمع مرته تتكلم بالتليفون وتقول...
رزان:نور هدي طلعت مراة حديديه........................والله لو كنت مكانها راهو متت من القهره.........بكل ماتقولش تعلم بكل تتصرف قدامها عادي جدا فالصاله..............ربي يكون فعونها وخلاص..
فجأة انجبد التليفون منها..
انخلعت والتفتت طول..
عماد بعصبيه صكر ع رفقه وقال:شكلك تحسابيني ندوي وخلاص يومها..تحسابيني نهدرز وخلاص..
رزان بخوف:فهمت غلط را......
عماد بغضب:انييي شن قلت..قووولي..تكلمي..
ناض ميلاد مخلوع وقعد يبكي..
رزان مشتله طول وهي ترعش ودموعها فعيونها..
عمادبغضب :كسرتي كلامي ودرتيها ولا...!واني كلامي وقلته....مراة تكسر كلامي معاش تلزمني...
رزان قعدت تشبحله بصدمه وهو طالع من الدار ويقول:مراة مفتنه معاش تلزمني...
ومشي طول طلع من الحوش بش يتصل نور ويحاول يتفاهم معاها...للأسف خوفه ع حوش خوه عماله عيونه وخلاه يتصرف تصرف بعيد كل البعد عن الحكمه🍃
...يتبع...
